بانسری کی آواز میں ہے مونا کے ہاتھوں کا کمال

مونا اپنی آنکھیں بند کیے ہوئے ہیں۔ ان کے ایک ہاتھ میں گرم لوہے کی ایک سلاخ ہے، جب کہ دوسرے ہاتھ میں بانس کی چھڑی کا ایک ٹکڑا ہے، جو اندر سے کھوکھلا ہے۔ آنکھوں کو یونہی بند کیے وہ اُس سلاخ سے بانس میں پہلے ایک سوراخ کرتی ہیں، پھر دوسرا، تیسرا۔ اس طرح وہ اس میں کل چھ سوراخ کرتی ہیں۔

اپنی آنکھوں کو کھولتے ہوئے وہ کہتی ہیں، ’’بانسری بنانے میں ہنر کی ضرورت ہوتی ہے اور زیادہ تعداد میں بنانے کے لیے رفتار کی۔‘‘ اس کے بعد وہ ہنستے ہوئے کہتی ہیں، ’’مرد یہ کام نہیں کر سکتے۔ یہ بہت مشکل ہے!‘‘

مونا (۳۵) کا تعلق اپنے خاندان میں بانسری بنانے والوں کی تیسری نسل سے ہے۔ وہ کہتی ہیں، ’’بانسری ایک معمولی لیکن پیچیدہ آلہ ہے۔ سوراخوں کے بغیر تو یہ بس بانس کا ایک ٹکڑا ہی ہے۔ لیکن اگر اس میں صحیح جگہ پر سوراخ کر دیے جائیں، تو اس سے تمام طرح کی دُھنیں نکلتی ہیں۔ یہ کانھا جی [بھگوان کرشن] کی نشانی ہے۔‘‘

وہ بغیر پلستر والے ایک کمرے کے بیچ میں بیٹھی ہوئی ہیں، جہاں ان کے بغل میں مٹی کا ایک چولہا کوئلے کی مدد سے جل رہا ہے۔ چھت پر بنے اس کمرے میں ایک ہی کھڑکی ہے، جہاں سے دھوپ چھن کر اندر آ رہی ہے؛ باہر آسمان میں چیلیں اڑ رہی ہیں۔

مونا پیلی بھیت میں رہتی ہیں، جو کہ اتر پردیش کے شمالی سرے پر واقع ایک قصبہ ہے۔ مونا جیسے بانسری بنانے والے کاریگروں کا کہنا ہے کہ وہ یہاں صدیوں سے رہتے چلے آئے ہیں۔ پورے ہندوستان میں بننے والی بانسریوں میں سے تقریباً ۹۰ فیصد، ہمالیہ کے دامن میں واقع اسی علاقہ میں بنائی جاتی ہیں۔ اس میں استعمال ہونے والا بانس (شیزو اسٹیچیوم) آسام سے منگایا جاتا ہے۔

مونا نے بانسری بنانے کا ہنر اپنی ماں سے سیکھا تھا۔ ’’جہاں تک مجھے یاد ہے، میں ہمیشہ سے بانسری بنتے ہوئے دیکھ رہی ہوں،‘‘ مونا کہتی ہیں۔ ’’جب میں بہت چھوٹی تھی، تو اپنی ماں کو آگ کے سامنے بیٹھ کر بانس میں سوراخ کرتے ہوئے دیکھتی تھی۔‘‘ اس چھوٹی سے لڑکی نے پہلے دوسروں کو سوراخ کرتے ہوئے دیکھ کر اور پھر خود سے مشق کرتے ہوئے اس ہنر کو سیکھا۔

ابھی صبح کے نو بجے ہیں، اور اپریل کے اس مہینہ میں ہوا بھی گرم چل رہی ہے۔ مونا چھت پر بنے اپنے ورکشاپ میں آتی ہیں اور تھوڑی ہی دیر میں پڑوس میں رہنے والی شبنم اور ان کی بھتیجی سونم بھی وہاں پہنچ جاتی ہیں؛ دونوں کی عمر بیس سال کے آس پاس ہے۔ دوپہر کے ۲ بجے تک، یہ تینوں مل کر ۵۰۰ بانسریاں بنا لیتی ہیں، جس سے مجموعی طور پر ان کی تقریباً ۳۰۰ روپے کی کمائی ہوتی ہے۔ اس طرح دیکھا جائے تو، سال بھر میں یہ تقریباً ۲ لاکھ بانسریاں بنا لیتی ہیں۔

