کووڈ کی سرگذشت: پٹنہ کے ڈوموں کی بے دخلی اور گمنامی

’’قہر برپا تھا،‘‘ عجیب و غریب نام والے ٹائم پاس یاد کرتے ہیں۔ ’’بہت لاش جلایا تھا۔ گنتی کے باہر ہو گیا تھا۔‘‘

گنگا کے کنارے واقع پٹنہ کے بانس گھاٹ کے قدیم ترین شمشان گھاٹ پر کووڈ۔۱۹ کی آمد کے پانچ سال بعد ۲۱ سالہ ٹائم پاس ایک بار پھر گمنامی کے اندھیروں میں کھو گئے ہیں۔ وہ اس عالمی وبا کے دوران کچھ وقت کے لیے اس گمنامی سے باہر آئے تھے۔ اب وہ بے گھر اور بے روزگار ہیں اور اس شہر میں پھر سے ایک گمنام شخص کی طرح زندگی گزار رہے ہیں۔

ایسا لگتا ہے کہ مستقل کام یا آمدنی کے بغیر زندگی گزارنے والے ٹائم پاس پر ان کا یہ نام صادق آتا ہے۔

لیکن انہیں یہ نام اپنی بے روزگاری کی وجہ سے نہیں ملا تھا۔ اس کے لیے ان کے چچا جگنو رام ذمہ دار تھے۔ ان کی پیدائش کے وقت جگنو رام سنی دیول کی ایک فلم دیکھ کر واپس آئے تھے۔ اور جب گھر کی خواتین نے ان کے بیکار بیٹھے رہنے پر طنز کیا، تو انہوں نے اس طنز پر بچے کا نام رکھ دیا۔

’’اب جو بھی کام میرے پاس آتا ہے اسے کر لیتا ہوں،‘‘ ٹائم پاس کہتے ہیں۔ ’’میں کبھی میٹرو میں بیت الخلاء صاف کرتا ہوں، کبھی نالیوں کی صفائی کرتا ہوں، کبھی سڑے ہوئے سؤروں کو اٹھاتا ہوں، کبھی لاوارث لاشوں کو جلاتا ہوں، اور کبھی کچرا بھی جمع کر لیتا ہوں،‘‘ وہ اپنے کاموں کی تفصیل فراہم کرتے ہیں۔

جب بھی شہر کو اپنے مردوں، بوسیدہ اور لاوارث لاشوں کو ٹھکانے لگانا ہوتا ہے، تو ٹائم پاس جیسے لوگوں سے رجوع کیا جاتا ہے۔ اگر کسی لاش کی بدبو فضا میں پھیلنے لگتی ہے، تو ٹائم پاس کو بلایا جاتا ہے۔ ریلوے کی پٹریوں پر کوئی مسخ شدہ لاش پڑی ہو، تو ٹائم پاس کو طلب کیا جاتا ہے۔ شہر کے کسی گوشہ میں کوئی لاوارث لاش مل جائے، تو پولیس کی جیپ ٹائم پاس کو لینے پہنچتی ہے، اور وہ پوسٹ مارٹم روم کے باہر انتظار کرتے ہیں۔

انہیں اس لیے نہیں بلایا جاتا کہ انہوں نے اس کام کی باقاعدہ تربیت حاصل کی ہے، بلکہ اس لیے بلایا جاتا ہے کہ وہ ڈوم برادری سے تعلق رکھتے ہیں۔ بہار میں ڈوموں کو مہا دلت کے زمرے میں شامل کیا گیا ہے۔ ان کا شمار ریاست کے پسماندہ ترین سماجی گروہوں میں ہوتا ہے۔ سال ۲۰۲۳ میں کرائے گئے ذات پات پر منبی سروے کے مطابق، ریاست میں ان کی کل آبادی دو لاکھ ۶۳ ہزار ۵۱۲ ہے، جو ریاست کی تقریباً ۱ء۱۳ کروڑ آبادی کا محض ۲۰ء۰ فیصد بنتی ہے۔

