આ જગ્યા જૂની પણ છે અને નવી પણ છે. પ્રાચીન પણ છે અને સમકાલીન પણ છે. તે ઐતિહાસિક રીતે ખૂબ મહત્ત્વનું છે, છતાં ખૂબ આધુનિક સુસંગતતા ધરાવે છે. પુઢુ મંડપમ જાણે કે મદુરાઈનું એક નાનકડું સ્વરૂપ છે. આ 384 વર્ષ જૂની ઐતિહાસિક ઇમારતમાં એક શોપિંગ કોમ્પ્લેક્સ પણ આવેલું છે. તે આ પ્રાચીન શહેરના સારને એવી રીતે વ્યક્ત કરે છે જે શહેરનો અન્ય કોઈ ભાગ કરી શકતો નથી. ચમકદાર, ભડકીલા કાપડ પર કામ કરતા દરજીઓથી લઈને, પરંપરાગત વાસણો વેચતી દુકાનો સુધી, આ જગ્યા અનેક રંગોથી શોભે છે.
આ એ જગ્યા છે જ્યાં તમિલનાડુના સૌથી મહત્ત્વપૂર્ણ હિંદુ મંદિરોના ઉત્સવોમાંના એક ઉત્સવ માટે ઉમટી પડતા ભક્તો માટે પોશાકો સીવવામાં આવે છે. અને અહીંના 150 દરજીઓમાંથી ત્રીજા ભાગથી વધુ મુસ્લિમ છે. તેઓ જે પોશાકો બનાવે છે તે પહેરનારા શ્રદ્ધાળુઓ મોટાભાગે મદુરાઈની આસપાસના ગ્રામીણ વિસ્તારોના હિંદુઓ હોય છે.
આ દરજીઓને તેઓ મુસ્લિમ હોવા છતાં હિંદુ તહેવાર માટે પોશાક સીવવા વિશે પૂછો, તો તેઓ આ વાતને ખાસ ગણકારતા નથી. આમિર જ્હૉન કહે છે, “મેડમ, આ ઉત્તર ભારત નથી. અમે પેઢીઓથી સાથે રહીએ છીએ અને એકબીજાને સગા-સંબંધીઓની જેમ સંબોધીએ છીએ. અહીં કશું ખોટું કેવી રીતે થઈ શકે?”
પુઢુ મંડપમના બીજા દરજી, 42 વર્ષીય મુબારક અલી પૂછે છે, “એમાં આટલું આશ્ચર્ય પામવા જેવું શું છે? અમે પેઢીઓથી આ જ કામ કરતા આવ્યા છીએ.”
