कोविड लड़ाका डोम मन के कोनो सुध लेवेइय्या नइ

“कहर बरपा था,” अजीब नांव वाले टाइम पास ह सुरता करथे.“बहुत लाश जलाई थी. गिनती के बाहर हो गया था.”

पटना मं गंगा पार मं बने सबले जुन्ना मरघट/मसान घाट, बांस घाट मं कोविड-19 के असर के बाद ले बीते पांच बछर मं , 21 बछर के 'टाइम पास' फिर ले गुमनामी के अंधियार मं गंवा गे हवय. महामारी बखत वो ह कुछु बखत बर लोगन मन के नजर मं आय रहिस. अब वो ह ककरो नजर मं आय बगेर, बेघर अऊ ठलहा शहर मं किंजरत रहिथे.

बगेर रोज के काम धन कमई के येती-वोती भटकत, अब वो ह सिरतोन अपन नांव टाइम पास मुताबिक जिनगी गुजारत लगत हवय.

फेर ओला ये नांव अइसने धन ये वजा ले मिले नइ रहिस. येकर बर ओकर कका जुगनू राम ला जिम्मेवार माने जा सकथे. ओकर जनम बखत जुगनू राम सनी देओल के फिलिम देखके लहूटे रहिस. अऊ जब घर के माईलोगन मन वोला ठलहा बइठे रहे सेती ताना मारिन, त वो ह उहिच ताना ला ओ लइका के नांव राख दिस.

“अब जेन घलो काम बूता मिलथे, कर लेथों,” टाइम पास कहिथे. “ मंय मेट्रो मं टायलेट साफ करथों, कभू नाली साफ करथों, कभू सरे गले सुरा ला उठाथों, त कभू लावारिस लाश के अंतिम संस्कार करथों. मंय कभू कचरा घलो बिनथों.” वो ह अइसने काम मन के नांव बताथे जेन ह ओला करे बर मिलथे.

जब घलो शहर के लोगन मन ला मरे, सरे गले अऊ लावारिस लाश ला हटवाय ला होथे, त ओ मन टाइम पास जइसने लोगन मन ला बलाथें. गर लाश बस्साय लगथे,त टाइम पास ला बले जाथे. रेल पटरी मं कोनो कटे-कुचरे लाश परे रहिथे त टाइम पास ला बलाय जाथे. शहर के कोनो कोनहा मं कोनो लावारिश लाश परे होय त पुलिस गाड़ी भेजे जाथे अऊ पोस्टमार्टम खोली के बहिर अगोरत रहिथे.

ओला येकरे सेती बलाय नइ जाय के वो ह ये काम के ट्रेनिंग ले हवय, फेर येकर बर काबर के वो ह डोम समाज ले हवय. डोम समाज ला महादलित माने जाथे – जेन ह बिहार मं सबले पिछड़ा समाज मन ले के ठन आय. साल 2023 के ताजा जाति सर्वे मुताबिक, ओकर मन के आबादी 2,63,512 हवय, जेन ह राज के 13.1 करोड़ के आबादी के सिरिफ 0.20 फीसदी हवय.

वो मन हिंदू जाति बेवस्था मं सबले तरी मं हवंय. अधितर लोगन मन अइसने बूता करे मं फंसे हवय जेन ला दबंग जात के लोगन मन थोपे हवंय – जइसने मुर्दा के अंतिम संस्कार धन साफ-सफई के काम.

“सात बजे से घाट पर बैठ जाता है कि कंगनी बॉडी आवे, कोई कुत्तावे, कोई बच्चावे [बिहनिया 7 बजे ले मंय मरघट मं बइठे रहिथों, कोनो लाश, धन सरे मुर्दा कुकुर, धन अस्पताल ले लाय गे लइका के कफन-दफन करे धन दाह संस्कार बर],” ला अगोरत रहिथों,” टाइम पास कहिथे. वो ह हमन ले मगधी (जेन ला मगही घलो कहिथें) मं गोठ-बात करर रहिस.

ये काम बर ओला बनेच कम पइसा मिलते – कभू 200, कभू 300 रूपिया, अऊ जियादा ले जियादा 500 रूपिया. वो ह जम्मो काम अपन जुच्छा हाथ ले करथे.

