لکڑی کے کباڑ سے کھانا پکانے کی مجبوری

’’اب کوئی بھی اپنے جمع کیے ہوئے لکڑی کے ٹکڑے نہیں بیچتا،‘‘ روبینہ بی بی کہتی ہیں۔ ’’لوگ انہیں اپنے ہی چولہوں میں جلانے کے لیے سنبھال کر رکھ لیتے ہیں۔‘‘ وہ اپنی جھگی (عارضی گھر) کے باہر بیٹھی ایک ایسے تختہ کو توڑ رہی ہیں جو کبھی دروازہ تھا۔

روبینہ اپنی پانچ رکنی فیملی کا کھانا پکانے کے لیے درکار لکڑی کی مقدار کی طرف اشارہ کرتے ہوئے کہتی ہیں، ’’یہ دو لگ جائیں گے۔‘‘ فروری ۲۰۲۶ میں ایران کے خلاف امریکہ و اسرائیل کی جنگ شروع ہونے کے بعد سے مائع پیٹرولیم گیس (ایل پی جی) کی قیمتوں میں بے تحاشہ اضافہ ہوا ہے۔ اب دو کلوگرام کا ایک سلنڈر ۴۴۰ سے ۵۰۰ روپے میں ملتا ہے، جو جنگ سے پہلے بلیک مارکیٹ میں ادا کی جانے والی قیمت سے دوگنا سے بھی زیادہ ہے۔

کچرا چُننے والی اس فیملی کے لیے اب کھانا پکانے کے لیے لکڑی کے ٹکڑے نہایت اہم ہو گئے ہیں۔ ایک ہفتہ میں وہ بمشکل پانچ کلو لکڑی جمع کر پاتے ہیں، یا پھر ’’ہم پانچ روپے فی کلو کے حساب سے لکڑی خریدتے ہیں،‘‘ روبینہ کہتی ہیں۔

وہ شمال مغربی دہلی کے بھلسوا علاقہ میں رہتی ہیں، جہاں کچرا چُننے والوں کی ایک بستی آباد ہے۔ ان میں تقریباً سبھی لوگ مغربی بنگال کے ضلع پشچم میدنی پور سے آنے والے پہلی یا دوسری نسل کے مہاجر ہیں۔ ان کی بستی ایک بہت بڑے کچرے کے ڈھیر کے پاس ہے، جس کی اونچائی تین سے چار منزلہ عمارت کے برابر ہے۔ مرد سڑکوں، رہائشی علاقوں اور بلدیاتی کچرا گھروں سے کچرا جمع کرتے ہیں۔ خواتین پلاسٹک کی بوتلیں، ساشے، ربڑ، شیشہ، تھرموکول اور دیگر قابلِ فروخت چیزیں چھانٹتی ہیں، جنہیں بعد میں کباڑیوں کو بیچ دیا جاتا ہے۔

دہلی میں گرمیوں کی بارش نے اس جھگی بستی میں جگہ جگہ پانی جمع کر دیا ہے۔ بستی کے چاروں طرف پڑا ہوا کچرا شدید بدبو پھیلا رہا ہے۔ گھروں کے درمیان تنگ گلیوں کے کنارے قابلِ بازیافت کچرے سے بھرے ہوئے بورے ایک دوسرے کے اوپر رکھے ہوئے ہیں۔ یہ گلیاں آخرکار ایسے تنگ راستوں پر ختم ہوتی ہیں، جہاں سے رہائشی صرف ایک قطار میں گزر سکتے ہیں۔

زبیدہ بی بی پاری کو ایک کونے میں رکھے لکڑی کے ٹکڑوں کے ڈھیر دکھاتی ہیں۔ پشچم میدنی پور کے بن پورہ گاؤں سے تعلق رکھنے والی یہ مہاجر خاتون کہتی ہیں، ’’بڑے گھروں کے لوگ ہم سے کہتے ہیں کہ ان چیزوں کو پھینک دو۔‘‘

گزشتہ چند مہینوں کے دوران، رہائشی سوسائٹیوں سے کچرا جمع کرتے وقت زبیدہ کے شوہر شاہ جہاں خان، پھینکی ہوئی لکڑی پر خاص نظر رکھتے ہیں، مثلاً ٹوٹا ہوا فرنیچر، جسے ایندھن کے طور پر استعمال کیا جا سکتا ہے۔

اب ایل پی جی بہت احتیاط سے استعمال کی جاتی ہے۔ دو کلو کا ایک ری فل زبیدہ کے خاندان کے لیے تقریباً ایک ہفتہ چل جاتا ہے اور اسے صرف چاول پکانے، کھانا گرم کرنے یا دودھ گرم کرنے کے لیے استعمال کیا جاتا ہے۔ باقی زیادہ تر کھانا پکانے کا انحصار ان لکڑی کے ٹکڑوں پر ہے جو شاہ جہاں خان جمع کر پاتے ہیں۔

