ഗഡ്‌ഗെ എന്ന "മനുഷ്യദൈവ'വും, അദ്ദേഹത്തിന്റെ യൂട്യൂബ്‌ അത്ഭുതങ്ങളും

പുലിറ്റ്സർ സെന്ററിന്റെ പിന്തുണയോടെ പാർത്ഥ്‌ എം എൻ തയ്യാറാക്കിയ പരമ്പരയുടെ ഭാഗമായ സ്‌റ്റോറിയാണിത്‌.

സഹോദരൻ അയച്ച യൂട്യൂബ് ചാനൽ ലിങ്ക് കാരണം അമോൽ ഖണ്ഡേക്കറിന് അദ്ദേഹത്തിന്റെ മാസവരുമാനത്തിന്റെ ഇരട്ടിയിലധികം നഷ്ടമുണ്ടായി. അതൊരു ഓൺലൈൻ ഫിഷിങ്‌ തട്ടിപ്പൊന്നുമല്ലായിരുന്നു.

ജീവിതത്തിന്റെ രണ്ടറ്റവും കൂട്ടിമുട്ടിക്കാൻ പാടുപെടുന്ന 35-കാരനായ ഈ തൊഴിലാളി ആ ലിങ്കിലെ ദൃശ്യങ്ങൾ കണ്ടതോടെ പുലർച്ചെതന്നെ ബസിൽ യാത്ര തിരിച്ചു. തലയിൽ ചെറിയ മുഴയുള്ള 11-കാരനായ മകനും സന്ധിവേദനകളാൽ ബുദ്ധിമുട്ടുന്ന വയോധികയായ അമ്മയും ഉണ്ടായിരുന്നു കൂടെ. തകർന്ന സ്റ്റേറ്റ് ട്രാൻസ്‌പോർട്ട് ബസിലെ ഒമ്പത് മണിക്കൂർ യാത്ര അമ്മയുടെ മുട്ടുവേദന കൂടുതൽ രൂക്ഷമാക്കിയെങ്കിലും ആ യാത്ര തങ്ങൾക്ക്‌ വലിയ ഗുണം ചെയ്യുമെന്ന പ്രതീക്ഷയിലായിരുന്നു അവർ. അവരുടെയെല്ലാം ആരോഗ്യപ്രശ്നങ്ങൾക്ക് പരിഹാരം ആ യൂട്യൂബ് ചാനലിലാണെന്ന് അമോലിന്റെ സഹോദരപുത്രൻ ഉറപ്പ്‌ നൽകിയിരുന്നു.

നെറ്റിയിൽ ഭസ്മം പൂശിയ താടിക്കാരനായ ഒരു ‘മനുഷ്യദൈവം’ ആയിരക്കണക്കിന് പേരെ അഭിസംബോധന ചെയ്യുന്ന വീഡിയോകളായിരുന്നു ആ യൂട്യൂബ്‌ ചാനലിലുണ്ടായിരുന്നത്‌. കുടുംബപ്രശ്നങ്ങൾ മുതൽ മദ്യാസക്തിവരെ, തൊഴിൽപ്രശ്നങ്ങൾ മുതൽ അർബുദംവരെ, മാനസികാരോഗ്യ പ്രശ്നങ്ങൾ മുതൽ പ്രണയജീവിതംവരെ — രാജേന്ദ്ര ഗഡ്ഗെ ‘മഹാരാജിന്റെ’ കൈയിൽ എല്ലാത്തിനും പരിഹാരമുണ്ടെന്ന്‌ ആ ദൃശ്യങ്ങൾ അവകാശപ്പെട്ടു.

വിഷ്ണുവിന്റെ അവതാരമായി അവകാശപ്പെടുന്ന സന്യാസിയായ ദത്തയുടെ കീഴിൽ 12 വർഷത്തെ ആത്മീയപഠനം പൂർത്തയാക്കിയ ആളാണ്‌ ഗഡ്ഗെ എന്നാണ്‌ അദ്ദേഹത്തിന്റെ ചാനലിന്റെ വാദം. “അദ്ദേഹത്തിന്റെ സമർപ്പിത ആത്മീയതയുടെ ഫലമായി ദത്ത ഗുരു ഗഡ്ഗെ മഹാരാജിനെ അനുഗ്രഹിച്ചു,” എന്ന് ചാനലിന്റെ ‘ആമുഖ’ത്തിൽ പറയുന്നു. “മരുന്നിന്റെയും പ്രാർത്ഥനയുടെയും സഹായത്തോടെ ഭക്തരുടെ പ്രശ്നങ്ങൾ അദ്ദേഹം പരിഹരിച്ചുകൊണ്ടിരിക്കുകയാണ്” എന്നും അതിലുണ്ട്.

