ಭಕ್ತಿ, ಕಾಣಿಕೆ ಮತ್ತು ಸಾಲದಲ್ಲಿ ಮುಳುಗಿದ ಬೇಸಾಯಗಾರರು

ಈ ಸ್ಟೋರಿಯನ್ನಯ ಪುಲಿಟ್ಜರ್‌ ಸೆಂಟರ್‌ ಅನುದಾನದ ಬೆಂಬಲದೊಂದಿಗೆ ವರದಿ ಮಾಡಲಾಗಿದೆ.

ಮಳೆಗಾಲಕ್ಕೂ ಮೊದಲು 53 ವರ್ಷದ ದೇವರಾವ್‌ ನಗರೆ ಭರವಸೆಯೊಂದನ್ನು ನೀಡಿದ್ದರು. ಅದೀಗ ಅವರನ್ನು ಎಡೆಬಿಡದೆ ಕಾಡುತ್ತಿದೆ.

ಅವರು ಸೆಪ್ಟೆಂಬರ್‌ ತಿಂಗಳನ್ನು ಮೊಣಕಾಲು ಮಟ್ಟದ ನೀರಿನಲ್ಲಿ ನಿಂತು ತಮ್ಮ ಕೃಷಿ ಭೂಮಿಯನ್ನು ವಿನಾಶಕಾರಿ ಮಳೆಯಿಂದ ರಕ್ಷಿಸಿಕೊಳ್ಳುವುದರಲ್ಲಿ ಕಳೆದರು. ಅವರ 8 ಎಕರೆ ಜಮೀನಿನಲ್ಲಿ ಚಕ್ಲಾಂಬಾ ಗ್ರಾಮದ ಗುಡ್ಡಗಾಡು ಪ್ರದೇಶದ ಇಳಿಜಾರಿನಲ್ಲಿದೆ. ಇದು ನೆರೆ ನೀರು ನುಗ್ಗಿದಾಗ ಸಮಸ್ಯೆಯನ್ನು ಇನ್ನಷ್ಟು ಬಿಗಡಾಯಿಸುವಂತೆ ಮಾಡುತ್ತದೆ.

“ನೀರು ನೇರವಾಗಿ ನನ್ನ ಜಮೀನಿನ ಮೂಲಕ ಹರಿಯುತ್ತದೆ. ಪ್ರತಿದಿನ ನಾನು ನೀರನ್ನು ಹೊರಗೆ ಹರಿದು ಹೋಗುವಂತೆ ಮಾಡುವುದರಲ್ಲಿ ಗಂಟೆಗಳಷ್ಟು ಸಮಯವನ್ನು ಕಳೆಯುತ್ತಿದ್ದೆ” ಎಂದು ಅವರು ಹೇಳುತ್ತಾರೆ.

ಆದರೆ ಅವರ ದಣಿವಿನ ದುಡಿಮೆ ಸಿಟ್ಟಿನಿಂದ ಆರ್ಭಟಿಸುತ್ತಿದ್ದ ಮೋಡಗಳೆದುರು ಫಲ ಕೊಡಲಿಲ್ಲ. ಅವರ ಹತ್ತಿ, ತೊಗರಿ ಮತ್ತು ಕಬ್ಬಿನ ಬೆಳೆಗಳು ಮಣ್ಣುಪಾಲಾದವು. ಪರಿಣಾಮವಾಗಿ ಅವರಿಗೆ ಎದುರಾದ ನಷ್ಟ 3 ಲಕ್ಷ ರೂಪಾಯಿಗಳು. ಬೆಟ್ಟಗಳಿಂದ ಹರಿದುಬಂದ ನೀರಿನ ರಭಸಕ್ಕೆ ಅವರ ಹೊಲದ ಮೇಲ್ಭಾಗದ ಮಣ್ಣಿನ ಒಂದು ಪದರವನ್ನೇ ಕೊಚ್ಚಿಕೊಂಡು ಹೋಗಿತ್ತು. ಮತ್ತು ಈ ಮೂಲಕ ಅವರ ದುಡಿಮೆಯ ದಾರಿ ಅಪಾಯದಲ್ಲಿತ್ತು.

ಆದರೂ ಇದೀಗ ಅವರನ್ನು ಕಾಡುತ್ತಿರುವುದು ಈ ಬೆಳೆನಷ್ಟವನ್ನು ಹೇಗೆ ಭರಿಸುವುದು ಎನ್ನುವ ಚಿಂತೆಯಲ್ಲ. ನಗರೆ ಅವರನ್ನೀಗ ಕಾಡುತ್ತಿರುವುದು ಮಹಾರಾಷ್ಟ್ರದ ಪ್ರಸಿದ್ಧ ದೇವಸ್ಥಾನವೊಂದಕ್ಕೆ ನೀಡುವುದಾಗಿ ಹೇಳಿದ್ದ 1.7 ಲಕ್ಷ ರೂಪಾಯಿಗಳನ್ನು ಹೇಗೆ ಹೊಂದಿಸುವುದು ಎನ್ನುವುದು.

ಬೀಡ್ ಮತ್ತು ಅಹಿಲ್ಯಾನಗರ ಜಿಲ್ಲೆಗಳ ಗಡಿಯಲ್ಲಿರುವ ಸುಂದರವಾದ ಬೆಟ್ಟದ ಮೇಲಿರುವ ಭಗವಾನ್‌ಗಡ್ ಸಂಕೀರ್ಣವು, ರಾಜ್ಯದೆಲ್ಲೆಡೆಯ ಭಕ್ತರನ್ನು ಆಕರ್ಷಿಸುವ ದೊಡ್ಡ ಜಾಗ. ವಾರ್ಕರಿ ಸಂಪ್ರದಾಯದ ಪೂಜ್ಯ ಸಂತ ಭಗವಾನ್ ಬಾಬಾ ಅವರಿಗೆ ಸಮರ್ಪಿತವಾದ ಈ ದೇವಾಲಯಕ್ಕೆ ವಾರ್ಷಿಕ 15-20 ಲಕ್ಷದಷ್ಟು ಭಕ್ತರು ಭೇಟಿ ನೀಡುತ್ತಾರೆ. 1958ರಲ್ಲಿ, ಅವರು ಭಗವಾನ್‌ಗಡ್‌ ಪ್ರದೇಶದಲ್ಲಿ ವಿಠ್ಠಲನ ವಿಗ್ರಹವನ್ನು ಪ್ರತಿಷ್ಠಾಪಿಸಿದರು. ವಿವಿಧ ಸಮುದಾಯಗಳ ಜನರು ಭಗವಾನ್‌ಗಡ್‌ಗೆ ಭೇಟಿ ನೀಡುತ್ತಾರೆಯಾದರೂ, ಇಲ್ಲಿಗೆ ಆಗಮಿಸುವ ಪ್ರಮುಖ ಭಕ್ತರು ಪ್ರಬಲ ಓಬಿಸಿ ಜಾತಿಯಾದ ವಂಜಾರಿ ಸಮುದಾಯಕ್ಕೆ ಸೇರಿದವರು.

