दिल्ली पुलिस ई लाइब्रेरी ना बंद करा सकल

पुलिस ए लाइब्रेरी के एक महीना में तीन बेर बन्द करावे के कोशिश कईलस. बाकिर ई लाइब्रेरी बंद ना भईल.

20 जून 2026 के, कॉकरोच जनता पार्टी, एगो मीम पेज जवन युवा आंदोलन में बदल गईल, ई पार्टी दिल्ली के जंतर मंतर पर यूनियन एजुकेशन मिनिस्टर धर्मेंद्र प्रधान के इस्तीफा के संदर्भ में धरना दिहलस, काहे से कि परीक्षा में पेपर लीक आ घपला में भ्रष्टाचार जग जाहिर भईल बा. ऑल इंडिया स्टूडेंट्स फेडरेशन ओ जगही पर लाइब्रेरी शुरू कईला के निर्णय लिहलस. एकरा पीछे के इरादा साफ रहे.

"आंदोलन करे वाला लोग खातिर, जंतर मंतर अगला कुछु दिन खातिर ए लोगन के घर ह," विराज देवांग, एआईएसएफ के अध्यक्ष कहने. "रउरा सब दिन भर नारा लगावेनी आ भाषण सुनेनी. बाकिर रउरा लगे खुद खातिर भी समय बा, अईसन जगही पर किताब सबसे नीमन साथी ह. हमनी के ई विचार रहे कि प्रदर्शन करे वाला लोग साहित्य पढ़े आ आपन आपन सामाजिक आ राजनीतिक विचार में सुधार लावे.

छात्र प्रदर्शनकारी एगो लकड़ी के मेज ले अईने आ ओ पर एगो लाल कपड़ा बिछा दीहने, जेपर लिखल रहे कि "प्रधान के जाएके पड़ी." पहिला दिन, "हमनी के लगे शिवाजी महाराज, भगत सिंह आ बाबासाहेब अंबेडकर पर किताब रहे," बीस साल के छात्र प्रदर्शनकारी मोहित बतवने, जे लाइब्रेरी के रोज चलावें. "क्रांतिकारी साहित्य के बिना प्रदर्शन जईसे विचार के बिना नेता. साहित्य से प्रदर्शनकारियन के ई पता चलेला कि कब आ कईसे विरोध होला."

एकरी अलावा, लाइब्रेरी में प्रेमचंद के किताब, बाल साहित्य आ वैज्ञानिकन के आत्मकथा भी रहे. " हमनी के समाज से विज्ञान के प्रति रूचि कम हो रहल बा," मोहित फेर कहेने. "त हमनी के सोचनी के कि ईहो साहित्य रखे के चाही."

बाकिर, जईसे एआईएसएफ लाइब्रेरी सेट कईने, दिल्ली पुलिस के अधिकारी लोग एके गैरकानूनी बता के ऐतराज कईने. "हमनी के जवाब दीहनी के कि ई मुफ्त के पुस्तकालय ह कवनो कमाई के जरिया ना ह," देवांग समझवने. "तनी मनी बहसबाजी के बाद पुलिस वाला लौटी गईने.

ई आखिरी बेर ना रहे जब पुलिस लाइब्रेरी के पीछे पड़ल.

अगले दस बारह दिन ले, आंदोलन में आईल शुभचिंतक और ढेर किताब दान दीहने आ किताब के ढेर बढ़त गईल. बगल में रखल रजिस्टर में और किताबीन के एंट्री भईल. बाकिर 2 जुलाई के पुलिस फेर लौटल. ए बेर ऊ लोग कहल कि ई पुस्तकालय भगदड़ के कारण बनी सकेला. ऐसे लोगन के दिक्कत हो रहल बा. देवांग मन पारी के कहने. "बाकिर आंदोलनकारी खुदे जुटी गईने आ कहने कि अईसन कवनो बात नईखे.

20 साल के विशाल जे मोहित के तरे खाली आपन नाम से जानल जाने, ऊ लाइब्रेरी चलवने. ऊ कहने कि भले से पुलिस के एसे दिक्कत बा बाकिर ई लाइब्रेरी लोगन खातिर बा एलिए हमनी के एके हटावे से मना करी दिहनी के.

वईसे, ए बेर दिल्ली पुलिस बहसबाजी के बाद जाए के मूड में ना रहे. "तोहके नेता बने के बा," एगो अधिकारी विशाल से ई बात कई बेर कहने आ ओकर धर पकड़ कईने. विशाल के साथी बिट्टू के कालर पकड़ी के घसीटल गईल काहे से कि ऊ ए सब घटना के फोने में रिकॉर्डिंग करत रहे.

"पुलिस भगत सिंह, शिवाजी महाराज आ बाबा साहेब अंबेडकर के किताब फेंकी दीहने. आपन राष्ट्रीय नायक के ए तरे अपमान करे के खातिर ए सबके माफी मांगे के चाही," देवांग कहने.

