अपंगता के मार, किसान बेहाल

“मंय शोले के ठाकुर जइसने अंव.”

रवींद्र शिंदे के नटखट हाँसी ले अइसन लगथे के वो ह अपन तुलना बॉलीवुड फिलिम के संजीव कुमार के किरदार ले करत गदगद हवय. फेर वो ह थोकन रुक जाथे. “ हो सकते मंय जादा किस्मत वाले अंव. ओकर त दूनों हाथ चले गे रहिस.”

ओकर जइसने हालत मं अधिकतर लोगन मन आगू बढ़े के साहस खो देथें, अपन जिनगी के मजाक करे त दूरिहा के बात आय. फेर 47 बछर के सियान शिंदे के मजाकिया सुभाव अभू घलो बने हवय.

महाराष्ट्र के यवतमाल जिला के उमरी गाँव मं 16 एकड़ जमीन के मालिक किसान, जेन ह किसोर उमर ले पूरा लगन ले खेती करत हवय. बदकिस्मती ले, ओकर खेती करे के बखत, वो बखत ले मेल खाथे जब खेती किसानी के संकट सुरु होय रहिस, जेन ह कतको बछर बाद घलो चलत हवय.

ओकर ददा खेती के आमदनी ले घर चलावत रहिस, फेर जब शिंदे के बिहाव होइस अऊ लोग-लइका होइन त हालत बदल गे. बढ़त महंगाई, फसल के गिरत दाम अऊ बदलत मऊसम सेती बिगड़त मऊसम- जइसने बनेच बखत तक ले पानी नइ गिरे, येकर सेती खेती के करजा बढ़त गिस.

महाराष्ट्र मं खेती ले होवेइय्या प्रति परिवार आमदनी बनेच कम हवय, सिरिफ 11, 492 रूपिया महीना. ये संकट के झलक नेशनल क्राइम रिकॉर्ड्स ब्यूरो के आंकड़ा मन मं घलो मिलथे – साल 2024 मं देस (भारत) मं किसान मन के आत्महत्या के 10, 546 मामला दरज करे गिस. मतलब हरेक दिन 29 आत्महत्या. असल मं ये आंकड़ा घलो कम करके बताय गे रहिस, काबर के जमीनी स्तर मं आंकड़ा जुटाय बखत अक्सर माइलोगन, दलित अऊ आदिवासी मन ला छोड़ दे जाथे. ये मन ले अधिकतर करा जमीन के मालिकाना हक के कागजात नइ रहय, जेन जमीन मं खेती करथें. ते पायके, ओकर मन के आत्महत्या ला अक्सर “खेती ले जुड़े” आत्महत्या के रूप मं नइ गिने जाय.

महाराष्ट्र 3, 824 आत्महत्या के संग लिस्ट मं सबले उपर रहिस जेन ह कुल संख्या के 36 फीसदी आय. महाराष्ट्र मं किसान मन के सबले जादा आत्महत्या विदर्भ इलाका मं होय हवय. शिंदे के गाँव घलो इहीच इलाका मं हवय, जेन ह खेती-किसानी के संकट ले जूझत हवय.

फेर ओला निच्चट घलो अंताज नइ रहिस के जिनगी अऊ घलो कठिन होवेइय्या हवय.

अक्टूबर 2021 के मंझनिया, अचानक भारी धुका-गर्रा अऊ झड़ी ह शिंदे ला चिंता मं डार दिस. ओकर सोयाबीन के फसल लुवा के खेत मं रहिस अऊ बेचे के लइक होगे रहिस. पानी ले बचाय बर प्लास्टिक पनपनी तोपे गे रहिस, फेर ओकर खेत ह नरूआ के लकठा मं रहिस, जिहां पानी चढ़े के खतरा बने रहिस.

शिंदे अपन घर ले थोकन दूरिहा खेत डहर जाय लगिस. धुका गर्रा मं डोलत रूख-रई मन ले बांचत वो ह रेंगत जावत रहिस. भारी झड़ी ले टीना के छानी वाले घर मन ले निकरत आवाज ककरो कलपे कस लगत रहय.

शिंदे सुरता करथे, “जब मंय अपन खेत हबरेंय, त पानी तेजी ले भीतरी खुसरत रहिस. मोला अपन फसल बचाय ला रहिस.”

