‘ದೇವ ಮಾನವʼ ಗಡ್ಗೆಯ ಯೂಟ್ಯೂಬ್‌ ಪವಾಡಗಳು

ಈ ವರದಿಯು ಪುಲಿಟ್ಚರ್‌ ಸೆಂಟರ್‌ನ ಬೆಂಬಲದೊಂದಿಗೆ ಮಾಡಲಾಗಿರುವ ಸರಣಿಯ ಒಂದು ಭಾಗ

ತಮ್ಮ ಸಂಬಂಧಿಯೊಬ್ಬರು ಕಳುಹಿಸಿದ್ದ ಯೂಟ್ಯೂಬ್‌ ಚಾನೆಲ್‌ನ ಒಂದೇ ಒಂದು ವಿಡಿಯೋ ಲಿಂಕ್‌ನಿಂದ ಅಮೋಲ್ ಖಂಡೇಕರ್ ಅವರಿಗೆ ತಮ್ಮ ತಿಂಗಳ ಆದಾಯದ ಎರಡು ಪಟ್ಟು ನಷ್ಟವಾಯಿತು. ಅದು ಕೂಡ ಆನ್‌ಲೈನ್ ಫಿಷಿಂಗ್‌ ರೀತಿಯ ವಂಚನೆಯೂ ಅಲ್ಲ.

ಅಮೋಲ್‌ ಸರಳ ಜೀವನವನ್ನು ನಡೆಸುವ 35 ವರ್ಷ ಪ್ರಾಯದ ಸಾಮಾನ್ಯ ಕಾರ್ಮಿಕ. ತಮ್ಮ ಸಂಬಂಧಿಯೊಬ್ಬರು ಕಳುಹಿಸಿದ ಯೂಟ್ಯೂಬ್ ವಿಡಿಯೋವನ್ನು ನೋಡಿದ್ದೇ ತಡ, ಮುಂಜಾನೆ ಬಸ್‌ ಹತ್ತಿ ಹೊರಟೇ ಬಿಟ್ಟರು. ಜೊತೆಗೆ ಹಣೆಯಲ್ಲಿ ಉರಿಯೂತದಿಂದ ನರಳುತ್ತಿರುವ ಅವರ 11 ವರ್ಷದ ಮಗ ಮತ್ತು ಕೀಲು ನೋವಿನಿಂದ ಬಳಲುತ್ತಿರುವ ತಾಯಿಯೂ ಇದ್ದರು. ಕಿತ್ತುಹೋದ ಒಂದು ಸರ್ಕಾರಿ ಬಸ್‌ನಲ್ಲಿ ಒಂಬತ್ತು ಗಂಟೆ ಪ್ರಯಾಣ ಮಾಡಿ ಅವರ ತಾಯಿಯ ಮೊಣಕಾಲುಗಳು ಇನ್ನಷ್ಟು ನೋಯುತ್ತಿದ್ದವು. ಹೋಗದೆ ಬೇರೆ ದಾರಿಯಿರಲಿಲ್ಲ. ಅವರ ಸಂಬಂಧಿಯೊಬ್ಬರು ಕಳುಹಿಸಿದ್ದ ಯೂಟ್ಯೂಬ್ ಚಾನೆಲ್‌ನ ವಿಡಿಯೋಗಳನ್ನು ನೋಡಿ, ತಮ್ಮ ಅನಾರೋಗ್ಯಕ್ಕೂ ಪರಿಹಾರ ಸಿಗಬಹುದು ಎಂಬ ಭರವಸೆಯಿಂದ ಮಗ ಮತ್ತು ಮೊಮ್ಮಗನೊಂದಿಗೆ ಅವರು ಬಸ್‌ ಹತ್ತಿದ್ದರು.

ಆ ಯೂಟ್ಯೂಬ್ ಚಾನೆಲ್‌ನಲ್ಲಿ ಹಣೆಗೆ ವಿಭೂತಿ ಬಳಿದುಕೊಂಡು ಸಾವಿರಾರು ಭಕ್ತರಿಗೆ ಪ್ರವಚನ ನೀಡುತ್ತಿರುವ ದಪ್ಪ ಗಡ್ಡದ ‘ದೇವಮಾನವʼನೊಬ್ಬನ ವಿಡಿಯೋಗಳಿದ್ದವು. ಕೌಟುಂಬಿಕ ಸಮಸ್ಯೆಗಳಿಂದ ಹಿಡಿದು ಮದ್ಯ ವ್ಯಸನ ಬಿಡಿಸುವ ವರೆಗೆ, ಉದ್ಯೋಗದ ಸಮಸ್ಯೆಗಳಿಂದ ಹಿಡಿದು ಕ್ಯಾನ್ಸರ್‌ವರೆಗೆ, ಮಾನಸಿಕ ಆರೋಗ್ಯ ಸಮಸ್ಯೆಗಳಿಂದ ಹಿಡಿದು ಪ್ರೇಮ ವೈಫಲ್ಯದ ವರೆಗೆ – ಎಲ್ಲಾ ಸಮಸ್ಯೆಗಳಿಗೆ ದೇವಮಾನವ ರಾಜೇಂದ್ರ ಗಡ್ಗೆ ‘ಮಹಾರಾಜ್’ ಬಳಿ ಪರಿಹಾರವಿತ್ತು.

ಅವರ ಚಾನೆಲ್‌ನ ಮಾಹಿತಿಯ ಪ್ರಕಾರ, ಗಡ್ಗೆಯವರು ವಿಷ್ಣುವಿನ ಅವತಾರವೆಂದು ಪೂಜಿಸಲ್ಪಡುವ ಪೌರಾಣಿಕ ಸನ್ಯಾಸಿ ದತ್ತನ 12 ವರ್ಷದ ಆಧ್ಯಾತ್ಮಿಕ ಶಿಕ್ಷಣವನ್ನು ಪೂರ್ಣಗೊಳಿಸಿದ್ದರು. “ತನ್ನನ್ನು ತಾನು ಸಂಪೂರ್ಣವಾಗಿ ಸಮರ್ಪಿಸಿಕೊಂಡು ಆಧ್ಯಾತ್ಮಿಕ ಸಾಧನೆ ಮಾಡಿದ ಫಲವಾಗಿ ದತ್ತಗುರುವು ಗಡ್ಗೆ ಮಹಾರಾಜರಿಗೆ ದೀಕ್ಷೆ ನೀಡಿದರು,” ಎಂದು ಚಾನೆಲ್‌ನ ‘ಅಬೌಟ್ [ಮಾಹಿತಿ]’ ನಲ್ಲಿ ಹೇಳಲಾಗಿದೆ. ಅವತ್ತಿನಿಂದ ಅವರು, “ಔಷಧಿ ಮತ್ತು ಪ್ರಾರ್ಥನೆಯ ಮೂಲಕ ತಮ್ಮ ಬಳಿಗೆ ಬರುವ ಭಕ್ತರ ಸಮಸ್ಯೆಗಳನ್ನು ಪರಿಹರಿಸುತ್ತಿದ್ದಾರೆ” ಎಂದು ಹೇಳಲಾಗಿದೆ.