जब ये रिपोर्टर ह 9 मई, 20 21 के दिन पहिली बेर ओकर ले मिले रहिस, त जवानी आवत रहिस; 5 फीट 2 इंच लंबा, दुबर-पातर अऊ बेफिकर सुभाव वाले लइका. पांच बछर बाद, ऐसों 21 अप्रैल के दिन जब हमन ओकर ले फिर मिले रहेन. ओकर ऊंच मं बस एकेच इंच के फरक आय रहिस. वो ह अपन ले दू बछर छोटे काजल ले बिहाव कर ले रहिस अऊ अब ओकर लक्ष्मी अऊ रॉकी नांव के दू झिन लइका हवंय.

जब हमन ओकर ले मिलथन, त टाइम पास बांस घाट के क्लर्क वाले हिस्सा के परछी के एक कोनहा मं बइठे रहिस. तापमान: 40 डिग्री सेल्सियस.

मसान घाट के भिथि मं हालेच मं करे गे पोताई के तरी, कोरोनावायरस के चिन्हा अभू घलो हल्का-फुल्का हवय. तुमन घलो पढ़ सकथो: “कोविड ले जान जाय लोगन मन के अंतिम संस्कार फोकट मं करे जाथे.”

उपर पंखा चलत हवय, तिपत हवा आवत हवय. लकठा मं, डोम लोगन मन के एक ठन टोली उहिच भारी घाम मं लकरी के एक ठन तखत मं सुते हवय, बूता मिले ला अगोरत हवय. बीते दू हफ्ता ले, टाइम पास ला पेट भरे लइक बूता मिले नइ ये. वो ह कहिथे, “कभी-कभी भूखे भी सूतने पड़ जाते हैं.”

पाँच बछर पहिली, टाइम पास अऊ आने डोम मन इहीच जगा मं रहिन – मुर्दा मन के बीच खावत-पीयत, सुतत-जागत अऊ सुस्तावत. चिता मन दिन-रात जरत रहंय अऊ लाइन अतक लंबा हो जावत रहिस के अगोरा के बखत बारह घंटा धन ओकर ले घलो जियादा हो जावत रहिस. कोविड ले मरेइय्या लोगन मन के लाश भारी आवत रहिस. कभू-कभू त एकेच एम्बुलेंस मं तीन-तीन ठन लाश आवत रहिस.

पटना नगर निगम (पीएमसी) ह बांस घाट मं जेन 14 झिन डोम मन ला काम मं राखे रहिस, वो सब्बो स्कूल के पढ़ई आधा मं छोड़ चुके रहिन. कतको झिन दूसरी धन तीसरी क्लास मं पढ़ई छोड़ दे रहिन. ओ मन ले कोनो घलो मिडिल स्कूल ले आगू पढ़े नइ सकिस. वो मन समाज बर भारी जरूरी काम करत रहिन, फेर ओ बखत के आपदा के अतक जियादा मरे ले घबरा गे रहिन.

पीएमसी ह इमरजेंसी ला देखत 14 झिन अऊ डोम ला काम मं रखे रहिस. ओकर बाद घलो, 56 लोगन मन के हाथ घलो कम परत रहिस. पटना मं कोविड के सबले जियादा मामला अऊ मऊत होवत रहिस अऊ ये ह राज के सबले जियादा असर वाले शहर रहिस.

50 बछर के राज कुमार कहिथे, “सरलग 24 घंटा काम करत रहे सेती बिजली वाले शवदाह मशीन घलो खराब हो गीस.” ते पाय के करीबन 50 फीसदी अंतिम संस्कार लकरी के चिता मन मं करे गीस. आज, बिजली वाले मसीन ले अंतिम संस्कार के आंकड़ा फिर ले 80 फीसदी होगे हे. कुमार रजिस्ट्रेशन विभाग के मुखिया आय अऊ साल 2017 ले घाट मं तैनात हवय.

