‘बाबा’ गाडगे के यू-ट्यूबनामी भंवरजाल

इ कहानी पार्थ एम. एन के कड़ी के एगो हिस्सा ह, जेकरा पुलित्जर सेंटर के समर्थन मिलल बा.

अपना चचेरा भाई से पावल यूट्यूब के एगो साधारण लिंक अमोल खांडेकर पर अइसन भारी पड़ल कि उनका आपन दू महीना से जादे के कमाई के नोकसान उठाये के परल. औरी इ मामला धोखाधड़ीयो वाला ना रहे.

आपन गुजारा मस्किल से करे वाला 35 साल के मजूर उ लिंक देखलस औरी भोरे-भोरे चले वाला एगो बस में सवार हो गईल. ओकरा साथे ओकर 11 साल के बेटा रहे, जेकरा मूड़ी में गांठ रहे. साथे ओकर बेमार माइयो रहे जेकरा ठेहुना में दरद रहे. एगो टूटल-फूटल सरकारी बस में नौ घंटा के जात्रा से ठेहुना के जकडन औरियो बढ़ गईल. बाकिर इ जतरा बेकार ना जाए वाला रहे. उनकर चचेरा भाई भरोसा दहले रहलन कि ओ सब के देह वाला सारा मस्किल के हल ओही यूट्यूब चैनल प मिली.

ए चैनल प एगो वीडियो के कई गो कड़ी देखावल रहे. जौना में एगो दाढ़ी वाला ‘बाबा’ लउकस. उनका लिलार प उज्जर टीका रहल करे औरी उ कई हजार लोग के बीच में अपना भक्त जईसन लोग से बोलस. उनका लगे हर मस्किल के हल रहे. परिवार के समस्या होखे चाहे सराब के बान होखे. चाहे कौनो पैसा-धंधा से ले के कैंसर जईसन बेमारी ले, मन के बेमारी के दिक्कत ले औरी प्रेम-जीवन तक ले, राजेन्द्र गाडगे ‘महाराज’ लगे हर मस्किल के हल रहे.

उनका चैनल के अनुसार, गाडगे ‘दत्त’ क 12 साल वाला आध्यात्मिक कोर्स कईले रहलन. दत्त एगो पौराणिक संत रहलन. जेकरा के भगवान विष्णु के अवतार मान के पूजल जाला. चैनल के ‘अबाउट’ सेक्शन में आगे बतावल गईल बा, कि “सांच भक्ति से खुस हो के दत्ता गुरु गाडगे महराज के आसीरबाद दहलन. तब से ले के अब ले, “उ दवाई औरी अरदास के मदद से आपन भक्त लोग के मस्किल दूर करत आ रहल बाड़न.

यूट्यूब चैनल प 183,000 सबस्क्राइबर होखे औरी हर वीडियो के नीचे खूब बड़ाई वाला कमेंट देख के, अमोल सोचलन, “उ जरूर कुछ सही करत होहिंहे.”

पंढरपुर सहर के लगे एगो छोट गांव के रहे वाला अमोल लायिकाइंए में इस्कूल छोड़ दहलन औरी अपना माई-बाप के मदद ला छोट-मोट कर कईल सुरु क दहलें. “हम अभी एगो बैपारी खातिर ड्राइवर के कार करेनी” उ कहलन, “हमार काम इ इलाका के अलगे-अलगे खेतिहर से फसल गोट्टा क के ओकरा के मंडी ले पहुंचावल ह.”

इ दू लोग के कार ह, एगो टेम्पो चलावे ला औरी दूसर आदमी पीछे से बोरा लादेला. बाकिर अमोल अकेलही दुनू कार करेलन कि तनियक बेसी कमाई हो सके. इ बहुत मस्किल औरी हाड़ तोड़ मेहनत से उनका हर महीना 10,000 रोपया मिलेला- जौन उनका कमाई के एकमात्र जरिया ह. उनकर दस एकड़ जमीन उपजाऊ त बा, बाकिर बंजर परल बा. उ जमीन पटीदारी के झगरा में फंसल बा.

