‘बाबा’ गाडगे अऊ यू ट्यूब के चमत्कार

ये कहिनी पार्थ एम. एन. के एक ठन सीरिज के कड़ी आय आय जेन ला पुलित्ज़र सेंटर के मदद मिले हवय.

अपन चचेरा भाई ले मिले एक ठन यू ट्यूब चैनल के मामूली लिंक के सेती अमोल खांडेकर ला महीना के अपन कमई ले दुगुना ले घलो जियादा नुकसान उठाय ला परिस. अऊ येकर भरपाई संभव घलो नइ रहिस.

35 बछर के ये मजूर जेकर गुजारा भारी मुस्किल ले होवत रहिस, वो ह ये लिंक देखिस अऊ बिहनिया बिहनिया निकरेइय्या एक ठन बस मं बइठ गीस. ओकर संग ओकर 11 बछर के बेटा घलो रहिस, जेकर मुड़ मं एक ठन गाँठ रहिस, अऊ ओकर बीमार दाई घलो, जेन ह जोड़ के पीरा ला झेलत रहिस. एक ठन खटारा सरकारी बस मं 9 घंटा बइठे ले ओकर माड़ी ह अऊ घलो जकड़ गे रहिस, फेर इहाँ जाय बेकार नइ होवय. अमोल के चचेरा भाई ह ओला भरोसा दे रहिस के ओकर बीमारी ले जुड़े कतको समस्या के निदान इही यू ट्यूब चैनल मं मिलही.

ये चैनल मं वीडियो के एक ठन पूरा सीरीज़ दिखाय गे रहिस, जेन मं दाढ़ी वाला एक ठन 'बाबा' नजर आवत रहिस- जेकर माथा मं उज्जर खड़िया के लेप लगे रहय – अऊ जेन ह अपन हजारों देखेइय्या मन ला बोलय. घर परिवार के कतको समस्या ले लेके दारू के लत तक, कारोबार मं दिक्कत ले लेके कैंसर तक ले, दिमागी बीमारी ले लेके मया-मयारू तक ले- राजेंद्र गाडगे 'महाराज' करा हरेक चीज़ के इलाज रहिस.

ओकर चैनल मुताबिक, गाडगे ह दत्ता के 12 बछर के आध्यात्मिक पढ़ई करे रहिस; दत्ता ला भगवान विष्णु के अवतार माने जाथे. ‘अबाउट’सेक्शन मं बताय गे हवय, “ओकर सेवा आध्यात्मिकता सेती, दत्तागुरु ह गाडगे महाराज उपर परसन होय रहिस.” तब ले लेके अब तक, “वो ह दवा अऊ पूजा ले अपन भगत मन के कतको समस्या के समाधान करत आवत हवय.”

यू ट्यूब चैनल के 1,83,000 सब्सक्राइबर होय अऊ हरेक वीडियो के तरी मं लोगन मन के ओकर महिमा लिखे देखे के, अमोल ह सोचिस: “सिरतोन वो ह कुछु बढ़िया करत होही?”

पंढरपुर शहर के तीर के एक ठन नान-कन गाँव के बासिंदा अमोल ह स्कूल छोड़ दे रहिस अऊ अपन दाई-ददा के मदद करे बर छोटे-मोटे बूता करे सुरू कर दे रहिस. वो ह कहिथे, “ये बखत मंय एक झिन बेपारी के ड्राइवर हों. मोर काम ये इलाका के कतको किसान के उपज ला जोर के ओला मंडी तक हबराय हवय.”

ये ह दू झिन के काम आय: टेम्पो चलाय, अऊ बोरी मन ला पाछू लादे. फेर अमोल अकेल्लाच ये दूनों काम करथे, जेकर ले कुछु उपराहा कमई हो सकय. ये भारी कठिन अऊ जांगरतोड़ मिहनत के वोला हरेक महीना 10,000 रूपिया मिलथे – जेन ह ओकर एकेच आमदनी आय. ओकर दस एकड़ के जमीन खेती बर त धनहा हवय, फेर असल मं वो ह परिया परे हवय –काबर के जमीन घरेलू झगड़ा मं फंसे हवय.

