معذوری نے کاشتکاری کو مزید مشکل بنا دیا

’’میری حالت تو شعلے [فلم] کے ٹھاکر جیسی ہو گئی ہے۔‘‘

رویندر شندے کی شرارتی مسکراہٹ یہ بتاتی ہے کہ وہ اس تشبیہ پر خوش ہیں، جس میں وہ خود کا موازنہ شہرۂ آفاق بالی ووڈ فلم ’شعلے‘ میں سنجیو کمار کے کردار سے کر رہے ہیں۔ لیکن پھر وہ ایک لمحہ کے لیے رکتے ہیں اور کہتے ہیں، ’’شاید میں ان سے زیادہ خوش قسمت ہوں۔ انہوں نے تو اپنے دونوں ہاتھ کھو دیے تھے۔‘‘

اس طرح کے حالات سے گزرنے والے اکثر لوگ شاید زندگی سے ہار مان لیتے، مذاق کرنا تو دور کی بات ہے۔ مگر ۴۷ سالہ شندے آج بھی اپنی تلخ زندگی کو سیاہ مزاح کے انداز میں بیان کرنے کا حوصلہ رکھتے ہیں۔

شندے کے پاس مہاراشٹر کے یوتمال ضلع کے اُمری گاؤں میں ۱۶ ایکڑ زمین ہے، جس پر انہوں نے اپنی نوجوانی کے زمانہ سے ہی پوری ذمہ داری کے ساتھ کھیتی کرنا شروع کر دیا تھا۔ بدقسمتی سے وہ زراعت سے تب وابستہ ہوئے جب زرعی بحران نے جنم لینا شروع کیا تھا، اور یہ بحران کئی دہائیوں سے مسلسل جاری ہے۔

ان کے والد کھیتی باڑی کی آمدنی سے گھر کا خرچ بخوبی چلا لیتے تھے، لیکن جب شندے کی شادی ہوئی اور ان کے بچے ہوئے تو حالات بدل چکے تھے۔ بڑھتی ہوئی مہنگائی، فصلوں کی گرتی ہوئی قیمتیں اور موسمیاتی تبدیلی کے باعث پیدا ہونے والے شدید موسمی حالات، جیسے طویل خشک سالی نے کسانوں کو بڑھتے ہوئے قرضوں کے بوجھ تلے دبا دیا۔

مہاراشٹر میں ایک زرعی گھرانے کی اوسط ماہانہ آمدنی محض ۱۱ ہزار ۴۹۲ روپے ہے، جو انتہائی مایوس کن ہے۔ اس بحران کی شدت نیشنل کرائم ریکارڈز بیورو کے اعداد و شمار سے بھی ظاہر ہوتی ہے۔ اس کے مطابق، سال ۲۰۲۴ میں ہندوستان میں ۱۰۵۴۶ کسانوں نے خودکشی کی، یعنی اوسطاً روزانہ ۲۹ کسان اپنی جان سے ہاتھ دھو بیٹھے۔ حقیقت میں یہ تعداد بھی اصل صورتِ حال سے کم ہے، کیوں کہ زمینی سطح پر اعداد و شمار جمع کرتے وقت اکثر خواتین، دلت اور آدیواسی برادریوں کو نظر انداز کر دیا جاتا ہے۔ سرکاری ریکارڈ میں چونکہ ان میں سے زیادہ تر افراد اس زمین کے قانونی مالک نہیں ہوتے جس پر وہ کھیتی باڑی کر رہے ہیں، اس لیے ان کی خودکشیوں کو اکثر ’’کسانوں کی خودکشی‘‘ کے طور پر درج ہی نہیں کیا جاتا۔

مہاراشٹر۳۸۲۴ خودکشیوں کے ساتھ اس افسوسناک فہرست میں سرفہرست رہا، جو ملک بھر میں ہونے والی کسانوں کی خودکشیوں کا تقریباً ۳۶ فیصد بنتا ہے۔ ان میں سے ایک بڑی تعداد ریاست کے ودربھ خطہ سے تعلق رکھتی ہے، اور شندے کا گاؤں بھی اسی علاقہ میں ہے، جو زرعی بحران کے شدید اثرات سے دوچار ہے۔

تاہم، شندے کو اس وقت یہ اندازہ بھی نہیں تھا کہ زندگی ان کے لیے ابھی مزید کٹھن ہونے والی ہے۔