اپنی زندگی میں اتنی تعداد میں بانسریاں بنانے کے باوجود، ’’میں نے کبھی بانسری بجانے کے بارے میں نہیں سوچا، کیوں کہ عورتیں یہ کام نہیں کرتیں۔ میرے شوہر بہت اچھا بجا لیتے ہیں، وہ جب بجاتے ہیں تو مجھے سن کر مزہ آتا ہے،‘‘ وہ پاری کو بتاتی ہیں۔

’’سوراخ کرتے وقت اگر ہم بہت کم یا بہت زیادہ زور لگائیں، تو بانس کا یہ ٹکڑا اندر سے پھٹ جائے گا، جس سے پوری بانسری ہی خراب ہو جائے گی،‘‘ ایک ٹوٹے ہوئے ٹکڑے کو دکھاتے ہوئے مونا کہتی ہیں۔

عورتیں اس کی سطح کو چکنا کرنے کے لیے آری، بلیڈ، چاقو جیسے تیز اوزار اور پھر ریگ مال (سینڈ پیپر) کا استعمال کرتی ہیں۔ مونا بتاتی ہیں کہ کیسے بانس کی چھڑی کو کاٹنے کے لیے آری کا استعمال کیا جاتا ہے؛ چھیلنے اور اسے صحیح شکل دینے کے لیے کیسے بلیڈ، چھینی اور چاقوؤں کا استعمال کیا جاتا ہے۔ اس کے بعد چاقو اور لوہے کی سلاخوں سے اس میں سوراخ کیا جاتا ہے۔

مونا بتاتی ہیں، ’’ہاتھوں کے کٹنے اور جلنے کا امکان ہمیشہ رہتا ہے۔ اگر زخم زیادہ گہرا ہو، تو اسے ٹھیک ہونے میں تقریباً ایک ہفتہ لگ سکتا ہے، جس کی وجہ سے یومیہ اجرت بھی چلی جاتی ہے۔‘‘

بانس کے ان ٹکڑوں سے بانسری کی شکل و صورت عطا کرنے کے لیے لمبے وقت تک دھوئیں میں کام کرنے سے بہت سے کاریگروں کو سانس لینے میں دقت ہونے لگتی ہے۔ مونا کہتی ہیں کہ ان کی آنکھوں کی روشنی اب کمزور پڑنے لگی ہے اور پیٹھ میں بھی ہمیشہ درد رہتا ہے۔ ’’آنکھیں کمزور ہونے کی وجہ سے میں اب سوئی میں دھاگہ بھی نہیں ڈال پاتی،‘‘ وہ مزید کہتی ہیں۔

مونا کا تعلق شیخ منصوری برادری سے ہے (جسے ریاست میں او بی سی کا درجہ حاصل ہے)۔ ’’پہلے یہ پیشہ صرف ہماری برادری کا ہوا کرتا تھا۔ لیکن اب، دوسری ذاتوں نے بھی اس ہنر سے پیسہ کمانا شروع کر دیا ہے،‘‘ وہ پاری کو بتاتی ہیں۔

مونا کا اندازہ ہے کہ اس کام میں شہر بھر کی تقریباً ۱۰۰-۱۵۰ عورتیں لگی ہوئی ہیں۔ یہ انتہائی اہم رول ہے، لیکن بانسریوں کی سپلائی اور فروخت پر ہول سیل کاروباریوں اور خوردہ فروشوں کا قبضہ ہے۔ وہی قیمتیں اور اجرت طے کرتے ہیں، اور پیلی بھیت کے بازار سے باہر، عموماً متھرا کے خریداروں سے سودا طے کرتے ہیں۔ یومیہ اجرت پر کام کرنے والے مزدور، جو اکثر مرد ہوتے ہیں، وہی بانس سے بانسری کے سائز کے ٹکڑے کاٹتے ہیں۔ ایک دن میں ایسے ۵۰۰ ٹکڑوں کو کاٹنے کے عوض انہیں تقریباً ۳۰۰-۳۵۰ روپے ملتے ہیں، جو کہ اتر پردیش میں نیم ہنرمند اور ہنرمند، دونوں قسم کے مزدوروں کی اجرت (۱۳ء۴۶۵ روپے اور ۵۲۱ روپے) سے کم ہے۔

