تھیلسیمیا سے ایچ آئی وی تک کا سفر

’’کوئی بھی اسے ہاتھ نہیں لگا رہا تھا؛ ہرشخص نے اس سے دوری بنا رکھی تھی۔ جب ڈاکٹر صاحب آئے، تو وہ بھی ہاتھوں میں دستانے پہن کر اور منہ ڈھک (ڈھانپ) کر اس کا معائنہ کر رہے تھے۔‘‘

سُنیتا لگوری اسپتالوں سے اچھی طرح واقف ہیں۔ وہ اپنی بیٹی کو وہاں اتنی دفعہ لے جا چکی ہیں کہ اب اس کی گنتی بھی یاد نہیں رکھنا چاہتیں۔

ان کی سات سالہ بیٹی رِیا جب محض پانچ مہینے کی تھی، تب اس میں تھیلیسیمیا کی تشخیص ہوئی تھی۔ تھیلیسیمیا ایک موروثی خون کی بیماری ہے، اور رِیا کو جس نوع کی تھیلیسیمیا ہے، اس کے علاج کے لیے باقاعدگی کے ساتھ زندگی بھر خون بدلنا ضروری ہوتا ہے۔ اسی لیے سنیتا ہر مہینہ دو بار اسے ہسپتال لانے کی عادی ہو چکی ہیں اور سرکاری اسپتال کے عملہ سے بھی اچھی طرح واقف ہو چکی ہیں۔

لیکن ستمبر ۲۰۲۵ کا دورہ ایسا تھا، جسے وہ زندگی میں کبھی نہیں بھلا پائیں گی۔

وہ گھر سے اس امید کے ساتھ نکلی تھیں کہ ریاست کی ’سوامی وویکانند نِشکت سواولمبن پروتساہن یوجنا‘ کے تحت ملنے والی ایک ہزار روپے ماہانہ کی امداد کے لیے درخواست دیں گی۔ انہیں بتایا گیا کہ درخواست جمع کرنے کے لیے کچھ اضافی ٹیسٹ کروانا ضروری ہے۔

سنیتا نے انتظار کیا، اور جب ٹیسٹ کے نتائج آئے تو اس نے سب کچھ بدل دیا۔ ان کی بیٹی ایچ آئی وی پازیٹو تھی۔ وہ ہیومن امیونو ڈِفیشئینسی وائرس (ایچ آئی وی، یعنی انسانی مدافعتی قلت کا وائرس) سے متاثر ہو چکی تھی۔ اگر اس کا علاج نہ کیا جائے تو ایچ آئی وی بعد میں خوفناک ایڈز (ایکوائرڈ امیونو ڈفیشئینسی سنڈروم) کا باعث بن سکتا ہے۔

’’ہم نے اس کے بارے میں کبھی نہیں سنا تھا۔ ہمیں یہ بھی نہیں معلوم تھا کہ یہ بیماری کیا ہے،‘‘ ریا کے ساتھ اپنے ایک کمرہ کے کچے مکان کے باہر بیٹھی سنیتا کہتی ہیں۔ وہ ہفتوں بعد بھی صدمہ کی حالت میں ہیں۔ ان کے شوہر وجے اکثر کام کے سلسلے میں ہجرت کرتے ہیں اور اس دفعہ وہ امید کر رہے تھے کہ اپنے گھر کی دوبارہ تعمیر کے لیے کافی رقم لے کر آئیں گے۔ پانچ افراد پر مشتمل یہ فیملی ’ہو‘ برادری سے تعلق رکھتی ہے، جسے جھارکھنڈ میں درج فہرست قبائل (شیڈولڈ ٹرائب) کے طور پر درج کیا گیا ہے۔

ریا ہمیشہ سے سنیتا کی ذمہ داری رہی ہے۔ ’’میرے شوہر اسے نہیں چاہتے تھے۔ انہوں نے کہا تھا، ’میرے پاس کوئی کام نہیں ہے، میں بچوں کی دیکھ بھال کیسے کروں گا؟‘ لیکن میں نے اسقاط حمل نہ کرنے کا فیصلہ کیا۔‘‘ ریا کی تھیلیسیمیا کی تشخیص کے بعد، وہ اس کے ساتھ صرف تین دفعہ ہسپتال گئے ہیں۔

