வங்கியிலிருந்து விரக்தியுடன்

பர்பானி மாவட்ட கூட்டுறவு வங்கியின் (PDCB) போரி கிளையில் அனில் காப்ரி மூன்று நாட்களாக முயற்சிக்கிறார். ”இன்று எனக்கு டோக்கன் கிடைத்துவிட்டது,“ என்கிறார் அவர் நிர்க்கதியாக. “நான் மீண்டும் நாளைக்கு வந்து நாள் முழுவதும் இங்கு இருக்க வேண்டும்.”

எட்டு கிலோமீட்டர் தொலைவில் உள்ள ரிதஜ் கிராமத்தில் 28 வயது காப்ரி வசிக்கிறார். வெளியே காத்திருக்கும் விவசாயிகளுக்கு வங்கி சார்பில் சுமார் 150 டோக்கன் விநியோகிக்கப்பட்டன. பலரும் டோக்கனின்றி திரும்பிவிட்டனர். வெயிலில் அதிக நேரம் காத்திருந்தும் பலரால் டோக்கன் இருந்தும் வங்கிக்குள் செல்ல முடியாமல் போகலாம். இந்தாண்டு மழையில்லை.

“எனது வயல் வேலைகளை விட்டுவிட்டு பல நாட்களை இங்கு செலவிட என்னால் முடியாது,” என்கிறார் கொதித்து போன காப்ரி. அவர் தனது மூன்று ஏக்கர் நிலத்தில் சோயாபீன், பருத்தி பயிரிட்டுள்ளார். “எங்களின் நிலம், பயிரிட்ட விதை போன்ற தகவல்களை குறிக்கும் ஆவணங்களை திரட்டவே எனக்கு மூன்று நாட்கள் ஆகிவிட்டது. விவசாயிகள் பலரும் தன்னை ஆவணங்களுக்கு அணுகுவதால் கிராம கணக்காய்வாளர் மிகவும் பரபரப்பாக உள்ளார். கூடுதலாக அவர்கள் வங்கிக்கு [ஆட்டோவில்] செல்ல 40 ரூபாயும் கூடுதலாக தேநீருக்கும் மதிய உணவிற்கும் செலவிட வேண்டும்.”

குறுவை பருவ பயிர் காப்பீட்டு பிரீமியம் செலுத்த விவசாயிகள் வந்து சென்ற வண்ணம் உள்ளதால் வங்கி ஊழியர்களும் ஆவணங்களை சரிபார்க்க நிரம்பியுள்ளனர். ஆவணங்களை சரிபார்த்து, தகவல்களை இணைய வழியில் நிரப்பி , ஒரு படிவத்தை பதிவேற்ற ஊழியர்களுக்கு 15 நிமிடங்கள் ஆகின்றது. இரண்டு கவுன்டர்களில் ஒரு மணி நேரத்தில் 4-5 படிவங்கள் என்று ஒரு நாளுக்கு 75-80 படிவங்களை வங்கியால் பதிவேற்ற முடிகிறது. ஆனால் வெளியே 400க்கும் மேற்பட்ட விவசாயிகள் காத்திருக்கின்றனர்.

ஆனால் காப்ரியால் இப்படி காத்திருக்க முடியாது. சூழலே பதற்றமாக உள்ளது. வங்கிக்கு முன்புறம் காவல்துறை வாகனம் நிறுத்தப்பட்டுள்ளது. வரிசையில் குழப்பம் ஏற்படக்கூடாது என தடியுடன் சில காவல்துறையினர் நிற்கின்றனர். காப்ரிக்கு டோக்கன் கிடைப்பதற்கு முதல்நாள் ஜூலை 27 அன்று வங்கி மீது கல் எறிந்ததாக 24 விவசாயிகள் மீது குற்றஞ்சாட்டப்பட்டு, ஏழு பேர் கைது செய்யப்பபட்டுள்ளனர்.