ಮಹಾರಾಷ್ಟ್ರದ ಮಾಜಿ ಉಪಮುಖ್ಯಮಂತ್ರಿ ಗೋಪಿನಾಥ್ ಮುಂಡೆ, ವಂಜಾರಿ ಸಮುದಾಯದ ರೈತರು ಮತ್ತು ಕಾರ್ಮಿಕರ ಬದುಕಿನಲ್ಲಿ ಆ ಸ್ಥಳಕ್ಕಿದ್ದ ಮಹತ್ವವನ್ನು ಗುರುತಿಸಿ, ಭಗವಾನ್‌ಗಡದಲ್ಲಿ ದಸರಾ ರ‍್ಯಾಲಿ ನಡೆಸುವ ಸಂಪ್ರದಾಯವನ್ನು ಪ್ರಾರಂಭಿಸಿದರು. ಕಾಲಕ್ರಮೇಣ, ಅವರ ಈ ರ‍್ಯಾಲಿಗಳು ಪ್ರಬಲವಾಗಿ ಬೆಳೆದು ಲಕ್ಷಾಂತರ ಭಕ್ತರನ್ನು ಆಕರ್ಷಿಸಿದವು. ಇದರ ಫಲವಾಗಿ, ಭಗವಾನ್‌ಗಡ್ ಧಾರ್ಮಿಕ ಯಾತ್ರಾಸ್ಥಳವಾಗಿದ್ದರೂ, ರಾಜಕೀಯ ಶಕ್ತಿಯ ಕೇಂದ್ರವಾಗಿಯೂ ಹೊರಹೊಮ್ಮಿತು.

ಪ್ರಸ್ತುತ ಭಗವಾನ್‌ಗಡದ ಮಹಂತರಾದ ನಾಮದೇವ್ ಶಾಸ್ತ್ರಿಯವರು, ಮಹಾರಾಷ್ಟ್ರದಾದ್ಯಂತ ಪೂಜಿಸಲ್ಪಡುವ 13ನೇ ಶತಮಾನದ ಕವಿ ಮತ್ತು ತತ್ವಜ್ಞಾನಿ-ಸಂತರಾದ ಜ್ಞಾನೇಶ್ವರರಿಗೆ ಸಮರ್ಪಿತವಾದ ಭವ್ಯ ದೇವಾಲಯವೊಂದನ್ನು ನಿರ್ಮಿಸಲು ನಿರ್ಧರಿಸಿದ್ದಾರೆ. ಇದರ ವೆಚ್ಚ 25 ಕೋಟಿ ರೂಪಾಯಿಗಳಿಗೂ ಅಧಿಕ ಎಂದು ಅಂದಾಜಿಸಲಾಗಿದೆ. ಇದರ ಉದ್ಘಾಟನೆಯನ್ನು ಅಲ್ಲಿನ ವಿಶಾಲ ಆವರಣದಲ್ಲಿ 2026ರ ದಸರಾ ಹಬ್ಬದ ಸಂದರ್ಭದಲ್ಲಿ ನಿಗದಿಪಡಿಸಲಾಗಿದೆ. ಮತ್ತು ಈ ಹಣವನ್ನು ಭಕ್ತರಿಂದ ಸಂಗ್ರಹಿಸಲಾಗುತ್ತಿದೆ, ಅವರಲ್ಲಿ ತಮ್ಮ ಮುಂದಿನ ಊಟದ ಕುರಿತು ಗ್ಯಾರಂಟಿ ಇಲ್ಲದ ಪರಿಸ್ಥಿತಿಯಲ್ಲಿ ಇರುವವರು ಸಹ ಇದ್ದಾರೆ.

ಬೀಡ್ ಜಿಲ್ಲೆಯ ಗೆವರಾಯಿ ತಾಲೂಕಿನಲ್ಲಿರುವ ನಗರೆಯವರ ಚಕ್ಲಂಬಾ ಗ್ರಾಮವು ಈ ದೇವಸ್ಥಾನದ ನಿರ್ಮಾಣಕ್ಕೆ 2.41 ಕೋಟಿ ರೂಪಾಯಿಗಳನ್ನು ಸಂಗ್ರಹಿಸುವುದಾಗಿ ಪ್ರತಿಜ್ಞೆ ಮಾಡಿದೆ. ಈ ಗ್ರಾಮದ 410 ಮನೆಗಳಿಂದ ಈ ಹಣವನ್ನು ಸಂಗ್ರಹಿಸಲಾಗುತ್ತಿದ್ದು, ಇಲ್ಲಿನ ಜನರಲ್ಲಿ ಹೆಚ್ಚಿನವರು ಬೇಸಾಯಗಾರರು, ಕೃಷಿ ಕೂಲಿಗಳು ಮತ್ತು ಕಬ್ಬು ಕಡಿಯುವ ಕೆಲಸಕ್ಕೆ ಹೋಗುವವರು. ನಾಮದೇವ್ ಶಾಸ್ತ್ರಿಯವರ ಉತ್ತರಾಧಿಕಾರಿಯಾಗಲಿರುವ ಕೃಷ್ಣ ಮಹಾರಾಜ್ ಅವರು ಮಾತನಾಡಿ, ಭಗವಾನ್ ಬಾಬಾ ಅವರು 1958ರಲ್ಲಿ ಭಗವಾನ್‌ಗಡ ದೇವಸ್ಥಾನವನ್ನು ಸ್ಥಾಪಿಸಿದರು. ಅಂದಿನಿಂದಲೂ ದೇಣಿಗೆ ಸಂಗ್ರಹಿಸುವ ಸುದೀರ್ಘ ಸಂಪ್ರದಾಯ ಚಾಲ್ತಿಯಲ್ಲಿದೆ ಎಂದರು. "ಆಗೆಲ್ಲ ಜನರ ಬಳಿ ಹಣವಿರುತ್ತಿರಲಿಲ್ಲ. ಹಣದ ಬದಲಿಗೆ ಅವರು ಧವಸ ಧಾನ್ಯವನ್ನು ನೀಡುತ್ತಿದ್ದರು. ಇಂದು ದೇಣಿಗೆ ನಗದು ರೂಪಕ್ಕೆ ಬದಲಾಗಿದೆ ಅಷ್ಟೇ."