اکتوبر ۲۰۲۱ کی ایک دوپہر اچانک تیز آندھی چلی، جس کے فوراً بعد موسلا دھار بارش شروع ہو گئی۔ یہ دیکھ کر شندے گھبرا گئے۔ ان کی سویابین کی کٹی ہوئی فصل کھیت میں باقاعدہ ڈھیروں کی صورت میں رکھی ہوئی تھی، جو بازار لے جانے کے لیے تیار تھی۔ بارش سے بچانے کے لیے انہوں نے اس پر پلاسٹک کی چادر ڈالی ہوئی تھی، مگر ان کا کھیت ایک نالے کے بالکل قریب تھا، اس لیے سیلابی پانی سے فصل کو شدید خطرہ لاحق تھا۔

شندے فوراً گھر سے کچھ ہی فاصلہ پر موجود اپنے کھیت کی طرف دوڑے۔ تیز ہوا سے جھومتے درختوں اور ان کی کانپتی ہوئی شاخوں کے درمیان وہ بمشکل اپنا توازن برقرار رکھ سکے۔ ٹن کی چھتوں پر گرنے والی بارش کی تیز بوندیں لگاتار شور مچا رہی تھیں۔

’’جب میں وہاں پہنچا تو دیکھا کہ پانی تیزی سے کھیت کے اندر داخل ہو رہا ہے۔ مجھے ہر حال میں اپنی فصل بچانی تھی،‘‘ شندے یاد کرتے ہوئے کہتے ہیں۔

انہوں نے کھیت سے پانی نکالنے کے لیے موٹر پمپ چلانے کی کوشش کی، لیکن تیز ہوا بجلی کے کھمبے اور کھیت تک بجلی پہنچانے والی تار کو الگ کر چکی تھی، اس لیے موٹر پمپ نہ چل سکا۔ بے بسی کے عالم میں وہ پہلے ٹرانسفارمر کی طرف دوڑے تاکہ مین سوئچ بند کریں، پھر بجلی کے کھمبے پر چڑھ کر تار جوڑ سکیں۔

’’کسان یہ کام اکثر خود ہی کر لیتے ہیں،‘‘ شندے کہتے ہیں۔ ’’میرے پاس اتنا وقت یا پیسہ نہیں تھا کہ محکمہ بجلی سے کسی کو بلاتا اور ان کا انتظار کرتا۔ ویسے بھی وہ کسانوں کا کام کرنے کے لیے وقت پر نہیں آتے۔ اس وقت میرے ذہن میں صرف اپنی سویابین کی فصل تھی۔‘‘

انہوں نے اس فصل کی کاشت پر ایک لاکھ روپے سے زیادہ خرچ کیا تھا، جبکہ اس کی تیار شدہ پیداوار کی قیمت اس سے بھی کہیں زیادہ تھی۔ ’’میں اپنی فصل کو پانی میں سڑنے نہیں دے سکتا،‘‘ اسی خیال کے ساتھ وہ عادت کے مطابق پھرتی سے بجلی کے کھمبے پر چڑھ گئے۔ یہ پہلا موقع نہیں تھا جب انہوں نے ایسا کیا ہو، مگر یہ آخری بار ثابت ہوا۔

جیسے ہی شندے نے اپنے بائیں ہاتھ سے تار کو پکڑا، بجلی کا شدید جھٹکا ان کے پورے جسم میں دوڑ گیا۔ وہ بیہوش ہو کر نیچے گر پڑے۔ دراصل انہوں نے ٹرانسفارمر کے سوئچ کی سمت کو غلط سمجھ لیا تھا۔ وہ کہتے ہیں، ’’مجھے لگا کہ سوئچ کو آن کرنا ہے، لیکن حقیقت میں وہ پہلے سے ہی آف (بند) تھا اور میں نے کھمبے پر چڑھنے سے پہلے اسے الٹا آن کر دیا۔‘‘

خوش قسمتی سے وہ کھمبے کے نیچے موجود بھوسے کے ڈھیر پر گرے، جس سے ان کی جان بچ گئی۔ آس پاس کے دوسرے کسان فوراً انہیں اسپتال لے گئے۔ ڈاکٹروں نے ان کی جان تو بچا لی، مگر ان کا بایاں بازو نہ بچا سکے۔ کندھے سے اوپر تک بازو کو کاٹنا پڑا۔ حادثہ کے بعد ان کے دائیں ہاتھ کی حرکت بھی متاثر ہو گئی۔ اب وہ نہ مٹھی بند کر سکتے ہیں اور نہ ہی انگلیاں ہلا سکتے ہیں۔ فون کرنے کے لیے وہ موبائل کو طشتری کی طرح ہتھیلی پر رکھ کر اسپیکر آن کرتے ہیں اور اسی طرح بات کرتے ہیں۔