اس برادری کے لوگ ہندو سماجی درجہ بندی میں سب سے نچلے درجے پر زندگی گزارنے پر مجبور ہیں۔ ان میں سے بیشتر ایسے پیشوں سے وابستہ ہیں، جو غالب ذاتوں کے ذریعہ ان پر مسلط کیے گئے ہیں، مثلاً مردوں کو ٹھکانے لگانا یا صفائی ستھرائی کا کام۔

’’سات بجے سے گھاٹ پر بیٹھ جاتا ہے کہ کگھنی باڈی آوے، کوئی کتا آوے، کوئی بچہ آوے [صبح ۷ بجے سے شمشان گھاٹ پر بیٹھ کر انتظار کرتا ہوں کہ کوئی لاش آئے، یا کسی کتے کا مسخ شدہ ڈھانچہ لایا جائے، یا کسی ہسپتال سے کسی مردہ بچے کو جلانے کے لیے لایا جائے]،‘‘ ٹائم پاس کہتے ہیں۔ وہ ہم سے مگدھی (جسے مگہی بھی کہتے ہیں) میں بات کرتے ہیں۔

ہر کام کے بدلے انہیں کبھی ۲۰۰ روپے، کبھی ۳۰۰ روپے، اور زیادہ سے زیادہ ۵۰۰ روپے تک کی معمولی سی رقم ملتی ہے۔ وہ یہ سارا کام ننگے ہاتھوں، بغیر کسی حفاظتی دستانے کے، انجام دیتے ہیں۔

جب پہلی بار اس رپورٹر نے ۹ مئی ۲۰۲۱ کو ان سے ملاقات کی تھی تو وہ جوانی کی دہلیز پر کھڑے، پانچ فٹ دو انچ قد کے ایک دبلے پتلے اور لاپرواہ انداز کے لڑکے تھے۔ پانچ سال بعد، اس سال ۲۱ اپریل کو ہم دوبارہ ان سے ملے۔ اس دوران ان کا قد بمشکل ایک انچ بڑھا تھا۔ انہوں نے خود سے دو سال چھوٹی کاجل سے شادی کر لی تھی، اور اب وہ دو بچوں، لکشمی اور راکی کے باپ ہیں۔

جب ہم ان سے ملتے ہیں، تو ٹائم پاس بانس گھاٹ کے کلرک سیکشن کے کھلے برآمدہ کے ایک کونے میں بیٹھے ہوتے ہیں۔ یہاں کا درجۂ حرارت ۴۰ ڈگری سیلسیس ہے۔

کریمیٹوریم (لاش بھٹی) کی دیواروں پر تازہ پینٹ کے نیچے کورونا وائرس کے مدھم پڑ چکے نشانات اب بھی نمایاں ہیں۔ وہاں اب بھی یہ تحریر پڑھی جا سکتی ہے: ’’کووڈ کے متاثرین کی آخری رسومات مفت ادا کی جاتی ہیں۔‘‘

ان کے سر کے اوپر ایک پنکھا گھوم رہا ہے، جس سے گرم ہوا خارج ہو رہی ہے۔ قریب ہی ڈوم برادری کے لوگوں کا ایک گروہ اس جھلسا دینے والی گرمی میں لکڑی کے ایک تختہ پر نیم بیداری کی حالت میں لیٹا کام کے انتظار میں ہے۔ گزشتہ دو ہفتوں سےٹائم پاس کو گزر اوقات کے لیے خاطر خواہ کام نہیں ملا ہے۔ وہ کہتے ہیں، ’’کبھی کبھی بھوکے بھی سوتنے (سونا) پڑ جاتا ہے۔‘‘