अमोल के आमदनी ले ओकर पाँच परानी के परिवार के गुज़ारा भारी मुस्किल ले होथे. येकरे सेती. 60 बछर के उमर पार ओकर दाई रंजना अपन जोड़ के बढ़त दरद के इलाज करवाय बर डॉक्टर करा जाय ले बचत रहिस. फेर जब ओकर बेटा रोहन के जउनी आँखि के ऊपर एक ठन गाँठ होगे, त अमोल घबराके ओला तुरते डॉक्टर तीर ले गिस: डॉक्टर ह ओला सीटी स्कैन करवाय ला कहिस.

चिंता के कोनो बात नइ निकरिस. डॉक्टर ह बताइस के रोहन के गांठ सधारन आय, जेन ह सरलग दवई खाय ले बने हो जाही. वइसे, गाँव के एक झिन परोसी ह कहे रहिस के ओकर मुड़ मं होय गांठ के सेती हो सकथे स्कूल मं रोहन के नंबर काम आवत रहे होय. इही बात ला ले के, अमोला के चचेरा भाई ह ओला एक ठन यू ट्यूब चैनल के लिंक भेजिस अऊ ओला 'गाडगे महाराज' करा जाय के सलाह दिस.

“वइसने घलो हमन जावत रहेन, ते पायके मोर दाई ह घलो अपन जोड़ के दरद बर हमर संग जाय के फइसला करिस,” अमोल बताथे.

नौ घंटा बस मं बइठे के बाद, वो तीनों झिन एक ठन ऑटो मं बोजा के अपन जगा तक हबरिन. अहिल्यानगर जिला (पहिली अहमदनगर) के वडगाँव पान गाँव मं राजेंद्र गाडगे के बड़े अकन आश्रम मं हबरे के बाद, अमोल अपन देखे उपर बेस्वास करे नइ पावत रहिस. ओला भीड़ होय के आस त रहिस, फेर अलग-अलग जात-धरम अऊ छोटे-बड़े लोगन मन उमड़ परहीं जेन मन गाडगे ला सुने बर लाइन मं लगे रहिन, येला वो ह सोचे तक नइ रहिस. वो लोगन मन के बीच मं एक झिन अइसने घलो मनखे रहिस जेकर देह मं पेसाब नली लगे रहिस; वो ह मुस्किल ले खड़े हो पावत रहिस.

बाबा ला एक नजर देखे बर लगे होड़ ह अमोला ला भरोसा घलो दीस फेर संसो घलो. ये भीड़ ला देख ओला लगिस के संगमनेर –जेन तालुका मं ये आश्रम हवय– आय के ओकर फइसला सही हो गे. फेर संगे संग, ये ह ये घलो सोचे बर मजबूर कर दिस के आखिर वो ह गाडगे ले अकेल्ला कइसने भेंट करे सकही.

“मंय आश्रम के एक झिन सेवादार ले मदद मांगेंय,” अमोल कहिथे. “वो ह मोला कहिस के निजी भेंट बर मोला 11,000 रूपिया देय ला परही.”

ये रकम ओकर महीना भर के कमई ले हजार रूपिया जियादा रहिस. वो ह येला सोचिस. ओकर दाई अऊ बेटा के लचार आँखि आस भरे नजर ले ओला देखत रहिन. घड़ी भर मं वो ह फइसला कर लिस. वो ह अतक दूरिहा आगे हवय –त काबर न आगू जाया जाय. अमोल ह इहाँ आय बखत अपन एक झिन संगवारी ले 20,000 रूपिया उधार लेय रहिस. ओला आस रहिस के वो ह ये रकम के चार हिस्सा के एक हिस्सा खरचा करही अऊ बाकी ला लहूटा दिही. फेर अब वो हाथ ले निकल चुके रहिस.

“11,000 रूपिया दे के बाद, वो मनखे ह मोला एक ठन रसीद दिस अऊ कहिस के हमर पारी कालि आही,” अमोल बताथे. ओ जगा मं लोगन मन बर खोली हवय जिहां तीनों झिन रुके रहिन.