ಅಧಿಕೃತವಾಗಿ ‘ದತ್ತಧಾಮ್ ಸರ್ಕಾರ್ ಸಂಗಮ್ನೇರ್’ ಎಂದಿರುವ ಆ ಯೂಟ್ಯೂಬ್‌ ಚಾನೆಲ್‌ಗೆ 1.83 ಲಕ್ಷ ಚಂದಾದಾರರು ಇದ್ದರು. ಪ್ರತಿಯೊಂದು ವಿಡಿಯೋಗಳ ಕೆಳಗೂ ಮೆಚ್ಚುಗೆಯ ಕಾಮೆಂಟ್‌ಗಳ ಸುರಿಮಳೆಯನ್ನೇ ಕಾಣಬಹುದು. ಇದನ್ನು ನೋಡಿ ಅಮೋಲ್‌, “ಇವರು ನಿಜವಾಗಿಯೂ ಏನೋ ಒಳ್ಳೆಯ ಕೆಲಸ ಮಾಡುತ್ತಿದ್ದಾರೆ,” ಎಂದು ನಂಬಿದರು.

ಪಂಢಾರಪುರ ಪಟ್ಟಣದ ಸಮೀಪದ ಒಂದು ಸಣ್ಣ ಗ್ರಾಮದ ನಿವಾಸಿಯಾಗಿರುವ ಅಮೋಲ್‌ ಅವರು ತಮ್ಮ ಓದನ್ನು ಅರ್ಧದಲ್ಲೇ ಬಿಟ್ಟು, ತಂದೆ-ತಾಯಿಗೆ ನೆರವಾಗಲು ಸಣ್ಣಪುಟ್ಟ ಕೆಲಸಗಳನ್ನು ಮಾಡಲು ಆರಂಭಿಸಿದ್ದರು. “ಈಗ ನಾನು ವ್ಯಾಪಾರಿಯೊಬ್ಬರ ಬಳಿ ಡ್ರೈವರ್‌ ಆಗಿ ಕೆಲಸ ಮಾಡುತ್ತೇನೆ. ಈ ಪ್ರದೇಶದ ಬೇರೆ ಬೇರೆ ರೈತರ ಬೆಳೆಗಳನ್ನು ಮಂಡಿಗಳಿಗೆ ಸಾಗಿಸುವುದು ನನ್ನ ಕೆಲಸ,” ಎಂದು ಅವರು ಹೇಳಿದರು.

ಇದು ಇಬ್ಬರು ಮಾಡಬೇಕಾದ ಕೆಲಸ. ಟೆಂಪೋ ಓಡಿಸಲು ಒಬ್ಬ ಬೇಕು, ಗೋಣಿ ಚೀಲಗಳಲ್ಲಿರುವ ಬೆಳೆಗಳನ್ನು ಲೋಡ್‌ ಮಾಡಲು ಒಬ್ಬ ಬೇಕು. ಆದರೆ ಸ್ವಲ್ಪ ಹೆಚ್ಚು ಸಂಪಾದನೆ ಆಗುತ್ತದೆ ಎಂಬ ಕಾರಣಕ್ಕೆ ಇಬ್ಬರ ಕೆಲಸಗಳನ್ನು ಅಮೋಲ್‌ ಒಬ್ಬರೇ ಮಾಡುತ್ತಾರೆ. ಬೆನ್ನು ಮುರಿಯುವಂತಹ ಈ ಕಠಿಣ ಕೆಲಸಕ್ಕೆ ಅವರಿಗೆ ತಿಂಗಳಿಗೆ ಕೇವಲ 10,000 ರುಪಾಯಿ ಸಂಬಳ ಸಿಗುತ್ತದೆ. ಅದೇ ಅವರ ಕುಟುಂಬದ ಏಕೈಕ ಆದಾಯದ ಮೂಲ. ಅವರ ಬಳಿ ಹತ್ತು ಏಕರೆ ಫಲವತ್ತಾದ ಕೃಷಿಭೂಮಿ ಇದೆ. ಆದರೆ ಕುಟುಂಬದ ಭೂವ್ಯಾಜ್ಯದ ಕಾರಣದಿಂದಾಗಿ ಅದು ಕೃಷಿ ಮಾಡದೆ ಹಡಿಲು ಬಿದ್ದಿದೆ.

ಅಮೋಲ್ ಅವರಿಗೆ ಐದು ಮಂದಿ ಸದಸ್ಯರ ತಮ್ಮ ಕುಟುಂಬವನ್ನು ನಡೆಸುವುದೇ ಕಷ್ಟವಾಗಿದೆ. ಅರವತ್ತರ ಹರೆಯದ ತಾಯಿ ರಂಜನಾ ಅವರ ಸಂಧಿವಾತದ ನೋವು ಹೆಚ್ಚಾಗುತ್ತಲೇ ಇದೆ, ಆದರೆ ಹಣವಿಲ್ಲ ಎಂಬ ಕಾರಣಕ್ಕೆ ವೈದ್ಯರ ಬಳಿ ಹೋಗುವುದನ್ನು ಮುಂದೂಡುತ್ತಿದ್ದಾರೆ. ಆದರೆ ಮಗ ರೋಹನ್‌ನ ಬಲ ಕಣ್ಣಿನ ಮೇಲ್ಭಾಗದಲ್ಲಿ ಒಂದು ಗಡ್ಡೆ ಕಾಣಿಸಿಕೊಂಡಿತ್ತು. ಆತಂಕಗೊಂಡ ಅಮೋಲ್ ಅವರು ಮಗನನ್ನು ತಕ್ಷಣ ವೈದ್ಯರ ಬಳಿಗೆ ಕರೆದುಕೊಂಡು ಹೋದರು. ವೈದ್ಯರು ಸಿಟಿ ಸ್ಕ್ಯಾನ್ ಮಾಡಿಸಬೇಕೆಂದು ಸಲಹೆ ನೀಡಿದರು.

ಸ್ಕ್ಯಾನ್‌ ಮಾಡಿದ ನಂತರ ಅಮೋಲ್‌ ಅವರ ಆತಂಕ ಸ್ವಲ್ಪ ಕಡಿಮೆಯಾಯಿತು. ರೋಹನ್‌ಗೆ ಸಾಮಾನ್ಯ ಉರಿಯೂತವಾಗಿತ್ತು. ಸರಿಯಾಗಿ ಮದ್ದು ಸೇವಿಸಿದರೆ ಅದು ಕಡಿಮೆಯಾಗುತ್ತದೆ ಎಂದು ವೈದ್ಯರು ಹೇಳಿದರು. ಆದರೆ ಅವರ ಊರಿನ ಒಬ್ಬರು, ರೋಹನ್‌ ಓದಿನಲ್ಲಿ ಹಿಂದೆ ಉಳಿಯಲು ತಲೆಯಲ್ಲಿರುವ ಆ ಗಡ್ಡೆಯೇ ಕಾರಣ ಎಂದು ಹೇಳಿದರು. ಅದೇ ವೇಳೆ, ಅಮೋಲ್ ಅವರ ಸಂಬಂಧಿಯೊಬ್ಬರು ಯೂಟ್ಯೂಬ್‌ ವಿಡಿಯೋ ಲಿಂಕ್‌ ಕಳುಹಿಸಿ, ‘ಗಡ್ಗೆ ಮಹಾರಾಜ್’ ಅವರ ಬಳಿ ಒಮ್ಮೆ ಹೋಗಿ ಎಂಬ ಸಲಹೆ ನೀಡಿದರು.

