‘கடவுள் மனிதர்’ கட்கேவும் அவரது யூட்யூப் அற்புதங்களும்

இந்தக் கட்டுரை, புலிட்சர் மையத்தின் ஆதரவுடன் பார்த் எம். என். வழங்கும் தொடரின் ஒரு பகுதியாகும்.

உறவினர் ஒருவர் அமோல் கண்டேகருக்கு அனுப்பிய ஒரு யூட்யூப் சேனல் சுட்டியால் மாத வருமானத்தை விட இரண்டு மடங்குக்கும் அதிகமாக செலவானது. இத்தனைக்கும் அது இணைய மோசடி கூட இல்லை.

வாழ்க்கையை கஷ்டப்பட்டு சமாளித்து வந்த 35 வயது தொழிலாளி, அந்த சுட்டியைப் பார்த்துவிட்டு அதிகாலை பேருந்தில் ஏறினார். தலையில் நீர்க்கட்டி இருப்பது கண்டறியப்பட்ட அவரது 11 வயது மகனும், மூட்டு வலியால் அவதிப்படும் அவரது தாயும் உடன் சென்றனர். பழுதடைந்த அரசுப் பேருந்தின் ஒன்பது மணி நேரப் பயணம், அவரது மூட்டுகளை மேலும் வீங்கச் செய்தது. ஆனால் அது பயனுள்ளதாகவே அமையப்போகிறது. உடல்நலம் பற்றிய அவர்களது கவலைகளுக்கான பதில், அந்த யூட்யூப் சேனலில் உள்ளதாக அமோலின் உறவினர் உறுதியளித்திருந்தார்.

நெற்றியில் வெள்ளைச் சுண்ணாம்பை பூசிக்கொண்டு, தாடியுடன் இருக்கும் ஒரு 'கடவுள் மனிதர்' ஆயிரக்கணக்கானோரை நோக்கிப் பேசும் தொடர் காணொளிகளை அந்த சேனல் வெளியிட்டது. குடும்பப் பிரச்சனைகள், குடிப்பழக்கம், தொழில்ரீதியான தடங்கல்கள், புற்றுநோய், மனநலப் பிரச்சனைகள், காதல் வாழ்க்கை என ராஜேந்திர கட்கே 'மகாராஜ்' எல்லாவற்றிற்கும் ஒரு தீர்வைக் கொண்டிருந்தார்.

விஷ்ணுவின் அவதாரமாகப் போற்றப்படும் புராணகாலத் துறவியான தத்தரிடம் கட்கே 12 வருட ஆன்மீகப் பயிற்சி முடித்துள்ளதாக, அவரது சேனலில் போடப்படிருந்தது. "அவரது ஆன்மீக அர்ப்பணிப்பை கண்டு, , தத்தகுரு கட்கே மகாராஜை ஆசீர்வதித்தார்," என்றும் அதில் போடப்படிருந்தது. அன்று முதல், "அவர் மருந்து மற்றும் பிரார்த்தனைகளின் உதவியுடன், தனது யாத்ரீகர்களின் பிரச்சனைகளைத் தீர்த்து வருகிறார்."

'தத்தாதாம் சர்க்கார் சங்கமனேர்' என்ற அந்த யூட்யூப் சேனலுக்கு 183,000 சந்தாதாரர்கள் இருப்பதையும், ஒவ்வொரு காணொளியின் கீழும் உற்சாகமான கருத்துகள் இருப்பதையும் கண்ட அமோல், "அவர் ஏதோ மாயம் செய்கிறார்" என்று நினைத்துள்ளார்.

பண்டர்பூர் நகருக்கு அருகிலுள்ள ஒரு சிறிய கிராமத்தைச் சேர்ந்த அமோல், பள்ளிப் படிப்பை பாதியில் நிறுத்திவிட்டு, தன் பெற்றோருக்கு உதவ சிறுசிறு வேலைகளைச் செய்யத் தொடங்கினார். "நான் தற்போது ஒரு வியாபாரியிடம் டிரைவராக வேலை செய்கிறேன்," என்று அவர் கூறினார். "இந்தப் பகுதியில் உள்ள வெவ்வேறு விவசாயிகளிடமிருந்து அறுவடையை மண்டிகளுக்குக் எடுத்து செல்வதுதான் என் வேலை."

