‘केहू ना बांची, सब जन चाखी’

बहुत कबर के ढेर पत्थर प एगो लिखनी लउकेला “केहू ना बांची, सब जन चाखी.” इ कवनो अगमजानी के लिखनी अइसन ना लउकेला, बलुक पूरा दिल्ली बडका कब्रिस्तान में से एगो ‘जदीद-अहल-ए-इस्लाम के कबर कुल के यादगारी पत्त्थरन प उरेहल मिलेला.

इ लिखनी- كُلُّ نَفْسٍ ذَائِقَةُ الْمَوْتِ - कुरआन के एगो आयत ह. कब्रिस्तान के उदासी में शांति औरी समझ जइसन. एही बीचे एगो औरी गाड़ी आवता औरी जेकर मौत भईल बा ओकर परिवार के लोग आखिरी नमाज पढता. जल्दिये गाड़ी खाली हो जाता औरी लास कबर के जगह ले लेता. एगो मसीन फेर कबर के पाटे लागता.

बहादुर शाह जफर मार्ग प मीडिया के कई गो इमारतन के बगल में, 62 साल के निजाम अख्तर, कबर पत्थर प मरे वाला लोग के नाम लिखत भेंटातारन. निजाम उ पत्थर कुल के मेहराब कहतारन. अपना अंगूरी के बीचे बहुत हौला ढंग से परकजा (लिखनी खातिर इस्तेमाल होखे वाला ब्रश) पकड़ के उ एगो नुक्ता लगावतारन. नुक्ता उर्दू में अच्छर के ऊपर लागे वाला एगो बिंदी के कहल जाला, जेकरा के उचारे के आपन ढंग होला. निजाम जौन शब्द लिख रहल बाड़न उ ह ‘दुरदाना’ जौन कि कोरोना के मारल एगो इंसान के नाम ह.

निजाम कबर के पत्थर प, मेंही औरी मस्किल लिखावट में नाम औरी बाक़ी जानकारी वाला अच्छर के रंग से लिखतारन. बाद में उनका साथे कार करे वाला साथी ओकरा के छेनी, हथौड़ी से छीन, तरास के पत्थर प सटीक उरेह दी. अइसन करे से रंग गायब हो जाई.

इ कातिब (लिखनी लिखे वाला) जेकर नाम निजाम ह, 40 से बेसी साल से कबर के पत्थरन प मूए वाला लोग के नाम उरेहतारन.निजाम बतावतारन, हमरा मन नईखे परत कि हम कबर के केतना पत्थर प काम कईले बानी. इ अप्रील औरी मई महीना में हम लमसम 150 अइसन लोग के नाम लिखले बानी जे कोरोना से मरल. औरी एतनही दुसरो मरे वाला लोग के नाम लिखनी जे कोरोना से ना मारल रहे. हर दिन, हम तीन से पांच गो पत्थर तैयार करनी. कवनो पत्थर के एक ओर लिखे में लमसम एक घंटा के समय लागेला.” ऊहो उर्दू में. पत्थर के दुसरा ओर मरे वाला के नाम अंग्रेजी में लिखाला. उ मुस्कियातारन औरी बहुत नरम आवाज में हमरा नोट बनावे के मजाक उड़ावत कहतारन, “इ कुछ सेकेंड में एगो पन्ना भर देवे जइसन आसन काम नईखे.”

महामारी के सुरुआत के पहिले, जदीद में हर रोज एगो चाहे दू गो पत्थर लिखनी खातिर आवत रहे. अब हर रोज चार से पांच गो आवता. काम के बोझा 200 फीसद से बेसी बढ़ गईल बा. इ काम चार मजूरा में बांटा गईल बा. इ हफ्ता, उ कवनो नया ऑर्डर नईखन लेत. अभिन, लमसम 120 पत्थर अइसन बा जे प आधा काम भईल बा. औरी 50 गो पत्थरन प त अभिन कारे सुरु नईखे भईल.

