करजा मं बूड़े, दान अऊ भक्ति

ये कहिनी पुलित्जर सेंटर के मदद ले लिखे पार्थ एम. एन. के श्रृंखला के कड़ी आय

बरसा के पहिली करे गे ओकर संकल्प 53 बछर के देउराव नागरे ला चिंता मं डारत जावत हवय.

वो ह सितंबर के महीना मं माड़ी तक पानी मं रहिके, अपन खेत ला बिनास वाले बरसा ले बचाय मं खपा दीस. ओकर 8 एकड़ के खेत चकलाम्बा गाँव मं एक ठन डोंगरी के उतरोल मं हवय, जेन ह पुर/बाढ़ आय के बखत अऊ घलो खराब हालत मं हो जाथे.

वो ह बताथे, “पानी सीधा मोर खेत ले होके बोहाथे. हरेक दिन, मंय पानी निकासी बर घंटों लगे रहिथों.”

ओकर ये भारी मिहनत बेकार होगे, अऊ वो ह बगियाय बादर के आगू टिके नइ सकिस. ओकर कपसा, राहेर अऊ कुसियार के फसल बेकार होगे, जेन मं ओकर 3 लाख ले जियादा रूपिया के नुकसान हो गिस. डोंगरी के भारी धार ओकर खेत के माटी ला घलो बोहा लेगे, जेकर ले ओकर जीविका बिपत मं परगे.

वइसे, ये नुकसान के भरपाई के चिंता वोला अतक नइ ये, जतक के महाराष्ट्र के एक ठन महत्तम तिरिथ के जगा मं बने मंदिर बर नगरे के करे गे 1.7 लाख रूपिया देय के संकल्प ला पूरा नइ कर सके के चिंता वोला सताते.

बीड अऊ अहिल्यानगर जिला के सरहदी मं एक ठन जुन्ना डोंगरी मं बने भगवानगढ़ के मंदिर अहाता, राज भर के भगत मन के बनाय बड़े अकन मंदिरआय. वारकरी परंपरा के एक झिन तपस्वी, भगवान बाबा ला समर्पित ये मंदिर मं सलाना 15-20 लाख लोगन मन आथें. साल 1958 मं, वो ह भगवानगढ़ मं विट्ठल के एक ठन मूर्ति स्थापित करिस. वइसे कतको समाज के लोगन मन भगवानगढ़ आथें, फेर येकर माई चुनावी इलाका वंजारी समाज के हवय, जेन ह परमुख ओबीसी जात आय.

महाराष्ट्र के पूर्व उपमुख्यमंत्री गोपीनाथ मुंधे ह वंजारी किसान अऊ मजूर मन के जिनगी मं ये जगा के महत्ता ला समझत, भगवानगढ़ मं दसेरा रैली के परंपरा सुरु करे रहिस. बखत के संग-संग ये रैली के अऊ घलो नांव हो गीस, लाखों भगत मन जुरे लगिन अऊ भगवानगढ़ एक ठन तिरिथ के जगा के संगे संग राजनीतिक ताकत के रूप मं घलो उभर गीस.

ये बखत, भगवानगढ़ मंदिर के महंत नामदेव शास्त्री, 13वीं सदी के कवि अऊ दार्शनिक-संत ज्ञानेश्वर के एक ठन बड़े मंदिर बनाय के काम करत हवंय, जेन ला जम्मो महाराष्ट्र मं माने जाथे. ये मं 25 करोड़ रूपिया ले जियादा खरचा होय के अंदाजा हवय. येकर प्राण प्रतिष्ठा साल 2026 के दसेरा मं ओकर बड़े अहाता मं होवेइय्या हे. अऊ येकर बर पइसा भगत मन ले जुटाय जावत हे, जेकर कतको झिन ला सायदे मालूम होही के वो मन के अवेइय्या भोग कहाँ ले आही.