پانچ سال پہلے، ٹائم پاس اور دیگر ڈوم اسی جگہ موجود رہتے تھے۔ اس وقت مردوں کے درمیان ہی کھانا، سونا، چلنا پھرنا اور آرام کرنا سب کچھ ہوتا تھا۔ دن رات چتائیں جلتی رہتی تھیں۔ قطاریں اتنی طویل ہو گئی تھیں کہ انتظار کا وقفہ بارہ گھنٹے یا اس سے بھی زیادہ ہو جاتا تھا۔ کووڈ سے مرنے والوں کی لاشیں بڑی تعداد میں آ رہی تھیں، یہاں تک کہ بعض اوقات ایک ہی ایمبولینس میں تین تین لاشیں لائی جاتی تھیں۔

پٹنہ میونسپل کارپوریشن (پی ایم سی) کی جانب سے بانس گھاٹ پر تعینات کیے گئے تمام ۱۴ ڈوم اسکول ڈراپ آؤٹ تھے۔ ان میں سے کئی نے دوسری یا تیسری جماعت کے بعد ہی تعلیم چھوڑ دی تھی، جبکہ کوئی بھی مڈل اسکول سے آگے نہ بڑھ سکا تھا۔ اس کے باوجود انہوں نے معاشرہ کے لیے نہایت ضروری کام انجام دیا۔ لیکن اس وقت وہ اس وبا کی ہولناکیوں کے دباؤ سے نڈھال ہو جاتے تھے۔

پی ایم سی نے ہنگامی بنیادوں پر ۱۴ مزید ڈوم ملازم رکھے، لیکن اس کے باوجود ۵۶ انسانی ہاتھ ناکافی ثابت ہوئے۔ اس دوران پٹنہ میں کووڈ کے سب سے زیادہ معاملے اور اموات رپورٹ ہو رہی تھیں اور یہ ریاست کا سب سے زیادہ متاثر شہر تھا۔

’’یہاں تک کہ لاش جلانے والی برقی مشینیں ۲۴ گھنٹے مسلسل استعمال کے بعد خراب ہو گئی تھیں،‘‘ ۵۰ سالہ راج کمار بتاتے ہیں۔ یہی وجہ تھی کہ تقریباً ۵۰ فیصد آخری رسومات لکڑی کی چتاؤں پر ادا کی گئیں۔ آج صورتِ حال بدل چکی ہے اور برقی مشینوں کے ذریعے آخری رسومات کا تناسب دوبارہ بڑھ کر تقریباً ۸۰ فیصد تک پہنچ گیا ہے۔ کمار رجسٹریشن کے سربراہ ہیں اور ۲۰۱۷ سے اس گھاٹ پر تعینات ہیں۔

مزید ۱۲ ڈوم، جن کی عمریں ۱۶ سے ۴۰ سال کے درمیان تھیں، لائے گئے، جس کے بعد ان کی مجموعی تعداد ۴۰ ہو گئی۔ انہیں میونسپلٹی نے نہیں رکھا تھا، بلکہ غمزدہ کنبوں نے براہِ راست برادری سے رابطہ کر کے کام پر تعینات کیا تھا۔ یہ کنبے انہیں ۱۰۰۰ سے ۴۰۰۰ روپے تک کی رقم ادا کرتے تھے، جو چتا جلانے والے چار کارکنان میں تقسیم ہو جاتی تھی۔ ان ۱۲ افراد میں سے کسی نے بھی پہلے کبھی یہ کام نہیں کیا تھا، لیکن کووڈ کی دوسری اور ہولناک لہر کے دوران وہ اچانک خود کو لکڑی کی چتاؤں اور برقی کریمیٹوریم، دونوں جگہوں پر آخری رسومات انجام دیتے ہوئے پاتے ہیں۔

یہ وہ وقت تھا جب بانس گھاٹ کے سب سے کم عمر اور نئے ملازمین میں سے ایک نے آگے بڑھ کر وہ کام کیا جس سے وبا کے عروج کے دوران زیادہ تر لوگ گھبراتے تھے، یعنی کووڈ۔۱۹ سے جاں بحق ہونے والے شخص کی آخری رسومات انجام دینا۔ اس کے بعد باقی گیارہ افراد نے بھی اسی کی پیروی کی۔

