عقیدہ، چندہ اور قرض میں ڈوبے کسان

یہ اسٹوری پارتھ ایم این کی اُس سیریز کا حصہ ہے، جسے پلٹزر سنٹر کا تعاون حاصل ہے۔

مانسون سے پہلے ۵۳ سالہ دیو راؤ ناگرے نے جو وعدہ کیا تھا اب وہ انہیں پریشان کرنے لگا ہے۔

انہوں نے ستمبر کا مہینہ گھٹنوں تک گہرے پانی میں کھڑے ہوکر اپنے کھیت کو تباہ کن بارش سے بچانے کی کوشش میں گزارا تھا۔ ان کا ۸ ایکڑ کا کھیت چکلامبا گاؤں میں ایک پہاڑی ڈھلان پر واقع ہے، جس کی وجہ سے سیلاب کے دوران نقصان کا خطرہ مزید بڑھ جاتا ہے۔

’’پانی براہ راست میرے کھیت سے ہوکر گزرتا ہے،‘‘ وہ بتاتے ہیں۔ ’’پانی کی نکاسی کا راستہ بنانے کے لیے میں نے روزانہ کئی گھنٹوں تک کام کیا۔‘‘

لیکن ان کی کمر توڑ محنت بیکار گئی، اور منہ زور بادلوں کی مار سے وہ ہار گئے۔ ان کی کپاس، ارہر اور گنے کی فصلیں تباہ ہو گئیں، جس سے انہیں ۳ لاکھ روپے سے زیادہ کا نقصان ہوا۔ پہاڑیوں سے نیچے اترنے والا پانی کا تیز بہاؤ اپنے ساتھ ان کے کھیت کی مٹی کی اوپری تہہ کو بھی بہا لے گیا، جس سے ان کی روزی روٹی خطرے میں پڑ گئی۔

نقصانات کی تلافی کے خیال سے ناگرے اتنے پریشان نہیں ہیں، جتنے مہاراشٹر کے اہم تیرتھ گاہوں (زیارت گاہوں) میں سے ایک پر مندر کی تعمیر کے لیے ۷ء۱ لاکھ روپے عطیہ دینے کے وعدہ کو پورا نہ کرنے کے اندیشہ کو لے کر پریشان ہیں۔

بیڈ اور اہلیہ نگر اضلاع کی سرحد سے متصل ایک صاف شفاف پہاڑی پر واقع بھگوان گڑھ کے وسیع و عریض کمپلیکس میں پوری ریاست سے عقیدت مندوں کا جمگھٹا رہتا ہے۔ بھگوان بابا، جو وارکری سلسلہ کے ایک قابل احترام سنیاسی ہیں، کے لیے وقف اس مندر میں ہر سال ۱۵-۲۰ لاکھ کے درمیان عقیدت مند آتے ہیں۔ سال ۱۹۵۸ میں انہوں نے بھگوان گڑھ میں وٹھل کی مورتی نصب کی تھی۔ حالانکہ بھگوان گڑھ میں مختلف برادریوں کے لوگ آتے ہیں، لیکن ونزاری برادری، جو ایک بڑی او بی سی ذات ہے، اس کی سب سے اہم پیروکار ہے۔

مہاراشٹر کے سابق نائب وزیر اعلیٰ گوپی ناتھ منڈے نے ونزاری کسانوں اور مزدوروں کی زندگی میں اس مقام کی اہمیت کو تسلیم کرتے ہوئے بھگوان گڑھ میں دسہرہ ریلی نکالنے کی روایت کا آغاز کیا تھا۔ وقت گزرنے کے ساتھ یہ ریلیاں مضبوط تر ہوتی گئیں، جس نے لاکھوں عقیدت مندوں کو اپنی طرف متوجہ کیا، اور بھگوان گڑھ ایک مذہبی مقام ہونے کے ساتھ ساتھ ایک سیاسی طاقت کے طور پر بھی ابھرا۔

