’میرا ووٹ کیسے کاٹا جا سکتا ہے؟‘

لاتیہرا ٹولہ میں سڑک کے دونوں جانب آدیواسیوں کے تقریباً دو درجن مکانات کھڑے ہیں۔ کچھ پختہ ہیں اور کچھ مٹی اور پھوس سے بنے ہوئے ہیں۔ ستمبر کی دوپہر ہے، بارش ابھی ابھی برس کر تھمی ہے اور آسمان تقریباً صاف ہے۔ چند ضعیف العمر خواتین گھروں کے سائے میں سڑک کنارے بیٹھی وقت گزاری کے لیے باتیں کر رہی ہیں۔

پھول منی کی خمیدہ کمر اور چہرے پر گہری ہوتی جھریاں ان کی عمر رسیدگی پر دلالت کر رہی ہیں۔ وہ چھڑی کے سہارے میری جانب بڑھتی ہیں۔ جب ہندوستان آزاد ہوا تو پھول منی کی عمر تین سال تھی۔ جموئی ضلع کے لاتیہرا ٹولہ سے تعلق رکھنے والی اس سنتھال آدیواسی خاتون کا نام ۲۱ سال کی عمر کے بعد سے ہمیشہ ووٹر لسٹ میں شامل رہا ہے، لیکن پچھلے مہینہ ان کا نام وہاں سے کاٹ دیا گیا تھا۔ تقریباً ۸۰ سال کی ہو چکیں پھول منی کو اب یہ فکر ستانے لگی ہے کہ ان کی باقی زندگی کیسے کٹے گی۔ انہیں ڈر ہے کہ اگر وہ ووٹ دینے سے قاصر رہتی ہیں تو سرکاری اسکیموں کا فائدہ نہیں اٹھا پائیں گی، جو ان کے لیے بہت ضروری ہے۔

دُبراتری گاؤں کے کَنار آدیواسی ٹولہ کے وشنو دیو ہنسدا کا نام بھی اہل ووٹروں کی فہرست سے حذف کر دیا گیا ہے۔ یہی معاملہ راجو کِسکُو اور پھول منی کے کنبے کے پانچ دیگر افراد کے ساتھ بھی ہوا ہے۔ یہ سب بوتھ نمبر ۱۴، اُتکرمِت مدھیہ ودیالیہ، کھِربھوجنا (مشرق) کے تحت آتے ہیں۔ یہاں ۵۰ نام کاٹ دیے گئے تھے۔ جب ان کی جانچ کی گئی تو معلوم ہوا کہ ان میں سے ۵۰ فیصد آدیواسی تھے۔ نظرثانی کے بعد حتمی فہرست میں اس بوتھ پر ۶۶۱ ووٹروں کے نام درج تھے۔

بہار میں خصوصی جامع نظر ثانی (ایس آئی آر) کا عمل جولائی ۲۰۲۵ میں شروع ہوا تھا، جس میں ’مردہ‘ اور ’منتقل‘ قرار دیتے ہوئے ۶۶ لاکھ سے زیادہ ووٹروں کے نام حذف کر دیے گئے تھے۔ پڑھیں: اپنی کہانیاں سناتے بہار کے ’مردہ‘ آدیواسی ووٹر

اس ریاست کی کل آبادی میں آدیواسیوں کا حصہ دو فیصد سے بھی کم ہے، لیکن یہ ان لوگوں میں شامل ہیں جن کے نام حالیہ انتخابات سے قبل کرائی جانے والی ایس آئی آر میں بہت زیادہ حذف کیے جا رہے ہیں۔ یہاں کے قبائلی اپنی کفالت کے لیے بنیادی طور پر قریبی پہاڑیوں سے حاصل ہونے والی معمولی جنگلاتی پیداوار پر منحصر ہیں۔ وہ دن بھر جنگل سے سوکھی لکڑیاں جمع کرتے ہیں اور شام کو قریبی بازار میں بیچتے ہیں، جس سے انہیں تقریباً ۱۵۰-۲۰۰ روپے کی آمدنی ہوتی ہے۔ اس کے علاوہ وہ کھیتوں میں، منریگا کے تحت اور جہاں بھی انہیں کام ملتا ہے یومیہ اجرت پر کام کرتے ہیں۔