अमोल के आमदनी से उनके पांच आदमी वाला परिवार के गुजारा बहुत मस्किल से हो पावेला. एही कारन से, उनकर माई रंजना, जे 60 साल से बेसी उमिर के बाड़ी, अपना जोड़ के बढ़त दरद के इलाज करवावे खातिर डाक्टर लगे जाए के टारत रहली. बाकिर उनका बेटा रोहन के दाहिना आंख के ऊपर एगो गोली आईल, त अमोल घबरा के उनका के तुरंत डाक्टर लगे ले गईलन. डॉक्टर उनका के सीटी स्कैन करवाए के कहलन.

चिंता के कौनो बात ना रहे. डाक्टर कहलस कि रोहन के माथा में एगो गांठ हो गईल बा, नियम से दवाई खयिला से ठीक हो जाई. अइसे गांव के एगो पड़ोसी आशंका जतवलन कि रोहन के मूड़ी में के उ गांठे त कहीं स्कूल में उनकर कम नंबर के कारन ना ह. एही बात प, अमोल के चचेरा भाई उनका एगो यूट्यूब लिंक भेजलन. औरी उनका के ‘गाडगे महराज’ के लगे जाए के सलाह दहलन.

“अब हमनी ओहीजा जाते रहनी, त माइयो आपन जोड़ के दरद के इलाज खातिर हमनी के साथे जाए के फैसला कईली,” अमोल कहलन.

नौ घंटा के बस के जतरा के बाद उ लोग एगो रिक्सा में ठूंसा के अहिल्या नगर (पहले अहमद नगर), आपन मंजिल पहुंचल. उहंवा वडगांव पान में राजेन्द्र गाडगे के बड़का आश्रम के दुआर में पहुंच के अमोल के अपना आंख प बिस्वास ना भईल. उनका भीड़ के उम्मीद त रहे बाकिर हेतना बेसी के ना रहे. अलगे-अलगे जात, धरम, वर्ग के लोग के बिसाल भीड़ गाडगे के सुने खातिर पांत में लागल रहे. ओ लोग में एगो अइसनो आदमी रहे जेकरा देह में कैथेटर (पेशाब निकले खातिर लगावल पातर नली) लागल रहे. उ बड़ा मस्किल से खड़िया पावत रहे, चाहे आपन मूड़ी सीधा क पावत रहे.

ओ बाबा के एक झलक पावे खातिर मचल भगदड़ देख के अमोल के चिंतो होत रहे औरी संतोसो होत रहे. संगमनेर, जहां के तालुका में इ आश्रम रहे, में आवे के उनकर फैसला के इ भीड़ सही साबित करत रहे. बाकिर साथही, उनकरा इ सोच के ताजुबो होत रहे के कि आखिर उ गाडगे से अकेले में कइसे भेंट क सकिहें.

“हम स्टाफ में से एगो आदमी से मदद मंगनी,” अमोल बतावेलन. “उ हमरा से कहलस कि अलग से जांच करवावे खातिर 11,000 रोपया खरचा करे के होई.”

इ रकम उनकर महीना भर के कमाई से एक हजार रोपया जादे रहे. उ कुछ देर सोचत रहलन. माई औरी बेटा दुनो उनका के उम्मीद से देखत रहे. एक मिनट बाद उ फैसला कयिलन कि जब हेतना दूर आइये गईल बानी त तनियक दूर औरी आगे बढ़ जाए के. अमोल इ जतरा खातिर आपन एगो दोस्त से 20,000 रोपया उधार लेले रहलन. उनकरा उम्मीद रहे कि इ रकम के एक चौथाई हिस्सा ही उ खर्चा करिहें, बाक़ी लौटा दीहें. बाकिर अब उ मौक़ा हाथ से निकाल चुकल रहे.

