दिल्ली पुलीस किताबनि खे क़ैदु न करे सघी…

हिक महीने जे अंदरि पुलीस इन लाइब्रेरी खे टे दफ़ा बंदि करण जी कोशिश कई, पर हर दफ़े लाइब्रेरी बहालु थी वेंदी हुई।

20 जून 2026 जो कॉकरोच जनता पार्टी – हिक मीम पेज जे तौर ते शुरू थियण खां पोइ शागिर्दनि जी तहरीक में बदिलजी वेई, जंहिं दिल्ली जे जंतर-मंतर धरणो मारे विहण जो सॾु ॾिनो। संदनि मुतालिबो हो त पेपर लीक ऐं इम्तिहाननि सां लाॻापियल अढंगायुनि मां ज़ाहिर थींदड़ रिश्वतख़ोरी (भ्रष्टाचार) जी जवाबदारी वठंदे तइलीम खाते जो मर्कज़ी मंत्री धर्मेंद्र प्रधान इस्तीफ़ा डि॒ए। इन धरणे जे दौरानि ऑल इंडिया स्टूडेंट्स फेडरेशन (एआइएसएफ़) हुते लाइब्रेरी शुरू करण जो फ़ैसिलो कयो। इन जे पोयां संदनि इरादो पधिरो हो।

एआईएसएफ़ जे नेश्नल प्रेसीडेंटु विराज देवांग चयो, “ईंदड़ कुझु ॾींहनि लाइ जंतर-मंतर ई विरोधु कंदड़नि जो आखेरो हो। सॼो ॾींहं नारा था हणिजनि, तकरीरूं ॿुधजनि थियूं, लेकिनि इन खां पोइ बि घणी वांदिकाई रहे थी।अहिड़े समे में किताबनि जो साथु बहितरीन हूंदो आहे। असांजो ख़्यालु हो त विरोधी ऐं शागिर्द अदब पढ़नि ऐं पंहिंजी समाजी ऐं सियासी सुजाॻी खे अञा वधाइनि।”

स्टूडेंट एक्टिविस्ट पाण सां गॾु लकड़ी जी हिक मेज़ खणी आया हुआ, जंहिं ते ॻाढ़ो कपड़ो पथिरियलु हो। उन ते लिखियल हो – ‘प्रधान मस्ट फ़ॉल’। नेम सां लाइब्रेरी जी संभाल कंदड़ 20 सालनि जे स्टूडेंट एक्टिविस्ट मोहत चयो, “पहिरिएं ॾींहुं असां वटि छत्रपति शिवाजी महाराज, भगत सिंह ऐं बाबासाहेब अंबेडकर सां वास्तेदारु किताब हुआ। इंक़िलाबी साहित खां सवाइ तहरीक बिना वीचारधारा वारे कंहिं अॻिवानु जहिड़ी आहे। साहित ई प्रदर्शनकारियुनि खे विरोध ऐं बग़ावत जी वाट ॾेखारे थो।”

इन खां सवाइ लाइब्रेरीअ में प्रेमचंद जूं रचिनाऊं, ॿाराणो अदब ऐं विज्ञानियुनि जूं आत्मकथाऊं बि हुयूं। मोहत चयो, “असांजे समाज में साइंसी नज़रियो सांदहि घुटंदो पियो वञे। इन करे असां सोचियो त इन विषय जा बि किताब हिते हुअणु घुरिजनि।”

लेकिनि एआईएसएफ़ द्वारां लाइब्रेरी शुरू थींदे ई दिल्ली पुलीस जे अधिकारियुनि इन ते एतिराज़ु कयो ऐं चयाऊं त इहो गै़रु क़ानूनी आहे। देवांग ॿुधायो, “असां उन्हनि खे चयो त इहा हिक फ़्री एक्सेस लाइब्रेरी आहे। इन में को कारोबारी सरगर्मी शामिलु नाहे। थोरे बहस खां पोइ पुलीसवारा हलिया विया।”