इ बैपार खूब बढता. बाकिर एकरा से जुडल लोग के मन इ बात से टूट जाता. इ कब्रिस्तान में कार करे वाला मोहम्मद शमीम कहतारन, “बहुत इंसान के मौत हो गईल बा, औरी ओकरा साथे इंसानियतो के मौत हो गईल बा. मौत के अइसन मंजर देख के हमार मन रोयेला.” शमीम अपना परिवार के तीसरका पीढी हवन जे इ कब्रिस्तान में कार कर रहल बा.

मौत के चर्चा करत निजाम कवनो साधू जइसन कहतारन, “जिनगी के सांच त ईहे ह कि जे लोग इ धरती प पैदा भईल बा, मौत के उ आखिरी सांच जइसन सभे मू जाई. लोग चल जाला औरी हमरा कबर के पत्थर बनावे के मिळत रहेला. बाकिर, हम अइसन मंजर पहिले कब्बो ना देखले रहनी.”

बैपार में इ तेजी तब्बो देखल जाता जबकि हर परिवार कबर खातिर पथ्थर ना बनवावेला. कुछ लोग एकर खर्चा ना उठा पावेला. उ लोग खाली लोहा के बोर्ड से काम चलावेला जौना प रंग से खाली अच्छर लिख दियाला. औरी एकर दामो बहुत कम होला. कई गो कबर के कवनो चीन्हा ना होला. निजाम कहलन, “दफनावे के 15 से 20 दिन बाद कबर के पत्थर बनावे के और्डर आवेला, कई बेर त अईसनो होला.” निजाम के साथे कार करे वाला हरियाणा के फरीदाबाद जिला के बल्लभगढ़ के रहे वाला आसिम पत्थर बनावे के कार करेलन. आसिम (बदलल नाम) कहेलन, “हमनी जौन और्डर लेनी ओकरा खातिर परिवार के कम से कम 20 दिन ले जोहे के परेला.”

35 बरीस के आसिम के साल बीतले कोरोना के होखहीं प सक रहे. बाकिर अब उनका कोरोना वायरस के होखे के भरोसा हो गईल बा. उ कहलन, “लास कुल झूठ ना बोली. हम एतना लास देख लेले बानी कि अब हमारा लगे कोरोना के माने के अलावे कोनो चारा नईखे. अइसन हाल हो गईल रहे कि लोग के अपना परिवार के आदमी खातिर अपने कबर खोदे के परल. कब्बो-कब्बो कबर खोदे वाला कम पर जाला.”

कब्रिस्तान के चलावे वाला कमेटी के देख भाल करे वाला हमनी के बतवलन, “महामारी सुरु होखे के पहिले ले, इ कब्रिस्तान में महीना में चार से पांच गो लास आवे. औरी अब एक महीना में लमसम 150”

इ साल खाली अप्रील औरी मई के महीना में, कब्रिस्तान में 1,068 लास दफनावे के आईल. एमे से 453 मौत कोरोना से भईल रहे. औरी दूसरा कारन से 165 गो रहे. खैर, इ त कब्रिस्तान के आपन अकान ह. इंहा कार करे वाला मजूर नाम ना बतावे के सर्त प कहलस गिनती एकरा से 50 फीसद ले बेसी बा.

आसिम कहलन, “एगो मेहरारू अपना डेढ़ साल के लईका के साथे ईंहा, कब्रिस्तान आईल रहे. ओकर मरद दोसरा राज्य से मजूरी करे इ सहर में आईल रहे. ओकर मौत कोरोना से हो गईल रहे. उ मेहरारू के आपन इंहा केहू ना रहे. दफनावे वाला सारा बेवस्था हमनी कईनी. अपना बाप के कबर पर उ लईका माटी डालत रहे.” जे कवनो लईकी मर जाय त कहल जाला कि उ अपना माई बाप के करेजा में दफ़न होले. बाकिर जब एगो लईकी के अपना बाप के माटी देवे के परे त एकरा खातिर कवनो कहाउत बा का?

