گڈگے ’مہاراج‘ اور ان کے یوٹیوب کا کرشمہ

یہ اسٹوری پارتھ ایم این کی اُس سیریز کا حصہ ہے جسے پُلٹزر سینٹر کا تعاون حاصل ہے۔

امول کھانڈیکر کو ان کے چچیرے بھائی کے ذریعہ بھیجے گئے یوٹیوب چینل کے ایک معمولی لنک کی قیمت اپنی ماہانہ آمدنی سے دوگنی سے بھی زیادہ رقم سے ادا کرنی پڑی۔ اور یہ کوئی فشنگ (آن لائن دھوکہ دہی) کا معاملہ بھی نہیں تھا۔

اپنی آمدنی سے بمشکل تمام گزر بسر کرنے والے اس ۳۵ سالہ مزدور نے اس لنک کو دیکھا اور صبح کی بس پکڑ لی۔ ان کے ہمراہ ان کا ۱۱ سالہ بیٹا تھا، جس کے سر میں ایک گانٹھ کی تشخیص ہوئی تھی، اور ایک بیمار ماں تھیں جو جوڑوں کے عارضہ میں مبتلا تھیں۔ اسٹیٹ ٹرانسپورٹ کی ایک خستہ حال بس میں نو گھنٹے کے اس سفر کی وجہ سے ان کے گھٹنوں میں مزید جکڑن پیدا ہو گئی تھی، لیکن یہ سفر رائیگاں نہیں جانے والا تھا۔ امول کے چچیرے بھائی نے انہیں یقین دلایا تھا کہ ان کی صحت سے متعلق تمام مسائل کا حل اسی یوٹیوب چینل میں چھپا ہے۔

اس چینل پر ویڈیوز کی ایک سیریز موجود تھی، جس میں پیشانی پر سفید بھبھوت مَلے ایک داڑھی والے ’بابا‘ کو دکھایا گیا تھا، جو اپنے ہزاروں عقیدت مندوں سے خطاب کر رہے تھے۔ خاندانی جھگڑوں سے لے کر شراب نوشی کی لت تک، پیشہ ورانہ رکاوٹوں سے لے کر کینسر تک، اور ذہنی صحت کے مسائل سے لے کر محبت کی وارداتوں تک راجندر گڈگے ’مہاراج‘ کے پاس ہر مرض اور ہر مسئلہ کا علاج اور حل موجود تھا۔

ان کے چینل کے مطابق، گڈگے نے دتّ کا ۱۲ سالہ روحانی کورس مکمل کیا تھا، جو کہ ایک اساطیری سادھو ہیں اور جنہیں بھگوان وشنو کا اوتار تصور کیا جاتا ہے اور ان کی پوجا کی جاتی ہے۔ چینل کے تعارفی سیکشن میں مزید لکھا گیا ہے کہ ان کی لگن اور روحانیت کو دیکھتے ہوئے دتّ گرو نے گڈگے مہاراج کو آشیرواد دیا۔ اس بعد سے ہی ’’وہ دوا اور دعا کی مدد سے اپنے زائرین کے مسائل حل کر رہے ہیں۔‘‘

دتّ دھام سرکار سنگم نیر کے باضابطہ نام سے چلنے والے اس یوٹیوب چینل کے ایک لاکھ ۸۳ ہزار سبسکرائبرز ہیں۔ چینل ہر ایک ویڈیو کے نیچےموجود پرجوش تبصروں کو دیکھ کر امول نے سوچا: ’’وہ یقیناً کچھ تو صحیح کر رہے ہوں گے۔‘‘

پَنڈھرپور قصبہ کے قریب ایک چھوٹے سے گاؤں سے تعلق رکھنے والے امول نے اسکول چھوڑ کر اپنے والدین کی مدد کے لیے چھوٹے موٹے کام کرنا شروع کر دیا تھا۔ ’’میں فی الحال ایک تاجر کے ڈرائیور کے طور پر کام کرتا ہوں،‘‘ انہوں نے کہا۔ ’’میرا کام علاقہ کے مختلف کسانوں سے فصل اٹھا کر منڈیوں تک پہنچانا ہوتا ہے۔‘‘

