‘ਬਾਬਾ’ ਗੜਗੇ ਅਤੇ ਉਹਨਾਂ ਦੇ ਯੂਟਿਊਬ ਕਰਿਸ਼ਮੇ

ਇਹ ਲੇਖ ਪਾਰਥ ਐੱਮ. ਐੱਨ. ਦੇ ਲੇਖਾਂ ਦੀ ਲੜੀ ਦਾ ਹਿੱਸਾ ਹੈ ਜਿਸ ਨੂੰ ਪੁਲਿਟਜ਼ਰ ਕੇਂਦਰ ਦੀ ਸਹਾਇਤਾ ਪ੍ਰਾਪਤ ਹੈ।

ਆਪਣੇ ਭਰਾ ਦੇ ਭੇਜੇ ਹੋਏ ਇੱਕ ਯੂਟਿਊਬ ਚੈਨਲ ਦੇ ਲਿੰਕ ਨੇ ਅਮੋਲ ਖੰਡੇਕਰ ਨੂੰ ਉਹਨਾਂ ਦੀ ਇੱਕ ਮਹੀਨੇ ਦੀ ਤਨਖਾਹ ਤੋਂ ਵੀ ਦੁੱਗਣੀ ਰਕਮ ਦਾ ਚੂਨਾ ਲਾ ਦਿੱਤਾ। ਤੇ ਇਹ ਤਾਂ ਫਿਸ਼ਿੰਗ ਦਾ ਮਾਮਲਾ ਵੀ ਨਹੀਂ ਸੀ।

ਇਸ 35-ਸਾਲਾ ਮਜ਼ਦੂਰ, ਜਿਸ ਦੀ ਆਈ ਚਲਾਈ ਹੀ ਬੜੀ ਮੁਸ਼ਕਿਲ ਨਾਲ਼ ਹੁੰਦੀ ਹੈ, ਨੇ ਇਹ ਲਿੰਕ ਦੇਖਿਆ ਤੇ ਸਵੇਰੇ ਜਲਦੀ ਹੀ ਬੱਸ ਫੜ੍ਹ ਕੇ ਤੁਰ ਪਿਆ। ਉਹਨਾਂ ਦੇ ਨਾਲ਼ ਉਹਨਾਂ ਦਾ 11 ਸਾਲ ਦਾ ਬੇਟਾ ਸੀ ਜਿਸ ਦੇ ਸਿਰ ਵਿੱਚ ਡਾਕਟਰ ਨੇ ਰਸੌਲੀ ਦੱਸੀ ਸੀ ਅਤੇ ਬਿਮਾਰ ਮਾਂ ਸੀ ਜੋ ਜੋੜਾਂ ਦੇ ਦਰਦ ਨਾਲ਼ ਜੂਝ ਰਹੀ ਹੈ। ਖਟਾਰਾ ਸਰਕਾਰੀ ਬੱਸ ਵਿੱਚ ਨੌਂ ਘੰਟਿਆਂ ਦੇ ਸਫ਼ਰ ਨੇ ਮਾਂ ਦੇ ਗੋਡਿਆਂ ਨੂੰ ਹੋਰ ਜਕੜ ਦਿੱਤਾ ਸੀ ਪਰ ਇਸ ਤਕਲੀਫ਼ ਦਾ ਮੁੱਲ ਪੈਣ ਹੀ ਵਾਲ਼ਾ ਸੀ। ਅਮੋਲ ਜੀ ਦੇ ਭਰਾ ਨੇ ਉਹਨਾਂ ਨੂੰ ਭਰੋਸਾ ਦਵਾਇਆ ਸੀ ਕਿ ਉਹਨਾਂ ਦੀਆਂ ਸਾਰੀਆਂ ਸਿਹਤ ਸਮੱਸਿਆਵਾਂ ਦਾ ਹੱਲ ਉਸ ਯੂਟਿਊਬ ਚੈਨਲ ਦੀ ਵੀਡਿਓ ਵਿੱਚ ਹਨ।

ਇਸ ਚੈਨਲ ਵਿੱਚ ਮੱਥੇ ‘ਤੇ ਸਫ਼ੇਦ ਤਿਲਕ ਲਗਾਏ ਦਾੜ੍ਹੀ ਵਾਲ਼ੇ ਇੱਕ ‘ਬਾਬੇ’ ਦੀਆਂ ਕਈ ਵੀਡਿਓ ਸਨ ਜੋ ਕਿ ਹਜ਼ਾਰਾਂ ਮੰਤਰਮੁਗਧ ਹੋਏ ਲੋਕਾਂ ਦੇ ਇਕੱਠ ਨੂੰ ਸੰਬੋਧਨ ਕਰ ਰਹੇ ਸਨ। ਚਾਹੇ ਪਰਿਵਾਰਿਕ ਸਮੱਸਿਆ ਹੋਵੇ ਜਾਂ ਸ਼ਰਾਬ ਦੀ ਲਤ ਦੀ, ਕੰਮਕਾਜ ਵਿੱਚ ਵਿਘਨ ਹੋਵੇ ਜਾਂ ਨਾਮੁਰਾਦ ਕੈਂਸਰ, ਦਿਮਾਗੀ ਸਮੱਸਿਆ ਤੋਂ ਲੈ ਕੇ ਪਿਆਰ ਵਿੱਚ ਸਮੱਸਿਆ, ਕੁਝ ਵੀ ਹੋਵੇ ਰਾਜੇਂਦਰ ਗੜਗੇ ‘ਮਹਾਰਾਜ’ ਕੋਲ਼ ਹਰ ਮਰਜ਼ ਦੀ ਦਵਾ ਸੀ।

ਉਹਨਾਂ ਦੇ ਚੈਨਲ ਅਨੁਸਾਰ, ਗੜਗੇ ਨੇ 12 ਸਾਲਾਂ ਦਾ ਦੱਤਾ, ਇੱਕ ਮਿਥਿਹਾਸਿਕ ਫ਼ਕੀਰ ਜਿਨ੍ਹਾਂ ਨੂੰ ਭਗਵਾਨ ਵਿਸ਼ਣੂ ਦੇ ਅਵਤਾਰ ਹੋਣ ਦਾ ਸਤਿਕਾਰ ਪ੍ਰਾਪਤ ਹੈ, ਦਾ ਰੂਹਾਨੀਅਤ ਇਲਮ ਪ੍ਰਾਪਤ ਕੀਤਾ ਸੀ। “ਉਹਨਾਂ ਦੇ ਅਧਿਆਤਮ ਪ੍ਰਤੀ ਸਮਰਪਣ ਦੇ ਨਤੀਜੇ ਵਜੋਂ ਦੱਤਾਗੁਰੂ ਨੇ ਗੜਗੇ ਮਹਾਰਾਜ ਨੂੰ ਆਸ਼ੀਰਵਾਦ ਦਿੱਤਾ,” ਉਹਨਾਂ ਬਾਰੇ ਇਸ ਚੈਨਲ ‘ਤੇ ਲਿਖਿਆ ਹੋਇਆ ਹੈ। ਉਦੋਂ ਤੋਂ ਲੈ ਕੇ ਹੀ, “ਉਹ ਦਵਾ ਅਤੇ ਦੁਆ ਨਾਲ਼ ਆਪਣੇ ਸ਼ਰਧਾਲੂਆਂ ਦੇ ਕਸ਼ਟ ਦਾ ਨਿਵਾਰਨ ਕਰ ਰਹੇ ਹਨ।”

