माज़ूरी खेतीअ जे मसइलनि खे वधाए थी

“मां शोले जे ठाकुर वांगुरु आहियां”

रवींद्र शिंदे जी चिलविलाई वारी मुर्क ज़ाहिरु करे थी त पाण खे मशहूरु बालीवुड फ़िल्म जे किरिदारु सां भेटींदे हू गदिगदि पियो थिए पर पोइ तर्सी चवे थो, “शायदि नसीबु मूंसां घटि जूठियूं कयूं आहिनि छाकाणि हुन जा त ॿेई हथ कोन हुआ।”

हुन जी जाइ ते बि॒यो केरु हुजे हा त दमु दिलासो छडे॒ डि॒ए हा, पाण ते खिलखाॿारी करण त परियां जी ॻाल्हि आहे पर 47 वरिह्य जे शिंदे में अॼु बि ॻुझी खिलमुखाई (डार्क ह्यूमर) जो जज़्बो बरक़रारु आहे।

शिंदे महाराष्ट्र जे यवतमाल ज़िले जे उमरी ॻोठ में 16 एकड़ ज़मीन जो मालिकु आहे। हू किशोर अवस्था खां ई जवाबदारीअ सां खेती करे रहियो आहे। करम जो काढो हुयो त हुन जे खेती करण जे दौर में ई मुल्क में हारी संकटु शुरू थियो जेको ॾहाकनि खां जारी आहे।

संदसि पीउ कुड़मत मां हासिलु थींदड़ आमदनी सां पंहिंजो घर हलाए सघंदो हो, पर जॾहिं शिंदे शादी कई ऐं ॿाल ॿचनि वारो थियो, तॾहिं सूरतेहाल तब्दीलु थी वेई। वधंदड़ महांगाई, पोख जी क़ीमतुनि में घटिताई, ऐं आबिहवा बदिलाउ सबबु मुंदाइती अड़ांगियुनि जे करे हारी क़र्ज़ में ॿुॾंदा विया।

महाराष्ट्र में खेती कंदड़ परीवार महीने में औसत रुॻो 11492 रुपया कमाए थो। हिन संकट जी झलक राष्ट्रीय अपराध रिकॉर्ड ब्यूरो (एनसीआरबी) जे अंग अखरनि में बि मिले थी। साल 2024 में भारत में 10546 किसाननि आपघातु कयो। याने औसत तौर ते रोज़ 29 आपघात थिया। जेतोणीकि इहो तइदादु हक़ीक़त खां घटि आहे छाकाणि त ज़मीनी सतह ते अंगु अखर हथि करण जे अमल में अक्सरि महिलाऊं दलित ऐं आदिवासी शामिल न कया वेंदा आहिनि। काग॒रनि ते जिनि ज़मीनुनि ते उहे खेती कंदा आहिनि उहे संदनि नाले ते न हूंदियूं आहिनि। इन करे उन्हनि जे आपघातनि खे घणो करे ‘हारी आपघातनि’ जे दर्जे में न रखियो वेंदो आहे।

महाराष्ट्र कुलु आपघातनि मां 36 सेकिड़े याने त 3824 मामलनि जे करे पहिरिएं नंबर ते आहे। सूबे में हारी आपघात जा सभिनी खां वधीक मामला विदर्भ जे इलाइक़े में दर्जु थियनि था। शिंदे जो ॻोठु बि हिन इलाइक़े में अचे थो, जेको कुड़मत जे संकट खे भोॻे रहियो आहे।

पर ज़रो बि समाउ न होसि त संदसि जियापो अञा मुश्किलु थियणु वारो आहे।

आक्टोबर 2021 जी हिक बि॒पहरी में, ओचिती तेज़ हवाउनि ऐं उन बैदि वड॒ फुड़नि शिंदे खे परेशानु करे छडि॒यो। हुन जे खेतनि में सोयाबीन जे लुणियल फ़सुल खे चङीअ रीति रखियो वियो हो ऐं बाज़ार में विकणण जे लाइ तयारु हो। मींहं खां बचाइण जे लाइ उन खे प्लास्टिक जी शीट सां ढकियो वियो हो, लेकिनि संदसि खेतु जे घणो वेझो वेझो हिकु कसी हुई, जंहिं सां ॿोॾि जो ख़तरो बरक़रारु हो।

