سیلاب سرحدوں کا پابند نہیں ہے

’’یہاں جنگوں سے اتنا نقصان نہیں ہوتا جتنا سیلاب سے ہوتا ہے،‘‘ ۷۳ سالہ کسان جسویر سنگھ کہتے ہیں۔ وہ اپنے زیرِ آب کھیتوں سے واپس لوٹ رہے ہیں، جو ہند-پاک سرحد کے ساتھ لگی خاردار تاروں کی باڑ کے اُس پار واقع ہیں۔

’’حد نگاہ تک آپ کو صرف پانی ہی پانی نظر آئے گا۔ دریا نے قبضہ کر لیا ہے۔ اس کی گہرائی ۱۵ سے ۲۰ فٹ ضرور ہو گی،‘‘ ستلج ندی کا حوالہ دیتے ہوئے جسویر ستمبر ۲۰۲۵ کے آخر میں پاری سے بات کرتے ہوئے کہتے ہیں۔

ولّے شاہ ہیتاڑ گاؤں کی چالیس ایکڑ زمین ۱۹۹۰ کے آس پاس تعمیر کی گئی خاردار باڑوں اور بین الاقوامی سرحد، جسے کنکریٹ کے ستونوں سے نشان زد کیا گیا ہے، کے درمیانی حصہ میں واقع ہے۔ جو کسان یہاں کھیتی کرتے ہیں انہیں اپنی زمین تک رسائی کے لیے بی ایس ایف کی اجازت درکار ہوتی ہے۔ جسویر کی فیملی کے پاس ۱۹ ایکڑ زمین ہے، جو انہوں نے ۱۹۸۰ میں حاصل کی تھی جب سرحدی گاؤوں میں زمین ان کے اپنے گاؤں تھیہ قلندر کے مقابلے میں بہت سستی تھی۔ وہ اس گاؤں تک اپنی اسکوٹی سے ۳۰ منٹ میں پہنچ جاتے ہیں۔

اگست ۲۰۲۵ میں پنجاب میں جب سیلاب آیا تو جسویر کی ۱۵ ایکڑ کی اراضی زیر آب آ گئی۔ دھان کی تیار فصل تباہ ہو گئی۔ جنوری۲۰۲۶ میں پاری سے بات کرتے ہوئے وہ کہتے ہیں، ’’گندم کی بوائی نہیں ہوسکی، کیوں کہ زمین میں اب بھی بہت زیادہ نمی ہے۔ تقریباً سات سے آٹھ ایکڑ زمین سے پانی نکل چکا ہے۔ لیکن اسے قابل کاشت بنانے کے لیے مزید چھ ماہ یا ایک سال تک چھوڑنا پڑ سکتا ہے۔‘‘ دو فصلی دور پہلے ہی ختم ہو چکا ہے۔

سیلاب سے پورے پنجاب میں کم از کم ۴۰ افراد ہلاک ہوئے، ۷۱۶۱ مویشی بہہ گئے، اور ۱۴ ہزار سے زیادہ مکانات اور تقریباً ۲ لاکھ ہیکٹیئر پر کھڑی فصل کو نقصان پہنچا۔ ’’جدَو پَکّن تے آئے اُودو ہڑ رُلکے لے گیا [جب دھان کی فصل کٹائی کے لیے تیار تھی، سیلاب نے سب کچھ برباد کر دیا]،‘‘ اشوک سنگھ کہتے ہیں، جو جسویر کی طرح فاضلکا ضلع کے ولّے شاہ ہیتاڑ کے ایک کسان ہیں۔

’’میں ٹھیک سے سو نہیں سکتا۔ اگر ایک بار نیند ٹوٹ جاتی ہے، تو پوری رات پریشانی میں گزر تی ہے،‘‘ ۴۰ سالہ کسان پاری کو بتاتے ہیں۔ ان کی فیملی کے پاس باڑ کے اس پار ۱۰ ایکڑ زمین ہے، جہاں انہوں نے دھان کی فصل لگائی تھی۔ پورا پلاٹ ڈوب گیا۔ اس زمین سے حاصل ہونے والی پیداوار پر ۱۰ افراد پر مشتمل ان کی فیملی کا گزارہ ہوتا ہے۔

