देह के लाचारी बढ़इलक किसान के बदहाली

“हम शोले के ठाकुर निहर बानी.”

रविन्द्र शिंदे के चंचल मुस्कराहट से साफ़ बा कि उनके ई तुलना पसंद बा. उ आपन तुलना प्रसिद्ध बॉलीवुड फिल्म के संजीव कुमार वाला पात्र से कर रहल बाड़ें. बाकिर फिर उ रुकेलन आ कहेलन, “शायद हम ढेर भाग्यशाली बानी. उनकर दूनो हाथ ना रहे.”

उनकरी हालत में अधिकतर लोग खातिर अपनी जीवन पर मजाक त दूर के बात बा, आगे बढ़े के हिम्मत जुटावल भी मुश्किल होला. बाकिर 47 बरिस के शिंदे के भीतर डार्क ह्यूमर बाचल बा.

महाराष्ट्र के यवतमाल जिला के उमरी गांव के शिंदे 16 एकड़ जमीन वाला किसान हवें आ किशोरावस्था से ही ए जमीन में लगन से खेती कर रहल बाड़ें. दुर्भाग्य से उनकर खेती में प्रवेश तब्बे भईल जब एगो कृषि संकट शुरू भईल रहे जवन दशकन ले चलल.

उनकर पिता खेती के आमदनी से आपन घर चला सकत रहलें बाकिर जब शिंदे के बियाह भईल आ बच्चा भईल तबले कहानी बदल चुकल रहे. बढ़त महंगाई, फसल के घटत दाम आ जलवायु परिवर्तन के वजह से मौसम के चरम हालत जैसे लम्बा सूखा वगैरह से खेती के कर्जा बढ़ गईल.

महाराष्ट्र के घरन में कृषि से होखे वाला आमदनी मात्र 11,492 रुपया महीना बा. ई संकट नेशनल क्राइम रिकार्ड्स ब्यूरो के आंकड़ा में भी देखाता जेकरी अनुसार 2024 में भारत में 10,546 किसान आत्महत्या कईलें. यानि हर दिन 29 लोग अपना के खतम कईलस. आ ई आंकड़ा अभी बहुत कम बा काहें कि जमीनी स्तर पर आंकड़ा जुटावे में अक्सर मेहरारू, दलित आ आदिवासी लोगन के नजरंदाज कर दिहल जाला. कागजन पर, एमे से ज्यादातर लोग अपनी खेती के जमीन के मालिक ना हवें एही से उनकरी आत्महत्या के ‘कृषि’ आत्महत्या ना मानल जाला.

महाराष्ट्र 3,824 आत्महत्या के संघे सूची में सबसे ऊपर रहे जवन कुल संख्या के 36 प्रतिशत बा. महाराष्ट्र के कृषि आत्महत्या के बड़ हिस्सा विदर्भ में केन्द्रित बा. शिंदे के गांव ओही क्षेत्र के हिस्सा हवे जवन कृषि संकट के चुनौतियन से जूझ रहल बा.

बाकिर उनके अंदाजा ना रहे कि जीवन अभी और मुश्किल होखे वाला बा.

अक्तूबर 2021 के एगो दुपहरिया में अचानक तेज हवा के संघे मूसलाधार बरखा से शिंदे चौकन्ना हो गईलें. उनकर सोयाबीन के फसल एकदम सुंदर ढंग से उनकी खेत में जमल रहे जेके बाजार में बेचे के तैयारी रहे. ओके बरखा से बचावे खातिर उ प्लास्टिक के चादर से तोपले रहलें बाकिर उनकर खेत एगो नाला के लग्गे रहे जेसे एइजा बाढ़ के खतरा रहे.

शिंदे अपनी खेत की ओर भगलें जवन उनकी घर से ढेर दूर ना रहे. उ चारों ओर से हिलत पेड़न के बीच में संतुलन बनवले राखे खातिर जूझत रहलें. पेड़न के पतई अपनी शाखा से बड़ी मुश्किल से चिपकल रहे. बारिश जब टीन के छत पर गिरे त ओकर गड़गड़ाहट से भयानक आवाज पैदा होत रहे.