शिंदे तुरत ई पंहिंजे घर खां थोरो परे मौजूद पंहिंजे खेतु ॾांहुं भॻो। तेज़ हवा में लुॾंदड़ वणनि जे विच में मीज़ान रखी हलणु मुश्किलु हो। फर-फर कंदड़ पन मस ई पंहिंजी शाख़ाउनि सां लॻल हुआ। टीन जे छपरनि ते फुड़नि जो सांदहि गोड़ु फूकार जहिड़ो ॿुधण में आयो पिए।

शिंदे यादि करे थो, “जॾहिं मां पहुतुसि त पाणी मुंहिंजे खेत में तेज़ीअ सां घिड़ी रहियो हो। मूंखे पंहिंजे फ़सुल खे बचाइणो हो।”

खेत मां पाणी कढण जे लाइ मोटर पंप हलाइण जी कोशिश कई पर तेज़ हवाउनि जे करे बिजली जे थंभे मां खेत ताईं ईंदड़ लाइन जो तार निकरी वियो हो। पंप चालू न थियो। मायूस थींदे शिंदे ट्रांसफ़ॉर्मर वटि वियो जंहिं सां मेन स्विच बंद करे सघे। पोइ हुन तार खे ठीकु करण जे लाइ बिजली जे थंभे ते चढ़णु शुरू कयो।

शिंदे चवे थो, “किसान अक्सरि इएं कंदा आहिनि। मूं वटि बिजली विभाग॒ खे फ़ोन करण ऐं उन्हनि जे अचण ताईं इंतिज़ार करण जो वक़्तु कोन हो। उएं बि उहे किसाननि जे लाइ वक़्तु सिरि पहुचंदा ई नाहिनि। ओॾी महिलु मुंहिंजे दिमाग़ में रुॻो सोयाबीन जो फ़सुलु हो।”

हुन खेती ते हिक लख खां वधीक जो ख़र्चो कयो हो ऐं फ़सुल जी क़ीमत इन खां अञा वधीक हुई। “थंभे ते चढंदे महिलु दिलि में रुॻो एतिरी ई ॻाल्हि हुई त मां पंहिंजी पोख खे इएं पाणी में सड़ण नथो ॾेई सघां। अहिंजाई सवाइ हू थंभे ते चढ़ी पियो।” शुरूअ में बि हू केतिरनि ई दफ़े इएं करे चुको हो ऐं खेसि इन जी हेर पियलु हुई पर इन दफ़े इहो आख़िरीं भेरो थियण वारो हो।

जीअं शिंदे पंहिंजो खाॿो हथु तारि ॾांहुं वधायो, बिजली जो तेज़ करंट संदसि सॼे बदन में दौरो करे वियो। हू धू करे पट ते किरियो। होश ख़ता थी वियुसि। “असुल में हुन ट्रांसफ़ॉर्मर जे स्विच जी जाइ समुझण में वेसरि खाधुमि।” हू अॻिते चवे थो, “भांयुमि त स्विच हेठि करणो आहे, पर थी उबि॒तड़ वियो। असुल में मूं थंभे ते चढ़ण खां अॻु हुन खे चालू करे छडि॒यो जॾहिं उहो अॻु में ई बंदु हो।”

सुभाॻो हो जो थंभे जे हेठि बूसे जो ढेरु पथिरियलु हो। शिंदे उन्हीअ ते ई किरियो। आसपासि जा बि॒या हारी हुन खे तकड़ो ई इस्पतालि वठी विया। डॉक्टरनि संदसि ज़िंदगी बचाइण में त कामियाबु रहिया पर उन्हनि खे संदसि खाॿो हथु कुल्हे जे हेठि ताईं धार करणो पियो। हादिसे जे करे संदसि साजे॒ हथ ते बि इन जो असरु पियो। हू हाणे मुठि भीड़े नथो सघे ऐं न वरी पंहिंजियूं आङरियूं हिलाए सघे थो। जड॒हिं हुन खे कंहिं खे फ़ोन करणो हूंदो आहे त मोबाइल खे तिरी ते तश्तरी वांगे रखी स्पीकर ऑन करे ॻाल्हाए थो।

