संगोला में सब उलट-पुलट हो गईल बा

कहानी पर्यावरण रिपोर्टिंग के कड़ी में 2019 के रामनाथ गोयनका इनाम जीते वाला कड़ी के हिस्सा ह. जौना में जलवायु परिवर्तन प आधारित पारी के कड़ी चलेला.

ईंटा से बनल अपना घर के माटी के ओसारा में बईठल 53 बरीस के ज्ञानू खैरात कहलें, “जे हम ई बात कहीं त लोग हमरा के सनकल कही. बाकिर 30-40 साल पहिले, बरखा के दिन में (लगे के धार से) मछरी हमनी के खेत में आ जाय. औरी हम ओकरा के अपना हाथे पकड़ लीँ.”

जेठ के तवाई के दिन ह. हमनीके उनका घरे पहुंचला से तानियके देर पहिले 5,000 लीटर पानी के टैंकर खरात बस्ती में आईल बा. ग्यानूभाई, उनकर मेहरारू फुलाबाई, औरी उनका परिवार के सब 12 गो सदस्य वाला बड़का परिवार के लोग घर में धयिल सब माटी के बर्तन, डिब्बा, बड़का छोटका बर्तन में पानी भरे में लागल बा. पानी के इ टैंकर हफ्ता भर के बाद आईल बा. इंहा पानी के जबरदस्त कमी बा.

लमसम 3,200 के आबादी वाला गांव, गौडवाडी, संगोला तालुका के खरात वस्ती से लमसम पांच किलोमीटर दूर बा. गौडवाडी में 75 बरीस के गंगूबाई गुलीग, अपना घर के लगे नीम के गाछ के नीचे बईठल हमनी के बतावतारी. “रउआ बिस्वास ना होई, 50-60 बरीस पहिले ईंहां एतना बरखा होखे कि लोग के आपन आंख खोलल मस्किल हो जात रहे. इंहां आवत बेरिया अपने बबूल के गाछ देखनी? ऊ पूरा जमीन प बहुत बढ़िया मटकी (मोठ के दाल) के उपज होत रहे. मुरुम (बेसलती चट्टान) बरखा के पानी के जोगवले रहत रहे औरी पानी के धार हमनीके खेत से निकलत रहे. एक एकड़ में बजरा के खाली चार घोहा (पंक्ति) से 4-5 बोरी (2-3 कुंटल) अनाज मिल जात रहे. माटी एतना नीमन रहे.”

औरी हौसाबाई अल्दर, जे एबेरा 80 बरीस के बाड़ी, गौडवाडी से तानियके दूर के अल्दर वस्ती में अपना खेत पर के दू गो इनार के मन पारतारी. “बरखा बुनी के दिन में दूनू इनार (50-60 बरीस पहिले) पानी से भरल रहत रहे. हर इनार में दू गो मोट बैल होखे. (बैल से खींचे वाला रहट) चारू बैल एक साथे चले. दिन होखे चाहे रात, हमार ससुर पानी निकाली औरी जरूरतमंद लोग के दीं. अब त केहू घईला भरे के नईखे कह सकत. सबकुछ उलटा हो गईल बा.”

महाराष्ट्र के सोलापुर जिला के संगोला तालुका अइसन खिस्सा से भरल बा. ऐतरे ई माणगांव में बा जौन एगो ‘वृष्टि छाया’ प्रदेस ह.(जहां पहाड़ के पांत से बरखा वाला बयार बहेला.) ई क्षेत्र में सोलापुर जिला के संगोला (जेकरा के संगोला भी कहल जाला) औरी मालशिरस तालुका, सांगली जिला के जत, अटपाडी, औरी कवठेमहकाल तालुका, औरी सतारा जिला के माण औरी खटाव तालुका सामिल बा.

नीमन बरखा औरी अकाल के चक्का इंहा अब लमहर बेरा से चलता. लोग के दिमाग में पानी के ईयाद ओहीतरे बसल बा जे तरे पानी के कमी के इयाद. बाकिर अब ई कुल गांव से अइसने ढेर समाचार आवता कि कईसे “सबकुछ उल्टे हो गईल बा” कईसे ‘बेसी’ अब पुरनका दिन के बात बा. कईसे पुरनका मौसम के घूमत पहिया टूट गयील बा. एतने ना, गौडवाडी के निवृत्ति शेंडगे कहेली, “बरखा त अब हमनी के सपनो में आईल बंद हो गयील बा.”