یہ دو افراد کا کام ہے: ایک ٹیمپو چلاتا ہے، دوسرا پچھلے حصہ میں اناج کی بوریاں لادتا ہے۔ لیکن کچھ اضافی آمدنی حاصل کرنے کے لیے امول یہ دونوں کام خود ہی کرتے ہیں۔ اس بے رحم اور کمر توڑ مشقت کے عوض انہیں ہر مہینے کے ۱۰ ہزار روپے ملتے ہیں۔ یہ ان کی آمدنی کا واحد ذریعہ ہے۔ ان کی دس ایکڑ زرعی زمین زرخیز تو ہے، لیکن خاندانی تنازع میں پھنس کر بنجر پڑی ہوئی ہے۔

امول کی آمدنی ان کے پانچ افراد پر مشتمل فیملی کی کفالت کے لیے ناکافی ہے۔ اسی وجہ سے ان کی ماں رنجنا نے، جن کی عمر ۶۰ سال سے زیادہ ہے، اپنے جوڑوں کے بڑھتے ہوئے شدید درد کے علاج کے لیے ڈاکٹر کے پاس جانا ترک کر دیا ہے۔ لیکن جب ان کے بیٹے روہن کی دائیں آنکھ کے اوپر ایک گانٹھ پیدا ہوئی، تو امول گھبراہٹ میں اسے لے کر ڈاکٹر کے پاس لے گئے، جس نے ان سے سی ٹی اسکین کروانے کا مشورہ دیا۔

نتائج تشویش ناک نہیں تھے۔ ڈاکٹر نے بتایا کہ روہن کی آنکھ کے اوپر ایک بے ضرر گلٹی (بینائن سسٹ) تھی جو دواؤں کے باقاعدہ کورس سے ٹھیک ہوجائے گی۔ تاہم، گاؤں کے ایک پڑوسی نے ان کے ذہن میں یہ وہم پیدا کر دیا کہ روہن کے اسکول میں کم نمبر آنے کی وجہ شاید اس کے سر کی یہی گلٹی (گانٹھ) ہے۔ بس اسی موقع پرامول کے چچیرے بھائی نے انہیں یوٹیوب کا وہ لنک بھیجا اور ’گڈگے مہاراج‘ سے ملنے کا مشورہ دیا۔

’’چونکہ ہم بہرصورت وہاں جا ہی رہے تھے، اس لیے میری ماں نے اپنے جوڑوں کے درد کے علاج کے لیے ہمارے ساتھ چلنے کا فیصلہ کیا،‘‘ امول وضاحت کرتے ہیں۔

نو گھنٹے کے بس کے سفر کے بعد وہ تینوں ایک شیئرنگ رکشہ میں جیسے تیسے سوار ہوکر اپنی آخری منزل پر پہنچے۔ مہاراشٹر کے ضلع اہلیہ نگر (سابقہ احمد نگر) کے گاؤں وڈگاؤں پان میں واقع راجندر گڈگے کے اس وسیع و عریض آشرم کے احاطے میں پہنچ کر امول کو اپنی آنکھوں پر یقین نہیں آ رہا تھا۔ انہیں بھیڑ کی تو امید تھی، لیکن مختلف ذاتوں اور طبقوں سے تعلق رکھنے والے لوگوں کے ایسے ٹھاٹھیں مارتے سمندر کی توقع نہیں تھی، جو گڈگے کو سننے کے لیے قطاروں میں کھڑے تھے۔ ان لوگوں میں ایک ایسا شخص بھی تھا جسے پیشاب کی نلی (کیتھیٹر) لگی ہوئی تھی، اور وہ بمشکل سیدھا کھڑا ہوسکتا تھا یا اپنا سر سیدھا رکھ سکتا تھا۔

بابا کی ایک جھلک پانے کے لیے ہو رہی دھکہ مکی نے بیک وقت امول کی ڈھارس بھی بندھائی اور انہیں پریشان بھی کیا۔ اس بے پناہ بھیڑ نے اتنی لمبی مسافت طے کر کے سنگم نیر – وہ تعلقہ جہاں یہ آشرم واقع ہے – آنے کے ان کے فیصلہ کو درست ثابت کر دیا۔ لیکن ساتھ ہی اس ہجوم نے انہیں یہ سوچنے پر بھی مجبور کر دیا کہ وہ آخر کس طرح گڈگے سے بنفس نفیس ملاقات کر پائیں گے۔

