مویشیوں کے گلے میں گھنٹی باندھنے والے کاریگر

رگھو ویر وشوکرما جب بڑے سے ہتھوڑے سے پیٹ کر لوہے کی چادر بناتے ہیں، تو ایک لے میں ہتھوڑے سے آواز آتی ہے: ’’ٹھک ٹھک ٹھک ٹھک۔‘‘ اس کے بعد چھوٹے ہتھوڑے کی ’ٹپ ٹپ ٹپ‘ کی آواز آتی ہے، کیوں کہ اس کی مدد سے وہ اس بات کو یقینی بناتے ہیں کہ اس دھات کی سطح پر کوئی ابھار نہ رہ جائے، جس سے وہ گھنٹی بنانے والے ہیں؛ یہ ایک باریک کام ہے۔

رگھو ویر آہستہ سے انتہائی فخریہ لہجہ میں کہتے ہیں، ’’یہ مویشیوں کا زیور ہے۔ ٹھیک ویسے ہی جیسے سونار لوگ عام لوگوں کے لیے زیورات بناتے ہیں، ہم مویشیوں کے لیے زیور بناتے ہیں۔‘‘

رگھو ویر (۷۶) جھارکھنڈ کے پلامو ضلع کے براؤں گاؤں میں واقع رام گڑھ محلہ کے رہنے والے ہیں، جو مویشیوں کی گھنٹیاں بنانے والے سب سے بزرگ کاریگروں میں سے ایک ہیں۔ رگھو ویر بتاتے ہیں کہ یہ محلہ (یہ لوہاروں کا محلہ ہے) ایک بڑے کارخانہ جیسا ہے، جہاں ہر کوئی گھنٹی بنانے کا کام کرتا ہے۔

رگھو ویر پانچویں نسل کے کاریگر ہیں، جو بتاتے ہیں، ’’ہمارا باپ دادا سب یہی کر رہا تھا۔ ہم تو نیپڑھ آدمی ہیں، ٹھیپہ دھاری [انگوٹھا ٹیک] ہیں، یقین نہیں کریئے گا۔‘‘

سردیوں کی اس صبح، رگھو ویر اپنے مٹی کے گھر کے باہر جوٹ کی ایک بوری پر دو زانو بیٹھے ہیں۔ بائیں ہاتھ سے لوہے کی چادر پکڑے ہوئے اس پر دائیں ہاتھ سے ہتھوڑا چلا رہے ہیں۔

مویشیوں کی گھنٹیوں کو لمبے عرصہ سے ان کا زیور مانا جاتا رہا ہے۔ دنیا بھر میں دیہی برادریوں کے لیے یہ گھنٹی صرف آرائشی سامان نہیں ہے، بلکہ ایک مفید ذریعہ بھی ہے۔ اس کی مدھم آواز گھنے جنگلوں میں بھی کسانوں کو اپنے مویشیوں کو ڈھونڈنے میں مدد کرتی ہے۔

یہ گھنٹیاں کبھی خوشحال دیہی زندگی کی نشانی ہوا کرتی تھی۔ لیکن مشینوں کے آ جانے کے بعد گھنٹیوں کی جانی پہچانی آواز گم ہونے لگی۔

دیسی مویشیوں کی تعداد اب کافی گھٹ چکی ہے، جنہیں پہلے ہل جوتنے میں لگایا جاتا تھا۔ وہ کہتے ہیں، ’’مویشی اب ہیں کہاں؟ یہیں دیکھئے، کسی کے پاس ایگو، کسی کے پاس دوگو ہے، تو کہاں سے [گھنٹی] بِکے گا؟‘‘

رگھو ویر اُس دور کی بات کرتے ہیں جب مویشی پروری کی کافی اہمیت ہوا کرتی تھی، تو انہیں اپنا بچپن یاد آ جاتا ہے۔ تب آس پاس کے جنگلوں سے رومانس کا احساس جڑا ہوا تھا۔

