چنئی کے صفائی کارکنوں کا تاریخی احتجاج

بھوک ہڑتالیں، ۱۶۵ دنوں کی ریلیاں، سڑکوں کا محاصرہ، ایم ایل اے کو درخواستیں،علامتی اموات کا ڈرامہ، خود کو گندگی اور غلاظت میں غرق کرنا…

یعنی اتنے طویل عرصہ تک اور اس شدت کے ساتھ چنئی کے بلدیاتی کارکنوں نے ریاست سے اپنے مطالبات منوانے کے لیے احتجاج کیا۔ یہ محض ایک احتجاج نہیں تھا، بلکہ شہر کے مظلوم ترین عوام کی ایک تاریخی جدوجہد تھی، جنہوں نے خاموشی سے شکست تسلیم کرنے سے انکار کر دیا تھا۔

دسمبر ۲۰۲۵ میں بات کرتے ہوئے، ایک سینئر صفائی کارکن، ایم مہالکشمی نے ریاستی حکومت کی بے رخی کو ذات پات پر مبنی امتیاز کا نتیجہ قرار دیا۔ ’’ہم ۱۳۰ دنوں سے زیادہ وقت سے احتجاج کر رہے ہیں لیکن کوئی سنوائی نہیں ہوئی۔ مندر کے ملازمین کو بغیر کسی احتجاج کے مستقل ملازمتیں دے دی گئیں۔ نرسوں کے مطالبات ایک ہفتہ میں پورے کر دیے گئے۔ لیکن جب دلت صفائی کارکنان اسی عزت نفس کا مطالبہ کرتے ہیں، تو ریاست خاموشی اختیار کر لیتی ہے۔‘‘

وہ نشاندہی کرتی ہیں کہ گریٹر چنئی کارپوریشن (جی سی سی) کے زیادہ تر صفائی کارکنوں کا تعلق دلت اور ارون تتیار برادریوں سے ہے، جس کی وجہ سے یہ امیتازی سلوک محض دفتری نہیں بلکہ ساختی بھی ہے۔ مہالکشمی (۳۷) کے مطابق، ’’یہ ذات پات اور طبقاتی بنیاد پرمبنی ادارہ جاتی امتیاز ہے۔‘‘

صفائی مزدوروں کو یوڈئیپور یوریمئی اِیکّم (یو یو آئی)، لیفٹ ٹریڈ یونین سینٹر (ایل ٹی یو سی)، اور آل انڈیا سینٹرل کونسل آف ٹریڈ یونینز (اے آئی سی سی ٹی یو) جیسی ٹریڈ یونینوں، سول سوسائٹی کی تنظیموں، اور کئی یونیورسٹیوں کے اسٹوڈنٹ گروپس کا تعاون حاصل رہا ہے۔ مظاہرے کی قیادت معروف ٹریڈ یونین لیڈر کامریڈ کے بھارتی اور سینئر ٹریڈ یونینسٹ کمارا سوامی نے کی تھی۔ یہ تحریک شروع سے ہی ان تنظیموں اور کارکنوں کے ذریعہ چلائی جا رہی تھی۔ دوسرا احتجاج ۲۸ نومبر، ۲۰۲۵ کو ایڈووکیٹ پولیئن تھوپ موہن اور کُٹّو اِیَکّم کی قیادت میں ہوا۔

اس احتجاج کی مدت اور شدت کے باوجود تمل ناڈو حکومت مسئلہ کا حل پیش کرنے میں سست روی کا مظاہرہ کر رہی تھی۔ ان کی یہ خاموشی دیگر کارکنوں کے مطالبات پر ان کے فوری ردعمل کے بالکل برعکس تھی۔ گزشتہ ۲۴ دسمبر ۲۰۲۵ کو وزیر صحت سبرامنیم نے ۱۰۰۰ کنٹریکٹ نرسوں کو ان کے احتجاج کے ایک ہفتہ کے اندر ہی مستقل سرکاری ملازمت دینے کا اعلان کر دیا۔ اس سے قبل، ہندو مذہبی اور خیراتی اوقاف (ایچ آر اور سی ای) محکمہ کے تحت ۲۵۰۰ عارضی کارکنوں کو ریگولر (باقاعدہ) کیا گیا تھا، اور مندر کے مزید ۱۵۰۰ کارکنوں کو مستقل ملازمت دینے کا وعدہ کیا گیا تھا۔

