चेन्नई सफईकर्मी मन के ऐतिहासिक आंदोलन

कतको भूख हड़ताल, 165 दिन तक ले रैली निकारे, रोड रोके, विधायक मन ला अरजी देय, मरे कस भूंइय्या मं सुते के नाटक, गंदा-मैला नाली मं उतरे...

चेन्नई मं नगर निगम के कर्मचारी मन अपन माँग मन ला राज सरकार तक राखे बर अतक लंबा अऊ गजब के लड़ई लड़िन.ये ह सिरिफ विरोध प्रदर्सन भरेच नइ रहिस, फेर ये ह शहर के सबले जियादा दबे-कुचरे लोगन मन के अगुवई मं निकारे गीस. ये ह एक ठन ऐतिहासिक लड़ई रहिस, जेन मन कलेचुप कोनहा मं परे हार माने ले साफ इंकार कर दे रहिन.

दिसंबर 2025 मं, एक झिन मुखिया सफईकर्मी एम. महालक्ष्मी ह सरकार डहर ले कोनो जुवाब नइ मिले ला “ गहिर ले जाति-आधारित बताइस. “ हमन 130 दिन ले घलो जियादा बखत ले विरोध-प्रदर्सन करत हवन, फेर कोनो जुवाब नइ मिलिस. मंदिर के काम करेइय्या मन ला बगेर कोनो विरोध के पक्का नउकरी दे दे गीस. नर्स मन के मांग हफ्ता भर के भितरिच पूरा कर दे गीस. फेर जब दलित सफईकर्मी मन उहिच सम्मान के बात करथन, त सरकार चुप परे रहिथे.”

वो मन बताइन के ग्रेटर चेन्नई कॉर्पोरेशन (जीसीसी) के अधिकतर सफईकर्मी मन दलित अऊ अरुंधतियार समाज ले हवंय, ते पायके ये बहिस्कार सिरिफ नौकरशाही ले जुड़े नई ये, फेर एक ठन ढांचा बने हवय. 37 बछर के ये कर्मी हा कहिथे, “ ये ह संस्थागत भेदभाव आय – जेन ह जात अऊ बरग, दूनों उपर आधारित हवय.”

लंबा बखत तक ले जोरदार विरोध-प्रदर्सन के बाद घलो, तमिलनाडु सरकार ह येकर समाधान मं बनेच बखत लगाइस. ओकर ये चुप्पी, दीगर करमचारी मन के मांग मन ला माने के ठीक उलट रहिस. विरोध प्रदर्सन के हफ्ता भर के भितरिच 24 दिसंबर, 2025 के दिन, स्वास्थ्य मंत्री सुब्रमण्यम ह घोसना करिस के 1,000 संविदा नर्स मन ला सरकारी पक्का नऊकरी मं राखे जाही. येकर पहिली, हिंदू धार्मिक अऊ धर्मार्थ बंदोबस्ती (एचआर एंड सीई) विभाग मं काम करेइय्या 2,500 अस्थाई कर्मचारी मन ला परमानेंट करे गे रहिस,अऊ येकर उपराहा 1,500 मंदिर कर्मचारी मन ला पक्का नउकरी देय के वादा करे गे रहिस.

ये फइसला मन ले गहिर ले जमे अनियाव के जरी के भाव ह अऊ घलो जियादा बढ़ गिस.

एक झिन सफईकर्मी, 31 बछर के ए जयराम, जेन ह बीते सात बछर ले जीसीसी बर बूता करत हवय, वो ह सफई के काम ला ठेका मं निजी कंपनी मन ला देय के कोसिस उपर सवाल उठाइस. “कंपनी मन ला काम देय ले हमर जिनगी सुधरेच नइ. चाहे सरकार होय धन कोनो ठेकादार, हमन ला उहिच जुन्ना अऊजार मन ले काम करे मजबूर होय ला परही. निजी कंपनी मन हमन ला नवा अऊजार नइ देवंय जेन ह बिदेस मं काम मं लाय जाथे. एकेच असल बदलाव ये होही के हमर मजूरी कम हो जाही.”

जयराम के मुताबिक, न त सरकारी अऊ न ठेकादार मन सुरच्छा के साजो-सामान देथें. वो ह कहिथे, “हमन आज घलो उहिच बुहारी (झाड़ू) अऊ उहिच कपड़ा के दस्ताना बऊरथन. राष्ट्रीय शहरी आजीविका मिशन जइसने योजना मन के फायदा हमन ला नइ मिलय.” आने कतको मजूर मन घलो ये बात मं हामी भरथें अऊ ये बात उपर जोर दीस के सफई के काम मं सम्मान नइ देय, जात-पात ले अटूट नाता हवय. जयराम कहिथे, “ये ह जात आधारित मिहनत आय. ते पायके हमन ला मान-सम्मान नइ देय जावय.”