مونا ایک دن میں جو تقریباً ۳۰۰ روپے کماتی ہیں، وہ رقم سونم اور شبنم کے ساتھ تقسیم ہو جاتی ہے، اس طرح انہیں طے شدہ کم از کم اجرت سے بھی کم کی کمائی ہوتی ہے۔

مونا دہاڑی مزدور کے طور پر ’کشکار‘ (ہول سیل کاروباری) کے ماتحت کام کرتی ہیں، جن کے پاس ضروری سرمایہ ہوتا ہے، جس سے وہ خام مال خریدتے ہیں، لوگوں کو کام پر رکھتے ہیں اور تیار بانسریوں کو پیلی بھیت کے بازاروں سے باہر بھیجتے ہیں۔ مونا کے شوہر، شکیل احمد کہتے ہیں، ’’کشکار کی بیویاں بانسری بنانے کا کام نہیں کرتیں، کیوں کہ انہیں اس کی ضرورت نہیں ہے۔ ان کے پاس اپنی فیملی کو چلانے کے لیے کافی پیسہ ہوتا ہے، اس لیے ان کی بیویوں کو کام کرنے کی ضرورت نہیں پڑتی۔‘‘

’’پانچ سال پہلے [۲۰۲۰]، مکمل بانسری بنانے کا خود کا اپنا کاروبار شروع کرنے کے لیے ہم نے [میرے شوہر اور میں نے] یونین بینک سے ۵۰ ہزار روپے کا لون (قرض) لیا تھا،‘‘ مونا اُداس لہجہ میں بتاتی ہیں۔ ’’ہم نے ۳-۴ لاکھ [روپے] کے بڑے لون لینے کا ارادہ کیا تھا، لیکن ہمیں لون دینے سے انکار کر دیا گیا۔‘‘

مونا جیسے کاریگروں کا کہنا ہے کہ انہیں مقامی فروشندوں سے آسامی بانس خریدنے پر کافی پیسے خرچ کرنے پڑتے ہیں، کیوں کہ وہ مہنگا بیچتے ہیں۔ ان کے داموں میں ہلکا فرق ہوتا ہے: ’’چھوٹے بانس [۱۰ انچ کے] پانچ سے ۱۰ روپے میں ملتے ہیں، جب کہ بڑے والے [۱۵ انچ کے] بیس روپے میں،‘‘ لمبائی کے حساب سے بانس کی قیمت کے بارے میں بتاتے ہوئے وہ کہتی ہیں۔

لیکن مونا کے ذریعہ بنائی گئی بانسری بازار میں ۵۰ روپے میں فروخت ہوتی ہے، جو اس کے سائز اور کوالٹی پر منحصر ہے۔ ان کے شوہر شکیل ہر مہینے امرتسر کا سفر کرتے ہیں، جہاں وہ مقامی میلوں میں گھوم گھوم کر بانسریاں بیچتے ہیں۔ لیکن یہ معمولی آمدنی ان کی مالی تنگی کو دور کرنے کے لیے کافی نہیں ہے۔ مجبوراً انہیں اپنی بانسریاں کم قیمت پر انہی کاروباریوں کو بیچنی پڑتی ہیں، جن سے انہوں نے بانس خریدے تھے۔ اس طرح، وہ قرض اور دوسروں پر انحصار کے چنگل سے باہر نہیں نکل پاتے۔ وہ آج بھی ۴ء۶ فیصد کی شرح سود پر لیا گیا قرض لوٹانے کے لیے ہر مہینے ۱۰۰۰ روپے ادا کر رہے ہیں، لیکن اپنے کاروبار میں ہونے والے خسارہ کی وجہ سے وہ اب تک قرض کی پوری رقم ادا نہیں کر پائے ہیں۔