अचार पापड़ ना, ढोल आ सपना से आइल बदलाव

“ई ढोल ना ह.” सविता दास एगो ढोल ओरी इशारा करत कहत बारी.

जिनगी में बहुत तरह के मौका ना होखे चलते बिहार के पटना जिला के ढिबरा गांव के महिला के ई समूह रोजी-रोटी कमाए के अलग तरीका शुरू कईले बा. खेती लायक जमीन सिकुड़त जाता, मजदूरी के मौका खतम होत जाता. एहिसे ई लोग अपना हांथ में छड़ी उठा लेले बा. सोलह गो मेहरारू एह राह के चुनली लेकिन परिवार के दबाव आ लोग के ताना चलते छह गो समूह के छोड़े प मजबूर हो गईली. नाम के आगे जिनकर दास लागल बा, अइसन दस गो मेहरारू आपन फैसला पर टिकल रहली. उहे लोग सन् 2012 में राज्य के पहिला ऑल वीमेन बैंड “सरगम महिला बैंड” बनवली जा.

“ई हाथ देखीं, खेती वाला कवनो खरोंच अब एहपर नईखे, हमनी भीरी पईसा बा, हमनी के इज्जत मिलेला, एकरा से जादे का चाही? दु गो बच्चन के माई डोमिन दास कहली.

सविता आ डोमिनी जईसन सरगम बैंड के बाक़ी मेहरारू – पंचम, अनीता, ललिता, मालती, सोना, बैजन्ती, चितरेख, छतिया– भी महादलित हई. बिहार के अनुसूचित जाति में ई सबसे गरीब आ पिछड़ल वर्ग ह. राज्य के 1.65 करोड़ दलित में से लगभग एक तिहाई ई लोग हवन जा. महिला बैंड के हर सदस्य के अलग कहानी बा कि कईसे उनकर पुरखा लोग के ऊंच जात के लोग दबवले रहे. ऊ लोग ईहो बतावेला कि कईसे ऊंच जात के जमींदार लोग ओह लोगन के खेत में आ घर में आके उनकर पति के साथे गलत व्यवहार करे. ई सब महिला दानापुर प्रखंड के जमसौत पंचायत के ढिबरा गांव से हई जा.

50 साल के चितरेख इयाद करत बाड़ी कि जबो ऊ घर के बाहर निकलल चाहस त उनकर पति कईसे आपत्ति जतावत रहन. “घर में काम कर – ऊ कहत रहन, बहुत बार अचानक कवनो काम करे के कह देत रहन. लेकिन अब जब कहीं बाहर जाए के रहेला त कहेलन जल्दी जा ना त लेट हो जाई. हालात अइसे बदल गईल,” ऊ हंसते कहली.

ढोल बजावे के विचार उनका अपने मने ना आइल. ऊ लोग एगो सेल्फ हेल्प ग्रुप चलावत रहे. आ एहिसे, जइसन कि ऊ कहतारी, “हमनी के साथे काम करत रहीं जा.” सब के इच्छा रहे कि आपन कमाई करे खातिर अचार आ पापड़ के अलावे कुछो अऊरी करे के. एहसे जब पटना के एगो संस्था नारी गुंजन ओह लोग से बैंड बनावे आ संगीत शिक्षक खोजे के कहलस त ई लोग तुरंते मान गईल. आदित्य कुमार गुंजन पटना से 20 किलोमीटर दूर हफ्ता में सात दिन एह लोग के ट्रेनिंग करावे जात रहन आ डेढ़ साल तक ई काम कईलन.

शुरुआती महीना 30 से 50 साल के महिला के एह समूह खातिर कठिन रहल. एक ओरी जहां गांव के लोग लगातार ताना मारत रहे कि ऊ लोग मरद निहन बनल चाहत बारी, ओहिजे दूसरा ओरी गर्दन में ढोलक लटका के लगातार पिटला से हथेली आ कंधा में दर्द रहे लागल रहे.

जईसे-जईसे एह ढोल वादकन के खबर फईलल, आस पास के आयोजन में ओह लोग के ढोल बजावे के नेवता के बाढ़ आ गईल. ओकरा बाद से ही दूर के इलाका में भी जाए लागल लोग. पटना आ ओकरा पड़ोसी जिला में ढोल बजावे के अलावा बैंड ओडिशा आ दिल्ली में भी आपन कला देखा चुकल बा. राजधानी दिल्ली के यात्रा ओह लोग खातिर यादगार रहल. उहंवा जिनगी में पहिला बेर मेट्रो ट्रेन में बईठे के मौका मिलल.

