मोर्चा पर डोम, चर्चा में काहे ना?

"कहर बरपल रहे," विचित्र नाम वाला टाईम पास कहेलन. "बड़ी ढेर लास जरवले रहनी. एतना लास रहे कि सगरो गिनती के बहरा हो गईल."

गंगा नदी के तीरे बसल पटना के सबसे पुरान श्मशान घाट, बांस घाट पर कोविड-19 के कहर बरसले के बाद, एक्कईस बरिस के टाईम पास फेर गुमनाम भईल बाने. महामारी के बेरा ऊ कुछु समय खातिर ए गुमनामी से बाहर आईल रहने. अब ऊ शहर में गुमनाम, बेघर आ बेकाम धाम के घूमेलें.

बेकाम धाम आ बेआमदनी के घुम्मत, ऊ अब आपन नाम, टाईम पास, के सार्थक करत बाने (जियवले बाने).

बाकिर उनके ई नाम ए तरे ना मिलल. एकरा खातिर उनकर चाचा जुगनूराम जिम्मेदार हवें. जब उनकर जनम भईल, तब ऊ (जुगनूराम) सनी देओल के पिच्चर देखी के आइल रहे. जब घर के मेहरारू उनका फुरसतिया कही के रिगवली, त ऊ ओ ताना के लईका के नाम बना देहलस.

"हमके जवन काम मिलेला ऊ हम करेनी." टाईम पास कहेलन. "हम बड़ बड़ शहर में लैटरीन आ कब्बो कब्बो नारी (नाली) साफ करेनी, कब्बो सरल (सड़ल) सूअर उठावेनी, कब्बो लावारिस लास फूंकेनी. हम कचरा भी बीनेली," ऊ काम गिनावेने जवन उनके मिलेला.

हर बेर जब ए शहर के आपन मुरदा, सरल आ फेंकल लास हटावेके होला, त ई टाईम पास जईसन लोगन के खोजेला. अगर मुरदा के बदबू बयार में फैली जाला, टाईम पास बोलावल जाने. रेल के पटरी पर अगर लास पड़ल मिलेला, टाईम पास फेर बोलावल जाने. शहर के कवनो कोना में अगर लावारिश लास मिलेला, पुलिस के जीप भेजल जाला, आ ऊ (टाईम पास) मुर्दाघर के बहरा अगोरेला.

ओके ए खातिर ना बोलावल जाला कि ऊ ए काम में माहिर ह, बाकिर ए खातिर कि ऊ एगो डोम ह. डोम महादलित कहल जाने जवन बिहार के पिछड़ा सामाजिक समूह में से एक ह. 2023 के तत्काल जाति सर्वेक्षण के अनुसार, इनके आबादी 2,36,512 बा, जवन राज्य के कुल आबादी 13.1 करोड़ के मात्र 0.20 प्रतिशत बा.

ई लोग हिंदू वर्ण व्यवस्था में सबसे नीचे बाने. जादेतर लोग अईसन काम में फंसल बाने जवन उनपर बडजातिया लोग थोपले रहे. जईसे मुर्दा फूंकला आ साफ-सफाई के काम.

"सात बजे से घाट पर बईठ जानी कि कवनो मुरदा आवे, कवनो सरल कुक्कुर आवे, कवनो अस्पताल से जरावे या गाड़े खातिर बच्चा आवे," टाईम पास कहेलन. ऊ हमनी से मगही में बात कईने.

हर काम से ओके मजूरी मिलेला, कब्बो कब्बो दू सौ, कब्बो तीन सौ रुपिया, आ सबसे ढेर पांच सौ रुपिया. सब काम ऊ अपनी हाथे से करेने.

जब ई रिपोटर ओसे पहिला बेर 9 मई 2021 के भेंट कईली, ऊ जवानी के दहलीज पर रहे, पांच फीट दू इंच लमहर, एगो बेपरवाह पातर लईका, पांच साल बाद ए 21 अप्रैल के, हमनी के फेर भेंट भईल. ऊ मुश्किल से एक इंच बढ़ल रहे, अपना से दू साल छोट, काजल से बियाह करीके, अब ओकर दूगो बच्चा भी रहे, लक्ष्मी आ रॉकी.

जब उनसे भेंट भईल त, टाईम पास बांस घाट के लिपिक अनुभाग के खुल्ला बरामदा में बैठल रहे. तामपान: 40 डिग्री सेल्सियस.