فی الحال، بھگوان گڑھ کے مہنت نام دیو شاستری، ۱۳ویں صدی کے ایک شاعر اور فلسفی-سنت گیانیشور کے لیے وقف ایک شاندار مندر تعمیر کرانے کے کام میں مصروف ہیں، جس پر ۲۵ کروڑ روپے سے زیادہ کی لاگت کا تخمینہ لگایا گیا ہے۔ اس مندر کا افتتاح اس کے وسیع و عریض احاطہ میں ۲۰۲۶ کے دسہرہ کے موقع پر ہونا ہے۔ اس کام کے لیے عقیدت مندوں سے پیسے جمع کیے جا رہے ہیں، جن میں سے بہت سے لوگ ایسے بھی ہیں جو یہ نہیں جانتے کہ ان کا اگلا کھانا کہاں سے آئے گا۔

بیڈ ضلع کے گیورائی تعلقہ میں واقع ناگرے کے گاؤں چکلامبا نے مندر کی تعمیر کے لیے ۴۱ء۲ کروڑ روپے جمع کرنے کا وعدہ کیا ہے۔ یہ رقم اس گاؤں کے ۴۱۰ کنبوں سے وصول کی جائے گی۔ گاؤں کی آبادی زیادہ تر کسانوں، زرعی مزدوروں، اور گنے کاٹنے والے مزدوروں پر مشتمل ہے۔ نام دیو شاستری کے بعد آنے والے کرشنا مہاراج نے کہا کہ چندہ مانگنا بھگوان بابا کے زمانے کی ہی ایک پرانی روایت رہی ہے۔ وہ ایک سنت تھے جنہوں نے ۱۹۵۸ میں بھگوان گڑھ کی بنیاد رکھی تھی۔ ’’ایک زمانہ تھا جب لوگوں کے پاس پیسے نہیں تھے، لہٰذا وہ اناج کا عطیہ دیتے تھے،‘‘ کرشنا مہاراج نے وضاحت کی۔ ’’آج، عطیات کی شکل نقد میں بدل گئی ہے۔ بس یہی فرق ہے۔‘‘

تاہم، جب ناگرے اور چکلامبا کے باقی لوگوں نے مندر کی تعمیر کے لیے ۴۱ء۲ کروڑ روپے کی بھاری بھرکم رقم عطیہ کرنے کا جب وعدہ کیا تھا، تب انہیں اس بات کا کوئی اندازہ نہیں تھا کہ اگلے چند ماہ میں کیا ہونے والا ہے۔

حالیہ دنوں میں مہاراشٹر میں ہونے والی سب سے تیز بارشوں میں سے ایک میں ستمبر کے آخری ہفتہ تک ریاست کے ۳۱ لاکھ سے زیادہ کسان متاثر ہوئے تھے اور تقریباً ۱۸ لاکھ ہیکٹیئر کھیت یتباہ ہو گئے تھے۔ ہزاروں لوگ راتوں رات اپنے گھروں سے محروم ہو گئے تھے۔

مہاراشٹر جس تباہی کا سامنا کر رہا ہے اس سے چکلامبا بھی اچھوتا نہیں ہے۔ ناگرے جیسے کسان پہلے ہی مستقبل کے قرضوں کی طرف دیکھ رہے ہیں۔ ریاست نے کسانوں کو راحت دینے کے لیے ۲۲۱۵ کروڑ روپے کے پیکیج کا اعلان کیا ہے، لیکن نقصان درحقیقت اس سے کہیں زیادہ ہے۔ اگر اس رقم کو متاثرین میں تقسیم کیا جائے تو یہ کم ہو کر فی کسان محض ۷۰۰۰ روپے رہ جاتی ہے۔

بعد میں وزیر اعلی دیویندر فڑنویس نے کسانوں کے لیے ۳۱ ہزار کروڑ روپے سے زیادہ کی امدادی رقم کا اعلان کیا۔ تاہم، کسان کارکن اجیت نولے نے نشاندہی کی کہ فڑنویس نے مختلف اسکیموں کے تحت کسانوں کو پہلے سے مختص کی گئی رقم کو ہوشیاری سے اس رقم میں شامل کر لیا تھا۔ امداد کی اصل رقم ۶۵۰۰ کروڑ روپے ہی تھی۔