’’پہلے میں خود ٹریکٹر چلاتا تھا اور کھیت میں دن رات محنت کرتا تھا،‘‘ شندے افسردہ مسکراہٹ کے ساتھ کہتے ہیں۔ ’’اب وہ سب ماضی بن چکا ہے۔ بس اسی بات پر شکر ادا کرتا ہوں کہ اس دن موقع پر ہی جل کر راکھ نہیں ہوا۔‘‘

سال ۲۰۲۴ میں ’ہندوستان میں زرعی کام کرنے والوں کی صحت اور انہیں لگنے والے زخموں کے نتائج‘ عنوان سے شائع ہونے والی تحقیق کے مطابق، ہندوستان میں زرعی شعبے میں ہر ایک لاکھ کارکنوں میں ۳۳۴ حادثات پیش آتے ہیں، جن میں سے ۶ء۵ فیصد جان لیوا ثابت ہوتے ہیں۔

تحقیق میں شامل نصف سے زیادہ افراد نے بتایا کہ مسلسل ایک ہی قسم کی جسمانی حرکات اور غیر موزوں انداز میں کام کرنے کے باعث انہیں کمر کے نچلے حصے، گھٹنوں اور کندھوں میں درد رہتا ہے، جو بڑھاپے سے وابستہ معذوریوں کو مزید شدید کر دیتا ہے۔ اسی تحقیق کے مطابق ۵۸ فیصد افراد نے قرض، فصلوں کی تباہی اور کسانوں کی خودکشیوں سے جڑے شدید ذہنی دباؤ کا اظہار کیا، جس کے نتیجے میں انہیں ذہنی صحت کے مسائل کا سامنا کرنا پڑا۔

تحقیق کے مطابق صرف مدھیہ پردیش میں زرعی حادثات کے نتیجے میں ہونے والی اموات اور کام کے تعطل سے ہر سال تقریباً ۱۷۰ کروڑ روپے کا معاشی نقصان ہوتا ہے۔

زرعی بحران کا بوجھ ویسے تو تمام کسانوں پر بھاری ہے، مگر معذور کسانوں کے لیے یہ بوجھ کہیں زیادہ کٹھن اور تکلیف دہ ثابت ہوتا ہے۔

ہندوستان میں زرعی بحران اور معذوری کے باہمی تعلق کی تصویر ابھی تک واضح نہیں ہے، خاص طور پر اس لیے کہ ملک میں مجموعی طور پر معذوری سے متعلق درست اور جامع اعداد و شمار موجود نہیں ہیں۔

سال ۲۰۱۱ کی مردم شماری کے مطابق، ہندوستان میں ۲ کروڑ ۶۸ لاکھ افراد معذوری کے ساتھ زندگی گزار رہے تھے، جو اس وقت کی کل آبادی کا ۲۱ء۲ فیصد تھے۔ ان میں سے ۶۹ فیصد دیہی علاقوں میں رہتے ہیں، جہاں زیادہ تر لوگوں کا روزگار براہِ راست یا بالواسطہ طور پر زراعت سے وابستہ ہے۔

تاہم، ۲۰۱۱ میں ہندوستان میں صرف آٹھ قسم کی معذوریوں کو سرکاری طور پر تسلیم کیا گیا تھا۔ مردم شماری کے پانچ سال بعد، مزید ۱۳ اقسام کو اس فہرست میں شامل کیا گیا، جس سے اندازہ ہوتا ہے کہ ملک میں معذور افراد کی حقیقی تعداد سرکاری اعداد و شمار سے کہیں زیادہ ہو سکتی ہے۔

عالمی ادارۂ صحت (ڈبلیو ایچ او) کے تخمینہ کے مطابق، دنیا کی تقریباً ۱۶ فیصد آبادی، یعنی ہر چھ میں سے ایک شخص، کسی نہ کسی قسم کی معذوری کے ساتھ زندگی گزار رہا ہے۔ اگر یہی تناسب ہندوستان پر لاگو کیا جائے تو ملک میں معذور افراد کی تعداد ۲۰ کروڑ سے زیادہ بنتی ہے۔