اس صبح میری تفتیش کا نتیجہ یہ نکلا کہ ٹولہ (آدیواسی بستی) کے سبھی لوگ اپنا اپنا ووٹر شناختی کارڈ لانے کے لیے دوڑ گئے۔ میں نے انہیں اپنے اسمارٹ فون پر ووٹر لسٹ دکھائی۔ الیکشن کمیشن کے فارم-۶ (انتخابی فہرستوں میں ناموں کی شمولیت) کے لیے ایک ملٹی میڈیا فون کی ضرورت ہوتی ہے تاکہ فارم کو کامیابی کے ساتھ ڈاؤن لوڈ کیا جا سکے اور پھر مکمل شدہ فارم کو دیگر فارموں اور دستاویزات کے ساتھ اپ لوڈ کیا جا سکے۔

’’میں ایک بڑی اسکرین والا فون خریدنے کے لیے پیسے کہاں سے لاؤں گا؟ مجھے فون چلانا نہیں آتا،‘‘ راجو کہتے ہیں۔

ان میں سے کسی نے بھی چھان بین کے لیے بوتھ کا دورہ نہیں کیا تھا۔ پھول منی کی بہو مینا دیوی نے مجھے بتایا، ’’ہمیں اس کے بارے میں آپ سے معلوم ہوا ہے۔ کھِربھوجنا کے ایک اسکول میں واقع ہمارا بوتھ میرے گھر سے پانچ کلومیٹر دور ہے۔ وہاں جانے کا مطلب پورا دن ضائع کرنا اور کمائی کا نقصان کرنا ہے۔ ہم صرف نام دیکھنے کے لیے پورا دن ضائع نہیں کرسکتے،‘‘ راجو کہتے ہیں۔

’’میں پورے اعتماد کے ساتھ کہہ سکتا ہوں کہ ایک بھی آدیواسی پولنگ بوتھ پر یہ دیکھنے نہیں گیا کہ آیا اس کا نام ووٹر لسٹ میں ہے یا حذف کر دیا گیا ہے،‘‘ نند کشور ہیمبرم کہتے ہیں۔ وہ ایک۳۵ سالہ آدیواسی کارکن ہیں۔

میرے ارد گرد لوگوں کی تعداد بڑھتی جا رہی تھی اور میں نے اگلے تین گھنٹے اپنے فون پر لسٹ چیک کرنے میں گزارے۔ ہر حذف شدہ نام پر بے یقینی کا اظہار ہو رہا تھا اور ناانصافی کی صدا بلند ہو رہی تھی۔

’’اتنا دن سے نام ہے، اتنا دن سے بھوٹ (ووٹ) دیتے آئے ہیں، کیسے کٹ جائے گا؟‘‘ راجو کسکو (۵۱ سالہ) جھلاہٹ کے ساتھ کہتے ہیں؟

وشنو دیو کا نام لسٹ سے حذف کر دیا گیا تھا، ان کے معاملے میں گھر والوں نے دھاندلی کا الزام لگایا ہے۔ ان کی شادی مُنیا دیوی سے ہوئی ہے اور وہ ان کے ساتھ ان کے گاؤں دُبراتری میں مقیم ہیں کیونکہ مُنیا دیوی اپنے والدین کی اکلوتی اولاد ہیں۔

ان کے والد کے آٹھ بھائی تھے جن کے پاس تقریباً۱۶ بیگھہ [تقریباً ۱۰ ایکڑ] زمین تھی، لہٰذا دو بیگھہ [۲۴ء۱ ایکڑ] زمین مُنیا دیوی کے حصے میں آئی تھی، جس پر وہ اپنے شوہر کے ساتھ کھیتی کرتی تھیں۔ لیکن اکتوبر ۲۰۲۴ کے بعد سے منیا دیوی کے بھتیجوں نے انہیں کھیت جوتنے سے روک دیا ہے۔