नंढी मुर्क सां गॾु शिंदे ॻाल्हाए थो, “पहिरीं मां पाण ट्रैक्टर हलाईंदो होसि ऐं खेत में हॾ गसाईंदो होसि। हाणे इहे सभु पुराणियूं ॻाल्हियूं आहिनि। शुकर आहे जो मां हुते ई सड़ी ख़ाक न थियुसि।”

साल 2024 में छपियल हिक अभ्यासु – ‘हेल्थ एंड इंजरी आउटकम्स अमंग एग्रीकल्चर वर्कर्स इन इंडिया’ जे मुताबिक़ि भारत में खेती जे शोबे में फ़ी लख पोरिहियतनि ते 334 हादिसा थियनि था। इन मां 5.6 सेकिड़े हादिसा मौतमारु साबित थियनि था।

पड़ताल में शामिल अध खां वधीक माण्हुनि जे मुताबिक़ि सांदहि हिक जहिड़ी जिस्मानी सरगर्मियुनि में शामिलु रहण ऐं असहिंजाई वारे कमनि सां संदनि चेल्हि, गोड॒नि ऐं कुल्हनि में सूरु रहे थो। वधंदड़ उमिर जे करे इहे निसतायूं अञा संजीदह थी वेंदियूं आहिनि। 58 सेकिड़े माण्हुनि जो चवणु आहे त क़र्ज़ु, फ़सुल जी बर्बादी ऐं किसाननि जे आपघात सां वास्तेदार चिंताउनि संदनि मानसिकु सिहत ते बि कोसो वाउ रसायो आहे।

अभ्यास जे मुताबिक़ि छड़ो मध्य प्रदेश में ई किसाननि जे मौतनि ऐं कमु कार बंद रहण जे करे हर साल 170 किरोड़ रुपयनि जो माली हाञो रसे थो।

ज़रई संकटु जिस्मानी तौर ते जॾे माण्हुनि जे लाइ अञा वॾो आहे।

मुल्क में ज़रई संकट ऐं माज़ूरी जे विच जो लाॻापो अञा बि झीणो आहे। ख़ासितौर ते इनकरे त भारत वटि माज़ूरीअ जी चिटी तस्वीर नाहे।

साल 2011 जी आदमशुमारी जे मुताबिक़ि भारत में ब॒ किरोड़ 68 लखु माण्हू दिव्यांग हुआ, जेको मुल्क जी आबादी जो 2.21 सेकिड़ो आहे। इन मां 69 सेकिड़े माण्हू ॻोठनि में रहनि था, जिता घणा रोज़गार सिधे या अणसिधे नमूने खेती सां ॻंढियल आहिनि।

जॾहिं त, भारत 2011 में माज़ूरीअ जे सिर्फ़ु अठ क़िस्मनि खे तस्लीमु कयो। आदमशुमारी जे पंज सालनि बैदि,13 वधीक दर्जा शामिलु कया विया, जंहिं जो मतिलबु आहे त माज़ूर माण्हुनि जो तइदादु तमामु घणो वधीक हुजण जो इम्कानु आहे।

डब्ल्यू.एच.ओ. जो अंदाज़ो आहे त दिव्यांगनि जो तइदादु आलमी आबादी जो लॻभॻि 16 सेकिड़ो आहे, याने फ़ी छह माण्हुनि में हिकिड़ो दिव्यांगु आहे। भारत में मुकमिलु तइदादु 20 किरोड़ खां वधीक हूंदो।