बीड जिला के जियोराई तालुका मं नागरे के गाँव चकलाम्बा ह मंदिर बनाय बर 2.41 करोड़ रूपिया जुटाय के संकल्प लेगे हवय. ये दान ये गाँव के 410 परिवार ले आही, जेन मं खास करके किसान, बनिहार अऊ कुसियार कटेइय्या हवंय. नामदेव शास्त्री के उत्तराधिकारी कृष्ण महाराज ह कहिथे के दान माँगे के परंपरा भगवान बाबा के बखत ले चले आवत हवय – वो संत जेन ह साल 1958 मं भगवानगढ़ के स्थापना करे रहिस. कृष्ण महाराज ह बताइस, “ वो बखत लोगन मन करा पइसा नइ होवत रहिस, ते पायके वो मन अनाज दान मं देवत रहिन. आज दान के रूप ह नगदी हो गे हवय. बस.”

वइसे, जब नागारे अऊ चकलाम्बा के बाकी लोगन मन मंदिर बर 2.41 करोड़ रूपिया के बड़े रकम दान करे के संकल्प करिन, त वो मन ला ये बात के कोनो अंदाजा नइ रहिस के अवेइय्या महीना कइसने गुजरही.

सितंबर के आखिरी हफ्ता तक, महाराष्ट्र मं हाल के बखत मं होय सेबल भारी बरसा सेती करीबन 18 लाख हेक्टेयर खेती मं 31 लाख किसान उपर असर परे हवय. हजारों लोगन मन के घर रातोंरात बरबाद होगे.

महाराष्ट्र जेन संकट ले जूझत हवय, वो मं चकलाम्बा घलो कोनो अपवाद नइ ये. नागरे जइसन किसान पहिलीच ले कतको करजा बोड़ी मं बूड़े अगम के रद्दा देखत हवंय. सरकार ह 2, 215 करोड़ रूपिया के राहत पॅकेज के घोसना करे हवय, फेर नुकसान असल मं कहूँ जियादा हवय. गर ये रकम ला प्रभावित लोगन मन ला बनते जाही, त येकर ले हरेक किसान ला सिरिफ 7,000 रूपियाच मिलही

बाद मं, मुख्यमंत्री देवेंद्र फडणवीस ह किसान मन बर 31,000 करोड़ रूपिया ले जियादा के सहायता रकम के घोसना करिस. वइसे, कृषि कार्यकर्ता अजीत नवले ह बताइस के फडणवीस ह कतको योजना के तहत किसान मन ला पहिली ले आवंटित रकम के गलत गणना करे रहिस, अऊ असल सहायता 6,500 करोड़ रूपियाच रहिस.

ओकर बाद घलो, ये गाँव भगवानगढ़ ले करे अपन संकल्प ला पूरा करे मं अड़े हवय, अऊ ओकर करा येकर बर बछर भर ले जियादा के बखत हवय. नागरे कहिथे, “मोर करा पइसा जोरे के बखत हवय. मंय पइसा बचाहूँ अऊ अपन संकल्प ला पूरा करहूँ. मंय अपन संकल्प पूरा कर दे हवं. मंय पलटी नइ मारवं.”

चकलाम्बा तउन 60-70 गाँव मन ले एक आय जेन ह हरेक महीना एक ट्रक भाखरी (रोटी) भगवानगढ़ भेजथे. कृष्ण महाराज कहिथें, “येकर ले भगवानगढ़ मं हरेक दिन कम से कम 3,500 दरसन करे अवेइय्या मन बर भंडारा लगथे

येकर छोड़, भगवानगढ़ मं दू ठन स्कूल चलथे, वो ह बताथे, अऊ कतको जात-धरम के 100 ले जियादा गरीब लइका मन के पढ़ई-लिखई के बेवस्था करे जाथे. वो मन ले करीबन 30 झिन लइका भगवानगढ़ के एक ठन हास्टल मं रहिथें. वो सब्बो टूरा आंय काबर के “ये ह ब्रह्मचर्य के जगा आय,” वो ह कहिथे.

