مشکوک ووٹر، جمہوریت، معذوری اور موت

قادر علی اب مجھ سے کبھی بات نہیں کر پائیں گے۔

نومبر ۲۰۲۵ میں میری ان سے آخری ملاقات ہوئی تھی۔ اس وقت وہ بمشکل کوئی بات کر سکے تھے۔ ٹن کی چھت والے ان کے چھوٹے سے گھر کے اندر صرف کھانسی کی نحیف آواز گونج رہی تھی۔ اس ماحول میں سامنے کے صحن میں مرغیوں کا پیچھا کرنے والے مرغ کی آواز بھی بری لگتی تھی۔ اندر قارد لکڑی کی ایک چارپائی پر پڑے تھے اور بظاہر بہت کمزور نظر آ رہے تھے۔

اس سے پہلے وہ مدد کے بغیر چل سکتے تھے، پرانی باتیں یاد کر سکتے تھے، اور اپنی نحیف آواز میں تھوڑی بہت بات چیت بھی کر سکتے تھے۔ لیکن نومبر آتے آتے وہ بستر سے جا لگے تھے، ان کے فالج نے بدتر صورت اختیار کر لی تھی، اور وہ بمشکل اپنے ہاتھ ہلا سکتے تھے۔ قادر ہوش میں تھے، اور اب بھی زندگی کے لیے اسی بہادری سے جدوجہد کر رہے تھے جس بہادری سے انہوں نے اپنی شہریت کے پیدائشی حق کے لیے برسوں تک لڑائی لڑی تھی۔

’’کوئی پندرہ دن قبل انہیں بخار آیا تھا اور ان کے جسم میں خون کی مقدار کم ہونے لگی تھی،‘‘ قادر کے ۳۳ سالہ بیٹے شاہد الاسلام آسام کے گمری گوڑی گاؤں میں اپنے گھر کے برآمدے میں کھڑے ہم سے بات کر رہے تھے۔ ’’وہ اب نہ کھا سکتے ہیں، نہ بات کر سکتے ہیں اور نہ ہی حرکت کر سکتے ہیں۔ ہمیں نہیں معلوم کہ وہ کب تک ہمارے ساتھ رہیں گے،‘‘ انہوں نے کہا۔

قادر ابھی تک ہوش میں تھے۔ ان کی آنکھیں کھلی ہوئی تھیں، جیسے امید کا کوئی سرا تھامے ہوئے ہوں۔ یہ امید بہرحال، سورج کی ان آخری شعاعوں کی طرح عارضی ثابت ہوئی، جو ان کے گھر کے واحد دروازہ سے اور ٹن کی چھت کی چھوٹی سی شگاف سے اندر داخل ہو رہی تھیں۔

ہماری ملاقات کے چند ہی دنوں بعد قادر وفات پا گئے۔ یہ ۱۸ نومبر ۲۰۲۵ کا واقعہ تھا۔ وہ ۶۶ سال کے تھے۔

اس آخری ملاقات کے دوران شاہدُل سے ہوئی میری بات چیت مجھے یاد ہے۔ ’’اگر انہیں ہسپتال میں رکھنا ہو تو ہم اس کے اخراجات کا انتظام نہیں کر سکتے۔ ان کے پاس مفت علاج کے لیے آیوشمان بھارت کارڈ بھی نہیں ہے۔‘‘ شاہدُل، جو کام کی تلاش میں دوسرے مقامات کی طرف ہجرت کرتے ہیں، اس وقت اپنے بیمار والد کی نگہداشت کے لیے ۱۰ ماہ سے زیادہ عرصے سے گھر پر موجود تھے۔ ان کی موجودگی پہلے سے ہی شدید جذباتی اور مالی پریشانی میں مبتلا اس فیملی کے لیے ہر ماہ ۲۰ ہزار روپے کی آمدنی کے اضافی نقصان کا باعث تھی۔