2026-27 जे मर्कज़ी बजट में दिव्यांगजन सशक्तिकरण विभाॻ जे वास्ते 1,670 किरोड़ जो ठहिराउ हो, जेको गुज़िरियलु साल जे मुक़ाबले में अटिकल 30 सेकिड़े या 380 किरोड़ जो वाधारो आहे पर असुलोको मसइलो पैसे जी खोटु न पर उन जो इस्तेमालु न थियण आहे। रिपोर्ट ॿुधाए थी त 2014 जे ईंदड़ साल जे दौरानि राइट्स ऑफ़ पर्संस विद डिसेबिलिटी खे लाॻू कंदड़ मुख़्तलिफ़ योजिनाउनि जे लाइ मुक़ररु 500 किरोड़ रुपयनि खां वधीक ख़र्चु ई न कया विया।

भारत जी खेती अर्थव्यवस्था सां वास्तेदारु ख़राबु हालति जी हिक झलक ॾेखारींदड़ महाराष्ट्र वटि दिव्यांग माण्हुनि जी अददी मालूमात नाहे जॾहिं त सूबे में माज़ूरि माण्हुनि जे लाइ रिथाऊं आहिनि, पर इन्हनि में हिकिड़ी बि रिथा दिव्यांग हारियुनि जे लाइ नाहे। अॻ में लाॻापियलु मंत्रालय में कमु कंदड़ हिकिड़े आफ़ीसरु चयो।

दिव्यांगजन सशक्तिकरण विभाग जे सचिवु डॉ. माणिक गुरसाल चवे थो त हुन खे इहो मालूमु नाहे त खेती ऐं जिस्मानी जॾाई जे गॾियल अनासर ते को अंग-अखर या ख़ासि योजिनाऊं आहिनि।

हुन चयो, “महिरबानी करे कमिश्नर सां ॻाल्हायो।”

हिन रिपोर्टरु कमिशनर सत्यजीत बडे खे हिक ईमेल मोकिली आहे। मोट मिलण ते हिन ख़बर खे अपडेट कयो वेंदो।

सरकारी अंगनि अखरनि मुजिबि, महाराष्ट्र में 36 लखु खां वधीक दिव्यांग आहिनि जेके यूनिक डिसएबिलिटी आईडी (यूडीआईडी) कार्ड जा हक़दार आहिनि। इहो तइदादु मुल्क में ॿियों सभ खां वॾो तइदादु आहे। यूडीआईडी कार्ड ठाहिराइण जे लाइ दिव्यांग खे ऑनलाइन अर्ज़ी विझणी हूंदी आहे ऐं पोइ सरकारी इस्पताल में मेडिकल जाच कराइणी हूंदी आहे।

पर सूबे में रुॻो 14 लख ऐं उन खां थोरा वधीक कार्ड ई जारी कया विया आहिनि। याने महाराष्ट्र में क़रीब 60 सेकिड़े दिव्यांग माण्हुनि वटि इहो कार्डु नाहे। इन जे बिना उहे सरकारी फ़ाइदेमंद योजिनाउनि जो फ़ाइदो नथा वठी सघनि।

27 सालनि जो निलेश वानखेडे़ उन्हनि मां हिकु आहे।

वानखेडे़ यवतमाल ज़िले जे इंजला ॻोठ जो हिकु दलित किसानु आहे। हू 19 वरिह्य जो हो जंहिं ॾींहुं हू पंहिंजे कपह जे फ़सुल ते जीतमार स्प्रै करे घरु मोटियो हो।

हुन जी माउ चंद्रकला (60) यादि कंदे चवे थी, “मानी खाधाईं ऐं काकूस जे लाइ ॿाहिरि निकतो। जड॒हिं अधु कलाक ताईं मोटी न आयो, त मूंखे चिंता थी।”

जॾहिं चंन्द्रकाला पंहिंजे पुट जी ॻोल्हा में वेई, त हुन खेसि बेहोशु ॾिठो। हुन खेसि घाटंजी तालुक़े जे इस्पतालि में दाख़िलु करायो, जितां खेसि यावतमल शहर रेफ़र कयो वियो।

चंद्रकला ॿुधाए थी, “जीतमार दवा जो छिटकारु कंदे महिलु ज़हरु हुन जे सरीर में विचुड़ी वियो। इस्पताल में डॉक्टरनि हुन खे बिस्तर सां ब॒धी करे इंजेक्शन डि॒ना। जड॒हिं ज़हरु उल्टी जे ज़रिए कढियो वियो, तड॒हिं हू मिर्घीअ जे मरीज़ वांगे फथकणु लॻो।”