ان کا ایک بھتیجہ بی ایل او ہے۔ مُنیا دیوی کا الزام ہے کہ زمین پر قبضہ کرنے کے لیے وشنو دیو کا نام ووٹر لسٹ سے ہٹا دیا گیا ہے۔

وشنو دیو کو معلوم ہے کہ ان کی شہریت خطرے میں پڑسکتی ہے، کیونکہ ان کا نام ووٹر لسٹ سے حذف کر دیا گیا ہے: ’’نام نہیں رہے گا تو یہاں رہنے نہیں دے گا؟ کیا کریں گے پھر…چلے جائیں گے کہیں،‘‘ وہ بے بسی ظاہر کرتے ہوئے کہتے ہیں؟

یہ حقیقت چند گھنٹوں میں ہی واضح ہو گئی تھی کہ بہت سے رہائشیوں کے نام حذف کر دیے گئے ہیں۔ شام تک لوگ مایوس اور پریشان ہو کر اپنے اپنے گھروں کو واپس لوٹ گئے تھے۔

لیکن غلط طریقے سے حق رائے دہی سے محروم آدیواسیوں کی خبر بلاک ہیڈ کوارٹر تک پہنچ گئی۔ خوش آئند بات یہ رہی کہ کچھ دنوں بعد بوتھ لیول آفیسرز (بی ایل او) جائے وقوعہ پر پہنچے اور تمام حذف شدہ ناموں کو ووٹر لسٹ میں دوبارہ شامل کر لیا۔

’’صبح تقریباً ۱۱ بجے کا وقت تھا، جب دو لوگ ایک کمپیوٹر [ٹیبلیٹ] لے کر آئے اور ہم سے اپنے ووٹر کارڈ دکھانے کو کہا۔ انہوں نے ہمیں بتایا کہ ایس آئی آر کے عمل میں جو نام حذف کیے گئے ہیں وہ واپس شامل کر دیے جائیں گے،‘‘ پھول منی کے چھوٹے بیٹے جَھری لال کِسکو نے مجھے فون پر بتایا۔

بی ایل او نے رہائشی آدیواسیوں سے گنتی کے لیےدستخط شدہ فارم ۶ حاصل کیا، اور ان کے آدھار کارڈ اور ووٹر کارڈ کی تفصیلات طلب کیں۔ ’’وہ ایک گھنٹہ تک ٹولہ میں رہے،‘‘ جَھری لال کہتے ہیں۔

دلچسپ بات یہ ہے کہ حتمی فہرست جاری ہونے کے بعد بی ایل او کا کام ختم ہو گیا تھا۔ نام درست کرنے کے لیے ان کا آنا ایس آئی آر کے عمل میں شامل نہیں تھا۔ مقامی لوگوں کا کہنا ہے کہ یہ اس بات کا ثبوت ہے کہ خبروں کا اثر ہوا تھا اور سیاسی جماعتیں نوٹس لے رہی تھیں۔

اس کے بعد ۱۰ نومبر کو ووٹنگ کے دن جھری لال اور دیگر آدیواسیوں نے ووٹ ڈالا۔ ’’ہم خوش تھے کہ ہمارے نام شامل کر دیے گئے ہیں، ورنہ ہمیں اپنی شناخت ثابت کرنے میں مشکل پیش آتی۔‘‘

بہار اسمبلی انتخابات کے نتائج کا اعلان ۱۴ نومبر ۲۰۲۵ کو ہوا، جس میں بھارتیہ جنتا پارٹی (بی جے پی) اور جنتا دل (یونائیٹڈ) کی قیادت والے قومی جمہوری محاذ (این ڈی اے) نے ۲۴۳ میں سے ۲۰۲ سیٹیں جیت کر زبردست کامیابی حاصل کی۔ حزب اختلاف مہاگٹھ بندھن (عظیم اتحاد) نے بدترین کارکردگی کا مظاہرہ کیا، اور صرف ۳۵ سیٹیں جیتنے میں کامیاب رہا۔