قادر پر فالج کا پہلا حملہ ۲۰۱۹ میں ہوا تھا۔ ان کے تین بیٹے، جو مہجری مزدور کے طور پر یا تو کیرالہ کے کافی کے باغات میں یا اروناچل میں ڈرائیور کے طور پر کام کرتے تھے، گھر پر ہی موجود تھے۔ لیکن وہ اس وقت اپنے والد کو ہسپتال نہیں لے گئے۔ انہیں اس سے بڑی پریشانیوں کا سامنا تھا۔ قادر فارنرز ٹربیونل (ایف ٹی) میں اپنی ’مشکوک‘ یا ڈی-وٹر کی قانونی حیثیت کے خلاف اپنا مقدمہ لڑ رہے تھے۔ بارپیٹا کی ایف ٹی نے پہلے ہی ان کی دونوں بیویوں، ۴۶ سالہ عظیم النساء اور پچاس کی عمر کے آس پاس پہنچ چکیں مرجینا خاتون کو غیر ملکی قرار دے دیا تھا۔

وہ گوہاٹی ہائی کورٹ میں اس فیصلہ کو چیلنج کر رہے تھے۔ نیشنل رجسٹر آف سٹیزنز (این آر سی) کا تازہ ترین حتمی مسودہ شائع ہو چکا تھا۔ اس رجسٹر سے فیملی کے تمام افراد کے نام حذف کر دیے گئے تھے۔

’’ڈی-ووٹر کے مقدمہ کی سماعت میں الجھے ہونے کی وجہ سے ہم نے انہیں ہسپتال لے جانے کے بارے میں سوچا ہی نہیں،‘‘ ۳۳ سالہ محید الاسلام کہتے ہیں۔ ان سے قریبی رشتہ نہ ہونے کے باوجود قادر انہیں اپنا ’پوتا‘ مانتے تھے۔ ’’یہ فالج کا کوئی بڑا حملہ نہیں تھا۔ گاؤں والوں نے مشورہ دیا کہ مقامی معالج جسم کے ایک حصہ کے فالج کا علاج کرسکتا ہے۔ ہم انہیں وہاں لے گئے، علاج کے بعد وہ صحت یاب ہو گئے، لیکن فالج کا اثر برقرار رہا۔‘‘

قادر اور ان کی فیملی کے مقدمات کی سماعت ۱۹۹۷ میں شروع ہوئی تھی۔ یہ وہ سال تھا جب ہندوستان کے انتخابی کمیشن نے آسام میں مختلف نسلی گروہوں کے درمیان ایک دہائی سے زیادہ طویل تنازعات اور پرتشدد قتل عام کے بعد انتخابی فہرستوں پر گہری نظر ثانی یا ان کی ’صفائی‘ کا حکم دیا تھا۔ غیر شہریوں کی شناخت اور انہیں انتخابی فہرستوں سے نکالنے کی اس مشق میں ریاست میں مسلمانوں اور ہندو اقلیتوں کے ایک بڑے طبقہ کو مشکوک ووٹر کے طور پر نشان زد کر دیا گیا تھا۔ آسام کے رہائشیوں پر غیر قانونی تارکین وطن ہونے کا شبہ ہونے لگا۔

انتخابی فہرستوں میں ان کے ناموں کے ساتھ منسلک انگریزی حرف ’ڈی‘ ان کی مشکوک شہریت کا اعلان کرتا تھا۔ سال ۱۹۹۷ میں قادر اور ان کی بیویاں ریاست کے تقریباً ۷ء۳ لاکھ ایسے افراد میں شامل تھیں۔ اس نشاندہی نے ان کی شناخت کو بدنام کر دیا، اور ملک کے جمہوری عمل میں حصہ لینے کا ان کا حق چھین لیا۔