‘ദത്തധാം സർക്കാർ സംഗമ്നേർ’ എന്ന പേരിലുള്ള യൂട്യൂബ് ചാനലിന് 1,83,000 സബ്സ്ക്രൈബർമാരും ഓരോ വീഡിയോയ്ക്കും കീഴിൽ ആവേശകരമായ കമന്റുകളും ഉണ്ടായിരുന്നു. “ഇത്രയും ആളുകൾ പിന്തുടരുന്നുണ്ടെങ്കിൽ നല്ല കാര്യം ചെയ്യുന്നുണ്ടാകണം,” എന്ന് അമോലും കരുതി.

പന്ധർപൂരിന് സമീപമുള്ള ഒരു ചെറിയ ഗ്രാമത്തിൽനിന്നുള്ള അമോൽ പഠനം ഉപേക്ഷിച്ച് മാതാപിതാക്കളെ സഹായിക്കാൻ ചെറുപ്പംമുതൽ ചെറിയ ജോലികൾ ചെയ്യാൻ തുടങ്ങിയിരുന്നു. “ഇപ്പോൾ ഞാൻ ഒരു വ്യവസായിയുടെ ഡ്രൈവറായി ജോലി ചെയ്യുകയാണ്,” അദ്ദേഹം പറഞ്ഞു. “പ്രദേശത്തെ വിവിധ കർഷകരിൽനിന്ന് വിളവെടുത്ത് ചന്തയിലെത്തിക്കുന്നതാണ് എന്റെ ജോലി.”

ഇത് സാധാരണയായി രണ്ടുപേർ ചെയ്യേണ്ട ജോലിയാണ് — ഒരാൾ ടെംപോ ഓടിക്കും, മറ്റൊരാൾ ചാക്കുകൾ കയറ്റും. പക്ഷേ അധിക വരുമാനത്തിനായി അമോൽ രണ്ട്‌ ജോലിയും സ്വയം ഏറ്റെടുത്തു. ഇത്രയും കഠിനമായ അധ്വാനത്തിന്‌ ശേഷവും പ്രതിമാസം ലഭിക്കുന്നത്‌ വെറും 10,000 രൂപയാണ് — അതാണ് കുടുംബത്തിന്റെ ഏക വരുമാനം. പത്തേക്കർ ഫലഭൂയിഷ്‌ഠമായ കൃഷിയിടമുണ്ടെങ്കിലും കുടുംബ തർക്കം കാരണം അത് ഉപയോഗിക്കാനാകാതെ കിടക്കുകയാണ്.

അമോലിന്റെ മാസവരുമാനം അഞ്ചംഗ കുടുംബത്തിന്റെ അടിസ്ഥാനാവശ്യങ്ങൾ നിറവേറ്റാൻപോലും തികയുമായിരുന്നില്ല. സന്ധിവേദന കഠിനമായിരുന്നിട്ടും ഡോക്ടറെ കാണുന്നത് നീട്ടികൊണ്ടുപോകുകയായിരുന്നു അറുപതുകളുടെ അവസാനത്തിലുള്ള അയാളുടെ അമ്മ രഞ്ജന. എന്നാൽ മകൻ രോഹന്റെ വലത് കണ്ണിന് മുകളിൽ ഒരു മുഴ കണ്ടപ്പോൾ അമോൽ ഭയപ്പാടോടെ ഉടൻ ഡോക്ടറെ സമീപിച്ചു. ഡോക്ടർ സിടി സ്കാൻ എടുക്കാനും നിർദേശിച്ചു.

സ്കാനിങ്‌ റിപ്പോർട്ടിൽ ആശങ്കാജനകമായ ഒന്നുമില്ലായിരുന്നു.