“கொதித்து போன விவசாயிகள் வங்கி ஊழியர்களுடன் வாக்குவாதத்தில் ஈடுபட்டனர்,” என்கிறார் காவல் ஆய்வாளர் சுனில் கிரி. “அவர்கள் மதியம் இரண்டு மணி நேரம் சாலை மறியலில்[வங்கி கிளைக்கு எதிரே] ஈடுபட்டனர். அவர்களை சமாதானப்படுத்த காவல்துறையினர் முயன்றனர். ஆனால் அவர்கள் கல் எறிய தொடங்கியதும் தடியடி நடத்தினோம். மூன்று காவல்துறையினர் காயமடைந்தனர், பேருந்தின் வின்ட் ஷீல்ட் உடைக்கப்பட்டது.”

இறுதி நாளான ஜூலை 31க்கு சில நாட்களே உள்ளதால் விவசாயிகளிடம் பதற்றம் தொற்றிக் கொண்டது. “மழையை கணிக்க முடியாமல் போனது உங்களுக்குத் தெரியுமா,” எனும் காப்ரிக்கு வங்கியில் ரூ.1லட்சம் கடன் உள்ளது. “இந்தாண்டும் மழையின்றி எனது பாதி பயிர்கள் காய்ந்துவிட்டன. பயிர் காப்பீடு தான் இழப்புகளை குறைக்கிறது. ஆனால் வங்கி அதிகாரிகள் அறிவின்றி, திமிராக நடந்து கொண்டதால் இந்த மோதல் ஏற்பட்டது.”

பயிர் காப்பீட்டு பிரீமியம் செலுத்துவது ஆண்டுதோறும் நடைபெறுகிறது. பிரதான் மந்திரி ஃபசல் பீமா திட்டத்தின் கீழ், விவசாயிகள் காப்பீட்டு நிறுவனங்களிடம் கட்டணம் செலுத்த வேண்டும். மாநில அரசு இதற்கு பாலமாக உள்ளது. மோசமான பருவநிலைகளால் ஏற்படும் பயிர் இழப்பிலிருந்து விவசாயிகளை காப்பீடு பாதுகாக்கிறது.

வழக்கம்போல இந்தாண்டும் ஜூலை மத்தியில் இந்த நடைமுறை தொடங்கியது. ஆனால் பெரிய வித்தியாசத்துடன்: படிவங்களை இணைய வழியில் நிரப்ப வேண்டும் என்று மாநில அரசு கட்டாயமாக்கிவிட்டது. ஜூலை முதல் வாரத்தில் தான் இதற்கான அறிவிப்பாணையை அதிகாரிகள் அளித்தனர்.

ஆன்லைன் வசதிகளுடன் வங்கிகளில் படிவங்களை நிரப்ப வேண்டும் அல்லது உள்ளூர் இ-சேவை மையங்களுக்குச் செல்ல வேண்டும் என்ற நிலைக்கு விவசாயிகளை தள்ளியது. வழக்கமாக தனியார் ஒப்பந்தக்காரர்களால் நடத்தப்படும் இந்த மையங்கள், சைபர் கஃபேக்கள் போன்றவற்றில் விவசாயிகள் நேரடியாக படிவங்களை பதிவேற்றலாம். ஆனால், தொடர் இணைப்பு பிரச்சினையால், மையங்கள் பயன்படுத்தப்படுவதில்லை.

“இந்த நெரிசலை சர்வர்களால் சமாளிக்க முடியவில்லை,“ என்கிறார் PDCB போரி கிளை மேலாளர் ராஜேஷ் சரோட். “படிவங்களை வேகமாக பதிவேற்றம் செய்ய வங்கி ஊழியர்களுக்கு பயிற்சி அளிக்கப்படவில்லை. 2016ஆம் ஆண்டு வரை இருந்த ஆஃப்லைன் முறை என்றால் எங்களுக்கு பிரச்சினை இல்லை. ஆனால் இப்போது ஜூலை 31ஆம் தேதிக்குள் அனைத்தையும் பதிவேற்றம் செய்ய வேண்டிய நெருக்கடியில் இருக்கிறோம். நாங்களும் இப்போது பிரச்சினையில் உள்ளோம்.“