आसिम औरी उनकर परिवारों कोरोना के लपेट में आ गईल रहे. उनका, उनकर दुनु जनानी औरी उनके माई-बाप के कोरोना के सब लच्छन के सहे के परल रहे.बाकिर उनकर पांचू लईका सुरक्षित रहे. परिवार में केहू जांच करावे ना गयेल रहे. बाकिर सभे बांच गईल. पत्थर के टुक्का प काम करत आसिम कहलन, “हम आपन परिवार चलावे खातिर इंहा पत्थर तूरेनी.” जदीद अहल -ए-इस्लाम में 9,000 रोपया महीना के तनखा पावे वाला आसिम सैकड़न मरे वाला खातिर नमाज-ए-जनाजा पढ़ चुकल बाड़न.एमे, कोरोनो औरी कोरोना से अलगहूं , सब मौत बा.

आसिम कहलन, “हमार परिवार हमरा के ई काम ला सहकावेला, काहे से कि जे लोग कवनो इंसान के अंतिम जात्रा में सेवा करेला ओकरा बाद के दुनिया में इनाम मिलेला.” निजामो के परिवार उनका के इ काम ला सहकवले रहे. औरी ऊहो लोग इ बात में बिस्वास करेला. दुनू जाना सुरुआत में इ काम से डेरात रहे. बाकिर बाद में ओ लोग के डर चल गईल. आसिम कहलन, “जब कवनो लास भुईंयां में धयिल बा त रउआ डर के बारे में ना, ओकरा के दफनावे के बारे में सोचेम.”

जदीद अहल-ए-इस्लाम में, कबर के पत्थर तइयार करावे में 1500 रोपया खर्चा होला. एमे से निजाम के 250 से 300 ले रोपया मिला जाला, जौन उनका लिखनी, मने किताबत खातिर दहल जाला. उ पत्थर के जौन टुकड़ा प काम करेलन उ लमसम 6 फीट लमहर औरी 3 फीट चाकर होला. एकरा में से 3 फीट लमहर औरी 1.5 फीट चाकर 4 गो पत्थर कात के निकालल जाला. एकरा बाद, हर पथ्थर के उपरका हिस्सा के गुंबद के आकार दहल जाला, एकरे के मेहराब कहल जाला. कुछ लोग संगमरमर के पत्थर के इस्तेमाल करेला औरी केहू पत्थर के जघ़े लोहा के बोर्ड के इस्तेमाल करेला. लोहा के बोर्ड इस्तेमाल करे वाला के 250 से 300 रोपया खर्चा आवेला. इ मेहराब प होखे वाला खर्चा के छठवां हिस्सा के बराबर बा.

हर और्डर लेवे के बाद, निजाम ऊ परिवार के कवनों आदमी से कागज प साफ़, सुथर भाषा में सब बेवोरा लिखवा लेलन. एकर में मूए वाला के नाम, पति चाहे पिता के नाम (मेहरारू के समबंध में) पैदाइश, औरी मरे के तारीख़, पता सामिल होला. एकरा अलावे कुरआन के कवनो आयतो सामिल रहेला, जे परिवार ओकरा के पत्थर प लिखवावे के चाहे त. निजाम कहलन, “एकरा से दू गो मकसद पूरा होला. पहिला नातेदार लोग के मरल आदमी के नाम लिखे के मिलेला,औरी दुसरा कि एकरा चलते कवनो गलती से फरके रहे में मदद हो जाला.” कई बेर त लिखनी में कवनो सरो सामिल होला. जइसे नीचे दहल गईल बा. इ सेर जहां आरा के कबर के पत्थर प लिखल जाई. जेकरा के बनवावे के और्डर अभिये उनकर परिवार दहल ह.