രോഹന്‌ അപകടകാരിയല്ലാത്ത ഒരു മുഴ മാത്രമാണുള്ളതെന്നും മരുന്ന് കഴിച്ചാൽ അത് കുറയുമെന്നും ഡോക്ടർ പറഞ്ഞു. രോഹൻ പഠനത്തിൽ പിന്നോക്കം പോയതിന്‌ തലയിലെ മുഴ കാരണമാകാമെന്ന് ഗ്രാമത്തിലെ ഒരു അയൽവാസി പറഞ്ഞു. അപ്പോഴാണ് അമോലിന്റെ സഹോദരപുത്രൻ യൂട്യൂബ് ലിങ്ക് അയച്ച് ‘ഗഡ്ഗെ മഹാരാജിനെ’ കാണാൻ ഉപദേശിച്ചത്.

“എന്തായാലും പോകുകയാണല്ലോ, സന്ധിവേദനയ്ക്ക്‌ പരിഹാരം കിട്ടുമെന്ന പ്രത‍ീക്ഷയിൽ എന്റെ അമ്മയും ഒപ്പം വരാൻ തീരുമാനിച്ചു,” അമോൽ പറഞ്ഞു.

ഒമ്പത് മണിക്കൂർ നീണ്ട ബസ് യാത്രയ്ക്കുശേഷം അവർ ഷെയർ ഓട്ടോറിക്ഷയിൽ കയറി ലക്ഷ്യസ്ഥാനത്തെത്തി. അഹില്യാനഗർ ജില്ലയിലെ (മുൻ അഹമ്മദ്നഗർ) വാഡ്ഗാവ് പാൻ ഗ്രാമത്തിലുള്ള രാജേന്ദ്ര ഗഡ്ഗെയുടെ വിശാലമായ ആശ്രമത്തിലെത്തിയ അമോലിന്‌ തന്റെ കണ്ണുകളെ വിശ്വസിക്കാനായില്ല. ആശ്രമത്തിൽ വലിയ തിരക്ക് പ്രതീക്ഷിച്ചിരുന്നെങ്കിലും വിവിധ ജാതി-സാമൂഹിക പശ്ചാത്തലങ്ങളിലുള്ളവർ ഇങ്ങനെ കൂട്ടമായി ഒഴുകിയെത്തുമെന്ന് അദ്ദേഹം കരുതിയിരുന്നില്ല. അവരിൽ നേരെ നിൽക്കാനോ തല ഉയർത്താനോപോലും ബുദ്ധിമുട്ടുന്ന ശരീരത്തിൽ കത്തീറ്റർ ഘടിപ്പിച്ച ഒരാളും ഉണ്ടായിരുന്നു.

ആ ‘മനുഷ്യദൈവത്തെ’ ഒരുനോക്ക്‌ കാണാനായുള്ള തിരക്കും ആവേശവും അമോലിന്‌ ഒരേസമയം ആത്മവിശ്വാസവും ആശങ്കയും ഉണ്ടാക്കി. ഇത്രയും ദൂരം സംഗമ്നേറിലേക്ക് വന്ന തന്റെ തീരുമാനം ശരിയാണെന്ന് തോന്നിപ്പിച്ചെങ്കിലും, ഗഡ്ഗെയെ നേരിൽക്കണ്ട് സംസാരിക്കാൻ അവസരം കിട്ടുമോ എന്ന ആശങ്കയും ഉണ്ടായിരുന്നു.

“ഞാൻ അവിടെയുള്ള ഒരു ജീവനക്കാരനോട് സഹായം ചോദിച്ചു,” അമോൽ പറഞ്ഞു. “സ്വകാര്യ പരിശോധനയ്ക്ക് 11,000 രൂപ നൽകേണ്ടിവരുമെന്നാണ്‌ അദ്ദേഹം പറഞ്ഞത്‌.”