साल 2017-18 जे दौरानि विदर्भ में 50 खां वधीक हारियुनि जो जीतमार जी ज़हरियत जे करे मौतु थी वियो, जड॒हिं त हिक हज़ार खां वधीक माण्हुनि खे घबि॒राहटु, भंवाटियुनि, नूर घटिजण ऐं पेट सूर जहिड़ी शिकायतुनि जे करे इस्पताल में दाख़िलु कराइणो पियो।

तड॒हिं खां वानखेड़े जी अखियुनि जी जोति पहिरीं जहिड़ी न रही।

जंहिं ॾींहुं निलेश ज़हरियत जो शिकारु थियो, हुन ॾींहुं सिजु सिर ते बीठो हो। संदसि ढाई एकड़ ज़मीन ते बीठल कपह जो फ़सुलु इंतिहाई तप में तपी रही हुई। अॼु बि जड॒हिं मंझंदि जो सिजु मथे ते बीहे थो, त जंहिं हादिसे जे करे हू निस्तो थियो हो, हुन जा दिलि कुहींदड़ उधिमा जाॻी पवनि था। ऊन्हारे में यवतमाल जो गर्मीपदु सांदहि 40 डिग्री सेल्सियस खां मथे रहे थो ऐं अहिड़े में वानखेड़े मुश्किल सां ई कुझु कलाक ई खेतनि में कमु करे सघे थो।

हू सम्झाए थो, “जॾहिं गर्मी थींदी आहे त मुंहिंजी धड़कणि वधी वेंदी आहे। मूंखे मूंझ ऐं घबि॒राहटु थिए थी। मूंखे उहो ॾींहुं यादि अची वेंदो आहे ऐं मां सवलाई सां सोचे बि नथो सघां।”

हाणे हुन जे खेत में मज़ूरी जो ख़र्चो वधी वियो आहे, छाकाणि संदसि माउ-पीउ अकेले ई संभाले न पिया सघनि। संदसि परीवारु कपहु ऐं सोयाबीन पोखे थो। बे॒ई फ़सुल मंडी में घटि में घटि सहिकारी अघ (एमएसपी) खां घटि में घटि 10 सेकिड़े घटि क़ीमतुनि ते विकामंदो आहे, जड॒हिं त खेती जी लाग॒ति सांदहि वधी रही आहे। केतिरनि ई दफ़े इहो वाधारो ओचितो थींदो आहे, जीअं त हेलिको सीज़न में थियो।

ईरान जे ख़िलाफ़ अमरीका ऐं इज़रायल पारां जंग जोटण बैदि भाण जो अघि वधी वियो आहे। हाणे हारियुनि खे फ़ी एकड़ ते घटि में घटि 3000 रुपया बि॒या ख़र्चु करणा पवंदा आहिनि। वानखेड़े चयो, “इन खे मुंहं डि॒यण जो हिकिड़ो ई तरीक़ो आहे त हारी पाण वधीक महिनतु करे, पर मूं लाइ इहो करणु मुमकिनु नाहे।”

हादिसे बैदि अटिकल चार सालनि ताईं वानखेड़े हारिपे में हथि न विझी सघियो। होरियां होरियां कमु ॿीहरु शुरू कयाईं, पर संदसि अखियुनि जो आज़ारु हुन खे सताईंदो रहियो।

“मुंहिंजी नज़र इन्हनि सभिनी सालनि में झीणी रही आहे।” हू चवे थो, “मां नौजवानी में घणो कमु कंदो होसि। मूंखे उमेद हुई त खेत संभालींदुसि ऐं पीउ जो जो बारु हल्को कंदुसि।”