ਉਹਨਾਂ ਦੇ ਯੂਟਿਊਬ ਚੈਨਲ, ਜਿਸ ਦਾ ਅਧਿਕਾਰਿਕ ਨਾਮ ਦੱਤਾਧਾਮ ਸਰਕਾਰ ਸੰਗਮਨੇਰ ਹੈ, ਦੇ 183,000 ਸਬਸਕ੍ਰਾਇਬਰ ਹਨ ਅਤੇ ਇੱਥੇ ਹਰ ਵੀਡਿਓ ‘ਤੇ ਆਏ ਉਤਸ਼ਾਹ ਭਰਪੂਰ ਕਮੈਂਟਾਂ ਨੂੰ ਦੇਖ ਕੇ ਅਮੋਲ ਜੀ ਨੇ ਵੀ ਸੋਚਿਆ: “ਉਹ ਕੁਝ ਤਾਂ ਸਹੀ ਕਰ ਰਹੇ ਹੋਣਗੇ।”

ਪੰਢਰਪੁਰ ਕਸਬੇ ਨੇ ਨੇੜੇ ਪੈਂਦੇ ਇੱਕ ਛੋਟੇ ਜਿਹੇ ਪਿੰਡ ਤੋਂ ਆਉਂਦੇ ਅਮੋਲ ਨੇ ਪੜ੍ਹਾਈ ਵਿਚਾਲੇ ਹੀ ਛੱਡ ਦਿੱਤੀ ਸੀ ਅਤੇ ਆਪਣੇ ਮਾਪਿਆਂ ਦੀ ਸਹਾਇਤਾ ਕਰਨ ਲਈ ਛੋਟੇ ਮੋਟੇ ਕੰਮ ਕਰਨੇ ਸ਼ੁਰੂ ਕਰ ਦਿੱਤੇ ਸੀ। “ਮੈਂ ਹੁਣ ਇੱਕ ਵਪਾਰੀ ਲਈ ਡਰਾਈਵਰੀ ਦਾ ਕੰਮ ਕਰਦਾ ਹਾਂ,” ਉਹ ਦੱਸਦੇ ਹਨ। “ਮੇਰਾ ਕੰਮ ਇਲਾਕੇ ਦੇ ਕਿਸਾਨਾਂ ਕੋਲੋਂ ਉਪਜ ਇਕੱਠਾ ਕਰ ਕੇ ਮੰਡੀਆਂ ਤੱਕ ਪਹੁੰਚਾਉਣਾ ਹੈ।”

ਇਹ ਦੋ ਬੰਦਿਆਂ ਦਾ ਕੰਮ ਹੈ: ਇੱਕ ਟੈਂਪੂ ਚਲਾਉਂਦਾ ਹੈ, ‘ਤੇ ਦੂਜਾ ਬੋਰੀਆਂ ਲੱਦਦਾ ਹੈ। ਪਰ ਅਮੋਲ ਵਾਧੂ ਆਮਦਨ ਲਈ ਦੋਵੇਂ ਕੰਮ ਆਪ ਹੀ ਕਰਦੇ ਹਨ। ਇਸ ਸਖ਼ਤ, ਲੱਕ ਤੋੜਨ ਵਾਲ਼ੇ ਕੰਮ ਲਈ ਉਹਨਾਂ ਨੂੰ ਮਹੀਨੇ ਦੇ 10,000 ਰੁਪਏ ਮਿਲ਼ਦੇ ਹਨ- ਜੋ ਉਹਨਾਂ ਦੀ ਕਮਾਈ ਦਾ ਇਕਲੌਤਾ ਜ਼ਰੀਆ ਹੈ। ਉਹਨਾਂ ਦਾ 10 ਏਕੜ ਦਾ ਉਪਜਾਊ ਜ਼ਮੀਨ ਦਾ ਟੱਕ ਪਰਿਵਾਰਿਕ ਜ਼ਮੀਨੀ ਵਿਵਾਦ ਦੇ ਚੱਲਦਿਆਂ ਹੁਣ ਬੰਜਰ ਪਿਆ ਹੈ।

ਅਮੋਲ ਦੀ ਕਮਾਈ ਨਾਲ਼ ਉਹਨਾਂ ਦੇ ਪੰਜ ਜੀਆਂ ਦੇ ਪਰਿਵਾਰ ਦਾ ਗੁਜ਼ਾਰਾ ਬੜੀ ਮੁਸ਼ਕਿਲ ਨਾਲ਼ ਹੁੰਦਾ ਹੈ। ਇਸੇ ਵਜਾਹ ਕਰ ਕੇ ਉਹਨਾਂ ਦੀ ਸੱਤਰਾਂ ਨੂੰ ਢੁੱਕ ਚੱਲੀ ਮਾਂ, ਰੰਜਨਾ, ਦਿਨੋਂ-ਦਿਨ ਵੱਧਦੇ ਜਾ ਰਹੇ ਜੋੜਾਂ ਦੇ ਦਰਦ ਦੇ ਇਲਾਜ ਲਈ ਡਾਕਟਰ ਕੋਲ਼ ਜਾਣਾ ਟਾਲ਼ਦੀ ਰਹਿੰਦੀ ਹੈ। ਪਰ ਜਦੋਂ ਉਹਨਾਂ ਦੇ ਬੇਟੇ ਰੋਹਨ ਦੀ ਸੱਜੀ ਅੱਖ ‘ਤੇ ਗੰਢ ਬਣ ਗਈ ਤਾਂ ਘਬਰਾਏ ਹੋਏ ਅਮੋਲ ਉਸ ਨੂੰ ਫਟਾਫਟ ਡਾਕਟਰ ਕੋਲ਼ ਲੈ ਕੇ ਗਏ ਜਿਸ ਨੇ ਸੀ. ਟੀ. ਸਕੈਨ ਕਰਾਉਣ ਲਈ ਕਿਹਾ।