दूसर दिन मंझनिया मं जब ‘महाराज’ आखिर मं रोहन अऊ रंजना ले मिलिस, त ये जाँच-परख 15 मिनट ले घलो कम बखत तक ले चलिस. वो ह कुछु जड़ी-बूटी वाले दवई बताइस, जेन ला अमोल ह आश्रम भितरिच ले बिसोय सकत रहिस: ये दवई बिसोय मं वो ह 8,000 रूपिया अऊ खरचा करिस.

“मोर बेटा हमर देखभाल बर कोनो दीगर मन ले घलो जियादा मिहनत करथे,” रंजना कहिथे. “वो ह बीमार परे के बाद घलो जांगर तोड़ मिहनत करथे. मंय ओकर पइसा खइता करे नइ चाहंव.”

फेर अमोल तीर अब बस आखिरी कुछेक हज़ार रूपिया बांचे रहिस, जेन ला वो ह अपन संगवारी ले उधार ले रहिस. अइसने बड़े उधार जेन ला वो ह लंबा बखत तक ले चुकाय नइ सकही.

भलेच गाडगे बीते 30 बछर ले लोगन मन के कतको समस्या मन ला सुलझाय के दावा करथे, फेर वो ह हमेसा अतक नामी अऊ महंगा नइ रहिस. असल मं ओकर नांव ह कोविड -19 के बगरे बखत बढ़े रहिस, अइसने शहर के एक झिन अंधविश्वास-विरोधी कार्यकर्ता और वकील रंजना गावंडे ह बताइस; ये शहर गाडगे के आश्रम ले करीबन 45 मिनट के रद्दा मं हवय. ओकर यू ट्यूब चैनल, जेन ह साल 2017 मं सुरु होय रहिस, करीबन उहिच बखत जेकर सेती ओकर नांव होइस.

“महामारी के बखत लोगन मन ला अचानक ले अपन लोगन मन के गुजरे के सामना करे पा परिस,” गावंडे कहिथे. “अस्पताल मरीज मन ले भरगे रहिस अऊ लाचार परिवार ह अइसने बिपत बखत मं सहारा पाय बर जादू-टोना अऊ पूजा-पाठ डहर चले गिन. गाडगे महाराज ह भारी चालाकी ले ये मउका के फायदा उठाइस.”

गवांडे अंधश्रद्धा निर्मूलन समिति (एएनआईएस) के एक झिन पदाधिकारी आंय; ये संगठन अंधविश्वास के खिलाफ लड़थे अऊ येकर संस्थापक नरेंद्र दाभोलकर के साल 2013 मं हिंदू कट्टरपंथी मन हत्या कर दे रहिन. ओकर कार्यकर्ता मन राजेंद्र गाडगे के आश्रम मं नकली मरीज बनके गे रहिन.

“करीबन 10 बछर पहिली, गाडगे ले भेंट करे बर मुस्किल ले घंटा भर लागत रहिस,” 34 बछर के प्रशांत पानसरे कहिथे, जेन ह आश्रम मं कुछेक बेर जा चुके हवय. “आज, गर तोर किस्मत बने हवय, त ले घलो कम से कम छै-सात घंटा लागथे. वो बखत फ़ीस सिरिफ 300 रूपिया रहिस.”

फेर ओकर भेंट करे के फीस मं 3,500 फीसदी बढ़ोत्तरी के बाद के घलो लोगन मन के उछाह कम नइ होय हवय. एकर उलट, अपन यूट्यूब चैनल ला जेन किसम ले सोच समझ के बनाय गे हवय, जेकर ले ओकर लोकप्रियता अऊ बढ़ गे हवय. गाडगे महाराजके पहाड़ ऊपर ले देय प्रवचन के घंटा-घंटा भर के वीडियो मन हवंय, अऊ संगे संग ओकर इंस्टाग्राम पेज ऊपर घलो नान-नान वीडियो डलथे, जेकर 2, 20,000 ले थोकन कम फालोवर्स हवंय.

एक वीडियो मं, गाडगे ह 30 अऊ 40 बछर के कुवांरा मन ला कहिथे. ओ ह पाछू मं मंद-मंद, सुग्घर संगीत के संग एक ठन लय मं बोलथे. “अपन ऊँच बरोबर लंबा कपसा के बाती बनावव,” वो ह कहिथे. “अइसने बाती ला तीन बृहस्पत सरलग दत्ता प्रभु के मन्दिर मं जलावव. तुंहर बिहाव जल्दीच हो जाही.”