ಈ ನಡುವೆ ನಗರೆ ಮತ್ತು ಇಡೀ ಚಕ್ಲಂಬಾ ಗ್ರಾಮವು ದೇವಾಲಯದ ನಿರ್ಮಾಣಕ್ಕಾಗಿ 2.41 ಕೋಟಿ ರೂಪಾಯಿಗಳಷ್ಟು ದೊಡ್ಡ ಮೊತ್ತವನ್ನು ದೇಣಿಗೆಯಾಗಿ ನೀಡುವುದಾಗಿ ಭರವಸೆ ನೀಡಿದಾಗ, ಮುಂದಿನ ಕೆಲವು ತಿಂಗಳುಗಳು ಹೇಗಿರಬಹುದೆನ್ನುವುದರ ಅರಿವು ಅವರಿಗಿರಲಿಲ್ಲ.

ಇತ್ತೀಚಿನ ದಿನಗಳಲ್ಲಿ ಮಹಾರಾಷ್ಟ್ರದಲ್ಲಿ ಭಾರೀ ಮಳೆಯಾಗಿದ್ದು, ಸೆಪ್ಟೆಂಬರ್ ಕೊನೆಯ ವಾರದ ವೇಳೆಗೆ, ಈ ಮಳೆಯಿಂದಾಗಿ 31 ಲಕ್ಷಕ್ಕೂ ಹೆಚ್ಚು ರೈತರು ಸುಮಾರು 18 ಲಕ್ಷ ಹೆಕ್ಟೇರ್‌ಗಳಷ್ಟು ಕೃಷಿ ಭೂಮಿಯಲ್ಲಿ ತೊಂದರೆಗೊಳಗಾಗಿದ್ದಾರೆ. ಸಾವಿರಾರು ಜನರು ಒಂದೇ ರಾತ್ರಿಯಲ್ಲಿ ತಮ್ಮ ಮನೆಗಳನ್ನು ಕಳೆದುಕೊಂಡಿದ್ದಾರೆ.

ಮಹಾರಾಷ್ಟ್ರ ಎದುರಿಸುತ್ತಿರುವ ಈ ದುರಂತಕ್ಕೆ ಚಕ್ಲಂಬಾ ಗ್ರಾಮವು ಹೊರತಾಗಿಲ್ಲ. ನಗರೆ ಅವರಂತಹ ರೈತರು ಈಗಾಗಲೇ ಸಾಲದ ಸುಳಿಯಲ್ಲಿರುವ ಭವಿಷ್ಯವನ್ನು ಎದುರು ನೋಡುತ್ತಿದ್ದಾರೆ. ರಾಜ್ಯ ಸರ್ಕಾರವು 2,215 ಕೋಟಿ ರೂಪಾಯಿಗಳ ಪರಿಹಾರದ ಪ್ಯಾಕೇಜ್ ಘೋಷಿಸಿದೆ, ಆದರೆ ವಾಸ್ತವದಲ್ಲಿ ಆಗಿರುವ ನಷ್ಟ ಅದಕ್ಕಿಂತ ಬಹಳಷ್ಟು ಹೆಚ್ಚಿದೆ. ಆ ಮೊತ್ತವನ್ನು ಸಂತ್ರಸ್ತ ರೈತರಿಗೆ ಹಂಚಿದರೆ, ಪ್ರತಿ ರೈತನಿಗೆ ಕೇವಲ 7,000 ರೂಪಾಯಿಗಳಿಗೆ ಬಂದು ನಿಲ್ಲುತ್ತದೆ.

ನಂತರ, ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ರೈತರಿಗೆ 31,000 ಕೋಟಿ ರೂಪಾಯಿಗಳಿಗೂ ಹೆಚ್ಚು ನೆರವು ನೀಡುವುದಾಗಿ ಘೋಷಿಸಿದರು. ಆದರೆ, ರೈತ ಹೋರಾಟಗಾರ ಅಜಿತ್ ನವಲೆ, ಫಡ್ನವೀಸ್ ಈಗಾಗಲೇ ಬೇರೆ ಯೋಜನೆಗಳ ಅಡಿಯಲ್ಲಿ ರೈತರಿಗೆ ಹಂಚಿಕೆ ಮಾಡಲಾದ ಹಣವನ್ನೂ ಸುಳ್ಳು ಲೆಕ್ಕದಲ್ಲಿ ಸೇರಿಸಿದ್ದಾರೆ ಮತ್ತು ವಾಸ್ತವಿಕ ನೆರವು ಕೇವಲ 6,500 ಕೋಟಿ ರೂಪಾಯಿಗಳು ಮಾತ್ರ ಎಂದು ಬೆಟ್ಟು ಮಾಡಿ ತೋರಿಸಿದರು.

ಇದೆಲ್ಲದರ ನಡುವೆಯೂ, ಗ್ರಾಮಸ್ಥರು ಭಗವಾನ್‌ಗಡ್‌ ಕ್ಷೇತ್ರಕ್ಕೆ ನೀಡಿದ ತಮ್ಮ ಭರವಸೆಯನ್ನು ಈಡೇರಿಸಲು ದೃಢಸಂಕಲ್ಪ ಮಾಡಿದ್ದಾರೆ. ಇದಕ್ಕೆ ಅವರಿಗೆ ಕೇವಲ ಒಂದೂ ಚಿಲ್ಲರೆ ವರ್ಷಕ್ಕೂ ಹೆಚ್ಚಿನ ಸಮಯವಿದೆ. "ಆ ಹಣ ಒಟ್ಟು ಮಾಡಲು ನನಗೆ ಸಮಯವಿದೆ" ಎಂದು ನಗರೆ ಹೇಳುತ್ತಾರೆ. "ಹಣವನ್ನು ಉಳಿಸಿ ನನ್ನ ಮಾತನ್ನು ಉಳಿಸಿಕೊಳ್ಳುತ್ತೇನೆ. ಮಾತು ಕೊಟ್ಟಿದ್ದೇನೆ, ಅದರಿಂದ ಹಿಂದೆ ಸರಿಯುವುದು ಸಾಧ್ಯವಿಲ್ಲ."

