बाढ़ बॉर्डर देख के ना आवे

“इहंवा बाढ़, जंग से जादे तबाही मचावेला,” जसवीर सिंह बतइले. 73 बरिस के ई बुजुर्ग बाढ़ में डूब चुकल आपन खेत से लउटत बाड़न. उनकर खेत भारत-पाकिस्तान सीमा पर लागल कांटा वाला तार के ओह पार पड़ेला.

“जहंवा देख, खाली पानिए लउकेला. दरया ने कब्जा कर लेया है (नदी सब कुछ अपना कब्जा में ले लेले बा.) पानी कोई 15 से 20 फीट ले गहिर होखी.” जसवीर सितंबर 2025 के आखिर में पारी से भइल बातचीत में सतलुज नदी के जिकिर कइले रहस.

वाले शाह हिठार गांव के कोई चालीस एकड़ खेत, 1990 के आस-पास खींचल तारबंदी आ कंक्रीट के खंभा से चिन्ह्ति अंतरराष्ट्रीय सीमा के बीच पड़ेला. किसान लोग के एह जमीन पर खेती करे खातिर बीएसएफ से अनुमति लेवे पड़ेला. इहंवा जसवीर के परिवार के, 1980 में कीनल 19 एकड़ जमीन बा. तब बॉर्डर से सटल गांव सब में जमीन उनकर आपन गांव थेह कलंदर के बनिस्पत बहुते सस्ता रहे. स्कूटी से ई जगह मोटा-मोटी 30 मिनट के दूरी पर बा.

पंजाब में जब अगस्त 2025 में बाढ़ आइल, जसवीर के 15 एकड़ जमीन पानी में डूब गइल. पक के तइयार धान के फसल बरबाद हो गइल. जनवरी 2026 में ऊ पारी से बतियावत कहलन, “जमीन अबहियो भींजल बा. कोई सात-आठ एकड़ खेत सूख गइल बा. बाकिर सायद ओकरा पर खेती करे में अबही छव महीना से एक साल आउर लाग जाई.” अबले उनकर दू बेर के खेती चौपट हो चुकल बा.

एह बाढ़ में पंजाब में कमो ना, त 40 लोग के जान चल गइल, कोई 7,161 मवेसी सब बह गइल. 14,000 से जादे घर ढह गइल आ मोटा-मोटी 2,00,000 हेक्टेयर फसल वाला जमीन के नुकसान पहुंचल. “जदों पक्कन ते आई, ओदों हड़ रोहड़ ले गया (जब धान पकके कटे खातिर तइयार भइल, तबहिए बाढ़ सब बहा ले गइल),” फाजिल्का जिला के वाले शाह हिठार गांव के ही रहे वाला किसान, अशोक सिंह बतइलन.

“हम ठीक से सुत ना सकीं. एक बेरा आंख खुल गइल, त पूरा रात चिंता में निकल जाला,” चालीस बरिस के अशोक पारी से कहलन. धान बोवे घरिया उनकर परिवार लगे बाड़ के ओह पार 10 एकड़ जमीन रहे. पूरा जमीन डूब गइल. इहे जमीन 10 जना वाला परिवार के सहारा बा.

जसबीर आ अशोक के तइयार फसल बरबाद हो गइल, बाकिर रुलिया सिंह त आपन घरो से हाथ धो बइठलन. चार किमी दूर राम सिंह भैणी गांव के रहे वाला 70 बरिस के रुलिया ई बात कहत भावुक हो जात बाड़न. सन् 2023 के बाढ़ के बाद फेरु से बनावल उनकर मकान अब माटी में मिल चुकल बा, बस कुछ टूटल ईंटा सब एने-ओने छितराइल बा. पीछे चार एकड़ के जमीन अबहियो पानी में डूबल बा. रुलिया कहेलन, “धान लगवले रहीं.... सब सत्यानास हो गइल. एहू रस्ता पर पानी धार बन के बहत रहे.”