1 अगस्त ले 13 अगस्त, 2025 के बीच मंय जीसीसी सफईकर्मी मन के विरोध-प्रदर्सन मं सामिल होंय. मंय उहना सिरिफ देखेइय्या के रूप मं नइ, फेर स्थायी काम अऊ मिहनत के सम्मान बर ओकर मन के लड़ई मं एक झिन साझीदार के रूप मं गेय रहेंय

कतको बछर ले, मोर अकादमिक काम अऊ निजी जुड़ाव दलित अऊ मछुआरा समाज मन के विस्थापन, निजीकरन, स्मार्ट सिटी के काम अऊ चेन्नई के समुंदर पार मं ‘ब्लू बीच प्रोजेक्ट’ जइसने योजना मन के विरोध ऊपर रहे हवय.

ये विरोध-प्रदर्सन बखत, मोर भेंट फ़ोटोग्राफ़र एम.पलनी कुमार ले होइस. मोर हाथ मं कैमरा धराके, वो ह मोला फ़्रेम अऊ मया-दया ले देखे सिखाइस – रोज के जिनगी मं गहिर ले धरे ढांचागत अतियाचार ला झेले, अऊ फ़ोटोग्राफ़ी ला सिरिफ एक ठन दस्तावेज़ीकरन के रूप मं नइ, फेर ये गवाही देय के एक ठन राजनीतिक काम के रूप मं समझे सिखाइस.

वो घड़ी ले, दस्तावेज़ीकरन ह विरोध बन गीस. मंय चेन्नई के सफईकर्मी के चलत लड़ई के हरेक काम, हरेक भूख हड़ताल अऊ दबाय के हरेक कार्रवाई ला दरज करे सुरु कर देंय.

जइसने-जइसने भूख हड़ताल चलत जावत रहिस, ओकर मन के सेहत तेजी ले बिगड़े लगिस अऊ चरों माईलोगन मन ला अस्पताल मं भरती कराय ला परिस, ओकर मन के जान के भारी खतरा रहिस. उहिच दिन, भूख हड़ताल के दूसरा चरन एम. सरस्वती, ई. सरस्वती (दूनों 40 बछर के), के. कल्पना (35 बछर) अऊ वी. वेलंकन्नी (43 बछर) सुरु करिन. वइसे, जल्दीच सेहत तेजी ले खराब होय होय के सेती दूनों सरस्वती ला अस्पताल मं भरती कराय ला परिस. कल्पना अऊ वेलंकन्नी ह 20 दिन ले घलो जियादा बखत तक हड़ताल मं रहिस. अब ये सब्बो माइलोगन मन ला भारी अल्सर होगे हवय, जेकर इलाज बर वो मन ला घेरी-बेरी अस्पताल जाय ला परथे.

बनेच बखत तक ले बंद परे काम बूता ह मजूर मन के परिवार ला टोर के राख दे हवय, काबर के महतारी सफईकर्मी मन अपन घर के अकेल्ला कमेलिन आंय. वो मन के उधर सरलग बढ़त जावत हवय. वसंती कहिथे, “काबर के मंय फीस देय नइ सकंय, मोर बेटी ह मोर ले गोठियायच बंद कर दीस.” महालक्ष्मी ला घर के भाड़ा नइ दे पाय, स्कूल के फ़ीस नइ फ़ीइ भरे सके अऊ कतको दिन तक ले बने करके खाय ला नइ मिले जइसने मुस्किल के सामना करे ला परत हवय.

कतको कमेइय्या मन बर ओंकर मन के परिवारेच ह ओमन के सुरता-मया के एक सहारा आय. अब उहू टूटत जावत हवय. “बीते तीन महीना ले कोनो तिहार-बार नइ मनाए गिस. देवारी ह सोग कस लगिस. अइसनेच क्रिसमस घलो सिरा गिस.अब पोंगल आवत हे,’ वो मन मोला बताइन.”

लंबा बखत तक ले भूख सहे, करजा, अऊ अस्थिर होय सेती होय दिमागी थकावट ह अब थका डरे हवय.’कभू-कभू अइसने लगथे के मरेच ह एकेच रद्दा आय. हमन अइसने पीरा के संग जियत हवन,’ 10 ले 15 बछर तक ले शहर के सेवा करेइय्या सफईकर्मी मन कहिन.

19 दिसंबर के दिन, 48 बछर के सफईकर्मी टी. रविकुमार ह रोयापुरम के आरएसआरएम अस्पताल के तीर आत्महत्या कर लिस.ओकर महतारी टिकाबाई ह येकर बर सरकार ला दोसी ठहरावत कहिथे के ओकर बेटा ह काम के बखत गोड़ मं भारी चोट लगे के बाद घलो, वो ह सरलग काम मं जावत रहिस, फेर सरकार ह ओला गैर-कानूनी तरीका ले नउकरी ले निकार दीस.

