دہلی پولیس اِس لائبریری کو نہیں ہٹا سکی

پولیس نے ایک مہینہ کی مدت میں اس لائبریری کو بند کرنے کی تین بار کوشش کی۔ لیکن یہ دوبارہ کھل جاتی تھی۔

کاکروچ جنتا پارٹی – ایک میم پیج جس نے بعد میں نوجوانوں کی ایک بڑی تحریک کی شکل اختیار کر لی – نے امتحانی پرچوں کے لیک میں ہونے والی بدعنوانیوں اور بدانتظامیوں پر مرکزی وزیر تعلیم دھرمیندر پردھان کے استعفیٰ کا مطالبہ کرتے ہوئے، ۲۰ جون ۲۰۲۶ کو دہلی کے جنتر منتر پر احتجاجی دھرنے کی کال دی تھی۔ اسی جگہ، آل انڈیا اسٹوڈنٹس فیڈریشن (اے آئی ایس ایف) نے ایک لائبریری کھولنے کا فیصلہ کیا۔ اس کا مقصد پوری طرح واضح تھا۔

’’مظاہرین اگلے چند دنوں تک جنتر منتر پر ہی قیام کرنے والے تھے،‘‘ اے آئی ایس ایف کے قومی صدر، ویراج دیوانگ نے کہا۔ ’’آپ رات دن نعرے لگا رہے ہیں اور تقریریں سن رہے ہیں۔ لیکن آپ کے پاس اپنے لیے بھی کافی وقت بچ جاتا ہے۔ ایسے حالات میں، کتابیں بہترین ساتھی ثابت ہوتی ہیں۔ ہم چاہتے تھے کہ مظاہرین اور طلبہ ادب کا مطالعہ کریں اور اس طرح اپنے سماجی و سیاسی شعور میں اضافہ کریں۔‘‘

طلبہ کارکن وہاں پر ایک لکڑی کی میز لے کر آئے اور اس کے اوپر ایک سرخ کپڑا بچھا دیا، جس پر لکھا تھا: ’پردھان کا فیل ہونا ضروری ہے۔‘ پہلے دن، ’’ہمارے پاس شیواجی مہاراج، بھگت سنگھ، اور بابا صاحب امبیڈکر پر لکھی ہوئی کتابیں تھیں،‘‘ ۲۰ سال کے طلبہ کارکن، موہت نے بتایا، جو ہر روز اس لائبریری کو چلاتے تھے۔ ’’انقلابی ادب کے بغیر احتجاج ویسا ہی ہوتا ہے جیسے کہ نظریات سے خالی کوئی قائد۔ ادب، احتجاج کرنے والوں کو مزاحمت اور بغاوت کا طریقہ بتاتا ہے۔‘‘

اس کے علاوہ، پریم چند سے متعلق کتابیں، بچوں کا ادب اور سائنس دانوں کی خودنوشتیں بھی اس لائبریری میں موجود تھیں۔ ’’ہمارے معاشرہ میں سائنسی اندازِ فکر کم ہوتا جا رہا ہے،‘‘ موہت کا کہنا تھا۔ ’’اس لیے ہم نے سوچا کہ ایسی کتابیں بھی رکھنی چاہئیں۔‘‘

لیکن، اے آئی ایس ایف نے جیسے ہی یہ لائبریری وہاں قائم کی، دہلی پولیس کے اہلکاروں نے اسے غیر قانونی قرار دیتے ہوئے اس پر اعتراض کیا۔ ’’ہم نے ان سے کہا کہ اس کا کوئی کاروباری مقصد نہیں ہے، بلکہ اس سے کوئی بھی مفت میں استفادہ کر سکتا ہے،‘‘ دیوانگ نے تفصیل بتاتے ہوئے کہا۔ ’’تھوڑی بحث کے بعد، پولیس واپس چلی گئی۔‘‘

لیکن پولیس کی طرف سے یہ آخری کارروائی نہیں تھی۔

اگلے ۱۰-۱۲ دنوں تک، احتجاجی مقام پر موجود بہی خواہ زیادہ سے زیادہ کتابیں لے کر آنے لگے اور اس طرح لائبریری کا ذخیرہ تیزی سے بڑھنے لگا۔ اس کے بغل میں رکھا ہوا رجسٹر مزید اندراج سے بھرنے لگا۔ لیکن ۲ جولائی کو، پولیس واپس آئی۔ اس بار، انہوں نے کہا، ’’اس سے بھگدڑ مچ سکتی ہے، اور لوگوں کو اس سے پریشانی ہو سکتی ہے،‘‘ دیوانگ نے یاد کرتے ہوئے بتایا۔ ’’لیکن مظاہرین وہاں فوراً جمع ہو گئے اور کہا کہ ایسا کچھ نہیں ہے۔‘‘