* * *
பீட் மாவட்டத்திற்கு நான் சென்ற சமயம் ஜூலை 31ஆம் தேதிக்கு மூன்று நாட்களே இருந்தன. பதற்றம் தீவிரமடைந்துள்ளது. சுமை தாங்க முடியாமல் ஆஃப்லைன் படிவங்களையும் பெற்றுக் கொள்ளுமாறு வங்கிகளுக்கு மாநில அரசு அறிவிப்பாணை வெளியிட்டுள்ளது. பெரும்பாலான விவசாயிகள் கணக்கு வைத்துள்ள மாவட்ட கூட்டுறவு வங்கிகளும் சுமையை பகிர்ந்து கொள்ளுமாறு கேட்டுக் கொள்ளப்பட்டுள்ளது. ஆனால் இவ்வங்கிகளின் பல கிளைகளில், ஸ்கேனர்கள், பிரிண்டர்கள் கிடையாது என்பதால் படிவங்களை ஏற்க முடியாது. இது பிற வங்கிகளுக்கு சுமையை அதிகரித்துள்ளது.

பீட் மாவட்ட கூட்டுறவு வங்கியின் (BDCB) டாக்கெட் கிளைக்கு வெளியே, குறுகிய தெருவில் விவசாயிகள் அமர்ந்துள்ளனர். வங்கி மேலாளரான கணேஷ் மஸ்கே, கடந்தாண்டு 3000 விண்ணப்பங்களைப் பெற்றதாக கூறுகிறார். “ஒரு நாளில் 250-300 [ஆஃப்லைனில்] என்றால் முடியும்,”என்று என்னை கவனிக்காதபடி சொல்கிறார் அவர். “கடந்தாண்டு பெற்றதில் [காலக்கெடு முடியும் நிலையில்] பாதியைக் கூட என்னால் இப்போது பெற முடியாது என நினைக்கிறேன்.”

வங்கிகளில் விவசாயிகளின் கவலை, குழப்பம், கூட்டம் நாளுக்கு நாள் அதிகரித்து வருகிறது. BDCBயின் பார்லி கிளையில், 23 வயது உமேஷ் சத்புதே வரிசையில் முன் நிற்க அதிகாலை 5.30 மணிக்கு வந்தபோது, ஏற்கனவே 250 பேர் இருந்தனர். “பிரீமியம் செலுத்த 5 நாட்களாக நான் முயல்கிறேன்,” என்கிறார். “மின்னஞ்சல் சேவை மையங்களில் முயன்றேன், பலனில்லை. பிறகு நேற்று இங்கு வந்தபோது தான் பெருங்கூட்டத்தை பார்த்தேன். எனவே காலை 5.30 மணிக்கு வந்தேன். மக்கள் நடைபாதையில் உறங்கியபடி காத்திருக்கின்றனர்.”

அவர்களில் 65 வயது சம்பாஜி சத்புதேவும் ஒருவர். “அச்சே தின் ஆனே வாலி ஹை,“ என்றபடி அவர் என்னிடம் காலிப் பையை காட்டுகிறார். “நான் கொண்டு வந்த இரண்டு பக்ரிசும், சப்சியும் நேற்று மாலையே தீர்ந்துவிட்டது. அதிலிருந்து எதுவும் சாப்பிடவில்லை.“

சம்பாஜியின் கிராமமான சேலு, வங்கியிலிருந்து 15 கிலோமீட்டர் தொலைவில் உள்ளது. “நான் இங்கு தான் இரண்டு நாட்களாக இருக்கிறேன்,“ என்கிறார் அவர். தெருவில் படுத்திருந்ததால் அவரது வெள்ளை குர்தா அழுக்காகி இருந்தது. கண்கள் சோர்ந்திருந்தன “நான் குளிக்கக் கூட இல்லை. ஆட்டோ அல்லது பேருந்தில் ஒருமுறை செல்ல 20 ரூபாய் செலவாகும். எனவே இங்கே தூங்கிவிட்டேன்.“