पर पुलीसवारा इन ॻाल्हि तां मोटण वारा न हुआ।

ईंदड़ 10-12 ॾींहनि में विरोध जे माग॒ ते घणघुरियनि पारां किताबनि जूं सौग़ातूं सांदहि मिलंदियूं रहियूं। किताबनि जो ढेरु लॻी वियो ऐं पासे में पियल रजिस्टर में दाख़िलाऊं वधंदियूं वेयूं। लेकिनि 2 जुलाई जो पुलीसवारा वरी अची विया। हेलिको उहे चवण लॻा, “इन सां भॼ भॼां थींदी ऐं माण्हुनि खे इन ते एतिराज़ु आहे,” देवांग यादि कंदे चयो। “पर विरोधु कंदड़ झटि गॾिजी विया ऐं चयाऊं त अहिड़ी ॻाल्हि नाहे।”

20 सालनि जो विशाल जेको मोहित वांगे पंहिंजो पहिरियों नालो इस्तेमालु करे रहियो हो, ओॾी महिल लाइब्रेरी जी संभाल करे रहियो हो। हुन चयो, “पुलीस खे इन ते एतिराज़ु थी सघे थो, पर हीअ लाइब्रेरी माण्हुनि जे लाइ आहे। असां इन खे हटाइण खां बिल्कुलु इंकारु करे छॾियो आहे।”

जेतोणीकि, इन दफ़े दिल्ली पुलीस रुॻो बहस खां पोइ वञण वारी न हुई। हिकु आफ़ीसरु निंदींदे चयो, “तव्हां खे नेता थियण जो शौक़ु आहे” ऐं हुन खे हिरासत में वठी छॾियो। विशालु जे साथी, बिट्टू खे बि गिरेबान खां झले घिल्याईं छाकाणि त हू हिन घटना खे पंहिंजे फ़ोन ते रिकार्ड करे रहियो हो।

देवांग चयो, “पुलीस भगत सिंह, शिवाजी महाराज ऐं बाबासाहेब आंबेडकर जे किताबनि जो अपमानु कयो आहे। असांजे क़ौमी नायकनि जो अपमानु करण जे लाइ हुननि खे माफ़ी घुरणु खपे।”

इन्हनि किताबनि में ‘शिवाजी कौन थे’ नाले जो किताबु बि हो जेको गोविंद पानसरे जे मराठी किताब जो हिंदी तर्जुमो हो। गोविंद पानसरे खे हिन्दू इन्तिहापसंदनि क़त्लु करे छॾियो हो। इन खां सवाइ भगत सिंह बनाम आरएसएस, जंहिं में इंक़िलाबी भगत सिंह ऐं आरएसएस जे ख़्याली तकरारनि जो जाइज़ो पेशि कयलु आहे, ऐं इन सां गॾोगॾु डॉ. बी. आर. अंबेडकर जी रचिनाउनि जा मजमूआ बि हुते मौजूदु हुआ।

मोहित चयो, “मूंखे पक आहे त जेकड॒हिं को बि हेकरि अहिड़ो को किताबु पढ़ी वठे, त हू इन जे बारे में ड॒ह ॿियनि माण्हुनि खे ॿुधाईंदो। अहिड़ियुनि ई विखुनि सां तब्दीली होरियां होरियां वधंदी आहे।”

लेकिनि विशाल ऐं बिट्टू जे चवण मुताबिक़ि हिरासत में वठण, गारगंद करण ऐं मारकुट बैदि पुलीसवारनि उन्हनि खे तवील अदालती मुक़दमे में फासाइण जी धमकी बि डि॒नी हुई। पोइ जड॒हिं एआईएसएफ़ जा साथी थाणे पहुता ऐं उन्हनि जी हिरासत जे ख़िलाफ़ ज़ोरदार विरोधु कयाऊं, त नेठि बि॒न्ही खे रिहा कयो वियो।

विशाल चयो, “मूंखे पुलिस जो डपु न हुयो। मूंखे इन ॻाल्हि जो डपु हो त किथे मुंहिंजे माउ पीउ खे इन ॻाल्हि जी ख़बर न पेइजी वञे।”

विशालु राजस्थान जे हिक नंढिड़े ॻोठ सां वास्तो रखे थो। संदसि पीउ हारी आहे ऐं माउ घरधियाणी। उन्हनि खे मालूमु नाहे त संदनि पुटु शागिर्द तहरीक में जुड़ियल आहे। विशाल चयो, “जेकड॒हिं उन्हनि खे पतो लॻी वियो, त शायदि उहे मूंखे दिल्ली में रहण ई न ॾींदा।”