مالی سال ۲۰۲۶-۲۷ کے وفاقی بجٹ میں محکمہ برائے بااختیاریِ معذور افراد کے لیے ۱۶۷۰ کروڑ روپے مختص کیے گئے، جو گزشتہ سال کے مقابلے میں تقریباً ۳۰ فیصد یا لگ بھگ ۳۸۰ کروڑ روپے زیادہ ہیں۔ تاہم، اصل مسئلہ فنڈز کی کمی نہیں بلکہ ان کے مؤثر استعمال کا ہے۔ اطلاعات کے مطابق، ۲۰۱۴ سے اگلے ۱۰ برسوں کے دوران معذور افراد کے حقوق کے قانون پر عمل درآمد سے متعلق مختلف اسکیموں کے لیے مختص کیے گئے ۵۰۰ کروڑ روپے سے زائد فنڈز خرچ ہی نہیں کیے جا سکے۔

مہاراشٹر، جو ہندوستان کی زرعی معیشت کی ابتر صورتِ حال کی ایک جھلک پیش کرتا ہے، وہاں زراعت سے وابستہ معذور افراد کی تعداد سے متعلق کوئی باضابطہ اعداد و شمار موجود نہیں ہیں۔ اس شعبے سے وابستہ ایک سابق سرکاری افسر کے مطابق، اگرچہ ریاست میں معذور افراد کے لیے مختلف سرکاری اسکیمیں موجود ہیں، لیکن ان میں سے کوئی بھی خاص طور پر معذور کسانوں کی ضروریات کو مدنظر نہیں رکھتی۔

محکمہ برائے بااختیاریِ معذور افراد کے سکریٹری ڈاکٹر مانک گرسال نے بتایا کہ انہیں اس بارے میں کوئی علم نہیں ہے کہ زراعت اور معذوری کے باہمی تعلق سے متعلق کوئی اعداد و شمار یا مخصوص سرکاری اسکیم موجود ہے بھی یا نہیں۔

’’براہِ کرم اس بارے میں کمشنر سے معلومات حاصل کریں،‘‘ انہوں نے کہا۔

اس رپورٹر نے کمشنر ستیہ جیت بڈے کو ای میل کے ذریعے مطلوبہ معلومات فراہم کرنے کی درخواست بھیجی ہے۔ ان کا جواب موصول ہونے پر اس رپورٹ کو اپ ڈیٹ کر دیا جائے گا۔

سرکاری اعداد و شمار کے مطابق، مہاراشٹر میں ۳۶ لاکھ سے زائد معذور افراد موجود ہیں، جو مرکزی حکومت کی جانب سے جاری کیے جانے والے یونیک ڈس ایبلٹی آئی ڈی (یو ڈی آئی ڈی) کارڈ کے اہل ہیں۔ یہ کارڈ حاصل کرنے کے لیے معذور فرد کو آن لائن درخواست جمع کرانی ہوتی ہے اور سرکاری اسپتال میں طبی معائنہ بھی کروانا پڑتا ہے۔

تاہم، ریاست میں اب تک صرف ۱۴ لاکھ سے کچھ زائد یو ڈی آئی ڈی کارڈ جاری کیے گئے ہیں۔ دوسرے الفاظ میں، مہاراشٹر کے تقریباً ۶۰ فیصد معذور افراد اب بھی اس کارڈ سے محروم ہیں، حالانکہ اس کے بغیر وہ سرکاری فلاحی سہولیات اور مراعات حاصل نہیں کر سکتے۔

نلیش وانکھیڑے (۲۷) بھی انہی میں سے ایک ہیں۔

وانکھیڑے، یوتمال ضلع کے پنجرا گاؤں سے تعلق رکھنے والے ایک دلت کسان ہیں۔ وہ صرف ۱۹ سال کے تھے جب ایک دن کپاس کی فصل پر کیڑے مار دوا کا چھڑکاؤ کرنے کے بعد گھر واپس آئے۔

’’اس نے دوپہر کا کھانا کھایا اور پھر بیت الخلاء جانے کے لیے گھر سے باہر نکلا۔ جب آدھے گھنٹے تک واپس نہیں آیا تو ہمیں تشویش ہونے لگی،‘‘ ان کی والدہ چندرکلا (۶۰) یاد کرتے ہوئے بتاتی ہیں۔

چندرکلا جب اپنے بیٹے کو ڈھونڈنے نکلیں تو وہ بیہوش حالت میں پڑا ملا۔ وہ فوراً اسے گھاٹنجی تعلقہ کے اسپتال لے گئیں، جہاں سے انہیں مزید علاج کے لیے یوتمال شہر منتقل کر دیا گیا۔