شاہدُل کو وہ دن یاد ہیں جب بانس کی تجارت اور کھال کی سپلائی کرنے والے ایک کامیاب تاجر کے طور پر ان کے والد کی زندگی میں تبدیلی آنا شروع ہوئی تھی۔ ’’جب میں دسویں جماعت میں تھا [۲۰۱۰ میں]، تو مجھے پہلی بار اس بات کا علم ہوا کہ میرے والد اور میری دونوں مائیں ڈی ووٹر ہیں۔ تب مجھے احساس ہوا کہ میرے والد کیوں مسلسل تناؤ میں رہتے ہیں۔ انہوں نے زیادہ کمائی کرنے اور پیسے بچانے کے لیے سخت محنت کی تھی۔ ہماری تعلیم کے دوران وہ ہمارے لیے چیزیں خریدنے میں بہت محتاط رہتے تھے‘‘ شاہدُل کہتے ہیں۔ ’’اس وقت مجھے یہ احساس ہوا کہ وہ بہت تیزی سے بوڑھے ہو رہے ہیں۔‘‘

’’میں اپنی بیویوں اور اپنے غیر ملکی ہونے کے مقدمات لڑتے لڑتے بیمار ہو گیا ہوں،‘‘ بیمار قادر نے آسام کے باکسا ضلع میں اپنے گھر پر ہماری ملاقات کے دوران بتایا تھا۔ ’’دوبارہ ووٹ دینے کے لیے مجھے مزید پانچ سال انتظار کرنا پڑے گا۔‘‘ وہ ایف ٹی مقدمہ کا حوالہ دے رہے تھے، جسے انہوں نے ۲۰۱۹ میں لڑا تھا۔

سال ۲۰۱۸ میں ڈی ووٹر کے طور پر درجہ بندی کے تقریباً ۲۱ سال بعد، قادر اور ان کی بیویوں کو ایف ٹی سے نوٹس موصول ہوئے تھے۔ اس وقت آسام میں تقریباً ۱۰۰ ایف ٹی سرگرم عمل تھے۔ غیر قانونی تارکین وطن کے موضوع پر طویل عرصہ سے جاری سماجی اور سیاسی احتجاج کے مدنظر ۱۹۶۴ میں ریاست میں غیر ملکیوں کے ٹربیونلز قائم کیے گئے تھے۔ ان ٹربیونلز میں ایسے افراد کی قانونی حیثیت کے بارے میں رائے دی جاتی ہے جن پر ’غیر ملکی‘ ہونے کا شبہ ہوتا ہے۔ ایسے معاملات بارڈر پولیس یا الیکشن کمیشن کے ذریعہ پیش کیے جاتے ہیں۔

’’۲۰۰۵ تک شکایت کنندہ ریاست کو یہ ثابت کرنے کے لیےکہ ملزم غیر ملکی ہے، ایک واضح اور قابل فہم ثبوت پیش کرنا ہوتا تھا،‘‘ گوہاٹی ہائی کورٹ کے وکیل ولی اللہ لشکر کہتے ہیں۔ ’’تاہم، سال ۲۰۰۵ کے سپریم کورٹ کے فیصلہ نے ۱۹۸۳ کے قانون کو کالعدم قرار دیتے ہوئے ثبوت فراہم کرنے کی ذمہ داری خود ملزموں کے سر پر ڈال دی۔‘‘

قادر کو یہ یاد نہیں تھا کہ وہ ایف ٹی کی کتنی سماعتوں میں حاضر ہوئے تھے۔ وہ صرف اتنا جانتے تھے کہ وہ ہر ماہ وہاں جاتے تھے، وکلاء سے ملاقات کرتے تھے اور اپنے آبائی نسب کو ثابت کرنے والی دستاویزات جمع کرنے کے لیے مختلف سرکاری دفاتر کا چکر لگاتے تھے۔