اس کے باوجود گاؤں والے بھگوان گڑھ کے ساتھ اپنے وعدہ کو پورا کرنے پر اٹل ہیں، اور ایسا کرنے کے لیے ان کے پاس صرف ایک سال کا وقت باقی ہے۔ ’’میرے پاس اتنا وقت ہے کہ میں رقم جمع کرلوں،‘‘ ناگرے کہتے ہیں۔ ’’میں بچت کروں گا اور اپنا وعدہ پورا کروں گا۔ میں نے زبان دی ہے، تو میں اس سے پیچھے نہیں ہٹ سکتا۔‘‘

چکلامبا ان ۶۰-۷۰ گاؤوں میں سے ایک ہے جو مہینہ میں ایک بار بھاکری (ایک طرح کی گول روٹی) سے بھرا ٹرک بھگوان گڑھ بھیجتے ہیں۔ کرشنا مہاراج کہتے ہیں، ’’اس کا استعمال بھگوان گڑھ میں روزانہ کم از کم ۳۵۰۰ عقیدت مندوں کو کھانا کھلانے کے لیے کیا جاتا ہے۔‘‘

اس کے علاوہ، بھگوان گڑھ میں دو اسکول چلائے جاتے ہے، وہ مزید کہتے ہیں، اور ذات پات اور مذہب کی تفریق کے بغیر ۱۰۰ سے زیادہ غریب بچوں کی تعلیم کی ذمہ داری اٹھائی جاتی ہے۔ ان بچوں میں سے تقریباً ۳۰ بھگوان گڑھ کے ایک ہاسٹل میں قیام کرتے ہیں۔ وہ سب لڑکے ہیں کیونکہ ’’یہ برہم چریہ کی جگہ ہے،‘‘ وہ کہتے ہیں۔

مہاراشٹر کو شرڈی یا پَنڈھر پور جیسے مشہور مندروں کے لیے جانا جاتا ہے۔ ان دونوں مندروں میں سالانہ تقریباً ۴ کروڑ زائرین آتے ہیں۔ تاہم، گزشتہ برسوں سے، ریاست کے باہر نسبتاً کم مشہور مذہبی مراکز بھی بڑے پیمانے پر زائرین کو اپنی طرف متوجہ کر رہے ہیں۔ ان علاقوں کے لوگوں نے وقت کے ساتھ ساتھ اپنے مقامی مندر کے ٹرسٹ کے ساتھ ایک وابستگی قائم کر لی ہے، اور قطع نظر اس کے کہ مذہبی نشست پر کون بیٹھا ہے ان کی وفاداریاں تبدیل نہیں ہوتی ہیں۔ مقامی لوگوں کی بدقسمتی یہ ہے کہ مندر کے ٹرسٹوں نے مستقبل بعید میں بہتر زندگی کا وعدہ دے کر اپنے عقیدت مندوں سے زیادہ سے زیادہ رقم وصول کرنا شروع کر دیا ہے۔

ستمبر کے آخری ہفتہ میں، ایک مقامی مراٹھی اخبار ’کاریارمبھ‘ نے مندروں کے ٹرسٹوں اور تیرتھ گاہوں کی جانب سے مصیبت زدہ کسانوں کی مدد کی کمی پر سوال اٹھایا۔ اخبار نے دلیل دی کہ کسان اور مزدور مذہبی پروگراموں، تہواروں اور مندروں کے لیے اپنی جیب سے پیسے خرچ کرتے ہیں اور اب جبکہ کسان سیلاب سے تباہ ہو چکے ہیں، ان اداروں کو آگے آنا چاہیے اور کسانوں کی مدد کرنی چاہیے۔