अल्लाह करे उनका कब्र प दुआ के बादल मोती के बरखा करे
उ हमेसा सुन्नर दुलारी बनल रहस.

निजाम साल 1975 में किताबत के काम सुरु कईले रहलन. उनकर वालिद पेंटर रहलन. साल 1979 में उनकर मौत हो गईल. एकरा बाद निजाम, कबर के पत्थर प लिखे के काम सुरु कईलन, उ कहेलन, “हमार अब्बा एगो कलाकार रहलन, बाकिर हम उनका से कुछु ना सीखनी. हम खाली उनका के पेंटिंग करत देखीं. हमरा के इ कला एगो खूबसूरत तोहफा के रूप में अपने आपे मिल गईल.”

साल 1980 में निजाम दिल्ली के किरोड़ीमल कॉलेज से उर्दू में ग्रेजुएशन कईलन. उ आपन काम सुरु कईलन. एगो सिंगल स्क्रीन मूवी थियेटर, जगत सिनेमा के सामने एगो दोकान खोललन. कौनो जमान में पाकीजा औरी मुग़ल-ए-आजम जइसन ऐतिहासिक सिनेमा देखावे वाला इ थियेटर अब स्थायी रूप से बंद हो गईल बा.साल 1986 में नसीम आरा से निजाम के बियाह भईल. इ माहिर कैलिग्राफर कब्बो अपना बीबी के ख़त ना लिख सकल. एकर जरुरते ना परल. उ जब्बे अपना माई-बाप के लगे जास, जल्दिये आ जास. कहे से कि उनकर घर पड़ोसे में रहे. इनकर एगो बेटा, एगो बेटी औरी छह पोता-पोती बा. इ पुरानी दिल्ली के जामा मस्जिद के लगे रहेलन.

“ओ जमाना में हम मुशायरा, सम्मेलन, बिग्यापन, धार्मिक औरी राजनीतिक सभा कुल खातिर होर्डिंग पेंट करत रहनी.” उ अपना दोकान प मेहराबो पेंट करे के और्डर लहलन. दोकान प बिरोध परदरसनी वाला बात कुल ढेर आवे. जैसे बैनर औरी तख्ती बने आवे.

उ कहलन कि "भारत के ओ बेरा के प्रधानमंत्री राजीव गांधी सन 80 के साल में बाबरी मस्जिद के ताला खोले के मंजूरी दे दहलन. “एकरा खेलाफ में मुसलमान समुदाय औरी बहुत लोग भारी परदरसन करत रहे. हम कपड़ा प आन्दोलन के बैनर औरी बिरोध करे वाला पोस्टर बनावत रहनी. साल 1992 में बाबरी मस्जिद गिरावे के बाद, आन्दोलन धीरे-धीरे सांत होखत गईल. लोग में (ढहाला के चलते) खीस रहे. बाकिर अब उ कम्मे बहरा आवत रहे.” उ इ बात मनलें कि समाज में ओ तरे के राजनीतिक गतिविधि कम होत गईल जेकरा में इ सब के जरुरत परित. उ आगे कहलन, “हम आठ लोग के काम प रखले रहनी. उ सब के धीरे-धीरे काम छोड़े के परल. हमरा लगे ओ लोग के देवे के पइसा ना रहे. उ लोग अब कहां बा, हमरा नईखे मालूम. इ बात से हमरा दुःख होला.”

निजाम हंसत कहलन, “साल 2009-10 में, गर्दन में संक्रमण के चलते हमार बोली चल गईल रहे औरी लमसम 18 महीना के बाद खाली आधा बोली वापस आ सकल. हमरा के समझे खातिर एतना काफी बा.” ओही साल निजाम के दोकान बंद हो गईल. उ आगे कहलन, “बाकिर हम मेहराब प नाम लिखल कब्बो बंद ना कईनी.”