ان کی پہلی چتا کووڈ وائرس سے جاں بحق ہونے والی ایک نوعمر لڑکی کی تھی۔ انہیں نہ اس کا چہرہ یاد ہے، نہ عمر؛ صرف اتنا یاد ہے کہ اس کی لاش سفید پلاسٹک میں لپٹی ہوئی تھی۔ انہیں یاد ہے کہ اہلِ خانہ اسے کریمیٹوریم کے احاطہ میں چھوڑ گئے تھے اور خوف کے مارے اسے چھونے کی بھی ہمت نہیں کر پا رہے تھے۔ کچھ دیر ٹھہرنے کے بعد آخری الوداع کہے بغیر وہ وہاں سے چلے گئے تھے۔ اس طرح اس کی آخری رسومات ادا کرنے کی ذمہ داری سورج کمار کے سر پر آ پڑی تھی۔

ٹائم پاس اور ان کے تین ساتھیوں نے آخری رسومات ادا کیں اور چتا کو آگ دی۔ اس کام کو انہوں نے کسی بھی حفاظتی ساز و سامان، مثلاً پی پی ای کٹس، دستانوں، فیس شیلڈز یا این۔۹۵ ماسک کے بغیر انجام دیا۔

’’یہ تو اے سی میں بیٹھنے والوں کے لیے ہے،‘‘ وہ طنزیہ لہجے میں کہتے ہیں۔ پہلی لہر کے دوران جن ڈوموں نے ۴۲ ڈگری سینٹی گریڈ کی شدید گرمی میں حفاظتی پوشاک پہننے کی کوشش کی، وہ چند ہی منٹوں میں پسینے سے شرابور ہو گئے اور ان کا دم گھٹنے لگا، یہاں تک کہ کئی بار وہ بیہوش ہو کر گر پڑتے تھے۔ چنانچہ جلد ہی ان کٹس کا استعمال ترک کر دیا گیا۔ بعد ازاں مانسون کے دوران ان کا استعمال کسی اور مقصد کے لیے کیا گیا۔

موت نے اس کم عمری میں بھی ٹائم پاس کو خوفزدہ نہیں کیا۔ ’’مردہ کے بیچ میں پالایا پوشایا ہے، تو مایا کسے لگے گا۔ [جن کی پرورش مُردوں کے درمیان ہوئی ہو، ان کے جذبات کو کوئی لاش کیسے متاثر کر سکتی ہے؟]‘‘

ایک لاش کے بعد دوسری اور دوسری کے بعد تیسری، یہ سلسلہ جون ۲۰۲۱ تک، مسلسل ۴۵ دنوں جاری رہا۔ اس عرصے میں ٹائم پاس ایک ایسی حقیقت کے گواہ بنے، جو آج بھی سرکاری اعداد و شمار کے نیچے دبی ہوئی ہے۔

ہندوستان میں کووڈ۔۱۹ سے ہونے والی اموات کے سرکاری اعداد و شمار میں موجود خامیوں سے واضح ہوتا ہے کہ مرنے والوں کی اصل تعداد کو بہت کم کر کے پیش کیا گیا تھا۔

کووڈ۔۱۹ کے تصدیق شدہ معاملات کی دنیا میں دوسری سب سے بڑی تعداد ہندوستان میں درج کی گئی، جہاں مجموعی طور پر ۵ء۴ کروڑ سے زائد معاملات سامنے آئے۔ سرکاری اعداد و شمار کے مطابق کووڈ۔۱۹سے ہونے والی اموات کے لحاظ سے بھی ہندوستان دنیا میں تیسرے نمبر پر رہا، اور وبا کے اختتام تک ہلاکتوں کی سرکاری تعداد ۵ لاکھ ۳۳ ہزار ۸۴۷ بتائی گئی۔ تاہم، عالمی ادارۂ صحت کی ایک رپورٹ کے مطابق ہندوستان میں تقریباً ۴۷ لاکھ اضافی موتیں ہوئیں، جن کا تعلق براہِ راست یا بالواسطہ طور پر کووڈ۔۱۹ سے تھا۔