महाराष्ट्र शिरडी अऊ पंढरपुर जइसने नामी मंदिर मन बर जाने जाथे, जिहां हरेक बछर कम से कम 4 करोड़ दरसन करेइय्या आथें. वइसे, बीते कुछक बछर मं, राज के बहिर के बनिस्बत कम नांव वाले तिरिथ के जगा मन मं घलो लोगन मन आवत हवंय. ये तिरिथ के जगा मन बखत के संग अपन इहाँ के मन्दिर ट्रस्ट के संग मेल कर लेय हवंय, अऊ धार्मिक पीठ मं कोनो घलो बिराजे, वो मन के निष्ठा मं कोनो बदलाव नइ आवय. इहाँ के लोगन मन के बदकिस्मती आय के मंदिर ट्रस्ट अपन भगत मन ले भविष्य मं बढ़िया बखत आय के बात करके वो मन ले जियादा ले जियादा रकम ऐंठे लगे हवंय.

सितंबर के आखिरी हफ्ता मं, इहाँ के के ठन मराठी अख़बार, “कार्यारम्भ” ह बिपत मं परे किसान मन ला मंदिर ट्रस्ट अऊ तिरिथ करेइय्या मन के डहर ले मदद नइ मिले ला ले के सवाल उठाय रहिस. अखबार के दलील रहिस गर किसान अऊ बनिहार धरम के काम, तिहांर अऊ मंदिर उपर अपन खिसा ले खरचा करथें. अखबार कहिथे के अब जब किसान पूर मं तबाह होगे हवंय, त उहिच मन के संस्था मन ला आगू आके वो मन के मदद करे ला चाही.

शिरडी अऊ तुलजा भवानी जइसने मंदिर ट्रस्ट मन पुर के असरवाले लोगन मन ला मदद करे बर 1-1 करोड़ रूपिया दें दे हवंय – जेन ह वो मन के सालाना आमदनी के नहीं के बरोबर रकम आय.

भगवानगढ़ ले 33 कोस दूरिहा के भीतरी मं दू ठन अऊ बड़े तिरिथ के जगा (मंदिर) हवंय – देवगढ़ अऊ सरला बेट – जेन ह ये बखत भास्करगिरी महाराज अऊ रामगिरी महाराज डहर ले चलाए जावत हवंय .

अगस्त 2024 मं, पुलिस ह पैगंबर मोहम्मद के खिलाफ अपमानजनक टिप्पणी सेती रामगिरी महाराज के खिलाफ एफआईआर दरज करिस. येकर ले अहिल्यानगर जिला के श्रीरामपुर क़स्बा मं, जिहां रामगिरी महाराज रहिथें, दंगा-फसाद जइसने हालत होगे रहिस. ओकर बाद घलो, काबर के कतको लोगन मन सरला बेट तिरिथ मं पूजा करथें, उही रामगिरी महाराज ला वो कार्यक्रम मन मं नेवते जाथे झें गाँव के लोगन मन अपन खरचा ले ओकर सम्मान मं भंडार लगाथें.

बीते दस बछर ले, नेवासा मं भास्करगिरि महाराज के अनुयायी (चेला) - अहिल्यानगर के वो तालुका जिहां ओकर सबले जियादा असर हवय – हरेक गाँव मं मंदिर बनाया के अभियान चलावत हवंय. येकर बर पइसा गाँव के लोगन मन अऊ ग्राम पंचायत ले आथे. पइसा संकेले के काम व्हाट्सएप ले करे जाथे.

नेवासा के कतको दुकान अऊ घर भास्करगिरि के मालावाले फोटू ले सजे हवय. इहाँ करीबन हरेक गाँव मं ओकर सम्मान मं जस गीत अऊ भजन गाये बर 30-40 झिन लोगन मन के एक ठन समर्पित समिति हवय. नेवासा के सौंदला गाँव मं समिति के सदस्य मंन ले एक, 47 बछर के रामदास वाकचौरे कहिथें, “ तिहार के बखत, भास्करगिरि महाराज खुदेच गाँव गाँव जाथे अऊ धरम-करम डहर लोगन मन ला जागरूक करे बर भक्ति गीत गाथे.”