رگھو ویر بتاتے ہیں، ’’یہاں اسی جگہ پر شیر بول رہا تھا، ہم چھوٹے گو تھے۔ اپنا ہوش میں ابھی تو طاقت نہیں ہے…لیکن ایک زمانہ تھا جب ہم شیر کو لاٹھی سے مارے ہیں۔‘‘ رگھو ویر نے یہ بھی بتایا کہ کیسے ایک زمانے میں پلامو کے جنگل کافی گھنے تھے اور کیوں مویشیوں کی گھنٹی کی مانگ اُن دنوں بہت زیادہ تھی۔

رگھو ویر اور ان کی بیوی گنگا جلی دیوی کے چھ بیٹیاں اور ایک بیٹا ہے۔ ان کے تمام بچوں کی شادی ہو چکی ہے اور وہ الگ الگ رہتے ہیں۔ فی الحال، دونوں بزرگ میاں بیوی الگ الگ سائز کی گھنٹیاں بنانے کے کام میں تقریباً ایک ہفتہ سے لگے ہوئے ہیں، جو قریب قریب پورا ہونے والا ہے۔ اس کے بعد بھٹی جلائی جائے گی اور گھنٹیاں تیار کی جائیں گی۔

رگھو ویر نے یہ ہنر بچپن میں اپنے والد سے سیکھا تھا۔ وہ بیٹھے ہوئے ہی اپنے کندھے کی طرف اشارہ کرتے ہوئے بتاتے ہیں، ’’میں جب صرف اتنا سا تھا، تو ایک بار میں نے سر پر بورا اٹھایا اور پیدل گڑھوا بازار تک چلا گیا تھا۔‘‘ وہ فخر سے بتاتے ہیں، ’’جب میں قریب ۱۰ یا ۱۲ سال کا تھا، تب ڈالٹن گنج پیدل جاتا تھا، جو یہاں سے ساڑھے تین کوس [تقریباً ۱۲ کلومیٹر] دور ہے۔ گڑھوا تو اور بھی دور تھا، یہاں سے تقریباً چھ کوس [تقریباً ۱۹ کلومیٹر] دور۔ یہ بات ۱۹۶۶ کی ہے۔‘‘

مویشیوں کی گھنٹیاں بنانا ایک لمبا اور پیچیدہ مرحلہ ہے۔ اس کے لیے پہلے لوہے کی چادریں گرم کی جاتی ہیں، جنہیں پھر مختلف سائزوں میں کاٹا جاتا ہے۔ رگھو ویر سمجھاتے ہوئے کہتے ہیں، ’’اسے فرما کہتے ہیں۔ یہ ہمارا ناپنے کا اوزار ہے۔‘‘ فرما، گھنٹیوں کی ناپ تول کرنے میں نسلوں سے استعمال ہوتا آ رہا ہے۔

مختلف سائز کی دھات کی چادروں سے مل کر بنا یہ اوزار دیوار پر چابی کے بڑے گچھے کی طرح ٹنگا رہتا ہے۔ دھات کی ہر چادر گھنٹی کے کسی مخصوص حصہ (جیسے باہر خول یا اوپری ٹوپی) کی درست پیمائش سے جڑی ہے۔ رگھو ویر کے پاس فرما کے ۱۰ سیٹ ہیں، جس میں سے ہر ایک کا استعمال مخصوص سائز کی گھنٹی بنانے کے لیے کیا جاتا ہے۔

ایک بار دھات کی چادریں کاٹ لی جاتی ہیں، کاریگر ہتھوڑے سے پیٹ کر انہیں سائز دینا شروع کرتے ہیں اور ان کے کناروں کو کیل سے جوڑ دیتے ہیں۔ اس کے بعد، گھنٹی کا اوپری حصہ بنایا جاتا ہے اور اسے رسی یا چین میں لٹکانے کے لیے اس میں ایک کلپ لگائی جاتی ہے۔