جسویر اور اشوک کی کھڑی فصلوں کا نقصان ہوا، لیکن رُولیا سنگھ نے تو اپنا گھر بھی کھو دیا۔ چار کلومیٹر دور رام سنگھ بَھیڑیں گاؤں کے رہائشی، ۷۰ سالہ بزرگ جب بات کرتے ہیں تو ان کی آنکھیں بھر آتی ہیں۔ سال ۲۰۲۳ کے سیلاب کے بعد دوبارہ بنایا گیا ان کا گھر تباہ ہو چکا ہے، جو کچھ باقی بچا ہے وہ بکھری ہوئی اینٹیں ہیں۔ ان کے پیچھے چار ایکڑ زیر آب زمین ہے۔ رولیا کہتے ہیں، ’’ہم نے دھان کی فصل لگائی تھی ... وہ سب تباہ ہو گئی۔ یہاں سڑک کے اوپر پانی بہہ رہا تھا۔‘‘

ستلج کا پانی اپنے گھماؤدار راستوں سے کئی بار ہندوستان اور پاکستان کی سرحدوں کو کاٹتا ہے۔ فاضلکا اور فیروز پور اضلاع میں ندی کا سانپ جیسا بہاؤ ایک وسیع خطہ پر قبضہ جما لیتا ہے، جو پانی کا حجم بڑھنے پر خطرناک طور پر پھیل جاتا ہے، اور اپنے کناروں کے قریب بسے گاؤوں کو زیر آب کر دیتا ہے۔

یہی اس وقت ہوا جب اگست ۲۰۲۵ کے اوائل میں چند دنوں کی شدید بارش اور پانی کی ناقص نکاسی کے سبب فاضلکا کے کئی گاؤں پانی میں ڈوب گئے۔ صورتحال میں مزید خرابی اس وقت پیدا ہوئی جب بھاکڑا ڈیم سے اضافی پانی چھوڑا گیا۔

’’اس سال بہت زیادہ بارش ہوئی۔ آبگیری (کیچمنٹ) والے علاقوں، بشمول ہماچل پردیش کے کچھ حصوں، میں بھی بہت زیادہ پانی آ گیا۔ یہ پانی ہماری ندیوں اور ڈیموں میں پہنچ گیا۔ جب جولائی یا اگست کے آخر میں اچانک بڑی مقدار میں پانی چھوڑ دیا جاتا ہے، تو مضبوط پشتے بھی ناکام ہوجاتے ہیں۔ میں نہیں سمجھتا کہ صورتحال سے نمٹنے کے لیے کافی تیاری کی گئی تھی،‘‘ پنجاب یونیورسٹی کے شعبہ جغرافیہ میں اسسٹنٹ پروفیسر ڈاکٹر سچا سنگھ کہتے ہیں۔

انہوں نے مزید کہا کہ اس سال بھاری بارش کی پیشن گوئی کی گئی تھی، لہٰذا ڈیم کا پانی مانسون کے آنے سے پہلے ہی چھوڑا جا سکتا تھا۔

دسمبر ۲۰۲۵ میں جل شکتی کی وزارت نے راجیہ سبھا میں اٹھے ایک سوال کے جواب میں اس بات کی تردید کی کہ بھاکڑا اور پونگ میں ڈیم کی ناقص دیکھ بھال یا بد انتظامی نے سیلاب کی صورتحال کو مزید خراب کیا، اور اس بات پر زور دیا کہ ڈیم حفاظتی اصولوں کے تحت کام کرتے ہیں۔ اس جواب میں یہ بھی کہا گیا کہ پانی چھوڑنے سے پہلے کم از کم ۲۴ گھنٹے کی پیشگی اطلاع دی جاتی ہے، اور مانسون سے پہلے ذخیرہ کرنے کی سطح ’’اوسط سطح کی حد میں‘‘ تھی۔