ಚಕ್ಲಂಬಾ ಗ್ರಾಮವು, ಪ್ರತಿ ತಿಂಗಳು ಭಗವಾನ್‌ಗಡ್‌ ಕ್ಷೇತ್ರಕ್ಕೆ ಒಂದು ಟ್ರಕ್ಕಿನಷ್ಟು ಭಕ್ರಿಗಳನ್ನು (ರೊಟ್ಟಿ) ಕಳುಹಿಸುವ 60-70 ಹಳ್ಳಿಗಳಲ್ಲಿ ಒಂದು. "ಭಗವಾನ್‌ಗಡ್‌ ಕ್ಷೇತ್ರದಲ್ಲಿ ಪ್ರತಿ ದಿನ ಕನಿಷ್ಠ 3,500 ಭಕ್ತರಿಗೆ ಊಟ ಬಡಿಸಲು ಇದನ್ನು ಬಳಸಲಾಗುತ್ತದೆ" ಎಂದು ಕೃಷ್ಣ ಮಹಾರಾಜ್ ಹೇಳುತ್ತಾರೆ.

ಇದರ ಜೊತೆಗೆ, ಭಗವಾನ್‌ಗಡ್ ಕ್ಷೇತ್ರ ಎರಡು ಶಾಲೆಗಳನ್ನು ಸಹ ನಡೆಸುತ್ತಿದೆ. ಜಾತಿ ಮತ್ತು ಧರ್ಮವನ್ನು ಲೆಕ್ಕಿಸದೆ 100ಕ್ಕೂ ಹೆಚ್ಚು ಬಡ ಮಕ್ಕಳ ಶಿಕ್ಷಣವನ್ನು ನೋಡಿಕೊಳ್ಳುತ್ತಿದೆ ಎಂದು ಅವರು ಹೇಳುತ್ತಾರೆ. ಆ ಮಕ್ಕಳಲ್ಲಿ ಸುಮಾರು 30 ವಿದ್ಯಾರ್ಥಿಗಳು ಭಗವಾನ್‌ಗಡದಲ್ಲಿರುವ ಹಾಸ್ಟೆಲ್ಲಿನಲ್ಲಿ ಉಳಿದುಕೊಂಡಿದ್ದಾರೆ. "ಇದು ಬ್ರಹ್ಮಚರ್ಯ ಪಾಲಿಸುವ ಸ್ಥಳವಾಗಿರುವುದರಿಂದ" ಇಲ್ಲಿ ಉಳಿದುಕೊಂಡಿರುವವರೆಲ್ಲರೂ ಹುಡುಗರು ಎಂದು ಅವರು ಹೇಳುತ್ತಾರೆ.

ಮಹಾರಾಷ್ಟ್ರವು ಶಿರಡಿ ಅಥವಾ ಪಂಢರಪುರದಂತಹ ಪ್ರಸಿದ್ಧ ದೇವಾಲಯಗಳಿಗೆ ಹೆಸರುವಾಸಿಯಾಗಿದ್ದು, ಈ ಎರಡರ ನಡುವೆ ವಾರ್ಷಿಕವಾಗಿ ಸುಮಾರು 40 ಮಿಲಿಯನ್ ಭಕ್ತರು ಭೇಟಿ ನೀಡುತ್ತಾರೆ. ಜೊತೆಗೆ ಇತ್ತೀಚಿನ ವರ್ಷಗಳಲ್ಲಿ, ರಾಜ್ಯದ ಹೊರಗೆ ತುಲನಾತ್ಮಕವಾಗಿ ಕಡಿಮೆ ಪ್ರಸಿದ್ಧವಾಗಿರುವ ಯಾತ್ರಾ ಕೇಂದ್ರಗಳು ಸಹ ಅಪಾರ ಸಂಖ್ಯೆಯ ಜನಸಮೂಹವನ್ನು ಆಕರ್ಷಿಸುತ್ತಿವೆ. ಈ ಕೇಂದ್ರಗಳಲ್ಲಿನ ಜನರು ಕಾಲಾನಂತರದಲ್ಲಿ ತಮ್ಮ ಸ್ಥಳೀಯ ದೇವಾಲಯದ ಟ್ರಸ್ಟ್‌ಗಳೊಂದಿಗೆ ಬಲವಾದ ಸಂಬಂಧವನ್ನು ಬೆಳೆಸಿಕೊಂಡಿದ್ದಾರೆ ಮತ್ತು ಧಾರ್ಮಿಕ ಪೀಠದಲ್ಲಿ ಯಾರಿದ್ದರೂ ಅವರ ನಿಷ್ಠೆ ಬದಲಾಗುವುದಿಲ್ಲ. ದುರದೃಷ್ಟವಶಾತ್, ಸ್ಥಳೀಯರಿಂದ, ದೇವಾಲಯದ ಟ್ರಸ್ಟುಗಳು ತಮ್ಮ ಭಕ್ತರಿಂದ ಹೆಚ್ಚು ಹೆಚ್ಚು ಹಣವನ್ನು ಸಂಗ್ರಹಿಸಲು ಪ್ರಾರಂಭಿಸಿವೆ, ಭವಿಷ್ಯದಲ್ಲಿ ಉತ್ತಮ ಬದುಕನ್ನು ನೀಡುವುದಾಗಿ ಭರವಸೆ ನೀಡುತ್ತಿವೆ.

ಸೆಪ್ಟೆಂಬರ್‌ ತಿಂಗಳ ಕೊನೆಯ ವಾರದಲ್ಲಿ, ಕಾರ್ಯಾರಂಭ ಎನ್ನುವ ಮರಾಠಿ ಪ್ರಾದೇಶಿಕ ಪತ್ರಿಕೆ ಸಂಕಷ್ಟದಲ್ಲಿರುವ ರೈತರಿಗೆ ದೇವಾಲಯದ ಟ್ರಸ್ಟ್‌ಗಳು ಮತ್ತು ಯಾತ್ರಾಸ್ಥಳಗಳಿಂದ ಸಹಾಯ ಮಾಡದಿರುವ ಬಗ್ಗೆ ಕಳವಳ ವ್ಯಕ್ತಪಡಿಸಿತು. ರೈತರು ಮತ್ತು ಕೂಲಿ ಕಾರ್ಮಿಕರು ಧಾರ್ಮಿಕ ಕಾರ್ಯಕ್ರಮಗಳು, ಹಬ್ಬಗಳು ಮತ್ತು ದೇವಾಲಯಗಳಿಗೆ ದೇಣಿಗೆಗಳನ್ನು ನೀಡುತ್ತಾರೆ ಎಂದು ಪತ್ರಿಕೆ ಪ್ರತಿಪಾದಿಸಿತು. ಪ್ರಸ್ತುತ ಪ್ರವಾಹದಿಂದ ರೈತರು ಕಂಗೆಟ್ಟಿದ್ದು ಈ ಧಾರ್ಮಿಕ ಸಂಸ್ಥೆಗಳು ಮುಂದೆ ಬಂದು ಸಹಾಯ ಒದಗಿಸಬೇಕು ಎಂದು ಅದು ಹೇಳಿದೆ.