علاج کے اخراجات برداشت کرنے کے لیے پرعزم سنیتا نے حال ہی میں ۳۰۰۰ روپے میں ایک سیکنڈ ہینڈ سلائی مشین خریدی ہے۔ ’’میں بلاؤز کی سلائی کرتی ہوں اور ٹیلرنگ کا چھوٹا موٹا کام کر لیتی ہوں،‘‘ وہ کہتی ہیں۔ ’’اس سے مجھے ہر ماہ تقریباً ۵۰۰ سے ۶۰۰ روپے کی آمدنی ہو جاتی ہے۔‘‘

انہیں امید تھی کہ اس آمدنی سے ہسپتال کے کچھ اخراجات کو پورا کرنے میں مدد ملے گی۔ ہر دورہ پر انہیں دو سے چار دن لگتے ہیں اور کم از کم ۵۰۰ روپے خرچ ہوتے ہیں۔ ہنگامی صورتحال میں کوئی گاڑی کرایہ پر لینے یا نجی لیب سے فوری ٹیسٹ کروانے پر اخراجات ۵۰۰۰ روپے تک جا سکتے ہیں۔

’’اسے [ریا کو] تین دن سے تیز بخار تھا۔ ہم نے اسے بہت ساری دوائیاں دیں لیکن بخار نہیں اتر رہا تھا۔ اس نے مجھے بتایا، ’ممی، لگ رہا ہے میرا خون ختم ہو گیا‘،‘‘ سنیتا ستمبر ۲۰۲۵ کی اس شام کو یاد کرتی ہیں۔

اپنی بیٹی کی تشویش ناک باتیں سننے کے بعد انہوں نے ذرا بھی تاخیر نہیں کی۔ اگلی صبح انہوں نے چاول اور سالن کا ایک چھوٹا سا لنچ باکس پیک کیا اور دونوں ماں بیٹی، جو جھارکھنڈ کے مغربی سنگھ بھوم ضلع کی رہائشی ہیں، بس میں سوار ہوکر صدر ہسپتال، چائباسا کے لیے روانہ ہو گئیں۔ تقریباً ۹۰ منٹ کا یہ سفر وہ گزشتہ سات سالوں سے مہینہ میں دو بار کرتی آ رہی ہیں۔

ہمیشہ کی طرح، ریا کے نو اور ۱۱ سالہ بہن بھائیوں کو واضح ہدایات کے ساتھ گھر میں تنہا چھوڑ دیا گیا تھا کہ جب تک وہ واپس نہیں آتیں ایک دوسرے کا خیال رکھیں۔ سنیتا کے شوہر وجے لگوری صرف تین دن قبل یومیہ اجرت پر کام کرنے کے لیے گجرات چلے گئے تھے۔ سنیتا کہتی ہیں، ’’میرے بچے سمجھتے ہیں کہ ماں ہسپتال جاتی ہیں، تاکہ مئیاں [چھوٹی بہن] کا علاج کرا سکیں۔‘‘

چائیباسا کے ضلعی اسپتال جانے والی بس میں رِیا، ٹکٹ کے ۹۰ روپے بچانے کے لیے اپنی ماں کی گود میں بیٹھتی ہے۔ سنیتا، چائیباسا کے ان باقاعدہ دوروں کا ذکر کرتے ہوئے کہتی ہیں، ’’انگنت خرچہ ہوتا ہے۔ میرے پاس تو سفر کے لیے بھی بمشکل پیسے ہوتے ہیں۔‘‘

لیکن جب اس شام لیب کی پرچی ملی تو ماں کے سامنے ایک نیا اور کہیں زیادہ بڑا مسئلہ کھڑا تھا۔

ریا ایچ آئی وی پازیٹو تھی۔

انہوں نے پاری کو بتایا کہ اگر کوئی ایچ آئی وی پازیٹو کا مطلب سمجھا دیتا، تو اس سے کچھ آسانی ہو جاتی۔ لیکن ہسپتال میں کسی نے کچھ نہیں بتایا۔ اس کے بجائے انہیں اپنی بچی کے ساتھ ان لوگوں کے مشکوک رویہ سے اندازہ لگانا پڑا کہ معاملہ کیا ہے۔

سال ۲۰۱۷ میں بنائے گئے ہیومن امیونو ڈفیشئینسی وائرس اینڈ ایکوائرڈ امیون ڈیفیشئینسی سنڈروم (روک تھام اور کنٹرول) قانون میں اس بات کی وضاحت کی گئی ہے کہ تمام ایچ آئی وی جانچ کے لیے، جانچ کیے جانے والے شخص یا ان کے نمائندہ کی باخبر رضامندی ضروری ہے۔ اور یہ کہ جن لوگوں کی جانچ کی جا رہی ہے انہیں اور ان کے نمائندوں کو جانچ سے پہلے اور بعد میں مشاورت فراہم کی جائے گی۔