“ನಾವು ಹೇಗೂ ಹೋಗುತ್ತಿದ್ದೇವೆ, ಹಾಗಾಗಿ ತಮ್ಮ ಸಂಧಿವಾತವನ್ನು ತೋರಿಸಲು ನನ್ನ ಅಮ್ಮನೂ ನಮ್ಮ ಜೊತೆ ಬರಲು ನಿರ್ಧರಿಸಿದರು,” ಎಂದು ಅಮೋಲ್ ಹೇಳಿದರು.

ಒಂಬತ್ತು ಗಂಟೆಗಳ ಕಾಲ ಬಸ್‌ನಲ್ಲಿ ಪ್ರಯಾಣಿಸಿ, ಆಮೇಲೆ ಮೂವರೂ ಒಟ್ಟಿಗೆ ಶೇರಿಂಗ್ ಆಟೋದಲ್ಲಿ ಕುಳಿತುಕೊಂಡು ಹೇಗೋ ಆಶ್ರಮವನ್ನು ತಲುಪಿದರು. ಅಹಲ್ಯಾನಗರ ಜಿಲ್ಲೆಯ (ಹಳೆಯ ಅಹಮದ್‌ನಗರ) ವಡಗಾಂವ್ ಪಾನ್ ಗ್ರಾಮದಲ್ಲಿರುವ ರಾಜೇಂದ್ರ ಗಡ್ಗೆಯವರ ಆಶ್ರಮದ ವಿಶಾಲ ಆವರಣ ತಲುಪಿದಾಗ ಅಮೋಲ್‌ ಅವರಿಗೆ ನಂಬಲಾಗದಂತಹ ದೃಶ್ಯ ಕಂಡಿತು. ದಟ್ಟ ಜನಸಂದಣಿ ಇರಬಹುದು ಎಂಬುದು ಮೊದಲೇ ಅವರ ತಲೆಯಲ್ಲಿತ್ತು, ಆದರೆ ಜಾತಿ-ವರ್ಗ ಭೇದವಿಲ್ಲದೆ ಸಾವಿರಾರು ಜನ ಸಾಲಿನಲ್ಲಿ ನಿಂತು ಗಡ್ಗೆಯವರ ದರ್ಶನ ಮಾಡಲು ಕಾಯುತ್ತಿರುವುದನ್ನು ನೋಡಿ ಅವರು ಅಚ್ಚರಿಗೊಂಡಿದ್ದರು. ಅವರ ನಡುವೆ ಕ್ಯಾಥೆಟರ್‌ ಹಾಕಿಕೊಂಡಿದ್ದ ಒಬ್ಬ ವ್ಯಕ್ತಿಯೂ ಇದ್ದರು, ಆ ಮನುಷ್ಯನಿಗೆ ತಲೆಯನ್ನು ನೆಟ್ಟಗೆ ಮಾಡಿಕೊಂಡು ಸರಿಯಾಗಿ ನಿಲ್ಲಲೂ ಆಗುತ್ತಿರಲಿಲ್ಲ.

‘ದೇವಮಾನವ’ನ ದಿವ್ಯದೃಷ್ಟಿ ಒಮ್ಮೆಯಾದರೂ ತಮ್ಮ ಮೇಲೆ ಬೀಳಲಿ ಎಂದು ಕಾಯುತ್ತಿರುವ ಗದ್ದಲದ ಜನಸಂದಣಿ ಅಮೋಲ್‌ ಅವರಿಗೆ ಭರವಸೆಯ ಜೊತೆಜೊತೆಗೆ ಆತಂಕವನ್ನೂ ಉಂಟುಮಾಡಿತ್ತು. ಇಷ್ಟು ಜನರು ಇಲ್ಲಿ ಬಂದು ಸೇರಿರುವುದನ್ನು ನೋಡಿ, ಆಶ್ರಮ ಇರುವ ಸಂಗಮ್ನೇರ್‌ವರೆಗೆ ತಾನು ಕಷ್ಟಪಟ್ಟು ಬಂದಿದ್ದು ಸರಿಯಾದ ನಿರ್ಧಾರ ಎಂಬ ಭಾವನೆ ಅವರಲ್ಲಿ ಮೂಡಿತ್ತು. ಆದರೆ, ಇಷ್ಟು ಭಕ್ತರ ಮಧ್ಯೆ ತಾನು ಗಡ್ಗೆ ಮಹಾರಾಜರನ್ನು ವೈಯಕ್ತಿಕವಾಗಿ ಭೇಟಿ ಮಾಡುವುದು ಹೇಗೆ ಎಂಬ ಚಿಂತೆಯೂ ಅವರನ್ನು ಕಾಡತೊಡಗಿತು.

“ನಾನು ಅಲ್ಲಿನ ಸಿಬ್ಬಂದಿಯೊಬ್ಬರನ್ನು ಕೇಳಿದೆ. ವೈಯಕ್ತಿಕ ಭೇಟಿಗೆ 11,000 ರುಪಾಯಿ ಕೊಡಬೇಕು ಎಂದು ಹೇಳಿದರು,” ಎಂದು ಅಮೋಲ್ ಹೇಳಿದರು.

ಆ ಮೊತ್ತ ಅಮೋಲ್ ಅವರು ತಿಂಗಳಿಗೆ ಸಂಪಾದಿಸುವ ಹಣಕ್ಕಿಂತ ಸಾವಿರ ರೂಪಾಯಿ ಹೆಚ್ಚು. ಅವರು ಒಂದು ಕ್ಷಣ ಯೋಚಿಸಿದರು. ತಾಯಿ ಮತ್ತು ಮಗನ ನಿರೀಕ್ಷೆಯಿಂದ ತುಂಬಿದ ಅಸಹಾಯಕ ಕಣ್ಣುಗಳು ಅವರತ್ತ ನೋಡುತ್ತಿದ್ದವು. ಒಂದು ನಿಮಿಷ ಯೋಚಿಸಿ, ಇಷ್ಟು ದೂರ ಬಂದು ಏನೂ ಮಾಡದೆ ವಾಪಸ್‌ ಹೋಗುವುದು ಸರಿಯಲ್ಲ ಎಂದು ನಿರ್ಧರಿಸಿದರು. ಅಷ್ಟು ದೂರ ಪ್ರಯಾಣಿಸಲು ಅಮೋಲ್ ಅವರು ತಮ್ಮ ಸ್ನೇಹಿತನಿಂದ 20,000 ರುಪಾಯಿ ಸಾಲ ತೆಗೆದುಕೊಂಡಿದ್ದರು. ಅದರಲ್ಲಿ ಕಾಲು ಭಾಗ ಖರ್ಚು ಮಾಡಿ, ಉಳಿದ ಹಣವನ್ನು ವಾಪಾಸ್‌ ಸ್ನೇಹಿತನಿಗೆ ನೀಡಬಹುದು ಅಂದುಕೊಂಡಿದ್ದರು. ಆದರೆ ಈಗ ಆ ಆಸೆಗೆ ಮಣ್ಣುಬಿತ್ತು.