ಶಿರಡಿ ಮತ್ತು ತುಳಜಾ ಭವಾನಿಯಂತಹ ದೇವಸ್ಥಾನಗಳು ಪ್ರವಾಹ ಪರಿಹಾರಕ್ಕಾಗಿ ತಲಾ 1 ಕೋಟಿ ರೂಪಾಯಿ ದೇಣಿಗೆ ನೀಡಿವೆ. ಈ ಮೊತ್ತವು, ಆ ದೇವಾಲಯಗಳು ವಾರ್ಷಿಕವಾಗಿ ಗಳಿಸುವ ಆದಾಯಕ್ಕೆ ಹೋಲಿಸಿದರೆ ತೀರಾ ಕಡಿಮೆ.

ಭಗವಾನ್​ಗಡದ 100 ಕಿಲೋಮೀಟರ್ ವ್ಯಾಪ್ತಿಯೊಳಗೆ ಎರಡು ಜನಪ್ರಿಯ ಯಾತ್ರಾ ಕೇಂದ್ರಗಳಿವೆ , ಅವುಗಳೆಂದರೆ ದೇವಗಡ ಮತ್ತು ಸರಳಾ ಬೆಟ್. ಈ ಕೇಂದ್ರಗಳ ನೇತೃತ್ವವನ್ನು ಪ್ರಸ್ತುತ ಕ್ರಮವಾಗಿ ಭಾಸ್ಕರಗಿರಿ ಮಹಾರಾಜ್ ಮತ್ತು ರಾಮಗಿರಿ ಮಹಾರಾಜ್ ವಹಿಸಿಕೊಂಡಿದ್ದಾರೆ.

2024ರ ಆಗಸ್ಟ್ ತಿಂಗಳಿನಲ್ಲಿ, ಪ್ರವಾದಿ ಮೊಹಮ್ಮದ್ ವಿರುದ್ಧ ಅವಹೇಳನಕಾರಿ ಹೇಳಿಕೆ ನೀಡಿದ ಆರೋಪದ ಮೇಲೆ ರಾಮಗಿರಿ ಮಹಾರಾಜ್ ಅವರ ವಿರುದ್ಧ ಪೊಲೀಸರು ಎಫ್‌ಐಆರ್ ದಾಖಲಿಸಿದ್ದರು. ಈ ಘಟನೆಯು ರಾಮಗಿರಿ ನೆಲೆಸಿರುವ ಅಹ್ಮದ್‌ನಗರ (ಈಗ ಅಹಿಲ್ಯಾನಗರ) ಜಿಲ್ಲೆಯ ಶ್ರೀರಾಮಪುರ ಪಟ್ಟಣದಲ್ಲಿ ಗಲಭೆಯಂತಹ ಪರಿಸ್ಥಿತಿಯನ್ನು ಸೃಷ್ಟಿಸಿತ್ತು. ಆದರೂ, ಸರಳಾ ಬೆಟ್ ಯಾತ್ರಾಸ್ಥಳದಲ್ಲಿ ಅನೇಕ ಭಕ್ತರು ಪೂಜೆ ಸಲ್ಲಿಸುವುದರಿಂದ, ಅದೇ ರಾಮಗಿರಿ ಮಹಾರಾಜ್ ಇಂದಿಗೂ ಗ್ರಾಮಸ್ಥರು ತಮ್ಮ ಸ್ವಂತ ಹಣದಿಂದ ಆಯೋಜಿಸುವ ಅನ್ನ ಸಂತರ್ಪಣೆ ಕಾರ್ಯಕ್ರಮಗಳಿಗೆ ಆಹ್ವಾನಿಸಲ್ಪಡುತ್ತಿದ್ದಾರೆ.

ಕಳೆದ 10 ವರ್ಷಗಳಿಂದ, ಅಹಿಲ್ಯಾನಗರದ ತಾಲ್ಲೂಕಿನ ಭಾಸ್ಕರಗಿರಿ ಮಹಾರಾಜರ ಅನುಯಾಯಿಗಳು ಪ್ರತಿ ಹಳ್ಳಿಯಲ್ಲಿ ದೇವಾಲಯಗಳನ್ನು ನಿರ್ಮಿಸುವ ಅಭಿಯಾನವನ್ನು ನಡೆಸುತ್ತಿದ್ದಾರೆ. ಇದಕ್ಕೆ ಹಣ ಗ್ರಾಮಸ್ಥರು ಮತ್ತು ಗ್ರಾಮ ಪಂಚಾಯಿತಿಯಿಂದ ಬರುತ್ತದೆ. ನಿಧಿಸಂಗ್ರಹಣೆ ವಾಟ್ಸಾಪ್ ಮೂಲಕ ನಡೆಯುತ್ತದೆ.

ನೇವಾಸಾ ಪಟ್ಟಣದ ಅಂಗಡಿಗಳು ಮತ್ತು ಮನೆಗಳಲ್ಲಿ ಭಾಸ್ಕರಗಿರಿಯವರ ಮಾಲೆ ಹಾಕಿದ ಭಾವಚಿತ್ರಗಳನ್ನು ಕಾಣಬಹುದು. ಇಲ್ಲಿನ ಪ್ರತಿಯೊಂದು ಗ್ರಾಮದಲ್ಲೂ ಅವರ ಗೌರವಾರ್ಥವಾಗಿ ಭಜನೆ ಮತ್ತು ಸ್ತೋತ್ರಗಳನ್ನು ಹಾಡಲು 30-40 ಜನರನ್ನೊಳಗೊಂಡ ಸಮಿತಿ ಇರುತ್ತದೆ. "ಹಬ್ಬಗಳ ಸಮಯದಲ್ಲಿ, ಭಾಸ್ಕರಗಿರಿ ಮಹಾರಾಜ್ ಅವರೇ ಗ್ರಾಮಗಳ ಮೂಲಕ ಪ್ರಯಾಣಿಸಿ, ಧರ್ಮದ ಬಗ್ಗೆ ಜಾಗೃತಿ ಮೂಡಿಸಲು ಭಕ್ತಿಗೀತೆಗಳನ್ನು ಹಾಡುತ್ತಾರೆ" ಎಂದು ನೇವಾಸಾದ ಸೌಂದಾಳ ಗ್ರಾಮದ ಸಮಿತಿಯ ಸದಸ್ಯರಲ್ಲಿ ಒಬ್ಬರಾದ 47 ವರ್ಷದ ರಾಮದಾಸ್ ವಕ್ಚೌರೆ ಹೇಳುತ್ತಾರೆ.