“जइसहीं भारत में कोरोना आईल, इ कब्रिस्तान के मजूरन के हमार सेवा के जरुरत रहे औरी हम ओ सब के मन ना कर सकत रहनी. पर साल जून में हम इंहा आ गईल रहनी. हम एहूसे एहिजा अयिनी कि हमारा परिवार चलावे के रहे.” निजाम के बेटा के जमा मस्जिद के लगे जूता के छोट दोकान बा. महामारी औरी लौक डाउन में उनकर कमाई बहुत घट गईल.

साल 2004 में बंद भईल जगत सिनेमा के जइसन उनकर औरियो बहुत चीज के इयाद अभिन ले बा. उ साहिर लुधियानवी के सायरी से परेम करेलन, औरी उनकर लिखल गीत सुनेलन. जौना साले निजाम आपन ग्रेजुएशन के इम्तिहान पास कईलन ओही साले इ महान सायर के इंतकाल हो गईल. साहिर के लिखल उनकर सबसे पसंद के लाइन ह, ‘चलो इक बार फिर से अजनबी बन जायं हम दोनों' एकरा के दूसरा तरे से समझीं, त जिनगी औरी मौत के आपस में बोलचाल ना ह.

निजाम कहलन, “पहिले अइसन कलाकार होत रहलें कुल जे उर्दू में लिख सकत रहे. अब अइसन लोग बा जे पत्थर प हिंदी आ अंग्रेजी में लिख सकेला. दिल्ली में अब मस्किले से केहू भेंटाला जे मेहराब प उर्दू में नाम लिख सके. सियासत अइसन भरम पसरा के रख दहलस कि इ खाली मुसलमाने के जबान ह. उर्दू के बहुत खराब से चोटा के औरी बर्बाद क के ध दहलस. उर्दू कैलीग्राफी में अब पहिले के मोकाबिल बहुत कम काम बचल बा.”

निजाम जौना मेहराब प काम करत रहलन ओ पे किताबत पूरा करे के बाद, पेंट के तनियक देर सूखे खातिर छोड़ दहलें.एकरा बाद आसिम, सुलेमान औरी नंदकिसोर एकरा के तरासे के कार करी. 50 से बेसी उमिर के नंदकिसोर 30 बरीस से बेसी साल से इ कब्रिस्तान में कार कर रहल बाडन. उ पत्थर के कात के औरी छेनी, हथौड़ी से तरास के ओकरा के गुंबद बनावे में माहिर बाड़न. उ इ कार खातिर मशीन के इस्तेमाल ना करेलन. उ कहेलन, “इ कब्रिस्तान कब्बो एतना भयानक मंजर ना देखले रहे, जेतना आज बा.”

नंदकिसोर कोरोना से मूए वाला लोग के कबर खातिर पत्थर नईखन गढ़त. उ अल-जदीद के दुसरा कोना में इ उम्मीद से बईठेलें कि अइसन क के उ इ वायरस से बांच जईहें. उ उ बतावेलन, “हमरा हर रोज एगो पत्थर खातिर 500 रोपया मिलेला, जेकरा के हम तरासी, धोई, काटी औरी पूरा करेनी. इ अंग्रेजन के जमाना के कब्रिस्तान ह.” हम जब सवाली अंदाज में कहनी कि का अंग्रेज खाली कब्रिस्ताने छोडलेसन? त नंदकिसोर हंस दहलन.

नंदकिसोर बतवलें, “उनका के कब्रिस्तान में काम करत देख के कब्बो-कब्बो लोग के हरानी होला. अइसन बेरा में हम ओ सब के मुंह ओरी देख के मुस्किया देनी. हमरा ना बुझाला कि का बोलीं. कब्बो-कब्बो हम ओ लोग से कह देनी , ‘हम रउआ लोग खातिर कुरआन के आयत तरासेनी. रउआ सब मुसलामन होखला के बादो इ कार जिनगी में कब्बो नईखीं कईले.’ फेर उ लोग हमरा के सुक्रिया कहेला. हमरा प भरोसा करेला, हमरा इंहां अपना घर जइसन बुझाला.” नंदकिसोर के तीन गो लईका उत्तरी दिल्ली के सदर बजार में रहेला.