اس میں سے کسی بات پر بھی عمل نہیں ہوا۔ اس کے برخلاف ہسپتال کا فوری ردعمل معلومات کو چھپانے پر مشتمل تھا۔ عملہ کے ایک رکن نے سنیتا کو ڈانٹتے ہوئے کہا کہ ایسا اس لیے ہوا، کیوں کہ اس نے جلدی میں خون کا مطالبہ کیا تھا۔ انہیں دھوکہ میں رکھا گیا اور کہا گیا کہ وہ اپنی بچی کو باقاعدگی کے ساتھ دوائیں دیں، اور سب ٹھیک ہو جائے گا۔

’’ہم کیا کرتے؟ کس سے کہتے، کس سے پوچھتے؟ ہم وہیں باتھ روم میں جا کر خوب روئے، باہر بیٹھ کے بھی روئے،‘‘ سنیتا یاد کرتی ہیں۔

ہسپتال میں صحت کی نگہداشت کرنے والے ایک سینئر شخص نے نام ظاہر نہ کرنے کی شرط پر اعتراف کیا کہ ریا جیسے معاملات میں، جہاں دونوں والدین ایچ آئی وی نگیٹو ہیں، ممکنہ طور پر خون کی منتقلی کے باعث ریا خوفناک وائرس کا شکار ہوئی تھی۔

بے یقینی اور خوف کے اس تاثر کے ساتھ کہ انفیکشن ان کے دوسرے بچوں میں بھی پھیل سکتا ہے، انہوں نے ہسپتال سے ہی اپنے بڑے بھائی کو فون کیا، اور ان سے گزارش کی کہ وہ دوسرے بچوں کو اپنے گھر لے جائیں۔ انہوں نے اپنے بھائی کو ایچ آئی وی کے بارے میں کچھ نہیں بتایا، کیوں کہ وہ بھی فکر مند ہو جاتے۔

دو دن بعد وہ اپنی بیٹی کے ساتھ واپس آئیں اور خالی گھر دیکھ کر رو پڑیں۔

جب ریا کو ہسپتال سے چھٹی ملی تو انہیں ایچ آئی وی کارڈ بھی ملا۔ سات سالہ بچی کا اینٹی ریٹرو وائرل علاج شروع کیا گیا تھا۔ ڈسچارج ہونے پر، ’’انہوں نے ہمیں ایچ آئی وی کی رپورٹ کے علاوہ تمام رپورٹیں دیں،‘‘ سنیتا کہتی ہیں۔ مریض یا اس کے گھر والوں کو کوئی مشاورت فراہم نہیں کی گئی۔ ’’اگر وہ کارڈ نہ بنایا ہوتا، تو ہمیں یہ دوا بھی نہ ملتی۔ ہمارے معاملے کو دبا دیتے۔‘‘

وزارت صحت اور خاندانی بہبود کی ۲۰۱۶ کی ایک رپورٹ میں بتایا گیا ہے کہ ہندوستان میں تھیلیسیمیا میجر سے متاثر تقریباً ایک سے ڈیڑھ لاکھ بچے ہیں۔ یہ تعداد دنیا میں سب سے زیادہ ہے۔ اس مرض میں پوری زندگی خون بدلنے کی ضرورت ہوتی ہے۔ ملک میں ہر سال تقریباً ۱۰ سے۱۵ ہزار تھیلیسیمیا میجر والے بچے پیدا ہوتے ہیں۔

ریا اُن پانچ بچوں میں سے ایک تھی، جو اسی ہسپتال میں خون کی منتقلی کے بعد ایچ آئی وی پازیٹو پائے گئے تھے۔ یہ سب کے سب تھیلیسیمیا کے مریض تھے۔ چند ہفتوں کے اندر (۱۸ اکتوبر، ۲۰۲۵ کے بعد) میڈیا کو اس واقعہ کی خبر ہو گئی۔

میڈیا میں اس اسکینڈل کا پردہ فاش ہونے کے بعد ریاستی حکومت کو کارروائی کرنے پر مجبور ہونا پڑا۔

ہسپتال نے تھیلیسیمیا کے دیگر مریضوں کی جانچ کرنی شروع کر دی۔ اکتوبر کے اوائل میں دوسرے بچے کا ٹیسٹ بھی پازیٹو آیا اور اسے ادویات فراہم کی گئیں، لیکن حتمی میڈیکل فائل میں، ایک بار پھر، لیب کی رپورٹ نہیں تھی۔