’’عام دنوں میں یہاں دو سے پانچ چتائیں جلائی جاتی ہیں۔ کووڈ کے دوران ہم روزانہ ۷۰ سے ۸۰ چتائیں دیکھ رہے تھے۔ اور تین ہفتوں کا ایک ایسا دورانیہ بھی آیا جس میں روزانہ ۱۰۰ سے ۱۰۵ آخری رسومات انجام دی گئیں،‘‘ رجسٹریشن ہیڈ راج کمار کہتے ہیں۔ ان کا یہ بیان ان سرکاری اعداد و شمار کی واضح تردید ہے، جو ہر شام ریاست کے ہیلتھ بلیٹن میں جاری کیے جاتے تھے۔

ٹائم پاس ہمیں بتاتے ہیں کہ ایک صدی پر محیط ان کے خاندان کی چار نسلوں میں سے کسی نے بھی موت کا وہ ہولناک منظر نہیں دیکھا جو انہوں نے اپنی آنکھوں سے دیکھا ہے۔

’’باپ دادا جس میں کھٹا ہے، بیٹا بھی اسی میں کھٹے گا [بیٹا اپنے والد اور دادا کا پیشہ ہی اپنائے گا]،‘‘ ٹائم پاس یہ بتاتے ہوئے وضاحت کرتے ہیں کہ انہیں اصولی طور پر ذات پر مبنی یہ کام وراثت میں ملا تھا۔ ان کے دو بھائی، ۲۵ سالہ رام جانے اور ۲۳ سالہ شیام، دوسرے شمشان گھاٹوں پر کام کر رہے تھے اور آج بھی کر رہے ہیں۔ ان کی ایک بہن گوری (۳۵) شادی شدہ ہیں اور دوسرے ضلع میں رہتی ہیں۔

ان کے والدین، پارس ڈوم اور شیلا دیوی، بھی بانس گھاٹ پر ہی رہتے تھے۔ پارس شمشان گھاٹ کے ملازم تھے، جبکہ شیلا چتاؤں سے بچ جانے والے ٹھنڈے کوئلے اور لکڑیاں جمع کرتیں اور انہیں بازار میں فروخت کرکے تین سے پانچ روپے روزانہ کما لیتی تھیں۔ وہ گھر کے اخراجات پورے کرنے کے لیے بانس کے چھاج (سوپ) بھی تیار کرتی تھیں۔ ٹائم پاس سمیت ان کے بچے بھی انہی کے ساتھ رہتے، شمشان گھاٹ کی صفائی کرنے، سؤر پالنے اور انسانی فضلہ صاف کرنے جیسے کاموں میں ان کا ہاتھ بٹاتے تھے۔

لیکن جب ٹائم پاس نے ۱۶ سال کی عمر میں پہلی بار مردہ جلانے کا کام شروع کیا تو وہ غیر متوقع طور پر ایک ’کووڈ وارئیر‘ بن گئے۔ انہوں نے خوف اور کورونا وائرس سے جڑی سماجی بدنامی کے باعث اپنے ہی اہلِ خانہ کے ذریعہ چھوڑی ہوئی لاشوں کو موت کے بعد عزت و احترام فراہم کیا۔ ان کا یہ کردار ایک ساتھ خطرناک بھی تھا اور جرات مندانہ بھی، تاہم یہ وہ کردار ہے جسے کووڈ کے قومی بیانیہ میں کوئی جگہ نہیں ملتی۔ ان کی کہانی ڈوم برادری کے اندر تو زبانی روایت کے طور پر زندہ ہے، لیکن وسیع تر معاشرہ میں اسے گویا مٹا دیا گیا ہے۔