اس عمل کے آخری مرحلہ میں گھنٹیوں کو مٹی اور دھان کی بھوسی کے آمیزہ سے بنے سانچہ میں رکھا جاتا ہے۔ ہر سانچے کے اندر تھوڑا سا پیتل اور سہاگہ (بوریکس) ڈالا جاتا ہے۔ پیتل کی وجہ سے گھنٹی کی آواز صاف اور گونجتی ہوئی سنائی دیتی ہے، وہیں سہاگہ پگھلی ہوئی دھات پر ایک حفاظتی پرت بناتے ہوئے گندگیوں کو ہٹاتا ہے، جس سے دھات کا میلٹنگ پوائنٹ کم ہو جاتا ہے۔

یہ سانچے ایک یا دو دن تک دھوپ میں سُکھائے جاتے ہیں، اس کے بعد انہیں کوئلے سے جلنے والی بھٹی میں ڈال کر ان کی ویلڈنگ کی جاتی ہے۔

اکثر گھر کی عورتیں سانچہ بنانے کا کام کرتی ہیں۔ گنگا جلی کہتی ہیں، ’’یہ بہت مشکل کام ہے۔ ہمیں پہاڑوں سے مٹی لانی پڑتی ہے۔‘‘ وہ پہلے تقریباً ایک کلومیٹر دور سے سر پر مٹی ڈھو کر لاتی تھیں، لیکن اب ان کی طبیعت ٹھیک نہیں رہتی، اس لیے رگھو ویر سائیکل سے مٹی لاتے ہیں۔

گنگا جلی اس محنتی عمل کے بارے میں بات کرتے ہوئے کہتے ہیں، ’’ایکرا میں اتنا محنت با رؤآ کی مت پونچھو۔ جب بھٹی جلتی ہے، تو سب کو دن رات ایک کر کے سارا کام نمٹانا پڑتا ہے۔‘‘

وہ اپنی کاریگر سے کام کے لائق آمدنی حاصل نہیں کر پاتے ہیں، اس لیے دونوں میاں بیوی اپنی دو بیگھہ (تقریباً ۶ء۱ ایکڑ) زمین پر کھیتی بھی کرتے ہیں۔ خریف کے موسم میں دھان اور مکئی اور ربیع کے موسم میں تھوڑا بہت گیہوں کی فصل اُگاتے ہیں۔

اس سال، دو برسوں کے وقفہ کے بعد انہوں نے پھر سے کھیتی شروع کی ہے۔ گنگا جلی کہتی ہیں، ’’باقی سب کر رہے تھے، تو ہم نے بھی کر لیا۔‘‘ لیکن رگھو ویر کو زیادہ امید نہیں ہے۔ وہ بتاتے ہیں کہ اب کھیتی سے گزارہ نہیں ہو پاتا۔

رگھو ویر بتاتے ہیں کہ ۱۹۷۰ کے عشرہ میں براؤں گاؤں میں کھیتی کی بڑی دھوم تھی۔ ایک زمیندار کے یہاں ایک ساتھ ۱۶ ہل چلتے تھے۔ وہ بتاتے ہیں، ’’جو بیل تھک جاتے تھے، انہیں بدل دیا جاتا تھا، لیکن ہل کبھی نہیں رکتے تھے۔‘‘ لیکن وہ پرانے دن اب بس ایک یاد بن کر رہ گئے ہیں۔

رگھو ویر مزید بتاتے ہیں، ’’اچھی فصل ہوتی تھی، تو پوری فیملی کے دو سال کے کھانے کے انتظام ہو جاتا تھا۔ اب تو اچھی کھیتی کے موسم میں بھی ہمیں آٹا اور چاول بازار سے خریدنا پڑتا ہے۔‘‘