16 ले 40 बछर उमर के 12 झिन अऊ डोम समाज के लोगन मन ला काम मं रखे गे रहिस, जेकर ले येकर मन के संख्या 40 होगे. ये मन ला नगरपालिका ह नइ, फेर दुखियारी परिवार मन डोम समाज ले संपर्क करके बलाय रहिन. परिवार मन 1,000 ले 4,000 रूपिया तक पटाइन – ये रकम वो चार झिन मं बांटे जावत रहिस जेकर जरूरत हरेक अंतिम संस्कार बर होथे. ये 12 झिन कभू काल मं ये काम करे नइ रहिन. फेर कोरोना के डरावना दूसर लहर बखत, अचानक वो मन ला लकरी के चिता अऊ बिजली मसीन वाले – दूनों किसम के अंतिम संस्कार करे मं लगा दे गे रहिस.

तभे बांस घाट मं काम करेइय्या सबले जवान अऊ नवा काम करेइय्या मन ले के झिन आगू आइस अऊ वो ह ये काम करिस जेन ला महामारी के चरम मं करे ले अधिकतर मन डेर्रावंय: कोविड-19 ले मरेइय्या के लाश के अंतिम संस्कार करे. बांचे 11 झिन मन घलो ओकर पाछू लगे रहिन.

वो ह सबले पहिली वायरस ले परान गंवाय एक झिन जवान माइलोगन के अंतिम संस्कार करे रहिस. ओला सुरता नइ के वो ह कइसने दिखत रहिस धन ओकर उमर काय रहिस, बस अतके सुरता हवय के ओकर देह सफ़ेद प्लास्टिक मं तोपाय रहिस. वोला सुरता हवय के ओकर घर के लोगन मन मसान घाट के सरहद मं छोड़ के सगले गे रहिन, काबर के ओ मन ओला छुये ले घलो डेर्रावत रहिन. ओ मन कुछेक घड़ी उहाँ रुके के बाद अऊ बगेर कोनो बिदा करे चले गिन. अंतिम संस्कार के जिम्मेदारी ओकर उपर आ परिस.

टाइम पास अऊ तीन झिन आने लोगन मन अंतिम संस्कार के रस्म पूरा करिन अऊ चिता ला आगि दिन. ये काम बगेर कोनो सुरच्छा सामान, जइसने पीपीई किट, दस्ताना, फेस शील्ड धन एन -96 मास्क के करे गिस.

वो ह ताना मारत कहिथे, “ये तरीका एसी [एयर कंडीशनिंग] मं काम करेइय्या मन बर त ठीक आय.” पहिली लहर के बखत, जेन लोगन मन 42 डिग्री के गर्मी मं सुरच्छा के सामान पहिरे के कोसिस करिन, वो मन पछिना ले नुहा गिन अऊ कुछेक मिनट मं ओकर मन के सांस फुले लगिस, जेकर ले वो मन अक्सर गिर घलो जावंय. वो किट मन ला तुरते हेर के राख दे गिस, फेर बरसात बखत फिर ले काम मं लाय गिस.

ओतका कम उमर में ओला मऊत के डर नइ रहिस, बस टेम पास करे के बात रहिस. “मुर्दा के बीच में पालापोसा है, तो माया कैसे लगेगा [जेन मन मुर्दा के मंझा मं जन्मे अऊ पले-बढ़े हवंय, ओकर मन बर लाश कइसने भाव जगा सकथे?].”

अऊ जून 2021 तक एक के बाद एक, कतको मुर्दा आगू मं आवत रहिस. वो 45 दिन मं टाइम पास ह एक ठन अइसने असलियत देखिस जेन ह आज घलो सरकारी आंकड़ा के खाल्हे दबे हवय.

देस (भारत) मं कोविड-19 ले होय मऊत के गलत आंकड़ा मन ले गंभीर अऊ अजीब किसम ले कम गिनती करे के पता चलथे.

दुनिया भर ले भारत मं कोविड-19 के तय मामला मं दूसर सबले बड़े संख्या (4.5 करोड़) दरज करे गे रहिस. सरकारी रूप ले, हमन महामारी ले होय मऊत के तीसर सबले बड़े संख्या – 5,33,847 – दरज करेन. वइसे, विश्व स्वास्थ्य संगठन के एक ठन रिपोर्ट के अनुमान हवय के भारत मं कोविड-19 ले सीधा धन दीगर रूप मं जुड़े 47 लाख अऊ मऊत होइस.