അമോലിന്റെ മാസവരുമാനത്തേക്കാൾ ആയിരം രൂപ കൂടുതലായിരുന്നു അത്‌. ഒരുനിമിഷം അദ്ദേഹം ആലോചിച്ചു. അമ്മയും മകനും പ്രതീക്ഷ നിറഞ്ഞ കണ്ണുകളാൽ അദ്ദേഹത്തെ നോക്കിക്കൊണ്ടിരുന്നു. ഒരു മിനിറ്റിന്‌ ശേഷം അദ്ദേഹം തീരുമാനിച്ചു. ഇത്രയും ദൂരം വന്നതല്ലേ, കുറച്ചുകൂടി മുന്നോട്ടുപോകാം. ഈ യാത്രയ്ക്കായി അമോൽ സുഹൃത്തിൽനിന്ന് 20,000 രൂപ കടം വാങ്ങിയിരുന്നു. അതിൽ നാലിലൊന്ന് മാത്രം ചെലവാക്കി ബാക്കി തിരികെ നൽകാമെന്നാണ് അദ്ദേഹം കരുതിയത്. പക്ഷേ അതിന്‌ സാധിക്കില്ല.

“11,000 രൂപ നൽകിയതോടെ അയാൾ ഒരു രസീത് നൽകി. നാളെ ഞങ്ങളുടെ അവസരം വരുമെന്ന് പറഞ്ഞു,” അമോൽ പറഞ്ഞു. ആശ്രമ സമുച്ചയത്തിനുള്ളിൽത്തന്നെയുള്ള ഡോർമിറ്ററി മുറികളിലൊന്നിൽ അവർ മൂവരും രാത്രി തങ്ങി.

അടുത്ത ദിവസം ഉച്ചയ്ക്ക് ‘മഹാരാജ്’ രോഹനെയും രഞ്ജനയെയും കണ്ടു. പരിശോധന 15 മിനിറ്റിൽ താഴെ മാത്രമേ നീണ്ടുനിന്നുള്ളൂ. ആശ്രമത്തിനുള്ളിൽനിന്നുതന്നെ വാങ്ങാവുന്ന ചില ആയുർവേദ മരുന്നുകൾ അദ്ദേഹം നിർദേശിച്ചു. അതിനായി അമോൽ വീണ്ടും 8,000 രൂപ ചെലവഴിച്ചു.

“എന്റെ മകൻ ഞങ്ങളെ നോക്കാൻ മറ്റാരേക്കാളും കൂടുതൽ കഷ്ടപ്പെടുന്നവനാണ്,” രഞ്ജന പറഞ്ഞു. “അവൻ സുഖമില്ലങ്കിലും ജോലി ചെയ്യും. അവന്റെ പണം പാഴാക്കാൻ ഞാൻ ആഗ്രഹിക്കുന്നില്ല.”

എന്നാൽ സുഹൃത്തിൽനിന്ന് കടം വാങ്ങിയ പണത്തിൽ അവസാന ആയിരം രൂപ മാത്രമാണ് അമോലിന്റെ കൈയിൽ ശേഷിച്ചിരുന്നത്.

ആ കടം ഇനി ദീർഘകാലം കഴിഞ്ഞേ തിരിച്ചടക്കാനാകൂ.

കഴിഞ്ഞ 30 വർഷമായി സാധാരണക്കാരുടെ പ്രശ്നങ്ങൾ പരിഹരിക്കുന്നുവെന്ന് ഗഡ്ഗെ അവകാശപ്പെടുന്നുണ്ട്‌. പക്ഷേ അദ്ദേഹം ഇത്ര പ്രശസ്തനോ പണച്ചെലവേറിയ ആളോ ആയിരുന്നില്ല. ശരിക്കും കോവിഡ്-19 മഹാമാരിക്കാലത്തോടെയാണ് ഗഡ്‌ഗെയുടെ വളർച്ചയാരംഭിച്ചതെന്ന്‌ അഭിഭാഷകയായ രഞ്ജന ഗവാണ്ടെ പറഞ്ഞു. സംഗമ്നേറിലെ അന്ധവിശ്വാസ വിരുദ്ധ പ്രവർത്തകയാണ്‌ രഞ്ജന. 2017-ൽ ആരംഭിച്ച യൂട്യൂബ് ചാനലും കോവിഡ്‌ കാലത്തുതന്നെയാണ് ജനപ്രീതി നേടിയത്.

“മഹാമാരിക്കാലത്ത് ആളുകളെല്ലാം മരണത്തെ മുഖാമുഖം കണ്ടു,” ഗവാണ്ടെ പറഞ്ഞു. “ആശുപത്രികൾ നിറഞ്ഞുകവിഞ്ഞു. നിരാശരായ പാവങ്ങൾ തങ്ങളുടെ ദുർബല സാഹചര്യത്തിൽ ആശ്വാസത്തിനായി കപടശാസ്ത്രങ്ങളിലേക്ക്‌ തിരിഞ്ഞു. ആ ദൗർബല്യത്തെ ബുദ്ധിപരമായ ഉപയോഗപ്പെടുത്തുകയായിരുന്നു ഗഡ്ഗെ ‘മഹാരാജ്’.”