श्मशान घाट में हाल ही में रंगाईल पोताइल देवाल के नीचे, कोरोना वायरस के सूचना अजुओ धुंधला लऊकत बा. रउरा अब्बो पढ़ी सकत बानी: "कोविड पीड़ितन के अंतिम संस्कार बेपईसा के कईल जाला."

ओकरा ऊपर एगो पंखा गुर्रात बा, जवन अधिकतर गरम हवा फेंकत बा. लगवें डोम के एगो समूह ओही जरत गर्मी में लकड़ी के तख्ता पर काम अगोरत अधसुतल पड़ल बा. पछिला पखवाड़ा से टाईम पास के एतना काम नइखे मिलल कि ऊ अपना के सम्हार सके. “कब्बो कब्बो त, हमरा भी भुख्खे सुते के पड़ेला.” ऊ कहेलन.

पांच बरिस पहिले टाईम पास आ बाकी डोम एक्के जगही पर खात रहले, सुतत रहले, टहलत रहले, मुरदन के बीच आराम करत रहले. दिन रात चिता जरत रहे आ कतार एतना लमहर हो गइल कि इंतजारी बारह घंटा आ ओकरा से अधिका हो गइल. कोविड से मुए वाला मनई बड़ी ढेर आवत रहे. कब्बो-कब्बो त एक्के एम्बुलेंस में तीन गो लास ले जाइल जात रहे.

सगरो चौदहवो डोम, जेके पटना म्युनिसिपल कॉरपोरेशन (पीएमसी) काम पर रखले रहे, ऊ सब स्कूल छोड़ले रहने. ओमें से बहुते लोग कक्षा दू या तीन के बाद छोड़ी दिहले रहने. एमे से केहू मिडिल स्कूल पार ना क पवले बाने. ई सब समाज खातिर बहुत बड़वन काम कईने. बाकिर फेर ओ महामारी के बोझ तले कूचा गईने.

पीएमसी चौदह डोम के आपातकाल स्थिति पर रखले रहे. आ फेर भी, छप्पन इंसानी हाथ काफी ना रहे. पटना में कोविड आ मौत के केस सबसे ढेर दर्ज होत रहे आ ई राज्य के सबसे बेकार शहर में रहे.

"एहिजा ले कि चौबीस घंटा चला दीहले से मुर्दा फूंके वाला बिजली के मशीन बिगड़ गईल," पचास साल के राजकुमार कहेलन. ऐसे आधा से ढेर चिता लकड़ी पर ही फूंकाईल. अब त, अस्सी प्रतिशत से ढेर लास बिजली मशीन से फुंकाला. कुमार घाट पंजीकरण के मुखिया हबैं आ घाट पर 2017 से तैनात बाने.

सोलह से चालीस बरिस के उमिर के अउरी बारह गो डोम के ले आवल गइल, जवना से ई लोग कुल चालीस जानी हो गइलन, ए लोग के नगरपालिका ना, बाकिर डोम समुदाय ले पहुंच के शोकग्रस्त परिवार काम पर लगवलस. परिवार ए लोगन के एक हजार से चार हजार रुपिया ले दिहलस, जवन हर बेर चिता फूंकला के बाद चार मजदूरन में बांटल जाई. ए बारह लोग में से केहू ए काम के पहिले कबो ना कइले रहे. बाकिर एकबएक दूसरका सिहरऊवा लहर के दौरान लकड़ी के चिता आ बिजली से दाह संस्कार दुनु करे के पड़ल.

ई तब भईल जब बांस घाट के सबसे नया आ कम उमीर के डोम आगे बढ़ी के ऊ काम कईलस जवन काम कइला से बाकी सब डेरात रहें: ई महामारी के चरम पर कोविड पीड़ितन लास फूंकलस. बाकी के ईग्यारह लोग भी ओकर देखा देखी कईंने.

ओकर पहिला चिता कोविड वायरस से मुअल एगो जवान मेहरारू के रहे. ओके याद नईखे कि ऊ मेहरारू कईसन लऊके आ ओकर उमीर का रहे, ओकर लास ऊज्ज़र पन्नी में बन्हाईल रहे. ओके अब्बो मन परेला कि ओकरी घर वाला ओकर लास श्मशान के बहरा छोड़ी के चली गईल, ओके छूवला के डेरा. तनी देरी रुकी के फेर, बिना दुआ सलाम के चली दीहल लोग. अंतिम संस्कार के जिम्मा ओकरी कपारे पड़ल.