مہینوں بعد، جب بالآخر کووڈ کی لہر تھمی، میونسپلٹی کے زیرِ ملازمت ڈوم برادری کے افراد کو ۴۵۰۰ روپے بطور اعزازیہ دیے گئے۔ انہیں یہ بھی بتایا گیا کہ یومِ آزادی کے موقع پر انہیں اعزاز سے نوازا جائے گا، اور اس سلسلے میں ۱۵ اگست کی تقریب کے لیے پٹنہ کے گاندھی میدان کا دعوت نامہ بھی موصول ہوا۔ راج کمار اور تین دیگر ملازمین، جو بنیادی طور پر کلرک تھے، تقریب میں شریک تو ہوئے، لیکن بغیر کسی اعزاز کے واپس لوٹ آئے۔

’’شاید ہم ہیرو نہیں بلکہ ولین تھے، کیونکہ کووڈ بنیادی طور پر موت کا ایک تماشہ تھا،‘‘ کمار نے اب اس دعوت نامے کا مذاق اڑاتے ہوئے کہا۔

ٹائم پاس کو نہ کبھی ۴۵۰۰ روپے کا اعزازیہ ملا اور نہ ہی ریاست کی جانب سے ان کی کبھی حوصلہ افزائی کی گئی۔ جیسے جیسے دنیا کووڈ کے وبائی سالوں سے آگے بڑھتی رہی ہے، ان کی محنت اور قربانی بھی کووڈ کے دور کے قومی بیانیہ سے آہستہ آہستہ گم ہوتی جا رہی ہے۔

ان کا اندازہ ہے کہ انہوں نے کووڈ سے مرنے والے ۲۰۰ سے زائد لوگوں کی آخری رسومات ادا کیں اور اس عمل کے ذریعے تقریباً ۷۰ ہزار سے ایک لاکھ روپے تک کی آمدنی حاصل کی۔ یہ رقم انہیں متوفی افراد کے اہلِ خانہ کی جانب سے دی گئی۔

’’کئیوں میں تو پیلو بھی پڑ گیا تھا [کچھ لاشیں اتنی بری طرح سڑ گئی تھیں کہ ان پر کیڑے رینگنے لگے تھے]،‘‘ وہ کہتے ہیں۔ بعض صورتوں میں، مرنے والے کے ساتھ کوئی رشتہ دار بھی نہیں آتا تھا۔ ایسی لاشوں سے انہوں نے پازیبیں اور پیر کی انگوٹھیاں نکال کر رکھ لیں۔

’’میں نے انہیں بعد میں ۹ ہزار روپے میں بیچ دیا،‘‘ وہ اعتراف کرتے ہیں۔ وہ رقم ملتے ہی ختم بھی ہو گئی۔ انہوں نے ۱۳ ہزار روپے میں ایک سیکنڈ ہینڈ اسکوٹر خریدا، مگر چند ہی مہینوں بعد، انجن کی مرمت کے تقاضے پر اسے بھی بیچنا پڑا۔ اسی دوران انہوں نے ایک اسمارٹ فون اور چند نئے کپڑے بھی خریدے۔ ان بے رحم مہینوں میں روزگار کے ساتھ ساتھ روزمرہ کے اخراجات بھی اتنے ہی کمرتوڑ ثابت ہو رہے تھے۔ اپنے والد پارس کے علاج کے اخراجات پورے کرنے کے لیے انہوں نے اپنا سؤر اور اس کے چار بچے ۱۹ ہزار روپے میں فروخت کر دیے۔ ایک سڑک حادثہ میں ایک تیز رفتار گاڑی کی زد میں آکر ان کی ٹانگ ٹوٹ گئی تھی۔ اسی عرصے میں انہوں نے مہنگے داموں ملنے والے دال بھات پر بھی پیسے خرچ کیے۔ آمدنی کا کچھ حصہ مہوا – مہوا کے پھول سے تیار کی جانے والی دیسی شراب – پر بھی صرف ہوا، تاکہ ذہن کو کچھ دیر کے لیے بے حس کر سکیں اور لاشوں کی ناقابلِ برداشت بو سے خود کو بچا سکیں۔ ان کی والدہ کا انتقال ۲۰۲۳ میں ہوا۔