“जब हम पहुंचनी त पानी हमरी खेत में आवत रहे. हमके आपन फसल बचावे के रहे,” शिंदे याद करेलन.

उ पानी निकाले खातिर मोटरपम्प चालू करे के कोशिश कईलें. बाकिर तेज हवा से बिजली के खम्बा से उनकी खेत ले बिजली पहुंचावे वाला लाइन के जोड़े वाला तार उखड़ गईल रहे. मोटरपम्प चालू ना भइल. हताश हो के उ ट्रांसफार्मर के लगे भगलें ताकि खम्बा पर चढ़ के तार ठीक करे से पहिले मुख्य स्विच बंद कर सकें.

“किसान लोग अइसन अक्सर करेला. बिजली विभाग के बोला के उनकी आवे आ समस्या ठीक होखे के इंतजार करे के हमरी लगे समय ना रहे. वैसे भी, किसानन खातिर उ लोग कब्बो समय पर ना आवेला. ओ समय पर हमरी दिमाग में बस आपन सोयाबीन के फसल ही रहे,” शिंदे बतावेलन.

ए खेती में शिंदे एक लाख से ढेर पईसा के निवेश कईले रहलें आ फसल के दाम एसे भी ढेर रहे. “हम एके पानी में सड़े ना दे सकेनी,” उ सोचलें आ सालन के अभ्यास से फुर्ती से बिजली के खम्बा पर चढ़ गईलें. उ ई काम पहिली बेर ना करत रहलें बाकिर इहे आखिरी बेर साबित भईल.

जैसे ही शिंदे तार पकड़े खातिर आपन बायां हाथ आगे बढ़वलें, बिजली के तेज करेंट उनकी पूरा शरीर में दौड़ गईल. उ बेहोश हो के नीचे गिर गईलें. ट्रांसफार्मर के स्विच के स्थिति समझे में उनसे गलती हो गईल रहे. “हमरा लागल कि स्विच नीचे कईला से उ बंद हो जाई. असल में उ पहिले से बंद रहे, त खम्बा पर चढ़े से पहिले हम ही ओके उल्टा चालू कर दिहनी,” शिंदे कहेलन.

सौभाग्य से शिंदे खम्बा के ठीक नीचे रखल भूसा के ढेर पर गिरलें. आसपास के किसान लोग उनके तुरंत अस्पताल ले गईल. डॉक्टर लोग उनकर जान त बचा लिहल बाकिर उनकर बायां हाथ ना बाचल. कंधे से उनकर हाथ काटे के पड़ल. शिंदे के दाहिने हाथ पर से भी नियंत्रण लगभग खतम हो गईल. उ ना त हथेली बंद कर के मुट्ठी बान्ह सकेलें आ ना ही आपन अंगुरी हिला सकेलें. जब उनके केहू के फोन करे के होला त उ मोबाइल के तश्तरी निहर टिका के स्पीकरफोन पर बात करेलें.

“हम ट्रेक्टर चलाईं आ खेत में जी-तोड़ मेहनत करीं,” शिंदे फीका मुस्कान संघे कहेलन. “अब उ सब पुरान बात हो गईल बा. अब त एतने शुक्र मना सकेनी कि ओही समय जल के राख ना हो गईनी.”

साल 2024 में प्रकशित अध्ययन ‘हेल्थ एंड इंजरी आउटकम्स अमंग एग्रीकल्चर वर्कर्स इन इंडिया’ के अनुसार, भारत में कृषि क्षेत्र में दुर्घटना के दर प्रति एक लाख श्रमिकन पर 334 बा. एमे से 5.6 प्रतिशत दुर्घटना जानलेवा साबित होले सन.

सर्वेक्षण में शामिल आधा से बेसी लोगन के कहनाम रहे कि बार-बार एक जईसन काम आ असुविधाजनक मुद्रा में काम करे से उनके कमर के निचला हिस्सा, घुटना आ कन्धा में दर्द रहेला. एसे बढ़त उमिर से जुड़ल शारीरिक समस्या आ अक्षमता अउरी ढेर गंभीर हो जाला. सर्वेक्षण में शामिल 58 प्रतिशत लोग मानसिक तनाव के शिकायत कईलें जेकर सम्बन्ध कर्जा, फसल के खराबी आ किसानन के आत्महत्या से जुड़ल परिस्थितियन से रहे. ए तनाव के वजह से उनके मानसिक स्वास्थ्य से सम्बंधित समस्या भी पैदा भईल.

