मोना कइसे बांसुरी ला गावाथे

मोना के आंखी बंद हवय. एक हाथ मं वो ह तिपत राड ला धरे हवय, अऊ दूसर हाथ मं पोंडा बांस. खोली ह कुहरत हवय. आंखी अभू घलो बंद राखे, वो ह वो राड ले बांस मं एक ठन छेदा करथे – ओकर बाद दूसर, फिर तीसर. जम्मो मिलाके छै ठन छेदा.

अपन आंखी ला खोलत वो ह कहिथे, “बांसुरी बनाय बर हुनर चाही अऊ जियादा बंसुरी बनाय बर लउहा-लउहा करे ला परथे.” ओकर बाद वो ह हांसत कहिथे, “मरद लोगन मन ये काम नइ करे सकेंय. ये ह भारी मुस्किल काम आय!”

मोना (वोला इहिच नांव बलाय भाथे) तीसर पीढ़ी के बाँसुरी बनेइय्या आय. 35 बछर के मोना कहिथे, “बांसुरी सीधा-सादा आय, ओकर बाद घलो बनेच बारीक़ बाजा आय.बिन छेदा के ये ह बस एक ठन बांस के लकरी भर आय, फेर सही छेदा होय ले ये मं बनेच अकन धुन समा जाथे, ये ह कान्हा जी के चिन्हारी आय.”

वो ह बिन छवाय खोली के बीचों बीच, माटी के चूल्हा तीर बइठे हवय जेन मं कोयला बरत हवय. ये खोली के छानी मं बने एक ठन झरोखा ले सुरुज के उजेला आवत हवय: बहिर, अकास मं चील मन मंडरावत हवंय.

छेदा करे के बाद, मोना बांसुरी मन ला 500-500 के बंडल बांधथे, ओकर बाद बेचे बर भेजथे. मोना पीलीभीत मं रहिथे, जेन ह उत्तर प्रदेश के भंडार दिग मं बसे एक ठन कस्बा आय. मोना जइसने बांसुरी कारीगर मन के जरी सदियों ले इही जगा ले जुड़े हवय. हिमालय के तलहटी मं बसे ये कस्बा, देस (भारत) भर मं बनेइय्या बांसुरी उत्पादन के करीबन 90 फीसदी हिस्सा पूरा करथे. ये कारीगरी मं काम मं लाय बांस असम ले मंगाय जाथे.

“जब ले मोला सुरता हवय, मंय हमेसा बांसुरी बनत देखे हवं,” मोना कहिथे, जेन ह ये हुनर अपन महतारी ले सीखे रहिस. “जब मंय बनेच कम उमर के रहेंय, त अपन महतारी ला आगि के आगू बइठ के बांस मं छेदा करत देखत रहंव.” ये नानचिक नोनी ह देख के सिखिस, अऊ ओकर बाद छेदा करे के अभियास करिस.

बिहनिया के नौ बजे हवय, अप्रैल के ये घाम वाले दिन मं हवा थोकन तिपत हवय. मोना छत मं बने अपन काम करे के जगा मं जाथे, तुरतेच ओकर परोसिन शबनम अऊ ओकर भतीजी सोनम घलो उहाँ हबर जाथें: दूनों 20 बछर के उमर मं हवंय. मंझनिया 2 बजे तक ले, तीनों झिन मिलके 500 ठन बांसुरी के काम कर ले लेथें, जेकर ले वो मन ला कुल मिलके 300 रूपिया के कमई हो जाथे. ये हिसाब ले, बछर भर मं ये ह करीबन 2 लाख बांसुरी तक ले हबर जाथे.

अपन जिनगी मं अनगिनत बांसुरी बनाय के बाद घलो, वो ह पारी ला बताथे, “मंय असल मं कभू बांसुरी बजाय ला सोचेच नइ, काबर के माईलोगन मन नइ बजवंय. मोर घरवाला ह भारी सुग्घर बांसुरी बजाथे, मोला वोला सुने ला भारी भाथे.”

“गर छेदा बनावत हमन बनेच जियादा धन बनेच कम जोर लगाथन, त बांस ह भीतरी ले ओदर जाथे, जेकर ले वो ह खइता हो जाथे.” मोना एक ठन ओदरे बांस ला दिखावत समझाथे.

माईलोगन मन तेज धार वाले अऊजार - आरी, ब्लेड, ट्यूनर चाकू बउरथें, अऊ वोला रेगमल कागज ले चिकनाथें. मोना बताथे के बांस ला काटे बर आरी काम मं लाय जाथे. ओला छिले अऊ आकार मं लाय बर ब्लेड, छेनी अऊ चाकू काम मं लाय जाथे. छेदा करे बर ट्यूनर चाकू अऊ लोहा के राड कमा मं लाय जाथे.

