चिता के लकरी ले जरत घर के चूल्हा

वाराणसी (बनारस) के राजा हरिश्चंद्र मसान घाट मं दिन के दूसर दाह संस्कार बर चिता सजावत विजय कहिथे, “हमारे चूल्हे तो इन लाशों से जलते हैं.” धुआं अऊ राख आंखी अऊ नाक मं गढ़त हवय, फेर वो ह हाथ ले पंखा झलत रहिथे अऊ अपन बर रद्दा बनावत रहिथे.

35 बछर के विजय चौधरी बनारस के डोम समाज ले हवय (जेन ह अनुसूचित जाति के रूप मं सूचीबद्ध हवय), वो ह ये पेशा मं अपन परिवार के चौथी पीढ़ी ले हवय – वो ह देस भर ले अंतिम संस्कार अऊ क्रिया-करम बर शहर मं आय दुखियारी परिवार के लोगन मन के मदद करे अऊ मरे देह के सेवा करथे.

विजय करा, इहाँ के आने लोगन मन के जइसने, घर मं रसोई गैस के सिलेंडर त हवय, फेर बीते 25 दिन ले गैस नइ ये. “मंय सिलेंडर भरवाय के कोसिस करें, फेर वो मन के फोन बस बाजत रहिथे. हमन 1,000 रूपिया के दाम वाले सिलेंडर (14.2 किलो) बर 2,000 रूपिया नइ दे सकन. ते पायके हमन अपन पहिली के चलन डहर लहूट आय हवन- चिता के बांचे लकरी ले चूल्हा बारे. हमन हरेक दिन उहाँ ले थोकन लकरी ले आथन,” विजय ह पारी ला बताथे.

“एक ठन मुरदा जराय बर हमन ला कम से कम 300 रूपिया देथें,” वो ह कहिथे, अऊ पचरी उपर चढ़त वो जगा कोती जाथे जिहाँ तुरते एक झिन दुखियारी परिवार हबरे हवय. “फेर कभू कभू हमन 500-600 रूपिया तय करथन. ये परिवार अपन दाई के लाश लेके आय हवय,” वो ह कहिथे, अऊ 20 मिनट तक नजर नइ आवय.

विजय, चौथी क्लास के बादेच स्कूल छोड़ दे रहिस, अपन काम के जगा ले 3 कोस दूरिहा रहिथे. ओकर परिवार मं पांच परानी हवंय, जेन मन ओकर कमई के भरोसेच हवंय. वोला दाह-संस्कार बर कम से कम 300 रूपिया मिलथे, अऊ वो ह रोज के दू-तीन चिता सजाथे. मतलब ये आय के वो ह हरेक दिन 600 ले 900 रूपिया कमा लेथे.

“इहाँ अऊ मणिकर्णिका घाट मं मोर जइसने कम-से-कम 500 झिन होहीं; ये मन मं अधिकतर अनपढ़ आंय अऊ सब्बो मरे लोगन के अंतिम संस्कार करकेच अपन गुजारा करथें.” घाम अऊ पछिना ले बांचे बर वो ह अपन गला मं एक ठन उज्जर गमछा धरे हवय, अऊ वो ह वो मुरदा डहर जाथे, जेकर अंतिम संस्कार करे बर वो ह 400 रूपिया के सौदा करे रहिस.

राजा हरिश्चंद्र घाट ले सिरिफ कोस भर दूरिहा मणिकर्णिका घाट हवय, ये हिंदू मसान घाट देस के सबले नामी दाह-घाट आय.

कतको संकेला गली, जेन मं डेयरी अऊ पूजा के सामान बेचेइय्या नान नान दुकान, जुन्ना रिहायशी मकान अऊ बड़े-बड़े तराज़ू धरे लकरी बेचेइय्या हवंय, हमन ला मणिकर्णिका घाट तक ले जाथें.

“हमन सब्बो डोम लोगन मन रोज कमाथन, रोज खाथन. हमर बर ये ह अइसने आय जइसे कोनो बनि-भूति करथे,” श्लोक चौधरी ह नदी के तीर मं जरत चिता ले दू ठन आधा जले लकरी ला हेरत कहिथे. ओखर ऊपर अप्रैल के घाम अऊ ओकर बगल मं जरत चिता के ताप ह एकदम निठुर बने हवय.

विजय के जइसनेच श्लोक घलो कहिथे: “हमन अपन पुरखा मन के जइसने अब चिता के लकरी बउरे लगे हवन. मुस्किल बखत मं इहीच हमर सहारा आय.” अऊ ओकर बाद वो ह चिता ले निकारे कुछु लकरी मन ला धरके गंगा कोती निकर परथे. आधा मिनट बाद, लकरी के चटचटाय अऊ अपन उपर उठत भुरुवा धुआं के संग, वो ह नदी पार ले लहूट आथे. वो ह समझावत कहिथे, “ये ह अतक जुड़ा गे हवय के येला घर ले जाय, जाय सकथे.”

घाट मं लकरी बेचेइय्या बलबीर चौधरी कहिथे, “पहिली एक मन (इहाँ के नाप, जेन ह 40 किलो के बरोबर होथे) लकरी के दाम 500-550 रूपिया रहिस, अब ये ह 700-800 रूपिया हो गे हवय. 80 किलो वजनी एक ठन लाश बर करीबन छै मन (करीबन 240 किलो) लकरी के जरूरत परथे. कुछु परिवार अब चार धन पाँच मनलकरीच ले काम चलावत हवंय;वो मन अपन बिसोय के ताकत के हिसाब ले अंतिम संस्कार के रित-रसम मं कटौती करत हवंय.” सीधा सीधा कहे जाय त, ईरान लड़ई सेती रसोई गैस के कमी होगे हवय, जेकर ले जलावन लकरी के मांग अचानक ले बढ़ गे हवय – अऊ येकर असर अब अंतिम संस्कार उपर घलो परत हवय.

29 बछर के श्लोक, हाई स्कूल पढ़ई छोड़े हवय. वो ह 14 बछर के उमर ले इहीच काम करत हवय. “मंय अपन ददा संग आवत रहंय अऊ ओकर हाथ बटावत रहंय, अब जब वो ह गुजर गीस, त बस मंय अऊ अम्मा (दाई) हवन, ते पाय के मंय ओकर बर ये बूता करथों.” श्लोक के एक ठन गोड़ तिपत राख मं बिछल जाथे अऊ वो ह हँस परथे. “मंय थोकन नसा मं हवंव. इहाँ कतको लाश के संग, इहाँ के बास अऊ माहौल मं, बगेर नसा-पानी करे बूता करे नइ सकाय,” वो ह पारी ला बताथे. ये बखत बिहनिया के सिरिफ 10 बजे हवय.

“गैस के कमी ह हमर उपर भारी असर डारे हवय. फेर हमन जइसने- तइसने निपटत हवन, वइसने सिरिफ हम डोम लोगन मन करेच सकथन,” श्लोक कहिथे,अऊ अपन सिगरेट के भारी दम लगावत, वो ह दिन के अपन पहिला ग्राहेक ले अगोरत हवय.