வரிசையில் முன்னேறிச் செல்ல ஒருவருக்கு ஒருவர் வாக்குவாதம் செய்து கொள்கின்றனர். வரிசையை ஒழுங்குப்படுத்த காவல்துறையினர் தடியடி பிரயோகிக்கின்றனர். “எங்கள் பயிர் காப்பீட்டை பெறுவதற்கு காத்திருக்க [இந்தாண்டு தொடக்கத்தில்] வைத்தனர்,“ எனும் சம்பா, தனது 4.5 ஏக்கர் நிலத்தில் சோயாபீன், பருத்தி பயிரிட்டுள்ளார். “இப்போது சொந்த பிரீமியம் செலுத்த இதை எல்லாம் சகித்துக் கொள்ள வேண்டி உள்ளது, என்ன நடக்கிறது? நாங்கள் எப்போது வேலையை பார்ப்பது?“

ஜூலை 31 அந்தி சாயும் பொழுதில், விவசாயிகள் பலரும் தங்கள் ஆவண வேலைகளை முடிக்கவில்லை. எந்தவொரு காப்பீட்டினாலும் பயிர்களை பாதுகாக்க முடியாத நிலைக்கு அவர்கள் தள்ளப்படுகின்றனர். நம்பிக்கையுடன் தொடங்கிய நாள் விரக்தியில் முடிகிறது.

* * *
ஆகஸ்ட் 1 அன்று நான் லத்தூரை அடைந்தபோது நேர்மறையாக நடந்தது. காலக்கெடுவை அரசு ஆகஸ்ட் 4 வரை நீட்டித்திருந்தது. நீண்ட வரிசையில் காத்திருக்க விவசாயிகளுக்கும் இன்னும் சில நாட்கள் கூடி இருக்கிறது

லத்தூரில் உள்ள பாரத ஸ்டேட் வங்கியின் ஜால்கோட் கிளையில், 40 வயது நாகேஷ் கேந்திரே ஆனந்தமாக வெளியே வருகிறார். 10 ஏக்கர் குடும்ப நிலத்தை அவரும், அவரது மூன்று சகோதரர்களும், பெற்றோர்களும் பங்கிட்டு கொண்டுள்ளனர். குடும்ப உறுப்பினர்கள் அனைவரும் வர வேண்டும் என்று வங்கி நிர்வாகம் அறிவுறுத்தியது. “என் சகோதரன் 50 கிலோமீட்டர் தொலைவில் உள்ள லோஹாவில் படிக்கிறான்,” என்கிறார். “அவர்கள் எங்களை பல நாட்கள் வரிசையில் காத்திருக்க வைத்தனர். படிப்பை விட்டுவிட்டு அவன் பிரீமியம் செலுத்த வரிசையில் நிற்க வேண்டுமா? ஏன் குடும்ப உறுப்பினர்கள் அனைவரும் படிவத்தை சமர்ப்பிக்க வேண்டும்? ஆவணங்கள் முறையாக இருப்பதால் நானே அவர்கள் சார்பில் தாக்கல் செய்யக் கூடாதா? என வங்கியில் நான் சண்டையிட்ட பிறகு இறுதியில் ஏற்றுக் கொண்டனர். காலக்கெடுவை நீட்டிக்காவிட்டால் எனக்கு பெரும் நெருக்கடி ஏற்பட்டு இருக்கும்.“

காலக்கெடு நீட்டிப்பில் கிடைத்த நிம்மதியும் நீடிக்கவில்லை. ஆகஸ்ட் 2ஆம் தேதி ஆஃப்லைன் படிவங்களை ஏற்க வேண்டாம் என்று வங்கிகளுக்கு அதிகாரிகள் மின்னஞ்சல் அனுப்பிவிட்டனர். ஆகஸ்ட் 4 வரையிலான காலக்கெடு, இணைய வழி பதிவேற்றத்திற்கு மட்டுமே என்று கூறிவிட்டனர். பீடில் உள்ள டால்கெட் கிளையில் கணேஷ் மஸ்கேவுக்கு இந்த திடீர் மாற்றங்கள் குறித்து அறிய நான் போன் செய்தேன். "இன்று காலை சுமார் 100 விவசாயிகள் வங்கியின் முன் கூடினர்", என்றார். "என்னால் முன்பு 1,600 படிவங்களை ஏற்க முடிந்தது. என்னால் இப்போது எதுவும் செய்ய முடியாது என்று விவசாயிகளிடம் கூறினேன். அவர்கள் எதிர்ப்பு தெரிவித்தனர். பின்னர் இ-சேவை மையத்தை நோக்கி விரைந்தனர்.“