रजिस्ट्रेशन के मुखिया राज कुमार कहिथे, “ समान्य दिन मं इहाँ 2 ले 5 अंतिम संस्कार होथें. कोविड बखत, हमन रोज के 70-80 अंतिम संस्कार करत रहेन. अऊ तीन हफ़्ते के अइसने घलो बखत रहिस जब हमन दिन भर मं 100-105 अंतिम संस्कार करत रहेन.” ये जानकारी तउन कम आँकड़ा मन के पोल खोलथे जेन ह सरकार के हेल्थ बुलेटिन मं हरेक संझा दिखाय जावत रहिस.

टाइम पास हमन ला बताथे के ओकर परिवार के चार पुस्त अऊ 100 बछर मं, कोनो घलो लोगन मन के मरे ला देखे नइ ये, जइसने वो ह देखे हवय.

“बाप-दादा जिसमें खटा है, बेटा भी उसी में खटेगा”, टाइम पास कहिथे. वो ह बताथे के वोला ये जाति-आधारित काम पुरखौती में मिले हवय. ओकर दू झिन भाई 25 बछर के रामजाने अऊ 23 बछर के श्याम, दूसर मसान घाट मं काम करत रहिन अऊ आभू घलो करत हवंय. ओकर एक झिन 35 बछर के बहिनी गौरी घलो हवय, जेकर बिहाव हो चुके हवय अऊ वो ह दूसर जिला मं रहिथे.

ओकर दाई-ददा, पारस डोम अऊ शीला देवी घलो बांस घाट मंइच रहिन. पारस शवदाह करत रहिस. वहीं शीला अंतिम संस्कार के बाद बांचे कोयला अऊ लकरी संकेलय अऊ बजार मं बेच के दू पइसा कमा लेवय. घर चलाय बर शीला बांस की सूपा घलो बनावय. ओकर लइका मन, जेन मं टाइम पास घलो रहिस, ओकर पाछू पाछू जावत रहिन अऊ मसान घाट के सफई, सुरा पोसे अऊ लोगन मन के मैला ला साफ करे जइसने काम मं मदद करत रहिन.

फेर जब 16 बछर के उमर मं वो ह पहिली बेर ककरो अंतिम संस्कार करे बर गिस, त टाइम पास एक अइसने कोविड लड़ाका बन गिस जेकर कोनो आस करे नइ रहिन. वो ह मरे लोगन के मान रखिस जेन मन ला कोरोना वायरस के डर अऊ ओकर ले जुसे कलंक सेती अकेल्ला छोड़ दे गे रहिस. ओकर काम खतरा ले भरे अऊ बहादुरी के रहिस. फेर राष्ट्रीय स्तर मं कोविड ले जुड़े कतको कहिनी मं वोला कोनोया जगा नइ मिलिस. ओकर कहिनी डोम समाज के जुबान मं हवय, फेर बाकी समाज मं गँवा के हवय.

महीनों बाद, जब कोविड के लहर आखिर मं कम होईस, त नगरपालिका मं काम करेइय्या डोम समाज के लोगन मन ला 4,500 रूपिया मानदेय देय गिस. ओ मन ला बताय गिस के स्वतंत्रता दिवस के दिन ओ मन ला सम्मानित करे जाही अऊ ओ मन ला 15 अगस्त के कार्यक्रम मं पटना के गांधी मैदान मं आय के नेवता घलो मिलिस. राज कुमार अऊ तीन झिन करमचारी, जेन मन खास करके बाबू (क्लर्क) रहिन, कार्यक्रम मं सामिल त होइन फेर बगेर सम्मानित होय लहूट आइन.

कुमार अब ओ नेवता ला लेके मजाक करत कहिथे, “हो सकथे हमन हीरो नइ, विलेन रहेन, काबर के कोविड खास करके मऊत के तमासा रहिस.”

टाइम पास ला कभू 4,500 रूपिया के मानदेय नइ मिलिस अऊ न सरकार डहर ले वोला कभू सम्मानित करे गिस. जइसने- जइसने दुनिया महामारी के बखत ले पार पावत रहिस, कोविड के बखत के बारे मं देस के सुरता अऊ बयान मन ले ओकर मन के योगदान घलो धीरे-धीरे मिटत जावत हवय.