ए किताबीन में शिवाजी कौन थे भी रहे, शिवाजी महाराज पर आधारित एगो मराठी पुस्तक के हिन्दी अनुवाद जेके लेखक गोविंद पंसारे रहने, जिनकर हत्या हिंदू आतताई क दिहने. भगत सिंह बनाम आरएसएस, ए किताब में ए क्रांतिकारी नेता आ राष्ट्रीय स्वयंसेवक संघ के विचारधारा में अंतर बतावल गईल बा, साथ मे बी.आर. अंबेडकर के चुनिंदा काम भी रहे.

मोहित कहेने," हमनी के भरोसा बा कि अगर एक्को आदमी अईसन किताब पढ़ी त ऊ दस और लोगन के ओकरी बारे में बताई. एही से त क्रमिक विकास होला."

बाकिर, विशाल आ बिट्टू के ईहो कहल बा कि जब ए लोग के पुलिस धरी के ले गईल ता ई लोगन के पुलिस गारी दिहलस आ पीटलस, साथ में ए सबपर गंभीर मुकदमा लदला के धमकी दिहल गइल. ई त नीक भईल कि ए सबके एआईएसएफ के दोस्त थाना पर आके शोर शराबा कईने तब कहीं ई दुनू लोगन के जमानत भईल.

"हमके पुलिस से डर ना रहे, हमके डर रहे कि कहीं हमार माई बाप के ए बात के पता ना लागी जाव.

विशाल राजस्थान के एगो छोट गांव से हवें. उनकर बाउजी किसान आ माई घर समहारेली बाकिर ओ सबके ई बात मालूम नईखे कि उनकर लईका छात्र आंदोलनकारी ह. "अगर ऊ लोग के पता लागी जाई त दिल्ली से हमार बोरिया बिस्तरा बंधा सकेला." विशाल कहेने.

तब्बो प्रदर्शन स्थल पर वापिस आईला के बाद, विशाल लाइब्रेरी खोले के काम सबसे पहले शुरू कईने. एआईएसएफ, जेकर सहयोग कम्युनिस्ट पार्टी ऑफ इंडिया करेले, किताब वापिस लाईल चालू क दीहने. अगला कुछु दिन में रजिस्टर में पंद्रह सौ से ढेर किताब के एंट्री भईल.

20 जुलाई के, कॉकरोच जनता पार्टी एआईएसए आ एआईएसएफ के संघे संसद भवन ले शांतिपूर्ण यात्रा के ऐलान कईने.

ओकरी 25 दिन पहिले, लद्दाख में रहे वाला पर्यावरण कार्यकर्ता सोनम वांगचुक आ छात्र कार्यकर्ता नेहा बोरा, मनीष कुमार आ आमीन अमितोज जंतर मंतर पर भूख हड़ताल कईले रहें: मांग उहे रहे, राज्य के रोजगार संबंधी परीक्षा में पारदर्शिता आ जिम्मेदारी.

लाखों लोग जेमें मुख्यतया युवा रहने, अधिक संख्या में पुलिस बल होखला के बावजूद जंतर मंतर के धरती काड़ी दीहने. जब दिन बीतल तब शांति से प्रदर्शन करत ए लोगन के नारा के बदले आंसू गैस के धुआं आ लाठी चार्ज मिलल. कई लोगन के बड़ा ढेर घाव लागल. केतना लोगन के कपार फाटी गईल रहे आ पूरा मुड़ी खूने खून भईल रहे. लईकिन के कपड़ा फ़ारल गईल. छोट बच्चन लेके ना छोड़ल गईल. कम से कम तीन लोगन के पिलेट गन से घाव लागल, कश्मीर में बहुते लोग ए पिलेट गन से आंधर हो गईल बाने.

ए प्रक्रिया में लाइब्रेरी भी तुरी दीहल गईल. "पुलिस हमनी के मेज आ किताब बिगी दिहल लोग," विशाल कहने. "ऊपर के शामियाना भी फारी दीहल गईल. हमनी के एके पोस्टर आ बैनर से सजवले रहनी के. सब तुरी फारी दीहल गइल. देखी के पता ना लागत बा कि एहिजा कब्बो लाइब्रेरी भी रहे."

बाकिर, बेरहम कार्रवाई, तबाही आ घाव लगला के बाद भी, प्रदर्शनकारी जंतर-मंतर पर वापिस अईने आ ओ जगही के फेर कब्जिया लिहने. ओही रात, विशाल ओही जगही, एगो मेज़ पर किताब सजवला में व्यस्त रहने. किताब बड़ी ढेर ना रहे, बाकिर ऊ एगो संदेश देत रहने. ओ राती के ऊ वादा कईने, "जबले प्रदर्शनकारी एहिजा रहीहैं, तबले ई लाइब्रेरी भी एहिजा रही." आ उनकर ई वादा सच साबित भईल.

पांच दिन बाद 25 जुलाई के, ए बढ़त प्रेशर के बीच प्रधान इस्तीफा दे दीहने. छात्र कार्यकर्ता आ प्रदर्शनकारी जीत के जश्न मनवने.एआईएसएफ के प्रदर्शनकारी लाइब्रेरी बंद करी दीहने आ बचल खुचल किताब के अपनी कामरेडन में बांटी दीहने.

"केहू के किताबीन से काहें डर लागी हो?" देवांग पूछेने. "किताब से डेराईल त डरपोकन के निशानी ह."