“11,000 रोपया देवे के बाद उ आदमी हमरा के एगो रसीद दहलस औरी कहलस कि हमार बारी काल आई.” अमोल बतवलन. उ सराय में साझा वाला कोठरी रहे जहां उ तीनू लोग आपन रात काटल.

अगिला दिने दोपहरिया में, जब ‘महराज’ आखिर रोहन औरी रंजना से भेंट कईलन, तब इ जांच-पड़ताल 15 मिनट से बेसी ना चलल. उ कुछ आयुर्वेदिक दवाई बतवलन, जौन अमोल आश्रम से कीन सकत रहलन. इ दवाई प अमोल 8,000 रोपया औरी खर्चा क दहलन.

“हमार बेटा हमनी के देखभाल करे खातिर कौनो दूसरा आदमी से बेसी मेहनत करेला.” रंजना कहली. “उ बेमारो भईला में जीउ-जहान से मेहनत करेला. हम ओकर पइसा बर्बाद नईखी करे के चाहत.”

बाकिर अमोल लगे संघाती से लेवल उधार में से अब एके हजार रोपया बांचल रहे. एगो अईसन उधार जौन उ लमहर बेरा ले ना चुका पयिहन.

भले गाडगे पछिला 30 साल से लोग के मस्किल हल करे के दावा करत होखस, बाकिर उ हमेसा से इतना नामी औरी महंग ना रहलन. असल में, उनकर नाम में उछाल कोविड-19 के पसरे के साथे आईल. संगमनेर सहर के रहे वाली अंधबिस्वास बिरोधी कार्यकर्ता औरी वकील रंजना गावंडे ई बात बतवली. संगमनेर सहर गाडगे के आश्रम से करीब 45 मिनट के दूरी प बा. उनकर यूट्यूब चैनल, जौन 2017 में सुरु भईल रहे, ओही बेरा के आस-पास नामी भईल रहे.

गावंडे कहली, “महामारी के बेरा लोग के अचानक मिरतु देखे के परल” “अस्पताल में मरीज कुल के भीड़ रहे औरी बेबस परिवार जौन ओ बेरा बहुत कमजोर हालत में झूठ-मूठ के इलाज पर भरोसा करे लागल. गाडगे ‘महराज’ बड़ी चालाकी से लोग के एही कमजोरी के फायदा लहलन.”

गावंडे अंधश्रद्धा उन्मूलन समिति के जिम्मेदार सदस्य बाड़ी. ई अंधबिस्वास के खिलाफ लड़ वाला एगो संगठन ह जेकर संस्थापक नरेंद दास दाभोलकर के 2013 में हिंदू कट्टरपंथी लोग हत्या क देले रहे. उनके कार्यकर्ता फर्जी मरीज के रूप में राजेन्द्र गाडगे के आश्रम पहुंचल रहे.

प्रशांत पनसरे 34 साल, जे आश्रम में कई बेर आ चुकल बाड़न, कहलन “लमसम 10 साल पहिले गाडगे से भेंट करे के जोहाई मस्किल से एक घंटा होत रहे, बाकिर आज, जे रउआ भाग्साली बानी त इ जोहाई छह से सात घंटा के हो सकता. तब फीसो 300 रोपया रहे.”

बाकिर उनकर राय के फीस में 35 गुना बढ़ोतरी के बादो लोग के उत्साह कम नईखे भईल. उल्टे उनकर यूट्यूब चैनल के जेतरे सोच समझ के तईयार कईल बा, ओसे उनकर नाम औरी बढ़ले बा. इ चैनल प ‘गाडगे महाराज’ के उपदेस के एक-एक घंटा के वीडियो बा. साथही उनकर छोट वीडियो उनकर इंस्टाग्राम पेज प डलल बा. ए पेज के अनुयायी लोग के गिनती 2,20,000 से तानियके कम बा.