वो ह पानी निकारे बर मोटर पंप चलू करे के कोसिस करिस. फेर धुका गर्रा सेती बिजली के खंभा ले ओकर खेत तक आय बिजली के तार ह निकर गे रहिस. मोटर पंप चालू नइ हवत रहय. कनझटा के वो ह खंभा मं चढ़े के पहिली में स्विच ला बंद करे बर ट्रान्सफार्मर डहर भागिस.

शिंदे कहिथे, “किसान मन अक्सर अइसने करथें. मोर करा बिजली आफिस ला फोन करके बलाय, ओकर मन के आय अऊ सुधारे ला अगोरे रहत के बखत नइ रहिस. वइसे घलो ओ मन किसान मन करा कभू बखत मं नइ आवंय. मंय बस अपन सोयाबीन के फसल ला बचाय के सोचत रहेंय.”

वो ह येकर खेती मं एक लाख रूपिया ले जादा पइसा खरचा करे रहिस अऊ फसल के दाम येकर ले बनेच जियादा रहिस. “मोला येला पानी मं सरके खइता होय नइ देना हे,” वो ह सोचिस अऊ तुरते खंभा मं चढ़गे; ओला ये सब करे के आदत रहिस. वो ह येकर पहिली कतको पईंत करे रहिस. फेर ये ह आखिरी बेर रहिस.

जइसनेच शिंदे ह अपन डेरी हाथ ले तार ला धरिस, ओला बिजली के जोरदार झटका लगिस. वो अचेत होके गिर परिस. ओला ट्रांसफ़ॉर्मर के स्विच के सही जगा के अंताज नइ रहिस. शिंदे कहिथे, “मोला लगिस के मोला येला तरी खींचना हे. असल मं, खंभा मं चढ़े के पहिलीच मंय वोला चालू कर दे रहेंय, फेर वो ह पहिलीच ले बंद रहिस.”

किस्मत रहिस के शिंदे खंभा ले गिरके भूंइय्या मं रखे भूसी के ढेरी मं गिरिस. दूसर किसान मन ओला तुरते अस्पताल ले गिन. डॉक्टर ओकर परान बचा लिस, फेर ओकर डेरी हाथ ला बचाय नइ सकिस. खांध ले ओकर डेरी हाथ काटे ला परिस. शिंदे के जउनि हाथ घलो नइ चलिस – वो ह अपन हथेली ला बंद करके मुट्ठा पारे नइ सकय अऊ न अपन ऊँगली मन ला हला सकथे. जब ओला कोनो ला फोन करे ला होथे, त वो ह अपन मोबाइल ला हथेली उपर धरथे अऊ स्पीकर फोन मं गोठियाथे.

शिंदे थोकन उदास होके मुचमुचावत कहिथे, “मंय खेत मं ट्रेक्टर चलावत रहेंय अऊ पछिना बोहावत रहेंय. अब वो सब्बो खतम होगे. भगवान करिस के मंय उहिंचे जरके राख नइ होवंय.”

साल 2024 मं छपे एक ठन अध्ययन -भारत मं बनिहार-भुतियार मन के सेहत अऊ अलहन के नतीजा-के मुताबिक, खेती-बारी के बूता मं हर एक लाख बनिहार मन मं 334 अलहन होथे. ये मं 5.6 फीसदी अलहन जानलेवा होथे.

सर्वे मं सामिल आधा ले जियादा लोगन मन घेरी बेरी एकेच किसम के बूता करे सेती अऊ बने ढंग ले उठे-बइठे धन बूता करे सेती कनिहा, माड़ी अऊ खांध मं दरद के बात करिन; येकर ले बुढ़ापा मं होवेइय्या देह के दिक्कत अऊ बढ़ जाथे. करीबन 58 फीसदी लोगन मन करजा, फसल खइता होय अऊ आत्महत्या जइसने कारन ले जन्मे दिक्कत के बात करिन, जेकर ले दिमागी सेहत ले जुड़े कतको दिक्कत होइस.

अध्ययन के मुताबिक, सिरिफ मध्य प्रदेश मं मरे अऊ काम बंद रहे ले सालाना 170 करोड़ रूपिया के हरजा होइस.

खेती-बारी के संकट के बोझा असकत किसान मन के उपर अऊ घलो जादा गरु आय.

देस मं खेती के संकट अऊ अपंगता के बीच के संबंध साफ नइ ये – खासकरके येकर बर काबर के भारत मं अभू घलो बड़े पैमाना मं अपंगता के कोनो सही-सही अऊ साफ आंकड़ा नइ ये.