اس وقت لائبریری کی دیکھ بھال وشال (۲۰) کر رہے تھے، جو موہت کی طرح ہی صرف اپنا پہلا نام استعمال کرتے ہیں۔ ’’پولیس کو اس سے دقت ہو سکتی ہے، لیکن یہ لائبریری عوام کے لیے ہے،‘‘ انہوں نے کہا۔ ’’ہم نے اس [لائبریری] کو وہاں سے ہٹانے سے انکار کر دیا۔‘‘

تاہم، اس بار دہلی پولیس بحث کے بعد بھی وہاں سے جانے کو تیار نہیں تھی۔ ’’تم نیتا بننا چاہتے ہو،‘‘ ایک اہلکار نے وشال سے بدتمیزی کرتے ہوئے کہا اور انہیں حراست میں لے لیا۔ وشال کے ساتھی، بٹّو کو بھی کالر سے پکڑ کر گھسیٹا گیا کیوں کہ وہ اس بات چیت کو اپنے فون پر ریکارڈ کر رہے تھے۔

’’پولیس نے بھگت سنگھ، شیواجی مہاراج اور بابا صاحب امبیڈکر کی کتابوں کی بے حرمتی کی،‘‘ دیوانگ نے بتایا۔ ’’ہمارے قوم کی ان عظیم شخصیات کی بے عزتی کرنے کے لیے انہیں معافی مانگنی چاہیے۔‘‘

اس میں جو کتابیں شامل تھیں ان کے نام ہیں: ’شیواجی کون تھے‘، جو کہ گووند پنسارے (جنہیں ہندو انتہا پسندوں نے قتل کر دیا تھا) کے ذریعہ شیواجی مہاراج پر مراٹھی میں لکھی گئی کتاب کا ہندی ترجمہ ہے؛ ’بھگت سنگھ بمقابلہ آر ایس ایس‘ جس میں انقلابی لیڈر اور راشٹریہ سویم سیوک سنگھ کے درمیان موجود نظریاتی اختلاف کا جائزہ لیا گیا ہے؛ اور بی آر امبیڈکر کی تصانیف کا مجموعہ۔

’’ہمارا ماننا ہے کہ اگر ایک آدمی بھی ایسی کوئی کتاب پڑھتا ہے، تو وہ دوسرے ۱۰ لوگوں کو اس کے بارے میں بتائے گا۔ تبدیلی اسی طرح سے پیدا ہوتی ہے،‘‘ موہت نے کہا۔

تاہم، وشال اور بٹّو بتاتے ہیں کہ پولیس کے ذریعہ حراست میں لیے جانے، گالیاں سننے اور پیٹے جانے کے بعد، انہیں لمبے کورٹ کیس میں پھنسانے کی بھی دھمکیاں دی گئیں۔ بعد میں جب اے آئی ایس ایف کے ان کے دوست پولیس اسٹیشن پہنچے اور ان کی حراست پر وہاں جم کر ہنگامہ کیا، تب جا کر دونوں کو وہاں سے رہا کیا گیا۔

’’مجھے پولیس کا ڈر نہیں تھا، بلکہ ڈر اس بات کا تھا کہ میرے والدین کو اس کا پتہ چل جائے گا،‘‘ وشال نے کہا۔

وشال کا تعلق راجستھان کے ایک چھوٹے سے گاؤں سے ہے۔ ان کے والد ایک کسان ہیں، جب کہ ماں ایک گھریلو خاتون ہیں – اور ان دونوں کو اس بات کا علم نہیں ہے کہ ان کا بیٹا ایک طلبہ کارکن ہے۔ ’’اگر انہیں پتہ چل گیا تو وہ مجھے دہلی میں نہیں رہنے دیں گے،‘‘ وشال نے کہا۔