एक ठन आने उपाय मं, वो ह अइसने कोनो घलो समस्या के समाधान बताथे जेन ह बनेच कोसिस करे के बाद घलो दूर नइ होवय. वो ह कहिथे, “अपन घर के पानी रखे के मटका/ हौंला करा एक ठन कटोरी रख देवव. ओमा थोरकुन गंगाजल डारव. अपन हथेली मं कोनो घलो सिक्का ल रखव अऊ कहव- दत्ताधाम सरकार की जय. सिक्का ला अपन कपार मं छुआवव अऊ कटोरी मं डारव. ओ गंगाजल के दू बूंद ला अपन आंखि में छिटकव. एकर ले तुंहर सब्बो समस्या दूर हो जाही.”

अइसन कतको वीडियो मन मं, जेन मं ओकर चैनल मं भगत मन के गवाही हवय, जेन मं वो मन 'बाबा' (भगवान के अवतार) ला कतकोन किसम के बीमारी मन ला बने करे बर आभार जतावत हवंय.

30 बछर के अनीता (बदले नांव) ला अइसनेच एक ठन वीडियो मिलिस अऊ वो ह अपन सास ला धरके तुरते आश्रम हबरिस; ओकर सास के डेरी गोड़ मं घाव होगे रहिस. आश्रम के अहाता मं एक ठन परछी मं बइठे अनीता ह बताइस, “डाक्टर मन सुना दे रहिन के ओकर गोड़ काटे ला परही.” वो ह बतावत जाथे, “हमन नइ कटवायेन, हमन सोचेन के हो सकते इहाँ कुछु मदद मिला जाय.”

पच्छिम महाराष्ट्र के सतारा जिला मं एक एकड़ ज़मीन के छोटे किसानिन अनीता ह अपन खाय बर कमाथे. ओकर करा गाडगे ले भेंट होय के फ़ीस धन ओकर दवई बिसोय ओकर बस मं नइ रहिस. अइसने लोगन मन करा सिरिफ पूजा-पाठ करे एक ठन उपाय हवय.

फेर ओला इहाँ तक आय बर भाड़ा मं कार करे ला परिस, काबर के ओकर सास के बस मं जाय संभव नइ रहिस. “ये मं मोर 8,000 रूपिया खरचा हो गीस,” वो ह बताइस. “मोर बहिनी ह मोला यू ट्यूब मं एक ठन वीडियो के लिंक भेजे रहिस, जेन मं गाडगे महाराज ह एक झिन माइलोगन के गोड़ के इलाज करे रहिस. मंय कुछु अऊ वीडियो देखेंय अऊ फइसला करेंय के वोला ऊहाँ ले के जाहूँ.”

देस (भारत) मं इंटरनेट के पहुंच साल 2024 मं 58 फीसदी तक ले हबर गे हवय, जेन मं 88.6 करोड़ सक्रिय यूजर हवंय. अऊ ओ मन अब सिरिफ सहर मन तक ले नइ यें. ओकर मन ले करीबन 48.8 करोड़ लोगन मन गाँव-देहात मं रहिथें, जेकर संख्या शहर मं रहेइय्या मन ले बनेच जियादा हवय.

समाज के अलग-अलग बरग मन मं इंटरनेट के बढ़े ले ढोंगी बाबा मन ला भारी नांव अऊ रसूख मिले मं मदद मिले हवय. देस मं ये बखत धरम के नांव मं जइसने राष्ट्रवाद के माहौल बने हवय, ओकर से ये मन अऊ जादा ऊपर उठगे हवंय. ये सब्बो जिनिस ‘बाबा’ मन ला सही ठहराथे अऊ ओमन के मनमानी ला बढ़ावा देथे.