मोना बताथे, “हाथ मन ला लगे धन जरे के बनेच जियादा डर लगे रहिथे. गर थोकन घलो जखम गहिर हो जाय त करीबन हफ्ता भर तक ले काम करे नइ सकाय अऊ रोजी मारे जाथे,

बनेच अकन कारीगर मन ला बांस ला सेंके के बखत निकरेइय्या कुहरा/ धूँआ ले सांस के बीमारी घलो हो जाथे. मोना कहिथे के बीते कुछक बछर मं ओकर आँखी के जोत कम होगे हवय अऊ पीठ घलो पिराथे. वोहा बतावत जाथे, “आँखी के अइसन हाल सेती अब मंय ह सुई मं धागा घलो नइ डारे सकंव.”

मोना शेख मंसूरी समाज ले आथे (जेन ला राज मं ओबीसी के रूप मं रखे गे हवय). वो ह पारी ला बताथे, “पहिली ये पेशा सिरिफ हमरेच समाज करत रहिस. फेर अब, दीगर जात के लोगन मन घलो ये हुनर ले कमाय सुरु कर दे हवंय.”

मोना के अंताज मुताबिक शहर भर मं करीबन 100-150 माईलोगन मन ये कारोबार मं लगे हवंय. ये मं वो मन के बड़े हाथ हवय, फेर बांसुरी के सप्लाई अऊ बिक्री थोक अऊ चिल्लर बेपारी मन के हाथ मं रहिथे. उहिच मन दाम अऊ मजूरी तय करथें, अऊ पीलीभीत के बजार के बहिर, अक्सर मथुरा मं, लेवाल मन ले सौदा करथें. रोज मजूरी करेइय्या मजूर - जेन मं अधिकतर मरद लोगन मन होथें- बांस ला तरासके बांसुरी बनाथें. वो मन ला 500 नग बनाय बर दिन भर मं 300-350 रूपिया मिलथे. ये रकम उत्तर प्रदेश मं आधा हुनर वाले अऊ पूरा हुनर वाले, दूनों किसम के मजूर मन बर तय न्यूनतम मज़दूरी ( 465.13 रूपिया अऊ 521 रूपिया) ले बनेच कम हवय.

मोना दिन भर मं जेन करीबन 300 रूपिया कमाथे, वोला सोनम अऊ शबनम के संग बाँटथे: ये किसम ले ओकर कमई न्यूनतम मज़दूरी ले बनेच कम हो जाथे’

मोना ‘काशकार’ (थोक बेपारी) मन बर रोजी मजूरी करथे. काशकार मन करा कच्चा माल बिसोय, मजूर मन ला काम मं राखे अऊ बांसुरी मन ला पीलीभीत ले बहिर के बजार मं बेचे बर जरूरी पूंजी होथे. मोना के घरवाला, शकील अहमद कहिथे, “काशकार मन के घरवाली मन बांसुरी बनाय के काम नइ करंय, काबर के वो मन ला ये करे के जरूरत नइ परय: वो मन करा अपन घरवाली मन ले बूता कराय बगेर अपन परिवार ला चलाय बर भरपूर साधन होथे.”

“पाँच बछर पहिली [2020] मं हमन [मोर घरवाला अऊ मंय] यूनियन बैंक ले 50,000 रूपिया लोन लेगे रहेन, ये आस रहिस के हमन पूरा बांसुरी बनाय के अपन नान कन कारोबार सुरु कर लेबो,” मोना सुरता करत बताथे: ओकर बोली मं जेन पहिली के उछाह रहिस, वो ह अब उदासी मं बदल गे रहिस. “हमर मन 3-4 लाख [रूपिया] तक के बड़े लोन लेय के रहिस, फेर गिरवी रखे बर कुछु नइ होय सेती हमन ला लोन देय ले मना कर दे गीस.”

मोना जइसने कारीगर मन के कहना आय के वो मन असम ले बांस बिसोय मं जियादा पइसा लगाथें, काबर के इहाँ के बेचेइय्या मन येकर जियादा पइसा लेथें. वो मन के मुनाफा बनेच कम होथे: “छोटे वाले [10 इंच] पाँच ले दस रुपिया मं बिकथे अऊ बड़े वाले [15 इंच] बीस रूपिया मं,” वो ह बांस के लंबाई के हिसाब ले ओकर दाम बतावत कहिथे.

फेर मोना के बांसुरी बजार मं करीबन 50 रूपिया मं बेचाथे, जेकर दाम ओकर आकार अऊ गुन के उपर रहिथे. ओकर घरवाला शकील हरेक महीना अमृतसर जाथे, जिहां मेला मन मं बांसुरी बेचथे. फेर ये अस्थिर आमदनी वो मन ला तंगी ले निकारे बर भरपूर नो हे. अऊ आखिर मं, वो मन बनाय बांसुरी मन ला उहिंचे के बेपारी मन ला कम दाम मं बेच देथें, जेकर ले वो मन बांस बिसोय रहिन. ये ह वो मन ला करजा अऊ दूसर के भरोसे रहे के चक्कर मं अरझा देथे. आज घलो, वो मन वो करजा के हरेक महिना 1,000 रूपिया चुकावत हवंय, जेन मं 6.4 फीसदी के हिसाब ले बियाज लगथे, फेर सरलग होवत नुकसान सेती वो मन अब तक ले अपन करजा चुकता करे नइ सके हवंय.

अनुवाद: निर्मल कुमार साहू