امید کی آگ جلائے رکھنے کی جدوجہد میں گاڑیا لوہار

کانسی رام، گروگرام کے بنجارہ بازار میں اپنی دکان کے سامنے کھڑے ہیں۔ ان کے پیچھے بانس اور ترپال سے بنی جھونپڑی میں لکڑی کا مختلف قسم کا فرنیچر فروخت کے لیے رکھا ہے، جو اس چھوٹی سی جگہ میں ٹھونس کر بھرا گیا ہے۔ ان کی بیوی آشا قریب ہی بیٹھی ہیں۔ وہ ایک کپڑا گیلا کر کے اپنے سر پر رکھتی ہیں۔ دن کا آغاز ہو چکا ہے، لیکن دہلی کی گرمیوں کی صبح بھی بے رحم ہوتی ہے۔ آشا کہتی ہیں کہ سر پر رکھا یہ گیلا کپڑا انہیں کچھ راحت دیتا ہے۔

کانسی رام اور آشا کے لیے یہ گرمی کوئی نئی نہیں ہے۔ روایتی لوہار برادری سے تعلق رکھنے والے گاڑیا لوہاروں کے لیے آگ ہمیشہ زندگی کا حصہ رہی ہے۔ ’’ایسی گرمی میں گرم گرم لوہے کو پیٹتے تھے…آنچ کے سامنے بہت محنت کی ہے۔‘‘

گاڑیا لوہار اپنی اصل راجستھان سے جوڑتے ہیں، جہاں انہیں انتہائی پسماندہ برادری (ایم بی سی) میں شمار کیا جاتا ہے۔ دہلی اور ہریانہ کے گرد و نواح جیسے کچھ علاقوں میں، جہاں ان کی بڑی تعداد موجود ہے، انہیں دیگر پسماندہ طبقات (او بی سی) میں شامل کیا گیا ہے۔ وہ ان ۹۸ فیصد خانہ بدوش اور نیم خانہ بدوش برادریوں کا حصہ ہیں، جن کے پاس اپنی زمین نہیں ہے۔ ہندوستان میں صرف ۱۱ فیصد خانہ بدوش برادریاں سرکاری زمین پر رہتی ہیں۔ بہت سے گاڑیا لوہار اپنی بیل گاڑیوں میں ہی رہتے اور سفر کرتے ہیں، جو ان کے لیے چلتے پھرتے گھر اور کام کی جگہ کا کردار ادا کرتی ہیں۔

کانسی رام نے برسوں تک جھلستی گرمیوں اور شدید سردیوں میں سڑکوں پر گھوم گھوم کر ہاتھ سے بنائے گئے لوہے کے اوزار، برتن اور دیگر سامان بیچے ہیں۔

لیکن دہلی اور اس کے اطراف میں گزشتہ دو دہائیوں کے دوران بڑھتے ہوئے درجۂ حرارت نے ان کی زندگی پر گہرا اثر ڈالا ہے، اور اب انہوں نے گھوم گھوم کر سامان بیچنا چھوڑ دیا ہے۔ وہپاریسے کہتے ہیں، ’’اتنی شدید گرمی میں گھر گھر جانا بیکار ہے۔ اسی لیے ہم نے وہ کام چھوڑ کر یہ کام شروع کر دیا۔‘‘

آئی ایل او (بین الاقوامی ادارہ محنت) کی رپورٹ کے مطابق، گرمی کے دباؤ سے سب سے زیادہ متاثر ہونے والا ملک ہندوستان ہے۔ رپورٹ میں یہ بھی کہا گیا ہے کہ ہندوستان نے ۱۹۹۵ میں اپنے مجموعی کام کے اوقات کا ۳ء۴ فیصد کھو دیا تھا، اور اندازہ ہے کہ ۲۰۳۰ تک یہ نقصان بڑھ کر ۸ء۵ فیصد ہو جائے گا۔

کانسی رام کی دکان فٹ پاتھ پر ہے، جہاں سایہ نام کی کوئی چیز نہیں۔ ان کی جھگی، جو وہاں سے ۱۵ منٹ کے فاصلہ پر ہے، وہاں بھی حالات بہت بہتر نہیں ہیں: چار چارپائیوں کے درمیان ایک لکڑی سے بنی ٹی وی کی الماری، فریج اور ایک کولر تنگ جگہ میں رکھے ہوئے ہیں، مگر کولر پر بھی بھروسہ نہیں کیا جا سکتا۔ ان کی بیٹی نیہا کہتی ہے: ’’آندھی آ جاتی ہے… بارش وارش میں سب ٹوٹ جاتا ہے… کولر وغیرہ کچھ نہیں چل پاتا… رات کو مچھر، دن میں اوپر گرم ہو جاتا ہے… اندر نہیں رہتے، باہر سوتے ہیں۔‘‘