وہ بتاتی ہیں، ’’فصل پر کیڑے مار دوا کا چھڑکاؤ کرتے ہوئے اس کے جسم میں زہر چلا گیا تھا۔ اسپتال میں ڈاکٹروں نے علاج کے دوران اسے بستر سے باندھ دیا اور انجیکشن لگائے۔ جب اس نے قے کر کے زہر باہر نکالا تو وہ مرگی کے مریض کی طرح تڑپنے لگا۔‘‘

سال ۲۰۱۷-۱۸ کے دوران ودربھ میں کیڑے مار ادویات کے زہریلے اثرات کی وجہ سے ۵۰ سے زائد کسانوں کی موت ہوئی، جبکہ ۱۰۰۰ سے زیادہ کسانوں کو گھبراہٹ، چکر آنے، بینائی متاثر ہونے اور معدے کی تکالیف کی شکایت کے ساتھ اسپتال میں داخل کرایا گیا۔

اس واقعہ کے بعد سے نلیش کی بینائی کبھی ٹھیک نہیں ہو سکی۔

جس دن وہ زہریلی دوا کا شکار ہوئے، دوپہر کا سورج عین سر پر تھا۔ ان کے ڈھائی ایکڑ کے کپاس کے کھیت پر شدید گرمی آگ برسا رہی تھی۔ آج بھی جب سورج سر پر آتا ہے تو وہ اس ہولناک واقعہ کو یاد کر کے پریشان ہو جاتے ہیں۔ گرمیوں میں یوتمال کا درجۂ حرارت اکثر ۴۰ ڈگری سینٹی گریڈ سے تجاوز کر جاتا ہے، اور ایسے موسم میں وانکھیڑے کے لیے کھیت میں چند گھنٹے بھی کام کرنا انتہائی مشکل ہو جاتا ہے۔

وہ کہتے ہیں، ’’جب گرمی بہت زیادہ ہوتی ہے تو میرے دل کی دھڑکن تیز ہو جاتی ہے۔ مجھے خوف اور گھبراہٹ محسوس ہونے لگتی ہے۔ وہ حادثہ یاد آ جاتا ہے اور میں ٹھیک سے سوچ بھی نہیں پاتا۔‘‘

ان کی معذوری کے باعث کھیت میں مزدوری کے اخراجات بھی بڑھ گئے ہیں، کیونکہ ان کے والدین سارے کام اکیلے نہیں کر سکتے۔ یہ خاندان کپاس اور سویابین کی کھیتی کرتا ہے، مگر بازار میں انہیں ان دونوں فصلوں کو مسلسل کم از کم امدادی قیمت (ایم ایس پی) سے ۱۰ فیصد کم قیمت پر بیچنا پڑتا ہے، جبکہ زرعی اخراجات اکثر اچانک بڑھ جاتے ہیں، جیسا کہ موجودہ سیزن میں ہوا۔

امریکہ اور اسرائیل کی جانب سے ایران کے خلاف جنگ کے اعلان کے بعد کھاد کی قیمتیں مزید بڑھ گئی ہیں، جس کے نتیجہ میں کسانوں کو فی ایکڑ کم از کم ۳۰۰۰ روپے اضافی خرچ کرنا پڑ رہے ہیں۔ وانکھیڑے کہتے ہیں، ’’نقصان سے بچنے کا واحد طریقہ یہی ہے کہ آدمی خود زیادہ محنت کرے، مگر میرے لیے ایسا کرنا ممکن نہیں ہے۔‘‘

حادثہ کے بعد تقریباً چار سال تک وہ کھیت میں کوئی کام نہیں کر سکے۔ بعد میں آہستہ آہستہ دوبارہ کام شروع کیا، لیکن ان کی آنکھوں کی تکلیف برقرار رہی۔

’’اتنے برس گزرنے کے باوجود میری نظر دھندلی ہی رہتی ہے،‘‘ وہ کہتے ہیں۔ نوجوانی میں میں بہت محنت کرتا تھا۔ میری خواہش تھی کہ کھیتی باڑی کی ذمہ داری سنبھال کر اپنے والد کا بوجھ کم کروں۔‘‘