شرڈی اور تُلجا بھوانی جیسے مندر کے ٹرسٹوں نے سیلاب کی امداد کے لیے ایک ایک کروڑ روپے کا عطیہ دیا ہے – جو ان کی سالانہ آمدنی کے ایک معمولی حصہ کے برابر ہے۔

بھگوان گڑھ سے ۱۰۰ کلومیٹر سے بھی کم فاصلہ پر دو اور بھیڑ بھاڑ والی تیرتھ گاہیں – دیوگڑھ اور سَرلا بیٹ – ہیں جو بالترتیب بھاسکر گیری مہاراج اور رام گیری مہاراج کی نگرانی میں چلائے جاتے ہیں۔

اگست ۲۰۲۴ میں، پولیس نے رام گیری مہاراج کے خلاف پیغمبر اسلام پر توہین آمیز بیان کے لیے ایف آئی آر درج کی تھی۔ ان کے بیان نے اہلیہ نگر ضلع کے شری رام پور قصبہ، جہاں رام گیری مقیم ہیں، میں فساد جیسی صورتحال پیدا کر دی تھی۔ پھر بھی، چونکہ بہت سے لوگ سرلا بیٹ کی تیرتھ گاہ میں عقیدت رکھتے ہیں، اسی رام گیری مہاراج کو ایسے پروگراموں کے لیے مدعو کیا جاتا رہتا ہے جہاں گاؤں والے اپنی جیب سے ان کے اعزاز میں دعوتوں کا اہتمام کرتے ہیں۔

گزشتہ ۱۰ سالوں کے دوران بھاسکر گیری مہاراج کے پیروکار نیواسا – اہلیہ نگرمیں ان کے اثر و رسوخ والا تعلقہ – میں ہر ایک گاؤں میں مندر بنانے کی مہم چلا رہے ہیں۔ پیسہ گاؤں والوں اور گرام پنچایت سے آتا ہے۔ چندہ اگاہی وہاٹس ایپ پر ہوتی ہے۔

نیواسا کی دکانیں اور گھر بھاسکر گیری کی مالاؤں والی تصویروں سے مزین ہیں۔ یہاں کے تقریباً ہر گاؤں میں ۳۰-۴۰ افراد پر مشتمل ایک کمیٹی ہے جو ان کے اعزاز میں عقیدت کے گیت اور مذہبی گیت گاتی ہے۔ ’’تہواروں کے دوران، بھاسکر گیری مہاراج خود گاؤں کا دورہ کرتے ہیں اور مذہبی بیداری پیدا کرنے کے لیے بھکتی گیت گاتے ہیں،‘‘ ۴۷ سالہ رام داس واکچَورے بتاتے ہیں، جو نیواسا کے ایک گاؤں سوندالا میں ان کمیٹیوں میں سے ایک کے رکن ہیں۔

مہاراشٹر میں ۲۰۲۴ کے ریاستی اسمبلی انتخابات سے ٹھیک پہلے، بھاسکر گیری مہاراج نے اپنے پیروکاروں سے کہا تھا کہ ’’مذہب کو ووٹ دیں،‘‘ کہا جاتا ہے کہ اس کی وجہ سے راتوں رات امیدواروں کی قسمت بدل گئی۔ اہلیہ نگر ضلع کی آبادی کا تقریباً ۷ فیصد مسلمان ہیں۔

واکچورے کا کہنا ہے کہ بھاسکر گیری مہاراج کے پیروکاروں نے اس بات کو یقینی بنایا ہے کہ نیواسا کے تعلقہ کے ہر گاؤں میں ہندو دیوتاؤں کے لیے وقف کم از کم چار مندر ہوں۔ ’’ہم اس بات کو یقینی بناتے ہیں کہ لوگوں کو ہر بار بار چندہ دینے کی ضرورت نہ پڑے۔ زیادہ سے زیادہ ہر دو سال میں ہر گاؤں سے ایک مندر بنتا ہے۔‘‘