जेन मंझनिया मंय आश्रम गे रहेंय, तेन दिन ‘महाराज’ ला डेढ़ घंटा मं 20 झिन ले भेंट करे ला रहिस; ये लोगन मन ओकर ले अकेल्ला भेंट होके सलाह लेय बर 11,000 रूपिया देय रहिन. आने ढंग ले कहे जाय त, वो ह 90 मिनट मं भोला-भाला सिधवा लोगन मन ले 2,20,000 रूपिया कमा ले रहिस –ये मन मं कतको अनपढ़ रहिन अऊ ओ मन ला ये घलो पता नइ रहिस के दूसर दिन के ओकर खाय के पइसा कहां ले आही. हरेक दिन हजारों लोगन मन आश्रम आथें. वो मन ये लोगन मन ले कतक पइसा कमाथें, येकर अन्ताज कोनो घलो लगा सकथे.

फेर जेन इहाँ के लोगन मन के आश्रम जाय सबले सुभीता हवय, वो मन सायदेच कभू उहाँ जाथें. जब अमोल अपन पहिली भेंट के महीना भर बाद अपन बेटा अऊ दाई के संग गाडगे करा लहुटिस, त ऑटो ड्राइवर ह ओकर ले कहिस के वो ह अपन बखत खइता करत हवय. अमोल सुरता करत बताथे, “वो ह कहे रहिस के ये मइनखे धोखेबाज आय. फेर मंय सोचेंय के सिरिफ एकेच बेर जाय के बाद मोला कोनो राय राखे ला नइ चाही.”

ए दारी ओकर करा बाबा ला अकेल्ला भेंट करे के बिनती बर पइसा नइ रहिस. अमोल सीधा काउंटर मं गीस अऊ उइच दवई फिर ले बिसो लिस. “हमन कम बिसोयेन, ते पायके कुल 4,000 रूपिया लगिस,” ओकर दाई रंजना कहिथे. ये ह ये बखत घलो महीना के तनखा के करीबन आधा हिस्सा आय.

गवांडे ह बनेच बखत ले राजेंद्र गाडगे के खिलाफ सिकायत करत रहिस, जेन ह आखिर मं ये अप्रैल मं दरज करे गिस; अऊ वो ‘बाबा’ अऊ ओकर चार झिन संगवारी मन ला गिरफ्तार कर ले गिस. ओकर उपर अंधविश्वास विरोधी अधिनियम,2013, आईटी अधिनियम,औषधि अऊ उपचार अधिनियम अऊ चिकित्सा व्यवसायी अधिनियम के तहत मामला दरज करेगे हवय.

गाडगे अपन गिरफ़्तारी ला लेके डेर्रावत नइ दिखिस. जइसने के वोला ले जाय बखत वो ह मीडिया ले कहिस, वो ह ‘ग्यानी मइनखे’ हरय अऊ ओकर करा ‘देवी सक्ति’ हवय.

“वो ह एआई ले बनाय एक ठन वीडियो दिखाइस, जेन मं वो ह दावा करिस के एएनआईएस ह ओकर ले पइसा मांगत रहिस,” गावंडे बताथे. “ओकर पहिली वो ह मोर उपर दुवाब डारे के कोसिस घलो करे रहिस.”

वडगाँव पान गाँव, जिहां गाडगे के राज हवय, उहाँ सुरु मं ओकर बारे मं कुछु हिचक रहिस. फेर ओकर सेती होवेइय्या भीड़ ह वो इलाका के चाय-पानी, खाय-पिये के अऊ किराना दूकान मन के कारोबार बढ़े लगिस.

अमोल घलो, जेन ह तंगी ले गुजरत रहिस, पंढरपुर लहूटे के पहिली चाहा पानी बर रुकिस. ओकर तीसर बेर आय के संभावना कमेच रहिस, काबर के वो ह 23,000 रूपिया ले जियादा खरचा कर चुके रहिस अऊ ओकर कोनो फायदा घलो नजर नइ आवत रहिस.

ओमन जब बहिर निकरत रहिन,त एक ठन सफेद रंग के मर्सिडीज गाड़ी के लकठा ले गुजरिस. ‘महाराज’ह ओतके बेरा ओकर कतको मंहगा गाड़ी ले अपन आश्रम के भीतर गिस. देस (भारत) मं ये मॉडल के सुरूआती कीमत 65 लाख रूपिया हवय. येती, अमोल,रंजना अऊ रोहन मन दस-दस रूपिया सीट वाले एक ठन ऑटो रिक्सा मं बोजाय अपन घर डहर नौ घंटा के रद्दा बर निकर परिन.