ریا کی تشخیص کے تقریباً ایک ماہ بعد، اکتوبر ۲۰۲۵ میں سریش منڈا تھیلیسیمیا کے مرض میں مبتلا اپنے سات سالہ بیٹے کو اسی ہسپتال میں لے آئے تھے۔ جب لڑکے کا ایچ آئی وی ٹیسٹ، پازیٹو آیا تو غصہ سے بھرے سریش سیدھے مغربی سنگھ بھوم کے ڈپٹی کمشنر کے دفتر پہنچ گئے اور الزام لگایا کہ بلڈ بینک نے ان کے بیٹے کو آلودہ خون فراہم کیا ہے۔

اس کے بعد ہی ہسپتال نے اپنے پہلے معاملہ کو عوامی طور پر تسلیم کیا۔ اس سے پہلے کے دو معاملوں کے سامنے آنے میں مزید وقت لگا۔ ۲۶ اکتوبر، ۲۰۲۵ کو جھارکھنڈ کے وزیرِ صحت، ڈاکٹر عرفان انصاری نے چائیباسا کے بلڈ بینک میں تعینات سول سرجن کے ساتھ ساتھ دیگر افسران اور تکنیکی اہلکاروں کو بھی معطل کر دیا۔

اسی دن وزیر اعلیٰ ہیمنت سورین نے آگے آکر ایکس پر اعلان کیا، ’’ریاستی حکومت متاثرہ بچوں کے اہل خانہ کو ۲ لاکھ روپے کی مالی امداد فراہم کرے گی اور متاثرہ بچوں کے علاج کا مکمل خرچ برداشت کرے گی۔‘‘

جھارکھنڈ ہائی کورٹ نے بھی اس معاملہ کا ازخود نوٹس لیا۔ اس خبر کے بریک ہونے کے تقریباً چار ماہ بعد، ۴ فروری ۲۰۲۶ کو عدالت نے اس معاملہ میں فرسٹ انفارمیشن رپورٹ (ایف آئی آر) درج کرنے کا حکم دیا۔

ہسپتال کے حکام کا کہنا ہے کہ مغربی سنگھ بھوم ضلع میں تھیلیسیمیا کے ۵۶ مریض ہیں، جنہیں باقاعدگی سے خون کی منتقلی کی ضرورت ہوتی ہے۔ نام ظاہر نہ کرنے کی شرط پر بات کرتے ہوئے، ایک اہلکار نے کہا کہ ابتدائی تحقیقات سے معلوم ہوا ہے کہ مریضوں کو واقعی آلودہ خون ملا تھا۔ ’’ہمیں بلڈ بینک کی اسکریننگ میں کچھ بے ضابطگی ملی ہے، جسے ٹھیک کرنے کا حکم دیا گیا ہے۔‘‘

انہوں نے مزید کہا، سال ۲۰۲۳ سے ۲۰۲۵ کے درمیان، ۲۵۹ لوگوں نے خون کا عطیہ دیا، ہم نے ان میں سے اب تک تقریباً ۷۰ کا پتہ لگا لیا ہے؛ ان میں سے چار ری ایکٹو تھے۔ اس خبر کی وجہ سے بہت سے عطیہ دہندگان خوفزدہ ہیں اور ٹیسٹ کے لیے سامنے نہیں آ رہے ہیں۔‘‘

گزشتہ برسوں کے دوران پورے ہندوستان میں ایچ آئی وی کے نئے معاملوں میں تیزی سے کمی آئی ہے۔ جھارکھنڈ میں بھی نئے انفیکشن میں بھاری کمی دیکھی گئی ہے۔ تاہم، اعداد و شمارپوری کہانی بیان نہیں کرتے۔ ’’ہمارے ضلع میں باضابطہ طور پر ۶۶۴ افراد ایچ آئی وی پازیٹو کے ساتھ درج ہیں، لیکن اصل تعداد اس سے کہیں زیادہ ہے،‘‘ صدر ہسپتال کے اہلکار کا کہنا ہے۔ ’’پچھلے سال ہمارے ہسپتال میں حاملہ خواتین کی بے ترتیب اسکریننگ میں، ہم نے ۴۰۰ خواتین کی جانچ کی۔ ان میں سے پانچ، ایچ آئی وی پازیٹو تھیں۔‘‘