’’میں نے عملہ کے ایک رکن سے مدد کی درخواست کی،‘‘ امول بتاتے ہیں۔ ’’اس نے مجھے بتایا کہ مجھے ذاتی معائنہ کے لیے ۱۱ ہزار روپے ادا کرنے ہوں گے۔‘‘

یہ رقم ان کی ایک مہینہ کی کمائی سے ایک ہزار روپے زیادہ تھی۔ انہوں نے اس کے متعلق سوچا۔ ان کی ماں اور بیٹے کی بے بس اور پر امید آنکھیں ان کی طرف دیکھ رہی تھیں۔ ایک منٹ بعد انہوں نے فیصلہ کر لیا۔ جب وہ یہاں تک آ ہی گئے تھے، تو کچھ اور آگے بھی جا سکتے تھے۔ امول نے اس دورہ کے لیے ایک دوست سے ۲۰ ہزار روپے ادھار لیے تھے۔ انہیں امید تھی کہ وہ اس میں سے تقریباً ایک چوتھائی خرچ کریں گے اور باقی واپس کر دیں گے۔ لیکن اب وہ وقت ہاتھ سے نکل چکا تھا۔

امول نے کہا، ’’میرے ۱۱ ہزار روپے ادا کرنے کے بعد اس شخص نے مجھے ایک رسید دی، اور کہا کہ ہماری باری کل آئے گی۔‘‘ اس عمارت میں مسافر خانے بنے ہوئے تھے جہاں ان تینوں نے رات گزاری۔

اگلی دوپہر، جب ’مہاراج‘ نے بالآخر روہن اور رنجنا سے ملاقات کی، ان کا معائنہ ۱۵ منٹ سے بھی کم وقت تک چلا۔ انہوں نے کچھ آیورویدک دوائیاں تجویز کیں، جنہیں امول آشرم کے اندر ہی سے خرید سکتے تھے۔ اس مد میں انہوں نے مزید ۸۰۰۰ روپے خرچ کیے۔

’’میرا بیٹا ہماری دیکھ بھال کے لیے کسی دوسرے شخص سے زیادہ محنت کرتا ہے،‘‘ رنجنا کہتی ہیں۔ ’’بیمارپڑنے پر بھی وہ محنت کرتا ہے۔ میں اس کے پیسے ضائع نہیں کرنا چاہتی۔‘‘

لیکن امول کے پاس اپنے دوست سے ادھار لیے گئے پیسوں میں سے اب صرف آخری ایک ہزار روپے ہی بچے تھے۔ یہ ایک ایسا قرض تھا، جسے وہ ایک طویل عرصہ تک نہیں چکا پائیں گے۔

اگرچہ گڈگے کا دعویٰ ہے کہ وہ گزشتہ ۳۰ سالوں سے لوگوں کے مسائل حل کر رہے ہیں، لیکن وہ ہمیشہ اتنے مقبول اور اتنے مہنگے نہیں تھے۔ گڈگے کے آشرم سے تقریباً ۴۵ منٹ کی دوری پر واقع سنگم نیر شہر سے تعلق رکھنے والی توہم پرستی مخالف کارکن، ایڈووکیٹ رنجنا گاونڈے نے بتایا کہ ان کی مقبولیت میں اصل اضافہ کووڈ-۱۹ کی وبا کے پھوٹنے کے ساتھ ہی شروع ہوا تھا۔ ان کا یوٹیوب چینل، جو ۲۰۱۷ میں شروع کیا گیا تھا، اسی دوران تیزی سے مقبول ہوا۔

’’لوگوں کو وبائی مرض کے دوران اچانک اپنی موت نظر آنے لگی تھی،‘‘ گاونڈے کہتی ہیں۔ ’’ہسپتال بھرے پڑے تھے اور مجبور و بے بس اہل خانہ انتہائی نازک حالت میں جذباتی مدد کے لیے نقلی سائنس کی طرف رجوع کر رہے تھے۔ گڈگے ’مہاراج‘ نے چالاکی سے اس مجبوری کا فائدہ اٹھایا۔‘‘