"نوٹس ملنے کے بعد اچانک ان میں تبدیلی آنا شروع ہو گئی۔ وہ ایک دن کے لیے کام پر جاتے تھے اور اگلے دو دن گھر پر رہتے تھے،‘‘ ان کی بیوی عظیمُن یاد کرتی ہیں۔ ’’تین مقدمات کے اخراجات کو برداشت کرنے کے لیے ہمارے پاس جو بھی پیسہ تھا وہ خرچ ہوگیا اور ۸ بیگھہ زمین بھی فروخت ہو گئی۔ سال ۱۹۵۱ کے این آر سی سے متعلق تمام دستاویزات جمع کرنے اور اس کے بعد کی تمام ووٹر لسٹوں کو ترتیب دینے میں ہمیں بہت زیادہ لاگت آئی،‘‘ وہ کہتی ہیں۔

شہریت کے مقدمہ کا سامنا کر رہے افراد کو اپنے باپ دادا یا خود کی تصدیق شدہ ووٹر لسٹ کی کاپیاں پیش کرنی ہوتی ہیں (اگر انہوں نے ۱۹۶۶ سے پہلے ووٹ دیا تھا)۔ ووٹر لسٹ اور دیگر قانونی دستاویزات جاری کرنے والے مقتدرہ کے ذریعہ تصدیق شدہ ہونی چاہئیں۔

سال ۱۹۵۱ کے این آر سی میں قادر کے والد یعقوب علی کی عمر ۹ سال درج تھی۔ لیکن ۱۹۶۷ کی ووٹر لسٹ میں ان کی عمر ۳۸ سال بتائی گئی۔ مزید یہ کہ ۱۹۵۱ کے این آر سی میں قادر کے دادا رمضان علی کا نام ’رمجان‘ نہیں بلکہ ’راجِدفا بی بی‘ درج تھا (بالکل ویسے ہی جیسے گاؤں والے انہیں پکارتے تھے)۔ ایف ٹی نے یہ خیال ظاہر کیا کہ قادر یہ ثابت کرنے میں ناکام رہے کہ راجدفا اور رمضان ایک ہی شخص کے نام تھے۔ اس نے یہ بھی نتیجہ اخذ کیا کہ ۱۹۵۱ کے این آر سی میں یعقوب علی ولد راجدفا کے طور پر درج شخص قادر کا باپ نہیں تھا۔

اس طرح کی بے ضابطگیوں کا حوالہ دیتے ہوئے، بارپیٹا ضلع میں ایف ٹی (نمبر ۸) نے نومبر ۲۰۱۹ میں اعلان کیا کہ قادر ’’۱ جنوری ۱۹۶۶ سے ۲۴ مارچ ۱۹۷۱ کے درمیان غیر ملکی تھے۔‘‘ اس لیے قادر کی قسمت کا فیصلہ آسام معاہدہ (۱۹۸۵) کے مطابق ہوا۔ اس سہ فریقی معاہدہ کے تحت ۱۹۵۵ کے شہریت ایکٹ میں ترمیم کی گئی تھی۔ شہریت کے لیے کٹ آف کی تاریخ کی بنیاد پر، اس نے قادر جیسے ووٹروں کو ۱۰ سال کی مدت کے لیے ووٹر لسٹ سے ہٹا دیا۔ اس وقت حق رائے دہی سے محروم قادر آسام میں قیام کے اہل تھے، لیکن اگر زندہ رہتے تو ۲۰۲۹ میں ان کے ووٹر ہونے کا حق بحال ہو جاتا۔

’’میں یہاں اپنی موجودگی ثابت کر سکتا تھا، لیکن انہوں نے میری بیویوں کے کاغذات کو مسترد کر دیا اور انہیں غیر ملکی قرار دے دیا۔ میں نے ایف ٹی آرڈر کو چیلنج کرنے کے لیے گوہاٹی ہائی کورٹ سے رجوع کیا۔ اس عمل میں، میں نے سب کچھ کھو دیا۔‘‘ قادر کاروبار، زمین اور پیسوں کے نقصانات کا ذکر کر رہے تھے۔ آخری اور سب سے بڑا نقصان فالج کے بعد ان کی صحت کا تھا۔