ਰਿਪੋਰਟ ਵਿੱਚ ਕੋਈ ਘਬਰਾਉਣ ਵਾਲ਼ੀ ਗੱਲ ਨਹੀਂ ਸੀ। ਡਾਕਟਰ ਅਨੁਸਾਰ ਰੋਹਨ ਦੇ ਜੋ ਗੰਢ ਸੀ ਉਹ ਮਾਮੂਲੀ ਸੀ ਜੋ ਦਵਾਈਆਂ ਨਾਲ਼ ਹੌਲ਼ੀ-ਹੌਲ਼ੀ ਆਪੇ ਠੀਕ ਹੋ ਜਾਵੇਗੀ। ਪਰ ਪਿੰਡ ਦੇ ਇੱਕ ਗੁਆਂਢੀ ਨੇ ਕਿਹਾ ਕਿ ਉਸ ਦੇ ਸਿਰ ਦੀ ਗੰਢ ਰੋਹਨ ਦੇ ਪੜ੍ਹਾਈ ਵਿੱਚ ਪਿਛੜਨ ਦੀ ਵਜਾਹ ਹੋ ਸਕਦੀ ਹੈ। ਜਿਸ ‘ਤੇ ਅਮੋਲ ਦੇ ਭਰਾ ਨੇ ਉਹਨਾਂ ਨੂੰ ਯੂਟਿਊਬ ਦਾ ਲਿੰਕ ਭੇਜ ਕੇ ‘ਗੜਗੇ ਮਹਾਰਾਜ’ ਕੋਲ਼ ਜਾਣ ਦੀ ਸਲਾਹ ਦਿੱਤੀ।

“ਕਿਉਂਕਿ ਅਸੀਂ ਜਾ ਹੀ ਰਹੇ ਸੀ, ਮੇਰੀ ਮਾਂ ਨੇ ਵੀ ਆਪਣੇ ਜੋੜਾਂ ਦੇ ਦਰਦ ਲਈ ਸਾਡੇ ਨਾਲ਼ ਜਾਣ ਦਾ ਫ਼ੈਸਲਾ ਲਿਆ,” ਅਮੋਲ ਜੀ ਦੱਸਦੇ ਹਨ।

ਬੱਸ ‘ਤੇ ਨੌਂ ਘੰਟਿਆਂ ਦੇ ਸਫ਼ਰ ਪਿੱਛੋਂ, ਇਹ ਤਿੰਨੋਂ ਜਣੇ ਇੱਕ ਰਿਕਸ਼ੇ ਵਿੱਚ ਸਵਾਰ ਹੋ ਕੇ ਆਪਣੀ ਮੰਜ਼ਿਲ ‘ਤੇ ਪਹੁੰਚੇ। ਅਹਿਲਿਆਨਗਰ ਜ਼ਿਲ੍ਹੇ (ਪਹਿਲਾਂ ਅਹਿਮਦਨਗਰ) ਦੇ ਪਿੰਡ ਵਡਗਾਓਂ ਪਾਨ ਵਿੱਚ ਕਾਫ਼ੀ ਵੱਡੀ ਥਾਂ ਵਿੱਚ ਫ਼ੈਲੇ ਹੋਏ ਰਾਜੇਂਦਰ ਗੜਗੇ ਦੇ ਆਸ਼ਰਮ ਵਿੱਚ ਪਹੁੰਚ ਕੇ ਅਮੋਲ ਜੀ ਨੂੰ ਆਪਣੀਆਂ ਅੱਖਾਂ ‘ਤੇ ਯਕੀਨ ਨਹੀਂ ਹੋ ਰਿਹਾ ਸੀ। ਉਹਨਾਂ ਨੂੰ ਇਕੱਠ ਦੀ ਉਮੀਦ ਤਾਂ ਸੀ ਉੱਥੇ ਤਾਂ ਵੱਖ ਵੱਖ ਜਾਤਾਂ ਅਤੇ ਵਰਗਾਂ ਦੇ ਲੋਕਾਂ ਦਾ ਠਾਠਾਂ ਮਾਰਦਾ ਸਮੁੰਦਰ ਸੀ ਜੋ ਗੜਗੇ ਨੂੰ ਸੁਣਨ ਲਈ ਕਤਾਰਾਂ ਬੰਨੀ ਹੋਏ ਸਨ। ਇਸ ਹਜੂਮ ਵਿੱਚ ਇੱਕ ਆਦਮੀ ਸੀ ਜਿਸ ਦੇ ਪਿਸ਼ਾਬ ਵਾਲ਼ੀ ਨਾਲੀ ਲੱਗੀ ਹੋਈ ਸੀ ਜੋ ਨਾ ਤਾਂ ਸਿੱਧਾ ਖੜ੍ਹਾ ਹੋ ਪਾ ਰਿਹਾ ਸੀ ਅਤੇ ਨਾ ਹੀ ਉਸ ਤੋਂ ਆਪਣਾ ਸਿਰ ਸਿੱਧਾ ਰੱਖਿਆ ਜਾ ਰਿਹਾ ਸੀ।

‘ਬਾਬਾ ਜੀ’ ਦੀ ਇੱਕ ਝਲਕ ਪਾਉਣ ਲਈ ਲੋਕਾਂ ਦਾ ਇਕੱਠ ਅਤੇ ਜੋਸ਼ ਦੇਖ ਕੇ ਅਮੋਲ ਨੂੰ ਇੱਕੋ ਸਮੇਂ ਹੌਂਸਲਾ ਵੀ ਹੋਇਆ ਅਤੇ ਚਿੰਤਾ ਵੀ। ਇਸ ਇਕੱਠ ਨੇ ਉਹਨਾਂ ਦੇ ਸੰਗਮਨੇਰ – ਉਹ ਤਾਲੁਕਾ ਜਿੱਥੇ ਇਹ ਪਿੰਡ ਪੈਂਦਾ ਹੈ- ਆਉਣ ਦੇ ਫੈਸਲੇ ‘ਤੇ ਸਹੀ ਹੋਣ ਦੀ ਮੁਹਰ ਲਾ ਦਿੱਤੀ ਸੀ। ਪਰ ਉਹਨਾਂ ਦੇ ਮਨ ਵਿੱਚ ਇਸ ਗੱਲ ਦੀ ਚਿੰਤਾ ਵੀ ਸੀ ਏਨੇ ਹਜੂਮ ਵਿੱਚ ਉਹ ਗੜਗੇ ਜੀ ਨਾਲ਼ ਆਹਮੋ-ਸਾਹਮਣੇ ਗੱਲ ਕਿਵੇਂ ਕਰ ਸਕਣਗੇ।

“ਮੈਂ ਉੱਥੋਂ ਦੇ ਇੱਕ ਕਰਮਚਾਰੀ ਨੂੰ ਮਦਦ ਦੀ ਅਪੀਲ ਕੀਤੀ,” ਅਮੋਲ ਕਹਿੰਦੇ ਹਨ। “ਉਸ ਨੇ ਮੈਨੂੰ ਕਿਹਾ ਕਿ ਮਿਲ਼ ਕੇ ਦਿਖਾਉਣ ਲਈ 11,000 ਰੁਪਏ ਦੇਣੇ ਪੈਣਗੇ।”