گاونڈے توہم پرستی کے خلاف لڑنے والی تنظیم اندھ شردھا نرمولن سمیتی (اے این آئی ایس) کی ایک عہدیدار ہیں۔ اس تنظیم کے بانی نریندر دابھولکر کو ۲۰۱۳ میں ہندو بنیاد پرستوں نے قتل کر دیا تھا۔ ان کے کارکنان نقلی مریضوں کے طور پر راجندر گڈگے کے آشرم کا دورہ کر چکے ہیں۔

‘‘تقریباً ۱۰ سال پہلے، گڈگے سے ملنے کے لیے انتظار کا وقت شاید ہی کبھی ایک گھنٹہ ہوتا تھا،‘‘ ۳۴ سالہ پرشانت پنسارے کہتے ہیں۔ وہ دو بار آشرم کا دورہ کرچکے ہیں۔ ’’آج کے دن اگر آپ خوش قسمت ہیں تو کم از کم چھ سات گھنٹے لگتے ہیں۔ اس وقت فیس صرف ۳۰۰ روپے تھی۔‘‘

لیکن ان کی مشاورتی فیس میں ۳۵۰۰ فیصد اضافہ نے بھی عوام کو ان سے ملنے سے باز نہیں رکھا۔ اس کے برعکس، انتہائی سلیقہ اور مہارت سے چلائے جانے والے ان کے یوٹیوب چینل کی بدولت ان کی مقبولیت آسمان چھونے لگی۔ اس چینل پر ’گڈگے مہاراج‘ کے گھنٹوں طویل خطبات اور تقاریر کی ویڈیوز موجود ہیں، اور ساتھ ہی ان کے انسٹاگرام پیج پر مختصر ویڈیوز بھی اپلوڈ کی جاتی ہیں، جس کے فالوورز کی تعداد تقریباً دو لاکھ ۲۰ ہزار کے قریب ہے۔

ایک ویڈیو میں، گڈگے ۳۰ اور ۴۰ سال کی عمر کے غیرشادی شدہ ناظرین سے مخاطب ہیں۔ وہ پس منظر میں بجنے والی دھیمی اور خوشگوار موسیقی کے ساتھ ایک خاص انداز میں بات کرتے ہیں۔ وہ کہتے ہیں، ’’اپنی لمبائی (قد) کے برابر روئی کی ایک بتی تیار کریں۔ اسے لگاتار تین جمعرات دتّ پربھو کے مندر میں جلائیں۔ آپ کی شادی جلد ہی ہو جائے گی۔‘‘

ایک دوسری ویڈیو میں وہ ہر اس مسئلہ کا حل پیش کرتے ہیں، جو متعدد کوششوں کے بعد بھی حل نہ ہو رہا ہو۔ ’’اپنے گھر میں پانی کے برتن کے پاس ایک پیالہ رکھیں،‘‘ وہ کہتے ہیں۔ ’’اس میں تھوڑا سا گنگا جل ڈالیں۔ اپنی ہتھیلی میں کسی بھی کرنسی کا سکہ لیں اور ’دتّ دھام سرکار کی جے‘ بولیں۔ اپنی ہتھیلی کو پیشانی سے دبائیں اور سکہ کو پیالے میں گرا دیں۔ اس میں سے کچھ گنگا جل اپنی آنکھوں پر چھڑکیں، اس سے آپ کا مسئلہ حل ہو جائے گا۔‘‘

اس نوع کی ویڈیوز کے بیک اپ کے طور پر ان کے چینل پر عقیدت مندوں کے بیانات موجود ہیں، جو کئی بیماریوں کے علاج کے لیے ’بابا‘ کا شکریہ ادا کرتے ہیں۔

انیتا (تبدیل شدہ نام) کی عمر ۳۰ سال ہے۔ ان کی نظر ایسی ہی ایک ویڈیو پر پڑی تو وہ فوراً اپنی ساس کے ساتھ گڈگے کے آشرم میں پہنچ گئیں، جو اپنے بائیں پاؤں کے ٹشیوز (بافت) کی شدید بیماری میں مبتلا ہیں۔ عمارت کے اندر ایک شیڈ کے نیچے بیٹھ کر انہوں نے بتایا، ’’ڈاکٹروں نے صاف کہہ دیا تھا کہ ان کی ٹانگ کاٹنی پڑے گی۔ ہم نے ایسا نہیں کروایا، اس لیے ہم نے سوچا کہ شاید یہاں سے کوئی مدد مل جائے۔‘‘