ஒருவர் டெம்போவை ஓட்ட, மற்றொருவர் வண்டியில் சாக்கு மூட்டைகளை ஏற்றுவார் என இது இருவருக்கான வேலை. ஆனால் அமோல் கூடுதல் வருமானத்திற்காக, இரண்டு வேலைகளையும் அவரே செய்கிறார். இந்த கடினமான, உடலை வருத்தும் வேலைக்கு, அவருக்கு மாதம் ரூ.10,000 கிடைக்கிறது. இதுவே அவரது ஒரே வருமான ஆதாரம். அவரது பத்து ஏக்கர் விவசாய நிலம், குடும்பத் தகராறில் தரிசாக கிடக்கிறது.

அமோலின் வருமானம், அவரது ஐந்து பேர் கொண்ட குடும்பத்தை நடத்துவதற்குப் போதுமானதாக இல்லை. அறுபது வயதைக் கடந்த அவரது தாயார் ரஞ்சனா, இதனாலேயே மூட்டு வலி இருந்தும் மருத்துவரிடம் செல்வதில்லை. ஆனால், அவரது மகன் ரோகனுக்கு வலது கண்ணின் மேல் ஒரு கட்டி வந்த போது, ​​அமோல் பதற்றத்துடன் மருத்துவரிடம் அழைத்துச் சென்றார். மருத்துவர், அவரை சி.டி. ஸ்கேன் எடுக்கச் சொன்னார்.

ஸ்கேன் முடிவுகள் பயப்படும் வகையில் இல்லை என்றாலும், அதற்குத் தொடர்ச்சியான மருந்துகள் பரிந்துரைக்கப்படும் என்றும் மருத்துவர் கூறினார். இருப்பினும், கிராமத்தார் ஒருவர் ரோகன் பள்ளியில் குறைந்த மதிப்பெண்கள் பெறுவதற்கு அந்த கட்டி காரணமாக இருக்கலாம் என்று கூறியுள்ளார். அந்த நேரத்தில்தான், அமோலின் உறவினர் 'காட்கே மகாராஜ்' யூட்யூப் சுட்டியை அனுப்பியுள்ளார்.

"நாங்கள் எப்படியும் அவரை பார்க்க செல்லவிருந்ததால், என் அம்மாவும் தனது மூட்டு வலிக்காக எங்களுடன் சேர்ந்து வர முடிவு செய்தார்," என்று அமோல் விளக்கினார்.

ஒன்பது மணி நேரப் பேருந்துப் பயணத்திற்கு பிறகு, மூவரும் ஒரு ஷேர் ஆட்டோவில் ஏறினர். அஹில்யநகர் மாவட்டத்தில் (முன்னர் அகமத்நகர்) உள்ள வட்காவ்ன் பான் கிராமத்தில் அமைந்துள்ள ராஜேந்திர காட்கேயின் ஆசிரமத்தின் பரந்த வளாகத்தை வந்தடைந்தபோது, ​​அமோலுக்கு ஆச்சர்யம் தாங்க முடியவில்லை. காட்கேயின் பேச்சைக் கேட்க, கூட்டம் அலைமோதும் என்று அவர் எதிர்பார்த்திருந்தாலும், சாதி, மத பேதமின்றி மக்கள், கடல் போல வரிசையில் நிற்பதை அவர் எதிர்பார்த்திருக்கவில்லை. அவர்களில், சிறுநீர் வடிகுழாய் பொருத்தப்பட்டிருந்த ஒரு மனிதரும் இருந்தார். அவரால் நேராக நிமிர்ந்து நிற்கக் கூட முடியவில்லை.

அந்த 'கடவுள் மனிதரை' ஒருமுறை தரிசிப்பதற்காக காத்திருக்கும் கூட்டத்தை பார்த்து, அமோலுக்கு ஆறுதலும் அதே சமயம் கவலையும் இருந்தது. தூரத்தை பொருட்படுத்தாமல் ஆசிரமம் அமைந்துள்ள தாலுக்காவான சங்கமநேருக்கு வர வேண்டும் என்ற அவரது முடிவை அந்த அவசரம் உறுதிப்படுத்தினாலும், கட்கேவை நேரில் சந்திப்பது சாத்தியமாகுமா என்ற கேள்வியும் அவருக்குள் எழுந்தது.

“நான் ஊழியர் ஒருவரிடம் உதவி கேட்டேன். அவர், தனிப்பட்ட ஆலோசனைக்கு 11,000 ரூபாய் செலுத்த வேண்டும்,” என்று கூறிவிட்டார்.