इन जे बावजूदि, जॾहिं विशाल विरोध वारे हंधि ते वापसि आयो त पहिरियाईं पहिरियाईं हुन लाइब्रेरीअ खे ॿीहर क़ाइमु कयो। कम्यूनिस्ट पार्टी ऑफ़ इंडिया सां लाॻापियल किताब वरी हथि कया विया ऐं लाइब्रेरी वरी शुरू थी वेई। ईंदड़ कुझु ॾींहनि जे दौरान, हुन जे रजिस्टर में 1500 दाख़िलाऊं दर्जु थी वेयूं।

20 जुलाई जो कॉकरोच जनता पार्टी, ऑल इंडिया स्टूडेंट्स एसोसिएशन (आइसा) ऐं एआईएसएफ़ जहिड़ियुनि शागिर्दी तंज़ीमुनि संसद ताईं शांतीअ सां मार्चु करण जो सॾु ॾिनो।

इन खां अॻु सांदहि 25 ॾींहनि ताईं लद्दाख़ जे पर्यावरणु कार्यकर्ता सोनम वांगचुक ऐं शागिर्द कार्यकर्ता नेहा बोरा, मनीष कुमार ऐं आमीन अमितोज जंतर-मंत ते उन्हीअ मुतालिबे जे करे बुख हड़ताल ते वेठा हुआ। उन्हनि इम्तिहाननि ऐं सरकारी मुक़ररियुनि में जवाबदारी ऐं सचाई जी ख़ातिरीअ जो मुतालबो कयो।

हज़ारहा माण्हू – जिनि में घणाई नौजवाननि जी हुई, पुलीस ऐं सलामती इंतिज़ाम जे मांडाण में जंतर-मंतर जे माग॒नि ते गॾु थिया हुआ। ॾींहुं गुज़रंदे नारनि जे आवाज़ जी जाइ ते आंसू गैस जी फूकुनि जो आवाज़ ऐं लाठीचार्ज जे करे विरोध कंदड़नि जूं रड़ियूं ॿुधण में आयूं। केतिरनि ई माण्हुनि जा मथो फाटी वियो हो ऐं रतु वही रहियो हो। नौजवान नियाणियुनि जा कपड़ा पिणु फाड़े छडि॒या हुआ। नाबालिग़ु शागिर्दनि खे बि न बख़्शियाऊं। घटि में घटि टिनि शागिर्दनि खे पैलेट गन जो निशानो बणायो वियो – ही हथियारु कश्मीर में केतिरनि खे अंधो करण जे लाइ बदिनामु आहे।

इन सॼी कारवाई में लाइब्रेरीअ खे बि समूरो तबाहु कयो वियो। विशाल ॿुधायो, “पुलिस मेज़ ऐं किताब खणी फिटा कया। मथे खोड़ियल ख़ेमो फाड़े छडि॒याऊं। असां उन खे पोस्टरनि ऐं बैनरनि सां सजायो हो। उहे बि ख़राबु करे विया। हुते डि॒सी केर बि चई न सघे हा त हिते कड॒हिं का लाइब्रेरी बि हुई।”

लेकिनि चोटुनि, तबाही ऐं निर्दई ग़ल्बे जे बावजूदि, मुज़ाहिरो कंदड़ु वापसि जन्तर मंतरु पहुता ऐं उन जाइ ते ॿीहर पंहिंजो धाको ॼमाए वरितो। उन्हीअ राति विशालु साॻे हंधि ते हिकु मैज़ मथां किताब सजाइण में महू हो। इन दफ़े किताबनि जो तइदाद पहिरीं वांगुरु ओतिरो न हो, लेकिनि हुन जो इहो कमु पाण में हिकु ऐलानु हो। हुन ॾींहुं रात जो चयाईं, “जेसीं हिते मुख़ालिफ़ रहंदा, तेसीं इहा लाइब्रेरी बि हिते ई रहंदी” ऐं नेठि इएं ई थियो।

पंजनि ॾींहनि बैदि, 25 जुलाई जो वधंदड़ दॿाउ सबबि प्रधान इस्तीफ़ा ॾिनी। शागिर्द कार्यकर्ता ऐं प्रदर्शनकारी खटणहार जीआं खिड़ी विया। एआईएसएफ़ जे कार्यकर्ताउनि माठि में लाइब्रेरी समेटे वरिती ऐं बचितल किताब पंहिंजे साथियुनि में विर्हाए छडि॒या।

देवांग पुछियो, “भला किताबनि खां केर डिजं॒दो? किताबनि खां कउ खाइणु कांइराई आहे।”