انیتا، جو مغربی مہاراشٹر کے ضلع ستارا میں ایک ایکڑ اراضی کی مالک ہیں اور ایک چھوٹی کسان ہیں، اور صرف اپنی کفالت کے لیے غذائی فصلیں اگاتی ہے، ان کے لیے گڈگے کی مشاورتی فیس یا ان کی دوائیوں کا خرچ اٹھانا کسی صورت سے ممکن نہ تھا۔ ایسے لوگوں کے لیے، وہاں صرف دعا مانگنے کا ایک متبادل طریقہ موجود ہے۔

تاہم، انہیں ایک کار کرائے پر لینی پڑی کیونکہ ان کی ساس کسی بھی طرح سے بس کا سفر نہیں کر سکتی تھیں۔ ’’اس پر میرے ۸۰۰۰ روپے خرچ ہو گئے،‘‘ انہوں نے بتایا۔ ’’میری بہن نے مجھے یوٹیوب پر ایک ویڈیو کا لنک بھیجا تھا جس میں گڈگے مہاراج نے ایک خاتون کے خراب ہوتے ہوئے پاؤں کو ٹھیک کر دیا تھا۔ میں نے کچھ اور ویڈیوز بھی دیکھے اور پھر انہیں یہاں لانے کا فیصلہ کیا۔‘‘

ہندوستان میں ۲۰۲۴ میں ۵۸ فیصد لوگوں تک انٹرنیٹ کی رسائی موجود تھی، جس میں فعال صارفین کی تعداد ۸۸ کروڑ ۶۰ لاکھ تھی۔ اور اب یہ صارفین صرف شہری علاقوں تک ہی محدود نہیں رہے ہیں۔ ان میں سے تقریباً ۴۸ کروڑ ۸۰ لاکھ صارفین دیہی ہندوستان میں رہتے ہیں، جو شہروں میں رہنے والے انٹرنیٹ صارفین کی تعداد سے نمایاں طور پر زیادہ ہیں۔

معاشرہ کے متعدد طبقات میں انٹرنیٹ کے پھیلاؤ نے ان خود ساختہ باباؤں کی شہرت اور اثر و رسوخ کو بے مثال بلندیوں تک پہنچنے میں بہت مدد پہنچائی ہے۔ ہندوستان میں اب جڑ پکڑ چکی مذہبی قوم پرستی کے ماحول نے ان کے مرتبہ کو اور بھی بلند کر دیا ہے۔ یہ تمام عوامل ان ’باباؤں‘ کو سماجی قبولیت بخشتے ہیں اور انہیں سزا سے محفوظ رکھتے ہیں۔

جس دوپہر کو میں نے آشرم کا دورہ کیا، اس دن ’مہاراج‘ کو ڈیڑھ گھنٹے میں ۲۰ لوگوں سے ملاقات کرنی تھی۔ یہ ایسے لوگ تھے جنہوں نے انفرادی ملاقات کے لیے ۱۱ ہزار روپے ادا کیے تھے۔ دوسرے لفظوں میں، انہوں نے سادہ لوح لوگوں سے تقریباً ۹۰ منٹ میں دو لاکھ ۲۰ ہزار روپے کمائے۔ ان میں سے کئی ان پڑھ تھے اور انہیں یہ بھی معلوم نہیں تھا کہ ان کے اگلے وقت کا کھانا کہاں سے آئے گا۔ روزانہ ہزاروں لوگ ان کے آشرم کا دورہ کرتے ہیں۔ وہ ان سے کتنی رقم کماتے ہیں، اس کا اندازہ لگانا مشکل نہیں ہے۔

