गुजरात के बिलात चरहा से चरवाहन के मस्किल

“रउआ कींहां बरखा होता?” इ कराभाई आल रहलन, जे उत्तर गुजरात के बनासकांठा जिला से फोन प बतियात रहलन. इ बातचीत अबकी जुलाई के अंतिम हफ्ता में होत रहे. उ आधा उम्मीद के साथे आपन फैसला सुनवलन, “इंहां बरखा नईखे होत, जे बरखा होई त हमनी अपना घरे जाईब.”

उ एतना चिंता में रहलन कि उनका ए बात से फरक ना परत रहे कि उ जेसे बतियावतारन उ खेतिहर ना ह. उ 900 किलोमीटर दूर पुणे में रहत कवनो आदमी से बतियात रहलन. उनकर पूरा ध्यान मानसून प रहे, जेकरा चलते उनका परिवार के जिए खातिर हर साल जूझे के परेला.

अपना बेटा, पतोह, दू गो पोता, एगो भाई औरी उनकर परिवार के साथे साल भर खातिर, 75 बरीस के चरवाहा के आपन गांव छोड़ले 12 महीना बीत गईल रहे. 14 परानी वाला इ परिवार आपन 300 से बेसी भेंड़ा, तीन गो ऊंट औरी आपन जनरवन के रखवारी करेला विछीयो नाम के कुक्कुर के साथे रवाना भईल रहे. औरी उ 12 महीना में उ आपन जनरवन के साथे कच्छ, गुजरात, सुरेंद्रनगर, पतन, औरी बनासकांठा जिलन में 800 किलोमीटर से बेसी दूरी तय कईले रहलन.

जब मार्च के सुरु में काराभाई के खोजत सुरेंद्रनगर जिला के गवाना गांव के एगो सूखल खेत में उनका से भेंट करे गईनी त उनकर बोली रहे, “हमरा बुझाइल कि गांव के पटेल लोग हमनी के ईंहां से भगावे खातिर तहरा के भेजेले बा.” इ जघ़े अहमदाबाद सहर से 150 किलोमीटर दूर बा.

उनकर इ संका के एगो कारन रहे. जब बेर मस्किल होला, जइसे बहुत सूखल दिन होला त जमीन के मालिक इ सब के, मवेसियन के संघे भगा देला अपना इलाका से. काहे से कि -ओ सब के अपने अपना जनरवन खातिर घास आ फसलन के ठूडी जोगावे के रहेला.

काराभाई हमनी के बतवलन, “ए पारी के दुष्काल (सुखाड़) बहुते खराब बा. ईहे कारन बा कि हमनी पछिला साल आसाढ़ (जून-जुलाई) के महीना में रापर से निकल गयीनी, काहे से कि ऊंहां बरखा ना भईल रहे.” उनका गरम जिला में परत सुखाड़ उनका के बेरा से पहिलही आपन सालाना जतरा सुरु करे के मजबूर क देहलस.

उ हमनी के बतवलन “जब ले मानसून सुरु ना होई हमनी अपना भेड़वन के साथे घूमत रहिले! जे बरखा ना होई त हमनी अपना घरे ना जायेनी, मालधारी के ईहे जिनगी ह.” ‘मालधारी’ गुजराती के दू गो सब्द माल (जनरवा) औरी धारी (पोसे वाला) से मिला के बनल बा.

नीता पंड्या कहेली, “गुजरात के सूखल, अधसूखल जगह में 2018-19 के सुखाड़ इतना भारी रहे कि जौन मालधारी लमसम 25 साल पहिले अपना गांव में बईठ गयी रहे, ऊहो चरहा, चारा औरी रोजी खोजे में दोबारा पलायन करे लागल.” उ अहमदाबाद के एगो गैर -लाभकारी मालधारी ग्रामीण अभियान समूह (मालधारी रूरल एक्शन ग्रुप, एमएआरजी) के संस्थापक हई, जे 1994 से चरवाहा लोग के साथे कार करेला.

इ मालधारी परिवार के रहे के जगह कच्छ में, 2018 में बरखा मात्र 131 मिमी भईल रहे, जबकि कच्छ के सामान्य सालाना औसत 356 मिमी ह. इ जिला के मानसून दस बरीस से बेसी समय से गड़बड़ायिल बा. भारतीय मौसम बिभाग (आईएमडी) के आंकड़ा बतावेला कि 2014 में जिला के बरखा घाट के 291 मिलीमीटर प पहुँच गईल. 2016 में 294 मिमी बरखा भईल, बाकिर 2017 में बढ़ के 493 मिमी हो गईल. चालीस साल पहिले 1974-78 एही तरे के बिनासकारी साल रहे (1974 में 88 मिमी) औरी चार गो पारा पारी साल देखावता, जौना में बरखा सामान्य औसत से ऊपर रहे.