2024ರ ಮಹಾರಾಷ್ಟ್ರದ ವಿಧಾನಸಭಾ ಚುನಾವಣೆಗೂ ಸ್ವಲ್ಪ ಮುಂಚೆ, ಭಾಸ್ಕರಗಿರಿ ಮಹಾರಾಜ್ ತನ್ನ ಅನುಯಾಯಿಗಳಿಗೆ "ಧರ್ಮಕ್ಕಾಗಿ ಮತ ಚಲಾಯಿಸಿ" ಎಂದು ಕರೆ ನೀಡಿದ್ದರು. ಈ ಹೇಳಿಕೆ ಅಭ್ಯರ್ಥಿಗಳ ರಾಜಕೀಯ ಭವಿಷ್ಯವನ್ನು ರಾತ್ರೋರಾತ್ರಿ ಬದಲಾಯಿಸಿತು ಎಂದು ಹೇಳಲಾಗುತ್ತದೆ. ಅಹಿಲ್ಯಾನಗರ ಜಿಲ್ಲೆಯ ಜನಸಂಖ್ಯೆಯಲ್ಲಿ ಮುಸ್ಲಿಮರು ಸುಮಾರು 7 ಪ್ರತಿಶತದಷ್ಟಿದ್ದಾರೆ.

ಅನುಯಾಯಿಗಳು ನೇವಾಸಾ ತಾಲ್ಲೂಕಿನ ಪ್ರತಿ ಗ್ರಾಮದಲ್ಲಿ ಕನಿಷ್ಠ ನಾಲ್ಕು ವಿವಿಧ ಹಿಂದೂ ದೇವರುಗಳಿಗೆ ಸಮರ್ಪಿತವಾದ ದೇವಾಲಯ ಇರುವಂತೆ ನೋಡಿಕೊಳ್ಳುತ್ತಿದ್ದಾರೆ ಎಂದು ವಕ್ಚೌರೆ ಹೇಳುತ್ತಾರೆ. "ಪದೇ ಪದೇ ಜನರಿಗೆ ದೇಣಿಗೆ ನೀಡುವ ಕಷ್ಟ ಕೊಡಬಾರದೆನ್ನುವ ಕಾರಣಕ್ಕಾಗಿ ಸುಮಾರು ಎರಡು ವರ್ಷಗಳಿಗೊಮ್ಮೆ ದೇವಸ್ಥಾನ ಕಟ್ಟಿಸಲಾಗುತ್ತದೆ" ಎಂದು ಅವರು ವಿವರಿಸುತ್ತಾರೆ.

ನೇವಾಸಾ ತಾಲ್ಲೂಕು 127 ಹಳ್ಳಿಗಳನ್ನು ಹೊಂದಿದೆ. ಪ್ರತಿ ಹಳ್ಳಿಗೆ ನಾಲ್ಕು ದೇವಾಲಯಗಳಂತೆ ಲೆಕ್ಕ ಹಾಕಿದರೆ, ಭಾಸ್ಕರಗಿರಿ ಮಹಾರಾಜ್ ಅವರ ಅನುಯಾಯಿಗಳು ಕೇವಲ 10 ವರ್ಷಗಳಲ್ಲಿ ಆ ಒಂದು ತಾಲ್ಲೂಕಿನಲ್ಲಿ ಸುಮಾರು 500 ದೇವಾಲಯಗಳನ್ನು ನಿರ್ಮಿಸಿದ್ದಾರೆ. "ಒಂದು ದೇವಾಲಯದ ನಿರ್ಮಾಣ ವೆಚ್ಚ ಸುಮಾರು ₹10 ಲಕ್ಷ" ಎಂದು ವಕ್ಚೌರೆ ಮಾಹಿತಿ ನೀಡಿದರು.

ಬೇರೆ ರೀತಿಯಲ್ಲಿ ಹೇಳುವುದಾದರೆ, ಸಾಮಾನ್ಯವಾಗಿ ಕೃಷಿ ಬಿಕ್ಕಟ್ಟು, ಕಳಪೆ ಆರೋಗ್ಯ ರಕ್ಷಣೆ ಮತ್ತು ಶಿಕ್ಷಣ ಸೌಲಭ್ಯಗಳ ಕೊರತೆಯೊಂದಿಗೆ ಹೋರಾಡುತ್ತಿರುವ ನೇವಾಸಾದ ಜನರು, ತಮ್ಮ ಊರುಗಳಲ್ಲಿ ಸಣ್ಣ ದೇವಾಲಯಗಳ ನಿರ್ಮಾಣ ಮಾಡುವುದಕ್ಕಾಗಿ 50 ರೂಪಾಯಿಗಳನ್ನು ಕೋಟಿ ಖರ್ಚು ಮಾಡಿದ್ದಾರೆ. "ದೇವರ ಕಾರ್ಯಕ್ಕೆಂದರೆ ಯಾರೂ ಹಣ ನೀಡಲು ನಿರಾಕರಿಸುವುದಿಲ್ಲ" ಎಂದು ವಕ್ಚೌರೆ ದೃಢವಾಗಿ ಹೇಳುತ್ತಾರೆ.

ಆದರೆ ಖಾಸಗಿಯಾಗಿ ರೈತರು ಮತ್ತು ಕಾರ್ಮಿಕರು ಬೇರೆಯದೇ ಸಂಗತಿಯನ್ನು ಬಹಿರಂಗಪಡಿಸುತ್ತಾರೆ. ಅವರ ಭಕ್ತಿಯೆನ್ನುವುದು ಅಚಲವಾದರೂ, ದೇಣಿಗೆಯ ವಿಷಯ ಎಷ್ಟೋ ಸಲ ಸಾಮಾಜಿಕ ಒತ್ತಡಕ್ಕೆ ಕಾರಣವಾಗುತ್ತದೆ. ಅನಾಮಧೇಯತೆಯ ಷರತ್ತಿನೊಂದಿಗೆ ನಮ್ಮೊಂದಿಗೆ ಮಾತನಾಡಿದ ಕೆಲವರು, “ಇಲ್ಲ ಅನ್ನೋದಕ್ಕೆ ಆಗೋದಿಲ್ಲ” ಅಥವಾ “ಕೊಡುವುದಿಲ್ಲ ಎನ್ನುವುದು ಚೆನ್ನಾಗಿರುವುದಿಲ್ಲ ಅಥವಾ “ಕೊಡದೆ ಹೋದರೆ ಊರಿನ ಇತರರು ನಮ್ಮನ್ನು ದೂರವಿಡಬಹುದು” ಎನ್ನುವ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದರು.

ಆದರೂ, ಈ ಪ್ರವೃತ್ತಿಯು ದೂರಗಾಮಿ ಪರಿಣಾಮಗಳನ್ನು ಹೊಂದಿದೆ.