टाईम पास आ बाकी के तीन लोग करमकांड कईल लोग आ चिता बारी दिहने. ई सब बिना कवनो सुरक्षा उपकरण, जईसे पीपीई किट, दस्ताना, फेस शिल्ड या एन 95 मास्क के बिना भईल,.

"ई सब एसी (एयर कंडीशनिंग) में काम करेला," ऊ तंज कसी के कहेला. पहिला लहर के दौरान, जे डोम बयालीस डिग्री तापमान में सुरक्षा उपकरण पहिरे के कोशिश कईने, ऊ पसीना में बोरा गईने आ कुछे मिनट में उनकर दम घोंटे लागल, कई लोग ता ढ़िमला गईलन. जल्दीए ई लोग किट पहीरल छोड़ी दीहने, खाली बरसात में एकर फेर से उपयोग भईल..

टाईम पास के छोट उमर से ही मरला से डर नाही लागेला. "मुरदा के बीच में जे पलाईल पोसाईल बा ओके कईसन मोह माया?"

जून 2021 ले एक लास के बाद दुसर लास, ओकरी बाद फेर एगो, ओकरी बाद फेर एगो. ओ पैंतालीस दिन में, टाईम पास अइसन सच के देखले जवन सच आज ले सरकारी आंकड़ा में दफन बा.

भारत में कोविड-19 से भईल मौत क आंकड़ा में भारी गड़बड़ी आ कम गिनती के बात साफ साफ लऊकेला.

भारत में कोविड 19 के केस दुनिया में दूसरा सबसे जादा संख्या में दर्ज भईल रहे, जवन कि 4.5 करोड़ भईल रहे. आधिकारिक तौर प हमनी के तीसरा सबसे जादा संख्या – 5,33,847 कोविड 19 मौत के रिपोर्ट हमनी के अंतिम महामारी के गिनती के रूप में देले बानी. हालांकि विश्व स्वास्थ्य संगठन के एगो रिपोर्ट में अनुमान लगावल गईल बा कि भारत में 47 लाख लोग के अतिरिक्त मौत भईल बा, जवन कि कोविड 19 से प्रत्यक्ष आ अप्रत्यक्ष दुनो तरीका से जुड़ल बा.

"रोज एहिजा, दू से पांच लास जरेला, कोविड के बीच, हमनी के रोजे सत्तर से अस्सी लास देखले बानी. आ ओहूमें तीन हफ्ता के अईसन बेरा आइल कि रोज सौ सवा सौ चिता जरत देखनी के." पंजीकरण के मुखिया, राजकुमार कहेलन. उनकर बतावल संख्या हर भिनई (सबेरे) राज्य के स्वास्थ्य बुलेटिन में देखावल संख्या पर सवाल खड़ा करी सकता.

टाईम पास हमनी से बतवने कि ओकरा कुनबा में पछिला चार पीढ़ी, सौ साल से ऊपर, केहू अईसन मौत नईखे देखले जेतना ऊ देखले बा.

"जहां बाप दादा लोग खटल बा, लईका भी त ऊंहवे खटी ना," टाईम पास ई बात समझा के कहेलन, कि उनके ई जातिवादी काम के करही के पड़ी. काहे से कि ईहे जमाना के कायदा ह. उनकर दू भाई, पच्चीस साल के रामजाने आ तेईस साल के श्याम भी दुसरे घाट पर ईहे काम करत बाने. उनकर पैंतीस साल के एगो बहिन ह, गायत्री जेकर बियाह दुसरे जिला में भईल बा. आ ऊ ओहिजा रहेले.

उनकर माई बाप पारस डोम आ शीला देवी बांस घाट पर रही चुकल बाने. पारस ओहिजा लास फूंके. शीला बुताईल कोयला आ चिता के बचल लकड़ी बीने अऊर ओके बजारी में बेची के तीन से पांच रुपिया कमा लें. शीला बांस के डलिया भी बीने ताकि घर अच्छा से चली जाव. उनकर लईका टाईम पास उनकरी पीछे रहे, श्मशान घाट आ मल साफ करे आ सूअर पोसे.

लेकिन जब सोलह साल के उमिर में ऊ पहिला बेर केहू के लास फूंकला खातिर आगे बढ़लें, टाईम पास अईसन कोविड योद्धा बनी गईने, जेके केहू उम्मीद ना कईले रहे. मुअला के बाद ऊ ओ लोगन के अंतिम सम्मान दिहने, जेके समाज कोरोना वायरस के डर से छोड़ी दिहले रहे. उनकर काम खतरनाक बाकिर बहादुरी वाला रहे. बाकिर देश भर में कोविड के दौर के जवन ख़िस्सा सुनावल जाला, ओमे उनकर काम के कवनो जीकर नईखे. उनकर कहानी डोम समुदाय में जबानी तौर पर कहल जाई, लेकिन बाकी समाज में ई कहीं न कहीं बिला गईल.