साल 2011 के जनगणना के आंकड़ा मुताबिक, भारत मं 2. 68 बिकलांग रहिन, जेन ह कुल आबादी के 2. 21 फीसदी आय. ये मं 69 फीसदी लोगन मन गाँव-देहात मं रहिथें, जिहां लोगन मन के जीविका कोनो न कोनो किसम ले खेती ले जुरे रहिथे.

वइसे, साल 2011 मं देस (भारत) ह बिकलांगता के सिरिफ आठ बरग ला माने रहिस. जनगणना के पांच बछर बाद, 13 ठन अऊ बरग जोड़े गिस, जेकर मतलब आय के बिकलांग लोगन मन के संख्या कहूँ जादा होय के संभावना हवय.

डब्लूएचओ के अनुमान हवय के दुनिया के आबादी के करीबन 16 फीसदी हिस्सा, मतलब हर छै झिन मं एक झिन बिकलांग हवय. ये हिसाब ले, देस मं येकर कुल संख्या 20 करोड़ ले जियादा होही.

साल 20 26-27 के केंद्रीय बजट मं 'दिव्यांगजन सशक्तिकरण विभाग' बर 1,670 करोड़ रूपिया आवंटित करे गिस – ये ह करीबन 30 फीसदी के बढ़ोत्तरी आय, जेकर ले बीते बछर के बनिस्बत करीबन 380 करोड़ रूपिया उपराहा मिले हवय. वइसे, समस्या पइसा के पूरा काम मं नइ होय आय. साल 2014 ले 10 बछर तक, 'दिव्यांगजन अधिकार अधिनियम' ला लागू करे के योजना मन बर बांटे गे 500 करोड़ रूपिया ले जियादा के रकम खरचा नइ करे जा सकिस.

महाराष्ट्र, जउन ह देस के कृषि अर्थव्यवस्था के खराब हालत के एक झलक दिखाथे, ओकर करा खेती-बारी के बूता मं लगे असकत लोगन मन के कोनो आंकड़ा नइ ये. संबंधित मंत्रालय मं पहिली काम कर चुके एक झिन अफसर ह बताइस के वइसे सरकार करा असकत लोगन मन बर कतको योजना हवंय, फेर ये मन ले कोनो घलो खास करके किसान मन बर नो हे.

दिव्यांगजन सशक्तिकरण विभाग के सचिव डॉ. माणिक गुरसाल कहिथे के ओला ये बात के जानकरी नइ ये के खेती अऊ असकत लोगन मन के सबंध मं कोनो आंकड़ा धन खास योजना हवय धन नइ.

वो ह कहिथे, “बिनती हे के कमिश्नर ले पता कर लेव.”

ये रिपोर्टर ह कमिश्नर सत्यजीत बडे ला ईमेल भेजके जानकारी मांगे हवय. जुवाब मिले के बात ये कहिनी मं जोड़े जाही.

सरकारी आंकड़ा मन के मुताबिक, महाराष्ट्र मं 36 लाख ले जादा असकत लोगन मन हवंय – जेन ह देस मं दूसर सेबल बड़े संख्या आय – अऊ वो ह केंद्र सरकार डहर ले जारी 'यूनिक डिसेबिलिटी आईडी’ (यूडीआईडी) कार्ड के काबिल हवंय. असकत मइनखे ला एक ठन ऑनलाइन आवेदन फ़ॉर्म भरना होथे अऊ सरकारी अस्पताल मं मेडिकल जांच करवाय ला परथे.

फेर राज मं सिरिफ 14 ले जादा यूडीआईडी कार्ड जारी करे गे हवय. दूसर ढंग ले कहे जाय त, महाराष्ट्र मं असकत मन के आबादी के 60 फीसदी लोगन मन ला यूडीआईडी कार्ड नइ मिले हवय, जेकर बगेर कोनो योजना के लाभ लेगे नइ जाय सकय.

उहिच मन ले एक झिन 27 बछर के नीलेश वानखेड़े हवय.

वानखेड़े यवतमाल के इंजाला गाँव के एक झिन दलित किसान आंय. जेन दिन वो ह कपसा मं दवई (कीटनाशक) छींच के घर लहूटिस, वो दिन वो ह 19 बछर के रहिस.

ओकर 60 बछर के सियानिन दाई चंद्रकला बताथे, “मंझनिया खाइस अऊ हरू होय बर घर ले बहिर निकरिस. जब वो ह आधा घंटा तक ले नइ लहूटिस,त हमन ला चिंता होय लगिस.”