ان فیصلوں نے ناانصافی کے گہرے احساس کو مزید تقویت بخشی۔

اکتیس سالہ اے جے رام، ایک اور کارکن ہیں جو گزشتہ سات سالوں سے جی سی سی میں ملازم ہیں۔ وہ صفائی کے کام کی نجکاری کے حکومت کے اقدام پر سوال اٹھاتے ہیں۔ ’’نجکاری سے ہماری زندگیوں میں کوئی بہتری نہیں آئے گی۔ حکومت ہو یا کوئی نجی ٹھیکیدار، ہمیں اب بھی اسی پرانے ساز و سامان کے ساتھ کام کرنے پر مجبور کیا جائے گا۔ نجی کمپنیاں ہمیں بیرون ملک استعمال ہونے والے جدید آلات فراہم نہیں کریں گی۔ واحد حقیقی تبدیلی جو آئے گی، وہ ہماری اجرتوں میں کمی ہوگی۔‘‘

جے رام کے مطابق، نہ تو سرکاری اور نہ ہی نجی آجر مناسب حفاظتی ساز و سامان فراہم کرتے ہیں۔ ’’ہم اب بھی وہی جھاڑو اور کپڑے کے دستانے استعمال کرتے ہیں۔ یہاں تک کہ قومی شہری روزگار مشن جیسی اسکیمیں بھی ہم تک نہیں پہنچی ہیں،‘‘ انہوں نے مزید کہا۔ کئی دوسرے کارکنوں نے اسی موقف کی تائید کی اور اس بات پر زور دیا کہ صفائی کے کام میں عزت نفس سے محرومی ذات پات کے نظام سے منسلک ہے۔ ’’یہ ذات پات کی بنیاد پر مبنی مزدوری ہے۔ اسی لیے ہمیں عزت نفس سے محروم رکھا جاتا جاتا ہے،‘‘ جے رام کہتے ہیں۔

ایک سے ۱۳ اگست ۲۰۲۵ کے درمیان، میں نے جی سی سی کے صفائی کارکنوں کے احتجاج میں حصہ لیا۔ میں وہاں کسی مشاہدہ کار کے طور پر نہیں، بلکہ مستقل روزگار اور محنت کی عظمت کے لیے ان کی جدوجہد میں ایک شراکت دار کے طور پر گیا تھا۔

برسوں سے، میری تعلیمی اور ذاتی وابستگی دلت اور ماہی گیر برادریوں کی بے دخلی، اور نجکاری، اسمارٹ سٹی اقدامات، اور چنئی کی ساحلی پٹی کے ساتھ ’بلیو بیچ‘ پروجیکٹ جیسی اسکیموں کے خلاف ان کی مزاحمت پر مرکوز رہی ہیں۔

اس احتجاج کے دوران میرا تعارف فوٹوگرافر ایم پلنی کمار سے ہوا۔ میرے ہاتھ میں کیمرہ رکھ کر، انہوں نے مجھے فریم اور ہمدردی سے بالاتر ہوکر دیکھنا سکھایا۔ اس میں روزمرہ کی زندگی میں رچی بسی ساختی تشدد کا مقابلہ کرنا، اور فوٹو گرافی کو محض دستاویز سازی کے طور پر ہی نہیں، بلکہ سیاسی عمل کے گواہ کے طور پر سمجھنا شامل تھا۔

اس لمحہ کے بعد دستاویز سازی مزاحمت بن گئی۔ میں نے چنئی کے صفائی کارکنوں کی جاری جدوجہد کی ہر تحریک، ہر بھوک ہڑتال، جبر کے ہر عمل کو کیمرے میں قید کرنا شروع کیا۔

’’سڑکوں کے کنارے ٹوٹے شیشے، دھاردار میٹل، سوئیاں، اور انسانی کچرے پڑے رہتے ہیں۔ کپڑوں کے دستانے ہمیں ان چیزوں سے نہیں بچا پاتے۔ ہم اکثر زخمی ہو جاتے ہیں،‘‘ جے گیتا نے بتایا۔ ’’ہم ٹوٹے ہوئے شیشے، انسانی فضلہ، اور پیشاب کو اپنے ننگے ہاتھوں سے اٹھاتے ہیں۔ ہم جس ذہنی کرب سے گزرتے ہیں، ماسک اور دستانے ہمیں ان سے نہیں بچا سکتے۔‘‘

انہوں نے جہاں ایک طرف اپنے اس ضروری کام کے خطرہ اور ابتر حالات کی نشاندہی کی، وہیں دوسری طرف سماج سے الگ تھلگ کیے جانے کے بارے میں بھی بتایا۔