اس سال ۳۰ اپریل کو پٹنہ میں ہونے والی بارش کے بعد گردنی باغ محلے کا کچی تالاب علاقہ زیرِ آب آ گیا۔ یہ ایک شہری کچی آبادی ہے جہاں ٹائم پاس اور ان کے والد سمیت تقریباً بیس کنبے رہتے ہیں۔ اسی سال ہولی کے دوران ٹائم پاس کی بیوی کاجل اپنے دو بچوں کے ساتھ انہیں چھوڑ کر چلی گئی اور اب وہ کسی دوسرے شخص کے ساتھ رہ رہی ہے، جو دیسی شراب فروخت کرتا ہے۔ فی الوقت صرف ٹائم پاس اور ان کے والد ایک ساتھ رہتے ہیں۔ ڈوم بستیاں عموماً نالوں، گندے تالابوں اور کچرے کے ڈھیروں کے قریب آباد ہوتی ہیں، جہاں سیلاب اور بے دخلی کی کارروائیاں معمول کا حصہ ہیں۔ اس کے علاوہ، نشیبی سرکاری زمینوں پر قبضے کی کوششوں کے دوران بعض اوقات مبینہ طور پر مافیا ان کی جھونپڑیوں کو نذر آتش بھی کر دیتے ہیں۔

’’کاش حکومت ہمیں کسی ڈوم خانہ (کالونی) میں دوبارہ آباد کر دیتی،‘‘ پارس ڈوم ایک ٹھنڈی آہ بھرتے ہوئے کہتے ہیں۔

پارس نے ٹائم پاس کے لیے۱۲ ضرب ۱۰ فٹ کی یہ جھونپڑی بنائی، جس کی چھت کچی تالاب میں منعقد ہونے والی سیاسی ریلیوں سے جمع کی گئی پلاسٹک کی چادروں سے بنی تھی۔ دو سال قبل اس محلہ میں آباد ہونے سے پہلے، ٹائم پاس چھجو باغ میں رہتے تھے، جہاں سے انتظامیہ نے تجاوزات کے خلاف مہم میں انہیں بے گھر کر دیا تھا۔ اس کے بعد انہیں کام نہیں مل رہا تھا۔

مایوسی کے عالم میں ٹائم پاس اور ان کے کزن منگرو ڈوم نے ایک تعمیراتی مقام پر کام تلاش کیا۔ ’’ہم سارا دن اینٹیں اٹھاتے رہے، اور جب مینیجر کو ہماری ذات کے بارے میں معلوم ہوا، تو ہمیں نوکری اور اجرت دونوں سے محروم کر دیا گیا،‘‘ وہ شکایتی لہجے میں کہتے ہیں۔ اس سے قبل بھی ٹائم پاس کو شمشان گھاٹ سے الگ کام تلاش کرنے میں کامیابی ملی تھی۔ کبھی کبھی یومیہ مزدورکے طور پر کام کرتے، کبھی شادی کے خیمے لگاتے، بارات کے جلوس کے دوران لائٹیں اٹھاتے، اور شادی کی رسومات کے بعد برتن صاف کرتے تھے۔

’’آپ کو یہ کام صرف اسی صورت میں ملتا ہے جب آپ اپنی ڈوم کی شناخت چھپاتے ہیں،‘‘ وہ بتاتے ہیں۔ ۲۷ لاکھ کی آبادی والا یہ بڑا شہر کچھ حد تک گمنامی عطا کرتا ہے اور ایک ایسی پناہ گاہ بن جاتا ہے جہاں شناخت کو چھپایا یا بدلا جا سکتا ہے۔

’’کسی گاؤں یا چھوٹے علاقے میں، جہاں ہر شخض ایک دوسرے کو جانتا ہے، اس طرح کا یومیہ اجرت کا کام تلاش کرنا کسی ڈوم کے لیے ناممکن ہے،‘‘ ٹائم پاس کہتے ہیں۔