जब चंद्रकला अपन बेटा ला खोजे निकरिस, त वो ह ओला अचेत परे मिलिस. वो ह तुरते घाटनजी तालुका के अस्पताल ले गिस, जिहां ले वोला यवतमाल शहर भेज दे गिस.

वो ह कहिथे, “ दवई छिंचे बखत ओला जहर चढ़ गे रहिस. जब डाक्टर मन ओला इंजेक्शन लगावत रहिन,त ओला अस्पताल के बिस्तर ले बांध दे गे रहिस. जब वो ह जहर उछारे लगिस त वो ह मिर्गी के मरीज कस तड़फे लगिस.”

साल 2017-18 मं विदर्भ मं दवई के जहर के असर ले 50 ले जियादा किसान मन के परान चले गिस अऊ 1,000 ले जादा किसान मन ला जी घबराय, चक्कर आय, देखे मं दिक्कत अऊ पेट पीरा सेती अस्पताल मं भरती कराय ला परिस.

तब ले वानखेड़े के नजर कभू घलो पहिली कस नइ आइस.

जउन दिन ओला जहर चढ़े रहिस, तउन दिन भारी घाम रहिस. भारी घाम ले ओकर 2.5 एकड़ के खेत मं लगे कपसा झुलस जावत रहिस. जब घलो भारी घाम होथे, ओला मऊत के मुंह ले लहूट आय के सुरता आ जाथे – अऊ वो ह निढाल पर जाथे. घाम मं यवतमाल के गरमी 40 डिग्री ले ऊपर चले जाथे, अऊ वानखेड़े खेत मं मुस्किल ले कुछेक घंटा बूता करे सकथे.

वानखेड़े बताथे, “जब घलो भारी जादा घाम होथे, त मोर धुकधुकी बाढ़ जाथे. मोला डर अऊ बैचेनी लागथे. मोला वो बखत सुरता आ जाथे अऊ मंय बने करके सोचे-बिचारे नइ सकंव.”

ओकर बनिहारी के खरचा बढ़गे हवय काबर के ओकर दाई-ददा खेती संभाले नइ सकंय. ये परिवार कपसा अऊ सोयाबीन कमाथे – बजार मं ये दूनों फसल हमेसा न्यूनतम समर्थन मूल्य (एमएसपी) ले कम से कम 10 फीसदी कम दाम मं बेचाथे, फेर खेती के खरचा बढ़त रहिथे, अऊ अक्सर ये ह अचानक बढ़थे, जइसने के ये सीजन मं होय हवय.

जब ले अमेरिका अऊ इज़राइल ह ईरान ले लड़ई करे हवंय, तब ले खातू महंगी होगे हवय,जेकर ले किसान मन ला एकड़ पाछू कम से कम 3,000 रूपिया जादा खरचा करे ला परत हवय. वानखेड़े कहिथे, “मूल निकारे के एकेच तरीका हवय के खुदेच जियादा बूता करे जाय, फेर मोर बस मं ये नइ ये.”

सुरु मं करीबन चार बछर तक ले वानखेड़े ह खेत मं कामेच नइ करिस. धीरे-धीरे वो ह करे ला धरिस, फेर ओकर आंखी के तकलीफ अब तक ले हवय.

वो ह कहिथे, “अतक बछर मं मोर नजर धुंधला रहे हवय. किसोर उमर मं मंय भारी मिहनत करत रहेंय. मोला आस रहिस के मंय खेती संभाल लिहूं अऊ मोर ददा के बोझा हरू हो जाही.”

फेर वानखेड़े दूरिहा के जिनिस मन ला गम करे नइ सकय. गर वो ह कुछु घड़ी लकठा के जिनिस मन ला देखथे, त ओकर मुड़ पिराय लगथे. भारी घाम मं निकरतेच ओकर दूनों आंखी ले आंसू निकरे लगथे. ओकर आंखी के ये तकलीफ के असर पूरा परिवार उपर परे हवय.

वो ह कहिथे, “मोर ददा ला खेत मं जियादा बखत बूता करथे अऊ बनिहार कस घलो करे ला परथे. मोला दुख लागथे के ओला ये उमर मं बूता करे ला परत हवय,” ओकर ददा 65 बछर के हवय.