अध्ययन के अनुसार, अकेले मध्य प्रदेश में ही मृत्यु आ कामकाज ठप भईला से हर साल लगभग 170 करोड़ रुपया के आर्थिक नुकसान हो रहल बा.

कृषि संकट के बोझ अक्षम किसानन के कन्धा पर और भी अधिक भारी हो गइल बा.

देश के कृषि संकट आ अक्षमता के बीच के सम्बन्ध अब्बो धुंधला बा – खासकर ए खातिर कि भारत के लगे आज भी समग्र रूप से अक्षमता के स्पष्ट आ विश्वसनीय तस्वीर उपलब्ध नईखे.

भारत में 2011 के जनगणना के अनुसार 2.68 करोड़ शारीरिक रूप से अक्षम लोग रहलें जवन देश के कुल जनसंख्या के 2.21 प्रतिशत रहे. एमे से 69 प्रतिशत लोग ग्रामीण क्षेत्रन में रहे जहां अधिकांश लोगन के आजीविका प्रत्यक्ष या अप्रत्यक्ष रूप से कृषि पर निर्भर बा.

हालांकि 2011 में भारत में खाली आठ प्रकार के शारीरिक अक्षमता के ही मान्यता रहे. जनगणना के पांच साल बाद 13 गो नया श्रेणी और जोड़ल गईल. एकर अर्थ बा कि देश में अक्षम लोगन के वास्तविक संख्या एसे कहीं ढेर होखे के सम्भावना बा.

विश्व स्वास्थ्य संगठन (डब्ल्यूएचओ) के अनुसार, दुनिया के लगभग 16 प्रतिशत आबादी, यानि हर छव में से एक व्यक्ति, कवनो न कवनो तरह के अक्षमता संघे जीवन जी रहल बा. अगर इहे अनुपात भारत पर लागू कर दिहल जाओ त देश में अक्षम लोगन के संख्या 20 करोड़ से अधिक पहुंच जाई.

केंद्र सरकार के 2026-27 के बजट में अक्षमजन सशक्तिकरण विभाग खातिर 1,670 करोड़ रुपया आवंटित कईल गईल जवन पिछला साल के तुलना में लगभग 30 प्रतिशत अधिक बा यानि एमे 380 करोड़ रुपया के बढ़ोत्तरी भईल. हालांकि बड़ समस्या आवंटित धनराशि के समुचित उपयोग के बा. रिपोर्टन के मानल जाओ त अगिला 10 साल के दौरान अक्षमजन अधिकार अधिनियम के क्रियान्वयन से जुड़ल योजनन खातिर आवंटित 500 करोड़ रुपया से अधिक के राशि कथित रूप से खर्चे ना कईल गईल.

महाराष्ट्र भारत के कृषि अर्थव्यवस्था के बदहाल हालत के एगो झलक प्रस्तुत कर रहल बा जहां कृषि क्षेत्र में काम करत अक्षम लोगन के संख्या के सम्बन्ध में कवनो उपलब्ध आंकड़ा नईखे. हालांकि राज्य सरकार के लगे अक्षम लोगन खातिर कई गो योजना बाड़ी सन बाकिर सम्बंधित मंत्रालय में पहिले काम कर चुकल एगो अधिकारी के अनुसार, एमे से कवनो योजना विशेष रूप से शारीरिक अक्षम लोगन के ध्यान में राख के नईखे बनावल गईल.

अक्षमजन सशक्तिकरण विभाग के सचिव डॉ. मानिक गुरसल के कहनाम बा कि उनके ए बात के जानकारी नईखे कि कृषि आ अक्षमता के परस्पर सम्बन्ध पर कवनो आंकड़ा उपलब्ध बा या ए विषय पर कवनो विशेष योजना मौजूद बा कि ना.

“आप कमिश्नर से पता करीं,” उनके कहनाम रहे.