لیکن وانکھیڑے اب دور کی چیزوں پر توجہ مرکوز نہیں کر پاتے۔ اگر کچھ دیر تک قریب کی کسی چیز کو دیکھیں تو سر میں درد ہونے لگتا ہے۔ جیسے ہی تیز دھوپ میں قدم رکھتے ہیں، ان کی آنکھوں سے پانی بہنے لگتا ہے۔ ان کی بینائی کمزور ہونے کی وجہ سے پوری فیملی پر اس کا اثر ہو رہا ہے۔

وہ کہتے ہیں، ’’میرے والد کو اب نہ صرف کھیت میں زیادہ دیر تک کام کرنا پڑتا ہے، بلکہ اضافی آمدنی کے لیے مزدوری بھی کرنی پڑتی ہے۔ مجھے جرم کا احساس ہوتا ہے کہ اس عمر میں بھی انہیں یہ سب کرنا پڑ رہا ہے۔‘‘ ان کے والد کی عمر ۶۵ سال ہے۔

اس کے باوجود نلیش کے پاس یو ڈی آئی ڈی کارڈ نہیں ہے۔ انہیں تو یہ بھی معلوم نہیں تھا کہ ایسا کوئی کارڈ ہوتا ہے، کیونکہ نہ تو کسی اسپتال نے اور نہ ہی کسی سرکاری ادارہ نے انہیں اس کے بارے میں بتایا تھا۔ ضلع کے محکمۂ بہبود کے افسران کی ذمہ داری ہوتی ہے کہ وہ مقامی تنظیموں کے تعاون سے رجسٹریشن کیمپ لگائیں اور یہ جانچ کریں کہ کوئی شخص یو ڈی آئی ڈی کارڈ کا اہل ہے یا نہیں۔ وانکھیڑے کے معاملے میں اگرچہ رہنما اصولوں میں بینائی کی مخصوص سطح کو معیار بنایا گیا ہے، لیکن آج تک ان کی آنکھوں کا باقاعدہ معائنہ ہی نہیں کیا گیا تاکہ یہ طے کیا جا سکے کہ وہ اس کارڈ کے مستحق ہیں بھی یا نہیں۔

دوسری جانب، رویندر شندے کو حادثہ کے تقریباً تین ماہ بعد یو ڈی آئی ڈی کارڈ مل گیا تھا۔ وہ کہتے ہیں، ’’مجھے ہر ماہ ۲۵۰۰ روپے ملتے ہیں، لیکن میرے اخراجات اس سے کہیں زیادہ ہیں۔‘‘

عام حالات میں، کپاس اور سویابین کی کھیتی کرنے والے کسان کو بیج، کھاد اور کیڑے مار ادویات پر فی ایکڑ ۲۵ ہزار سے ۳۵ ہزار روپے تک خرچ کرنے پڑتے ہیں۔ مزدوروں کو عموماً صرف فصل کی کٹائی کے وقت کام پر رکھا جاتا ہے، لیکن حادثہ کے بعد شندے کی معذوری کے باعث انہیں پورے زرعی موسم کے دوران مزدوروں کی خدمات حاصل کرنی پڑتی ہیں، جس سے ان کے اخراجات کئی گنا بڑھ گئے ہیں۔

وہ بتاتے ہیں، ’’میں مرد مزدور کو روزانہ ۵۰۰ روپے اور خاتون مزدور کو ۳۰۰ روپے دیتا ہوں۔ میرے زرعی اخراجات دوسرے کسانوں کے مقابلے میں تقریباً ڈیڑھ گنا زیادہ ہیں۔ میرا زخم تو گویا دُشکالت تیروا مہینہ کی مثال ہے۔‘‘ یہ مراٹھی کہاوت ہے جس کا مطلب ہے ’’قحط کے دوران اضافی تیرہواں مہینہ‘‘ – یعنی پہلے سے موجود مصیبت پر ایک اور بڑی مصیبت آ پڑنا۔

’’کھیتی باڑی ویسے ہی خسارے کا سودا بن چکی ہے،‘‘ شندے کہتے ہیں۔ ’’اگر کبھی موسم اچھا بھی ہو اور فصل بہتر ہو جائے، تب بھی زیادہ مزدوری کے اخراجات کی وجہ سے مجھے بہت کم منافع ہوتا ہے۔ لیکن جب نقصان ہوتا ہے تو بہت بڑا ہوتا ہے۔ ایسے میں ماہانہ ۲۵۰۰ روپے آخر میرے کس کام آئیں گے؟‘‘