“ನಾನು 11,000 ರೂಪಾಯಿ ಕೊಟ್ಟ ಮೇಲೆ, ಆ ವ್ಯಕ್ತಿ ಒಂದು ರಸೀದಿ ಕೊಟ್ಟು ‘ನಿಮ್ಮ ಸರದಿ ನಾಳೆ ಬರುತ್ತದೆ’ ಎಂದು ಹೇಳಿದರು,” ಎಂದು ಅಮೋಲ್ ಹೇಳಿದರು. ಆಶ್ರಮದ ಆವರಣದಲ್ಲೇ ಇರುವ ವಸತಿ ಕೋಣೆಯಲ್ಲಿ ಮೂವರು ರಾತ್ರಿ ಉಳಿದುಕೊಂಡರು.

ಮಾರನೇ ದಿನ ಮಧ್ಯಾಹ್ನ ‘ಮಹಾರಾಜ್’ ಕೊನೆಗೂ ರೋಹನ್ ಮತ್ತು ರಂಜನಾ ಅವರಿಗೆ ದರ್ಶನ ನೀಡಿದರು. ಅವರ ಆರೋಗ್ಯ ಪರಿಶೀಲನೆ 15 ನಿಮಿಷಕ್ಕಿಂತ ಕಡಿಮೆ ಕಾಲ ನಡೆಯಿತು. ಆಶ್ರಮದ ಆವರಣದಲ್ಲೇ ಮಾರಾಟ ಮಾಡುವ ಕೆಲವು ಆಯುರ್ವೇದ ಔಷಧಿಗಳನ್ನು ಮಹಾರಾಜ್ ಬರೆದು ಕೊಟ್ಟರು. ಅವುಗಳಿಗೆ ಅಮೋಲ್ ಮತ್ತೆ 8,000 ರುಪಾಯಿ ಖರ್ಚು ಮಾಡಬೇಕಾಯಿತು.

“ಎಲ್ಲರಿಗಿಂತಲೂ ಹೆಚ್ಚು ಕಷ್ಟಪಟ್ಟು ನನ್ನ ಮಗ ನಮ್ಮನ್ನು ನೋಡಿಕೊಳ್ಳುತ್ತಾನೆ. ಅವನಿಗೆ ಆರೋಗ್ಯ ಸರಿಯಿಲ್ಲದಿದ್ದರೂ ದುಡಿಯುತ್ತಾನೆ. ನಾನು ಅವನ ಹಣವನ್ನು ವ್ಯರ್ಥ ಮಾಡುವುದಿಲ್ಲ,” ಎಂದು ರಂಜನಾ ಹೇಳಿದರು.

ಅಮೋಲ್ ತಮ್ಮ ಸ್ನೇಹಿತನಿಂದ ತೆಗೆದುಕೊಂಡ ಸಾಲದಲ್ಲಿ ಕೊನೆಗೆ ಉಳಿದದ್ದು ಸಾವಿರ ರುಪಾಯಿ ಮಾತ್ರ. ಇನ್ನು ಆ ಸಾಲವನ್ನು ಅಷ್ಟು ಬೇಗ ತೀರಿಸಲು ಅವರಿಗೆ ಸಾಧ್ಯವಿಲ್ಲ.

ಗಡ್ಗೆ ಕಳೆದ 30 ವರ್ಷಗಳಿಂದ ತಾವು ಜನರ ಸಮಸ್ಯೆಗಳನ್ನು ಪರಿಹರಿಸುತ್ತಿದ್ದೇನೆ ಎಂದು ಹೇಳಿಕೊಂಡಿದ್ದಾರೆ. ಆದರೆ ಅವರು ಈಗಿನಷ್ಟು ಜನಪ್ರಿಯರಾಗಿರಲಿಲ್ಲ; ಹಾಗೆಯೇ ಇಷ್ಟೊಂದು ದುಬಾರಿಯೂ ಆಗಿರಲಿಲ್ಲ. ಅವರ ಜನಪ್ರಿಯತೆಯ ಏರಿದ್ದು ಕೋವಿಡ್-19 ಸಮಯದಲ್ಲಿ ಎಂದು ಗಡ್ಗೆ ಆಶ್ರಮದಿಂದ ಸುಮಾರು 45 ನಿಮಿಷ ದೂರದಲ್ಲಿರುವ ಸಂಗಮ್ನೇರ್ ಪಟ್ಟಣದ ಮೂಢನಂಬಿಕೆ ವಿರೋಧಿ ಹೋರಾಟಗಾರ್ತಿ ಮತ್ತು ವಕೀಲೆ ರಂಜನಾ ಗವಾಂಡೆ ಹೇಳಿದರು. 2017ರಲ್ಲಿ ಆರಂಭವಾದ ಅವರ ಯೂಟ್ಯೂಬ್‌ ಚಾನೆಲ್‌ ಕೂಡ ಅದೇ ಸಮಯದಲ್ಲಿ ಭಾರೀ ಪ್ರಚಾರವನ್ನು ಪಡೆದುಕೊಂಡಿತು.

“ಕೊರೊನಾ ಸಮಯದಲ್ಲಿ ಏಕಾಏಕಿ ಜನರಲ್ಲಿ ಸಾವಿನ ಭಯ ಹುಟ್ಟಿಕೊಂಡಿತು. ಆಸ್ಪತ್ರೆಗಳು ರೋಗಿಗಳಿಂದ ತುಂಬಿಹೋಗಿದ್ದವು. ದುರ್ಬಲ ಮನಸ್ಥಿತಿಯ ಅಸಹಾಯಕ ಕುಟುಂಬಗಳು ಭಾವನಾತ್ಮಕ ನೆರವನ್ನು ಪಡೆಯಲು ಮೂಢನಂಬಿಕೆಯ ಮೊರೆ ಹೋದರು. ಗಡ್ಗೆ ‘ಮಹಾರಾಜ್’ ಜನರ ಆ ದೌರ್ಬಲ್ಯವನ್ನು ತುಂಬಾ ಚಾತುರ್ಯದಿಂದ ದುರುಪಯೋಗಪಡಿಸಿಕೊಂಡರು,” ಎಂದು ಗವಾಂಡೆ ಹೇಳಿದರು.