सतलुज नदी के धारा भारत-पाकिस्तान में एने-ओने मुड़त-घुमत चलत रहेला. फाजिल्का आ फिरोजपुर जिला में नदी सांप जइसन टेढ़-मेढ़ बहे चलते दूर-दूर ले फइल जाला. पानी जइसहीं जादे होखे लागेला, नदी उफान मारेला आउर किनारे बसल गांव सब में घुस जाला.

लगातार कइएक दिन ले पानी मूसलाधार बरसे आ खराब निकासी चलते अगस्त 2025 के सुरुआत में फाजिल्का के कइएक गांव पानी में डूब गइल. हालत तब आउरी बिगड़ गइल जब भाखड़ा बांध से आउर पानी छोड़ल गइल.

“अबकी बरिस बहुत जादे बरखा भइल. पानी जमा होखे वाला इलाका सब, जेकरा में हिमाचल प्रदेस के हिस्सा भी बा, में भी बहुते जादे पानी गिरल. ई सब पानी आखिर में हमनी के नदी आ बांध में आइल. जुलाई के आखिर, चाहे अगस्त में जब अचानक एतना जादे पानी छोड़ल जाला, त बरियार तटबंधो टूट सकेला. हमरा नइखे लागत कि ई सब खातिर अबकी ठीक से तइयारी रहे,” पंजाब विश्वविद्यालय के भूगोल विभाग में सहायक प्रोफेसर डॉ. सुच्चा सिंह कहलन.

ऊ इहो बतइलन कि अबकी बरिस पहिलहीं से भारी बरखा के भविष्यवाणी रहे. आउर मानसून के आवे से बहुत पहिले बांध से पानी छोड़ल जा सकत रहे.

जल शक्ति मंत्रालय (जल संसाधन) दिसंबर 2025 में राज्यसभा में उठावल गइल एक सवाल के जवाब में एह बात के खारिज कर देवल गइल कि भाखड़ा आ पोंग बांध सब में रखरखाव के कमी, चाहे कुप्रंबधन भइल बा. आउर इहे चलते बाढ़ के स्थिति गंभीर हो गइल. मंत्रालय के कहनाम बा कि बांध सुरक्षा नियम के हिसाब से काम कर रहल बा. पानी छोड़ल जाए से कम से कम 24 घंटा पहिले आगाह कइल जाला. आ बरखा सुरु होखे से पहिले जमा पानी के हालत औसत के आसपास रहे, अइसन जानकारी देवल गइल रहे.

“जंगल होंदा सी, बॉर्डर अग्गे ऐथे सी. असी खेती दे लिए तयार कित्ता सी (इहंवा कबो जंगल होखत रहे, लगहीं बॉर्डर रहे. हमनी एही जमीन के खेती खातिर तइयार कइले रहीं),” रुलिया के इयाद आवात. ऊ आपन ढहल घर के ईंटा सब के जोड़-जोड़ के एगो कामचलाऊ झोंपड़ी बना लेले बाड़न. ओही में ऊ रोज, दिन भर बइठेलन आ सरकारी बाबू लोग के रस्ता देखलन. उनका इंतजार रहेला, कब ऊ लोग आई आउर तय करी कि उऩका मुआवजा मिली कि ना.

बॉर्डर से सटल फाजिल्का जिला के कोई 25 गांव में रहे वाला जादेतर लोग राय सिख समुदाय से बा. ई लोग पंजाब में अनुसूचित जाति मानल जाला. बंटवारा के कुछ साल बाद ऊ लोग के एह जमीन पर बसावल गइल रहे. परिवार के किसान के रूप में मान्यता मिलल. बाकिर जमीन के अधिकार सरकारे पास रहल. एकरा कच्चा जमीन (अपंजीकृत जमीन) पुकारल जाला.