’’جنگل ہوندا سی، بارڈر آگے ایتھے سی۔ آسی کھیتی دے لیے تیار کِتا سی [ یہاں جنگل تھا۔ سرحد نزدیک تھی۔ ہم نے اس زمین کو کاشتکاری کے لیے تیار کیا]۔‘‘ انہوں نے اپنے منہدم ہو چکے مکان کی اینٹیں جوڑ کر ایک عارضی پناہ گاہ تیار کر لی ہے۔ یہاں وہ روزانہ، سارا دن، سرکاری اہلکاروں کی آمد کا انتظار کرتے ہیں، جو یہ فیصلہ کریں گے کہ انہیں معاوضہ دیا جائے گا یا نہیں۔

سرحد سے متصل فاضلکا ضلع کے تقریباً ۲۵ گاؤوں کے زیادہ تر باشندے رائے سکھ برادری سے تعلق رکھتے ہیں، جنہیں پنجاب میں درج فہرست ذات کے طور پر درج کیا گیا ہے۔ وہ تقسیم کے چند سال بعد اس سرزمین پر آباد ہوئے تھے۔ ان کنبوں کو کاشتکار تسلیم کیا گیا، لیکن زمین کا مالکانہ حق حکومت کے پاس رہا۔ ایسی زمین کو کچی زمین (غیر رجسٹرڈ زمین) کہا جاتا ہے۔

ستلج کے کنارے کی کچھ زمینیں، جن میں اشوک، رولیا اور جسویر کے کاشت شدہ کھیت شامل ہیں، کچی زمینیں ہیں۔ یہاں وہ تقریباً نصف صدی سے کاشتکاری کرتے آ رہے ہیں۔ اس غیرمندرج زمین پر سیلاب سے فصلوں کو ہوئے نقصانات پر کسانوں کو بہت آسانی سےمعاوضہ نہیں ملتا۔

پنجاب حکومت نے فصلوں کی تباہی کے لیے فی ایکڑ۲۰ ہزار روپے کے معاوضہ کا اعلان کیا ہے۔ یہ ایک ایسی رقم ہے جو کسانوں کے مطابق بہت کم ہے اور اس سے دھان کی کاشت کی لاگت بھی پوری نہیں ہوگی۔ تاہم یہ رقم سبھی کسانوں کے لیے یقینی بھی نہیں ہے۔

اشوک نے ستمبر میں پاری کو بتایا، ’’ہمیں نہیں معلوم ہے کہ ہمیں کچی زمین کی تباہ شدہ فصلوں کا معاوضہ ملے گا یا نہیں۔ حکام اس بارے میں کچھ نہیں کہہ رہے ہیں۔‘‘

اشوک کہتے ہیں، ’’ساڈا ہون ۱۵ لاکھ [روپے] قرض ہے [ہم پر اب ۱۵ لاکھ روپے کا قرض ہے]۔ اس میں وہ ۵ لاکھ روپے بھی شامل ہیں، جنہیں اشوک اور ان کے بھائی نے سیلاب کی نذر ہو جانے والی دھان کی فصل کی بوائی کے لیے اڑھتیا (کمیشن ایجنٹ) سے ادھار لیے تھے۔ ہر فصل میں وہ کاشت کے اخراجات کو پورا کرنے کے لیے اڑھتیا سے قرض لیتے ہیں۔ جب وہ فصل بیچتے ہیں تو وہ ان کی ادائیگی سے اپنا قرض منہا کرلیتا ہے۔