باوجود اس کے، وشال جب احتجاجی مقام پر واپس لوٹے، تو انہوں نے پہلا کام یہی کیا کہ انہوں نے لائبریری کو وہاں دوبارہ قائم کر دیا۔ کمیونسٹ پارٹی آف انڈیا سے وابستہ اے آئی ایس ایف نے کتابوں کو وہاں دوبارہ لانے اور لائبریری کو پھر سے چلانے کا کام کیا۔ اگلے کچھ دنوں میں رجسٹر کے اندراج میں ۱۵۰۰ لوگوں کے نام شامل ہو چکے تھے۔

کاکروچ جنتا پارٹی نے آل انڈیا اسٹوڈنٹس ایسوسی ایشن (آئیسا) اور اے آئی ایس ایف جیسی طلبہ تنظیموں کے ساتھ مل کر ۲۰ جولائی کو پارلیمنٹ تک پرامن مارچ نکالنے کی کال دی۔

اس سے پہلے، لداخ سے تعلق رکھنے والے ماحولیاتی کارکن سونم وانگچُک اور طلبہ کارکن نیہا بورا، منیش کمار، اور آمین امیتوج بھی تعلیمی امتحانوں اور ریاستی بھرتیوں میں جوابدہی اور شفافیت کے مطالبات کے ساتھ جنتر منتر پر ۲۵ دنوں سے بھوک ہڑتال پر بیٹھے ہوئے تھے۔

ہزاروں نہیں بلکہ دسیوں ہزار، جن میں اکثریت نوجوانوں کی تھی، سخت پولیس اور سیکورٹی انتظامات کے باوجود جنتر منتر کی سڑکوں پر امڈ آئے۔ جوں جوں دن گزرتا گیا، حکومت مخالف نعروں کی جگہ پر امن مظاہرین پر آنسو گیس کے گولوں اور لاٹھی چارج کی چیخ و پکار نے لے لی۔ کئی مظاہرین بری طرح زخمی ہوئے، ان کے سر پھوٹے اور خون بہنے لگا۔ نوجوان خواتین کے کپڑے پھٹے۔ چھوٹی عمر کے طلبہ بھی بخشے نہیں گئے۔ کم از کم تین طلبہ کو پیلٹ گن سے نشانہ بنایا گیا، جو کہ ایک ایسا بدنامِ زمانہ ہتھیار ہے جس کے استعمال سے کشمیر میں بہت سے افراد اپنی بینائی سے محروم ہو چکے ہیں۔

اس ہنگامہ میں لائبریری کو بھی نقصان پہنچا۔ ’’پولیس نے میز اور کتابوں کو پھینک دیا،‘‘ وشال نے بتایا۔ ’’اس کے اوپر لگی ہوئی چھتری کو پھاڑ دیا گیا۔ ہم نے اسے پوسٹروں اور بینروں سے سجایا تھا۔ انہیں بھی تباہ کر دیا گیا۔ آپ پتہ ہی نہیں لگا پاتے کہ یہاں کبھی لائبریری تھی۔‘‘

تاہم، زخموں، تباہی اور وحشیانہ کریک ڈاؤن کے باوجود طلباء دوبارہ جنتر منتر پہنچے اور اپنے احتجاجی مقام پر دوبارہ قبضہ جما لیا۔ اسی رات، وشال بھی اسی مقام پر میز کے اوپر کتابیں سجانے میں مصروف نظر آئے۔ اب کتابیں زیادہ نہیں بچی تھیں، لیکن وہ بیان دے رہے تھے۔ ’’جب تک مظاہرین رہیں گے، تب تک لائبریری بھی یہیں رہے گی،‘‘ اُس رات انہوں نے وعدہ کیا تھا۔ ان کا یہ وعدہ سچ ثابت ہوا۔

پانچ دنوں کے بعد، ۲۵ جولائی کو، بڑھتے ہوئے دباؤ کی وجہ سے پردھان نے استعفیٰ دے دیا۔ طلبہ کارکن اور مظاہرین نے جیت کا جشن منایا۔ اے آئی ایس ایف کے کارکنوں نے خاموشی سے لائبریری کو سمیٹا اور بچی ہوئی کتابیں اپنے ساتھیوں کے درمیان تقسیم کر دیں۔

’’کسی کو کتابوں سے ڈر کیوں لگے گا بھلا؟‘‘ دیوانگ نے سوال کیا۔ ’’کتابوں سے خوف کا مطلب ہے کہ آپ ڈرپوک ہیں۔‘‘