ई लोग आपन काम आ पईसा के इंतजाम अपने करेला. पईसा सभ के बीच बराबर बांटल जाला बाकि अगर कोई काम से हांथ खिंच लेलस त ओके पईसा ना देल जाला. अभ्यास केतना करे के बा ऊ काम पर निर्भर करेला (आमतौर प खेत में अभ्यास करेलिजा ताकि गांव के लोग परेशान न होखे). ई लोग विजिटिंग कार्ड बनवले बाड़ी आ एकरा अलावा एगो अचार संहिता भी बा. बैंड के सब महिला साफ़ कपड़ा पहिनी आ कवनो कारोबार के मामला प खाली समूह के लीडर सविता बात करीहन.

संगही, ई एगो अनकहल समझौता ह कि हर महिला आपन कमाई अपना भीरी ही रखी. ऊ कहली कि, हमनी के अपना पति के ना देवेनी जा. “एह पईसा से हम अपना लईकन के स्कूल के फीस दिहिला, ओह लोग के किताब खरीदीला, हमनी के नीक खाना खाई ला जा. हम पईसा बचावेनी आ कबो-कबो अपना प खर्च भी करेनी. ई आज़ादी पावे में जिनगी लाग गइल. ई पईसा हम दूसरा के काहे देब?

पुरान जाति आधारित समाज में ऊंच जात के बियाह आ उत्सव में अनिता आ उनका बैंड के मौजूदगी मात्र उनका के “गंदा” क देवेला. बाक़ी जवन दुनिया ई मेहरारू लोग अपना खातिर गढ़ले बाड़ी जा ओहमें हर जाति के लोग उनकर संगीत के हुनर चलते ओह लोग के अपना जगह प बोलावेला. असल में कई बेर ऊ लोग अपना कार्यक्रम के दिन तब धरेला जब उनके पता चल जाए कि ओह दिन ई समूह उनका जगह प मौजूद रही. ई मेहरारू लोग गर्व से कहत बा कि अब ऊ लोग बिना कवनो संकोच के ओह होटलन में चल जाला जहां ऊ लोग पहिले देखे के भी हिम्मत ना कर पावत रही.

बैंड एक दिन के काम खातिर 10 से 15 हज़ार रुपया लेवेला. लगन के सीजन महीना में 10 दिन के भी काम मिल जाला. एहिसे एह मौसम में ऊ लगभग 1.5 लाख रुपया काम लेवेली जा. सविता कहली, “हमनी के ढेर जिद ना करेनी जा, कम-बेसी खातिर बातचीत हो सकेला. बाक़ी जवन शर्त ना बदलल जा सकेला ऊ ई ह कि अपना गांव से पिकअप आ ड्रॉप के, अगर रात में रुके के पड़े त ओकर इंतज़ाम.

पहिले के मजदूरी के मुकाबले अब उनकर हालात कईसन बा? ई एगो अइसन राज्य ह जहां मनरेगा के तहत रोजाना के मजदूरी 168 रुपया बा. एह बात के अहसास बहुत कम होला कि जब ई अकुशल मज़दूर आपन बैंड बनवली जा तब न्यूनतम मजदूरी 200 से कम रहे, ई मेहरारू लोग भी जब 2012 में खेत में काम करत रहे त रोज 100 रुपया से जादे ना कमात रहे.

आर्थिक आज़ादी के चलते भले गांव में इज्जत मिले लागल होखे (आ दूसर मेहरारू पुछेलिजा कि इ बैंड के हिस्सा कईसे बनल जा सकेला), लेकिन एकरा चलते ऊ लोग आपन सामाजिक ज़िम्मेदारी नइखे भुलाइल. गाली देवे वाला पति से लेके दहेज के मांग करे वाला तक- सबके सामना करेलीजा आ ढिबरा आ अऊरी गांव में सलाह देवेली जा आ मध्यस्थता भी करेलिजा. ऊ एकर उदाहरण भी देतारी लेकिन कवनो नाम नईखी लेत.

एह घड़ी बैंड में नव गो ड्रम आ एगो झांझ बा बाकि ई लोग बहुत जल्दी बेस ड्रम आ कैशियो इलेक्ट्रोनिक कीबोर्ड जोड़ल चाहत बा. भले इनकर पसंदीदा भांगड़ा बीट होखे लेकिन ई लोग नया संगीत अपने से जोड़े के कोशिश कर रहल बा. ऊ लोग के मन बा कि पोशाक – पैंट, शर्ट आ साथ में टोपी आ कैरीऑल होखे जवना से समूह “मिलिट्री बैंड” जईसन लागे.

बाक़ी लोग निहन सविता भी अचरज से अपना अतीत के पीछे मुड़ के देखली. ढोल उनका खातिर वाद्ययंत्र से काफ़ी बढ़के बा. “हम जब एकरा के पिटीला त लगेला कि हम ऊ सभ लोगन के पिटतानी जे हमरा के रोकले रहे”, बैंड के लीडर सविता, (बाँए, अग्रभाग) कहली.

दुनिया के एह छोट हिस्सा में सरगम महिला बैंड बदलाव के परचम फहरावत बा, हर एक थाप पर.

अनुवाद: सिल्की