ಹೆಚ್ಚು ಗಮನಕ್ಕೆ ಬಾರದ ದೂರದ ದುರ್ಗಮ ಹಳ್ಳಿಗಳಲ್ಲಿ, ಸಣ್ಣ ಮಟ್ಟದ ದೇವಮಾನವರ ಸಂಖ್ಯೆ ಹೆಚ್ಚುತ್ತಿದೆ. ಇವರು ಉತ್ತಮ ಭವಿಷ್ಯದ ಭರವಸೆ ನೀಡಿ ಜನರಿಂದ ಹಣ ಸುಲಿಗೆ ಮಾಡುತ್ತಿದ್ದಾರೆ. ಪ್ರಸ್ತುತ ಇದೊಂದು ಯಶಸ್ವಿ ವ್ಯಾಪಾರ ಮಾದರಿಯಾಗಿ ಮಾರ್ಪಟ್ಟಿದೆ.

ನಾಮದೇವ ಶಾಸ್ತ್ರಿಯ ಜನಪ್ರಿಯತೆ ಬೇರೆಯೇ ಮಟ್ಟದಲ್ಲಿದೆ. ಅವರ ಯೂಟ್ಯೂಬ್ ಚಾನೆಲ್—ಕಾಲು ಮಿಲಿಯನ್‌ಗಿಂತಲೂ (2.5 ಲಕ್ಷ) ಹೆಚ್ಚು ಚಂದಾದಾರರೊಂದಿಗೆ—ಅವರು ಸ್ವಿಟ್ಜರ್ಲೆಂಡ್‌ನಲ್ಲಿ ಹೆಲಿಕಾಪ್ಟರ್‌ನಲ್ಲಿ ಪ್ರಯಾಣಿಸುತ್ತಿರುವ ಅಂದವಾಗಿ ಸಂಪಾದಿಸಿದ ವೀಡಿಯೊವನ್ನು ಸಹ ಹೊಂದಿದೆ . 2024ರ ವಿಧಾನಸಭಾ ಚುನಾವಣೆಗೂ ಮುನ್ನ, ಅವರು ಮಹಾಯುತಿ ಅಭ್ಯರ್ಥಿ ಧನಂಜಯ್ ಮುಂಡೆಯವರನ್ನು ಬೆಂಬಲಿಸಿದ್ದರು, ಇದು ಮುಂಡೆಯವರ ಗೆಲುವಿನ ಹಿಂದಿನ ನಿರ್ಣಾಯಕ ಅಂಶವೆಂದು ವ್ಯಾಪಕವಾಗಿ ಪರಿಗಣಿಸಲ್ಪಟ್ಟಿದೆ. ಆದರೆ ಭಗವಾನ್​ಗಡದ ಭಕ್ತರ ಪಾಲಿಗೆ ಅದೆಲ್ಲ ಮುಖ್ಯ ವಿಷಯವಲ್ಲ. ಅವರ ಪ್ರಕಾರ ನಾಮದೇವ ಶಾಸ್ತ್ರಿಯೆಂದರೆ ದಾರಿ ತೋರಿಸುವ ಗುರು.

ವಂಜಾರಿ ಸಮುದಾಯಕ್ಕೆ ಸೇರಿದವರಾದ 48 ವರ್ಷದ ನಾನಾಬಾಯಿ ಉಗಲಮುಗಲೆ ಅವರ ಪತಿ 50 ವರ್ಷದ ಶಿವಾಜಿ, ಇಬ್ಬರೂ ಚಕ್ಲಂಬಾ ಗ್ರಾಮದವರು. ಇವರು ಕಬ್ಬಿನ ಗದ್ದೆಗಳಲ್ಲಿ ಕೆಲಸ ಹುಡುಕಿಕೊಂಡು ವಲಸೆ ಹೋಗುತ್ತಾರೆ. ಮರಾಠವಾಡಾ ಪ್ರಾಂತ್ಯದ ಈ ದಂಪತಿ ಕೇವಲ 50,000 ರೂಪಾಯಿಯಷ್ಟು ಸಣ್ಣ ಮೊತ್ತದ ಸಂಪಾದನೆಗಾಗಿ ಪಶ್ಚಿಮ ಮಹಾರಾಷ್ಟ್ರ ಅಥವಾ ಕರ್ನಾಟಕಕ್ಕೆ ವಲಸೆ ಹೋಗುತ್ತಾರೆ. ಅಲ್ಲಿ ಕೆಲಸದ ಸ್ಥಳಗಳು ಭೀಕರವಾಗಿರುತ್ತವೆ. ಇವರು ಜೀತದಾಳುಗಳಾಗಿ ಇಲ್ಲಿ ದುಡಿಯುತ್ತಾರೆ. ಅವರ ಮಕ್ಕಳೂ ಇದೇ ಕೆಲಸ ಮಾಡುತ್ತಾರೆ. "ನಮ್ಮ ಮಕ್ಕಳನ್ನು ಓದಿಸಬಹುದಾದಷ್ಟು ಹಣ ಯಾವತ್ತೂ ಇದ್ದಿರಲಿಲ್ಲ" ಎಂದು ಶಿವಾಜಿ ಹೇಳುತ್ತಾರೆ.

ಈ ದಂಪತಿಯೂ ಭಗವಾನಗಡ ದೇವಸ್ಥಾನಕ್ಕೆ 1 ಲಕ್ಷ ರೂಪಾಯಿ ದೇಣಿಗೆ ನೀಡುವುದಾಗಿ ಒಪ್ಪಿಕೊಂಡಿದ್ದಾರೆ. ಇದು ಅವರ ವಾರ್ಷಿಕ ಆದಾಯವನ್ನೂ ಮೀರಿದ ಮೊತ್ತ.

"ಯಾತ್ರಾಸ್ಥಳ ನಮ್ಮ ಪಾಲಿಗೆ ಮಕ್ಕಳಿದ್ದಂತೆ" ಎಂದು ಶಿವಾಜಿ ಹೇಳುತ್ತಾರೆ. "ನಮಗೆ ಕಾಲಿಗೆ ಚಪ್ಪಲಿ ಇಲ್ಲದಿದ್ದರೂ ಅಥವಾ ತಲೆಯ ಮೇಲೆ ಸೂರಿಲ್ಲದಿದ್ದರೂ, ದೇವಾಲಯಕ್ಕಾಗಿ ನಮ್ಮಿಂದ ಏನು ಸಾಧ್ಯವೋ ಅದೆಲ್ಲವನ್ನೂ ಮಾಡುತ್ತೇವೆ. ಭಕ್ತಿ ನಮ್ಮ ಬದುಕಿನ ರೀತಿ. ನಮ್ಮನ್ನು ಬೆಳೆಸಿರುವ ರೀತಿಯೇ ಅಂತಹದ್ದು."