اس گاؤں کے آدیواسیوں کو رائے دہی کا حق انتخابات سے کچھ دن پہلے دوبارہ ملا، اور انہیں ووٹ دینے کی اجازت دے دی گئی۔ اس سے انہیں ریاستی اسکیموں سے فائدہ اٹھانے کی ان کی اہلیت بھی بحال ہو گئی۔

لیکن وہ بدستور پریشان ہیں کہ یہ کیوں اور کیسے ہوا، اور انہیں اپنے آبائی گھروں سے ’منتقل‘ کیوں دکھایا گیا۔

’’ہمارے آباء و اجداد اسی گاؤں میں رہتے تھے، ہم بھی صرف یہیں رہے ہیں،‘‘ الیکشن کمیشن آف انڈیا کی طرف سے اپنا نام کاٹے جانے کی وجہ پر سوال اٹھاتے ہوئے پھول منی کے بڑے بیٹے کہتے ہیں۔ ’’ہم نے کبھی پیسہ کمانے کے لیے ہجرت نہیں کی۔ ہم گھر پر ہی رہتے ہیں۔ ہم صرف جنگل سے لکڑیاں لانے اور انہیں فروخت کرنے کے لیے باہر نکلتے ہیں،‘‘ وہ مزید کہتے ہیں۔ جھری لال ایک ٹرین میں ٹکٹ کلکٹر کے معاون کے طور پر کام کرتے ہیں، جس کے لیے انہیں ۵۰۰۰ روپے ماہانہ ملتے ہیں۔ ’’میں ٹرین میں سفر کرتا ہوں اور بغیر ٹکٹ کے سفر کرنے والوں کو پکڑتا ہوں۔‘‘

پھول منی دیوی آنند پور گاؤں کے لاتیہرا ٹولہ میں اس وقت سے آباد ہیں جب نصف صدی قبل اس گاؤں میں ان کی شادی ہوئی تھی۔ وہ ایک سنتھال آدیواسی ہیں۔ انہوں نے اپنے دن اپنے چار بچوں کی پرورش کرنے، قریبی جنگل سے لکڑیاں اور مہوا جمع کرنے، اور چند ایکڑ کی مشترکہ خاندانی زمین (جو ان کے شوہر اور ان کے بھائیوں کی ملکیت ہے) پر کام کر نے میں گزارے ہیں۔ ان کا کنبہ عموماً اپنے استعمال کے لیے چاول اگاتا ہے۔ اب جب کہ ان کے دو بیٹے اور ایک بیٹی جوان ہو چکے ہیں، وہ تھوڑا آرام کرسکتی ہیں۔

ان کا نام جب ووٹر لسٹ سے حذف کر دیا گیا، تو وہ پریشان ہو گئیں: ’’اگر میں ووٹ نہیں دے سکتی تو حکومت سے کیسے فوائد مانگوں گی؟‘‘ جب ان کا نام ووٹر لسٹ میں دوبارہ شامل ہو گیا تو انہیں نے اپنا ووٹ ڈالنے کا ارادہ کیا، لیکن پانچ کلومیٹر کا فاصلہ طے کرنا ان کے لیے مشکل تھا۔ ’’مجھے برا لگا کہ میں ووٹ نہیں دے سکی،‘‘ وہ کہتی ہیں۔

ابتدائی طور پر، ’منتقل‘ شدہ بتا کر راجو کا نام حذف کر دیا گیا تھا۔ ’’آپ لوگ کیسے کہہ سکتے ہیں کہ ہم کہیں اور رہتے ہیں؟ ہم یہاں برسوں سے رہ رہے ہیں۔ میں بالکل آپ کے سامنے کھڑا ہوں،‘‘ انہوں نے اس رپورٹر سے کہا تھا۔