पर हाणे वानखेड़े जी ॾूरांहीं कंहिं शइ ते घणे वक़्त ताईं निहारे नथो सघे। जेकॾहिं हू कुझु देरि कंहिं नज़दीकी शइ खे ॾिसंदो आहे त मथे में सूरु थियणु लॻंदो आहे। तिखी उस में ईंदे ई संदसि अखियुनि में पाणी अचे थो। हाणे इन मसइले जो असरु संदसि पूरे परीवार ते थी रहियो आहे।

हू चवे थो, “मुंहिंजे पीउ खे मैदान में वधीक कलाकनि ताईं कमु करणो पवंदो आहे ऐं गॾोगॾु पोरिहियो बि करणो पवे थो। मूंखे अफ़सोसु थींदो आहे त हिन उमिरि में हुन खे इहो सभु करणो पवे पियो।” संदसि पीउ जी उमिरि 65 साल आहे।

हिन जे बावजूदि वानखेड़े वटि यूडीआईडी कार्डु नाहे। उन खे इहा ख़बर न हुई त अहिड़ो को कार्ड हूंदो आहे छाकाणि त इस्पताल या सरकारी अफ़सरु खेसि हिन ॻाल्हि खे कड॒हिं बि न ॿुधायो। ज़िला समाज कल्याण अधिकारियुनि जी जवाबदारी हूंदी आहे त उहो मकानी इदारनि जी मदद सां रजिस्ट्रेशन केम्पस जो बंदोबस्तु कनि ऐं इहा जाचु कनि त को शख़्सु यूडीआईडी कार्ड जे क़ाबिलु आहे या नाहे। वानखेेड़े जे मामिले में ॾिसण जी सघ सां लाॻापियल हिदायतुनि जो मयारु त आहे, पर अॼु ताईं संदसि अखियुनि जी अहिड़ी काई जाच न थी आहे जंहिं सां इहो पक करे सघिजे त हुन जो कार्डु ठही सघे थो या नथो ठही सघे।

रविंद्र शिंदे जे मामले में हादिसे जे अटिकल टिनि महीननि बैदि यूडीआईडी कार्डु ठही करे आयो। हू अॻिते चवे थो, “मूंखे महीने में 2500 जी कमाई थिए, पर मुंहिंजो ख़र्चो इन खां घणे क़दुरु वधीक आहे।”

साॻी हालतुनि में कपह ऐं सोयाबीन जी खेती में ॿिजु, भाण ऐं जीतमार ते हारियुनि खे फ़ी एकड़ जे लाइ 25 खां 35 हज़ार रूपया ख़र्चु करणा पवनि था। आम तौर ते मज़ूरनि जी घुरिजु फ़क़ति मुंद जे आख़िरि में लाबारे दौरानि पवंदी आहे मगरि हादिसे पुॼाणां शिंदे जी मज़ूरीअ जी लाॻति तमामु वधी वेई आहे छाकाणि हाणे हुन खे मुकमिल फ़सुल जे दौरानि मज़ूर रखणा पवनि था।

हू चवे थो, हिक मज़ूर खे रोज़ु 500 रूपया ॾींदो आहियां ऐं मज़ूरियाणी खे 300 रुपया। “मुंहिंजी खेती जो ख़र्चो बि॒यनि हारियुनि जी भेट में अटिकल ॾेढूणो वधीक आहे। मुंहिंजी चोट 'दुष्काळात तेरावा महिना' मिस्लु आहे।” इन मरहटी पहाके जो मतिलबु आहे, ‘ॾुकार जे महिल तेरहों महीनो अचणु’, याने त हिकिड़ा ॾुख ॿियूं ॾूंगियूं।

शिंदे चवे थो, “खेती में त उएं ई नुक़्सानु आहे, कॾहिं मौसमु सुठो बि हुजे, त बि पोरिहिए जी वधीक लाग॒ति जे हूंदे मूंखे तमामु घटि फ़ाइदो थींदो आहे ऐं जड॒हिं नुक़्सानु थींदो आहे, त तमामु वॾो थींदो आहे। अहिड़े में महीने जे 2500 रूपए मां कीअं पूरी पवंदी?”