उ कहेलें, “कबर के भीतर दफ़न लोग हमार आपन जईसन बा. जब हम इंहां से बहरा गोड़ धरनी, त दुनिया हमारा अपना जइसन ना बुझाला. इंहां हमरा सकून मिलेला.”

दू महीना पहिले इंहां एगो नया आदमी के कार प राखल गईल. उनकर नाम पवन कुमार ह. उ बिहार के बेगूसराय जिला से बाड़न. उनकर मेहरारू औरी तीन गो लईका बिहार वापस चल गईल बा. 31 साल के पवन कुमार पत्थर कातेलन. पथ्थर काटे वाला एगो छोट मशीन के मदद से 20 गो स्लैब काटे के बाद उ कहेलन, “हमार मुंह लाल हो गईल बा.” पथ्थर काटे बेरिया उड़े वाला धूरा उनका पूरा देह प बईठ गईल बा. उ बतावेलन, “कोरोना होखे चाहे ना होखे हमरा अपना परिवार के पेट पोसे खातिर साल भर कार करे के बा. इंहां हमरा कब्बो-कब्बो 700 रोपया मिल जाला.” उनका लगे कोनो स्थायी रोजगार ना रहे, नंदकिसोर औरी समीम के जइसन ऊहो इस्कूल के मुंह नईखन देखेले.

उत्तर परदेस के अलीगढ़ के रहेवाला आस मोहम्मद, ऊहो इंहां मजूरी करेलन. उ सब कार में पूरल बाडन. उ कब्रिस्तान के हर काम में मदद करेलन. उ इंहां करीब छव साल से काम करतारन. आस के परिवार के लोग उत्तर परदेस के कासगंज जिला के एगो दूर के नातेदार के बेटी से उनकर बियाह तय कईले रहे.

आस बतावलन, “हमरा ओकरा से प्रेम हो गईल रहे. पर साल लौक डाउन के बेरिया, कोरोना से ओकर मौत हो गयील.” बाद में परिवार उनका खातिर एगो औरी रिश्ता देखलस. इ साल मार्च में लड़की रिश्ता के नकार दहलस. काहे से कि उ अइसन आदमी से बियाह ना करे के चाहत रहे जे कब्रिस्तान में कार करेला.

आस कहतारन, “दुःख से हम बेसी काम कईल सुरु क दहनी. बेसी कबर खोदे लगनी, बेसी पत्थर काटे लगानी. अब हम बियाह नईखी करे के चाहत.” उ इ बात स्लैब काटते कहलन. उ एड़ी से मूड़ी ले धूरा में सनायिल बाड़न. उनका हर महीना 8,000 रोपया मिलेला.

लगहीं एगू पीयर रंग के तितली कब्र के अगल-बगल उड़त रहे. जेतरे ओकरा बुझात णा होखे कि उ कबर प चढ़ल फूल के चूमे कि कबर प गड़ल पत्थर के.

मूए वाला के इयाद उरेहे वाला निजाम कहतारन, “जेकर मौत हो जाला उ लोग त चल जाला. अल्लाह के मदद से हमही ओ लोग के आखीरी बेर ओ सब के नाम देनी. दुनिया के बतावेनी कि ईंहां केहू रहे, केहू के पियारा.” उनकर बुरुस के मुंह प करिया, उज्जर पेंट लागल बा, जे निजाम के इशारा प चलेला. आखिरी शब्द के आखिरी अच्छर प नुक्ता लगावत एगो औरी पत्थर प अरबी में उ आयत पूरा करतारन, “केहू ना बांची, सब जन चाखी.”