’ہمارے چولہے تو ان لاشوں سے جلتے ہیں‘

’’ہمارے چولہے تو ان لاشوں سے جلتے ہیں،‘‘ وجے کہتے ہیں، جو وارانسی کے راجہ ہریش چندر گھاٹ پر دن کی دوسری لاش کو جلانے کی تیاریوں میں مصروف ہیں۔ دھواں اور راکھ ان کی آنکھوں اور ناک میں چبھتے ہیں، لیکن وہ لگاتار ہاتھ سے ہوا کرتے ہوئے اسی کے درمیان اپنا کام کرتے رہتے ہیں۔

وجے چودھری (۳۵) کا تعلق بنارس کی ڈوم کمیونٹی سے ہے (جس کا شمار درج فہرست ذات میں ہوتا ہے)۔ ان کا خاندان چار نسلوں سے اس کام میں لگا ہوا ہے۔ وہ ملک بھر سے آخری رسومات ادا کرنے کے لیے شہر لائے جانے والے متوفیوں کی چتاؤں کو سجانے اور ان کی لاشوں کو جلانے کا کام کرتے ہیں۔

یہاں کے دیگر لوگوں کی طرح، وجے کے گھر پر بھی سیال پٹرولیم گیس (ایل پی جی) کا کنکشن تو ہے، لیکن پچھلے ۲۵ دنوں سے انہیں گیس نہیں ملی ہے۔ ’’میں نے سلنڈر بُک کرانے کی کوشش کی، لیکن ان کا فون بس بجتا رہتا ہے۔ ایک ہزار روپے والے سلنڈر [۲ء۱۴ کلو] کے لیے ۲۰۰۰ روپے دینا ہمارے بس میں نہیں ہے۔ اس لیے ہمیں چِتا میں استعمال ہوئی لکڑیوں کے ٹکڑوں اور بچی ہوئی لکڑی سے کھانا بنانے کی پرانی روایت پر لوٹنا پڑا ہے۔ ہم روزانہ تھوڑی بہت لکڑیاں گھر لے جاتے ہیں،‘‘ وجے نے پاری کو بتایا۔

’’ایک لاش کو جلانے کے لیے ہمیں کم از کم ۳۰۰ روپے ملتے ہیں،‘‘ وہ گھاٹ کی سیڑھیوں سے نیچے اترتے ہوئے کہتے ہیں، جہاں ایک غم زدہ فیملی ابھی ابھی پہنچی ہے۔ ’’لیکن کبھی کبھی ۵۰۰-۶۰۰ روپے تک بات ہو جاتی ہے۔ یہ فیملی اپنی ماں کی لاش لے کر آئی ہے،‘‘ اتنا کہہ کر وہ تقریباً ۲۰ منٹ کے لیے غائب ہو جاتے ہیں۔

چوتھی جماعت تک پڑھے وجے، شمشان گھاٹ سے ۱۰ کلومیٹر دور پانچ رکنی فیملی کے ساتھ رہتے ہیں، جو پوری طرح ان کی کمائی پر منحصر ہے۔ انہیں ایک متوفی کی آخری رسومات ادا کروانے کے عوض کم از کم ۳۰۰ روپے ملتے ہیں اور وہ روزانہ دو سے تین لاشوں کی آخری رسومات ادا کرواتے ہیں۔ یعنی اوسطاً ان کی ایک دن کی کمائی ۶۰۰ سے ۹۰۰ روپے کے درمیان ہوتی ہے۔

’’یہاں اور منی کرنیکا گھاٹ پر میرے جیسے کم از کم ۵۰۰ لوگ ہوں گے۔ ان میں سے زیادہ تر پڑھے لکھے نہیں ہیں اور سبھی کی روزی روٹی متوفیوں کی آخری رسومات پر منحصر ہے۔‘‘ گرمی اور پسینے سے بچنے کے لیے انہوں نے گردن میں سفید رومال ڈال رکھا ہے اور پھر ایک دوسری لاش کی طرف لوٹ جاتے ہیں، جس کی آخری رسومات ادا کروانے کے لیے انہوں نے ۴۰۰ روپے طے کیے ہیں۔