’’فارنر عدالت میں ہر سماعت کا مطلب تھا ہم گواہ اکٹھے کریں، ان کے اخراجات برداشت کریں اور وکلاء کا معاوضہ ادا کریں۔ اس پورے عمل نے ہمیں بدحال کر دیا۔ ایک سال کے اندر اندر ان [قادر] پر اس قدر دباؤ پڑا کہ وہ صاحب فراش ہو گئے،‘‘ عظیمن کہتی ہیں۔ ان کے پڑوسی، ۶۷ سالہ باسط علی ان سے اتفاق کرتے ہیں۔ ’’وہ زندگی میں اچھا کر رہے تھے۔ لیکن ڈی ووٹر کے مقدمات کی وجہ سے وہ کاروبار سے لے کر صحت تک ہر چیز سے محروم ہو گئے۔ ایک بار بیمار پڑنے کے بعد وہ دوبارہ صحت یاب نہ ہو سکے۔‘‘

خرابی صحت نے آہستہ آہستہ قادر کو کام سے باہر کردیا۔ فیملی کو اکثر شاہدُل کی آمدنی پر انحصار کرتے ہوئے کفایت شعاری سے کام چلانا پڑا۔ لیکن قادر پرعزم تھے۔ ان حالات میں بھی وہ گوہاٹی کا ۱۳۵ کلومیٹر کا سفر طے کرنے کے لیے اپنے گاؤں سے بارپیٹا شہر تک آٹو اور پھر بس لے کر جاتے تھے۔ ’’ان ذہنی الجھنوں سے گزرتے ہوئے، ان کے فالج پر زور بڑھتا گیا،‘‘ عظیمن کہتی ہیں۔

سیاسی حالات بھی بدل چکے تھے۔ دسمبر ۲۰۱۴ میں شروع ہونے والا نیشنل رجسٹر آف سٹیزنز اپ ڈیٹ کرنے کا منصوبہ اگست ۲۰۱۹ میں پایہ تکمیل کو پہنچ چکا تھا۔ ایف ٹی کے ساتھ قادر کا معاملہ طے ہونے سے تین ماہ قبل حتمی فہرست شائع ہوئی اور ان کی فیملی کے تمام ۱۱ افراد ان ۱۹ لاکھ سے زائد افراد میں شامل تھے، جنہیں رجسٹر سے خارج کر دیا گیا تھا۔ منسوخی کی پرچی موصول ہونے کے بعد اپیل کرنے کے لیے ان کے پاس ۱۲۰ دن باقی تھے۔ اور آسام کے فارنرز ٹریبونل کو ان کی شہریت کا تعین کرنا تھا۔

’’ہمیں این آر سی کے لیے دستاویزات کا بندوبست بھی کرنا تھا،‘‘ شاہدُل کہتے ہیں۔ ’’ہمارے نام این آر سی کے پہلے مسودے میں اس لیے شامل کیے گئے تھے کیوں کہ ہمارے پاس ضروری دستاویزات جیسے میراثی ثبوت، پنچایتوں سے تعلق کے سرٹیفکیٹ، ووٹر لسٹوں کی مصدقہ کاپیاں سبھی کچھ تھے۔ لیکن حتمی مسودہ میں، ہمارے والدین کے خلاف ڈی ووٹر کے مقدمات کی وجہ سے ہمارے پورے کنبے کو ہٹا دیا گیا تھا۔‘‘

سال ۲۰۱۵ اور ۲۰۱۷ کے درمیان قادر اور ان کے اہل خانہ بھی اپنے این آر سی دستاویزات حاصل کرنے کے لیے بھاگ دوڑ کر رہے تھے۔ انہیں اپنا میراثی ڈیٹا تلاش کرنے کے لیے بارپیٹا کلکٹریٹ، اور این آر سی ہیلپ ڈیسک پر بھی جانا پڑا۔ عظیمن کو اپنے والد کی زمین کے کاغذات میں اپنا نام شامل کروانا پڑا تھا۔ یہ طویل عمل تھکا دینے والا تھا۔ ایسا اس لیے بھی تھا، کیوں کہ اس کے لیے درکار دستاویزات ڈی ووٹر کے معاملات سے مختلف تھے۔