زیادہ تر ہسپتال، بشمول اس ہسپتال کے، ریپڈ (تیز رفتار) ایچ آئی وی ٹیسٹ استعمال کرتے ہیں۔ وہ تیز رفتار ہیں، لیکن غلط مثبت (فالس پازیٹو) نتائج دے سکتے ہیں یا ابتدائی انفیکشن کا پتہ لگانے سے قاصر رہ سکتے ہیں۔ مثبت نمونے تصدیق کے لیے اینٹی ریٹرو وائرل تھیراپی (اے آر ٹی) سینٹر کو بھیجے جاتے ہیں۔ لیکن منفی نتائج ہمیشہ انفیکشن کو مسترد نہیں کرتے۔ ایلیسا (ای ایل آئی ایس اے) ٹیسٹ زیادہ قابل اعتماد ہوتا ہے اور وائرس سے متاثر ہونے کے ۳۰ سے ۴۵ دنوں بعد انفیکشن کا پتہ لگاتا ہے۔ این اے ٹی/پی سی آر وائرس کو بہت جلد پکڑ سکتا ہے (۱۲ سے ۲۱ دنوں کے اندر) لیکن یہ کبھی کبھی ہی دستیاب ہوتا ہے۔

’’ہم دو ماہ سے ایلیسا مشین استعمال کر رہے ہیں،‘‘ ہسپتال کے ایک اہلکار بتاتے ہیں۔ ’’ریاست بھر میں، این اے ٹی ٹیسٹ صرف تین مراکز پر ہوتے ہیں، ہمارے ضلع میں کوئی مرکز نہیں ہے۔‘‘

یہاں تک کہ ان طریقوں سے بھی خون کی منتقلی سے وابستہ خطرے کو صرف کم کیا جا سکتا ہے، ختم نہیں کیا جا سکتا۔ دسمبر ۲۰۲۵ میں، مدھیہ پردیش میں بھی ایک ایسا ہی معاملہ سامنے آیا تھا، جہاں تھیلیسیمیا کے لیے زیر علاج چھ بچے ایچ آئی وی پازیٹو پائے گئے تھے۔

اسے راز رکھنے کی کوشش کے باوجود، ریاکی ایچ آئی وی کی تشخیص کی خبر گاؤں تک پھیل گئی۔ گاؤں کے تالاب پر، جو نہانے اور کپڑے دھونے کے لیے پانی کا ایک عام ذریعہ ہے، سنیتا نے دوسروں کو سرگوشی کرتے سنا کہ ریا کو وہاں نہانے کی اجازت نہیں دی جانی چاہیے۔

’’ایک دن ہم نہانے گئے،‘‘ وہ یاد کرتی ہیں۔ ’’[پہلے] سب آکر گپ شپ کیا کرتی تھیں۔ لیکن اس دن سب دوسری جانب تھیں۔ وہ ہمیں دیکھتی رہیں اور آپس میں باتیں کرتی رہیں۔ میں سمجھ گئی کہ وہ ہمارے بارے میں ہی باتیں کر رہی ہیں، اس لیے ہم نہا کر چلے گئے۔‘‘ علاحدگی مزید گہری ہوتی گئی۔ سرکاری ہینڈ پمپ انہی کی زمین پر ہے۔ پھر بھی گاؤں والے نہیں چاہتے تھے کہ ریا وہاں سے پانی نکالے، لیکن چونکہ ہینڈ پمپ ان کی زمین پر تھا، اس لیے وہ اسے روک نہیں سکے۔

’’ہم اس طرح کی دل شکستہ زندگی نہیں جی رہے تھے،‘‘ سنیتا کہتی ہیں۔ ’’جب سے اسے یہ بیماری ہوئی ہے، اسے سکون نہیں ملا ہے، اس کا جسم کمزور ہو گیا ہے، جلد پر ہر جگہ سیاہ نشانات نمودار ہو گئے ہیں۔‘‘

جب ریا اسکول گئیں تو سنیتا پریشان رہیں: ’’میں نے ٹیچر سے کہا کہ اسے یہ بیماری (تھیلیسیمیا) ہے، اس لیے اسے گرنے نہ دیں اور اگر کچھ ہو جائے تو مجھے فون کریں۔ میں کہیں نہیں جاتی، گھر پر ہی رہتی ہوں۔‘‘