ਇਹ ਉਹਨਾਂ ਦੀ ਮਹੀਨੇ ਦੀ ਕਮਾਈ ਤੋਂ ਹਜ਼ਾਰ ਰੁਪਏ ਜ਼ਿਆਦਾ ਸੀ। ਉਹਨਾਂ ਨੇ ਇਸ ਬਾਰੇ ਕਾਫ਼ੀ ਸੋਚਿਆ। ਉਹਨਾਂ ਦੀ ਮਾਂ ਅਤੇ ਪੁੱਤਰ ਦੀਆਂ ਲਾਚਾਰ ਅਤੇ ਸਵਾਲ ਭਰੀਆਂ ਅੱਖਾਂ ਉਹਨਾਂ ਵੱਲ ਦੇਖ ਰਹੀਆਂ ਸਨ। ਉਹਨਾਂ ਨੇ ਇੱਕ ਮਿੰਟ ਵਿੱਚ ਫ਼ੈਸਲਾ ਲੈ ਲਿਆ। ਜਦ ਉਹ ਏਨੀ ਦੂਰ ਆ ਹੀ ਗਏ ਹਨ ਤਾਂ ਥੋੜ੍ਹਾ ਹੋਰ ਸਹੀ। ਅਮੋਲ ਜੀ ਨੇ ਆਪਣੇ ਇੱਕ ਦੋਸਤ ਤੋਂ ਇੱਥੇ ਆਉਣ ਤੋਂ ਪਹਿਲਾਂ 20,000 ਰੁਪਏ ਉਧਾਰ ਲਏ ਸਨ। ਉਹਨਾਂ ਨੇ ਸੋਚਿਆ ਸੀ ਕਿ ਇਸ ਵਿੱਚੋਂ ਚੌਥਾ ਹਿੱਸਾ ਖਰਚ ਕਰ ਲੈਣਗੇ ਅਤੇ ਬਾਕੀ ਵਾਪਿਸ ਕਰ ਦੇਣਗੇ। ਪਰ ਹੁਣ ਉਹ ਰਾਹ ਤਾਂ ਬੰਦ ਹੋ ਚੁੱਕਿਆ ਸੀ।

“11,000 ਰੁਪਏ ਡੈਨ ਤੋਂ ਬਾਅਦ ਉਸ ਆਦਮੀ ਨੇ ਮੈਨੂੰ ਇੱਕ ਰਸੀਦ ਦਿੱਤੀ ਅਤੇ ਕਿਹਾ ਕਿ ਸਾਡੀ ਵਾਰੀ ਕੱਲ ਨੂੰ ਆਵੇਗੀ,” ਅਮੋਲ ਜੀ ਨੇ ਦੱਸਿਆ। ਆਸ਼ਰਮ ਵਿੱਚ ਕਮਰੇ ਬਣੇ ਹੋਏ ਹਨ ਜਿਨ੍ਹਾਂ ਵਿੱਚੋਂ ਇੱਕ ਵਿੱਚ ਉਹ ਤਿੰਨੋਂ ਠਹਿਰੇ ਸਨ।

ਅਗਲੀ ਦੁਪਹਿਰ, ਜਦੋਂ ‘ਮਹਾਰਾਜ’ ਰੋਹਨ ਅਤੇ ਰੰਜਨਾ ਜੀ ਨੂੰ ਮਿਲ਼ੇ ਤਾਂ ਉਹ ਮੁਲਾਕਾਤ 15 ਮਿੰਟ ਤੋਂ ਵੀ ਘੱਟ ਸਮੇਂ ਲਈ ਸੀ। ਉਹਨਾਂ ਨੇ ਅਮੋਲ ਜੀ ਨੂੰ ਆਸ਼ਰਮ ਤੋਂ ਹੀ ਕੁਝ ਆਯੁਰਵੈਦਿਕ ਦਵਾਈਆਂ ਖਰੀਦਣ ਲਈ ਕਿਹਾ ਜਿਸ ‘ਤੇ ਉਹਨਾਂ ਨੇ 8,000 ਹੋਰ ਰੁਪਏ ਖਰਚ ਕੀਤੇ।

“ਮੇਰਾ ਪੁੱਤਰ ਸਾਡੇ ਲਈ ਬਹੁਤ ਮਿਹਨਤ ਕਰਦਾ ਹੈ,” ਰੰਜਨਾ ਜੀ ਦੱਸਦੇ ਹਨ। “ਉਹ ਬਿਮਾਰ ਵੀ ਹੋਵੇ ਤਾਂ ਵੀ ਕੰਮ ਵਿੱਚ ਲੱਗਿਆ ਰਹਿੰਦਾ ਹੈ। ਮੈਂ ਉਸ ਦੀ ਮਿਹਨਤ ਦੀ ਕਮਾਈ ਨੂੰ ਜ਼ਾਇਆ ਨਹੀਂ ਕਰਨਾ ਚਾਹੁੰਦੀ।”

ਪਰ ਅਮੋਲ ਜੀ ਕੋਲ਼ ਆਪਣੇ ਦੋਸਤ ਤੋਂ ਉਧਾਰ ਲਏ ਹੋਏ ਪੈਸੇ ਵੀ ਖਤਮ ਹੋਣ ਕਿਨਾਰੇ ਸਨ। ਇੱਕ ਅਜਿਹਾ ਉਧਾਰ ਜੋ ਸ਼ਾਇਦ ਉਹ ਲੰਬੇ ਸਮੇਂ ਤੱਕ ਅਦਾ ਨਾ ਕਰ ਪਾਉਣ।

ਭਾਵੇਂ ਕਿ ਗੜਗੇ ਦਾਅਵਾ ਕਰਦੇ ਹਨ ਕਿ ਉਹ ਪਿਛਲੇ 30 ਸਾਲਾਂ ਤੋਂ ਲੋਕਾਂ ਦੀਆਂ ਸਮੱਸਿਆਵਾਂ ਦਾ ਨਿਦਾਨ ਕਰ ਰਹੇ ਹਨ, ਪਰ ਉਹ ਹਮੇਸ਼ਾ ਤੋਂ ਹੀ ਏਨੇ ਪ੍ਰਸਿੱਧ ਨਹੀਂ ਸਨ ਅਤੇ ਨਾ ਹੀ ਏਨੇ ਮਹਿੰਗੇ। ਰੰਜਨਾ ਗਵਾਂਡੇ, ਅਨੁਸਾਰ ਅਸਲ ਵਿੱਚ ਉਹਨਾਂ ਦੀ ਪ੍ਰਸਿੱਧੀ ਵਿੱਚ ਕੋਵਿਡ-19 ਤੋਂ ਬਾਅਦ ਇਜਾਫ਼ਾ ਹੋਇਆ ਹੈ, ਜੋ ਗੜਗੇ ਆਸ਼ਰਮ ਤੋਂ 45 ਮਿੰਟ ਦੀ ਦੂਰੀ ‘ਤੇ ਪੈਂਦੇ ਸੰਗਮਨੇਰ ਵਿੱਚ ਇੱਕ ਅੰਧਵਿਸ਼ਵਾਸ ਵਿਰੋਧੀ ਕਾਰਕੁੰਨ ਹਨ। ਉਹਨਾਂ ਦਾ 2017 ਵਿੱਚ ਇਸੇ ਸਮੇਂ ਦੌਰਾਨ ਯੂਟਿਊਬ ਚੈਨਲ ਸ਼ੁਰੂ ਹੋਇਆ ਸੀ।