അന്ധവിശ്വാസത്തിനെതിരെ പ്രവർത്തിക്കുന്ന സംഘടനയായ അന്ധശ്രദ്ധ നിർമൂലൻ സമിതിയുടെ (എഎൻഐഎസ്‌) ഭാരവാഹിയാണ് ഗവാണ്ടെ. 2013-ൽ ഹിന്ദുത്വ തീവ്രവാദികൾ കൊലപ്പെടുത്തിയ നരേന്ദ്ര ധാബോൽക്കറായിരുന്നു സംഘടനയുടെ സ്ഥാപകൻ. അവരുടെ പ്രവർത്തകർ രോഗികളുടെ വേഷത്തിൽ രാജേന്ദ്ര ഗഡ്ഗെയുടെ ആശ്രമം സന്ദർശിച്ചിട്ടുണ്ട്.

“ഏകദേശം 10 വർഷം മുമ്പ് ഗഡ്ഗെയെ കാണാൻ ഒരു മണിക്കൂറിൽ താഴെ കാത്തിരുന്നാൽ മതിയായിരുന്നു,” ആശ്രമത്തിൽ മുമ്പ് പല തവണ പോയിട്ടുള്ള 34-കാരനായ പ്രശാന്ത് പൻസാരെ പറഞ്ഞു. “ഇന്ന് ഭാഗ്യം ഉണ്ടെങ്കിൽപ്പോലും കുറഞ്ഞത് ആറോ ഏഴോ മണിക്കൂർ കാത്തിരിക്കണം. അന്ന് ഫീസ് 300 രൂപ മാത്രമായിരുന്നു.”

എന്നാൽ പരിശോധാന ഫീസിൽ 3,500 ശതമാനത്തിന്റെ വർധനവുണ്ടായിട്ടും ജനങ്ങൾ പിന്നോട്ട്‌ പോയില്ല. വളർത്തികൊണ്ടുവന്ന യൂട്യൂബ് ചാനലിന്റെ സഹായത്തോടെ ജനപ്രീതി കൂടുതൽ ഉയർന്നു. ‘ഗഡ്ഗെ മഹാരാജിന്റെ’ ദീർഘപ്രഭാഷണങ്ങളുള്ള മണിക്കൂറുകൾ ദൈർഘ്യമുള്ള വീഡിയോകളും ഏകദേശം 2,20,000 ഫോളോവേഴ്സുള്ള ഇൻസ്റ്റാഗ്രാം പേജിൽ അപ്‌ലോഡ് ചെയ്യുന്ന ചെറുവീഡിയോകളും വ്യാപകമായി പ്രചരിച്ചു.

ഒരു വീഡിയോയിൽ ഗഡ്ഗെ 30–-40 പ്രായക്കാരായ അവിവാഹിതരോട് സംസാരിക്കുകയാണ്‌. മൃദുവായ പശ്ചാത്തല സംഗീതത്തിനൊപ്പം സംഗീതസമാനമായ ശബ്ദത്തിൽ അദ്ദേഹം പറയുന്നു: “പരുത്തികൊണ്ട്‌ നിങ്ങളുടെ ഉയരത്തിനൊത്ത ഒരു തിരി തയ്യാറാക്കുക. തുടർച്ചയായി മൂന്ന് വ്യാഴാഴ്ചകളിൽ ദത്തപ്രഭുവിന്റെ ക്ഷേത്രത്തിൽ അത് തെളിക്കുക. അതിവേഗം വിവാഹം നടക്കും.”