அது அவர் மாத சம்பாத்தியத்தை விட ஆயிரம் ரூபாய் அதிகம். அவரது தாயும் மகனும் மிகுந்த எதிர்பார்ப்புடன் அவனைப் பார்த்தும், ஒரு நிமிடத்தில் முடிவு செய்துவிட்டார். இவ்வளவு தூரம் வந்துவிட்டோம், இன்னும் கொஞ்சம் தூரம் தானே? இந்தப் பயணத்திற்காக அமோல் 20,000 ரூபாய் கடன் வாங்கியிருந்தார். அதில் கால் வாசியை செலவழித்துவிட்டு, மீதியைத் திருப்பிக் கொடுத்துவிடலாம் என்று நினைத்திருந்தார். ஆனால் அதற்கு இனி வாய்ப்பில்லை.

”நான் 11,000 ரூபாய் செலுத்திய பிறகு, 'நாளை பார்க்க முடியும்' என்று அந்த நபர் எனக்கு ஒரு ரசீதைக் கொடுத்தார்," என்கிறார் அமோல். அந்த வளாகத்தில் இருந்த தங்கும் விடுதி அறையில் அவர்கள் மூவரும் தங்கிக் கொண்டனர்.

மறுநாள் மதியம், ‘மகாராஜ்’ இறுதியாக ரோகனையும் ரஞ்சனாவையும் 15 நிமிடங்களுக்கு மட்டுமே சந்தித்தார். ஆசிரம வளாகத்திற்குள்ளேயே அமோல் வாங்கிக்கொள்ளக்கூடிய சில ஆயுர்வேத மருந்துகளை அவர் பரிந்துரைத்தார். அதற்காக அமோல் மேலும் 8,000 ரூபாய் செலவழிக்க வேண்டி இருந்தது.

”எங்களைக் கவனித்துக்கொள்வதற்காக என் மகன் கடினமாக உழைக்கிறான்," என்று ரஞ்சனா கூறுகிறார். "உடல்நிலை சரியில்லாதபோதும் அவன் கடுமையாக உழைக்கிறான். அவனுடைய பணத்தை நான் வீணாக்க விரும்பவில்லை."

ஆனால், அமோலிடம் கடனாக வாங்கியிருந்த பணத்தில் கடைசி ஆயிரம் மட்டுமே இருந்தது. அந்தக் கடனை கட்டி முடிக்கவே பல காலம் ஆகிவிடும்.

கடந்த 30 ஆண்டுகளாக மக்களின் பிரச்சனைகளைத் தீர்த்து வருவதாக கட்கே கூறினாலும், அவர் இவ்வளவு பிரபலமாகவோ அல்லது இவ்வளவு அதிக கட்டணம் வசூலிப்பவராகவோ இருந்ததில்லை. உண்மையில், அவரது வளர்ச்சி கோவிட்-19 உடன் ஒருசேர நிகழ்ந்தது என்று, கட்கேயின் ஆசிரமத்திலிருந்து சுமார் 45 நிமிடத் தொலைவில் உள்ள சங்கமநேர் நகரைச் சேர்ந்த மூடநம்பிக்கை எதிர்ப்பு ஆர்வலரும் வழக்கறிஞருமான ரஞ்சனா கவாண்டே கூறுகிறார். 2017-ல் தொடங்கப்பட்ட அவரது யூட்யூப் சேனலும் ஏறக்குறைய அதே நேரத்தில் தான் பிரபலமடையத் தொடங்கியது.

“பெருந்தொற்றின் போது மக்களுக்கு திடீரென மரண பயம் வந்தது,” என்று கவாண்டே கூறினார். “மருத்துவமனைகள் நிரம்பி வழிந்தன. மேலும் மிகவும் பாதிக்கப்படக்கூடிய நிலையில் இருந்த உதவியற்ற குடும்பங்கள், மன உறுதுணைக்காக போலி அறிவியலை நாடின. கட்கே ‘மகாராஜ்’ அந்த பலவீனத்தை தந்திரமாகப் பயன்படுத்திக் கொண்டார்.”

கவாண்டே, மூடநம்பிக்கைக்கு எதிராகப் போராடும் அந்தஷ்ரத்தா நிர்மூலன் சமிதி (ANIS) அமைப்பின் ஒரு அலுவலகப் பொறுப்பாளர் ஆவார். இந்த அமைப்பின் நிறுவனர் நரேந்திர தபோல்கர், 2013-ல் இந்து தீவிரவாதிகளால் கொலை செய்யப்பட்டார். அவரது ஆதரவாளர்கள், ராஜேந்திர காட்கேயின் ஆசிரமத்திற்கு போலி நோயாளிகளாகச் சென்றுள்ளனர்.