साऊथ एसिया नेटवर्क ऑन डैम्स, रीवर्स एंड पीपुल के हिमांशु ठक्कर सालन के गलत प्राथमिकता के चलते गुजरात में आसन्न जल संकट नाम के 2018 के रिपोर्ट में लिखतारन कि पछिला तीस बरीस में, राज्य के पहिले के सरकार कुल नर्मदा बांस्ध के कार के कच्छ, सौराष्ट्र, औरी उत्तर गुजरात के सुखाड़ वाला जघ़े के जीवन रेखा जइसन आगे बढ़वले बा. ऐतरे, सांच में इ कुल जघे के सबसे कम भाव दियाला. इ सब के सहरी इलाका, उद्द्योग, औरी मध्य गुजरात के खेतिहर कुल के जरूरत पूरा कयीला के बाद के बांचल पानी मिलेला.

सुरेंद्रनगर, जहां हम इ चरवाहा लोग से भेंट कईनी, उंहा 63 परतिसत से बेसी कामकाजी लोग खेती के कार करेला. पूरा गुजरात में इ आंकड़ा 49.61 बा. ईंहां होखे वाला परमुख फसल ह जीरा, कपास, गेहूं, बजरा, दाल, मूंगफली औरी रेंड़ी. कटनी के बाद फसल के ठूंढ़ी भेड़ा कुल ला नीमन चारा होला.

साल 2012 के गिनती से इ पशुधन, गुजरात के 33 जिला के कुल 17 लाख भेड़ा के आबादी में से अकेले कच्छ में 570,000 चाहे ओकरो से बेसी बा. इ समुदाय के साथे कार करत गैर -लाभकारी संस्था एमएआरएजी के मोताबिक, जिला के वागड़ उप-क्षेत्र में, जहां के काराभाई हवन, उनकरा जइसन लमसम 200 रबारी परिवार बा. जे हर साल कुल 30,000 भेड़न के साथे उ 800 किलोमीटर के दूरी तय करेला. उ हमेसा अपना घर से 200 किलोमीटर फरके चलेला.

पुरनका ढंग से इ मवेसियन के झुंड अपना गोबर, मूत से खेत में कटनी के बाद खाद देत रहे. बदला में, खेतिहर लोग इ सब के चाय, चीनी औरी बजरा देत रहे. बाकिर जलवायु के जईसेही, अपना में अदलेन-बदलेन की इ फायदा वाला बातो अब बदल रहल बा.

काराभाई गोविन्द मारवाड़ से पूछलन (जे हमनी के साथे रहलन), “तहरा गांव में कटनी हो गयील बा? का हमनी उ सरेहन में बिलम सकेनी?”

गोविन्द कहतारन, “उ दू दिन बाद फसल काटी लोग” उ एमएआरएजी के सदस्य औरी पाटन जिला के सामी तालुका के धनोरा गांव के एगो खेतिहर मालधारी हवन. “ए बारी, मालधारी लोग खेत से त जा सकेला, बाकिर बिलम ना सकेला. इ हमनी के पंचायत के फैसला बा. काहे से कि इंहां पानी औरी चारा के भारी कमी बा.”

ईहे उ जगह ह जहां से काराभाई औरी उनकर परिवार आगे चल दहल-पाटन के ओर. घरे लौटे से पहिले उ सब तीन गो परमुख क्षेत्र, कच्छ, सौराष्ट्र औरी गुजरात के चक्कर लगा लेले रही.

बदलत मौसम औरी जलवायु के परिस्थिति में जौन चीज अस्थिर रहे- उ रहे ओ सब के सेवा भाव. रास्ता में बनावल अस्थायी घरो में उ लोग मेहमानी ना छोड़े. काराभाई के पतोह,हीराबेन आल पूरा परिवार खातिर बजरा के रोटी बना के ढेरीअवले रहली. सबका ला चाय बनवली. कहां ले पढ़ल बानी? इ सवाल के जवाब में उ कहली, “हम अपने कब्बो स्कूल नईखी गयील.” एतना कह के उ बर्तन मांजे लगली. परिवार के बड़ा लोग के रहला प जेतना बेर उ खड़ा भयिली, ओतना बेर करिया ओढनी से आपन मूंह तोप लेस. जब कार करे भुइयां बइठस त फेर आपन ओढ़नी मूह प से हटा के कार करे लागस.

परिवार के मेढ़ा कुल मारवाड़ी नसल के बा, जे गुजरात औरी राजस्थाने के नसल ह. एक में उ लमसम 25 से 30 मेढ़ा बेचेलन. हर मेढ़ा के 2,000 से 3,000 ले रोप्य मिल जाला.भेड़ा के दूध एगो दूसर कमाई ह उ सब के. ऐतरे इ झुण्ड से कमीनी कम्मे होला. काराभाई कहेलन, 25-30 मेढ़ा से उनका 9-10 लीटर ले दूध हो जाला. जगह के छोटहन डेयरी से 30 रोप्य लीटर ले मिल जाला. जब दूध ना बिकला त इ परिवार ओकर छाछ बना लेलअ. औरी छाछ से घीव.