മറ്റൊരു വീഡിയോയിൽ ഇതുവരെ പരിഹാരം ലഭിക്കാത്ത പ്രശ്നങ്ങൾക്ക് പരിഹാരം അദ്ദേഹം നിർദേശിക്കുന്നു.“നിങ്ങളുടെ വീട്ടിൽ വെള്ളം സംഭരിക്കുന്ന പാത്രത്തിനരുകിൽ മറ്റൊരു പാത്രം വെക്കുക,” അദ്ദേഹം പറയുന്നു. “അതിൽ കുറച്ച് ഗംഗാജലം ഒഴിക്കുക. ഒരു നാണയം കൈയിലെടുത്ത് ‘ദത്തധാം സർക്കാർ കി ജയ്‌’ എന്ന്‌ വിളിക്കുക. കൈ നെറ്റിയിൽ അമർത്തിയശേഷം നാണയം പാത്രത്തിൽ ഇടുക. പിന്നീട്‌ ആ ഗംഗാജലം കണ്ണുകളിൽ തളിക്കുക. അതോടെ നിങ്ങളുടെ പ്രശ്നം പരിഹരിക്കപ്പെടും.”

ഇത്തരം വീഡിയോകൾക്ക് പിന്തുണയായി രോഗങ്ങൾ സുഖപ്പെട്ടുവെന്ന് അവകാശപ്പെടുന്ന വിശ്വാസികളുടെ സാക്ഷ്യപ്പെടുത്തലുകളും ചാനലിലുണ്ട്.

ഇടതുകാലിൽ ഗുരുതരമായി കോശം നശിക്കുന്ന അമ്മായിയമ്മയെ കൂട്ടി 30-കാരിയായ അനിത (പേര് മാറ്റിയിരിക്കുന്നു) ഗഡ്‌ഗെയുടെ വീഡിയോ കണ്ടശേഷം ആശ്രമത്തിലെത്തി.

“കാല്‌ മുറിച്ചുമാറ്റേണ്ടിവരുമെന്നാണ്‌ ഡോക്ടർമാർ പറഞ്ഞത്‌,” ആശ്രമത്തിലെ ഷെഡ്ഡിനടിയിൽ ഇരുന്നുകൊണ്ട് അവൾ പറഞ്ഞു. “ഞങ്ങൾ അത് ചെയ്തില്ല. ഇതിലൂടെ പരിഹാരമുണ്ടാകുമെന്ന്‌ കരുതി.”

പടിഞ്ഞാറൻ മഹാരാഷ്ട്രയിലെ സതാര ജില്ലയിൽ ഒരേക്കർ ഭൂമിയുള്ള ചെറിയ കർഷകയായ അനിത ഉപജീവനത്തിനായി കൃഷി ചെയ്യുന്നയാളാണ്‌. ഗഡ്ഗെയുടെ പരിശോധനാ ഫീസോ മരുന്നുകളോ താങ്ങാൻ അവൾക്കായില്ല. അത്തരക്കാർക്ക് പ്രാർത്ഥന മാത്രം നടത്താനുള്ള അവസരവും അവിടെ ഉണ്ടായിരുന്നു.

എന്നാൽ അമ്മായിയമ്മയ്ക്ക് ബസിൽ യാത്ര ചെയ്യാൻ കഴിയുന്ന സാഹചര്യമല്ലാത്തതിനാൽ അവർക്ക്‌ കാർ വാടകയ്ക്ക് എടുക്കേണ്ടിവന്നു. “അതിന് 8,000 രൂപ ചെലവായി,” അവൾ പറഞ്ഞു. “ഒരു സ്ത്രീയുടെ അഴുകിയ പാദം ഗഡ്ഗെ മഹാരാജ് സുഖപ്പെടുത്തിയെന്ന വീഡിയോയുടെ ലിങ്ക് സഹോദരിയാണ്‌ അയച്ചുതന്നത്‌. പിന്നീട്‌ കൂടുതൽ വീഡിയോകൾ കണ്ടശേഷമാണ് അമ്മയെ ഇവിടെ കൊണ്ടുവരാൻ തീരുമാനിച്ചത്.”

