आगि ले जादा घाम झेलत गाड़िया लोहार

कांसी राम गुरुग्राम के बंजारा मार्केट मं अपन दुकान के आगू ठाढ़े हवय. ओकर पाछू, बांस अऊ तिरपाल ले बने टपरा मं, लकरी के किसम-किसिम के फर्नीचर बेचे बर रखाय हवय, जेन ह नान-कन जगा मं एक एक उपर गंजाय परे हवय. ओकर घरवाली आशा लकठाच मं बइठे हवय. वो ह एक ठन कपड़ा ला ओद्दा करके अपन मुड़ मं राखथे.दिन होगे हवय अऊ दिल्ली मं घाम के बिहनिया घलो भारी तिपते, ओकर कहना आय के मुड़ मं डारे ओद्दा कपड़ा ओला सीतल राखही.

कांसी राम अऊ आशा दूनोंच ये घाम ले अनजान नई यें. पारंपरिक गाड़िया लोहार समाज बर, आगि हमेसा ओकर संग देथे. “ऐसी गर्मी में गरम लोहे को पीटते थे…आँच के सामने बहुत मेहनत किये है.”

गाड़िया लोहार मूल रूप ले राजस्थान के बासिंदा आंय, जिहां ओ मन ला ‘सबले पिछड़ा वर्ग (एमबीसी) माने जाथे. दिल्ली अऊ ओकर तीर-तखार के इलाका मं, जिहां येकर मन के बनेच आबादी हवय, ये मन ला ‘अन्य पिछड़ा वर्ग’ (ओबीसी) मं रखे गे हवय. ये तउन 98 फीसदी घूमंतू अऊ अध-घूमंतू समाज के हिस्सा आंय जेन मं भूमिहीन हवंय. देस (भारत) मं घूमंतू समाज मन के सिरिफ 11 फीसदी हिस्सा सरकारी जमीन मं रहिथे. कतको गाड़िया लोहार अपन बइला गाड़ीच मं रहिथें अऊ किंजरत रहिथें; ये गाड़ी ओकर मन के चलत फिरत घर अऊ काम करे के जगा घलो आय.

कांसी राम ह भारी घाम अऊ जाड़ मं कतको बछर तक ले सड़क मन मं घूमत हाथ ले बने लोहा के अऊजार, बरतन अऊ दीगर जिनिस बेचे रहिस.

फेर रजधानी दिल्ली अऊ ओकर तीर-तखार के इलाका मन मं बीते बीस बछर मं बढ़त गरमी के भारी खराब असर परे हवय, अऊ वो ह घूमे बदन कर दे हवय. वो ह पारी ला बताथे, “अतक भारी घाम मं घर घर जाय बेकार आय. ते पायके हमन ये काम छोड़ दे हवन अऊ ये काम सुरु करेन.”

आईएलओ के रिपोर्ट के मुताबिक, भारत ह गरमी के तनाव ले सबले जियादा असर वाले देस आय. रिपोर्ट मं ये घलो बताय गे हवय के साल 1995 मं देस के कुल कामकाज के बखत के 4.3 हिस्सा कम होगे हवय अऊ अनुमान करे गे हवय के साल 2030 तक ये नुकसान 5.8 फीसदी हबर जाही.

कांसी राम के दुकान खुल्ला मैदान मं हवय, कोनो छैंय्या नइ ये. इहाँ ले 15 मिनट के रद्दा मं जेन झुग्गी हवय, ओकर हालत घलो बने नइ ये: चार ठन खटिया ठसाठस हवय, जिहां लकरी के बने टीवी कैबिनेट, एक ठन फ्रिज अऊ एक ठन कूलर हवय, जेकर कोनो भरोसा नइ रहय. ओकर बेटी नेहा कहिथे, “आँधी आ जाती है..बारिश-वारिश तब टूट जाती है...कूलर बगेर कुछु नहीं चल पाता.. रात को मच्छर दिन में ऊपर गरम हो जाता है...अंदर नहीं रहते..बाहर सोते हैं.”