ಗವಾಂಡೆ ಅವರು ಮೂಢನಂಬಿಕೆ ವಿರುದ್ಧ ಹೋರಾಡುತ್ತಿರುವ ಸಂಘಟನೆ ‘ಅಂಧಶ್ರದ್ಧಾ ನಿರ್ಮೂಲನ್ ಸಮಿತಿ’ (ಎಎನ್‌ಐಎಸ್‌) ಯ ಸದಸ್ಯೆ. ಈ ಸಂಘಟನೆಯ ಸ್ಥಾಪಕರಾದ ನರೇಂದ್ರ ದಾಬೋಲ್ಕರ್ ಅವರನ್ನು 2013ರಲ್ಲಿ ಹಿಂದುತ್ವವಾದಿಗಳು ಹತ್ಯೆ ಮಾಡಿದರು. ಒಮ್ಮೆ ಗವಾಂಡೆ ಅವರ ಸಂಘಟನೆಯ ಕಾರ್ಯಕರ್ತರು ನಕಲಿ ರೋಗಿಗಳಂತೆ ನಟಿಸಿ ರಾಜೇಂದ್ರ ಗಡ್ಗೆ ಆಶ್ರಮಕ್ಕೂ ಭೇಟಿ ನೀಡಿದ್ದರು.

“ಸುಮಾರು ಹತ್ತು ವರ್ಷಗಳ ಹಿಂದೆ ಗಡ್ಗೆ ಅವರನ್ನು ನೋಡಲು ಒಂದು ಗಂಟೆಗಿಂತ ಹೆಚ್ಚು ಕಾಯವ ಪರಿಸ್ಥಿತಿ ಇರಲಿಲ್ಲ. ಆದರೆ ಇವತ್ತಿನ ದಿನ ಅದೃಷ್ಟ ಇದ್ದರೂ ಕನಿಷ್ಠ ಆರು-ಏಳು ಗಂಟೆಗಳ ಕಾಲ ಕಾಯಬೇಕಾಗುತ್ತದೆ. ಹಿಂದೆ ಅವರನ್ನು ನೋಡಲು ಕೊಡಬೇಕಾಗಿದ್ದ ಶುಲ್ಕವೂ ಕೇವಲ 300 ರೂಪಾಯಿಯಷ್ಟೇ ಇತ್ತು” ಎಂದು ಆಶ್ರಮಕ್ಕೆ ಎರಡು ಬಾರಿ ಭೇಟಿ ನೀಡಿರುವ 34 ವರ್ಷದ ಪ್ರಶಾಂತ್ ಪನ್ಸಾರೆ ಹೇಳಿದರು.

ಆದರೆ ಅವರ ವೈಯಕ್ತಿಕ ಸಲಹಾ ಶುಲ್ಕ ಶೇಕಡಾ 3,500 ಏರಿಕೆಯಾಗಿದ್ದರೂ ಜನರಲ್ಲಿ ಅವರ ಮೇಲಿನ ಭಕ್ತಿ ಮಾತ್ರ ಕಡಿಮೆಯಾಗಿಲ್ಲ. ಅದರ ಜೊತೆಗೆ ತುಂಬಾ ಜಾಣ್ಮೆಯಿಂದ ಮಾಡಿರುವ ಅವರ ಯೂಟ್ಯೂಬ್‌ ಚಾನೆಲ್‌ ಕಾರಣದಿಂದ ಗಡ್ಗೆಯ ಜನಪ್ರಿಯತೆ ಇನ್ನಷ್ಟು ಹೆಚ್ಚಾಗಿದೆ. ‘ಗಡ್ಗೆ ಮಹಾರಾಜ್’ ಅವರ ಉಪನ್ಯಾಸಗಳ ಗಂಟೆಗಟ್ಟಲೆ ವಿಡಿಯೋಗಳನ್ನು ಆ ಚಾನೆಲ್‌ನಲ್ಲಿ ಪ್ರಸಾರ ಮಾಡಲಾಗಿದೆ. ಜೊತೆಗೆ ಅವರ ಇನ್‌ಸ್ಟಾಗ್ರಾಂ ಪೇಜ್‌ನಲ್ಲೂ ಚಿಕ್ಕ ವಿಡಿಯೋಗಳನ್ನು ನಿರಂತರವಾಗಿ ಹಂಚಲಾಗುತ್ತದೆ. ಆ ಪೇಜ್‌ನಲ್ಲಿ ಸುಮಾರು 2.20 ಲಕ್ಷದಷ್ಟು ಫಾಲೋವರ್‌ಗಳಿದ್ದಾರೆ.

ಒಂದು ವಿಡಿಯೋದಲ್ಲಿ ಗಡ್ಗೆ ಅವರು 30 ಮತ್ತು 40ರ ವಯಸ್ಸಿನ ಅವಿವಾಹಿತ ಭಕ್ತರನ್ನು ಉದ್ದೇಶಿಸಿ ಮಾತನಾಡುತ್ತಾರೆ. ಹಿನ್ನಲೆಯಲ್ಲಿ ಮೆದುವಾದ, ಮನಸಿಗೆ ಹಿತವನ್ನು ನೀಡುವ ಸಂಗೀತ ಕೇಳಿಬರುತ್ತದೆ. ಅದಕ್ಕೆ ಸರಿಯಾಗಿ ಅವರು ಲಯಬದ್ಧವಾಗಿ ಮಾತನಾಡುತ್ತಾರೆ. “ನಿಮ್ಮ ಎತ್ತರದಷ್ಟು ಉದ್ದದ ಹತ್ತಿಯ ಬತ್ತಿಯನ್ನು ತಯಾರಿಸಿ. ಅದರಿಂದ ದತ್ತ ಪ್ರಭುವಿನ ದೇವಸ್ಥಾನದಲ್ಲಿ ಸತತ ಮೂರು ಗುರುವಾರ ದೀಪ ಬೆಳಗಿಸಿ. ಬೇಗನೇ ನಿಮ್ಮ ಮದುವೆಯಾಗುತ್ತದೆ,” ಎಂದು ಅವರು ಹೇಳುತ್ತಾರೆ.