گیتا نے ۱۷ نومبر، ۲۰۲۵ کو تین دیگر خواتین صفائی مزدوروں – ۵۰ سالہ پی جینووا، ۳۹ سالہ جی وسنتی، اور ۳۶ سالہ ایس بھارتی کے ساتھ امبتّور توڈر کوڈم پر غیر معینہ بھوک ہڑتال شروع کی۔ انہوں نے مستقل ملازمت، جاب سیکورٹی اور کام کو عزت ملنے تک تا دم مرگ بھوک ہڑتال پر بیٹھنے کا اعلان کیا۔

جیسے جیسے بھوک ہڑتال طول پکڑتی گئی، چاروں خواتین کی صحت تیزی سے بگڑتی گئی اور ان کی زندگی کو لاحق شدید خطرہ کے مدنظر ان چاروں کو ہسپتال میں داخل کرایا گیا۔ اسی دن ۴۰ سالہ ایم سروتی، ۴۰ سالہ ای سراوتی، ۳۵ سالہ کے کلپنا اور ۴۳ سالہ وی ویلنکنّی نے بھوک ہڑتال کے دوسرے مرحلہ کا آغاز کیا۔ تاہم، تیزی سے بگڑتی ہوئی صحت کی وجہ سے دونوں سراوتیوں کو ہسپتال میں داخل کرایا گیا۔ کلپنا اور ویلنکنّی نے ۲۰ سے زیادہ دنوں تک ہڑتال جاری رکھی۔ اب یہ تمام خواتین کمزور کرنے والی السر کا شکار ہیں جن کے لیے بار بار ہسپتال جانا پڑتا ہے۔

طویل عرصہ سے بے روزگاری نے مزدوروں کے کنبوں پر تباہ کن اثرات مرتب کیے ہیں، کیونکہ زیادہ تر خواتین صفائی کارکنان اپنے گھروں کی واحد کمانے والی فرد ہیں۔ ان کے قرضے مسلسل بڑھ رہے ہیں۔ وسنتی کہتی ہیں، ’’چونکہ میں فیس ادا نہیں کرسکی، اس لیے میری بیٹی نے مجھ سے بولنا بند کر دیا۔‘‘ مہالکشمی واجب الادا کرائے، اسکول کی فیسوں اور کئی کئی دن تک پیٹ بھر کھانا نہ ملنے کی وجہ سے شدید مشکلات کا سامنا کر رہی تھیں۔

بہت سے مزدوروں کے لیے ان کا کنبہ ہی جذباتی سہارے کا واحد ذریعہ ہے۔ اب وہ رشتہ بھی شکست و ریخت کا شکار ہے۔ انہوں نے مجھ سے کہا ’’گزشتہ تین ماہ سے کوئی تہوار نہیں منایا گیا۔ دیوالی کسی جنازے یا ماتم جیسی لگی۔ کرسمس بھی اسی طرح گزر گئی۔ اب پونگل آنے والا ہے۔‘‘

طویل بھوک، قرض اور بے یقینی کی وجہ سے پیدا ہونے والی ذہنی تھکن اب ناقابل برداشت ہو چکی ہے۔ تقریباً ۱۰ سے ۱۵ سال تک شہر کی خدمت کرنے والے مزدوروں نے کہا، ’’بعض اوقات ایسا محسوس ہوتا ہے کہ موت ہی واحد راستہ ہے۔ یہ وہ شدید ذہنی کرب ہے جس کے ساتھ ہم جی رہے ہیں۔‘‘

صفائی مزدور ٹی روی کمار (۴۸) نے ۱۹ دسمبر کو رائے پورم کے آر ایس آر ایم ہسپتال کے قریب اپنی زندگی کا خاتمہ کر لیا۔ ان کی والدہ، ٹیکا بائی نے حکومت کو قصوروار ٹھہراتے ہوئے کہا کہ کام کے دوران ٹانگ میں شدید چوٹ لگنے کے باوجود ان کا بیٹا ڈیوٹی پر حاضر ہوتا رہا، لیکن حکومت نے اسے غیرقانونی طور پر نوکری سے نکال دیا۔

انہوں نے کہا، ’’چونکہ انصاف کی کوئی امید باقی نہیں بچی تھی، اس لیے اس کی جان چلی گئی۔ حکومت کو اس کا ذمہ دار ٹھہرایا جانا چاہیے۔‘‘