तेज बरसा धन धुका-गर्रा मं कोनो घलो झुग्गी (झाला) नइ ठहरय. 14 बछर के ये नोनी पारी ला बताथे, “हमन फिर झाला मारथन. हमन [इहाँ बसे बखत ले] सुरु ले अइसने करत आवत हवन.” रोजमर्रा के पानी बर महीना मं करीबन 6,000 ले 8,000 रूपिया खरचा हो जाथे.

दिल्ली डिज़ास्टर मैनेजमेंट अथॉरिटी के हीट एक्शन प्लान के मुताबिक, शहर मं बढ़त गरमी के खराब असर वो गरीब अऊ वंचित समाज मन के उपर परथे जेन मन ठीक हवा पानी नइ मिले अऊ भीड़ वाले घर अऊ काम के जगा मं रहिथें.

कांसी राम 20 बछर पहिली राजस्थान के चित्तौड़गढ़ ले दिल्ली आय रहिस. वो ह कहिथे, “सिरेमिक वाले, फूल वाले... सब हम ही हैं – एक ही हैं.” वो ह बताते के ओकर समाज के लोगन मन हरियाणा के गुरुग्राम अऊ ओकर तीर-तखार के बजार मं कतको किसम के काम करथें.

बीते सात-आठ बछर ले, कांसी राम लकरी के बने जिनिस अऊ फ़र्नीचर बेचत हवय, जेन ला वो ह राजस्थान के जोधपुर, अजमेर, जयपुर अऊ चित्तौड़गढ़ ले लाथे. पारंपरिक रूप ले, गाड़िया लोहार गाँव-गाँव जाके हाथ ले बने लोहा के अऊज़ार, बरतन अऊ दीगर जिनिस बेचत रहिन.

घाम मं लेवाली बनेच कम हो जाथे काबर के ग्राहेक मन घर ले नइ निकरंय. देवारी बखत ले सीजन धरे लगथे अऊ वो ह महीना मं करीबन 10,000 रूपिया कमा लेथे. ओकर बेचेइय्या जिनिस मन मं करीबन 50 रूपिया के नफा होथे फेर अक्सर मोला भाव करेइय्या लेवाल मन कम करवा देथें. ये कमई ले बस ओकर रोज के पेट भरे ह निकर जाथे. कांसी राम कहिथे, “पेट भरे जरूरी आय.”

दू बछर पहिली, सरकारी अफसर मन ओकर ले अपन दुकान हटाय ला कहे रहिन. “तुमन इहाँ रहे नइ सकव. तुमन ला इह लेव जाय ला परही.” अफसर मन तीर के बड़े घर के लोगन मन के सिकायत ला बताइन के, जेन मन ला गाडिया लोहार मन के रांधे के चूल्हा मन ले दिक्कत रहिस.

रोड तीर मं समान बेचेइय्या मन के कहना आय के जबरदस्ती हटाय जाय बखत ओकर मन के दुकान अऊ फर्नीचर टोर देय जाथे अऊ ओ मन ला कोनो मुआवजा घलो नइ मिलय. “कमेटी वाले तोड़-फोड़ कर जाते हैं... किसी का फ़र्नीचर तोड़ दिया... किसी का क्या तोड़ दिया.” ओला तोड़-फोड़ अऊ चोरी के घलो डर रहिथे. कांसी राम कहिथे, “हमर करा 3-4 लाख रूपिया के सामान परे रहिथे.”

संपत्ति के नुकसान अऊ जगा छोड़े के आर्डर सेती कांसी राम अऊ दीगर परिवार मन ला बीते बखत तीन बछर पहिली साल 2023 मं कुल मिलाके करीबन 20 लाख रूपिया के नुकसान होय रहिस. सरकार डहर ले ओ मन ला कभू कोनो मुआवजा न मिलय, न त पइसा के रूप मं अऊ न कोनो किसम ले. वो मन अपन घर ला फिर ले बनाथें अऊ जिनगी गुजारथें – ये लोहार मन अपन घर-परिवार के आस के उजियार ला बनाय राखे हवंय.