साल 2025 में चौमासे जे पुॼाईंदड़ ॾींहनि में जॾहिं तिखी बरसाति महाराष्ट्र जे 68 लख हेक्टेयर जी ॿनियुनि खे तबाहु करे छॾियो। हिन सां 60 लख किसाननि खे नुक़सानु थियो।इन में सउ खां वधीक माण्हुनि जो मौति थी वियो ऐं 3000 घर रतियूं रतियूं थी विया। कारे ककरनि अहिड़ो त वॾ फुड़ो वसायो जंहिं जे करे मीलनि ताईं ॿनियूं पाणीअ में ॿुॾी वियूं। वण पाड़ुनि खां पटिजी विया ऐं बिजलीअ जा थंभ किरी विया। किसाननि खे पंहिंजे फ़सुलनि ऐं चोपाए माल खे बचाइण जे लाइ भॼ डुक करणी पेई।

लेकिनि 53 सालनि जो सुरेश मुंढे बेवसि थी करे पंहिंजो कारोबार खे ॿुॾंदे ॾिसंदो रहियो।

हू यादि कंदे चवे थो, “संझा महिलु अठ खनु थिया जड॒हिं बरसाति शुरू थी। फ़क़ति 15 मिंटनि में ई अङरु भितर थी वियो।”

सोलापुर ज़िले जे उकड़गांव जो रहिवासी बाशिंदे मुंढे खे नंढे हूंदे खां ई पोलियो आहे, इन करे हू कुकिड़ियुनि खे बचाए न सघियो। जेसीं हू शेडु ताईं पहुतो, तेसीं संदसि 15000 कुकिड़ियूं ॿुॾी वेयूं हुयूं। तिखे वहक में उन्हनि जा पर फर फर करे रहिया हुआ ऐं पाणी उन्हनि खे पाण सां गॾु वहाए वियो।

मुंढे वटि गुज़ारे जे लाइ खेती जी ज़मीन आहे, लेकिनि हिन मददी कारोबार ई माज़ीअ जे अटिकल 20 सालनि खां संदसि घर जो ख़र्चो पूरो कयो आहे।

हू चवे थो, “अॼु घटि में घटि मां तव्हां सां ॻाल्हाए सघां पियो। कुझु महीननि पहिरीं त मां सदमे जी हालति में होसि।”

सरकारी ठहिराउ जे मुताबिक़ि मुंढे खे हर मुअल कुकिड़ जे लाइ 100 रुपए जो मुआवज़ो मिलणु खपे याने कुलु 15 लख रुपया। लेकिनि जड॒हिं इंतज़ामिया नुक़्सान जो जाइज़ो वरितो, त उन्हनि खे फ़क़ति 10,000 रुपयनि जो मुआवज़ो डि॒नो वियो।

हू चवे थो, “इहो त मज़ाक़ु हो। मूं ते 40 लख जो क़र्ज़ो आहे।”

बार्शी जे तहसीलदार एफ़आर शेख़ ॿुधायो त हेलिताईं इंतिज़ामिया नुक़्सानु भोॻींदड़ 73000 हारियुनि जे लाइ अटिकल 94 किरोड़ रुपया ऐं तबाहु थियल 1670 घरनि जे लाइ 68 लखु रुपयनि जी मदद मंज़ूर कई वेई आहे। हुन चयो, “कुकड़ियुनि जे मामले में सरकारी प्रस्ताउ जे तहति नुक़्सान जी हद 100 यूनिट ताईं मुक़ररु हुई। हाणे उन्हनि खे 10000 रुपया हासुलु थिया।”

हालांकि, हुन इहो बि ॿुधायो त, “हाणे इहा मथांहीं हद हटाई वेई आहे। असां उन्हनि खां 1500 कुकिड़ियुनि जी ख़रीद जूं रसीदूं घुरियूं आहिनि। वास्तेदार हारियुनि खे उन्हनि जो मुआवज़ो मिली वेंदो।”

लेकिन इहे शर्त किसाननि जे लाइ सवला न आहिनि, छाकाणि केतिरनि ई सालनि पहिरीं ख़रीदु कयल शयुनि जूं रसीदूं हर हिकु किसान संभाले करे नथो रखे सघे। जेतोणीकि मुंडे वटि उहे रसीदूं आहिनि। हू चवे थो, “जून में मुंहिंजो पीउ ब्लड कैंसर सां गुज़ारे वियो हिन करे मां उहे रसीदूं तुरत जमा न कराए सघियुसि। हाणे जल्दु ई जमा कराए छॾंदुसि।”