نیواسا میں ۱۲۷ گاؤں ہیں۔ ہر گاؤں میں چار مندر کے لحاظ سے بھاسکر گیری مہاراج کے پیروکاروں نے صرف ۱۰ سالوں میں ایک ہی تعلقہ میں تقریباً ۵۰۰ مندر بنوائے ہیں۔ ’’ایک مندر کی تعمیر کی لاگت تقریباً ۱۰ لاکھ روپے آتی ہے،‘‘ واکچورے مزید کہتے ہیں۔

دوسرے لفظوں میں، نیواسا کی آبادی – جو عام طور پر کھیتی کے بحران، صحت کی ناقص نگہداشت اور تعلیم کی ناقص سہولت سے نبرد آزما ہے – نے ان کے گاؤں کے چھوٹے مندروں کی تعمیر کے لیے ۵۰ کروڑ روپے خرچ کیے ہیں۔ ’’کوئی بھی بھگوان کے کام کے لیے پیسے دینے سے انکار نہیں کرتا،‘‘ واکچورے کہتے ہیں۔

بہرحال، کسانوں اور مزدوروں سے ان کے گھروں کے اندر رازداری میں بات چیت کے دوران ایک اضافی تہہ کھلتی ہے۔ اگرچہ ان کی عقیدت غیر متزلزل ہے، لیکن وہ جو عطیات دیتے ہیں وہ بعض صورتوں میں سماجی دباؤ کا نتیجہ ہوتے ہیں۔ نام ظاہر نہ کرنے کے وعدہ کے بعد لوگ یہ کہتے ہوئے سنائی دیتے ہیں، ’’نہ کہنا ٹھیک نہیں لگے گا‘‘ یا ’’لوگ کیا کہیں گے‘‘ یا ‘‘باقی گاؤں سے الگ پڑ جاؤگے‘‘

تاہم، اس رجحان کے بہت دور رس اثرات ہیں۔

دور افتادہ گاؤوں میں مقامی سطح پر عام لوگوں کی نظروں سے دور، چھوٹے چھوٹے سادھو ابھر آئے ہیں جو غریبوں کو بہتر وقت کا وعدہ کرتے ہوئے ان سے پیسے اینٹھتے ہیں۔ یہ اب ایک کامیاب کاروباری ماڈل بن گیا ہے۔

نام دیو شاستری کی پہنچ بالکل دوسری سطح کی ہے۔ ان کے یوٹیوب چینل پر چوتھائی ملین سبسکرائبر ہیں، جس پر سوئٹزرلینڈ میں ہیلی کاپٹر سے سفر کرتے ہوئے ایک بہترین ایڈٹ شدہ ان کا ایک ویڈیو بھی شائع ہوا ہے۔ سال ۲۰۲۴ کے ریاستی اسمبلی انتخابات میں انہوں نے مہایوتی امیدوار، دھننجے منڈے کی حمایت کی تھی، جسے منڈے کی بڑی جیت کے ایک اہم عنصر کے طور پر دیکھا گیا۔ تاہم، بھگوان گڑھ کے عقیدت مندوں کو اس سے کوئی فرق نہیں پڑتا۔ ان کے لیے وہ ایک رہنما ہیں۔

چکلامبا کی ۴۸ سالہ نانا بائی اُوگل مُگلے اور ان کے ۵۰ سالہ شوہر شیواجی دوںوں ہی ونزاری برادری کے مہاجر گنا مزدور ہیں۔ چھ مہینوں میں۵۰ ہزار روپے کی معمولی رقم کے لیے مراٹھواڑا سے یہ مزدور میاں بیوی زیادہ تر مغربی مہاراشٹر یا کرناٹک کی طرف ہجرت کرتے ہیں اور خوفناک حالات میں بندھوا مزدوری کی سب سے بھیانک شکلوں میں سے ایک میں کام کرتے ہیں۔ ان کے بچے بھی اسی پیشہ میں ہیں کیونکہ شیواجی کے مطابق، ’’ہمارے پاس اپنے بیٹوں کو پڑھانے کے لیے پیسے نہیں تھے۔‘‘