صرف پیداوار میں ہی کمی نہیں آئی ہے، زرعی پیداوار کے معیار میں بھی گراوٹ آئی ہے۔

اس وقت وہ سانوا اور کودو جیسے موٹے اناج کی کھیتی کرتے تھے، ساتھ ہی پانڈی اور بھاکھر (ابلے ہوئے چاول کی قسم) جیسے چاول کی کئی قسمیں بھی اگاتے تھے۔ رگھو ویر، گنگا جلی کی طرف اشارہ کرتے ہوئے کہتے ہیں، ’’ہم لوگ ایک ایک کلو چاول میں بھات کھا کے پچاتے تھے…پوچھئے، پریوار بیٹھا ہے سامنے۔‘‘

وہ ہنستے ہوئے کہتے ہیں، ’’ہم تین کلو بھینس کا دودھ ایک بار میں پی جاتے تھے۔ آج کے زمانہ میں کیا کوئی پچا پائے گا؟ تب تو ہم ۲۵۰-۳۰۰ گرام تازہ متھا ہوا گھی بھی ایسے ہی کھا لیتے تھے، جیسے کچھ ہوا ہی نہ ہو۔‘‘

وہ مزید کہتے ہیں، ’’جس وقت شیر کو لاٹھی سے مارے تھے، اس وقت ہمارا لاٹھی تولل تھا ۵ء۳ سیر۔‘‘ سیر پیمائش کی روایتی اکائی ہے جس کا تخمینہ علاقہ کے مطابق بدلتا ہے۔ پلامو کے آس پاس کے علاقوں میں ایک سیر تقریباً ۴۲۵ گرام کے برابر ہوتا ہے۔

کئی دنوں کی تیاری کے بعد، صبح ۴ بجے بھٹی جلائی جاتی ہے۔

فیملی کے پاس دو روایتی بھٹیاں ہیں۔ ایک باہر کھلی جگہ پر ہے۔ گھنٹی بنانے کے لیے زیادہ تر اسی بھٹی کا استعمال کیا جاتا ہے۔ دوسری بھٹی اندر ہے، جو مانسون کے دوران یا گرموں میں جب تیز لو چلتی ہے، تب کام آتی ہے۔

مقامی زبان میں اسے بھانتھی کہا جاتا ہے۔ یہ مٹی کی بنی بھٹی ہوتی ہے، جس میں آگ کو پھونکنے کے لیے بکری کی کھال سے بنی دھونکنی لگی ہے۔ رگھو ویر وقفہ وقفہ پر بھٹی کا ڈھکن اٹھا کر آگ کی شدت دیکھتے ہیں، اور سامنے دھونکنی کے پاس بیٹھی گنگا جلی کو بتاتے ہیں کہ کب اس میں لگی بانس کی چھڑی تیزی سے یا آہستہ سے گھمانا ہے، تاکہ ہوا کی رفتار کو کنٹرول کیا جا سکے۔

کڑاکے کی سردی میں بھی جب بھٹی جل رہی ہوتی ہے، تو رگھو ویر اور گنگا جلی دونوں ہی پسینے سے تر ہو جاتے ہیں۔

سائز کے حساب سے ایک بار میں ۲۰ سے ۲۵ چھوٹی گھنٹیاں، ۱۰ سے ۱۵ اوسط سائز کی گھنٹیاں، اور صرف ۲ سے ۳ بڑی گھنٹیاں ہی بھٹی میں پکائی جاتی ہیں۔ رگھو ویر لوہے کے لمبے چمٹے سے بھٹی کے اندر پک رہی گھنٹیوں کو سنبھالتے ہیں۔ گھنٹیوں کے ایک گچھے کو پکنے میں تقریباً ۳۰ منٹ کا وقت لگتا ہے۔