’’سرکاری ریکارڈ سے معلوم ہوتا ہے کہ ہم زمین کاشت کرتے ہیں۔ لیکن ہمیں جب تک مالکانہ حقوق نہیں مل جاتے، زمین مرکز کی ملکیت رہے گی،‘‘ اشوک کہتے ہیں جو اس بات کو لے کر فکرمند ہیں کہ وہ اپنے بچوں کی اسکول کی فیس، ہنگامی طبی اخراجات اور دیگرگھریلو اخراجات کیسے پورا کریں گے۔

رولیا کی عارضی پناہ گاہ کے پیچھے، ان کی چار ایکڑ زمین اب بھی زیر آب ہے، دھان کی فصل تباہ ہوچکی ہے۔ سیلاب اپنے ساتھ مویشیوں لیے ذخیرہ کیا ہوا سبز چارہ اور توری (گندم کا بھوسا) بھی بہا لے گیا۔

جنوری ۲۰۲۶ میں فاضلکا کے تحصیلدار جسپریت سنگھ نے دعویٰ کیا کہ ۹۹ فیصد معاوضہ ادا کر دیا گیا ہے۔ یہ پوچھے جانے پر کہ کیا کچی زمین والے کسانوں کو بھی معاوضہ ادا کیا گیا ہے، تو انہوں نے براہ راست جواب دینے سے گریز کیا اور کہا کہ ’’یہ قانون کے مطابق کیا گیا ہے۔‘‘

جسویر کو ۱۹۸۸ کا تباہ کن سیلاب یاد ہے، جس میں سینکڑوں لوگ مارے گئے تھے۔ ’’سیلاب ستمبر ۱۹۸۸ کے وسط میں اچانک آیا تھا اور ایک ہفتہ کے اندر اندر پانی اتر گیا تھا،‘‘ وہ بتاتے ہیں۔ ریاست میں اس مانسون میں۰ء۱۱۷۱ ملی میٹر بارش ہوئی تھی، جو معمول سے دوگنا زیادہ تھی۔ پھر بھی پانی جلد ہی اتر گیا تھا۔

پنجاب میں ۲۰۲۵ کی بارش کی سطح ۱۹۸۸ کی سطح سے آدھی – یعنی ۹ء۶۲۰ ملی میٹر۔ تاہم، اب سیلاب کے اضافی پانی کے قدرتی بہاؤ میں خلل پیدا ہو گیا ہے۔ ’’کنکریٹ کے تعمیر شدہ علاقوں میں بے تحاشہ اضافہ کی وجہ سے زمین میں پانی کی سرایت متاثر ہوئی ہے،‘‘ سوچا سنگھ وضاحت کرتے ہیں۔ ’’سڑکوں کی تعمیر، پلوں کی ناقص منصوبہ بندی اور قدرتی نکاسی کے نظام کے کنارے یا اس پر کنکریٹ کی دیواروں کی تعمیر، مثلاً چو [موسمی ندیوں]، کا کام بھی رک گیا ہے۔‘‘

ریاست کے آبی وسائل کے محکمہ کے سابق سکریٹری کاہاں سنگھ پنوں کہتے ہیں کہ پنجاب میں ندیوں کے بہاؤ کی صلاحیت میں گاد کی وجہ سے مسلسل کمی واقع ہو رہی ہے، ڈیموں کے ذخیرہ کی گنجائش تقریباً ۲۵ فیصد تک کم ہو چکی ہے۔ انہوں نے مزید کہا کہ ’’ان وجوہات کی بناپر سیلاب کے امکانات اور اس کے قہر میں اضافہ ہو گیا ہے۔‘‘

موسمیاتی تبدیلی ہماچل پردیش اور جموں میں اچانک موسلادھار بارش اور بادل پھٹنے کے واقعات کا سبب بن رہی ہے۔ ندیوں اور ڈیموں کے گاد میں اضافہ کی وجہ سے معمولی سیلاب بھی اب پشتوں کو توڑ سکتا ہے اور بڑے پیمانے پر نقصان پہنچا سکتا ہے، جس سے اشوک اور جسویر اور رولیا جیسے کسانوں کی زندگیاں بدل جاتی ہیں۔