ई पत्रकार जानकारी प्राप्त करे खातिर आयुक्त सत्यजित बड़े के ईमेल लिख चुकल बा. उनकर जवाब मिलला पर ए रिपोर्ट के अपडेट कर दिहल जाई.

सरकारी आंकड़न के अनुसार, महाराष्ट्र में 36 लाख से अधिक अक्षम लोग बाड़ें जे केंद्र सरकार द्वारा जारी यूनिक डिसेबिलिटी आईडी (यूडीआईडी) कार्ड खातिर पात्र बाड़ें. ई संख्या देश में दूसरा नम्बर पर बा. यूडीआईडी कार्ड प्राप्त करे खातिर अक्षम व्यक्ति के ऑनलाइन आवेदन करे के पड़ेला आ एकरी बाद सरकारी अस्पताल में चिकित्सकीय परीक्षण से गुजरे के पड़ेला.

बाकिर राज्य में अभी ले खाली 14 लाख से कुछ अधिक यूडीआईडी कार्ड ही जारी कईल गईल बा. दूसरी शब्दन में कहल जाओ त महाराष्ट्र के लगभग 60 प्रतिशत अक्षम लोग अभी भी यूडीआईडी कार्ड से वंचित बाड़ें. ए कार्ड के बिना उ लोग सरकार के अक्षमजन कल्याणकारी योजना आ सुविधन के लाभ ना उठा सकेला.

निलेश वानखेड़े (27) भी एमे से एक बाड़ें.

वानखेड़े यवतमाल के इंजला गांव के एगो दलित किसान हवें. जवनी दिन ऊ अपनी कपास के फसल पर कीटनाशक के छिड़काव कईलें, ओ समय उनकर उमिर 19 बरिस रहे.

“उ दुपहर के खाना खईलस आ निपटे खातिर घर से बाहर निकलल,” उनकर माई चन्द्रकला (60) याद करेली. “जब उ आधा घंटा ले ना लौटल त हमनी के चिंता होखे लागल.

जब चन्द्रकला अपनी बेटा के खोजे निकलली त उ बेहोशी के हालत में उनके पड़ल मिलल. उ ओके लेके तुरंत घटांजी तालुका के अस्पताल ले गईली जहां से उनके यवतमाल शहर के अस्पताल में रेफर कर दिहल गईल.

“कीटनाशक के छिड़काव करत के ओकरी शरीर में जहर चल गईल रहे,” उ बतावेली. “अस्पताल में डॉक्टर कुल ओके इंजेक्शन लगावे खातिर बिस्तर से बांध देले रहलें सन. जब ओकरी शरीर से उलटी संघे जहर बाहर निकलल त उ मिर्गी के मरीज निहर तड़पे लागल.”

विदर्भ में 2017-18 के दौरान कीटनाशक विषाक्तता से 50 से अधिक किसानन के मौत भईल जबकि 1000 से अधिक किसान घबराहट, चक्कर आवल, नजर धुंधला भईल आ पेट दर्द जईसन शिकायत ले के अस्पताल में भर्ती भईलें.

ओ घटना के बाद से वानखेड़े के नजर कब्बो ठीक ना हो पावल.

जवनी दिन उ कीटनाशक के चपेट में अईलें, ओ दिन दुपहरिया के तपत घाम उनकी कपार पर रहे. उनकर ढाई एकड़ जमीन पर खड़ा कपास के फसल गर्मी से झुलसत रहे. अब जब भी सूरज कपार पर होला, उनके मौत के नजदीक ले जाए वाला ओ घटना के याद आ जाला आ उ काम करे के स्थिति में ना रह जालें. गर्मियन में यवतमाल के तापमान 40 डिग्री सेल्सियस से ऊपर चल जाला, अइसना में वानखेड़े मुश्किल से कुछे घंटा खेत में काम कर पावेलें.

“जब बहुत ढेर गर्मी होला त हमार धड़कन तेज होखे लागेला,” वानखेड़े बतावेलें. “हमके डर आ घबराहट होखे लागेला. ओ घटना के याद आवेला आ हम ठीक से सोच समझ ना पावेनी.”