ان کی بیوی مُسنی دیوی کی ایک سال قبل زچگی کے دوران موت واقع ہو گئی تھی۔ ان کے سات بچے (تین بیٹے اور چار بیٹیاں) ہیں جن کی عمر ۱۰ سے ۲۸ سال کے درمیان ہے۔ دو شادی شدہ ہیں اور پانچ ان کی دیکھ ریکھ میں ہیں۔

راجو جنگل سے سوکھی لکڑیاں لاکر فروخت کرتے اور اپنے کنبے کی کفالت کرتے ہیں۔ ’’ایک کھیپ لکڑی لانے میں پورا دن صرف ہو جاتا ہے۔ جب ہم اسے بازار میں فروخت کرتے ہیں تو ہمیں ۲۰۰ روپے ملتے ہیں،‘‘ وہ کہتے ہیں۔ اس کے علاوہ برسات کے موسم میں محکمہ جنگلات کی جانب سے شجرکاری کے لیے ۴۰۰ روپے یومیہ دیے جاتے ہیں، لیکن یہ کام باقاعدہ نہیں ہے۔ وہ حکومت سے خوش نہیں ہیں۔

’’سرکار سے کوئی فائدہ نہیں مل رہا۔ سب اپنا جیب ہی بھر لیتا ہے،‘‘ وہ پاری کو بتاتے ہیں۔

آدیواسی کارکن ہیمبرم کہتے ہیں، ’’بی ایل او نے شرارت کی ہے۔‘‘ وہ آدیواسی سماجک ایوم سانسکرتک وکاس سمیتی کے سکریٹری ہیں، جو ایک غیر منافع بخش ثقافتی تنظیم ہے۔ ’’میں نے اپنی پنچایت میں دیکھا کہ حذف کیے گئے زیادہ تر نام آدیواسیوں اور دلتوں کے ہیں،‘‘ سرکاری ملازمت کے لیے تیاری کر رہے ریاضی اور تاریخ کے گریجویٹ ہیمبرم کہتے ہیں۔

کارکنوں کا کہنا ہے کہ ’دراندازوں کو باہرکرنے‘ اور ’شہریت کا ثبوت مانگنے‘ کا کام الیکشن کمیشن کا نہیں ہے۔ ’’ای سی (الیکشن کمیشن) کو نااہل ووٹروں کو ووٹ ڈالنے سے روکنے کا حق حاصل ہے، لیکن اسے کسی شہری کی شہریت کا پتہ لگانے کا کوئی حق نہیں ہے۔ ای سی آئی (الیکشن کمیشن آف انڈیا) نے اپنے دائرہ اختیار کی خلاف ورزی کی ہے اور لوگوں سے کہا کہ وہ اپنی شہریت ثابت کریں اور سپریم کورٹ اسے ایسا کرنے دے،‘‘ ٹاٹا انسٹی ٹیوٹ آف سوشل سائنسز میں سوشل ورک کے سابق پروفیسر پشپیندر کہتے ہیں۔

انہوں نے مزید کہا کہ ای سی آئی کے ذریعہ آدیواسیوں کو دبانے کی کوشش کی جا رہی ہے۔ انہیں پہلے سے ہی ایس آئی آر جیسے مکمل طور پر مبہم عمل سے گزرنے اور اس کے لیے مطلوبہ دستاویزات حاصل کرنے میں دشواری کا سامنا ہے۔ ’’وہ حاشیہ پر رہتے ہیں، اور ایس آئی آر نے ووٹر لسٹ سے بہت سے آدیواسیوں کے نام حذف کر کے ان کا سیاسی اخراج کیا ہے،‘‘ پشپیندر کہتے ہیں۔

سنتھال آدیواسی، راجو کِسکو بہت سے ووٹروں کے لیے بات کرتے ہیں جب وہ کہتے ہیں: ’’جب الیکشن ہوں گے، تو ہر کوئی آئے گا اور آپ کے پاؤں چھوئے گا۔ الیکشن کے دوران چاپلوس آپ سے درخواست کریں گے کہ اس شخص کو ووٹ دیں، اس شخص کو ووٹ دیں۔ ایک ووٹ کی قدر ہوتی ہے۔ اس سے جیت یا ہار کا فیصلہ ہو سکتا ہے۔‘‘