महीनन के बाद, जब कोविड के लहर कम भईल, डोम लोगन के 4,500 रुपिया के मानदेय मिलल, जेके म्युनसिपिल्टी काम पर रखले रहे. ओ लोगन के बतावल गईल कि आजादी वाला दिन ओ सबके सम्मान मिली आ पटना के गांधी मैदान में सबके बोलावल जाई. राजकुमार आ बाकी के तीन और लोग, जे क्लर्क रहे, समारोह में गईल बाकिर बेसम्मान के ही वापस लौटे के पड़ल.

"शायद हमनी के नायक ना खलनायक हई के, काहे से कि कोविड त मौत के तमाशा ही रहे न," कुमार, अब न्यौता के लेके मजाक करेने.

टाईम पास के ना त 4,500 रुपये मानदेय मिलल, आ ना राज्य सरकार से कब्बो सम्मान. जईसे-जईसे दुनिया महामारी के दौर से आगे बढ़ी गईल, कोविड के बेरा के देश के कहानी से उनकर मेहनत भी धीरे-धीरे मिट रहल बा.

ऊ अंदाजन कहेलन कि ऊ दू सौ से ऊपर लास फूंकने आ लमसम सत्तर हजार से एक लाख के बीच रुपिया कमईने. ई पईसा उनके पीड़ित परिवार से मिलल.

"कई लास में त कीरा पड़ी गईल रहे," ऊ कहेला. कुछ मामला में त, लास के संगे केहू ना आईल रहे. अईसन लास से ऊ पायल, बिछिया निकाल लिहलस.

ऊ सीकरने, "बाद में हम ओके नौ हजार रुपिया में बेच दिहनी," पईसा जेतना तेज़ी से आईल, ओहीं गा खर्चो हो गइल. ऊ तेरह हजार रुपिया में एगो स्कूटर कीनले रहने बाकिर ओके कुछु महीना में बेची दिहने काहे से कि ओकर इंजन खराब हो गईल रहे. ऊ एगो स्मार्टफोन आ कुछु नया कपड़ो कीनले. ओ मुश्किल दौर में पेट जीयावला के खर्चा भी ढेर रहे. उनके आपन सूअर आ ओके चार गो बच्चन के उन्न्यीस हजार में बेचे के पड़ल ताकि ऊ आपन बाऊ जी पारस के दवाई करवा सके जे खटिया पकड़ले बाने. उनकर गोड़ एगो कार से कचरा के टूटी गयील बा. ऊ खाली दाल भात खईला पर हरमेस्सा से दोगुना बेसी खर्चा कईने. कुछ पईसा महुआ के पऊआ पर भी उड़वने ताकि भक्क हो सकें आ लास के बदबू से बची सकें. उनकर माई 2023 में गुजर गईली.

ए साल 30 अप्रैल के, जब पटना में बरखा भईल, गर्दनीबाग इलाका के कच्ची तालाब पानी में बुड़ी गईल. एहिजा बीस परिवार के एगो शहरी झुग्गी रहे, जहवां टाईम पास आ उनकर बाऊ जी रहें. टाईम पास के मेहरारू, काजल, ए साल होली पर उनके छोड़ी दीहलस आ आपन दूनू बच्चा भी ले गईल. ऊ अब दूसरे मरद संगे रहेली, जे देसी दारू बेचेला. अब खाली टाईम पास आ उनकर बाऊ जी साथे रहेने. डोमन के पलानी नाला, गढ़ही (गंदे पोखरे) आ कूड़ा के लग्गे बनेला. बाढ़ आ पलायन आम बात ह एहिजा. एकरी अलावा, ए सरकारी बंजर भूमि कब्जीयावे खातिर गुंडा मवाली भी इनके भगा देने.

"काश कि सरकार हमनो के डोम बस्ती बसा देईत," पारस डोम ऊसांसे कहने.