येकर बाद घलो, वानखेड़े तीर यूडीआईडी कार्ड नइ ये. ओला त येकर बारे मं पता घलो नइ रहिस काबर के कोनो घलो अस्पताल धन अफसर मन ओला येकर बारे मं नइ बताइन. जिला कल्याण अफसर मन के जिम्मेदारी हवय के वो मन सुभीता सेती स्थानीय संगठन के मदद ले रजिस्ट्रेशन कैंप लगवाएं अऊ ये जाँच करेंय के कोनो मइनखे यूडीआईडी कार्ड के काबिल हवय धन नइ. वानखेड़े के मामला मं, नियम-कानून मं देखे के ताकत ले जुड़े एक ठन पैमाना हवय, फेर ओकर आंखी मन के जांच कभू नइ करे गिस ये जाने बर के ओकर कार्ड बन सकथे धन नइ.

शिंदे ला अपन संग होय अलहन के बाद यूडीआईडी कार्ड मिले मं करीबन तीन महीना लग गे. वो ह कहिथे, “मोला हरेक महीना 2,500 रूपिया मिलथे, फेर मोर खरचा ओकर ले कहूँ जादा हवय.”

कपसा अऊ सोयाबीन के खेती मं एक किसान ह बीजा, खातू अऊ दवई ऊपर एकड़ पाछू 25,000 ले 35,000 रूपिया तक के खरचा करथे. बनिहार सिरिफ आखिर मं लुवई बखत करे जाथे. फेर अलहन होय के बाद ले शिंदे के बनिहारी खरचा बढ़ गे हवय, काबर के पूरा फसल होवत तक ले ओला बनिहार करे ला परथे.

वो ह कहिथे, “मंय बनिहार ला 500 रूपिया अऊ बनिहारिन ला 300 रूपिया रोजी देथों. मोर खरचा दीगर मन के बनिस्बत करीबन डेढ़ गुना हवय. मोला लगे चोट दुष्काळात तेरावा महिना के एक ठन उदाहरन आय.” ये मराठी हाना के मतलब आय “ दुकाल के तेरहवाँ महीना” – जइसने दुब्बर बर दू असाढ़.

शिंदे कहिथे, “खेती वइसे घलो घटा के काम आय. कभू-कभार जब सीजन बढ़िया रहिथे, तभे ले घलो बनिहारी के खरचा जियादा होय सेती मोला कम फायदा मिलथे. फेर जन नुकसान होथे, त बनेच बड़े होथे. अइसन मं महीना के मिलेइय्या 2,500 रूपिया ले येकर भरपाई कइसने होही?”

साल 2025 मं बरसात सीजन के आखिर मं गिरे भारी पानी ह जम्मो महाराष्ट्र मं 68 लाख हेक्टेयर खेती ला बोहा ले गिस, येकर ले 60 लाख किसान मन के उपर असर परिस. 100 ले जियादा लोगन मन के जान चले गिस अऊ 3,000 घर टूट फूट गे. तूफानी बादर ले झड़ी लग गे, जेकर ले कोसों दूरिहा तक के खेती पानी मं बूड़ गे, रुख अऊ बिजली खंभा मन गिरगे. किसान अपन फसल बचाय अऊ अपन मवेसी मन ला सुरच्छित ठीहा मं ले जाय के उदिम करे लगिन.

फेर 53 बछर के सुरेश मुंधे लाचार होके अपन कारोबार ला डूबत देखत रहिगे.

मुंधे सुरता करत कहिथे, “संझा के करीबन 8 बजे रहिस जब झड़ी सुरु होइस. सब्बो कुछु बरबाद होय मं बस 15 मिनट लगिस.”

सोलापुर जिला के उक्कड़गाँव मं बचपनाच ले पोलियो ले जूझत ओकर बर बचाय के काम ओकर हाथ मं नइ रहिस. जब तक ले वो ह कुकरी छपरी/कुंढ़रा/खोरड़ा तक हबरिस, तब तक ले ओकर 15,000 कुकरी मन बूड़ चुके रहिन – जोर ले बोहावत पानी वो मन ला बोहाके ले जावत रहिस अऊ वो मन अपन पांख फड़फड़ावत रहिन.

मुंधे करा गुजारा बर खेत हवय, फेर वो ह बीते करीबन 20 बछर ले घर चलाय बर खेती ले जुड़े दीगर बूता ले काम चलावत हवय

वो ह कहिथे. “आज कम से कम मंय तुमन ले गोठियाय सकत हवं. कुछेक महीना पहिली तक ले मंय सदमा मं रहेंय.”

सरकार के प्रस्ताव मुताबिक, मुंधे ला अपन हरेक मरे कुकरी बर 100 रूपिया मिले ला रहिस. मतलब कुल मिलाके 15 लाख रूपिया. फेर जब प्रशासन ह नुकसान के जायजा लिस, त वोला मुआवजा के रूप मं सिरिफ 10,000 रूपिया मिलिस.