تیس برس کی عمر کے اس جوڑے کا کہنا ہے، ’’جب جلانے کے لیے لکڑی کے ٹکڑے نہیں ملتے تو ہمارے لیے کھانا پکانا مشکل ہو جاتا ہے۔‘‘ ایسے میں وہ اپنی ہی عارضی جھگی کے کچھ حصے کھولنے پر مجبور ہو جاتے ہیں، جو رسیوں اور بَلیوں (کھمبوں) کے سہارے کھڑی ہے۔

زبیدہ کہتی ہیں، ’’ہم رسیاں کاٹ دیتے ہیں اور چند بلیاں نکال لیتے ہیں۔ پھر انہی کو ایندھن بنا کر تھوڑے سے چاول پکا لیتے ہیں۔‘‘ تاہم وہ احتیاط برتتی ہیں کہ صرف چند ہی حصے نکالے جائیں۔

پڑوس کی جھگی میں ان کی بھابھی رخسانہ بی بی دوپہر کے کھانے کے لیے ماچھ بھات (مچھلی اور چاول) پکا رہی ہیں۔ وہ چولہے میں ان پرانی بَلّیوں کو جلا رہی ہیں جو چند سال پہلے نئی بلیاں لگانے کے بعد سنبھال کر رکھ لی گئی تھیں۔

ان کے شوہر مضمر میر کہتے ہیں، ’’ہم نے انہیں چولہا جلانے کے لیے سنبھال کر رکھ لیا تھا۔‘‘ تیس سالہ مضمر ہر صبح تقریباً پانچ کلومیٹر دور بُراڑی کے ایک کچرا گھر میں کچرا چُننے کا کام کرتے ہیں۔

’’بلدیاتی ٹرکوں کے لائے ہوئے کچرے میں اکثر ٹوٹی ہوئی کرسیاں، چارپائیاں اور دروازے بھی ہوتے ہیں،‘‘ وہ پاری کو بتاتے ہیں، جب کہ ساتھ والی جھگی سے بلند آواز میں بجتی بنگالی موسیقی سنائی دے رہی ہے۔

مہنگے مٹی کے تیل دستیاب نہ ہونے کی وجہ سے لکڑی کی آگ جلانا آسان نہیں ہوتا، اس لیے خواتین پھینکے ہوئے پلاسٹک کے ساشے اور چپس کے خالی پیکٹ استعمال کرتی ہیں۔ مشرقی میدنی پور ضلع کے برجلال چک گاؤں سے تعلق رکھنے والی ۵۵ سالہ صفیہ بی بی کہتی ہیں، ’’میں پہلے دو تین پلاسٹک کے ریپر جلاتی ہوں، پھر چولہے میں لکڑی ڈالتی ہوں۔‘‘

پلاسٹک جلانے سے پیدا ہونے والے زہریلے دھوئیں ہر طرف پھیلے ہوئے ہیں۔ چند ہی میٹر کے فاصلہ پر واقع لینڈفل میں جگہ جگہ چھوٹی آگ سلگ رہی ہے، جو زہریلے اور نقصان دہ کیمیائی مادّے اور باریک آلودہ ذرات فضا میں خارج کرتی ہے۔

شدید گرمیوں کے موسم میں کچرا جمع کرنے اور اسے چھانٹنے کے کام میں کمی آ جاتی ہے۔ وہ کنبے جو عام طور پر ماہانہ ۱۰ ہزار سے ۱۵ ہزار روپے تک کما لیتے تھے، کہتے ہیں کہ اس عرصہ میں ان کی آمدنی تقریباً نصف رہ جاتی ہے۔

’’جب اس گرمی میں ہماری آمدنی اتنی کم ہے تو ہم ہر ہفتے گیس بھرانے پر ۵۰۰ روپے کیسے خرچ کر سکتے ہیں؟ بچوں کی اسکول فیس، ٹیوشن فیس اور بے شمار دوسرے اخراجات بھی ہیں،‘‘ زبیدہ اپنے دوپٹے سے پسینہ پونچھتے ہوئے کہتی ہیں۔

وہ مزید کہتی ہیں، ’’ہم بنگالی لوگ چاول کے ساتھ ایک ہی برتن میں آلو بھی ڈال دیتے ہیں۔ چاول بھی پک جاتے ہیں اور آلو بھی۔ پھر آلو نکال کر ان کا بھرتا بنا لیتے ہیں۔‘‘

’’ہم دن میں صرف ایک بار کھانا پکاتے ہیں، تاکہ ہمارے پاس موجود لکڑی کے ٹکڑے زیادہ وقت تک چل سکیں۔‘‘