کوئی بھی جھگی شدید موسم، جیسے موسلا دھار بارش یا طوفان کا سامنا نہیں کر سکتی۔ نیہا (۱۴) پاری کو بتاتی ہے، ’’ہم دوبارہ جھگیاں بنا لیتے ہیں۔ یہاں آنے کے بعد سے ہم یہی کرتے آ رہے ہیں۔‘‘ پانی جیسی بنیادی ضرورتوں پر ہی ہر ماہ تقریباً ۶۰۰۰ سے ۸۰۰۰ روپے خرچ ہو جاتے ہیں۔

دہلی ڈیزاسٹر مینجمنٹ اتھارٹی کے اس ہیٹ ایکشن پلان کے مطابق، شہر میں بڑھتا ہوا درجۂ حرارت ان غریب اور پسماندہ برادریوں پر شدید اثر ڈال رہا ہے جو ہوا کی مناسب آمد و رفت سے محروم، تنگ گھروں اور کام کی جگہوں میں زندگی گزار رہی ہیں۔

کانسی رام ۲۰ سال پہلے راجستھان کے چتوڑ گڑھ سے دہلی آئے تھے۔ وہ کہتے ہیں، ’’سیرامک والے، پھول والے… سب ہم ہی ہیں… ایک ہی ہیں۔‘‘ وہ گروگرام، ہریانہ کے بازاروں میں اپنی برادری کے لوگوں کی جانب سے کیے جانے والے مختلف کاموں کا ذکر کر رہے تھے۔

گزشتہ سات آٹھ برسوں سے کانسی رام لکڑی کے سامان اور فرنیچر فروخت کر رہے ہیں، جنہیں وہ راجستھان کے جودھپور، اجمیر، جے پور اور چتوڑ گڑھ سے لے کر آتے ہیں۔ روایتی طور پر گاڑیا لوہار گاؤں گاؤں گھوم کر ہاتھ سے بنائے گئے لوہے کے اوزار، برتن اور دیگر اشیاء فروخت کیا کرتے تھے۔

گرمیوں میں ان کی فروخت میں نمایاں کمی آ جاتی ہے کیوں کہ لوگ گھروں سے باہر نکلنے کے بجائے اندر رہنا پسند کرتے ہیں۔ دیوالی کے موسم کے ساتھ نسبتاً بہتر موسم شروع ہوتا ہے، اور اس دوران وہ ایک مہینہ میں تقریباً ۱۰ ہزار روپے کما لیتے ہیں۔ ان کے فروخت کردہ سامان پر اوسط منافع تقریباً ۵۰ روپے ہوتا ہے، جو اکثر گاہکوں کے مول تول کی وجہ سے مزید کم ہو جاتا ہے۔ یہ آمدنی صرف روزمرہ کے کھانے پینے کی ضروریات پوری کرنے میں مدد دیتی ہے۔ کانسی رام کہتے ہیں، ’’کھانے لائق ملنا ضروری ہے۔‘‘

دو سال پہلے سرکاری اہلکاروں نے ان سے اپنی دکان دوسری جگہ منتقل کرنے کو کہا۔ ’’تم یہاں نہیں رہ سکتے۔ تمہیں یہاں سے ہٹنا ہوگا۔‘‘ اہلکاروں نے اس کی وجہ آس پاس کی بڑی کوٹھیوں میں رہنے والے لوگوں کی شکایات کو بتایا، جنہیں گاڑیا لوہاروں کے چولہوں کے دھوئیں اور آگ سے شکایت تھی۔

فٹ پاتھ پر دکان لگانے والے یہ لوگ کہتے ہیں کہ ایسی جبری بے دخلی کے دوران ان کی دکانوں اور فرنیچر کو اکثر توڑ دیا جاتا ہے، اور انہیں کبھی اس کا معاوضہ نہیں ملتا۔ کانسی رام بتاتے ہیں، ’’کمیٹی والے توڑ پھوڑ کر جاتے ہیں… کسی کا فرنیچر توڑ دیا… کسی کا کچھ اور توڑ دیا۔‘‘ انہیں توڑ پھوڑ اور چوری کا بھی خوف رہتا ہے۔ ’’ہمارا ۳-۴ لاکھ [روپے] کا سامان یہاں پڑا رہتا ہے،‘‘ وہ کہتے ہیں۔

تین سال پہلے، ۲۰۲۳ میں، ایسی ہی ایک کارروائی کے دوران املاک کی تباہی اور جگہ خالی کرنے کے حکم سے کانسی رام اور دیگر کنبوں کو مجموعی طور پر تقریباً ۲۰ لاکھ روپے کا نقصان ہوا تھا۔ حکومت کی جانب سے انہیں کبھی مالی یا کسی اور شکل میں معاوضہ نہیں دیا گیا۔ پھر بھی، وہ اپنے گھر دوبارہ تعمیر کرتے ہیں اور زندگی جاری رکھتے ہیں – ایسے لوہار جو اپنے خاندانوں کی امید کی آگ کو بجھنے نہیں دیتے۔