महाराष्ट्र मं साल 2024 के विधानसभा चुनाव के ठीक पहिली, भास्करगिरि महाराज ह अपन चेला मन ले “ धरम बर वोट देय’ ला कहे रहिस, जेकर बारे मं बताय जाथे के येकर ले रातोंरात उम्मीदवार मन के किस्मत बदल गीस. अहिल्यानगर जिला के आबादी मं मुसलमान मन के संख्या करीबन 7 फीसदी हवय.

वाकचौरे कहिथें, ओकर चेला मन ये तय करे हवंय के नेवासा तालुका के हरेक गाँव मं अलग-अलग हिंदू देवता मन के कम से कम चार मंदिर होय. “हम ये देखथन के लोगन मन ला हरेक एक दू महिना मं दान देय ला झन परे. अधिकतर हर दू बछर मं एक मंदिर हर गाँव मं बनथे.”

नेवासा मं 127 ठन गाँव हवंय. भास्करगिरि महाराज के चेला मन हरेक गाँव मं चार मंदिर के हिसाब ले, एक तालुका मं सिरिफ 10 बछर मं करीबन 500 मंदिर बनवाय हवंय. वाकचौरे बताथें, “एक ठन मंदिर बनाय मं करीबन 10 लाख रूपिया लगे हवय.

दीगर शब्द मं, नेवासा के आबादी, जेन ह अक्सर खेती के संकट, इलाज के खराब सुविधा अऊ शिक्षा ले जूझत रहिथे, वो ह अपन गाँव मं छोटे-छोटे मंदिर बनाय मं 50 करोड़ रूपिया खरचा कर देय हवय. वाकचौरे कहिथें, “भगवान के नांव मं कोनो घलो पइसा देय ले इंकार नइ करय.”

वइसे, किसान अऊ बनिहार मन ले वो मन के घर मं अकेल्ला मं बात करे ले एक ठन अऊ बात उजागर होथे. वइसे वो मन के श्रद्धा अटूट हवय, फेर कुछेक मामला मं वो मन जेन दान देथें, वो ह संगवारी मन के दुवाब के नतीजा हो सकथे. लोगन मन ला नांव उजागर नइ करे के वादा करे के बाद, “तंय मना करे नइ सकस” धन “ये बने नइ लगय” धन “तंय अपन गाँव के बाकि लोगन मन ला अलग-थलग कर सकथस,” जइसने बात सुने मं आथे.

ओकर बाद घलो, ये प्रवृत्ति के दूरिहा तक ले असर हवय.

दूर-दराज के गाँव मन मं, स्थानीय स्तर मं, कइसने घलो तरीका के चकाचौंध ले दूरिहा, छोटे-मोटे बाबा पनपथें अऊ गरीब लोगन मन ले पइसा ऐंठथें, वो मन अगम मं बढ़िया बखत लाय के भरोसा देथें. ये ह अब सुग्घर कारोबार बनगे हवय.

नामदेव शास्त्री के पहुँच एक ठन अलगेच स्तर मं हवय. ओकर यूट्यूब चैनल मं – जेकर ढाई लाख से जियादा सब्सक्राइबर हवंय- सबले बढ़िया एडिटिंग वाला वीडियो घलो हवय जेन मं वो ह स्विट्जरलैंड मं हेलीकॉप्टर ले सैर करत हवय. साल 2024 के राज विधानसभा चुनाव के पहिली. वो ह महायुति के उम्मीदवार धनंजय मुंडे ला समर्थन करे रहिस, जेन ला मुंडे के जीत के एक ठन बड़े कारन माने जावत रहिस. वइसे,भगवानगढ़ के भगत मन बर कोनो मायने नइ रखय. ओकर मन बर, वो ह रद्दा दिखेइय्या आंय.