गौडवाडी के एगो मवेशी सिविर में, मई के एगो तवाईल दोपरिया में अपना खातिर पान बनावत, 83 बरीस के विठोबा सोमा गुलीग कहतारन, (जेकरा के प्रेम से सभे तात्या कहेला) ‘इ जमीन, जहां ए बेरा ई सिविर बनावल बा, कौनो ज़माना में अपना बजरा खातिर नामी रहे. पहले, हम एह प खेती कईले बानी..” ऊ फिकिर में कहलन. अब सब बदल गईल बा. बरखा हमरा गांव से रिसिया गईल बा.”

दलित होलार समुदाय से आवे वाला तात्या आपन पूरा जिनगी गौडवाडी में रहलन. जईसन उ बतावलन कि उनकरा से पहिले उनका परिवार के 5-6 पुस्त ई मस्किल जिनगी में रहे. उ औरी उनकर मेहरारू, गंगू बाई 60 बरीस पहिले ऊंख काटे खातिर सांगली औरी कोल्हापुर आईल रहे. ई लोग खेतन प मजूरी कयील औरी अपना गांव के लगे राज्य के साईट कुल प कार कयील. उ कहलन, “हमनी आपन चार एकड़ जमीन 10-12 साल पहिले कीननी. तब, हमनीके बहुत मेहनत करे के परत रहे.”

अईसे, तात्या अब माण देस में एकसुरे परत सुखाड़ से चिंता में बाडन. उ कहेलन कि 1972 के सुखाड़ के बाद बरखा के प्राकृतिक चक्र अभी बरोबर नईखे भईल. ‘इ हर साल कम से कमतर भयील जाता. हमनी के ना त वलीव (मानसून) के बरखा मिलता ना ओकरा बाद के. औरी गरम के दिन बढ़ले जाता. अईसे, पर साल (2018) में हमनी के कम से कम वलीव के नीमन बरखा जरूर भेंटाई रहे. बाकिर ए साल... अभी ले सुखाड़ बा. भूईंया आखिर ठंडा कईसे होई?”

गौडवाडी के कई गो दूसर पुरनिया 1972 के दुर्भिक्ख (अकाल) अपना गांव के बरखा औरी सुखाड़ के घुमाव के महत्त के रूप में मन पारेला. ओ साल, सोलापुर जिला खाली 321 मिलीलीटर बरखा भईल रहे (भारत के मौसम बिभाग के अकान से ले के इंडियावाटर पोर्टल देखावेला)- जौन 1901 के बाद सबसे कम रहे.

गंगूबाई खातिर 1972 के दुर्भिक्ख के ईयाद बहुत बज्जर मेहनत, उनका रोजदिना के मेहनत से बहुते मस्किल, औरी भूख के मन परावेला. ऊ कहेली, “हमनी (सुखाड़ के दिन में) सड़क बनवनी, ईनार खोदनी, पत्थर थूरनी. ओ बेरा देह में ताकत रहे औरी पेट में भूख. हम 12 आना (पचहत्तर पईसा) में 100 कुंटल गेंहूं पीसे के कार कयीनी. ओ साल हाल बहुत खराब हो गईल रहे.”

मवेशी सिविर में चाय के दोकान प बईठल 85 बरीस के दादा गडदे कहलन, “अकाल इतना महज्जर रहे कि हम अपना मवेशी कुल के संघे 10 दिन एकसुरे चलत रह गईनी औरी अकेलहीं कोल्हापुर पहुंचनी. मिराज रोड प नीम के सब गाछ झर गयील रहे. ओकर सब पत्ता औरी डाढ मवेशी, भेड़ा कुल खा गईल रहे. ऊ हमरा जिनगी के सबसे खराब दिन रहे. ओकरा बाद जिनगी फेर पटरी प ना आयील.”