ಇನ್ನೊಂದು ವಿಡಿಯೋದಲ್ಲಿ, ಹಲವು ಪ್ರಯತ್ನಗಳನ್ನು ಮಾಡಿದರೂ ಪರಿಹಾರವಾಗದ ಯಾವುದೇ ಸಮಸ್ಯೆಗೆ ಗಡ್ಗೆ ಒಂದು ಪರಿಹಾರವನ್ನು ಹೇಳುತ್ತಾರೆ. “ನಿಮ್ಮ ಮನೆಯ ನೀರಿನ ಪಾತ್ರೆಯ ಪಕ್ಕದಲ್ಲಿ ಒಂದು ಬಟ್ಟಲನ್ನು ಇಡಿ. ಅದರೊಳಗೆ ಸ್ವಲ್ಪ ಗಂಗಾಜಲ ಸುರಿಯಿರಿ. ಕೈಯಲ್ಲಿ ಒಂದು ನಾಣ್ಯವನ್ನು ಹಿಡಿದು ‘ದತ್ತಧಾಮ್ ಸರ್ಕಾರ್ ಕಿ ಜೈ’ ಎಂದು ಹೇಳಿ. ಆ ಕೈಯನ್ನು ನೆತ್ತಿಗೆ ತಾಗಿಸಿ, ಬಳಿಕ ನಾಣ್ಯವನ್ನು ಬಟ್ಟಲಿನೊಳಗೆ ಹಾಕಿ. ಆ ಗಂಗಾಜಲವನ್ನು ಕಣ್ಣಿನ ಮೇಲೆ ಒತ್ತಿಕೊಳ್ಳಿ. ಇದರಿಂದ ನಿಮ್ಮ ಸಮಸ್ಯೆ ಪರಿಹಾರವಾಗುತ್ತದೆ,” ಎಂದು ಅವರು ಹೇಳುತ್ತಾರೆ.

ಇಂತಹ ಅನೇಕ ವಿಡಿಯೋಗಳು ಹೆಚ್ಚು ಜನರನ್ನು ಆಕರ್ಷಿಸಲಿ ಎಂದು ಅವರ ಚಾನೆಲ್‌ನಲ್ಲಿ ಅವರ ಭಕ್ತರು ತಮ್ಮ ಸಮಸ್ಯೆಗಳು ಪರಿಹಾರವಾದ ಬಗ್ಗೆ ಸಾಕ್ಷಿಗಳ ಮಾತುಗಳನ್ನು ಆಡುವ ವಿಡಿಯೋಗಳನ್ನೂ ನೀಡಲಾಗದೆ. ತಮ್ಮ ಕಾಯಿಲೆಗಳನ್ನು ಗುಣಪಡಿಸಿದ್ದಕ್ಕಾಗಿ ‘ದೇವಮಾನವ’ನಿಗೆ ಧನ್ಯವಾದ ಹೇಳುವ ಭಕ್ತರ ಅನುಭವಗಳನ್ನು ಅಲ್ಲಿ ಹಂಚಿಕೊಳ್ಳಲಾಗಿದೆ.

ಅನಿತಾ (ಅವರ ವಿನಂತಿಯ ಮೇರೆಗೆ ಹೆಸರು ಬದಲಿಸಲಾಗಿದೆ) ಎಂಬ 30 ವರ್ಷದ ಮಹಿಳೆಯೊಬ್ಬರು ಇಂತಹ ಒಂದು ವಿಡಿಯೋ ನೋಡಿ, ಎಡ ಕಾಲಿನಲ್ಲಿ ತೀವ್ರ ಮಾಂಸಕೋಶ ಹಾನಿಯಿಂದ ಬಳಲುತ್ತಿದ್ದ ತಮ್ಮ ಅತ್ತೆಯನ್ನು ಕರೆದುಕೊಂಡು ತಕ್ಷಣ ಗಡ್ಗೆಯ ಆಶ್ರಮಕ್ಕೆ ಬಂದರು. “ವೈದ್ಯರು ಅವರ ಕಾಲನ್ನು ಕತ್ತರಿಸಬೇಕಾಗುತ್ತದೆ ಎಂದು ಹೇಳಿದ್ದಾರೆ. ಆದರೆ ನಾವು ಅದನ್ನು ಮಾಡಿಸಲಿಲ್ಲ. ಹೀಗಾಗಿ ಇದರಿಂದ ಏನಾದರೂ ಸಹಾಯವಾಗಬಹುದು ಎಂದುಕೊಂಡು ಇಲ್ಲಿಗೆ ಬಂದೆವು,” ಎಂದು ಆಶ್ರಮದ ಆವರಣದಲ್ಲಿರುವ ಒಂದು ಶೆಡ್‌ ಕೆಳಗೆ ಕುಳಿತಿದ್ದ ಅನಿತಾ ಹೇಳಿದರು.

ಪಶ್ಚಿಮ ಮಹಾರಾಷ್ಟ್ರದ ಸತಾರ ಜಿಲ್ಲೆಯಲ್ಲಿ ಒಂದು ಏಕರೆ ಜಮೀನು ಹೊಂದಿರುವ ಸಣ್ಣ ರೈತ ಮಹಿಳೆ ಅನಿತಾ ಆಹಾರ ಬೆಳೆಗಳನ್ನು ಬೆಳೆಯುತ್ತಾರೆ. ಗಡ್ಗೆಯ ಸಲಹಾ ಶುಲ್ಕವನ್ನಾಗಲಿ, ಅವರ ಔಷಧಿಗಳ ಖರ್ಚನ್ನಾಗಲಿ ಭರಿಸುವ ಶಕ್ತಿ ಅವರಲ್ಲಿ ಇರಲಿಲ್ಲ. ಇಂತಹ ಜನರಿಗಾಗಿ ಕೇವಲ ಪ್ರಾರ್ಥನೆ ಮಾತ್ರ ಮಾಡುವ ಆಯ್ಕೆಯೂ ಆಶ್ರಮದಲ್ಲಿದೆ.

ಇವರ ಅತ್ತೆಗೆ ಬಸ್‌ನಲ್ಲಿ ಪ್ರಯಾಣಿಸಲು ಸಾಧ್ಯವಿಲ್ಲದ ಕಾರಣ, ಅನಿತಾ ಒಂದು ಕಾರನ್ನು ಬಾಡಿಗೆಗೆ ತೆಗೆದುಕೊಳ್ಳಬೇಕಾಯಿತು. “ಅದಕ್ಕೆ ನನಗೆ 8,000 ರೂಪಾಯಿ ಖರ್ಚಾಯಿತು,” ಎಂದು ಅವರು ಹೇಳಿದರು. “ಮಹಿಳೆಯೊಬ್ಬರ ಪಾದದ ಸಮಸ್ಯೆಯನ್ನು ಗಡ್ಗೆ ಮಹಾರಾಜ್ ಗುಣಪಡಿಸಿದ ಯೂಟ್ಯೂಬ್‌ ವಿಡಿಯೋವೊಂದನ್ನು ನನ್ನ ಅಕ್ಕ ಕಳುಹಿಸಿದ್ದರು. ಇನ್ನೂ ಕೆಲವು ವಿಡಿಯೋಗಳನ್ನು ನೋಡಿದ ಮೇಲೆ ಇವರನ್ನು ಇಲ್ಲಿಗೆ ಕರೆದುಕೊಂಡು ಬರುವ ನಿರ್ಧಾರ ಮಾಡಿದೆ,” ಎಂದು ಅವರು ಹೇಳಿದರು.