“சுமார் 10 ஆண்டுகளுக்கு முன்பு, கட்கேவைப் பார்க்க ஒரு மணி நேரத்திற்கும் குறைவாகவே காத்திருக்க வேண்டும்,” என்று அந்த ஆசிரமத்திற்கு ஓரிரு முறை சென்றுள்ள 34 வயது பிரசாந்த் பன்சாரே கூறினார். “இன்றோ, அதிர்ஷ்டம் இருந்தால் குறைந்தபட்சம் ஆறு-ஏழு மணி நேரத்தில் பார்த்து விடலாம். அப்போது கட்டணமும் வெறும் 300 ரூபாயாகத்தான் இருந்தது.”

ஆனால், அவருடைய ஆலோசனைக் கட்டணம் 3,500 சதவீதம் உயர்ந்த போதும், பொதுமக்கள் சந்திப்பதை நிறுத்தவில்லை. மாறாக, அவர் உருவாக்கிய யூட்யூப் சேனல் அவரது புகழை பன்மடங்கு உயர்த்தியுள்ளது. அதில், ‘கட்கே மகாராஜ்’ மலையிலிருந்து ஆற்றும் பல மணி நேர பிரசங்கக் காணொளிகளும், ஏறக்குறைய 220,000 ஃபாலோவர்ஸ் கொண்ட அவரது இன்ஸ்டாகிராம் பக்கத்தில் பதிவேற்றப்படும் குறு காணொளிகளும் உள்ளன.

ஒரு காணொளியில், காட்கே 30 மற்றும் 40 வயதுகளில் உள்ள திருமணமாகாத பார்வையாளர்களை நோக்கிப் பேசுகிறார். பின்னணியில் மென்மையான, இனிமையான இசை ஒலிக்க, அவர் ஒரு தாள லயத்துடன் பேசுகிறார். “உங்கள் உயர நீளத்திற்கு ஒரு பருத்தித் திரியைத் தயார் செய்து, அதை தொடர்ச்சியாக மூன்று வியாழக்கிழமைகளுக்கு தத்தா பிரபு கோவிலில் ஏற்றுங்கள். உங்களுக்கு விரைவில் திருமணம் நடக்கும்,” என்கிறார்.

மற்றொரு பதிவில், பல முயற்சிகளுக்குப் பிறகும் தீராத பிரச்சனைக்கும் அவர் தீர்வை வழங்குகிறார். “உங்கள் வீட்டில் தண்ணீர் பாத்திரத்தின் அருகில் ஒரு கிண்ணத்தை வைத்து, அதில் சிறிதளவு கங்கை நீரை ஊற்றுங்கள். ஒரு நாணயத்தை உங்கள் உள்ளங்கையில் எடுத்துக்கொண்டு, ‘தத்தாதம் சர்க்கார் கி ஜெய்’ என்று சொல்லுங்கள். உங்கள் உள்ளங்கையை நெற்றியில் அழுத்தி, அந்த நாணயத்தைக் கிண்ணத்தில் போடுங்கள். அந்தக் கங்கை நீரில் சிறிதளவு உங்கள் கண்களில் தெளித்துக் கொள்ளுங்கள். இது உங்கள் பிரச்சனையைத் தீர்த்துவிடும்.”

இதுபோன்ற பல காணொளிகளுக்கு வலுசேர்க்கும் விதமாக, பல்வேறு நோய்களைக் குணப்படுத்தியதற்காக அந்த 'கடவுள் மனிதருக்கு' நன்றி தெரிவித்து, அவரது சேனலில் பக்தர்கள் அளித்த சாட்சியங்களும் உள்ளன.

30 வயது அனிதா (பெயர் மாற்றப்பட்டுள்ளது), இது போன்ற ஒரு காணொளியைக் கண்டதும், இடது காலில் கடுமையான திசு சேதத்தால் பாதிக்கப்பட்டிருந்த தன் மாமியாருடன் காட்கேயின் ஆசிரமத்திற்கு சென்றுள்ளார். அந்த வளாகத்தில் உள்ள ஒரு கொட்டகையின் கீழ் அமர்ந்தபடி “அவரது காலைத் துண்டிக்க வேண்டும் என்று மருத்துவர்கள் கூறினார்கள். நாங்கள் அதைச் செய்யவில்லை. இங்கு சரி செய்து கொள்ளலாம் என்று நினைத்தோம்.”