उनकरी खेत में मजदूरी के लागत अब बढ़ गईल बा काहें कि उनकर माई बाप अब अकेले खेती के कुल काम ना संभार सकेलें. परिवार कपास आ सोयाबीन के खेती करेला. ए दुनु फसलन के बाजार में न्यूनतम समर्थन मूल्य (एमएसपी) से कम से कम 10 प्रतिशत कम दाम पर बेचे के पड़ेला जबकि खेती के लागत लगातार बढ़ल जा रहल बा. कई बेर, जईसे ए मौजूदा सीजन में, उत्पादन लागत अप्रत्याशित रूप से और ढेर बढ़ जाला.

अमेरिका आ इजराईल द्वारा ईरान के खिलाफ युद्ध के घोषणा के बाद से उर्वरकन के दाम बढ़ गईल बा. एकरी वजह से किसानन के हर एकड़ पर कम से कम 3000 रूपया अतिरिक्त खर्चा करे के पड़ रहल बा. “नुकसान से बचे के एकमात्र तरीका बा कि आप खुद पहिले से ढेर मेहनत करीं बाकिर उ हमरी खातिर अब संभव नईखे,” वानखेड़े कहेलन.

शुरुआती लगभग चार साल ले वानखेड़े खेत में एकदम काम ना कईलें. धीरे-धीरे उ फिर से खेती के काम शुरू कईलें बाकिर उनकरी आंख के परेशानी लगातार बनल रहल.

“ए सालन में हमार नजर धुंधला बनल रहल बा,” उ कहेलन. “किशोरावस्था में हम बहुत मेहनत करीं. हमरा उम्मीद रहे कि हम खेती के जिम्मेदारी सम्भार लेब आ पिताजी के बोझ कम करब.”

बाकिर वानखेड़े दूर के कवनो चीज पर ठीक से ध्यान केन्द्रित ना कर पावेलें. कुछ देर ले पास के कवनो चीज के देखे पर उनकरी कपार में दर्द शुरू हो जाला. तेज घाम में कदम रखते उनकरी आंख से पानी बहे लागेला. उनकी नजर सम्बन्धी समस्या के असर उनकी पूरा परिवार पर पड़ल बा.

“हमरी पिता के अब खेत में पहिले से ज्यादा घंटा काम करे के पड़ता आ साथ ही मजदूरी भी करे के पड़ता. ए उमिर में उनके ई कुल करत देख के बहुत अपराधबोध होखेला.” उनकी पिता के उमिर 65 साल बा.

तब्बो वानखेड़े के लग्गे यूडीआईडी कार्ड नईखे. उनके त इहो ना पता रहे कि अइसनो कवनो कार्ड होला काहें कि कवनो अस्पताल या सरकारी अधिकारी उनके कब्बो ए बारे में कवनो जानकारी ना दिहलस. नियमन के अनुसार, जिला कल्याण अधिकारियन के जिम्मेदारी हवे कि उ लोग स्थानीय संगठनन के मदद से पंजीकरण शिविर आयोजित करें आ ई जांच करें कि कवनो व्यक्ति यूडीआईडी कार्ड खातिर पात्र बा कि ना. वानखेड़े के मामले में दिशा निर्देशन में दृष्टि क्षमता के मानदंड निर्धारित बा बाकिर आज ले उनकी आंख के जांच ही नईखे भईल जेसे ई तय हो सके कि उ यूडीआईडी के पात्र बाड़ें कि ना.

शिंदे के मामला में दुर्घटना के लगभग तीन महीना बाद यूडीआईडी कार्ड बन के आईल. उ कहेलन, “हमके हर महीना 2,500 रूपया मिलेला बाकिर हमार खर्च एसे बहुत ज्यादा बा..

सामान्य परिस्थितियन में कपास आ सोयाबीन के खेती खातिर एगो किसान के प्रति एकड़ 25,000 से 35,000 रूपया ले बीज, उर्वरक आ कीटनाशक पर खर्चा करे के पड़ेला. आमतौर पर मजदूरन के खाली मौसम के अंत में, फसल के कटाई के समय रखल जाला. बाकिर दुर्घटना के बाद शिंदे के मजदूरी के लागत कई गुना बढ़ गईल बा काहें कि अब उनके पूरा खेती के मौसम में मजदूर रखे के पड़ेला.

