मिटत-भुलात शब्दन के कोठी भरत किसान

नागालैंड के गोड़ छुअत असम के जोरहाट जिला में पोहुकोटिया श्याम नाम के एगो निहायत छोट आ सुंदर गांव बा. इहंवा टाई तुरुं लोग रहेला. सरकारी कागज-पत्तर में एकरा टिपोमिया हाबी कहल जाला. माटी वाला घुमावदार रस्ता, बांस के झुरमुट, हरियरी के चादर आ पारंपरिक घर सब से सजल ई गांव जइसे पुरनका समय के एगो जिंदा तस्वीर होखो. इहे गांव में रहेलन 77 बरस के अनंत तुरुं. खेती-बाड़ी से गुजारा करेलन, बाकिर फुरसत में आपन भाषा के मिटत-भुलात शब्दन के नयका पीढ़ी तक पहुंचावे में लागल रहेलन.

“भाषा नदी के पानी नियर होखेला- बहत रहेला, त बदलतो रहेला. बाकिर एतना ना बदले के चाहीं कि ओकर पहचाने मिट जाव,” ऊ कहेलन. एही बात के गांठ बान्ह के ई छोट किसान पचास बरिस से जादे बखत से आपन माई-बोली के एक-एक शब्द कागज पर उतारत आ रहल बाड़न. तुरुं समाज कहंवा से आइल, कइसे-कइसे जगह बदलक, रस्ता में का-का छूटल, का-का जुड़ल, अनंत तुरुं बरिसन से ई सभ खोज-खबर लेत रहलन. एह बीच ऊ आपन भाषा के शब्द, कहावत, नियम- सब किताब, पत्रिका आ अखबार में सहेज के लिखत रहलन,

ई सब काम ऊ आपन जेब से करत रहलन, जबकि उनकर आमदनी के साधन बहुत सीमित, बस पांच बीघा (1.6 एकड़) जमीन रहे. चार दसक से जादे ले ऊ बिना पगार एगो वेंचर (सरकारी मदद के बिना चले वाला) स्कूल में मास्टरी (अनौपचारिक) करत रहलन आ हिसाबो-किताब संभरलन. आखिर में सरकारी मदद पहुंचल, पगार के बेरा आइल, बाकिर तब जब उनकर नौकरी के बस तीने महीना रह गइल रहे. एह सब के बावजूद आपन भाषा बचावे के राह से ऊ कबो ना हटलन.

सन् 2011 के भाषाई जनगणना में ताई तुरुं के अलग भाषा के दरजा ना मिलल. ओकरा के टाई भाषा के बड़ परिवार में डाल दिहल गइल. एह चलते सरकारी कागज-पत्तर देख के बतावल मुश्किल बा कि आज ताई तुरुं बोले वाला केतना लोग बचल बा. कुछ बरिस पहिले जब शोध करे वाला लोग उनका लगे आइल आ ताई तुरुं के बोलनिहार के गिनती पूछे लागल, त ऊ अपने जवाब खोजे गांव निकल पड़लन. घरे-घरे जाके पता कइलन, दोसरो गांव में चिट्ठी लिखलन. उनका पता चलल कि ताई तुरुं अब बस 1456 लोगन के ही जुबान पर बचल बा. ई लोग असम के छव अलग-अलग गांव आ अरुणाचल के कुछ घर में छितराइल बा.

टाई तुरुं भाषा के नुकसान आ ई सांस्कृतिक क्षरण साफ लउके लागल रहे. ऊ आपन आंख से देखत रहलन कि पारंपरिक लोकगीत, मीठ लोरी आ खास तरह के पहचान वाला नाच-गान सब धीरे-धीरे लुप्त भइल जा रहल बा. ऊ इहो देखलन कि कइसे काम के तलाश में पलायन करे वाला परिवार आपन भाषा पीछे छोड़त चल गइल. ऊ नयका पीढ़ी के आपन पारंपरिक धुन छोड़ के असमिया बिहू गीत गाते देखले बाड़न. बाकिर अनंत तुरुं हिम्मत ना हरलन, आपन ‘कोठी’ भरत रहलन, लगातार भरत रहलन.

अनंत तुरुं ‘तुरुं गा दुम’ (शब्दन के कोठी) नाम से हाथ से लिखल एगो शब्द पुस्तक तइयार कइले बाड़न. एकरा में देह के अलग-अलग अंग, जानवर के नाम, कुदरती चीज खातिर इस्तेमाल होखे वाला रोजमर्रा के शब्द सब लिखल बा. इ सब तुरुं, असमिया आ अंगरेजी में बा. ऊ आवे वाला पीढ़ी खातिर एगो शब्दकोष आ व्याकरण के किताब पूरा करे में जुटल बाड़न. आपन भाषा बचावे के एह कोशिश में ऊ कबो कवनो सम्मान आ फायदा ना खोजलन आ भाषा के खजाना तइयार करे में लागल रहलन. अनंत के 63 साल के घरवाली भानुमती तुरुं बतावेली, “उनका लगे एह शब्दकोष से आउर बड़का पांडुलिपी रहे. दस साल से जादे हो गइल, उ एकरा के असम साहित्य सभा के सौंप देले रहलन. उम्मीद रहे कि एक दिन ई किताब के रूप में छपी आ लोग तक पहुंची. बाकिर आजो हमनी इंतजारे करत बानी.”

अनंत तुरुं बस एतने चाहत बाड़न, “हमरा बादो तुरुं के आवाज गूंजत रहो.”

फिलिम में देखावल गइल गांव के नाम जनगणना में शायद वइसे ना दिखे, काहेकि ओकरा में से कइएक गांव बहुते छोट-छोट बा.

पारी के लुप्तप्राय भाषा प्रोजेक्ट (ईएलपी), अजीम प्रेमजी यूनिवर्सिटी के सहजोग से चले वाला एगो खास पहल बा. एकर मकसद भारत के संकटग्रस्त भाषा के, ओकरा बोले वाला आम अवाम आ ओकर जिनगी के अनुभव के सहारे दर्ज कइल बा.