منی کرنیکا گھاٹ، راجہ ہریش چندر گھاٹ سے صرف ۳ کلومیٹر دور ہے۔ یہ ہندو شمشان گھاٹ ملک کے سب سے مشہور آخری رسومات ادا کیے جانے کی جگہوں میں شمار کیے جاتے ہیں۔

دودھ وغیرہ اور پوجا کے سامان بیچنے والی چھوٹی دکانوں، پرانے رہائشی مکانوں اور بڑی بڑی ترازو والی لکڑی کی دکانوں سے بھری کئی تنگ گلیاں ہمیں منی کرنیکا گھاٹ تک لے جاتی ہیں۔

’’ہم ڈوم لوگ بس جیسے تیسے گزارہ کرتے ہیں۔ ہمارے لیے یہ پوری طرح یومیہ مزدوری کا کام ہے،‘‘ شلوک چودھری کہتے ہیں۔ وہ ندی کنارے جلتی چِتا سے آدھی جلی لکڑیوں کے دو ٹکڑے کھینچ کر نکالتے ہیں۔ اپریل کی تپتی دھوپ ہے اور بغل میں دہکتی چِتا کی گرمی – دونوں ہی بے رحم۔

وجے کی طرح شلوک بھی کہتے ہیں، ’’ہم اپنے آباء و اجداد کی طرح پھر سے چِتا کی لکڑیاں استعمال کرنے لگے ہیں۔ اس مشکل وقت میں یہی ہمارا سہارا ہیں۔‘‘ اتنا کہہ کر وہ ابھی ابھی چِتا سے نکالی گئی لکڑیاں لے کر گنگا کی طرف دوڑ پڑتے ہیں۔ تیس سیکنڈ بعد سلگتی لکڑی کے بجھنے کی آواز اور کالے دھوئیں کے ساتھ وہ واپس لوٹتے ہیں۔ ’’اب یہ گھر لے جانے لائق ٹھنڈی ہو گئی ہے،‘‘ وہ بتاتے ہیں۔

گھاٹ پر لکڑی بیچنے والے بلبیر چودھری کہتے ہیں، ’’پہلے ایک من [مقامی وزن، تقریباً ۴۰ کلو] لکڑی ۵۰۰-۵۵۰ روپے میں ملتی تھی، اب ۷۰۰-۸۰۰ روپے لگ رہے ہیں۔ تقریباً ۸۰ کلو وزن والی ایک لاش کے لیے تقریباً چھ من [تقریباً ۲۴۰ کلو] لکڑی درکار ہوتی ہے۔ لیکن اب کچھ خاندان چار یا پانچ من میں ہی کام چلا رہے ہیں اور اپنی حیثیت کے حساب سے رسمیں چھوٹی کر رہے ہیں۔‘‘ سیدھی بات یہ ہے کہ ایران جنگ کے سبب پیدا ہوئی ایل پی جی قلت نے جلاون کی لکڑی کی مانگ میں اضافہ کر دیا ہے، جس کا اثر آخری رسومات پر بھی پڑا ہے۔

شلوک (۲۹) ہائی اسکول سے آگے نہیں پڑھ پائے۔ وہ ۱۴ سال کی عمر سے یہ کام کر رہے ہیں۔ ’’میں اپنے پاپا کے ساتھ آتا تھا اور ان کی مدد کرتا تھا۔ اب وہ نہیں رہے، تو صرف میں اور امّا ہیں۔ اس لیے میں ان کے لیے کام کرتا ہوں۔‘‘ شلوک کے پیر اچانک گرم راکھ کے ڈھیر پر پھسلتے ہیں اور وہ ہنسنے لگتے ہیں۔ ’’میں تھوڑا نشہ میں ہوں۔ یہاں کی بدبو، ماحول اور لاشوں کے درمیان بغیر نشہ کے کام نہیں کیا جا سکتا،‘‘ وہ پاری سے کہتے ہیں۔ اس وقت صبح کے صرف ۱۰ بجے ہیں۔

’’گیس کی کمی نے ہمیں بہت مشکل میں ڈال دیا ہے۔ لیکن ہم ڈوم لوگ اس سے اسی طرح نمٹ رہے ہیں جس طرح صرف ہم ہی نمٹ سکتے ہیں،‘‘ شلوک کہتے ہیں۔ وہ سگریٹ کا لمبا کش لیتے ہیں اور دن کے اپنے پہلے گاہک کا انتظار کرنے لگتے ہیں۔