लमहर बेरा ले सुखाड़ के चलते, ईंहां के लोग 2005 में माणदेस जिला के मांग करे लागल रहे. जौना में तीन जिला -सोलापुर, सांगली औरी स्टार- से काट के निकलल सब सुखाड़ वाला ब्लॉक होखे. (बाकिर इ अभियान आखिर में तब ख़तम हो गईल, जब एकर कुछ नेता इंहां के पटवन योजना जइसन मामिला प ध्यान करे लागल.)

अईसे, ई सुखाड़ 1972 के ह, जेकरा के गौडवाडी के कई गो लोग मील के पत्थर जैसन मन पारेला. सोलापुर के सरकारी वेबसाईट के आंकड़ा से मालूम चलता कि जिला में 2003 में ओकरो से कम (278.7 मिमी) औरी 2015 में (251.18 मिमी) बरखा भईल रहे.

महाराष्ट्र के कृषि बिभाग के ‘रेनफौल रिकार्डिंग एंड एनालिसिस’ पोर्टल के मोताबिक 2018 में संगोला में, 241.6 मिमी बरखा भईल. ई 20 बरीस में सबसे कम बा जब खाली 2 दिन ले बरखा भईल रहे. बिभाग के ईहो कहनाम बा कि इ ब्लॉक में सामान्य बरखा लमसम 537 मिमी होई.

एहीसे, बेसी पानी के बेरा कम चाहे बिलात लउकता, जबकि सूखल दिन, गरमी औरी पानी के कमी के महीना के गिनती बढ़ल जाता.

मवेशी सिविर में उनका साथे बईठल दूसर किसान लोग उनका ई बात के साथे बा. बरखा के बढ़त अनिश्चितता से सभे चिंता में बा. तात्या बतावेलन, “पर साल, पंचांग (चन्द्रमा प आधारित हिन्दू पंचांग) कहलस ‘घावील त पाविल’- ‘जे बेरा प बोई ऊहे नीमन फसल काटी’ बाकिर बरखा अब कभी-कदार होता, एहीसे इ सब खेत में ना परी.”

सड़क के ओह पार सिविर के अपना तम्बू में बईठल खरात वस्ती के 50 बरीस के फुलाबाई खरात (ऊ धनगर समुदाय से बाड़ी, जे खनाबदोश जनजाति के रूप में लिखल बा) अपना साथे तीन गो भईंस ले आयील बाड़ी –“सब नखत के बरखा’ के मन पारतारी. उ कहली, “खाली धोंडयाचा महीना (हिन्दू कैलेण्डर में हर तीन साल प बढ़े वाल एगो औरी महीना- मलमास) आवे प बरखा चुपचाप चल जात रहे. अगिला दू साल हमनी के नीमन बरखा ना मिलत रहे. बाकिर पछिला काई बरीस से अइसन नयीखे होखत.”

ई सब परिवर्तन के अपना हिसाब से करे खातिर, कई गो किसान लोग अपना खेती के बेरा में हेर फेर कयील. संगोला के किसान कहेला कि ईंहां खरीफ के बेरा में मटकी (मोठ के दाल), हुलगे (करिया रहिला) औरी बजरा, तुअर (रहर) के खेती होखे. औरी रबी के बेर में गेंहूं, छीमी, जवार, मकई के गर्मीवाला किसिम के खेती बिसेस रूप से चारा के फसल खातिर कईल जाला.

अलदर वस्ती के हौसाबाई कहेली, “पछिला 20 साल में, हमरा ए गांव में एक्को आदमी अइसन ना मिलल, जे (स्वदेसी) मटकी बोअत होखे. बजरा औरी रहर के देसी किसिम के भी ईहे हाल बा. गेंहूं के खपली किसीम अब ना बोआला, औरी ना हुलगे चाहे तिल.”