پھر سپریم کورٹ نے ۲ جولائی ۲۰۱۸ کو حکم دیا کہ ڈی ووٹرز کو، ان کی اولادوں کو یا وہ لوگ جن کے معاملات ایف ٹی میں زیر التوا ہیں انہیں، این آر سی میں شامل نہیں کیا جائے گا، لہٰذا قادر کی فیملی کے ۱۱ افراد کے ناموں کو این آر سی سے خارج کر دیا گیا تھا۔ اس کا مطلب یہ تھا کہ فیملی کے لیے آزمائشوں کا ایک اور دور شروع ہو گیا ہے۔ اس افراتفری کے درمیان قادر کی شہریت کے مقدمات کے فیصلہ سے تھوڑا سکون ملا۔ عظیمن اور مرجینا کے معاملات ہائی کورٹ میں چل رہے ہیں، اور وہ اب ضمانت پر باہر ہیں۔

قادر پر ۲۰۲۳ میں فالج کا دوسرا حملہ ہوا۔ محیدُل کے مطابق، اس کے بعد انہیں دوبارہ مقامی معالجوں کے پاس لے جایا گیا۔ ’’ڈی ووٹر کے لیے کوئی مدد نہیں تھی، نہ بڑھاپے کی پنشن کی، اور نہ ہی حکومت کی طرف سے امدادی علاج کی۔ چونکہ طبی علاج بہت مہنگا ہے، اس لیے ہم نے تقریباً تین ماہ تک دوبارہ مقامی معالج سے علاج کروانے کی کوشش کی۔‘‘

لیکن جب قادر کی حالت میں کوئی بہتری نہ آئی تو وہ انہیں فخرالدین علی احمد میڈیکل کالج اور ہسپتال لے گئے، جو ان کے گاؤں سے ایک گھنٹہ سے زیادہ کی مسافت پر واقع بارپیٹا کے ضلعی ہیڈکوارٹرز میں واقع ہے۔ تاہم ڈاکٹروں کو ان میں صحت یاب ہونے کا کوئی امکان نظر نہیں آیا۔ اس کے بعد قادر گھر پر ہی رہے اور بانس کی چھڑی کے سہارے گرتے پڑتے چلتے رہے۔

جون ۲۰۲۵ میں مبینہ غیر قانونی تارکین وطن کو ملک بدر کرنے کے حکومت کے منصوبہ کی وجہ سے آسام میں بہت زیادہ کشیدگی تھی۔ ریاست نے مئی ۲۰۲۵ میں سو سے زیادہ افراد کو ہندوستان اور بنگلہ دیش کی سرحدوں کے درمیان ’نو مینز لینڈ‘ میں پھنسے ہوئے چھوڑ دیا تھا۔ اس میں کچھ اب بھی شہریت کے مقدمات لڑ رہے تھے۔ اس نے قادر کو پریشان کر دیا، کیونکہ ان کی بیویوں کو بھی اب غیرملکی سرزمین میں دھکیلا جا سکتا تھا۔ ان کی شہریت کے بارے میں کوئی سوال کرتا تو وہ رونے لگتے۔ اس تناؤ نے ان کی جان لے لی۔

شہریت کے ساتھ قادر کی جدوجہد ان کی زندگی میں ۲۸ سال تک جاری رہی، اور اس کا خاتمہ معذوری اور آخرکار ان کی موت کے بعد ہوا۔ ان کی بیویوں کی قومیت متنازع رہی، اور شہریت کے مقدمات کا پریشان کن سایہ فیملی کے سر پر منڈلا رہا ہے۔ ’’ہم تناؤ میں رہتے ہیں،‘‘ شاہدُل کہتے ہیں۔ ’’اگر میرے والدین غیر ملکی ثابت ہو گئے تو ہمارا کیا بنے گا؟‘‘

ترجمہ نگار: شفیق عالم