ایس آئی آر کی مہم اور اس کے بعد نام حذف کیے جانے سے بہار میں آدیواسی برادری کو صدمہ پہنچا ہے، جو پہلے ہی اپنے واجبات اور زمین کے حقوق حاصل کرنے کے لیے جدوجہد کر رہی تھی۔ پڑھیں: زمین کے لیے پورنیہ کے سنتھالوں کی جدوجہد

جھارکھنڈ میں آدیواسی انتخابی لحاظ سے اہم ہیں، لیکن بہار میں ریاستی حکومت کے ذریعہ ۲۰۲۲-۲۰۲۳ کے ذات پر مبنی سروے کے مطابق یہاں آدیواسیوں کی آبادی محض ۲۱ لاکھ ۹۹ ہزار ہے۔ اور وہ مختلف حلقوں میں بکھرے ہوئے ہیں اور ان کے ووٹ کی اتنی اہمیت نہیں ہے۔

حق رائے دہی کے واضح نقصان کے علاوہ ریاستی اسکیموں تک رسائی بھی انہیں پریشان کرتی ہے۔ پھول منی دیوی کو بڑھاپا پنشن کے طور پر ۴۰۰ روپے ملتے ہیں، جسے بہار حکومت نے حال ہی میں بڑھا کر ۱۱۰۰ روپے کر دیا ہے۔

میں ان سے پوچھتا ہوں کہ وہ پنشن کی رقم کا کیا کرتی ہیں۔ اس سے پہلے کہ وہ جواب دیتیں، ان کے دو پوتے (جن کی عمر تین سے چار سال کے درمیان ہے) ان کے پاس آ کر پیسے مانگتے ہیں۔ وہ اپنی ساڑی کا ایک کونا کھولتی ہیں، اور ۱۰ روپے کے دو سکّے دونوں بچوں کے ہاتھوں میں رکھ دیتی ہیں۔ اس کے بعد وہ میری طرف متوجہ ہوتی ہیں اور بہار کے مگدھ علاقے میں بولی جانے والی زبان مگہی میں ہنستے ہوئے کہتی ہیں، ’’دیکھلہو نا! ایہی میں کھرچ ہو جاہئی [آپ نے دیکھا! پنشن کی رقم یہیں جاتی ہے]۔"

پھول منی کو ہمیشہ سے ہی چائے پینے کا شوق رہا ہے۔ وہ بتاتی ہیں کہ وہ جھارکھنڈ (سال ۲۰۰۰ میں بہار سے الگ ہوئی ریاست) کے دیوگھر ضلع کے بیدیہ ناتھ میں ساون کے دوران (مانسون کے موسم کے ابتدائی مہینوں میں سے ایک) شیو مندر میں پوجا کرنے کے لیے کبھی ۱۲۵ کلومیٹر پیدل چل کر جا سکتی تھیں۔

’’میں بغیر چپلوں کے بیدیہ ناتھ مندر تک پیدل چل کر جاتی تھی۔ میرے ساتھ آنے والی خواتین تھک جاتیں اور اپنا سامان نہیں اٹھا پاتی تھیں، اس لیے میں ان کا سامان لے کر چلتی تھی،‘‘ وہ یاد کرتی ہیں، ’’میں صرف چائے پی کر اتنا لمبا سفر پیدل طے کرتی تھی۔ چائے سے مجھے توانائی ملتی تھی۔‘‘

ان کی پنشن دن میں دو کپ چائے پر خرچ ہوتی ہے۔ جب ان کا نام ووٹر لسٹ سے حذف کر دیا گیا تو انہوں نے اس رپورٹر سے پوچھا: ’’کیا میری پنشن روک دی جائے گی؟ پھر میں چائے کیسے پیوں گی؟‘‘

یہ اسٹوری تکشیلا پاری سینئر فیلوشپ ۲۰۲۵ کے تحت شائع ہوئی ہے۔

ترجمہ نگار: شفیق عالم