‘किताब ले डरे कायर होय के चिन्हारी आय’

पुलिस ह महीना भर के भीतर तीन बेर लाइब्रेरी ला बंद करे के कोसिस करिस. फेर वो ह घेरी-बेरी एक बेर अऊ खुल जावय.

20 जून, 2026 मं कॉकरोच जनता पार्टी- जेन एक ठन मीम पेज रहिस अऊ बाद मं नवा पीढ़ी के लइका मन के आन्दोलन बन गिस, ह दिल्ली के जंतर-मंतर मं धरना देय के अपील करिस. वो ह परीक्षा के पेपर लीक अऊ गड़बड़ी मं भ्रष्टाचार आगू आय सेती केंद्रीय शिक्षा मंत्री धर्मेंद्र प्रधान के इस्तीफा के मांग करत रहिन. ऑल इंडिया स्टूडेंट्स फेडरेशन (एआईएसएफ) ह इही जगा मं एक ठन लाइब्रेरी सुरू करे के फइसला करिस.येकर मकसद बिल्कुल साफ रहिस.

एआईएसएफ के राष्ट्रीय अध्यक्ष विराज देवांग कहिथे, “प्रदर्सन करेइय्या मन बर जंतर-मंतर अवेइय्या कुछेक दिन तक ले ओकर मन के ठीहा बने ला रहिस. ओ मन दिन भर नारा लगावत अऊ भासन सुनत रहिथें. फेर ओकर मन करा अपन बर बनेच बखत होथे. अइसने हालत मं किताब सबले बढ़िया संगवारी होथे. हमर मकसद रहिस के प्रदर्सन करेइय्या अऊ लइका मन साहित्य पढ़ेंय अऊ अपन समाजिक अऊ राजनीतिक समझ ला अऊ बढ़िया बनाएं.”

छात्र कार्यकर्ता मन लकरी के टेबल लाइन अऊ ओ मं लाल कपड़ा बिछा दिन, जेन मं लिखाय रहिस, ‘प्रधान ला हटे ला परही.’ लाइब्रेरी ला रोज के चलेइय्या छात्र कार्यकर्ता मन ले एक झिन 20 बछर के मोहित ह कहिथे, “पहिली दिन हमर करा शिवाजी महाराज, भगत सिंह अऊ बाबासाहेब अंबेडकर के किताब मन रहिन. क्रांतिकारी साहित्य के बगेर विरोध वइसने हवय जइसने बगेर विचारधारा वाले नेता. साहित्य प्रदर्सन करेइय्या मन ला विरोध अऊ बगावत के रद्दा दिखाथे.”

येकर छोड़, लाइब्रेरी मं प्रेमचंद के किताब, बाल साहित्य अऊ वैज्ञानिक मन के आत्मकथा घलो रहिन. मोहित कहिथे, “हमर समाज मं वैज्ञानिक सोच कम होवत जावत हवय. ते पायके हमन सोचेन के हमर करा घलो कुछु अइसने किताब होय ला चाही.”

वइसे, एआईएसएफ के लाइब्रेरी सुरु करतेच दिल्ली पुलिस के अफसर मन येकर उपर आपत्ति जताइन अऊ कहिन के ये ह गैर-कानूनी आय. देवांग ह बताइस, “हमन कहेन के ये ह मुफत के लाईब्रेरी आय अऊ येकर कोनो कारोबारी नइ ये. थोकन बहस के बाद पुलिस लहूट गिस.”

ये ह आखिरी बेर नइ रहिस जब पुलिस लाइब्रेरी के मामला मं दखल दिस.

अगला 10 -12 दिन तक ले, विरोध-प्रदर्सन वाले जगा मं हमर हितैसी मन अऊ जियादा किताब दान करत रहिन अऊ किताब मन के ढेरी लगत गे. रजिस्टर घलो नांव ले भरगे. फेर 2 जुलाई के दिन पुलिस ह फिर आइस. देवांग ह बताइस के ये बखत ओ मन कहिन, “येकर ले भगदड़ मच सकथे अऊ लोगन मन ला येकर ले दिक्कत हवय. फेर प्रदर्सन करेइय्या मन तुरते जुर गिन अऊ कहिन के अइसने कुछु बात नइ ये.”

20 बछर के विशाल, जेन मोहित जइसनेच सिरिफ अपन पहिला नांव बलाय ला पसंद करथे, वो बखत लाइब्रेरी संभालत रहिस. वो ह कहिस, “हो सकथे के पुलिस ला येकर ले कोनो दिक्कत होय, फेर लाइब्रेरी त लोगन मन बर आय. हमन येला हटाय ले मना कर देन.”

फेर ये दारी दिल्ली पुलिस बहस के बाद जवेइय्या नइ रहिस. एक झिन अफसर ह भारी ऊंचा लहजा मं कहिस, “तोला नेता बनना हे,” अऊ वोला हिरासत मं ले लिस. विशाल के संगवारी बिट्टू ला घलो कालर धरके घसीटे गिस काबर के वो ह ओ गोठ बात ला रिकार्ड करत रहिस.

देवांग कहिथे, “पुलिस ह भगत सिंह, शिवाजी महाराज अऊ बाबासाहेब अंबेडकर के किताब मन केअपमान करिस. ओ मन ला हमर देस के लड़ाका मन के अपमान करे सेती माफ़ी मांगना चाही.”

ये किताब मन मं सामिल रहिस: ‘शिवाजी कौन थे’जेन ह शिवाजी महाराज ऊपर लिखे गे मराठी किताब के हिंदी अनुवाद आय अऊ जेकर लेखक गोविंद पानसरे आंय जेन ला हिंदू कट्टरपंथी मन हत्या कर दिन, भगत सिंह बनाम आरएसएस, जेन मं क्रांतिकारी नेता अऊ राष्ट्रीय स्वयंसेवक संघ के बीच वैचारिक मतभेद के विश्लेसन करे गे हवय, अऊ बी.आर.अंबेडकर के रचना मन के संग्रह.