मानसून देरी से आवेला- जून के अंत चाहे जुलाई के सुरुआत में. औरी जल्दिये चलियो जाला. सितम्बर में त अब मस्किल से बरखा होला. एहीसे इंहां के किसान उपज के कम बेर वाला मिलौनी (संकर) किसिम के ओर जाता. एकर रोपनी से कटनी ले 2.5 महीना के समय लागेला. नवनाथ माली कहेलन, “पांच महीना के लमहर बेर ले तईयार होखे वाला जवार, बजरा, मटकी, रहर के किसीम अब बिलाता, काहे से कि माटी में अब नमी नईखे.” ऊ गौडवाडी के दूसर 20 गो किसान के साथे, कोल्हापुर के एमिकस एग्रो समूह के सदस्य हवन. जे एसएमएस से, पईसा ले के मौसम के अकानल जानकारी देला.

दूसर फसल के साथे आपन भाग के दांव खेले खातिर कुछ किसान लोग करीब 20 साल पहिले अनार के खेती करे आईल रहे. राज्य के दहल सब्सिडी से ओ सबके मदद भईल. बेरा बीतला के बाद ऊ लोग कुछ मिलौनी, कुछ दूसर-दूसर किसीम करे लागल. माली पूछलन, “हमनी सुरुआत में (12 साल पहिले) एक एकड़ प लमसम 2-3 लाख कमयिनी. बाकिर पछिला 8-10 साल में, बगईचा प तेल्या रोग लागता. हमरा बुझाता इ पानी-बयार के फेरबदल से होता. पछिला साल, हमनी आपन फल 25-30 रोपया किलो बेचे के परल रहे. हमनी प्रकृति के मर्जी के का सकेनी?”

मानसून से पहिले औरी मानसून के बाद होखे वाला बरखा के चलते खेती के ढंग प असर परल बा. संगोला में मानसून के बाद के बरखा, अक्तूबर से दिसंबर तक, में साफ़-साफ़ कमी लउकता. कृषि बिभाग के आंकड़ा से 2018 में इ ब्लॉक में मानसून के बाद खाली 37.5 मिमी बरखा भईल. पछिला बीस साल में- 1998 से 2018 के बीच ईंहां औसत 93.11 मिमी बरखा भईल रहे.

माणदेसी फौंडेशन के संस्थापक चेतन सिन्हा के कहनाम बा, “पूरा माणदेस क्षेत्र खातिर सबसे चिंताजनक बात मानसून से पहिले औरी बाद में बरखा के गायब भईल बा.” इ फौंडेशन गांव के मेहरारू लोग के साथे खेती, कर्जा, औरी मेहनत जइसन बात प कार करेला. (संस्था इ साल 1 जनवरी के राज्य में पहिलका मवेसी सिविर, सतारा जिला के माण ब्लॉक के महसवाण में सुरु कईलस, जेमे 8,000 से बेसी मवेशी रखल गईल रहे) “जात मानसून हमनी के जिनगी के लकीर रहल बा, काहेसे कि हमनी अनाज औरी मवेशी के चारा खातिर रबी के फसल के आसरे रहेनी. जात मानसून के 10 चाहे ओकरा से बेसी बरीस से ना रहला से माणदेस के देहाती औरी दूसर समुदाय प बहुत असर परल बा.”

बाकिर इंहां खेती के तरीका में सायद बड़का फेरबदल ऊंख के खेती के चलते भईल बा. महराष्ट्र सरकार के वित्त औरी सांख्यिकीय निदेशालय के आंकड़ा कहता कि 2016-17 में, सोलापुर जिला में 1,00,505 हेक्टेयर जमीन प 6,33,000 टन ऊंख के खेती भईल. कुछ समाचार रिपोर्ट के कहनाम बा कि एह साल जनवरी ले, सोलापुर अक्तूबर में सुरु भयील ऊंख पेराई के सत्र में सबसे ऊपर रहे. जब जिला के 33 पंजी कईल चीनी मिल (चीनी आयुक्तालय के आंकड़ा) से 10 मिलियन टन से बेसी ऊंख पेराईल ह.

सोलापुर के एगो पत्रकार औरी जल-संरक्षण कार्यकर्ता, रजनीश जोशी कहेलन कि खाली एक टन ऊंख परे खातिर 1,500 लीटर पानी के जरूरत होला. एकर मतलब बा कि ऊंख पेराई के पचिल्का सत्र में अक्तूबर 2018 से जनवरी 2019 ले- अकेले सोलापुर जिला में ऊंख खातिर 15 मिलियन क्यूबिक मीटर से बेसी पानी के उपयोग भयील.