ಚಕ್ಲಾಂಬಾದಲ್ಲಿನ ತಮ್ಮ ಒಂಟಿ ಕೋಣೆಯ ಮನೆಯ ಹೊರಗೆ ಕುಳಿತು ನಮ್ಮೊಂದಿಗೆ ಮಾತನಾಡುತ್ತಿದ್ದ ನಾನಾಬಾಯಿ, ಕಠಿಣ ಕೆಲಸದ ಪರಿಣಾಮವಾಗಿ ಕೀಲು ನೋವು ಮತ್ತು ಮೊಣಕಾಲು ನೋವಿನಿಂದ ಬಳಲುತ್ತಿದ್ದರು. ಪತಿಯ ಮಾತಿಗೆ ಸಹಮತ ವ್ಯಕ್ತಪಡಿಸಿದ ಅವರು, "ನಮ್ಮಲ್ಲಿ ಏಣಾದರೂ ಚೂರುಪಾರು ಇದೆಯೆಂದರೆ ಅದಕ್ಕೆ ಕಾರಣ ಭಗವಾನ್‌ಗಡ ಮತ್ತು ನಾಮದೇವ್‌ ಶಾಸ್ತ್ರಿಗಳು. ಎಲ್ಲವನ್ನೂ ಕೊಟ್ಟಿದ್ದು ಅವರು. ಅವರಿಗೆ ಏನಾದರೂ ಕೊಡುವಾಗ ನಾವು ಎರಡನೇ ಯೋಚನೆ ಮಾಡಬಾರದು. ಪ್ರಶ್ನೆಗಳನ್ನು ಕೇಳಬಾರದು" ಎಂದರು.

ಚಕ್ಲಂಬಾದ ಜನರು ಮಳೆಗಾಲ ಆರಂಭವಾಗುವುದಕ್ಕೂ ನಾಮದೇವ ಶಾಸ್ತ್ರಿ ಕಾರಣ ಎನ್ನುತ್ತಾರೆ. ಊರಿನ ವಲಸೆ ಕಬ್ಬು ಕಾರ್ಮಿಕರಾದ ಭಾವುಸಾಹೇಬ್‌ ಥೋರೆ ಹೇಳುವಂತೆ, "ಅವರು ನಮ್ಮ ಊರಿನ ಕಾರ್ಯಕ್ರಮವೊಂದಕ್ಕೆ ಬರುವ ತನಕ ಇಲ್ಲಿ ಒಂದು ಹನಿಯೂ ಮಳೆಯಾಗಿರಲಿಲ್ಲ. ಅವರು ಇಲ್ಲಿಗೆ ಕಾಲಿಟ್ಟ ತಕ್ಷಣ ಮಳೆ ಶುರುವಾಯಿತು."

ಆದರೆ, ಮಳೆ ಶುರುವಾದ ನಂತರ ನಿಲ್ಲದೆ 30 ಜಿಲ್ಲೆಗಳನ್ನು ನಾಶ ಮಾಡಿ, ಪ್ರಾಣಹಾನಿ ಮತ್ತು ಜೀವನೋಪಾಯಕ್ಕೆ ಗಂಭೀರ ನಷ್ಟವನ್ನು ಉಂಟುಮಾಡಿತು ಎನ್ನುವುದು ಮತ್ತೊಂದು ವಿಚಾರ. ಅದಕ್ಕೂ ಸಹ ಭಾವುಸಾಹೇಬ್ ಒಂದು ಪ್ರತ್ಯುತ್ತರವನ್ನು ನೀಡಿದರು: "ಕನಿಷ್ಠ ನಮ್ಮ ಕುಡಿಯುವ ನೀರಿನ ಚಿಂತೆಯಾದರೂ ದೂರವಾಗಿದೆ, ಮತ್ತು ಇದರಿಂದ ನಮಗೆ ಚಳಿಗಾಲದ ಬೆಳೆಗೆ ನೀರು ಸಿಗುತ್ತದೆ."

ಭಾವುಸಾಹೇಬ್ ದೇವಾಲಯ ನಿರ್ಮಾಣಕ್ಕಾಗಿ ರೂಪಾಯಿ 1.25 ಲಕ್ಷ ದೇಣಿಗೆ ನೀಡುವುದಾಗಿ ಭರವಸೆ ನೀಡಿದ್ದಾರೆ. ಅವರ ಬಳಿ ಕೃಷಿ ಭೂಮಿಯಿಲ್ಲ, ಮತ್ತು ಅವರು ತಿಂಗಳಿಗೆ 1,500 ರೂಪಾಯಿ ಬಾಡಿಗೆ ಪಾವತಿಸಿ ಒಂದು ಕೋಣೆಯ ಮನೆಯಲ್ಲಿ ವಾಸಿಸುತ್ತಿದ್ದಾರೆ . "ದೇವಾಲಯಕ್ಕೆ ಕೊಡುಗೆ ನೀಡುವುದು ಒಂದು ಗೌರವ. ಇಂತಹ ಅವಕಾಶ ಮುಂದಿನ ಮೂರು ತಲೆಮಾರುಗಳಲ್ಲಿ ನಮಗೆ ಸಿಗುವುದಿಲ್ಲ" ಎಂದು ಅವರು ಹೇಳುತ್ತಾರೆ. "ಒಂದೂವರೆ ವರ್ಷದೊಳಗೆ ಸಮಯ ಬಂದಾಗ, ನಾವು ಹಣವನ್ನು ಬಾಬಾರ ಪಾದಗಳ ಬಳಿ ಇಡುತ್ತೇವೆ."

ದೇವಸ್ಥಾನ ನಿರ್ಮಾಣವಾದ ನಂತರ ಅದು ನಮ್ಮ ಹೆಮ್ಮೆಯ ಪ್ರತೀಕವಾಗುತ್ತದೆ ಎನ್ನುತ್ತಾರೆ ಭಾವುಸಾಹೇಬ್.‌ "ಒಂದಷ್ಟು ವರ್ಷಗಳ ನಂತರ ನಾವು ಇರುವುದಿಲ್ಲ. ಆದರೆ ದೇವಸ್ಥಾನ ಇರುತ್ತದೆ. ಮತ್ತು ಅದರಲ್ಲಿ ನಮ್ಮದೊಂದು ಸಣ್ಣ ಭಾಗವೂ ಇರುತ್ತದೆ" ಎಂದು ಅವರು ಹೇಳುತ್ತಾರೆ.

ಅನುವಾದ: ಶಂಕರ. ಎನ್. ಕೆಂಚನೂರು