جموئی ضلع کے سکندرا گاؤں کے رہنے والے، رجسٹریشن ہیڈ راج کمار چتاؤں اور راکھ کے اس بندھن سے خود کو آزاد کرانے میں اس لیے کامیاب رہے، کیوںکہ ان کے والد انہیں اسکول بھیجنے کے لیے پرعزم تھے۔ کمار نے بالآخر حیاتیات (بائیولوجی) میں ڈگری مکمل کی، جو ان کی برادری کے کسی شخص کے لیے ایک غیرمعمولی کامیابی ہے۔

کمار کہتے ہیں کہ ان کے دادا کے دور میں، ’’ڈوم برادری کے لوگ جب کسی غالب ذات کے گھر کے پاس سے گزرتے تھے، تو اپنی چپلیں اپنے سر پر رکھ لیتے تھے اور جھک جاتے تھے۔‘‘

اگلی نسل کے لیے حالات میں تھوڑی تبدیلی آئی۔ کمار کہتے ہیں، ’’میرے والد کے دور میں، اس کا مطلب یہ تھا کہ جیسے ہی کسی اونچی ذات کے شخص کو گزرتے ہوئے دیکھو، فوراً چارپائی یا اسٹول سے کھڑے ہو جاؤ۔ ہمیں شیشے کے گلاس سے پانی پینے کی اجازت نہیں تھی۔ ہم اپنے ہاتھ جوڑتے تھے اور ہتھیلی سے پانی پیتے تھے۔‘‘ ایک چھوٹی لیکن اہم تبدیلی۱۹۹۰ کی دہائی میں اس وقت رونما ہونا شروع ہوئی، جب لالو پرساد یادو اقتدار میں آئے۔

’’کم از کم ہم نے اسکول جانا تو شروع کیا۔ لیکن ڈوم، مسہر اور چمار (یہ سب درج فہرست ذاتیں) برادری کے بچوں کو عام زمرے کے طالب علموں سے الگ بٹھایا جاتا تھا،‘‘ کلاس روم کی سطح پر ہونے والے تعصب کو یاد کرتے ہوئے وہ کہتے ہیں۔

ٹائم پاس نے اس بندھن سے آزاد ہونے کے مختلف طریقے تلاش کر لیے ہیں۔ ان کے لیے اسکول نہیں، بلکہ اپنے اسمارٹ فون پر سوشل میڈیا کا استعمال نجات کا ذریعہ بنا۔

ان کی پہلی مزاحمت وہ تھی جب کچھ سال پہلے ان کا آدھار کارڈ بن رہا تھا۔ انہوں نے اپنا ذلت آمیز نام بدل دیا، جو بہت سے دلتوں کے لیے ایک بہت بڑا مسئلہ ہوتا ہے۔ وہ اپنی ایک خالہ کو یاد کرتے ہیں جن کا نام لُچّی دیوی تھا۔ عام بول چال کی زبان میں ’لُچّی‘ کا مطلب ’جھوٹا‘ ہوتا ہے۔ ان کے دو چچاؤں کا نام اکیلا اور بیماری تھا۔ لیکن ٹائم پاس نے اپنا حق خود ارادی استعمال کیا اور روہت کمار بن گئے۔

اس کے بعد ان کا اسمارٹ فون آیا، جو صرف دکھاوے کے لیے نہیں تھا، بلکہ دیکھے جانے کا ایک طریقہ تھا، وہ زور دے کر کہتے ہیں۔

پچھلے سال وہ انسٹاگرام پر وہی سب کچھ کرنے آئے جو ان کی نسل کے اکثر افراد کرتے دکھائی دیتے ہیں: یعنی ناچنا اور گانا۔ اس پلیٹ فارم پر رجسٹریشن ان کے لیے ایک بہت بڑی راحت تھی۔

’’اس نے مجھ سے یہ نہیں پوچھا کہ کیا میں ڈوم ہوں۔‘‘