उनके कहनाम बा, “एगो पुरुष मजदूर के हम रोज के 500 रुपया आ महिला मजदूर के 300 रुपया देवेनी. हमार खेती के लागत दूसरी लोगन के तुलना में लगभग डेढ़ गुना हो गईल बा. हमार चोट ‘दुश्कालात तेरावा महिना’ जईसन बा.” मराठी के ए कहावत के अर्थ होला – सूखे में तेरहवां महीना माने पहले से मौजूद मुश्किल पर एगो और बड़ मुसीबत के आ पड़ल.

शिंदे कहेलन, “वैसे भी खेती घाटे के सौदा बा. कभी-कभार मौसम ठीक भी हो जाए त मजदूरी पर अधिक खरचा भईला के वजह से हमके मुनाफा बहुत कम होला. बाकिर जब नुकसान होला त बहुत बड़ होला. अइसना में 2,500 रुपया महीना से आखिर का पूरा हो जाई?”

महाराष्ट्र में 2025 के मानसून के अंतिम दौर में भईल अत्यधिक बरखा से 68 लाख हेक्टेयर कृषि भूमि तबाह हो गईल आ 60 लाख किसान एसे प्रभावित भईलें. ए आपदा में 100 से अधिका लोगन के मृत्यु भईल आ 3,000 घर क्षतिग्रस्त हो गईल. आसमान से प्रचंड बादल अईसन मूसलाधार बरखा बरसवलस कि मीलों तक फईलल खेत पानी में डूब गईलें सन. पेड़ आ बिजली के खम्बा उखड़ के गिर गईल. किसान अपनी फसल आ मवेशियन के सुरक्षित जगह पर पहुंचावे के हड़बड़ी में भागल लोग.

बाकिर 53 साल के सुरेश मुंडे अपनी आजीविका के पानी में डूबत बेबसी से देखत रह गईलें.

“सांझी के करीब आठ बजे मूसलाधार बरखा शुरू भईल. लगभग 15 मिनट के भीतर कुल तबाह हो गईल,” मुंडे याद करेलन.

सोलापुर जिला के उकड़गांव के निवासी मुंडे बचपन से पोलियो प्रभावित हवें. एही वजह से उ अपनी मुर्गियन के बचावे खातिर कवनो कदम ना उठा पवलें. जब ले उ शेड पर पहुंचलें, उनकर 15,000 मुर्गी पानी में डूब चुकल रहली सन. तेज बहाव उन्हनी के बहा के ले जात रहे आ उन्हनी के पंख आखिरी बार फड़फड़ात रहे.

मुंडे के लगे गुजारा खातिर खेती के जमीन बा बाकिर पिछला बीस साल से उनकी घर के खरचा एही सहायक आजीविका मुर्गी पालन से ही चलत रहे.

“आज हम कम से कम आपसे बतिया पावत बानी. कुछ महीना पहिले ले हम बहुत गहरा सदमा में रहनी,” उ कहेलन.

सरकारी शासनादेश के अनुसार मुंडे के हर मुर्गी पर 100 रूपया मुआवजा मिले के चाहीं. यानि उनके 15 लाख रूपया मिले के चाहीं बाकिर जब प्रशासन नुकसान के आकलन कईलस त उनके खाली 10,000 रूपया के मुआवजा दिहल गईल.

“ई बहुत गन्दा मजाक निहर बा. हमरी पर 40 लाख रुपया के कर्जा बा,” उनकर कहनाम बा.

बार्शी के तहसीलदार एफ. आर. शेख बतवलें कि अभी ले प्रशासन नुकसान झेले वाला 73,000 किसानन खातिर लगभग 94 करोड़ रुपया आ क्षतिग्रस्त भईल 1,670 घरन खातिर 68 लाख रुपया के सहायता राशि मंजूर कईले बा. “मुर्गियन के मामले में सरकारी शासनादेश के तहत नुकसान के सीमा 100 इकाई ले निर्धारित बा. एही वजह से उनके 10,000 रुपया के मुआवजा मिलल,” उ कहलें.