மேற்கு மகாராஷ்டிராவின் சதாரா மாவட்டத்தில் ஒரு ஏக்கர் நிலம் கொண்ட சிறு விவசாயியான அனிதா, தனது வாழ்வாதாரத்திற்காக உணவுப் பயிர்களைப் பயிரிடுகிறார். காட்கேயின் ஆலோசனைக் கட்டணத்தையோ அல்லது அவரது மருந்துகளையோ செலுத்தும் வசதியோ அவரிடம் இல்லை. அத்தகையவர்களுக்கு, ஒரு பிரார்த்தனை மட்டும் செய்யும் வழி ஒன்றும் உள்ளது.

இருப்பினும், அவருடைய மாமியாரால் பேருந்தில் வர முடியாது என்பதால், 8,000 ரூபாய் செலவு செய்து, காரை வாடகைக்கு எடுக்க வேண்டியிருந்தது என்கிறார். “கட்கே மகாராஜ் ஒரு பெண்ணின் பாதத்தைக் குணப்படுத்திய யூட்யூப் காணொளி இணைப்பை என் சகோதரி எனக்கு அனுப்பினார். நான் அதோடு சேர்த்து மேலும் பல காணொளிகளைப் பார்த்துவிட்டு, அவரை இங்கு அழைத்து வர முடிவு செய்தேன்.”

2024-ஆம் ஆண்டில் இந்தியாவில் இணையப் பயன்பாடு 58 சதவீதத்தை எட்டியதுடன், 88.6 கோடி பயனர்களை கொண்டுள்ளது. நகர்ப்புறங்களில் மட்டுமல்லாது, சுமார் 48.8 கோடி கிராமப்புற பயனர்களையும் கொண்டுள்ளது. இது நகரங்களில் உள்ளவர்களை விட அதிகமாகும்.

சமூகத்தின் பல்வேறு தரப்பினரிடையே இணையத்தின் வளர்ச்சி, போலி சாமியார்கள் முன்னெப்போதும் இல்லாத புகழையும் செல்வாக்கையும் அடைய பெரிதும் உதவியுள்ளது. தற்போது இந்தியாவில் ஆழமாக வேரூன்றியுள்ள மத தேசியவாதச் சூழல் அவர்களை மேலும் உயர்த்துகிறது. இவை அனைத்தும் ‘போலி சாமியார்’ உருவங்களுக்கு சட்டப்பூர்வ அங்கீகாரத்தை அளித்து, அவர்கள் தண்டனையிலிருந்து தப்பிக்கும் வாய்ப்பை அதிகரிக்கின்றன.

நான் ஆசிரமத்திற்குச் சென்ற அன்று மதியம், அந்த ‘மகாராஜ்’ ஒன்றரை மணி நேரத்தில் 20 பேரைச் சந்திக்கத் திட்டமிட்டிருந்தார். அவர்கள் தனிப்பட்ட ஆலோசனைக்காக 11,000 ரூபாய் செலுத்தியிருந்தனர். அதாவது, சுமார் 90 நிமிடங்களில், எளிதில் ஏமாறக்கூடிய மக்களிடமிருந்து 2,20,000 ரூபாய் சம்பாதித்திருந்தார். அவர்களில் பலர் கல்வியறிவு இல்லாதவர்களாகவும், தங்களின் அடுத்த வேளை உணவு எங்கிருந்து வரும் என்று அறியாதவர்களாகவும் இருந்தனர். தினமும் ஆயிரக்கணக்கானோர் அவரது ஆசிரமத்திற்கு வருகிறார்கள். அவர்களிடமிருந்து அவர் எவ்வளவு பணம் சம்பாதிக்கிறார் என்பது யாருக்கும் தெரியாது.

இருப்பினும், உள்ளூர்வாசிகள் கூட ஆசிரமத்திற்குள் அரிதாகவே செல்கின்றனர். அமோல் தனது முதல் வருகைக்கு ஒரு மாதம் கழித்து, தன் மகன் மற்றும் தாயுடன் காட்கேவுக்குத் திரும்பியபோது, ​​அந்த ஆட்டோ ஓட்டுநர் அவரிடம், அவர் நேரத்தை வீணடிப்பதாகக் கூறினார். "அந்த ஆள் ஒரு மோசடிக்காரன் என்று அவர் சொன்னார்," என அமோல் நினைவுகூர்கிறார். "ஆனால், ஒரே ஒருமுறை வந்துவிட்டு நான் அவசரப்பட்டு ஒரு முடிவுக்கு வரக்கூடாது என்று நினைத்தேன்."