ओकर अंताज हवय के वो ह कोविड ले मरेइय्या 200 ले जियादा लोगन के लाश के अंतिम संस्कार करिस अऊ येकर ले 70,000 ले 1 लाख रूपिया कमाइस. ये पइसा मरे लोगन के परिवार मन ले मिले रहिस.

“कईयों में तो पिल्लू भी पड़ गया था [ कुछु लाश भारी सरगे रहिस अऊ किरा परगे रहिस],” वो ह कहिथे. कुछु मामला मं त मरेइय्या के संग ओकर कोनो नइ रहिस. अइसने लाश मन ले वो ह पायल अऊ बिछिया हेरिस.

वो ह मानथे, “बाद मं मंय वोला 9,000 रूपिया मं बेच देंय.” पइसा जइसने तेजी ले आय रहिस, ओतकेच तेजी ले खरचा घलो हो गिस. वो ह 13,000 रूपिया मं एक ठन जुन्ना स्कूटर बिसोइस,फेर कुछेक महीना बीते बेच दिस काबर के ओकर इंजन मं खराबी आगे रहिस. वो ह एक ठन स्मार्टफोन अऊ कुछु नवा कपड़ा घलो बिसोइस. वो बखत मं गुजारा अऊ आय जाय के खरचा घलो जियादा रहिस. वो ह अपन सुरा अऊ चार ठन पिला ला 19,000 रूपिया मं बेंच दिस जेकर ले अपन ददा पारस के इलाज के खरचा भरे सकय; तेज रफ्तार कार के ठोकर ले ओकर ददा के गोड़ टूट गे रहिस. वो मं खाय-पीये मं आने दिन ले दुगुना खरचा करिन. कुछु पइसा महुआ (मऊहा दारू) मं घलो खरचा कर दिस, नशा सेती लाश के भारी बास के पता झन चलय. साल 2023 मं ओकर दाई ह गुजर गिस.

एसों 30 अप्रेल के दिन जब पटना मं बरसा होइस, त गर्दनीबाग इलाका के कच्ची तालाब (तरिया) बूड़ गिस. ये ह शहरी झुग्गी बस्ती आय, जिहाँ बीस परिवार रहिथें; ये मं टाइम पास अऊददा घलो हवंय. टाइम पास के घरवाली काजल ऐसों होली बखत अपन दूनों लइका मन ला धरके वोला छोड़ के चले गे रहिस. वो ह अब एक झिन अइसने मनखे के संग रहत हवय जेन ह देसी दारू बेचथे. अब टाइम पास अऊ ओकर ददा एके संग रहिथें. डोम बस्ती मन नरुआ, गंदा तरिया अऊ कुड्डा कचरा के तीर मं बसे होथें. इहाँ बाढ़/ पुर आय अऊ ओकर मन के बेदखली आम बात आय. येकर छोड़, सरकारी जमीन मं कब्जा करे बर माफिया मन ये बस्ती मन ला आगि घलो लगा सकथें.

पारस डोम दुख जतावत कहिथे, “भगवान करे, सरकार हमन बर कोनो डोम खाना (कालोनी) बसातिस.”

पारस ह टाइम पास बर 10 बाई 12 फीट के ये कुरिया बनाय रहिस, जेन ला कच्ची तालाब मं होय कतको राजनीतिक रैली मन के जमा करे गे प्लास्टिक पनपनी ले छाय गे रहिस. दू बछर पहिली ये इलाका मं बसे के पहिली, टाइम पास छज्जू बाग मं रहत रहिस, जिहां ले प्रशासन के तोड़-फोड़ अभियान सेती ओला बेघर होय ला परे रहिस. अऊ वोला काम बूता घलो मिलत नइ रहिस.