تاہم، سب سے آسان رسائی والے مقامی لوگ بمشکل ہی آشرم میں داخل ہوتے ہیں۔ جب امول اپنے پہلے دورہ کے ایک ماہ بعد اپنے بیٹے اور ماں کے ساتھ گڈگے کے پاس دوبارہ آئے تو آٹو ڈرائیور نے ان سے کہا کہ وہ اپنا وقت ضائع کر رہے ہیں۔ امول یاد کرتے ہوئے کہتے ہیں، ’’اس نے کہا تھا کہ یہ آدمی دھوکہ باز ہے۔ لیکن میں نے سوچا کہ مجھے صرف ایک دورہ کے بعد کسی نتیجہ پر پہنچنے میں جلدی نہیں کرنی چاہیے۔‘‘

اس بار ان کے پاس اتنے پیسے نہیں تھے کہ وہ اس ’بابا‘ سے انفرادی ملاقات کرنے پر زور دے سکتے۔ امول سیدھے کاؤنٹر پر گئے اور وہی دوائیاں دوبارہ لیں۔ ان کی والدہ رنجنا نے بتایا، ’’ہم نے انہیں کم مقدار میں خریدا، اس لیے ان کی قیمت ۴۰۰۰ روپے بنی۔‘‘ یہ رقم اب بھی امول کی ماہانہ تنخواہ کے تقریباً آدھے حصہ کے برابر ہے۔

گاونڈے کچھ عرصے سے راجندر گڈگے کے خلاف شکایت درج کروانے کی کوشش کر رہے تھے۔ انہیں آخرکار اس اپریل میں کامیابی حاصل ہوئی، جس کے نتیجہ میں ’بابا‘ اور ان کے چار ساتھیوں کو گرفتار کر لیا گیا۔ ان کے خلاف توہم پرستی ایکٹ ۲۰۱۳، آئی ٹی ایکٹ، ڈرگس اینڈ ریمیڈیز ایکٹ اور میڈیکل پریکٹشنر ایکٹ کے تحت مقدمہ درج کیا گیا ہے۔

گڈگے اپنی گرفتاری سے زیادہ پریشان نظر نہیں آئے۔ جیسا کہ انہوں نے جیل جاتے وقت میڈیا کو بتایا کہ وہ ایک ’’روشن ضمیر انسان‘‘ ہیں، جنہیں ’’روحانی طاقت‘‘ حاصل ہے۔

’’انہوں نے اے آئی کی مدد سے تیار کردہ ایک ویڈیو بنایا جس میں دعویٰ کیا گیا تھا کہ اے این آئی ایس ان سے پیسہ وصولی کی کوشش کر رہا ہے،‘‘ گاونڈے نے کہا۔ ’’اس سے قبل اس نے مجھ پر بھی دباؤ ڈالنے کی کوشش کی۔‘‘

وڈگاؤں پان، جہاں گڈگے کی سلطنت واقع ہے، کے لوگوں کو شروع میں ان کو لے کر کچھ تحفظات تھے۔ لیکن ان کے طفیل آنے والی بھیڑ نے علاقہ میں چائے کے خوانچوں، ہوٹلوں اور پنساری کی دکانوں کے کاروبار میں اضافہ شروع کر دیا۔

یہاں تک کہ امول بھی، پیسوں کی تنگی کے باوجود، پَنڈھرپور واپس جانے سے قبل چائے اور ناشتے کے لیے ایک جگہ رکے تھے۔ اس بات کا امکان بہت کم تھا کہ وہ تیسری بار یہاں کا رخ کرتے، کیونکہ وہ پہلے ہی ۲۳ ہزار روپے سے زیادہ خرچ کر چکے تھے – اور اس کا کوئی واضح فائدہ بھی نہیں ہوا تھا۔

باہر نکلتے ہوئے وہ تینوں ایک سفید مرسڈیز کے پاس سے گزرے۔ ’مہاراج’ ابھی ابھی اس شاندار گاڑی میں بیٹھ کر اپنے آشرم کے احاطہ میں داخل ہوئے تھے۔ ہندوستان میں اس ماڈل کی بنیادی قیمت ۶۵ لاکھ روپے ہے۔ دریں اثناء امول، رنجنا اور روہن ۱۰ روپے فی سیٹ کے حساب سے ایک آٹو رکشہ میں کسی طرح سوار ہوئے اور گھر واپسی کے اپنے نو گھنٹے کے تھکا دینے والے سفر کا آغاز کیا۔