இந்த முறை அந்த 'கடவுள் மனிதரை' நேரில் சந்தித்துப் பேச அவரிடம் பணம் இல்லை. அமோல் நேரடியாக கவுண்டருக்குச் சென்று, மருந்துகளை மீண்டும் வாங்கியுள்ளார். “நாங்கள் அவற்றைச் சிறிய அளவுகளில் வாங்கியதால், அதற்கு ரூ.4,000 ஆனது,” என்று அவரது தாய் ரஞ்சனா கூறினார். அதுவும் அமோலின் மாதச் சம்பளத்தில் கிட்டத்தட்ட பாதியாகும்.

கவாண்டே, ராஜேந்திர காட்கே மீது சிறிது காலமாகப் புகார் அளித்து வந்துள்ளார். அந்தப் புகார் இறுதியாக இந்த ஏப்ரல் மாதம் பதிவு செய்யப்பட்டதைத் தொடர்ந்து, அந்த 'கடவுள் மனிதர்' மற்றும் அவருடன் தொடர்புடைய நான்கு பேர் கைது செய்யப்பட்டனர். அவர் மீது மூடநம்பிக்கை ஒழிப்புச் சட்டம், 2013, தகவல் தொழில்நுட்பச் சட்டம், மருந்துகள் மற்றும் நிவாரணச் சட்டம் மற்றும் மருத்துவப் பயிற்சியாளர் சட்டம் ஆகியவற்றின் கீழ் வழக்கு பதிவு செய்யப்பட்டுள்ளது.

தனது கைது குறித்து காட்கே பெரிதாகக் கவலைப்பட்டதாகத் தெரியவில்லை. கைது செய்து அழைத்துச் செல்லப்பட்டபோது ஊடகங்களிடம் அவர் "தெய்வீக சக்திகள்" கொண்ட ஒரு "ஞானம் பெற்ற மனிதர்" என்று கூறிச் சென்றார்.

"ANIS தன்னிடம் இருந்து பணம் பறிக்க முயற்சிப்பதாகக் கூறி, அவர் AI மூலம் உருவாக்கப்பட்ட ஒரு காணொளியை வெளியிட்டார்," என்று கவாண்டே கூறினார். "அதற்கு முன்பு, அவர் என்னையும் பின்வாங்க வற்புறுத்த முயன்றார்."

கட்கேயின் சாம்ராஜ்யம் அமைந்துள்ள வட்காவ்ன் பான் கிராம மக்கள், ஆரம்பத்தில் அவர் மீது சந்தேகம் கொண்டிருந்தனர். ஆனால், அவர் ஈர்த்த மக்கள் கூட்டம், அப்பகுதியில் உள்ள தேநீர் விற்பனையாளர்கள், உணவகங்கள் மற்றும் மளிகைக் கடைகளுக்கு வியாபாரத்தைக் கொண்டுவரத் தொடங்கியது.

கையில் குறைந்த பணமே இருந்தபோதிலும், அமோல் பண்டர்பூருக்குத் திரும்புவதற்கு முன்பு ஒரு கப் தேநீரும் சிற்றுண்டியும் அருந்துவதற்காக அங்கு சென்றுள்ளார். ரூ. 23,000-க்கும் மேல் செலவழித்தும் குறிப்பிடத்தக்க பலன் எதுவும் கிடைக்காததால், அவர் மூன்றாவது முறை திரும்பி வரமாட்டார் என்றே தோன்றுகிறது.

அவர்கள் மூவரும் வெளியே செல்லும் போது ஒரு வெள்ளை மெர்சிடிஸ் கார் அவர்களை கடந்து சென்றது. அந்த ஆடம்பரமான வாகனத்தில் தான் ‘மகாராஜ்’ தனது ஆசிரம வளாகத்திற்குள் நுழைகிறார். இந்தியாவில் இந்த மாடலின் அடிப்படை விலை ரூ. 65 லட்சம். இதற்கிடையில் அமோல், ரஞ்சனா மற்றும் ரோகன் ஆகியோர் ஒரு இருக்கைக்கு ரூ.10 செலுத்தி ஒரு ஆட்டோ ரிக்ஷாவில் நெருக்கியடித்துக்கொண்டு, தங்கள் வீட்டிற்குத் திரும்பும் ஒன்பது மணி நேரக் கடினமான பயணத்தைத் தொடங்குகின்றனர்.