मजबूरी मं, टाइम पास अऊ ओकर चचेरा भाई मंगरू डोम ह इमारत बनाय के काम मं बूता करे के कोसिस करिस. वो ह बताथे, “ हमन दिन भर ईंटा दोहारेन, फेर जब मैनेजर ला हमर जात के पता चलिस, त हमन ला न तो काम मिलिस अऊ न मजूरिच.” येकर पहिली, टाइम पास ह मसान घाट के काम के छोड़ दीगर बूता घलो खोज ले रहिस. कभू रोजी मजूर, त कभू बिहाव के टेंट लगाय, बरात मं लाइट धरे, धन बिहाव मन मं बरतन भाड़ा धोय के बूता.

“ये काम तभेच मिलथे जब अपन डोम होय के पहिचान ला लुकाके रखबे,” वो ह समझाथे. 27 लाख लोगन मन के आबादी वाले बड़े शहर ह लोकल पहिचान लुकाय के जगा देथे, एक अइसन आसरा जिहां पहिचान ला मिटाय धन बदले जा सकथे.

टाइम पास कहिथे, “कोनो गाँव धन छोटे बस्ती मं, जिहां हर कोनो एक दूसर ला जानथे, डोम जात के लोगन मन ला रोजी मजूरी के काम नइ मिलय.”

जमुई जिला के सिकंदरा गाँव के बासिंदा अऊ रजिस्ट्रेशन मुखिया राज कुमार, चिता अऊ राख के माहौल ले बहिर निकर गिस, काबर के ओकर ददा ह वो ला स्कूल भेजे के प्रन करे रहिस. कुमार ह बायोलॉजी मं डिग्री पूरा करिस, जेन ह ओकर समाज मं मिले दुब्बर रहिस.

कुमार बताथे के ओकर बाबा के जमाना मं, “डोम जात के लोगन मं कोनो दबंग जात के घर के आगू ले गुजरे बखत अपन पनही मुड़ मं धर लेवत रहिन अऊ झुकके जावत रहिन.”

अवेईया पीढ़ी बर हालत थोकन बदलिस. कुमार कहिथे, मोर ददा के बखत मं, येकर मतलब रहिस के ऊँच जात के कोनो मइनखे जावत दिखय, त खटिया धन स्टूल ले खड़े होय ला परत रहिस. हमन गिलास मं पानी पिये के मनाही रहिस. हमन अपन अंजुरी मं झोंक के पानी पियत रहेन.” साल 1990 के दसक मं, जब लालू परसाद यादव राज करिस, त छोटे फेर बड़े बदलाव सुरू होइस.

वो ह क्लास मं होवेइय्या ऊँच-नीच के भेदभाव ला सुरता करत कहिथे, “कम से कम हमन स्कूल पढ़े जाय त सुरू करेन. फेर डोम, मुसहर अऊ चमार (सब्बो अनुसूचित जाति) समाज के लइका मन ला दूसर लइका मन ले अलग बिठाय जावत रहिस.”

टाइम पास ह आजाद होय के दूसर उपाय खोज लीस. स्कूल नइ, फेर अपन मोबाइल मं सोशल मीडिया बउरे ह ओकर बहिर निकरे के जरिया बन गिस.

विरोध के ओकर पहिला पाँव वो बखत उठे रहिस जब कुछेक बछर पहिली ओकर आधार कार्ड बनत रहिस. वो ह अपन अपमान वाले नांव ला बदल लिस. एक ठन अइसने समस्या जेकर ले कतको दलित जूझत रहिथें. वोला लुच्ची देवी नांव के काकी के सुरत हवय; बोलचाल मं येकर मतलब झूठी होथे. ओकर दू झिन कका के नांव अकेला अऊ बीमारी रहिस. फेर टाइम पास ह अपन मन के ला करवा लिस अऊ रोहित कुमार बन गिस.

ओकर बाद आइस ओकर स्मार्टफ़ोन; ओकर कहना आये के ये ह कोनो दिखावा करे के नइ, फेर लोगन मन के नजर मं आय के जरिया रहिस.

बीते बछर, वो ह इंस्टाग्राम मं उही करे सुरु करिस जेन ला ओकर पीढ़ी के दीगर लोगन मन करत दिखथें: डांस अऊ गाना. ये जगा मं आय ह ओकर बर राहत के बात रहिस.

“वो ह मोर ले नइ पूछिस के काय मंय डोम हों.”