டால்கெட்டில் உள்ள இ-சேவை மையம் வங்கியிலிருந்து சில மீட்டர் தொலைவில் உள்ளது. அதிகபட்சமாக, சுமார் 6-8 பேர் உள்ளே வரலாம். இதை சந்தோஷ் கெய்க்வாட் என்ற இளைஞர் நடத்தி வருகிறார். ஜூலை 30 அன்று, வலைத்தளம் (http://agri-insurance.gov.in) நெரிசலால் முடங்கியதாக அவர் என்னிடம் கூறினார். "பதிவிறக்கம், ஸ்கேனிங், பதிவேற்றம், ஆன்லைனில் பணம் செலுத்துதல் - இவற்றுக்கு நிறைய நேரம் ஆகும்," என்று அவர் கூறினார். "சர்வர் நடுவில் நின்றுவிட்டால், நீங்கள் முதலில் இருந்து தொடங்க வேண்டும்." இரவுபகலாக கூட இந்த மையத்தை இயக்கிய அவரால் ஒரு வாரத்தில் 30 விவசாயிகளின் படிவங்களை மட்டுமே பதிவேற்ற முடிந்தது. 100க்கும் மேற்பட்டோர் நம்பிக்கையுடன், விரக்தியுடன் காத்திருந்தனர்.

பின்குறிப்பு: ஜூலை 31 வரை, 39 லட்சம் படிவங்கள் மட்டுமே ஏற்றுக்கொள்ளப்பட்டன என்று மாநில வேளாண் அமைச்சர் பாண்டுரங் ஃபண்ட்கர் நம் செய்தியாளரிடம் தெரிவித்தார். 2016 ஆம் ஆண்டில், 1.09 கோடி விவசாயிகள் பயிர் காப்பீட்டிற்கு விண்ணப்பித்ததாக, மாநில அரசு மார்ச் மாதத்தில் தெரிவித்தது. அதே நேரத்தில் திட்டத்தை அணுக ஆதாரை கட்டாயமாக்கியது. 2017 ஆம் ஆண்டிற்கான இறுதி எண்ணிக்கையை அரசு இன்னும் தொகுக்கவில்லை என்றாலும், விண்ணப்பங்களின் அளவு மற்றும் காலக்கெடு ஆகஸ்ட் 4 வரை என நான்கு நாட்கள் மட்டும் நீட்டிக்கப்படுவதைக் கருத்தில் கொண்டு, பயிர் காப்பீட்டு விண்ணப்பங்களின் எண்ணிக்கை கடந்த ஆண்டைப் போன்றே இருப்பதற்கு சாத்தியமில்லை.

எவ்வாறாயினும், எண்ணிக்கையில் வித்தியாசத்தை உணர வேண்டும் என்று ஃபண்ட்கர் கூறுகிறார்: "கடந்தாண்டு வரை, பயிர்களின் எண்ணிக்கை அடிப்படையில் பயிர் காப்பீட்டை ஏற்றுக்கொண்டோம். எனவே ஒரு விவசாயி நான்கு பயிர்களை சாகுபடி செய்கிறார் என்றால், நான்கு படிவங்களை நிரப்பினார். இந்த முறை, ஒரு விவசாயிக்கு ஒரு படிவம், அதனால்தான் எண்ணிக்கை குறைந்துள்ளது. நாங்கள் ஆகஸ்ட் 5 அன்று மட்டுமே ஆஃப்லைன் படிவங்களை ஏற்றுக்கொண்டோம், அன்றைய தினம் 1,27,000 படிவங்களைப் பெற்றோம். ஆகஸ்ட் 1 முதல் ஆகஸ்ட் 4 வரை, எங்களுக்கு ஆன்லைன் படிவங்கள் மட்டுமே கிடைத்தன. இம்முறை இறுதி எண்ணிக்கை சுமார் 70 லட்சமாக இருக்கும் என்று நாங்கள் எதிர்பார்க்கிறோம்.”

தமிழில்: சவிதா