पारस टाईम पास खातिर ई 10x12 फ़ीट के ई पलानी बनवलें, जेकर छत कच्ची तालाब में भईल कईगो राजनीतिक रैलियों से जुटावल प्लास्टिक के शीट से बनल रहे. दू बरिस पहिले ए इलाका में बसला से पहिले, टाईम पास छज्जू बाग में रहे, जन्हवां से प्रशासन के तोड़-फोड़ अभियान से ओके बेघर होखे के पड़ल. आ ओके काम भी ना मिलत रहे.

मजबूरी में, टाईम पास आ उनकर चचेरा भाई मंगरू डोम एगो कंस्ट्रक्शन साइट पर काम करे के कोशिश कईने. ऊ कहेलन, "हमनी के पूरा दिन इन्टा ढोवनी के बाकिर जईसे मैनेजर के हमनी के जाती के बारे में पता लागल, ना त काम मिलल ना त मजूरी." एसे पहिले, टाईम पास श्मशान घाट के काम के अलावा भी काम खोजी लिहने. कब्बो दिहाड़ी मजूरी, त कब्बो बियाहे में टेंट लगावल, बरात में लाइट उठावल, या बियाह के बाद बर्तन धो के.

"ई सब काम तब्बे मिली जब आपन डोम के पहिचान छिपा ल त," ऊ समझावेने. सत्ताईस लाख लोगन के शहर में, कुछ गुमनामी त मिली जाला, अईसन जगह जहां पहचान छिपावल या बदल्ल जा सकेला.

टाईम पास कहेलन," गांव या छोट बस्ती में, जहवां सब लोग सबके जानेला, ए तरह के दिहाड़ी के काम कवनो डोम के मिलल मुश्किल ह.'

जमुई जनपद के सिकंदरा गांव के रहवईया, पंजीकरण मुखिया राजकुमार ए चूल्हा चिता के झंझट से बची गईने काहे से कि उनकर बाऊ जी उनकरा के स्कूल भेजला के फेर में पड़ी गईल रहने. कुमार के लग्गे अब जीवविज्ञान के डिग्री बा, जवन उनकरी समुदाय में एगो बहुत बड़ बाती ह.

ओकरी दादा के जमाना में, "डोम आपन चप्पल कपार पर रखी लें आ मुड़ी निहुरा लें जब कवनो बड़जतीया के घर से होके जाए के पड़े." कुमार कहेलन.

अगिला पीढ़ी खातिर हालात तनी सा बदलल बा. "हमनी के बाप के समय में, कवनो बडजातिया के आवत देखी के खटिया या स्टूल से उठे के पड़े. गिलासी से पानी पीयला के इजाजत ना रहे, अंजुरी से पानी पिए के पड़े. कुमार कहेलन. जब लालू प्रसाद यादव सत्ता में अईने त छोट लेकिन अहम बदलाव शुरू भईल.

"कम से कम हमनी के स्कूल गईल शुरु कईने के, लेकिन डोम, मुसहर आ चमार (सब अनुसूचित जाति) के बाकी जाति के लईकन से दूरे बईठे के पड़े," कक्षा में होखे वाला भेदभाव के याद करीके ऊ कहेलन.

टाईम पास के आजादी के नया तरीका मिलल. स्कूल नाही, बाकिर फोन में सोशल मीडिया चलावल उनकर बाहर निकलले के जरिया बनल.

विरोध के पहिला कदम ऊ तब उठवने, जब कुछु साल पहिले उनकर आधार कार्ड बनत रहे. ऊ आपन अपमानजनक नाम बदल लिहने– एगो अईसन समस्या जेसे भत्तेर दलित जूझेने. उनके 'लुच्ची देवी' नाम के एगो चाची मन परेली; आम बोलचाल के भाषा में ए शब्द के माने झूठी होला. उनकर दूगो चाचा लोगन के नाम 'अकेला' आ 'बीमारी' रहे. बाकिर टाईम पास आपन पहचान खुदे बनवले आ रोहित कुमार बनी गईने.

फेर उनकरी लगे स्मार्टफ़ोन आईल; उनकर कहल बा कि ई कवनो देखावा के चीज ना रहे बाकिर आपन पहचान आ लोगन के नजर में आईला के एगो तरीका रहे.

पछिला साल, ऊ इंस्टाग्राम ले पहुंच गईले आ ऊहे करत बाने जवन उनकर पीढ़ी के जादेतर लोग कर रहल बा, नाचल आ गाइल. ओ प्लेटफॉर्म पर रजिस्ट्रेशन कईल उनकरी खातिर नीक अनुभव रहे.

"कम से कम ई ना पुच्छलस कि हम डोम हईं कि नाही."