ಭಾರತದಲ್ಲಿ ಇಂಟರ್‌ನೆಟ್‌ ಬಳಕೆ 2024ರಲ್ಲಿ ಶೇಕಡಾ 58 ಕ್ಕೆ ತಲುಪಿದ್ದು, 88.6 ಕೋಟಿ ಸಕ್ರಿಯ ಬಳಕೆದಾರರಿದ್ದಾರೆ. ಇವರು ಈಗ ನಗರ ಪ್ರದೇಶಗಳಿಗೆ ಮಾತ್ರ ಸೀಮಿತವಾಗಿಲ್ಲ. ಸುಮಾರು 48.8 ಕೋಟಿ ಬಳಕೆದಾರರು ಗ್ರಾಮೀಣ ಭಾರತದಲ್ಲೇ ವಾಸಿಸುತ್ತಿದ್ದು, ಈ ಸಂಖ್ಯೆ ನಗರಗಳ ಬಳಕೆದಾರರಿಗಿಂತ ಗಮನಾರ್ಹವಾಗಿ ಹೆಚ್ಚು.

ಸಮಾಜದ ವಿವಿಧ ವರ್ಗಗಳಿಗೆ ಇಂಟರ್‌ನೆಟ್‌ ವೇಗವಾಗಿ ತಲುಪಿದ್ದು ‘ದೇವಮಾನವ’ರಿಗೆ ತಮ್ಮ ಖ್ಯಾತಿ ಮತ್ತು ಪ್ರಭಾವವನ್ನು ದೊಡ್ಡ ಮಟ್ಟದಲ್ಲಿ ವಿಸ್ತರಿಸಿಕೊಳ್ಳಲು ಕಾರಣವಾಯಿತು. ಭಾರತದಲ್ಲಿ ಈಗ ಬೇರೂರಿರುವ ಮತೀಯ ರಾಷ್ಟ್ರವಾದದ ವಾತಾವರಣವೂ ಅವರನ್ನು ಇನ್ನಷ್ಟು ಎತ್ತರಕ್ಕೆ ಏರಿಸಿದೆ. ಇವೆಲ್ಲಾ ಅಂಶಗಳು ಇಂತಹ ‘ದೇವಮಾನವ’ರಿಗೆ ಸಾಮಾಜಿಕ ಮಾನ್ಯತೆ ಕೊಟ್ಟಿದೆ, ಅವರಿಗೆ ಕಿಂಚಿತ್ತೂ ಭಯವಿಲ್ಲದಂತೆ ಮಾಡಿದೆ.

ಮಧ್ಯಾಹ್ನದ ಹೊತ್ತು ನಾನು ಆಶ್ರಮಕ್ಕೆ ಭೇಟಿ ನೀಡಿದೆ. ಆಗ ‘ಮಹಾರಾಜ್’ ಅವರು ಒಂದೂವರೆ ಗಂಟೆಯೊಳಗೆ 20 ಜನರನ್ನು ವೈಯಕ್ತಿಕವಾಗಿ ಭೇಟಿ ಮಾಡುವ ಕಾರ್ಯಕ್ರಮ ಹಾಕಿಕೊಂಡಿದ್ದರು. ಈ ಪ್ರತಿಯೊಬ್ಬರೂ ವೈಯಕ್ತಿಕ ಸಲಹೆಗಾಗಿ 11,000 ರೂಪಾಯಿ ಕೊಟ್ಟಿದ್ದರು. ಅಂದರೆ, ಕೇವಲ 90 ನಿಮಿಷಗಳಲ್ಲಿ ಮಹಾರಾಜ್ 2,20,000 ರೂಪಾಯಿಯನ್ನು ಸಂಪಾದಿಸುತ್ತಿದ್ದರು, ಅದೂ ಕೂಡ ಹೆಚ್ಚಾಗಿ ಅಶಿಕ್ಷಿತರಾಗಿರುವ, ನಾಳೆ ಹೊಟ್ಟೆ ತುಂಬಿಸುವುದು ಹೇಗೆ ಎಂಬ ಚಿಂತೆಯಲ್ಲೇ ಬದುಕುವ ಜನರಿಂದ. ಪ್ರತಿದಿನ ಸಾವಿರಾರು ಜನರು ಅವರ ಆಶ್ರಮಕ್ಕೆ ಬರುತ್ತಿದ್ದಾರೆ. ಅವರಿಂದ ಆಶ್ರಮದವರು ಎಷ್ಟು ಪ್ರಮಾಣದಲ್ಲಿ ಹಣವನ್ನು ದೋಚುತ್ತಾರೆ ಎಂಬುದನ್ನು ಊಹಿಸಲೂ ಸಾಧ್ಯವಿಲ್ಲ.

ಆದರೆ ಆಶ್ರಮದ ಆಸುಪಾಸು ವಾಸಿಸುವ ಸ್ಥಳೀಯರನ್ನು ಮಾತ್ರ ಅಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ನೋಡಲು ಸಾಧ್ಯವಿಲ್ಲ. ಮೊದಲ ದರ್ಶನ ಆದ ಒಂದು ತಿಂಗಳ ನಂತರ ಅಮೋಲ್ ಮತ್ತೆ ತಮ್ಮ ಮಗ ಮತ್ತು ತಾಯಿಯನ್ನು ಗಡ್ಗೆಯ ಆಶ್ರಮಕ್ಕೆ ಕರೆದುಕೊಂಡು ಹೋಗುವಾಗ, ಆಟೋ ಚಾಲಕರೊಬ್ಬರು ಇದೆಲ್ಲಾ ಸಮಯ ವ್ಯರ್ಥ ಎಂದು ಹೇಳಿದರು. “ಆ ದೇವಮಾನವ ಒಬ್ಬ ಮೋಸಗಾರ ಎಂದು ಅವನು ಹೇಳಿದ. ಆದರೆ ಕೇವಲ ಒಂದು ಭೇಟಿಯಲ್ಲೇ ಇಂತಹ ತೀರ್ಮಾನಕ್ಕೆ ಬರಬಾರದು ಎಂದು ನಾನು ಭಾವಿಸಿದೆ,” ಎಂದು ಅಮೋಲ್ ನೆನಪಿಸಿಕೊಳ್ಳುತ್ತಾರೆ.

ಎರಡನೇ ಬಾರಿ ‘ದೇವಮಾನವ’ನನ್ನು ವೈಯಕ್ತಿಕವಾಗಿ ಭೇಟಿಯಾಗುವಷ್ಟು ಹಣ ಅಮೋಲ್ ಅವರ ಬಳಿ ಇರಲಿಲ್ಲ. ಅವರು ನೇರವಾಗಿ ಕೌಂಟರ್‌ಗೆ ಹೋಗಿ, ಹಿಂದೆ ಬರೆದುಕೊಟ್ಟಿದ್ದ ಔಷಧಿಗಳನ್ನೇ ಮತ್ತೆ ತೆಗೆದುಕೊಂಡರು. “ನಾವು ಈ ಬಾರಿ ಕಡಿಮೆ ಔಷಧಿ ಖರೀದಿಸಿದ್ದರಿಂದ 4,000 ರೂಪಾಯಿ ಖರ್ಚಾಯಿತು,” ಎಂದು ಅವರ ತಾಯಿ ರಂಜನಾ ಹೇಳಿದರು. ಆದರೂ ಅದು ಅಮೋಲ್ ಅವರ ತಿಂಗಳ ಸಂಬಳದ ಅರ್ಧಕ್ಕಿಂತಲೂ ಹೆಚ್ಚು.