ریا کو اسکول جانا بہت پسند تھا۔ وہ اڑیہ، ہو اور ہندی بولتی ہے اور انگریزی حروف تہجی سیکھ رہی تھی۔ ’’میں درجہ دوئم میں ہوں،‘‘ سات سالہ بچی نے فتح کا نشان دکھاتے ہوئے کہا۔ ’’گڈی میری سب سے اچھی دوست ہے۔ ہم ایک ساتھ فٹ بال کھیلتے ہیں۔‘‘ اس بات پر ان کی ماں ہلکے سے مسکرا دیتی ہیں۔

لیکن اس نے اسکول جانا چھوڑ دیا۔ ’’ہم کو ڈر لگتا ہے کہ اس کو کوئی کچھ کہہ دے گا۔ اس سے مجھے تکلیف ہوگی۔‘‘

نومبر ۲۰۲۵ میں ریا کی صحت تیزی سے بگڑ گئی۔ سنیتا نے ایمبولینس ہیلپ لائن ۱۰۸ پر ڈائل کیا، لیکن کوئی ایمبولینس دستیاب نہیں تھی۔ ’’ہم نے رات بھر انتظار کیا۔‘‘ اگلی صبح انہوں نے اپنی بیٹی کی حالت بیان کرتے ہوئے دوبارہ فون کیا اور انہیں وہی جواب ملا۔

ہسپتال نے انہیں اپنی سواری کا بندوبست خود کرنے کو کہا۔ وہ ایک گاؤں والے کے پاس گئیں اور اسے چائیباسا پہنچانے کے لیے ۳۰۰۰ روپے کی پیشکش کی۔ وہ شخص اپنے گھر میں داخل ہوا اور دروازہ بند کر لیا۔ انہوں نے دو بائیک والوں سے بھی رابطہ کیا، لیکن انہوں نے بھی بہانے بنا دیے۔

سنیتا کہتی ہیں، ’’یہ وہی لوگ تھے جو کسی بھی وقت مدد کے لیے حاضر رہتے تھے۔ لیکن ایچ آئی وی کے بعد نہیں۔‘‘

مایوس ہوکر، وہ نیم بے ہوشی اور بخار میں مبتلا بیٹی کو گود میں لیے بس اسٹاپ کی طرف چل پڑیں۔ وہ صبح ۸ بجے سے دوپہر ۱ بجے تک انتظار کرتی رہیں۔ چند بسیں گزر گئیں، لیکن کسی میں بیٹھنے کے لیے جگہ خالی نہیں تھی۔

’’پورا گاؤں تماشہ دیکھتا رہا، لیکن کوئی مدد کے لیے نہیں آیا،‘‘ وہ روتے ہوئے یاد کرتی ہیں۔

آخر کار ایک ایمبولینس اس وقت پہنچی جب انہوں نے ایک صحافی سے مدد کے لیے رابطہ کیا اور اس صحافی نے کچھ کال کیے۔ سنیتا کہتی ہیں، ’’اگر اس بھیا [بھائی] سے بات نہ ہوئی ہوتی، تو پتہ نہیں میری بیٹی کے ساتھ کیا ہوتا۔‘‘

گاؤں میں کچھ لوگ انہیں طعنے دیتے ہیں: اب جب کہ حکومت نے انہیں ۲ لاکھ روپے دیے ہیں، تو وہ خود گاڑی خرید سکتی تھی! دریں اثنا، سات سالہ ریا اب بھی گم صم رہتی ہے، وہ نہ صرف تھیلیسیمیا سے نمبرد آزما ہے، بلکہ ایچ آئی وی کے لیے تجویز کردہ اینٹی ریٹرو وائرلز کے مضر اثرات کا بھی سامنا کر رہی ہے۔

’’[انہوں] نے ہمارے ساتھ بہت برا سلوک کیا ہے۔ حکومت نے ہم سے پیچھا چھڑانے کے لیے ۲ لاکھ روپے دیے ہیں۔ اگر یہ ان کی اپنی اولاد ہوتی تو کیا وہ ایسا ہی کرتے؟‘‘ سنیتا کا غصہ تیز ہے، اور وہ اپنی بیٹی کے حقوق کے لیے لڑتے رہنے کے لیے پرعزم ہیں۔

’’شاید ہم غریب ہیں، اسی وجہ سے وہ سوچتے ہیں کہ وہ ایسا کرسکتے ہیں۔ کیا میری بچی کی زندگی صرف دو لاکھ روپے ہے؟‘‘ وہ مزید کہتی ہیں۔

اس اسٹوری میں شامل افراد کے نام، ان کی شناخت کے تحفظ کے لیے تبدیل کر دیے گئے ہیں۔

ترجمہ نگار: شفیق عالم