روی کمار کی موت کوئی علاحدہ واقعہ نہیں تھا۔ اس سے قبل دو اور صفائی کارکن بھی بے روزگاری اور ذہنی تناؤ سے منسلک صحت کی پیچیدگیوں کی وجہ سے فوت ہو گئے تھے۔ ژون ۶ سے تعلق رکھنے والے ۴۸ سالہ بی اُدے کمار ملازمت سے محروم ہونے کے بعد یرقان اور شدید ذہنی کرب میں مبتلا تھے۔ ان کے اہل خانہ کے مطابق طویل بے روزگاری کے باعث وہ بروقت علاج کی استطاعت نہیں رکھتے تھے۔

ژون ۵ سے تعلق رکھنے والے ایک اور مزدور ۴۹ سالہ اشوک کمار، مبینہ طور پر ذیابیطس (شوگر) اور واجب الادا کرائے و تعلیمی اخراجات کی وجہ سے شدید ذہنی دباؤ کا شکار تھے۔ بعد میں، ۵ ستمبر ۲۰۲۵ کو دل کا دورہ پڑنے سے ان کا انتقال ہو گیا۔

ٹی روی کمار کی آخری رسومات میں شرکت کے دوران، بہت سے مزدوروں نے کہا، ’’ہم سب اسی طرح مرنے والے ہیں۔ یہی واحد حل نظر آتا ہے؛ اس کے علاوہ اور کوئی راستہ نہیں ہے۔‘‘

ان کی باتوں سے مجھے کئی راتوں تک نیند نہیں آئی۔ پھر بھی مجھے احساس ہوا کہ یہ ذہنی کرب عارضی نہیں تھا۔ وہ خود بے یقینی، بھوک اور خوف کے بوجھ تلے دبے ۱۳۰ سے زیادہ دنوں سے بغیر سوئے زندگی گزار رہے تھے۔

اس سال ۳ جنوری ۲۰۲۶ کو روی کمار کی موت کے ۱۶ویں دن، سینکڑوں مزدور چنئی کے منٹ کے قریب ایک شمسان میں جمع ہوئے اور ایک انتہائی علامتی احتجاج درج کروایا۔ دو مزدور مُردہ لاشوں کی طرح زمین پر لیٹ گئے، اور یہ اعلان کیا کہ حکومت اور اداروں کی طویل مدتی غفلت نے انہیں بالکل آخری حد تک پہنچا دیا ہے۔

مزدور ۵ جنوری ۲۰۲۶ کو مزاحمت کے ایک اور طریقہ کے ساتھ واپس آئے۔ ایگمور میوزیم کے قریب، وہ کووم ندی میں داخل ہوئے۔ انہوں نے کہا، ’’یہ ہمارے لیے کوئی نئی بات نہیں ہے۔ ہمیں ہمیشہ اسی طرح کے گٹروں میں بھیجا گیا ہے۔‘‘

عام طور پر، پولیس فوری طور پر مداخلت کرتی ہے۔ لیکن اس بار دو گھنٹے سے زائد عرصہ تک کوئی کارروائی نہیں ہوئی۔ کارکن گھنٹوں آلودہ ندی کے اندر کھڑے رہے۔ بہت سے لوگوں کو الٹیاں ہوئیں اور شدید متلی آئی۔ وسنتی بیہوش ہوگئیں اور کئی گھنٹوں تک سانس کی تکلیف میں مبتلا رہیں۔ برسوں سے ان مزدوروں کو بغیر حفاظتی اقدامات یا جدید آلات کے گٹروں میں اترنے پر مجبور کیا جاتا رہا ہے۔

اس احتجاج نے ترقی کی زبان کے پیچھے چھپی ذات پات پر مبنی معاشرہ کی سفاک حقیقت کو بے نقاب کر دیا۔ بالآخر فائر سروس کے عملہ اور پولیس نے ندی میں داخل ہوکر زبردستی احتجاج کو منتشر کر دیا۔

ہندو مذہبی اور خیراتی اوقاف (ایچ آر اور سی ای) کے وزیر، پی کے شیکھر بابو نے مظاہرین سے ملاقات کی اور وعدہ کیا کہ ژون ۵ اور ژون ۶ کے تمام کارکنوں کو گریٹر چنئی کارپوریشن میں بحال کر دیا جائے گا۔

یہ بحالی ان صفائی کارکنوں کی ایک غیرمعمولی اور تاریخی جدوجہد کا نتیجہ تھی، جو اپنے حقوق کے دفاع میں ثابت قدمی کے ساتھ ڈٹے رہے، اور چنئی کی تمام سڑکوں، گلیوں، مرگھٹوں، ندیوں اور عوامی مقامات پر دھرنا جاری رکھا۔