सतलुज नदी के किनारे के कुछ जमीन, जइसन अशोक, रुलिया आ जसवीर लोग जोतेला, कच्चा बा. बाढ़ आवेला, त बिना रजिस्टरी वाला एह जमीन पर फसल खराब होखे खातिर मुआवजा मिलल आसान ना होखे. जबकि किसान लोग मोटा-मोटी पचास बरिस से इहंवा खेती करत आइल बा.

पंजाब सरकार एलान कइलस कि खराब भइल फसल खातिर प्रति एकड़ 20,000 रुपइया के मुआवजा देवल जाई. बाकिर किसान लोग के कहनाम बा कि ई रकम बहुते कम बा. एतना से त धानो रोपे के खरचा ना निकली. आउर ई पइसा सभे के मिली, इहो पक्का नइखे.

“मालूम ना कच्चा जमीन पर बरबाद भइल फसल के मुआवजा मिली कि ना. बाबू लोग एह बारे में चुप्पी सधले बा,” अशोक सितंबर में पारी से बात करत कहलन.

“साडे ते हुण 15 लाख कर्जा है (अब हमनी के माथ पर 15 लाख रुपइया के करजा बा),” अशोक कहेलन. एकरा में ऊ 5 लाख रुपइयो बा, जेकरा ऊ आउर उनकर भाई आढ़ती (कमीशन एजेंट) से धान रोपे खातिर उधार लेले रहस. उहे धान सब बाढ़ में खराब हो गइल. हर मौसम में ऊ खेती खातिर आढ़ती से उधार लेवेलन. फसल बेचला पर ऊ आपन उधार के हिसाब काट के बाकी रकम देवेला.

“सरकारी कागज कहेला कि ई जमीन हमनी जोतत बानी. बाकिर जबले हमनी के एकर मालिकाना हक नइखे मिल जाइत, तबले ई सरकारे के मानल जाई,” अशोक कहलन. उनका लइकन सब के फीस, इलाज के पइसा आ दोसर जरूरी खरचा सब पूरा करे के फिकिर लागल बा.

फाजिल्का जिला के डिप्टी कमिश्नर अमरप्रीत कौर संधू अक्टूबर के सुरु में पारी से कहले रहस कि कच्चा जमीन के फसल खराब होखला खातिर किसान लोग के मुआवजा के राशि “विचाराधीन बा”.

जनवरी 2026 में फाजिल्का के तहसीलदार जसप्रीत सिंह बतइलन कि 99 प्रतिशत मुआवजा बांटल जा चुकल बा. बाकिर कच्चा जमीन वाला किसान लोग के भी मुआवजा मिलल बा, पूछला पर ऊ सीधा जवाब ना देलन, “सब काम नियम से कइल गइल बा.”

जसवीर के सन् 1988 के प्रलंयकारी बाढ़ आजो इयाद बा. तब सैंकड़न लोग के जान चल गइल रहे. ऊ इयात करत कहलन, “ओह बरिस बीच सितंबर में बाढ़ अचानके आ धमकल, आउर एक हफ्ता में पानी उतरियो गइल.” ओह बरसात में राज्य में 1171.0 मिमी बरखा भइल रहे. ई सामान्य से दोगुना से भी जादे रहे. बाकिर तबो पानी बहुते जल्दी निकल गइल रहे.

सन् 2025 में पंजाब में बरखा, 1988 से आधा भइल रहे, 620.9 मिमी. तबो हालत खराब हो गइल, काहे कि बाढ़ के पानी के अपना आप बहे के रस्ता ना मिलल. सुच्चा सिंह बतावेलन, “कंक्रीट के इमारत सब बहुते बन गइल बा. पानी के जमीन में समाए के जगह नइखे बचल. सड़क, गलत तरीका से बनल पुल आ चो (मौसमी नाला) जइसन कुदरती तरीका के जल निकासी के ब्यवस्था, चाहे ओकरा आर-पार बनल कंक्रीट के देवाल भी पानी के रस्ता बंद कर देले बा.”