खाली एगो नगदी फसल प पानी के इतना बेसी इस्तेमाल से, दूसर फसल खातिर पानी के स्तर बहुत नीचे चल जला. जबकि इ क्षेत्र में फसल खातिर बरखा औरी सिचाई के पानी के कमी पहिलही से बा. नवनाथ माली के अकान से 1,361 हेक्टेयर में बसल गांव, गौडवाडी (जनगणना 2011) में, जहां बेसी जमीन प खेती हो रहल बा, खाली 300 हेक्टेयर में सिंचाई के परबंध4 बा. बाक़ी जमीन पानी खातिर बरखा के आसरे बा. सरकारी आंकड़ा के अकनला से, सोलापुर जिला में, 7,74,315 हेक्टेयर के कुल सिंचाई क्षमता में से 2015 में खाली 39.49 परतिसत ले सिंचाईल रहे.

किसान लोग के कहनाम बा कि फसल के नोकसान (बरखा के कमी से बचे खातिर कम समय में होखे वाला फसल कयील) के साथे-साथे बढ़त गरमी माटी के औरी बेसी सुखा देले बा. हौसाबाई कहली कि अब त माटी में नमी “छवो इंच गहीर” नईखे.

दुनू फसल के साथे मवेशी के चारो एगो महत्त के बीसय बा. पोपट गडदे के अकान बा कि चारा के कमी सरकार के (औरी दूसर) संगोला में सूखाड़ के दिन में पसु सिविर लगावे के मजबूर कयील. साल 2019 में अब तक ले 50,000 मवेसियन के साथे 105 सिविर. ऊ एगो दूध सहकारी समिति के निदेसक औरी गौडवाडी में पसु सिविर सुरु करे वाला आदमी हवन. इ सब सिविर में मवेसी का खाला? ऊहे ऊंख (एगो अकान से) जे प्रति हेक्टेयर 29.7 मिलियन लीटर पानी सोख लेला.

ऐतरे, संगोला में एक दूसरा से लागल बदलाव चल रहल बा. जौन ‘प्रकृति’ के हिस्सा ह. बाकिर एकरो से बडका बात ई बा कि मानुसे से चलावल बा. एमे सामिल बा कम होत बरखा, बरखा के कम होत दिन,बढ़त तापमान, बेसी गरमी वाला दिन, मानसून से पहिले औरी बाद के अलोपत बरखा, औरी माटी में नमी के कमी. साथे साथ फसल के बदलत तरीका- कम समय वाला बेसी फसल औरी एकरा नतीजा में फसल के रकबा में कमी, कम देसी किसिम, जवार जइसन कम खाद्य फसल औरी ऊंख जइसन बेसी नगदी फसल के खेती – साथे में खराब सिंचाई, घटत भूजल स्तर – औरियो बहुत कुछ.

गौडवाडी के पसु सिविर में बईठल तात्या से जब पूछल गयील कि इ सब फेरबदल के पीछे का कारन बा. त ऊ मुस्कियात कहलन, “ओह हमनी बरखा देवता के दिमाग पढ़ पवतीं! आदमी जब लालची हो गयील त बरखा कईसे होई? इंसान जब आपन रहे सहे के ढंग बदल दहलस त प्रकृति आपन पुरान तरीका प कईसे रह पाई?”

आपन अनमोल समय औरी नीमन जानकारी देवे खातिर लेखिका शहाजी गडहिरे औरी दत्ता कुलीग के धन्यवाद देवे के चाहतारी

कवर फोटो: संकेत जैन/ पारी

पारी के जलवायु परिवर्तन प केन्द्रित राष्ट्रव्यापी रिपोर्टिंग के प्रोजेक्ट, यूएनडीपी समर्थित ओ पहल के हिस्सा ह. जेकरा में साधारण लोग के जिनगी औरी ओकरा अनुभव से पर्यावरण में होत बदलाव के लिखल जाला.

अनुवाद: स्मिता वाजपेयी