سال ۲۰۲۵ کے مانسون کے اختتام پر ہونے والی غیر معمولی موسلا دھار بارش نے مہاراشٹر میں ۶۸ لاکھ ہیکٹیئر زرعی اراضی کو تباہ کر دیا تھا، جس سے ۶۰ لاکھ کسان متاثر ہوئے تھے۔ اس تباہی میں ۱۰۰ سے زائد افراد کی جانیں گئیں، جبکہ ۳۰۰۰ مکانات کو نقصان پہنچا۔ گھنے بادلوں نے ایسی شدید بارش برسائی کہ میلوں تک پھیلے کھیت پانی میں ڈوب گئے، درخت اکھڑ گئے اور بجلی کے کھمبے گر پڑے۔ کسان اپنی فصلیں بچانے اور مویشیوں کو محفوظ مقامات پر پہنچانے کے لیے دوڑ پڑے تھے۔

لیکن ۵۳ سالہ سریش مُنڈے بے بسی سے اپنا پورا کاروبار پانی میں ڈوبتا ہوا دیکھتے رہے۔

وہ یاد کرتے ہوئے کہتے ہیں، ’’رات کے تقریباً آٹھ بجے بارش شروع ہوئی، اور صرف پندرہ منٹ کے اندر اندر سب کچھ تباہ ہو گیا۔‘‘

سولاپور ضلع کے اُکّڑگاؤں میں بچپن سے پولیو کے ساتھ زندگی گزارنے والے سریش مُنڈے کے لیے سیلاب کے دوران اپنی مرغیوں کو بچانے کی کوئی مؤثر کوشش کرنا ممکن نہیں تھا۔ جب تک وہ مرغیوں کے شیڈ تک پہنچے، ان کی ۱۵ ہزار مرغیاں پانی میں ڈوب چکی تھیں۔ تیز بہتے ہوئے سیلابی پانی میں ان کے پر پھڑپھڑا رہے تھے اور وہ پانی کے ساتھ بہتی جا رہی تھیں۔

منڈے کے پاس گزر بسر کے لیے کچھ زرعی زمین تو ہے، مگر گزشتہ تقریباً ۲۰ برس سے ان کے گھر کے اخراجات کا بڑا سہارا پولٹری کا یہی کاروبار تھا۔

وہ کہتے ہیں، ’’میں آج کم از کم آپ سے بات تو کر پا رہا ہوں۔ چند ماہ پہلے تک تو میں شدید صدمہ کی حالت میں تھا۔‘‘

سرکاری ضابطہ کے مطابق، منڈے کو ہر ہلاک ہونے والی مرغی کے بدلے ۱۰۰ روپے کا معاوضہ ملنا چاہیے تھا، یعنی مجموعی طور پر ۱۵ لاکھ روپے۔ لیکن جب انتظامیہ نے نقصان کا جائزہ لیا تو انہیں صرف ۱۰ ہزار روپے بطور معاوضہ دیے گئے۔

’’یہ تو ایک مذاق تھا،‘‘ وہ کہتے ہیں۔ ’’مجھ پر ۴۰ لاکھ روپے کا قرض ہے۔‘‘

بارشی کے تحصیلدار ایف آر شیخ کے مطابق، انتظامیہ اب تک نقصان اٹھانے والے ۷۳ ہزار کسانوں کے لیے تقریباً ۹۴ کروڑ روپے اور ٹوٹے ہوئے ۱۶۷۰ مکانات کے لیے ۶۸ لاکھ روپے کی امداد منظور کر چکی ہے۔ ’’مرغیوں کے معاملے میں سرکاری قرارداد کے تحت نقصان کی حد ۱۰۰ مرغیوں تک مقرر تھی، اسی لیے انہیں صرف ۱۰ ہزار روپے معاوضہ ملا،‘‘ انہوں نے بتایا۔

تاہم، اب اس بالائی حد کو ختم کر دیا گیا ہے۔ ’’ہم نے ان سے ۱۵ ہزار مرغیوں کی خریداری کی رسیدیں طلب کی ہیں، اور متعلقہ کسان کو مکمل معاوضہ ادا کیا جائے گا،‘‘ انہوں نے مزید کہا۔

لیکن یہ شرط کئی کسانوں کے لیے مشکل ثابت ہو سکتی ہے، کیونکہ برسوں پرانی خریداری کی رسیدیں ہر کوئی محفوظ نہیں رکھتا۔ خوش قسمتی سے منڈھے کے پاس یہ رسیدیں موجود ہیں۔ وہ کہتے ہیں، ’’میرے والد جون میں خون کے کینسر کے باعث انتقال کر گئے تھے، اسی وجہ سے میں فوراً یہ رسیدیں جمع نہیں کرا سکا۔ اب جلد ہی انہیں جمع کرا دوں گا۔‘‘