“ये ह मज़ाक करे कस रहिस, वो ह कहिथे. “मोर उपर 40 लाख रूपिया के करजा हवय.”

बारशी के तहसीलदार एफ.आर. शेख ह बताइस के प्रशासन ह अब तक ले नुकसान झेलेइय्या 73,000 किसान मन बर करीबन 94 करोड़ रूपिया अऊ टूटे फूटे 1,670 घर बर 68 लाख रूपिया मंज़ूर करे हवय. वो ह कहिथे, “कुकरी मन के मामला मं, सरकारी प्रस्ताव के तहत नुकसान के भरपाई के सीमा 100 यूनिट तय करे गे रहिस. येकरे सेती वोला 10,000 रूपिया मिलिस.”

वइसे, अब वो ऊपरी सीमा मं ढील दे दे गे हवय. वो ह कहिथे, “हमन 15,000 कुकरी बिसोय के रसीद मांगे हवन अऊ वो किसान ला ओकर मुआवजा मिला जाही.”

ये ह एक ठन मुस्किल मांग आय काबर के हो सकथे के किसान मन कतको बछर पहिली पहिली बिसोय के रसीद जतन करके राखे न होंय. वइसे,मुंधे करा वो रसीद मन हवंय. वो ह कहिथे, “जून मं ब्लड कैंसर ले मोर ददा ह गुजर गे. मंय वो रसीद मन ले तुरते जमा करे नइ सकंय, मंय जल्दीच जमा करहूँ.”

इही बखत मं मुंधे ह अपन आप ला संभाल लिस अऊ अपन कारोबार ला फिर ले सुरु करिस. फेर ये आसान नइ ये. वो ह कहिथे, “जब मंय सुरु करे रहंय, वो बखत तिस बछर के रहेंय.”

बिपत मं परे खेती-किसानी ला अऊ बढ़ेइय्या खास कारन मन ले एक ठन आय बदलत मऊसम. अब सरलग झिपिर-झिपिर बरसे के जगा अचानक ले भारी बरस जाथे. बदलत मऊसम ला देख के किसान मन ला घलो अपन आप ला वइसने ढाले ला परत हवय – अचानक होय भारी बरसा ले अपन फसल बचाय के उदिम अब जिनगी गुजारे बर एक ठन हुनर बन गे हवय. असकत किसान मन बर त दुब्बर बर दू असाढ़ हो जाथे. जब तक ले ओ मन ला मदद मिलथे, तब तक ले बनेच देरी हो चुके होथे.

रवींद्र शिंदे ह बचाय के काम करे नइ सके सेती अचिंता नइ रहय.

भारी घाम मं खेत के रुख तरी बइठे शिंदे कहिथे, “मंय त अपन आप पानी घलो पीये नइ सकंव, अपन फसल ला बचाय के बातेच छोड़ो.” ओकर माथा ले पछीना बोहावत हवय अऊ वो ह अपन संगवारी ला पानी के बोतल के ढक्कन खोले के आरो करथे. वो ह ताना मारत कहिथे,”काय अगोरत हस?” संगवारी हांसथे अऊ पानी पियाथे.

शिंदे कहिथे, “मोर दाई-ददा डोकरा सियान होवत जावत हवंय अऊ ओकर मन के अपन कतको दिक्कत हवय. मोर ददा ले पीठ के समस्या हवय अऊ मोर दाई ह जोड़ मं दरद ले हलाकान रहिथे.”

फेर वोला ये बात के भारी दुख हवय के वो ह अपन बेटी मन बर अपन मन के करे नइ सकय. ओकर बेटी मन 10 अऊ 12 बछर के हवंय. न वो ह फटफटी मं स्कूल छोड़े जाय सकय अऊ न स्कूल ले घट लहूटे के बाद ओकर मन संग खेले सकय.

वो ह कहिथे, “मंय ओकर मन के बचपना के आनंद नइ लेगे सकंय. ये ह एक ठन अइसने जिनिस आय जेन ह हरेक ददा लेगे ला चाहथे. मोला हमेसा ये बात के दुख रइही.”

ये कहिनी ला इंटरनेशनल फाउंडेशन फॉर डिसेबिलिटी इंक्लूजन (आईएफडीआई) के जर्नलिज्म फेलोशिप ऑन डिसेबिलिटी इंक्लूजन डहर ले मदद मिले हवय