हिन दौरान पाण खे संभाले करे मुंढे वरी कारोबार शुरू कयो आहे पर इहो एतिरो सवलो नाहे रहियो। हू चवे थो, “मूं इहो कमु जॾहिं पहिरीं शुरू कयो हो, तॾहिं मां अटिकल टीह वरिह्य जो होसि।”

आबिहवा में तब्दीली उन्हनि सबबनि में शुमार आहे जंहिं खेती जे संकट खे अञा वधाए छडि॒यो आहे। पहिरीं जिते घणे अरिसे ताईं सांदहि सन्हो मींहुं वसंदो रहंदो हो, हाणे उन जे बदिरां थोरे वक़्त जे लाइ वड॒ फुड़ा था पवनि। मौसम जे मिज़ाज में तब्दीलीअ जे करे हारियुनि खे पाण खे बदलणो पियो पवे। ओचितो तेज़ बरसात सां फ़सुलु बचाइण जे लाइ खेतनि ॾांहुं भॼण हाणे रोज़ जो कमु थी वियो आहे। जिस्मानी तौर ते निस्ते किसाननि जे लाइ इहा चुनौती अञा वॾी आहे। जेसीं मददु पहुचे थी, तेसीं अक्सरि अवेर थी वेंदी आहे।

रविंद्र शिंदे पाण ते थींदड़ गै़रु यक़ीनी खे रोज़ु महिसूसु करे थो। हू हाणे पंहिंजो फ़सुलु बचाइण जे लाइ कुझ बि करणु जोॻो नाहे।

शिंदे खुलियल खेत में हिक वण जे हेठां सख़्त गर्मी में वेठो आहे। हुन जे पेशानी तां पघर वहे पियो। हू पाणी जी बोतल ॾांहुं इशारो करे थो जंहिं सां संदसि यारु उन जो ढकु खोले ॾिए। हू चवे थो, “फ़सुलु बचाइण त परियां जी ॻाल्हि आहे, मां त पाणी पीअण खां बि मुहिताजु आहियां।” पोइ तंज़ जे अंदाज़ में पंहिंजे दोस्त खां पुछे थो, “तूं अञा कंहिं खे पियो तकीं?” दोस्त खिली पवे थो ऐं हुन खे पाणी पीआरे थो।

शिंदे अॻिते चवे थो, “मुंहिंजा माउ पीउ पोढ़ा थी रहिया आहिनि ऐं हुननि जा पंहिंजा मसइला आहिनि मुंहिंजे पीउ खे जेल में सूरु रहे थो ऐं मुंहिंजी माउ संदनि जे सूरु जे करे परेशान आहे।”

लेकिनि हुन खे सभ खां वधीक अफ़सोसु इन ॻाल्हि जो आहे त हू पंहिंजी धीअरुनि जे लाइ हिक क़ाबिलु पीउ थी न सघियो, जेको हू थियण चाहींदो हो। संदसि धीअरूं 10 ऐं 12 सालनि जूं आहिनि। हू उन्हनि खे मोटरसाइकल ते वेहारे स्कूलु नथो छॾे सघे न वरी घरु मोटण ते उन्हनि सां गॾु रांदि करे सघे थो।

शिंदे चवे थो, “मां ॿालपण वारी चिलविलाई जो मज़ो न माणे सघियुसि। पीउ जी इहा ई त मुराद हूंदी आहे। इन ॻाल्हि जो सदाईं अफ़सोसु रहंदो।”

इन अहिवाल खे डिसएबिलिटी इन्क्लूज़न जर्नलिज़्म फ़ेलोशिप जे तहति इंटरनेशनल फ़ाउंडेशन फ़ॉर डिसएबिलिटी इन्क्लूज़न (आईएफ़डीआई) जो सहिकारु हासुलु आहे।