رولیا اپنے نقصان کا تخمینہ لگا رہے ہیں۔ دھان کی بوائی کی لاگت اور اسے فروخت کر کے جو آمدنی حاصل ہوتی، اس کا کل جمع تقریباً ایک لاکھ روپے فی ایکڑ ہوتا ہے، وہ کہتے ہیں۔ ’’ہمیں جو بھی مدد مل رہی ہے، گندم، راشن، اور مویشیوں کے چارے کی شکل میں وہ پیچھے [مزید اندرونی علاقوں، ندی اور سرحد سے دور] کے گاؤوں سے آ رہی ہے،‘‘ وہ مزید کہتے ہیں۔

اس صورتحال کا باریکی سے مطالعہ کرنے والے اداروں اور افراد کا کہنا ہے کہ ریاست کو محض سیلاب کی تباہ کاریوں کے بعد ردعمل ظاہر کرنے کے بجائے بار بار ہونے والی تباہی کو روکنے کے لیے کام کرنا چاہیے۔

ولے شاہ ہیتاڑ کے رہائشیوں کا کہنا ہے کہ ۲۰۱۳ کے بعد سے ہر سال سیلاب آتا ہے، اور اب زیر زمین پانی پہلے کے مقابلے میں تقریباً چار فٹ اوپر آ گیا ہے۔ سال ۲۰۲۳ میں سیلاب کا پانی جولائی میں گاؤں میں داخل ہوا اور ستمبر تک برقرار رہا۔ سال ۲۰۲۵ کے سیلاب میں یہ دیکھا گیا کہ ستلج کا مرکزی بہاؤ اپنے ساتھ سرحد سے متصل کھیت کی تقریباً ۵۰۰ میٹرزمین کاٹ کر بہا لے گیا۔ مزید یہ کہ حالیہ سیلابی پانی نے زمین کے تقریباً ۱۰ فٹ کے تموج کو ہٹا کر اسے ہموار کر دیا ہے۔

کسی ندی کے قدرتی سیلاب کی اپنی حدیں ہوتی ہیں اور دونوں طرف سیلاب کے اضافی ژون ہوتے ہیں۔ جب بھی تیز بارش ہوتی ہے تو ندیاں حدوں تک پھیل جاتی ہیں۔ ’’چونکہ لوگ اب وہاں آباد ہو گئے ہیں یا کھیتی باڑی کرتے ہیں، اس لیے اسے سیلاب خیال کیا جاتا ہے، حالانکہ اس زمین کا مطلب ہمیشہ ندی کا اپنا علاقہ ہوتا تھا،‘‘ سوچا سنگھ کہتے ہیں۔

درج فہرست ذات سے تعلق رکھنے والی برادریوں کو دی گئی زمین کا ایک بڑا حصہ درحقیقت ندی کے قدرتی سیلاب والا علاقہ تھا، جس کا نقصان ہوا ہے۔ پشتوں کو مضبوط کرنے اور مزید پیچھے ہٹ کر ان کی تعمیر کرنے کی ضرورت ہے، تاکہ کھیتوں اور گھروں کو تباہ کیے بغیر ندی کو وسعت دینے کے لیے جگہ بنائی جا سکے۔

مئی ۲۰۲۵ میں جب ہندوستان اور پاکستان فوجی تصادم میں مصروف تھے، ولے شاہ ہیتاڑ کے رہائشی چاق و چوبند تھے لیکن فکرمند نہیں تھے۔ ’’یہاں کچھ نہیں ہوا۔ یہ علاقہ پوری طرح محفوظ تھا،‘‘ گاؤں کے ایک رہائشی نے کہا۔ مہینوں بعد گاؤں میں تباہی مچ گئی۔ پانی سے، بندوق سے نہیں۔

ترجمہ نگار: شفیق عالم