ಗವಾಂಡೆ ಅವರು ಕೆಲಕಾಲದಿಂದ ರಾಜೇಂದ್ರ ಗಡ್ಗೆ ವಿರುದ್ಧ ದೂರು ದಾಖಲಿಸಲು ಹೋರಾಟ ನಡೆಸುತ್ತಿದ್ದರು. ಕೊನೆಗೆ ಈ ವರ್ಷದ ಏಪ್ರಿಲ್‌ನಲ್ಲಿ ಪ್ರಕರಣ ದಾಖಲಾಗಿ, ‘ದೇವಮಾನವ’ ಹಾಗೂ ಅವರ ನಾಲ್ವರು ಸಹಚರರನ್ನು ಬಂಧಿಸಲಾಯಿತು. ಅವರ ವಿರುದ್ಧ 2013 ರ ಮೂಢನಂಬಿಕೆ ವಿರೋಧಿ ಕಾಯ್ದೆ, ಐಟಿ ಕಾಯ್ದೆ, ಔಷಧ ಮತ್ತು ಪರಿಹಾರಗಳ ಕಾಯ್ದೆ ಹಾಗೂ ವೈದ್ಯಕೀಯ ವೃತ್ತಿಪರರ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ.

ಬಂಧನದ ಸಮಯದಲ್ಲಿ ಗಡ್ಗೆ ಹೆಚ್ಚು ಆತಂಕಗೊಂಡಂತೆ ಕಾಣಿಸಲಿಲ್ಲ. ಪೊಲೀಸರು ಕರೆದುಕೊಂಡು ಹೋಗುವಾಗ ಮಾಧ್ಯಮಗಳ ಜೊತೆಗೆ ಮಾತನಾಡಿದ ಅವರು, ತಾವು “ದೈವಿಕ ಶಕ್ತಿಗಳನ್ನು ಹೊಂದಿರುವ ಸಂಪೂರ್ಣ ಜ್ಞಾನೋದಯಗೊಂಡವನು,” ಎಂದು ಹೇಳಿದರು.

“ಎಎನ್‌ಐಎಸ್ ತನ್ನಿಂದ ಹಣ ವಸೂಲಿ ಮಾಡಲು ಯತ್ನಿಸುತ್ತಿದೆ ಎಂದು ಹೇಳುವ ಎಐ ಮೂಲಕ ಸೃಷ್ಟಿಸಲಾದ ಒಂದು ವಿಡಿಯೋವನ್ನು ಅವನು ಬಿಡುಗಡೆ ಮಾಡಿದ್ದ. ಅದಕ್ಕೂ ಮೊದಲು, ನನ್ನ ಮೇಲೂ ಒತ್ತಡ ಹೇರಲು ಪ್ರಯತ್ನಿಸಿದ್ದ,” ಎಂದು ಗವಾಂಡೆ ಹೇಳಿದರು.

ಗಡ್ಗೆಯ ಸಾಮ್ರಾಜ್ಯ ಇರುವ ವಡಗಾಂವ್ ಪಾನ್ ಗ್ರಾಮದ ಜನರು ಆರಂಭದಲ್ಲಿಯೇ ಅವರ ಬಗ್ಗೆ ಅನುಮಾನವನ್ನು ಹೊಂದಿದ್ದರು. ಆದರೆ ಅವರ ಆಶ್ರಮಕ್ಕೆ ಹರಿದುಬರುತ್ತಿದ್ದ ಭಕ್ತರಿಂದಾಗಿ ಚಹಾ ಅಂಗಡಿಗಳು, ಹೋಟೆಲ್‌ಗಳು ಮತ್ತು ದಿನಸಿ ಅಂಗಡಿಗಳಿಗೆ ವ್ಯಾಪಾರ ಹೆಚ್ಚಾಗತೊಡಗಿತು.

ಕೈಯಲ್ಲಿ ಹೆಚ್ಚು ಹಣವಿಲ್ಲದಿದ್ದರೂ, ಪಂಢಾರಪುರಕ್ಕೆ ವಾಪಾಸ್‌ ಹೋಗುವ ಮೊದಲು ಅಮೋಲ್ ಕೂಡ ಒಂದು ಕಪ್ ಚಹಾ ಕುಡಿಯುತ್ತಾ, ತಿಂಡಿ ತಿನ್ನುತ್ತಾ ಅಲ್ಲೇ ನಿಂತಿದ್ದರು. 23,000 ರೂಪಾಯಿಗೂ ಹೆಚ್ಚು ಹಣ ಖರ್ಚು ಮಾಡಿಯೂ ಯಾವುದೇ ಪರಿಹಾರ ಸಿಗದ ಕಾರಣ, ಮೂರನೇ ಬಾರಿ ಮತ್ತೆ ಆಶ್ರಮದ ಕಡೆಗೆ ಮುಖಮಾಡಿ ಮಲಗುವ ಸಾಧ್ಯತೆಯೂ ಕಡಿಮೆ ಇತ್ತು.

ಆ ಮೂವರೂ ನಡೆದುಕೊಂಡು ಹೋಗುವಾಗ ಒಂದು ಬಿಳಿ ಮರ್ಸಿಡಿಸ್‌ ಕಾರನ್ನು ದಾಟಿಕೊಂಡು ಹೋದರು. ಆ ಅದ್ದೂರಿ ಕಾರಿನಲ್ಲಿಯೇ ‘ಮಹಾರಾಜ್’ ತಮ್ಮ ಆಶ್ರಮಕ್ಕೆ ಆಗಷ್ಟೇ ಆಗಮಿಸಿದ್ದರು. ಭಾರತದಲ್ಲಿ ಈ ಕಾರಿನ ಬೆಲೆ 65 ಲಕ್ಷ ರೂಪಾಯಿ. ಅದೇ ವೇಳೆ, ಅಮೋಲ್‌, ರಂಜನಾ ಮತ್ತು ರೋಹನ್ ತಲಾ 10 ರೂಪಾಯಿ ಕೊಟ್ಟು ಒಂದು ತುಂಬಿದ ಆಟೋ ರಿಕ್ಷಾದಲ್ಲಿ ಕುಳಿತುಕೊಂಡು, ತಮ್ಮ ಮನೆಯ ಕಡೆಗೆ ಸಾಗಲು ಕಠಿಣ ಒಂಬತ್ತು ಗಂಟೆಗಳ ಪ್ರಯಾಣವನ್ನು ಆರಂಭಿಸಿದರು.