اس جوڑے نے بھگوان گڑھ کے مندر میں ایک لاکھ روپے کا عطیہ دینے کا وعدہ کیا ہے، جو ان کی سالانہ آمدنی کے مساوی ہے۔

’’ہم اپنی تیرتھ گاہوں کا خیال اپنے بچوں کی طرح رکھتے ہیں،‘‘ شیوا جی کہتے ہیں۔ ’’اگر ہمارے پیروں میں جوتے یا سر پر چھت نہ ہو، تب بھی ہم مندر کے لیے جو کچھ کرسکتے ہیں وہ کریں گے۔ ہماری پرورش اس کی عبادت کے لیے ہوئی ہے۔‘‘

چکلامبا میں اپنے ایک کمرے کے مکان کے باہر بیٹھیں نانا بائی سخت مشقت کی وجہ سے جوڑوں کے درد اور کمزور گھٹنوں کے ساتھ نبرد آزما ہیں۔ وہ بھی اپنے شوہر سے اتفاق کرتی ہیں۔ ’’ہمارے پاس جو کچھ بھی ہے، وہ بھگوان گڑھ اور نام دیو شاستری کی وجہ سے ہے۔ انہوں نے ہی ہمیں سب کچھ دیا ہے۔ انہیں کچھ دینے سے پہلے ہمیں دو بار نہیں سوچنا چاہیے۔ کوئی سوال نہیں پوچھنا چاہیے،‘‘ وہ کہتی ہیں۔

چکلامبا کے باشندے یہاں تک کہ مانسون کی آمد کو بھی نام دیو شاستری سے منسوب کرتے ہیں۔ گاؤں میں گنے کے ایک مہاجر مزدور، ۵۲ سالہ بھاؤ صاحب تھورے کہتے ہیں، ’’اس علاقہ میں اس وقت تک بارش نہیں ہوئی جب تک وہ ہمارے گاؤں میں ایک پروگرام کے لیے نہیں آئے۔ جیسے ہی وہ یہاں آئے، بارش شروع ہو گئی۔‘‘

یہ الگ بات ہے کہ بارش شروع ہونے کے بعد اس وقت تک نہیں رکی جب تک کہ اس نے ۳۰ اضلاع میں تباہی برپا نہ کر دی اور جان و مال کا شدید نقصان نہ پہنچا دیا۔ بھاؤ صاحب کے پاس اس کا رد بھی موجود ہے۔ وہ کہتے ہیں، ’’کم از کم ہمارے پینے کے پانی کا خیال تو رکھا گیا ہے، اور ہمارے پاس موسم سرما کی فصل کے دوران پانی دستیاب ہو گا۔‘‘

بھاؤ صاحب نے مندر کی تعمیر کے لیے ۲۵ء۱ لاکھ روپے دینے کا وعدہ کیا ہے۔ ان کے پاس اپنی کوئی زمین نہیں ہے، اور وہ ۱۵۰۰ روپے ماہانہ کرائے ادا کرکے ایک کمرے کے مکان میں رہتے ہے۔ ’’مندر کی تعمیر میں حصہ داری ایک اعزاز ہے جو ہمیں اگلی تین نسلوں تک نہیں ملے گا،‘‘ وہ مزید کہتے ہیں۔ ’’جب ڈیڑھ سال میں ہماری باری آئے گی تو ہم نقد رقم بابا کے قدموں میں رکھیں گے۔‘‘

انہوں نے مزید کہا کہ جب مندر تعمیر ہوگا تو یہ فخر کی بات ہو گی۔ ’’برسوں بعد ہمارا وجود نہیں رہے گا،‘‘ بھاؤ صاحب کہتے ہیں۔ ’’لیکن مندر وہاں رہے گا، اور اس میں ہماری بھی کچھ حصہ داری ہوگی۔‘‘

ترجمہ نگار: شفیق عالم