जल संसाधन विभाग के पूर्व सचिव काहन सिंह पन्नू कहलन कि गाद जमे के चलते पंजाब के नदी सब के वहन क्षमता लगातार कमजोर हो रहल बा. बांध के जल भंडारण क्षमता मोटा-मोटी 25 प्रतिशत कम हो चुकल बा. ऊ बतइलन, “एकरा से बाढ़ के खतरा आ ओकर कहर दूनो बढ़ जाला.”

पानी-हवा बदले चलते हिमाचल प्रदेस आ जम्मू में अचानक मूसलाधार बरखा आ बादल फटे जइसन घटना बढ़ गइल बा. दरिया आ बांध में गाद जमा होखे से अब मामूली बाढ़ भी तटबंध के तुड़ सकता आ भारी नुकसान कर सकता. एह हालत में अशोक, जसवीर आ रुलिया जइसन किसान लोग के जिनगी उलट-पुलट भइल जा रहल बा.

रुलिया आपन घाटा जोरत बाड़न. ऊ कहेलन कि धान उगावे के खरचा आ बिकला पर होखे वाला आमदनी मिला के देखीं, त एक एकड़ पर कोई एक लाख रुपइया के घाटा भइल बा. “हमनी के जवन कुछ सहारा मिलत बा- चाहे अनाज, रासन होखे, चाहे मवेसियन के चारा, सब पाछू के गांव (जे नदी आ सीमा से दूर, भीतरी ओरी बसल बा) से आ रहल बा.”

जानकार लोग के कहनाम बा कि सरकार के जिम्मेदारी बा कि ऊ बाढ़ अइला के बाद सक्रियता देखावे से जादे, बेर-बेर आवे वाला तबाही के रोके के उपाय करे.

वाले शाह हिठार के गांव-देहात के लोग बतावता कि सन् 2013 से इहंवा हर साल बाढ़ आवेला. जमीन अब पहिले से चार फुंट ऊंच हो गइल बा. सन् 2023 में बाढ़ के पानी जुलाई में गांव पहुंच गइल आउर सितंबर ले रुकल रहल. सन् 2025 के बाढ़ में बॉर्डर संगे बहे वाला सतलुज नदी के मुख्य धारा कोई 500 मीटर ले खेत सब में कटाव करत चल गइल. इहे ना, हाल के बाढ़ के पानी जमीन के समतल कर देले बा, जेकरा चलते पहिले से कोई 10 फीट के फरक पट गइल.

दरिया के दुनो किनारे प्राकृतिक फइलाव के इलाका रहेला, जहंवा तेज बरखा में ऊ बढ़ के फइल जाला. सुच्चा सिंह कहेलन, “आज उहंवा लोग बस गइल बा, चाहे खेती करे लागल बा. एह चलते जब पानी फइल जाला त ओकरा लोग बाढ़ समझेला, जबकि ऊ जीमन त हरमेसा से दरिये के रहे.”

ऊ पारी से बतइलन कि अनुसूचित जाति के लोग के देवल गइल बहुत जमीन दरिया के बाढ़ वाला किनारी पट्टी रहे, जवन हर बेरा तबाही सहेला. उनकर राय बा कि तटबंध आउर बरियार होखे के चाहीं आ कुछ दूर पीछे ले बनावल जाए के चाहीं. एह से ई होई कि दरिया के जगह मिली आ खेत-खलिहान आ घर-दुआर बचल रही.

मई 2025 में जब भारत आ पाकिस्तान के बीच माहौल गरम रहे, वाले शाह हिठार के लोग चौकन्ना त रहे, बाकिर घबराइल ना रहे. गांव के एगो आदमी कहलक, “कहीं कुछो ना भइल, सब ठीक रहे.” कुछे दिन बाद उहे गांव तबाह हो गइल. अबकी गोली से ना, दरिया के पानी से.

अनुवाद: स्वर्ण कांता