اُدھر، گنگا جلی لگاتار بھٹی میں ہوا پھونکتی رہتی ہیں، تاکہ آگ جلتی رہے۔

بھٹی میں پکانے کے بعد گھنٹی کی آواز ٹھیک کرنے کا کام باقیرہ جاتا ہے۔ اس کے لیے رگھو ویر ہتھوڑے سے گھنٹی کی سطح پر رہ گئے کسی قسم کے ابھار کو ٹھیک کرتے ہیں، اس کی موٹائی کو متوازن کرتے ہیں اور اس کے کناروں کو اندر کی طرف موڑتے ہیں۔ پھر اس میں لوہے یا لکڑی کا لٹکن (گھونگھرو) لگا دیتے ہیں۔ وہ ابھی ابھی بنائی گئی گھنٹی کی آواز کو پرکھتے ہوئے کہتے ہیں، ’’سب سے خوبصورت آواز کھیر کی لکڑی سے آتی ہے۔‘‘

رگھو ویر کہتے ہیں، ’’دیکھئے، پہلے ہم اتنی بڑی گھنٹیاں بناتے تھے۔‘‘ وہ اپنے برآمدے کے ایک کونے میں ٹنگی ٹوٹی ہوئی پرانی گھنٹی دکھاتے ہیں۔ وہ مزید کہتے ہیں، ’’یہاں اس جگہ پر مٹی کچھ کم پڑ گئی تھی، اس لیے یہ جل گئی تھی۔‘‘

اتنی کڑی محنت کے باوجود اس کاریگری سے بہت کم منافع ہوتا ہے۔ رگھو ویر تلخی کے ساتھ کہتے ہیں، ’’اس میں کوئی اصل کمائی نہیں ہے۔ نہ ہی کھیتی میں کوئی آمدنی ہے۔ آپ پڑھے لکھے ہیں، خود حساب لگا سکتے ہیں۔‘‘

گھنٹیوں کے ایک مجموعہ پر رگھو ویر کو ۳ سے ۴ ہزار روپے خرچ کرنے پڑتے ہیں۔ پھر ہونے والا منافع مشکل سے لاگت کے برابر ہی ہوتا ہے۔ وہ سمجھاتے ہیں، ’’اگر میں ان گھنٹیوں کو ۸۰۰۰ روپے میں بیچوں اور خرچ گھٹا دوں، تو بچتا ہی کتنا ہے؟ بس، اسی میں گزارہ ہوتا ہے۔‘‘

ہر مہینے ۲۰۰ سے ۳۰۰ گھنٹیاں بیچنے کے باوجود ان کی کمائی مشکل سے دہاڑی مزدوری جتنی ہوتی ہے۔ رگھو ویر بتاتے ہیں کہ پچھلے مہینہ انہوں نے صرف ۴۰۰۰ روپے کمائے تھے۔

رگھوویر بتاتے ہیں کہ مہنگائی کی وجہ سے حالات مزید خراب ہو گئے ہیں۔ وہ کہتے ہیں، ’’ایک وقت تھا جب ہم آٹھ آنے [۵۰ پیسے] فی کلو کے حساب سے لوہے کی چادر خریدتے تھے۔ اب وہی چادریں فی کلو ۱۰۰ روپے میں مل رہی ہیں۔ پہلے ایک کلو پیتل ۶ روپے کا پڑتا تھا، اب ۵۵۰ روپے کا ہو گیا ہے۔‘‘

بڑھتی مہنگائی نے انہیں چاروں طرف سے پریشان کیا ہے۔ ’’مجھے یاد ہے جب ایک روپیہ میں تین سیر [تقریباً ۳ء۱ کلو] مکئی مل جاتی تھی، اب ۲۰ روپے کلو سے کم میں مکئی نہیں ملتی۔ سوچئے، کتنا مہنگا ہو گیا ہے سب کچھ۔‘‘