“ਮਹਾਂਮਾਰੀ ਦੌਰਾਨ ਅਚਾਨਕ ਲੋਕਾਂ ਨੂੰ ਆਪਣੀ ਮੌਤ ਸਾਹਮਣੇ ਦਿਖਾਈ ਦੇਣ ਲੱਗੀ ਸੀ,” ਗਵਾਂਡੇ ਦਾ ਕਹਿਣਾ ਹੈ। “ਹਸਪਤਾਲ ਖਚਾਖਚ ਭਰੇ ਹੋਏ ਸਨ ਅਤੇ ਬੇਵੱਸ ਪਰਿਵਾਰਾਂ ਨੇ ਇਸ ਨਾਜ਼ੁਕ ਸਮੇਂ ਵਿੱਚ ਭਾਵਨਾਤਮਕ ਸਹਾਰੇ ਲਈ ਅਜਿਹੇ ਅੰਧਵਿਸ਼ਵਾਸ ਦਾ ਸਹਾਰਾ ਲਿਆ। ਇਸ ਨਾਜ਼ੁਕ ਮੌਕੇ ਦਾ ਗੜਗੇ ‘ਮਹਾਰਾਜ’ ਨੇ ਬੜੀ ਹੋਸ਼ਿਆਰੀ ਨਾਲ਼ ਫ਼ਾਇਦਾ ਚੁੱਕਿਆ।”

ਗਵਾਂਡੇ ਅੰਧਸ਼ਰਧਾ ਨਿਰਮੂਲਨ ਸਮਿਤੀ (ਏ. ਐਨ. ਆਈ. ਐਸ.) ਵਿੱਚ ਅਹੁਦੇਦਾਰ ਹਨ, ਜੋ ਅੰਧਵਿਸ਼ਵਾਸ ਵਿਰੋਧੀ ਸੰਸਥਾ ਹੈ ਜਿਸ ਦੇ ਸੰਸਥਾਪਕ ਨਰੇਂਦਰ ਦਾਭੋਲਕਰ ਦੀ 2013 ਵਿੱਚ ਹਿੰਦੂ ਕੱਟੜਪੰਥੀਆਂ ਨੇ ਹੱਤਿਆ ਕਰ ਦਿੱਤੀ ਸੀ। ਉਹਨਾਂ ਦੇ ਕਾਰਕੁੰਨ ਨਕਲੀ ਮਰੀਜ਼ ਬਣ ਕੇ ਰਾਜੇਂਦਰ ਗੜਗੇ ਦੇ ਆਸ਼ਰਮ ਗਏ ਸਨ।

“ਲਗਭਗ 10 ਸਾਲ ਪਹਿਲਾਂ ਗੜਗੇ ਨੂੰ ਮਿਲ਼ਣ ਲਈ ਉਡੀਕ ਸਮਾਂ ਮੁਸ਼ਕਿਲ ਨਾਲ਼ ਇੱਕ ਘੰਟਾ ਹੁੰਦਾ ਸੀ,” 34 ਸਾਲ ਦੇ ਪ੍ਰਸ਼ਾਂਤ ਪੰਸਾਰੇ ਦਾ ਕਹਿਣਾ ਹੈ ਜੋ ਪਹਿਲਾਂ ਵੀ ਦੋ ਵਾਰ ਆਸ਼ਰਮ ਜਾ ਚੁੱਕੇ ਹਨ। “ਅੱਜ ਜੇ ਤੁਹਾਡੀ ਵਾਰੀ ਛੇ-ਸੱਤ ਘੰਟਿਆਂ ਵਿੱਚ ਵੀ ਆ ਜਾਂਦੀ ਹੈ ਤਾਂ ਤੁਸੀਂ ਕਿਸਮਤ ਵਾਲ਼ੇ ਹੋ। ਪਹਿਲਾਂ ਤਾਂ ਫ਼ੀਸ ਵੀ ਸਿਰਫ਼ 300 ਰੁਪਏ ਹੁੰਦੀ ਸੀ।”

ਪਰ ਉਹਨਾਂ ਦੀ ਫ਼ੀਸ ਵਿੱਚ 3,500 ਫ਼ੀਸਦੀ ਦੇ ਇਜਾਫ਼ੇ ਨਾਲ਼ ਵੀ ਲੋਕਾਂ ਦੇ ਉਤਸ਼ਾਹ ਵਿੱਚ ਕੋਈ ਕਮੀ ਨਹੀਂ ਆਈ ਹੈ। ਇਸ ਦੇ ਉਲਟ ਉਹਨਾਂ ਦੇ ਧਿਆਨਪੂਰਵਕ ਚਲਾਏ ਜਾਂਦੇ ਯੂਟਿਊਬ ਚੈਨਲ ਨੇ ਉਹਨਾਂ ਦੀ ਪ੍ਰਸਿੱਧੀ ਵਿੱਚ ਹੋਰ ਵਾਧਾ ਕੀਤਾ ਹੈ। ‘ਗੜਗੇ ਮਹਾਰਾਜ’ ਦੀਆਂ ਪਰਵਚਨ ਦੀਆਂ ਘੰਟੇ ਲੰਬੀਆਂ ਵੀਡਿਓ ਹਨ, ਇਸ ਦੇ ਨਾਲ਼ ਹੀ ਛੋਟੀਆਂ ਵੀਡਿਓ ਵੀ ਹਨ ਜੋ ਉਹਨਾਂ ਦੇ ਇੰਸਟਾਗ੍ਰਾਮ ਪੇਜ ‘ਟੇ ਜਾਂਦੀਆਂ ਹਨ ਜਿੱਥੇ ਉਹਨਾਂ ਦੇ 2.20,000 ਫ਼ਾਲੋਅਰ ਹਨ।

ਇੱਕ ਵੀਡਿਓ ਵਿੱਚ ਗੜਗੇ ਉਮਰ ਦੇ ਤੀਹਵਿਆਂ ਅਤੇ ਚਾਲੀਵਿਆਂ ਵਿੱਚ ਅਣਵਿਆਹੇ ਦਰਸ਼ਕਾਂ ਨੂੰ ਸੰਬੋਧਨ ਕਰ ਰਹੇ ਸਨ। ਪਿਛੋਕੜ ਵਿੱਚ ਮੱਧਮ ਜਿਹੇ ਸੁਖਦ ਸੰਗੀਤ ਵਿੱਚ ਉਹ ਇੱਕ ਲੈਅ ਵਿੱਚ ਬੋਲਦੇ ਹਨ। “ਆਪਣੇ ਕੱਦ ਜਿੰਨੀ ਲੰਬੀ ਰੂੰ ਦੀ ਬੱਤੀ ਬਣਾਉ,” ਉਹ ਕਹਿੰਦੇ ਹਨ। “ਇਸ ਨੂੰ ਲਗਾਤਾਰ ਤਿੰਨ ਵੀਰਵਾਰ ਦੱਤਾ ਪ੍ਰਭੂ ਦੇ ਮੰਦਿਰ ਵਿੱਚ ਜਗਾਓ। ਜਲਦ ਹੀ ਤੁਹਾਡਾ ਵਿਆਹ ਹੋਵੇਗਾ।”