काराभाई मस्ती में कहेलन, “घीव पेट मा छे! इ गरमी में चले से गोड़ जर जाला. एही से एकरा खयिला से मदद हो जाला.”

औरी ऊन बेचल? इ सवाल के जवाब में काराभाई उदासी से कहलन, “दू साल पहिले ले, लोग हर जनरवा के ऊन 2 रोप्य किलो कीनत रहे. अब केहू एकरा के ना कीने के चाहेला. ऊं हमनी ला सोना जइसन बा. बाकिर हमनी के एकरा के बीगे के परेला.” उनका खातिर औरी उनका जइसन लाखन बिना जमीन के, छोट खेतिहर, मालधारी लोग ला इ मेढ़ा (औरी बकरी) ओ सब के धन ह. औरी ओ सब के जीविका के बिंदू ह. अब ई धन कम भईल जाता.

भारत में 2007 औरी 2012 के पशुधन गड़ना के बीच के पांच बरीस में भेड़ा कुल के गिनती में 6 मिलियन से बेसी के कमी आईल बा. 71.6 मिलियन से घट के 65 मिलियन पहुंच गईल. इ 9 फीसदी गिरावट बा. गुजरातो में तेजी से गिरावट आइल बा. जहां लमसम 300,000 के कमी भयिला के बादो इ गिनती खाली 1.7 मिलियन रह गईल बा.

कच्छ में कमी देखल गयील. बाकिर इंहा इ जनावर सब कुल बेसी नीमन रहे. जौन कि मालधारी कुल के नीमन देख रेख के नतीजा ह. इंहां प 2007 के परतर में लमसम, 200 कम भेड़ा रहे.

पशुधन के 2017 के गणना के आंकड़ा छह महीना ले बहरा ना आई. बाकिर काराभाई के कहनाम बा कि उ गिरावट के सुभाव के देखतारन औरी भेड़ा के गिनती में कमी के कई गो मिलौनी कारन बतावलन. उ कहलन, “हम जब 30 बरीस के रहनी, त आज से बेसी घास आ गाछ बिरीछ होत रहे, मेढ़ा चरावे के कौनो परेसानिये ना रहे. अब जंगल औरी गाछ काटल जाता. घास के मैदान छोट होत जाता. गरमीयो बहुते बेसी बा.” साथही, अनियमित मौसम औरी जलवायु परिवर्तन खातिर मानुस जात के रहन सहन के जिम्मेदार कहेलन.

उ कहेलन, “सुखाड़ के बेर में जईसे हमनी परेसान होनी, ओईसने मेढ़वो सहेली कुल. घास के मैदान के कम भईला के माने बा कि ओकनी के चारा खोजे ला ढेर चले के परेला आ बउआये के परी. भेड़वन के गिनती सायद कम होता, काहे से कि कुछ लोग बेसी कमाए खातिर ढेर जनरवा के बेचत होई.”

अपना झुण्ड ला घास आ चरहा के मैदान के सिकुड़े के बारे में उनकर बात सही बा. सेंटर फॉर डेवलपमेंट आल्टरनोटिव्स, अहमदाबाद के प्रोफ़ेसर इंदिरा हिरवे के मोताबिक, गुजरात में 4.5 परतिसत जमीन चरहा के जमीन ह. बाकिर आधिकारिक डेटा, जइसन कि उ बतावतारी, इ जमीन प बड़का पैमाना प अवैध अतिक्रमण के नईखे मानत. एहीसे असली तस्वीर लुकाइल रहेला. मार्च 2018 में, सरकार एकरा से संबंधित सवाल के जवाब में राज्य के बिधानसभा इ सकरलस कि 33 जिला में 4,725 हेक्टेयर चरहा के जमीन प अतिक्रमण भयिल बा. अईसे त, कुछ बिध्यक लोग हमला बोलत कहले रहे लोग कि इ आंकड़ा बहुते कम क के देखावल बा.

सरकार अपने ई सकरले रहे कि 2018 में, राज्य के भीतर 2,754 गांव अईसन रहे जहां चरहा के जमीन एकदम्मे ना रहे.

गुजरात औद्योगिक विकास निगम से कल-कारखाना के सौंपल जमीनो में बढ़ोतरी भयिल बा- एमे से कुछ जमीन राज्य ले लहलस. इ 1990 औरी 2001 के बीचे अकेले एसईजेड ला उद्द्योग के ,4,620 हेक्टेयर जमीन सौंप दह्लस. अइसन जमीन 2001-2011 के बेरा से अंत ले बढ़ के 21,308 हेक्टेयर हो गईल रहे.