ادھر منڈے نے خود کو سنبھالتے ہوئے اپنا پولٹری فارم دوبارہ صفر سے شروع کر دیا ہے۔ لیکن یہ آسان نہیں ہے۔ وہ کہتے ہیں، ’’آخری بار میں نے یہ سب کام اپنی تیس سال کی عمر کے آس پاس کیا تھا۔‘‘

ماحولیاتی تبدیلی زرعی بحران کو مزید سنگین بنانے والے اہم عوامل میں سے ایک ہے۔ پہلے مانسون کے دوران مسلسل ہلکی بارش ہوا کرتی تھی، لیکن اب اس کی جگہ اچانک ہونے والی موسلا دھار بارشوں نے لے لی ہے۔ بدلتے ہوئے موسمی حالات کے ساتھ کسانوں کو بھی خود کو ڈھالنا پڑ رہا ہے۔ اب غیر متوقع شدید بارش سے اپنی فصل کو بچانے کی فوری کوشش کرنا ان کی بقا کے لیے ایک لازمی مہارت بن چکی ہے۔ تاہم، معذور کسان اس صورتِ حال میں دوہری مشکل کا سامنا کرتے ہیں۔ ان کے لیے بروقت کوئی انتظام کرنا آسان نہیں ہوتا، اور جب تک مدد پہنچتی ہے، اکثر بہت دیر ہو چکی ہوتی ہے۔

رویندر شندے اس بے بسی اور عدم تحفظ کے احساس کے ساتھ زندگی گزار رہے ہیں کہ اب وہ کسی ہنگامی صورتِ حال میں اپنی فصل کو بچانے کے لیے خود عملی اقدام کرنے کے قابل نہیں رہے۔

شدید گرمی میں کھیت میں ایک درخت کے نیچے بیٹھے شندے کہتے ہیں، ’’میں تو خود اپنے ہاتھ سے پانی بھی نہیں پی سکتا، فصل بچانے کی بات تو بہت دور ہے۔‘‘ پسینہ ان کی پیشانی سے بہہ رہا ہے۔ وہ پانی کی بوتل کی طرف اشارہ کرتے ہیں تاکہ ان کا دوست اس کا ڈھکن کھول دے۔ پھر طنزیہ انداز میں کہتے ہیں، ’’کس بات کا انتظار کر رہے ہو؟‘‘ دوست مسکرا دیتا ہے، بوتل کھول کر انہیں پانی پلاتا ہے اور ان کی پیاس بجھاتا ہے۔

’’میرے والدین اب بوڑھے ہو چکے ہیں اور وہ خود بھی مختلف مسائل کا شکار ہیں،‘‘ شندے مزید کہتے ہیں۔ ’’میرے والد کمر کے درد میں مبتلا ہیں، جبکہ میری والدہ جوڑوں کے درد سے پریشان رہتی ہیں۔‘‘

تاہم، انہیں سب سے زیادہ افسوس اس بات کا ہے کہ وہ اپنی دونوں بیٹیوں کے لیے وہ سب نہیں کر سکتے جو ایک باپ کرنا چاہتا ہے۔ ایک بیٹی ۱۰ سال کی ہے، جبکہ دوسری ۱۲ سال کی۔ وہ نہ تو انہیں موٹر سائیکل پر اسکول چھوڑ سکتے ہیں اور نہ ہی اسکول سے واپس آنے کے بعد ان کے ساتھ کھیل سکتے ہیں۔

’’میں اپنی بیٹیوں کے بچپن سے لطف اندوز ہی نہیں ہو سکا،‘‘ شندے کہتے ہیں۔ ’’ایک باپ کی سب سے بڑی خواہش یہی ہوتی ہے کہ وہ اپنے بچوں کے بچپن کا حصہ بنے۔ یہ افسوس شاید ہمیشہ میرے ساتھ رہے گا۔‘‘

یہ رپورٹ معذوری کے شعبہ میں شمولیت سے متعلق صحافت کے لیے انٹرنیشنل فاؤنڈیشن فار ڈس ایبلٹی اِنکلوژن (آئی ایف ڈی آئی) کی جرنلزم فیلوشپ کے تعاون سے تیار کی گئی ہے۔