ਇੱਕ ਹੋਰ ਵੀਡਿਓ ਵਿੱਚ, ਉਹ ਅਜਿਹੀ ਸਮੱਸਿਆ ਦਾ ਹੱਲ ਦੱਸਦੇ ਹਨ ਜੋ ਬਹੁਤ ਕੋਸ਼ਿਸ਼ਾਂ ਬਾਅਦ ਵੀ ਜਾ ਨਹੀਂ ਰਹੀ। “ਆਪਣੇ ਘਰ ਵਿੱਚ ਪਾਣੀ ਵਾਲ਼ੇ ਬਰਤਨ ਨੇੜੇ ਇੱਕ ਕੌਲੀ ਰੱਖੋ,” ਉਹ ਕਹਿੰਦੇ ਹਨ। “ਇਸ ਵਿੱਚ ਥੋੜ੍ਹਾ ਜਿਹਾ ਗੰਗਾਜਲ ਪਾਉ। ਆਪਣੇ ਹੱਥ ਵਿੱਚ ਇੱਕ ਸਿੱਕਾ ਲਉ ਅਤੇ ਕਹੋ ‘ਦੱਤਾਧਾਮ ਸਰਕਾਰ ਕੀ ਜੈ’। ਆਪਣੀ ਹਥੇਲੀ ਮੱਥੇ ‘ਤੇ ਲਾਉ ਅਤੇ ਸਿੱਕਾ ਕੌਲੀ ਵਿੱਚ ਸੁੱਟ ਦਿਉ। ਥੋੜ੍ਹਾ ਜਿਹਾ ਗੰਗਾਜਲ ਆਪਣੀਆਂ ਅੱਖਾਂ ‘ਤੇ ਛਿੜਕੋ। ਇਸ ਨਾਲ਼ ਤੁਹਾਡੀ ਸਮੱਸਿਆ ਦਾ ਹੱਲ ਹੋ ਜਾਵੇਗਾ।”

ਇਸ ਚੈਨਲ ‘ਤੇ ਅਜਿਹੀਆਂ ਹੋਰ ਕਈ ਵੀਡਿਓ ਦੇ ਹੱਕ ਵਿੱਚ ਆਉਂਦੀਆਂ ਹਨ ਸ਼ਰਧਾਲੂਆਂ ਦੀਆਂ ਗਵਾਹੀਆਂ, ਜੋ ‘ਬਾਬਾ ਜੀ’ ਨੂੰ ਵੱਖ-ਵੱਖ ਬਿਮਾਰੀਆਂ ਦਾ ਇਲਾਜ ਕਰਨ ਲਈ ਸ਼ੁਕਰਗੁਜ਼ਾਰ ਹਨ।

30 ਸਾਲਾਂ ਦੀ ਅਨੀਤਾ (ਬੇਨਤੀ ‘ਤੇ ਨਾਮ ਬਦਲਿਆ) ਨੇ ਵੀ ਅਜਿਹੀ ਇੱਕ ਵੀਡਿਓ ਦੇਖੀ ਅਤੇ ਗੜਗੇ ਦੇ ਆਸ਼ਰਮ ਵਿੱਚ ਆਪਣੀ ਸੱਸ ਦੇ ਨਾਲ਼ ਭੱਜੀ ਆਈ ਜਿਨ੍ਹਾਂ ਦੇ ਖੱਬੇ ਪੈਰ ‘ਤੇ ਬੜੀ ਡੂੰਘੀ ਸੱਟ ਲੱਗੀ ਹੈ। “ਡਾਕਟਰਾਂ ਨੇ ਕਿਹਾ ਹੈ ਉਹਨਾਂ ਦੀ ਲੱਤ ਕੱਟਣੀ ਪਵੇਗੀ,” ਆਸ਼ਰਮ ਵਿੱਚ ਇੱਕ ਸ਼ੈੱਡ ਹੇਠਾਂ ਬੈਠੇ ਉਹ ਕਹਿੰਦੇ ਹਨ। “ਅਸੀਂ ਉਸ ਪਾਸੇ ਨਹੀਂ ਜਾਣਾ ਚਾਹੁੰਦੇ ਸੀ ਤਾਂ ਸੋਚਿਆ ਕਿ ਸ਼ਾਇਦ ਇੱਥੇ ਕੋਈ ਰਾਹ ਮਿਲ਼ ਜਾਵੇ।”

ਮਹਾਰਾਸ਼ਟਰ ਦੇ ਸਤਾਰਾ ਜ਼ਿਲ੍ਹੇ ਵਿੱਚ ਇੱਕ ਏਕੜ ਜ਼ਮੀਨ ਵਾਲ਼ੀ ਛੋਟੀ ਜਿਹੀ ਕਿਸਾਨ ਅਨੀਤਾ, ਆਪਣੀ ਲੋੜ ਜਿੰਨੀ ਖੇਤੀ ਕਰਦੇ ਹਨ। ਉਹ ਕਿਸੇ ਵੀ ਤਰੀਕੇ ਗੜਗੇ ਦੀ ਸਲਾਹ ਫ਼ੀਸ ਜਾਂ ਦਵਾਈਆਂ ਦਾ ਖਰਚਾ ਨਹੀਂ ਝੱਲ ਸਕਦੇ ਸਨ। ਕੁਝ ਲੋਕਾਂ ਲਈ ਪ੍ਰਾਥਨਾ ਤੋਂ ਬਿਨਾਂ ਹੋਰ ਕੋਈ ਚਾਰਾ ਨਹੀਂ ਹੁੰਦਾ।

ਪਰ ਉਹਨਾਂ ਨੂੰ ਇੱਕ ਕਿਰਾਏ ‘ਤੇ ਕਾਰ ਕਰਾਉਣੀ ਪਈ ਕਿਉਂਕਿ ਉਹਨਾਂ ਦੀ ਸੱਸ ਕਿਸੇ ਵੀ ਹਾਲ ਵਿੱਚ ਬੱਸ ਦਾ ਸਫ਼ਰ ਨਹੀਂ ਕਰ ਸਕਦੀ ਸੀ। “ਮੇਰਾ 8,000 ਰੁਪਏ ਦਾ ਖਰਚਾ ਹੋ ਗਿਆ,” ਉਹ ਕਹਿੰਦੇ ਹਨ। “ਮੇਰੀ ਭੈਣ ਨੇ ਮੈਨੂੰ ਯੂਟਿਊਬ ਵੀਡਿਓ ਦਾ ਲਿੰਕ ਭੇਜਿਆ ਜਿੱਥੇ ਗੜਗੇ ਮਹਾਰਾਜ ਇੱਕ ਔਰਤ ਦਾ ਸੜ ਰਿਹਾ ਪੈਰ ਠੀਕ ਕਰ ਦਿੰਦੇ ਹਨ। ਮੈਂ ਹੋਰ ਵੀ ਬਹੁਤ ਵੀਡਿਓ ਦੇਖੀਆਂ ਅਤੇ ਇੱਥੇ ਆਉਣ ਦਾ ਫ਼ੈਸਲਾ ਲਿਆ।”