सुरेंदरनगर में, मार्च के महीना में जैसही तापमान बढल, काराभाई मरदाना लोग से कहलन, “दुपहरिया हो गईल, आवा ओगिन अब चले के सुरु कयील जाव.” मर्दाना लोग आगे चले लगाल त मेढ़ा कुल भी पीछे-पीछे चले लागल. सातवा कलास ले स्कूले गईल उनकर 13 साल के पोता, प्रभुवाला, खेत के अरिया के झंखाड़ के पीटता औरी ओहीजा घूमत भेडा कुल के हांक के झुण्ड में ले आवता.

टीनू मेहरारू रस्सी के खटिया, स्टील के दूध के डिब्बा औरी दूसर सब सामान बान्हल. प्रभुवाला दूर गाछ से बान्हल ऊंट के खोल के ऊंहां ले अयिलन जहां उनकर माई, हीराबेन अपना रास्ता के घर औरी दूसर सामान गोट्टा क के धईले रहे कि इ सब समान ऊंट के पीठ प लडा सके.

पांच महीना बाद हमनी काराभाई से दोहरा के भेंट कईनी, रापर तालुका गांव के सड़क प. औरी जत वादा गांव के उनका घरे गईनी. उनकर मेहरारू 70 साल के दोसीबाई आल हमनी के बतवली औरी सबका ला चाय बनवली. “10 बरीस पहिले तक ले हमहूँ अपना परिवार के साथे जातरा करत रहनी, भेड़ा औरी बकरी हमनी के धन ह. उ सब के नीमन से देखभाल होखे के चाहीं, ईहे हम चाहतानी.”

भइयाभाई मकवाना, उनकर पड़ोसिया, सिकायत करे लगलन कि अब त सुखाड़ अक्सरहां पड़ता. “जे पानी नईखे, त हमनी अपना घरे नईखी जा सकत. पछिला छह साल में, हम खाली दू बेर घरे अयिनी”

एगो दूसर पड़ोसी, रत्नाभाई धागल दूसर कुल बात के बारे में बतवलन. “हम सुखाड़ के चलते दू साल बाद घरे लावत सकनी. आ के देखनी कि सरकार हमनी के चरहा के जमीन के चारू ओरिया से घेर देले बा. हमनी दिन भर घूमेंनी तब्बो हमनी के माल के ठीक ठाक घास ना मिल सकेला. हमनी का करी? ओकनी के चरावे ले जाईं कि पींजरा में क दीं? माले पोसल एगो कार बा जवन हमनी जानेनी औरी ओही प गुजर करेनी.”

अनियमित मौसम औरी जलवायु परिवर्तन में बढ़ोतरी के चलते थाकल काराभाई कहेलन, “सुखाड़ के चलते हमनी बहुत दुःख सहेनी. खाए के कुछु ना रहेला. औरी जनरवन, चिरईनो तक खातिर दाना पानी ना रहेला.”

अगस्त में भईल बरखा तनियक रहत दहलस. आल परिवार के लगे सामिलाती में लमसम आठ एकड़ बरखा के भरोसे वाला जमीन बा. जेमे उ लोग बजरा बोअले बा.

मवेशी के चरे, औरी मालधारी के भागे के पीछे बहुत कुल कारन बा. जईसे कि राज्य में असफल औरी गुजारा से कम मानसून, बेर-बेर के सुखाड़, कम होत चरहा के जमीन, तेजी से मशीनीकरण औरी सहरीकरण, बन के कटाई औरी चारा-पानी के कमती. मालधारी कुल के जिनगी के अनुभव से पता चलेला कि एमे से कई गो कारन मौसम औरी जलवायु के फेरबदल जिम्मेदार बा आखिर में ई समुदाय के आयील-गयील गम्भीरे परभावित भईल बा. जवन बेर-नियम बदलता ओह प इ सब एगो जुग से चलता.

काराभाई बिदाई बेर कहलन, “हमनी के सब सकिस्ती के बारे में लिखीहा. औरी हमनी देखें कि एसे का बदलाव आवता. अगर ना, त फेर भगवान त बड़लहीं बाड़न.”

लेखक इ स्टोरी के रिपोर्ट करे में अहमदाबाद औरी भुज के माल्धारी रूरल एक्शन ग्रुप(एमआरएजी) के टीम के साथ औरी सहायता करे ला धन्यवाद करे के चाहतारी.

पारी के जलवायु परिवर्तन प केन्द्रित राष्ट्रव्यापी रिपोर्टिंग के प्रोजेक्ट, यूएनडीपी समर्थित ओ पहल के हिस्सा ह जेकरा में साधारण लोग के जिनगी के अनुभव से पर्यावरण में हो रहल बदलाव के दर्ज कयील जाला.

अनुवाद : स्मिता वाजपेयी