48 बछर के नानाबाई उगलमुगले अऊ ओकर 50 बछर के घरवाला शिवाजी, दूनोंच चकलाम्बा मं प्रवासी वंजारी कुसियार मजूर आंय. मराठवाड़ा के ये जोड़ा, छै महीना बर सिरिफ 50,000 रूपिया के मजूरी बर, पच्छिम महाराष्ट्र धन कर्नाटक मं जाके भारी घिनहा हालत मन ले एक बंधुआ मजूरी करथें. शिवाजी कहिथें, “ओकर लइका मन घलो इहीच काम करथें काबर के हमर करा अपन बेटा मन ला पढ़ाय-लिखाय बर कभू पइसा नइ रहिस.”

ये जोड़ा ह भगवानगढ़ मंदिर बर एक लाख रूपिया दान देय के संकल्प करे हवय. ये ह वो मन के बछर भर के आमदनी के बरोबर हवय.

शिवाजी कहिथे, “ हमन तीरथ के जगा संग वइसनेच बेवहार करथन जइसने अपन लइका मन के संग करथन. भलेच हमर पाँव मं पनही चप्पल झन होय धन कुरिया झन होय, हमन मंदिर बर जेन घलो करे सकबो, करबो. हमन ला येकर पूजा बर जिनगी मिले हवय.”

चकलाम्बा मं अपन एक खोली के घर के ठीक बहिर बइठे नानाबाई, जेन ह भारी मिहनत सेती जोड़ मं दरद अऊ कमजोर माड़ी ले जूझत हवय, अपन घरवाला के बात ले राजी हवय, वो ह कहिथे, “हमर करा जेन घलो कुछू हवय, वो ह भगवानगढ़ अऊ नामदेव शास्त्री के बदौलत आय. वो ह हमन ला सब्बो कुछु देय हवय. हमन वोला कुछु घलो देय के पहिली दू बेर सोचे ला नइ चाही. कोनो सवाल नइ.”

चकलाम्बा के बासिंदा मन तो बरसात लाय के हाथ नामदेव शास्त्री ला देथें. गाँव के प्रवासी गन्ना मजूर, 52 बछर के भाऊसाहेब थोरे कहिथें, जब तक ले वो ह एक ठन कार्यक्रम बर हमर गाँव आय नइ रहिस, तब तक ले ये इलाका मं बरसा नइ होय रहिस. जिसनेच वो ह इहाँ आइस, बरसा सुरु होगे.”

यह अलग बात आय के बरसात सुरु होय के बाद तब तक ले नइ माढ़ीस जब तक ले वो ह 30 जिला ला तबाह नइ कर दीस अऊ जान-माल के भारी नुकसान नइ कर दीस. भाऊसाहेब करा येकर जुवाब घलो हवय. वो ह कहिथे, “कम से कम हमर पीये के पानी के समस्या के निदान होगे हवय, अऊ जाड़ के सीजन मं हमन ला पानी मिल जाही.”

भाऊसाहेब ह मंदिर बनाय बर सवा लाख रूपिया दे के संकल्प करे हवय. ओकर करा अपन खेत नइ ये, अऊ वो ह एक खोली के भाड़ा के घर मं रहिथे, वोला महिना मं 1,500 रूपिया भाड़ा देय ला परथे. वो ह कहिथे, “मंदिर सेती दान देय एक ठन अइसने सम्मान आय जेन ह हमन ला अवेइय्या तीन पीढ़ी तक ले नइ मिलही. डेढ़ बछर मं जब बखत आही, य हमन ये पइसा बाबा के चरन मं चढ़ा देबो.”

जब मंदिर बनही त ये ह गरब के बात होही. भाऊसाहेब कहिथे, “कुछु बछर बीते, हमन नइ रहिबो. फेर मंदिर त रइहिच, अऊ वो मं हमर घलो कुछु हिस्सा घलो होही.”

अनुवाद: निर्मल कुमार साहू