एगो वीडियो में, गाडगे 30 से 40 बरीस के कुंवार लोग से कहतारन. उ एगो राग में बोलतारन, जेकरा पाछे से नीमन आ सोहावन धुन बाजता. उ कहतारन, “अपना कद के बरोबर एगो सूती बतिहर (रूई के बाती) बनाई. एकरा के दत्ता परभु के मंदिर में एकसुरे तीन बियफे जराईं, बियाह जल्दिये हो जाई.”

एगो दूसरा बिडियो में उ कौनो अइसन समस्या के बारे बतावतारन जौन कई परयास के बादो नईखे होखत, “अपना घर में पानी के बरतन लगे एगो कटोरी रखीं. ओकरा में तनियक गंगा जल डालीं. अपना हथेली में कौनो एगो सिक्का लीँ औरी ‘दत्ताधाम सरकार’ के जय कहीं. आपन हथेली माथा से लगाईं औरी सिक्का कटोरी में डाल दीं. उ गंगाजल में से तनियक अपना आंख प छीटीं. एकरा से राउर मस्किल हल हो जाई.

इ सब बात के साबित करे खातिर उनका चैनल प भक्त लोग के कई गो विडीयो बा, जेमे उ लोग ‘भगवान’ के कई गो बेमारी के इलाज करे खातिर धन्यवाद देता.

अनीता (कहला प नाम बदल दहल बा) 30 साल के, उनका एगो अइसने वीडियो लउकल औरी उ अपना सास के ले के पहुंच गईली. उनका सास के बंवारी गोड़ में टिशू के नोकसान पहुंचल रहे. आश्रम के दुआर प एगो छानी के नीचे बईठल अनीता बतवली, “डाक्टर कह देले रहे कि उनकर गोड़ काटे के परी, बाकिर हमनी के अइसन बुझाइल कि सायद ईंहां से कुछ मदद मिल जाई.”

पश्चिमी महराष्ट्र के सतारा जिला के अनीता के लगे एक एकड़ जमीन बा. उ खाए वाला सब फसल करेली. अनीता एगो छोट किसान हई. उनका खातिर गाडगे के राय मशविरा के खर्चा उठावल बहुत मस्किल बा. अइसन लोग खातिर, बस प्रार्थना करे के एगो रास्ता बा.

बाकिर उनका एगो कार किराया प लेवे के परल. काहे से कि उनकर सास से बस के जातरा होईये ना पाईत. “एमे हमार 8,000 रोपया खरचा हो गईल.” उ बतवली, “हमार बहिन हमारा के एगो यूट्यूब वीडियो के लिंक भेजलस, जेमे गाडगे महराज एगो मेहरारू के पैर के इलाज कईले रहलन. हम औरियो वीडियो देखनी औरी तय कईनी कि हम उनका के ईंहां ले आएम.”

इंटरनेट के पहुंच भारत में 2024 में भारत में 58 परतिसत ले हो गईल, जेमे 88 करोड़ 60 लाख लोग इंटरनेट चलावत रहे. औरी अब ई सुविधा खाली सहरिये इलाका ले नइखे. एमे से लमसम 44 करोड़ 80 लाख लोग गांव वाला भारत में रहेला. ई गिनती सहर में रहे वाला लोग से बेसी बा.

समाज के कई गो वर्ग में इंटरनेट के पसराव से ‘धर्मगुरु लोग’ के परसिद्धि औरी परभाव के ऊंचा प पहुंचावे में बहुत मदद भईल बा. भारत में अब जौन ‘धार्मिक राष्ट्रवाद’ के माहौल रच-बस गईल बा, उ ओकरा के औरियो ऊंचाई प ले जाता. इ सब अपना के ‘धर्मगुरु लोग’ माने वाला बाबा लोग के आउर जादे मानता देवेला आउर उनकर बेखौफ रवैया के बढ़ा देवेला.