رگھو ویر نے پہلے دہاڑی مزدوری بھی کی ہے۔ انہوں نے پتھر توڑے، بڑھئی گیری کی، یہاں تک کہ فیکٹریوں میں بھی کام کیا۔ وہ یاد کرتے ہوئے کہتے ہیں، ’’ریہلا کے پاس جب ریل لائن ڈبلنگ کا کام چل رہا تھا، تب میں ۷۳۳ دن تک اس پروجیکٹ میں کام کیا تھا۔ صرف تین دنوں کے فرق سے مجھے مستقل ملازمت ملتے ملتے رہ گئی۔‘‘ یہ ۱۹۷۴ کی بات ہے۔ اُس وقت ان کی تنخواہ ۱۰۵ روپے مہینہ تھی۔

اب عمر کی ساتویں دہائی میں پہنچنے کے بعد، دہاڑی مزدوری کا متبادل ہی نہیں بچا۔ وہ کہتے ہیں، ’’اب کوئی مجھے کام نہیں دے گا…کون پیسہ دے گا؟‘‘

حکومت کی جانب سے رگھو ویر کو اب تک صرف بیت الخلاء کی تعمیر کے لیے کچھ مدد ملی ہے۔ اس کے علاوہ، ریاستی حکومت کی بڑھاپے کی پنشن کی اسکیم کے تحت رگھو ویر اور گنگا جلی، دونوں کو ہر مہینے ۱۰۰۰ روپے کی پنشن ملتی ہے۔

رگھو ویر اور ان کی بیوی، دونوں کی طبیعت ٹھیک نہیں رہتی۔ دونوں ہی جوڑوں کے درد سے پریشان ہیں اور انہیں باقاعدگی سے دواؤں کی ضرورت پڑتی ہے۔ وہ کہتے ہیں، ’’نام دیکھئے بھگوان ہم کو دیے رگھو ویر وشو کرما، لیکن شکتی (طاقت) نہیں دیے۔‘‘

دن بھر کا کام ختم ہونے کے بعد، رگھو ویر دو کلومیٹر پیدل چل کر پاس کے گرامین بینک جاتے ہیں تاکہ اپنی پنشن کی معلومات حاصل کر سکیں۔

ہاتھ میں آدھار کارڈ لیے رگھو ویر کاؤنٹر کی طرف بڑھتے ہیں، لیکن انہیں انتظار کرنے کو کہا جاتا ہے۔ وہ بتاتے ہیں، ’’نمبر تو لے لیا ہے، لیکن لائن بہت لمبی ہے۔ کہہ رہے ہیں کہ کم از کم دو گھنٹے لگیں گے۔ کون جانے اور کتنا وقت لگ جائے۔‘‘

وہ اگلے دن دوبارہ نہیں آ سکتے۔ اب ان میں اتنی طاقت نہیں ہے کہ وہ پھر سے چل کر آئیں۔ اس لیے وہ وہیں بیٹھ کر انتظار کرتے ہیں۔ انہیں پنشن کے ۱۰۰۰ روپے ملنے کی امید ہے، جس سے وہ دوائیں، گھنٹیوں کے لیے سامان، اور تھوڑا راشن خریدیں گے۔

رگھو ویر کہتے ہیں، ’’اگر پیسے نہیں آئے، تو بس ۲۰۰ روپے نکالوں گا اور واپس چلا جاؤں گا۔‘‘ یہی ان کی پچھلے مہینہ کی پنشن کی بچی ہوئی جمع پونجی ہے۔

اپنی باری کا انتظار کرتے ہوئے رگھو ویر ایک بینچ پر بیٹھ جاتے ہیں۔ بیٹھتے وقت وہ اپنی لاٹھی دیوار کے سہارے ٹکاتے ہیں، وہ لاٹھی جو اب ان کی جوانی کے دنوں کی بھاری بھرکم لاٹھی سے کئی گنا ہلکی ہو چکی ہے۔

یہ اسٹوری مرنالنی مکھرجی فاؤنڈیشن (ایم ایم ایف) کی ایک فیلوشپ کے تحت لکھی گئی ہے۔

ترجمہ نگار: قمر صدیقی