886 ਮਿਲੀਅਨ ਸਰਗਰਮ ਉਪਭੋਗਤਾਵਾਂ ਨਾਲ਼ 2024 ਵਿੱਚ ਭਾਰਤ ਵਿੱਚ ਇੰਟਰਨੈੱਟ ਦੀ ਪਹੁੰਚ 58 ਪ੍ਰਤੀਸ਼ਤ ਤੱਕ ਸੀ। ਅਤੇ ਹੁਣ ਇਹ ਸਿਰਫ਼ ਸ਼ਹਿਰੀ ਖੇਤਰਾਂ ਤੱਕ ਸੀਮਿਤ ਨਹੀਂ। ਇਹਨਾਂ ਵਿੱਚੋਂ ਲਗਭਗ 488 ਮਿਲੀਅਨ ਲੋਕ ਭਾਰਤ ਦੇ ਪੇਂਡੂ ਖਿੱਤਿਆਂ ਵਿੱਚ ਰਹਿੰਦੇ ਹਨ ਜੋ ਸ਼ਹਿਰੀ ਵੱਸੋਂ ਨਾਲੋਂ ਕਿਤੇ ਜ਼ਿਆਦਾ ਹੈ।

ਸਮਾਜ ਵਿੱਚ ਇੰਟਰਨੈਟ ਦੇ ਵਿਸਤਾਰ ਨੇ ਬਾਬਿਆਂ ਦੀ ਪ੍ਰਸਿੱਧੀ ਅਤੇ ਪ੍ਰਭਾਵ ਵਿੱਚ ਕਾਫ਼ੀ ਵਾਧਾ ਕੀਤਾ ਹੈ। ਭਾਰਤ ਵਿੱਚ ਹੁਣ ਜੜ੍ਹ ਫੜ ਚੁੱਕਾ ਧਾਰਮਿਕ ਰਾਸ਼ਟਰਵਾਦ ਦਾ ਮਾਹੌਲ ਉਨ੍ਹਾਂ ਨੂੰ ਹੋਰ ਅੱਗੇ ਲੈ ਕੇ ਜਾਂਦਾ ਹੈ। ਇਹ ਸਭ ‘ਬਾਬਿਆਂ’ ਦੇ ਅਕਸ ਨੂੰ ਕਾਨੂੰਨੀ ਮਾਨਤਾ ਦਿੰਦਾ ਹੈ ਅਤੇ ਉਨ੍ਹਾਂ ਦੀ ਸਜ਼ਾ ਤੋਂ ਮੁਕਤੀ ਨੂੰ ਹੋਰ ਵਧਾਉਂਦਾ ਹੈ।

ਜਿਸ ਦਿਨ ਮੈਂ ਆਸ਼ਰਮ ਗਿਆ ਤਾਂ ‘ਮਹਾਰਾਜ’ ਨੇ ਡੇੜ੍ਹ ਘੰਟੇ ਵਿੱਚ 20 ਲੋਕਾਂ ਨੂੰ ਮਿਲ਼ਣਾ ਸੀ ਜਿਨ੍ਹਾਂ ਨੇ ਉਹਨਾਂ ਨੂੰ ਇਕੱਲੇ ਮਿਲ਼ਣ ਲਈ 11,000 ਰੁਪਏ ਖਰਚੇ ਸਨ। ਦੂਜੇ ਲਫ਼ਜ਼ਾਂ ਵਿੱਚ ਉਹਨਾਂ ਨੇ ਕੁਝ ਭੋਲੇ ਲੋਕਾਂ ਕੋਲੋਂ 90 ਮਿੰਟਾਂ ਵਿੱਚ 2,20,000 ਬਣਾ ਲਏ ਸਨ- ਜਿਨ੍ਹਾਂ ਵਿੱਚੋਂ ਜ਼ਿਆਦਾਤਰ ਅਨਪੜ੍ਹ ਹਨ ਅਤੇ ਜਿਨ੍ਹਾਂ ਨੂੰ ਇਹ ਅੰਦਾਜ਼ਾ ਨਹੀਂ ਕਿ ਉਹਨਾਂ ਦੀ ਰੋਟੀ ਕਿਥੋਂ ਆਵੇਗੀ। ਉਹਨਾਂ ਦੇ ਆਸ਼ਰਮ ਵਿੱਚ ਰੋਜ਼ਾਨਾ ਹਜ਼ਾਰਾਂ ਲੋਕ ਆਉਂਦੇ ਹਨ। ਕੋਈ ਅੰਦਾਜ਼ਾ ਨਹੀਂ ਕਿ ਉਹ ਇਹਨਾਂ ਲੋਕਾਂ ਕੋਲੋਂ ਕਿੰਨਾ ਪੈਸਾ ਬਣਾ ਲੈਂਦੇ ਹਨ।

ਪਰ, ਸਭ ਤੋਂ ਨੇੜੇ ਰਹਿੰਦੇ ਸਥਾਨਕ ਲੋਕਾਂ ਦੀ ਆਸ਼ਰਮ ਤੱਕ ਪਹੁੰਚ ਬਹੁਤ ਹੀ ਸੀਮਿਤ ਹੈ। ਜਦ ਆਪਣੀ ਪਹਿਲੀ ਫੇਰੀ ਦੇ ਡੇੜ੍ਹ ਮਹੀਨੇ ਬਾਅਦ ਅਮੋਲ ਜੀ ਆਪਣੇ ਬੇਟੇ ਅਤੇ ਮਾਂ ਨਾਲ਼ ਗੜਗੇ ਜੀ ਦੇ ਆਸ਼ਰਮ ਪਹੁੰਚੇ ਤਾਂ ਆਟੋ ਡਰਾਈਵਰ ਨੇ ਉਹਨਾਂ ਨੂੰ ਕਿਹਾ ਕਿ ਉਹ ਆਪਣਾ ਸਮਾਂ ਖਰਾਬ ਕਰ ਰਹੇ ਹਨ। “ਉਹਨਾਂ ਨੇ ਕਿਹਾ ਕਿ ਉਹ ਬੰਦਾ ਧੋਖੇਬਾਜ਼ ਹੈ,” ਅਮੋਲ ਦੱਸਦੇ ਹਨ। “ਪਰ ਮੈਨੂੰ ਲੱਗਿਆ ਕਿ ਸਿਰਫ਼ ਇੱਕ ਫੇਰੀ ਦੇ ਬਾਅਦ ਕਿਸੇ ਨਤੀਜੇ ‘ਤੇ ਪਹੁੰਚਣਾ ਸਹੀ ਨਹੀਂ ਹੈ।”