जौना दोपहरिया हम आश्रम में गईनी, ओह दिन ‘महाराज’ के डेढ़ घंटा में 20 लोग से भेंट करे के रहे. जे लोग अकेले में राय करे खातिर 11,000 रोपया देले रहे. दोसरा तरे से कहल जाय त 90 मिनट में 2,20,000 रोपया कमा लह्लें. एमे से कई गो लोग अनपढ़ रहे. औरी ओ लोग के ईहो पक्का ना रहे कि अगिला खयका कहां से आई. इ लोग से उ केतना पईसा कमालें, एकर अंदाजा केहू लगा सकता.

बाकिर, जे लगे के लोग बा ओकरा आश्राम में जेल सबसे आसान बा, उ लोग सायदे कब्बो जाला. जब अमोल पहिला भेंट के बाद अपना बेटा औरी माई के साथे अयिले, त औटो ड्राइवर उनका से कहलस कि उ आपन समय बर्बाद कर रहल बा. अमोल मन पार के कहलन, “उ कहलस कि उ आदमी धोखेबाज बा.” बाकिर हम सोचनी कि खाली एक बेर गायीला के बाद हमरा कौनो नतीजा प ना पहुंचे के चाहीं.

ए पारी उनका लगे ‘बाबा’ से अकेले में भेंट करे के पईसा ना रहे. उ सीधे काउंटर प गईलन औरी आपन दवाई कुली दुबारा कीनलें. उनकर माई रंजना कहली, “हमनी बहुत कम मात्रा में दवाई किननी, एही से ओकर कुल खर्चा 4,000 रोपया भईल.” ईहो अमोल के महीना के वेतन के आधा बा.

गावंडे कुछ समय से राजेन्द्र गाडगे के खेलाफ सिकायत करे के कोसिस करत रहलन. जौन आखिर इ अप्रील में हो गईल. एकरा बाद उ ‘बाबा’ औरी उनके चार साथी लोग के खेलाफ अंधबिस्वास बिरोधी कानून, 2013, आईटी एक्ट, ड्रग्स औरी उपचार कानून, औरी मेडिकल प्रैक्टिशनर क़ानून में मामला दर्ज कईल बा.

गाडगे अपना गिरफ्तारी से बेसी परेसान ना लागत रहलन. जईसन कि ले जात बेरिया उ मीडिया के बतवलन, कि उ एगो “ग्यानी आदमी” रहलन जेकरा लगे दिव्य शक्ति रहे.

“उ एआई से बनल एगो वीडियो बनवलन जौना में दावा कईल गईल कि एएनआईएस उनका से पईसा उगाही के कोशिश करता.” गावंडे कहलन.

वडगांव पान, जवन गांव में गाडगे के पूरा साम्राज्य बा, के लोग सुरु में उनका के ले के कुछ सक कईलस. बाकिर बाद में उनका लगे आवे वाला भीड़ से ओ सब के चाय, किराना औरी खाए पीये के दोकान में पईसा आवे लागल.

इंहा ले कि अमोल के लगे पईसा के तंगी होखला के बादो, पंढरपुर लौटे से पहिले उ चाय नाश्ता खातिर रुकलन. उनका तीसरा बेर लौटे के आस कामे रहे. उ 23,000 रोपया से बेसी खर्चा क देले रहलन, औरी ओकर कौनो खास नतीजा ना निकलल.

बहरा निकलत बेरी, उ तीनू लोग एगो उज्जर मर्सिडीज के लगे से गईल. ‘महराज’ ओही झकाझक गाड़ी में बईठल रहलें. अब्बे-अब्बे उ अपना आश्रम के दुआर प आईल रहलन. ऊंहे दुसरा ओर अमोल, रंजना औरी रोहन 10 रोपया सीट के ऑटो में ठुंसा के बईठ गईल लोग. औरी अपना घर के हरा देवे वाल नौ घंटा के जात्रा प निकल गईल लोग.