88.6 കോടി സജീവ ഉപയോക്താക്കൾ എത്തിയതോടെ 2024-ൽ ഇന്ത്യയിലെ ഇന്റർനെറ്റ് വ്യാപനം 58 ശതമാനത്തിലെത്തി. ഇവർ നഗരമേഖലകളിൽ മാത്രം കേന്ദ്രീകരിച്ചവരല്ല. ഇതിൽ ഏകദേശം 48.8 കോടി പേർ ഗ്രാമപ്രദേശങ്ങളിലാണ് താമസിക്കുന്നത്. നഗരത്തിലുള്ളവരേക്കാൾ എണ്ണത്തിൽ മുന്നിലാണ്‌ ഗ്രാമീണരായ ഇന്റർനെറ്റ്‌ ഉപയോക്താക്കൾ

ഇത്തരത്തിൽ സമൂഹത്തിന്റെ വിവിധ തലങ്ങളിലേക്കുള്ള ഇന്റർനെറ്റ് വ്യാപനം മനുഷ്യദൈവങ്ങൾക്ക്‌ മുമ്പില്ലാത്ത വിധം പ്രശസ്തിയും സ്വാധീനവും കിട്ടാൻ കാരണമായി. ഇന്ത്യയിൽ ശക്തിപ്രാപിച്ച മതരാഷ്ട്രവാദം അവർക്ക്‌ കൂ‍ടുതൽ വളർച്ച നൽകി. ഇതെല്ലാം ഇത്തരം ‘മനുഷ്യദൈവ’ങ്ങളായ വ്യക്തിത്വങ്ങൾക്ക് സാമൂഹികാംഗീകാരവും നിയമത്തോടുള്ള ഭയമില്ലായ്മയും സൃഷ്‌ടിച്ചു.

ഞാൻ ആശ്രമം സന്ദർശിച്ച ഉച്ചസമയത്ത്‌ 11,000 രൂപ വീതം നൽകിയ 20 പേരെ ഒന്നര മണിക്കൂറിനുള്ളിൽ ‘മഹാരാജ്’ കാണുമെന്ന്‌ അറിയിച്ചു. അതായത് വെറും 90 മിനിറ്റിനുള്ളിൽ അയാൾ സമ്പാദിച്ചത്‌ 2,20,000 രൂപയാണ്‌ — അതും നിരക്ഷരരും അടുത്ത നേരത്തെ ഭക്ഷണം എവിടെനിന്ന്‌ ലഭിക്കുമെന്ന്‌ അറിയാത്തവരുമായ സാധാരണക്കാരിൽനിന്ന്. ദിവസേന ആയിരക്കണക്കിന് ആളുകളാണ് അദ്ദേഹത്തിന്റെ ആശ്രമത്തിലെത്തുന്നത്. അവരിൽനിന്ന് അദ്ദേഹം എത്ര പണം സമ്പാദിക്കുന്നുവെന്ന് ആർക്കും മനസിലാകും.

അടുത്ത്‌ താമസിക്കുന്ന നാട്ടുകാർ അവിടേക്ക്‌ പോകാറില്ല. ആദ്യ സന്ദർശനത്തിന് ഒരുമാസത്തിന്‌ ശേഷം അമോൽ വീണ്ടും മകനെയും അമ്മയെയും കൂട്ടി ഗഡ്ഗെയെ കാണാൻ ചെന്നപ്പോൾ ഒരു ഓട്ടോ ഡ്രൈവർ പറഞ്ഞത്‌ നിങ്ങൾ സമയം പാഴാക്കുകയാണെന്നാണ്‌. “അയാൾ ഒരു തട്ടിപ്പുകാരനാണെന്ന് ഡ്രൈവർ പറഞ്ഞു,” അമോൽ ഓർക്കുന്നു. “പക്ഷേ ഒരേയൊരു സന്ദർശനത്തിനുള്ളിൽ നിഗമനത്തിലെത്തരുതെന്ന് ഞാനും കരുതി.”

ഇത്തവണ ‘മനുഷ്യദൈവ’ത്തെ നേരിൽ കാണാനുള്ള പണം അദ്ദേഹത്തിന്റെ കൈയിലില്ലായിരുന്നു. അമോൽ നേരെ കൗണ്ടറിലെത്തി മരുന്നുകൾ വീണ്ടും വാങ്ങി. “കഴിഞ്ഞ തവണത്തേക്കാൾ കുറഞ്ഞ അളവിൽ വാങ്ങിയതുകൊണ്ട് 4,000 രൂപയേ ആയുള്ളൂ,” അമ്മ രഞ്ജന പറഞ്ഞു. അതും അമോലിന്റെ മാസശമ്പളത്തിന്റെ പകുതിയോളം വരും.