ਇਸ ਵਾਰ ਉਹਨਾਂ ਕੋਲ਼ ‘ਬਾਬਾ ਜੀ’ ਨਾਲ਼ ਇਕੱਲਿਆਂ ਮਿਲਣੀ ਕਰਨ ਲਈ ਪੈਸੇ ਨਹੀਂ ਸਨ। ਅਮੋਲ ਸਿੱਧਾ ਕਾਊਂਟਰ ‘ਤੇ ਗਏ ਅਤੇ ਪੁਰਾਣੀ ਦਵਾਈ ਹੀ ਦੁਬਾਰਾ ਲੈ ਲਈ। “ਅਸੀਂ ਘੱਟ ਮਾਤਰਾ ਵਿੱਚ ਦਵਾਈ ਲਈ ਜਿਸ ਨਾਲ਼ ਸਾਡਾ ਬਿੱਲ 4.000 ਰੁਪਏ ਦਾ ਬਣਿਆ,” ਉਹਨਾਂ ਦੀ ਮਾਂ ਰੰਜਨਾ ਦਾ ਕਹਿਣਾ ਹੈ। ਇਹ ਵੀ ਅਮੋਲ ਦੀ ਇੱਕ ਮਹੀਨੇ ਦੀ ਤਨਖਾਹ ਦਾ ਲਗਭਗ ਅੱਧ ਹੀ ਬਣ ਜਾਂਦਾ ਹੈ।

ਗਵਾਂਡੇ ਕੁਝ ਸਮੇਂ ਤੋਂ ਰਾਜੇਂਦਰ ਗੜਗੇ ਖਿਲਾਫ਼ ਸ਼ਿਕਾਇਤ ‘ਤੇ ਕੰਮ ਕਰ ਰਹੇ ਸਨ, ਜੋ ਅਖੀਰ ਜਾ ਕੇ ਅਪ੍ਰੈਲ ਵਿੱਚ ਰਜਿਸਟਰ ਹੋਈ, ਜਿਸ ਸਦਕਾ ਇਸ ‘ਬਾਬੇ’ ਅਤੇ ਉਸ ਦੇ ਚਾਰ ਸਾਥੀਆਂ ਦੀ ਗ੍ਰਿਫ਼ਤਾਰੀ ਸੰਭਵ ਹੋਈ। ਉਹਨਾਂ ਨੂੰ ਅੰਧਵਿਸ਼ਵਾਸ ਵਿਰੋਧੀ ਐਕਟ, 2013, ਆਈ. ਟੀ. ਐਕਟ, ਡਰੱਗਸ ਅਤੇ ਰੈਮੇਡੀਸ ਐਕਟ ਅਤੇ ਮੈਡੀਕਲ ਪ੍ਰੈਕਟੀਸ਼ਨਰ ਐਕਟ ਤਹਿਤ ਗਿਰਫ਼ਤਾਰ ਕੀਤਾ ਗਿਆ।

“ਉਹਨਾਂ ਨੇ ਇੱਕ ਏ. ਆਈ. ਵੀਡਿਓ ਬਣਾਈ ਅਤੇ ਦਾਅਵਾ ਕੀਤਾ ਕਿ ਏ. ਐਨ. ਆਈ. ਐਸ. ਉਹਨਾਂ ਨੂੰ ਪੈਸਿਆਂ ਲਈ ਧਮਕਾ ਰਹੀ ਹੈ,” ਗਵਾਂਡੇ ਦਾ ਕਹਿਣਾ ਹੈ। “ਉਸ ਤੋਂ ਪਹਿਲਾਂ ਉਹਨਾਂ ਨੇ ਮੇਰੇ ‘ਤੇ ਦਬਾਅ ਬਨਾਉਣ ਦੀ ਵੀ ਕੋਸ਼ਿਸ਼ ਕੀਤੀ ਸੀ।”

ਵਡਗਾਓਂ ਪਾਨ, ਜਿੱਥੇ ਗੜਗੇ ਦਾ ਸਾਮਰਾਜ ਸਥਿਤ ਹੈ, ਦੇ ਲੋਕਾਂ ਦੇ ਮਨ ਵਿੱਚ ਉਹਨਾਂ ਪ੍ਰਤੀ ਕੁਝ ਸ਼ੰਕੇ ਸਨ। ਪਰ ਉੱਥੇ ਆਉਂਦੇ ਲੋਕਾਂ ਕਾਰਨ ਚਾਹ ਦੇ ਖੋਖਿਆਂ, ਢਾਬਿਆਂ ਅਤੇ ਰਾਸ਼ਨ ਦੀਆਂ ਦੁਕਾਨਾਂ ‘ਤੇ ਵਪਾਰ ਵੱਧਣਾ ਸ਼ੁਰੂ ਹੋ ਗਿਆ।

ਸੀਮਿਤ ਸਾਧਨਾਂ ਦੇ ਹੁੰਦਿਆਂ ਵੀ ਅਮੋਲ ਪੰਢਰਪੁਰ ਵਾਪਸੀ ਤੋਂ ਪਹਿਲਾਂ ਚਾਹ ਦਾ ਕੱਪ ਅਤੇ ਕੁਝ ਖਾਣ ਲਈ ਖਰੀਦ ਕੇ ਹੀ ਗਏ ਸਨ। ਉਹਨਾਂ ਦੇ ਤੀਸਰੀ ਵਾਰ ਆਉਣ ਦਾ ਸਬੱਬ ਨਾ-ਬਰਾਬਰ ਹੀ ਸੀ ਕਿਉਂਕਿ ਉਹ ਬਿਨਾਂ ਕਿਸੇ ਠੋਸ ਨਤੀਜੇ ਦੇ 23,000 ਰੁਪਏ ਖਰਚ ਚੁੱਕੇ ਸਨ।

ਇਹ ਤਿੰਨੋਂ ਵਾਪਸੀ ‘ਤੇ ਇੱਕ ਸਫ਼ੇਦ ਮਰਸੀਡੀਸ ਕੋਲੋਂ ਗੁਜ਼ਰਦੇ ਹਨ। ਇਸ ਸ਼ਾਨਦਾਰ ਗੱਡੀ ਵਿੱਚ ‘ਮਹਾਰਾਜ’ ਹੁਣੇ ਹੀ ਆਸ਼ਰਮ ਵਿੱਚ ਆਏ ਹਨ। ਭਾਰਤ ਵਿੱਚ ਇਸ ਮਾਡਲ ਦੀ ਮੁੱਢਲੀ ਕੀਮਤ 65 ਲੱਖ ਰੁਪਏ ਹੈ। ਦੂਜੇ ਪਾਸੇ ਅਮੋਲ, ਰੰਜਨਾ ਅਤੇ ਰੋਹਨ 10 ਰੁਪਏ ਪ੍ਰਤੀ ਸੀਟ ਵਾਲ਼ੇ ਆਟੋ ‘ਤੇ ਬੈਠ ਕੇ ਆਪਣੇ ਘਰ ਵਾਪਸੀ ਦਾ ਨੌਂ ਘੰਟੇ ਦਾ ਲੰਬਾ ਮੁਸ਼ਕਿਲ ਸਫ਼ਰ ਸ਼ੁਰੂ ਕਰਦੇ ਹਨ।