हालांकि, अब ए अधिकतम सीमा के हटा दिहल गईल बा. उ आगे बतवलें, “हमनी के किसान से 15,000 मुर्गियन के खरीद के रसीद मंगले बनी जा. सम्बंधित किसान के पूरा मुआवजा दिहल जाई.”

बाकिर ई शर्त व्यवहारिक रूप से कठिन बा काहें कि किसान कई साल पुराना रसीद हरदम संभार के ना रखेला लोग. हालांकि मुंडे के लगे उ रसीद बा. उ कहेलन, “हमरी पिताजी के जून में ब्लड कैंसर के वजह से निधन हो गईल रहे. एकरी वजह से हम उ रसीद तुरंत जमा ना करवा पवनी. अब जल्दिये जमा कर देब.”

ए बीच मुंडे अपना के संभार के आपन व्यवसाय फिर से एकदम शुरुआत से खड़ा करे शुरू कर दिहलें. बाकिर ई आसान नईखे. उ कहेलन, “पिछली बेर जब हम ई काम शुरू कईले रहनी त हमर उमिर 30 के लाइन में रहे.”

जलवायु परिवर्तन कृषि संकट के और खतरनाक बनावे वाला प्रमुख कारणन में से एक बन चुकल बा. पहिले जहां कम बरखा होखे ओकरी जगह अब कम समय में होखे वाला अत्यधिक मूसलाधार बरखा ले लेले बा. बदलत मौसम के ए दौर में किसानन के अपना के नया परिस्थितियन में ढाले के पड़ रहल बा. अचानक शुरू होखे वाला तेज बरखा से फसल के बचावे खातिर तुरंत खेत के ओर दौड़ल अब उनकी खातिर जरूरी जीवन कौशल बन गईल बा. बाकिर शारीरिक रूप से अक्षम किसानन खातिर ई हालत और कठिन बा. जब ले मदद पहुंचेला तब ले अक्सर बहुत देर हो चुकल रहेला.

रविन्द्र शिंदे हर समय एही असुरक्षा के भावना में जीयत बाड़ें कि कवनो आपदा के हालत में उ अपनी फसल या संपत्ति के बचावे खातिर अपने से कुछ ना कर पईहें.

“फसल बचावल त दूर, हम अपने से एक गिलास पानी ले ना पी सकेनी,” भीषण गर्मी झेलत खेत में एगो पेड़ के छाया के नीचे बईठल शिंदे कहेलन. उनकरी माथा से पसीना बह रहल बा. उ पानी के बोतल के ओर इशारा करेलन कि उनकर दोस्त ओकर ढक्कन खोल देवे. फिर व्यंग्य में कहेलन, “कवनी बात के इंतजार बा?” दोस्त हंसे लागेला आ उनके पानी पियावेला.

“हमार माई बाबू बूढ़ हो रहल बा आ उ लोग खुदे अपनी परेशानियन से जूझ रहल बा. हमरी पिताजी के कमर के दिक्कत बा आ माई जोड़न के दर्द से परेशान रहेली,” शिंदे आगे बतावेलन.

बाकिर उनके सबसे ढेर अफ़सोस ए बात के बा कि अपनी बेटियन संघे वईसन समय ना बिता पवलें जईसन चाहत रहें. उनकर बेटी 10 आ 12 साल के बाड़ी सन. उ ना उन्हनी के मोटरसाइकिल से स्कूले छोड़ सकेलन आ ना ही स्कूल से लौटला के बाद उन्हनी संघे खेल सकेलन.

“हम उन्हनी के बचपन ना जी पवनी. हर बाप चाहेला उ अपनी बच्चन के बचपन के हिस्सा बने. ए बात के अफ़सोस हमरा हरदम रही,” उ कहेलन.

ई रिपोर्ट इंटरनेशनल फाउंडेशन फॉर डिसेबिलिटी इनक्लूजन (आईएफडीआई) के जर्नलिज्म फेलोशिप ऑन डिसेबिलिटी इनक्लूजन के सहयोग से तैयार कईल गईल बा.