രാജേന്ദ്ര ഗഡ്ഗെയെതിരെ താൻ നൽകിയ പരാതിയെ രഞ്ജന ഗവാണ്ടെ സ്ഥിരം പിന്തുടരുമായിരുന്നു. ഒടുവിൽ ഈ ഏപ്രിലിൽ കേസ് രജിസ്റ്റർ ചെയ്തു. തുടർന്ന് ‘മനുഷ്യദൈവ’വും അദ്ദേഹത്തിന്റെ നാല് സഹപ്രവർത്തകരും അറസ്റ്റിലായി. അന്ധവിശ്വാസ നിരോധന നിയമം 2013, ഐടി ആക്ട്, ഡ്രഗ്സ് ആൻഡ് റെമഡീസ് ആക്ട്, മെഡിക്കൽ പ്രാക്ടീഷണർ ആക്ട് എന്നിവപ്രകാരമാണ് കേസ് എടുത്തിരിക്കുന്നത്.

എന്നാൽ തന്റെ അറസ്റ്റിൽ ഗഡ്ഗെ വലിയ ആശങ്ക പ്രകടിപ്പിച്ചില്ല. പൊലീസ് അറസറ്റ്‌ ചെയ്ത്‌ കസ്റ്റഡിയിലേക്ക് കൊണ്ടുപോകുന്നതിനിടെ “ദിവ്യശക്തികളുള്ള ജ്ഞാനിയായ മനുഷ്യൻ” ആണ്‌ താൻ എന്നാണ്‌ പറഞ്ഞത്‌.

“എഎൻഐഎസ്‌ തന്റെ പക്കൽനിന്ന് പണം തട്ടിയെടുക്കാൻ ശ്രമിക്കുകയാണെന്നാരോപിച്ച്‌ നിർമിതബുദ്ധിയാൽ സൃഷ്‌ടിച്ച വീഡിയോ അദ്ദേഹം പുറത്തിറക്കിയിരുന്നു,” ഗവാണ്ടെ പറഞ്ഞു. “അതിന് മുമ്പും പലതവണ എന്നെ സമ്മർദ്ദത്തിലാക്കാൻ അവർ ശ്രമിച്ചിരുന്നു.”

ഗഡ്ഗെയുടെ ആത്മീയസാമ്രാജ്യം സ്ഥിതിചെയ്യുന്ന വാഡ്ഗാവ് പാൻ ഗ്രാമവാസികൾക്ക് ആദ്യം അയാളിൽ സംശയമുണ്ടായിരുന്നു. എന്നാൽ സന്ദർശനത്തിനെത്തുന്ന ജനക്കൂട്ടം പ്രദേശത്തെ ചായക്കടകൾക്കും ഹോട്ടലുകൾക്കും പലചരക്ക് കടകൾക്കും നല്ല വരുമാനം ഉണ്ടാക്കികൊടുത്തു.

കൈയിൽ തുച്ഛമായ പണം മാത്രമുള്ള അമോൽ പോലും പന്ധർപൂരിലേക്ക്‌ മടങ്ങുംമുമ്പ്‌ ഒരു ചായയും ലഘുഭക്ഷണവും കഴിക്കാൻ കടയിൽ കയറി. 23,000 രൂപയ്ക്കുമുകളിൽ ചെലവഴിച്ചിട്ടും യാതൊരു ഫലവും ലഭിക്കാത്തതിനാൽ മൂന്നാം തവണ അയാൾ തിരികെ വരാനുള്ള സാധ്യത വളരെ കുറവായിരുന്നു.

തിരിച്ചുപോകുന്നതിനിടെ അവരെ ഒരു വെള്ള മെഴ്‌സിഡസ് കാർ കടന്നുപോയി. ആ ആഡംബര വാഹനത്തിൽ ‘മഹാരാജ്’ ആശ്രമത്തിലെത്തി. ഇന്ത്യയിൽ ഈ മോഡൽ വാഹനത്തിന്റെ അടിസ്ഥാന വില 65 ലക്ഷം രൂപയാണ്. അതേസമയം അമോലും രഞ്ജനയും രോഹനും സീറ്റൊന്നിന്‌ 10 രൂപ നൽകി ഓട്ടോറിക്ഷയിൽ കയറി കഠിനമായ ഒമ്പത് മണിക്കൂർ നീളുന്ന മടക്കയാത്ര ആരംഭിച്ചു.