चिता के लकड़ी पर खाना बनावे के मजबूर बनारस

“मुरदा जरेला, त घर में खाना बनेला,” विजय चिता खातिर लकड़ी सजावत कहलन. बनारस के राजा हरिश्चंद्र घाट पर ऊ दोसर चिता जरावे के तइयारी में बाड़न. लकड़ी के धुआं आ राख से आंख आ नाक लहरता, बाकिर हाथ से अपना के हवा कर-कर के ऊ ओही में आपन काम करत जात बाड़न.

पैंतीस बरिस के विजय चौधरी बनारस के डोम समुदाय (अनुसूचित जाति) से आवेलन. परिवार में ई चौथा पीढ़ी बा जे देस भर से अंतिम संस्कार खातिर बनारस के घाट पर आवे वाला मुरदा के संभारेला आ ओकरा अंतिम विदाई देवेला.

बाकी लोग जइसन, विजय के घर पर भी एलपीजी गैस कनेक्शन त बा, बाकिर पछिला 25 दिन से सिलिंडर सब ढनढनाएल पड़ल बा. “कंपनी में फोन लगाव, त केहू उठावत नइखे. हमनी 1,000 वाला सिलिंडर (14.2 किलो) खातिर 2,000 खरचा नइखी कर सकत. त अब पुरान तरीका से घर में चूल्हा जरावल जा रहल बा. चिता में जरल लकड़ी के बचल टुकड़ा सब उठा के लाइला आउर ओकरे पर खाना बनाइला. हमनी रोज थोड़ा-बहुत लकड़ी उठा के ले आवत बानी.”

“एगो मुरदा जरावे खातिर कम से कम 300 रुपइया मिलेला,” खड़ा ढाल वाला सीढ़ी चढ़त ऊ कहलन. ऊ तुरंते पहुंचल शोक-संतप्त परिवार लगे पहुंचत बाड़न. ऊ बतइलन, “बाकिर कबो-कबो बात बन जाला, त 500 से 600 भी मिल जाला. ई परिवार आपन माई के शव लेके आइल बा,” एतना कहत ऊ 20 मिनट खातिर नजर से ओझल हो गइलन.

चौथा में स्कूल छोड़ देवे वाला विजय एह घाट से कोई 10 किमी दूर रहेलन. उहंवा उनकर पांच जना के परिवार बा, जे उनके कमाई पर निर्भर बा. एगो दाह-संस्कार में उनका कम से कम 300 रुपइया मिल जाला. ऊ रोज के कोई दू-तीन ठो दाह-संस्कार करेलन. मतलब रोज औसतन 600 से 900 रुपइया के कमाई होखेला.

“इहंवा एह मणिकर्णिका घाट पर हमरा जइसन कोई 500 लोग होई. जादेतर लोग अनपढ़ बा आउर मुरदा जरावे के इहे काम पर निर्भर बा.” गरमी आ पसीना से बचे खातिर उनकर गरदन में उज्जर गमछा लपेटल बा. अब ऊ 400 रुपइया में तइयार भइल एगो परिवार खातिर शवदाह करे जात बाड़न.

मणिकर्णिका घाट, राजा हरिश्चंद्र घाट से मात्र 3 किमी के दूरी पर बा. दुनो घाट देस के प्रसिद्ध श्मशान घाट मानल जाला.

मणिकर्णिका घाट जाए वाला पातर-पातर गली में दूध आ पूजा के सामान से भरल छोट-छोट दोकान, पुरान घर आउर लकड़ी तौले वाला बड़का-बड़का तराजू मिली.

“डोम लोग के रोज कमाए, रोज खाए वाला जिनगी बा. हमनी खातिर ई रोज के मजदूरी जइसन बा,” श्लोक चौधरी नदी के घाट पर जरत चिता से लकड़ी के दू ठो अधजरल टुकड़ा निकालत कहलन. माथ पर अप्रिल के जरत घाम बा आउर सामने चिता से उठत लपट, दुनो निर्दयी.

विजय जेका श्लोको के कहनाम बा, “पहिले लोग चिता के लकड़ी पर खाना बनावत रहे, अब उहे नौबत आ गइल बा. एह कठिन घड़ी में इहे सहारा बा.” फेरु ऊ चिता से उठावल लकड़ी लेके जल्दी-जल्दी गंगा किनारे भाग जात बाड़न. 30 सेकेंड में लकड़ी ठंडा होखे के छन्न से आवाज करता. मटमैला धुंआ छोड़त लकड़ी हाथ में लेले ऊ नदी किनारे से लउट आवत बाड़न. आ समझावत कहत बाड़न, “अब घर ले जाए लाइक ई ठंडा हो गइल बा.”

घाट पर लकड़ी बेचे वाला बलबीर चौधरी के कहनाम बा, “पहिले एक मन (40 किलो) लकड़ी 500 से 550 रुपइया में मिल जात रहे. बाकिर अब एकर दाम 700 से 800 हो गइल बा. 80 किलो के एगो लाश जरावे खातिर छव मन (कोई 240 किलो) लकड़ी के जरूरत पड़ेला. केतना परिवार त चारे पांच मन में काम चला रहल बा. जेकरा लगे कम साधन बा, ऊ ओकरे हिसाब से रसम छोट करके काम चलावता.”

उनतीस साल के श्लोक के हाई स्कूल में पढ़ाई छूट गइल. चौदह साल से ऊ एह काम में लागल बाड़न. “हम पापा संगे घाट पर आवत रहीं आ उनकर मदद करत रहीं. अब ऊ त नइखन, हम आ माई बचल बानी. अब हम माई खातिर काम करिला.” राख के गरम ढेर पर पांव पड़ल, त श्लोक तनी लड़खड़ा गइलन. एह बात पर ऊ हंसत कहलन, “हमार माथा तनी घूमत लागता. एतना मुरदा के बीच काम कइल आसान नइखे. ई गंध आउर इहंवा के माहौल. ई सब के बहुते खराब असर पड़ेला.” भोर के बस दस बाजल बा.

“गैस के किल्लत से आदमी-आदमी परेसान बा. बाकिर एह स्थिति से निपटल जा रहल बा, जइसने एगो डोम निपट सकेला,” श्लोक कहलन. सिगरेट के लंबा कश लेत ऊ आज के पहिल ग्राहक के आवे के राह ताके लगलन.