मोहित कहिथे, ”हमर मानना ​​आय के गर कोनो एक झिन घलो अइसने किताब पढ़थे, त वो ह 10 झिन अऊ ला येकर बारे मं बताही. अइसने करके धीरे-धीरे बदलाव आथे.”

वइसे, विशाल अऊ बिट्टू के कहना आय के पुलिस हिरासत मं ओकर मन के संग बदसलूकी अऊ मारपीट करे गिस, अऊ ओ मन ला लंबा बखत तक ले चलेइय्या कोर्ट केस के धमकी घलो दे गिस. जब ओकर मन के एआईएसएफ के संगी मन थाना आइन अऊ ओकर मन के हिरासत ला लेके हंगामा करिन, तब जाके ओ मन ला रिहा करे गिस.

विशाल कहिथे, “मोला पुलिस के डर नइ लगत रहिस. मोला डर ये बात के रहिस के मोर दाई–ददा ला पता चल जाही.”

विशाल राजस्थान के एक ठन नान कन गाँव के आय.ओकर ददा किसान आय अऊ दाई घर- गृहस्थी वाली – अऊ ओ मन ला थोकन घलो गम नइ ये के ओकर मन के बेटा ह छात्र समाजिक कार्यकर्ता आय. वो ह कहिथे, “गर ओ मन ला पता चल गिस त हो सकथे मोला दिल्ली मं रहे नइ देंय.”

ओकर बाद घलो, जब वो ह विरोध के जगा मं लहूट के आइस, त विशाल ह सबले पहिली लाइब्रेरी ला फिर ले सुरु करिस. कम्युनिस्ट पार्टी ऑफ़ इंडिया ले जुड़े एआईएसएफ ह किताब लेके आय अऊ लाइब्रेरी ला फिर ले सुरु करे के काम करिस. कुछेक दिन मं रजिस्टर मं1,500 झिन के नांव दर्ज होइस.

20 जुलाई के दिन कॉकरोच जनता पार्टी ह ऑल इंडिया स्टूडेंट्स एसोसिएशन (एआईएसए) अऊ एआईएसएफ जइसने छात्र संगठन मन के संग मिलके संसद तक शांतिपूर्ण रैली निकारे के अपील करिस.

येकर पहिली 25 दिन तक ले, लद्दाख के पर्यावरण कार्यकर्ता सोनम वांगचुक अऊ छात्र कार्यकर्ता नेहा बोरा, मनीष कुमार अऊ आमीन अमितोज जंतर-मंतर मं इही मांग मन ला लेके भूख हड़ताल मं रहिन : परीक्षा अऊ राज मं भर्ती मन मं जवाबदेही अऊ पारदर्शिता.

भारी पुलिस अऊ सुरक्षा तैनाती के बीच, हजारों लोगन मन – जेन मं अधिकतर नवा पीढ़ी रहिन - जंतर-मंतर के सड़क मन मं जमा हो गिन. जइसने- जइसने दिन चढ़े लगिस, नारा के जगा आँसू गैस के गोला अऊ प्रदर्सन करेइय्या मन के उपर लाठीचार्ज के आवाज सुनाई देय लगिस. लोगन मन ला गहिर जखम आइस, मुड़ ले लहू बोहावत रहय. नोनी मन के कपड़ा मन फाड़े गिस. इहाँ तक के किसोर उमर के लइका मन ला घलो छोड़े नइ गिस. कम से कम तीन झिन ला पैलेट गन के गोली लगिस, ये ह उही बंदूक आय जेन ह कश्मीर मं कतको लोगन मन ला अंधवा करे सेती बदनाम हवय.

इही बखत, लाइब्रेरी घलो बरबाद हो गिस. विशाल कहिथे, “पुलिस ह टेबिल अऊ किताब मन ला फेंक दिस. ओकर उपर लगे कैनोपी ला फाड़ दे गिस. हमन ओला पोस्टर अऊ बैनर ले सजाय रहेन. सब्बो बरबाद हो गिस. देखके पताच नइ चलत रहिस के इहाँ कभू कोनो लाइब्रेरी रहिस.”

वइसे, जखम, तबाही अऊ बेरहम कार्रवाई के बाद घलो, प्रदर्सन करेइय्या जंतर-मंतर लहूट आइन अऊ ओ जगा मं फिर ले कब्जा कर लिन. उही रात, विशाल उही जगा मं एक ठन टेबल मं किताब मन ला जमाय मं लगे रहिस. किताब बनेच जियादा त नइ रहिस, फेर वो ह एक ठन संदेसा देवत रहय. वो रतिहा वो ह प्रन करिस, “जब तक प्रदर्सन करेइय्या इहाँ रइहीं, तब तक ले लाइब्रेरी घलो इहिंचे रइही.”अऊ ओकर ये प्रन पूरा होइस.

पांच दिन बाद, 25 जुलाई के दिन, बढ़त दुवाब के बीच प्रधान ह इस्तीफा दे दिस. छात्र कार्यकर्ता अऊ प्रदर्सन करेइय्या मन जीत के जसन मनाइन. एआईएसएफ कार्यकर्ता मन कलेचुप लाइब्रेरी समेटिन अऊ बांचे किताब मन ला अपन कार्यकर्ता मन ला बांट दे गिस.

देवांग सवाल करत कहिथे, “कोनो किताब मन ले काबर डरही? किताब ले डरे कायर होय के चिन्हारी आय.”