“काबर के न कोनो नियाव बांचे रहिस अऊ न कोनो आस, येकरे सेती वो ह अपन जान दे दिस. येकर बर सरकार ला जिम्मेवार ठहराय जाय ला चाही,” वो ह कहिथे.

रविकुमार के मरे ह कोनो अकेल्ला बात नइ रहिस. येकर पहिली घलो दू झिन दीगर सफईकर्मी मन के परान काम बूता नइ मिले अऊ तंगी सेती सेहत के कतको समस्या सेती जा चुके रहिस. जोन 6 के रहेइय्या 48 बछर के बी. उदय कुमार ला नउकरी जाय के बाद पीलिया अऊ भारी दिमागी तनाव होगे रहिस. ओकर घर के लोगन मन के मुताबिक, लंबा बखत तक ले ठलहा रहे सेती वो ह बखत मं इलाज नइ करवाय सके रहिस.

जोन 5 के एक झिन आने कर्मी, 49 बछर के अशोक कुमार, जेन ला कहे जाथे के सक्कर के बीमारी रहिस अऊ वो ह भाड़ा अऊ पढ़ई के खरचा नइ चुकाय सेती भारी तनाव मं रहिस. 5 सितंबर 2025 के दिन दिल के दौरा परे सेती ओकर परान चले गिस.

टी. रविकुमार के अंतिम संस्कार मं सामिल होवत, कतको कर्मी मन कहिन, “हमन सब्बो इहीच किसम ले मरेइय्या हन. इहीच एकेच ठन समाधान लागथे; अऊ कोनो रद्दा बांचे नइ ये.”

ओकर बात ह मोला कतको रतिहा तक सुते नइ दिस. ओकर बाद मोला गम होइस के ये पीरा घड़ी भरके नइ रहिस – वो ह खुदेच 130 ले जियादा दिन तक ले सुते बगरे रहिस. अथिर, भूख अऊ डर के बोझा तरी दबे.

3 जनवरी, 2026 मं, रविकुमार के गुजर जाय के 16 वां दिन सैकड़ों कर्मी चेन्नई के मिंट इलाका के तीर के एक ठन मरघट (कब्रिस्तान) मं जुरिन अऊ एकठन गहिर अऊ प्रतीकात्मक विरोध-प्रदर्सन करिन. दू झिन कर्मी मरे जइसने भूंइय्या मं सुत गे रहिन अऊ येला देखावत वो मन कहिन के सरकार अऊ ओकर कतको संस्था मन के लंबा बखत तक ले चले आवत अनदेखी ह ओमन ला मरे के पार मं लाके पेल दे हवय.

5 जनवरी, 2026 के दिन, सफईकर्मी मन एक ठन अऊ किसम के विरोध के संग लहूँट आइन. एगमोर म्यूजियम के तीर, ओमन कूवम नदी मं उतर गिन. “ये हा हमर बर कोनो नवा बात नोहे. हमन ला हमेसा इही किसम ले गटर मं भेज दे जाथे.”

अक्सर पुलिस तुरते कार्रवाई करथे. फेर ये पईंत, दू घंटा ले जियादा बखत तक ले कोनो कार्रवाई नइ करिस. सफईकर्मी मन कतको घंटा तक उही गंदा मैला नदिया भितरी ठाढ़े रहिन. अब्बड़ झन उछारे लगिन अऊ ओमन ला भारी मिचली आइस. वसंती अचेत होगे अऊ कतको घंटा तक सांस लेय बर तड़पत रहिस. कतको बछर ले, ये सफईकर्मी मन ला बगेर कोनो सुरच्छा उपाय धन नवा जमाना के अऊजार के जबरदस्ती गटर मं उतारे जाथे.

ये प्रदर्सन ह विकास के नांव के आड़ मं लुकाय जात-पात वाले समाज के कुरुप असलियत ला उजागर कर दिस.आखिर मं, अग्नि -समन करमचारी अऊ पुलिस ह नदिया मं घुस के प्रदर्सन ला जबरदस्ती छितिर-भीतिर कर दिन.

हिंदू धार्मिक अऊ धर्मार्थ बंदोबस्ती (एचआरएंडसीई) मंत्री पी.के.शेखर बाबू ह प्रदर्सन करेइय्या मन ले भेंट करिस अऊ जबान दिस के जोन 5 अऊ 6 के सब्बो सफईकर्मी मन ला ग्रेटर चेन्नई कॉर्पोरेशन मं सामिल कर ले जाही.

ये ह सफईकर्मी मन के बड़े लड़ई के नतीजा रहिस, जेन ह अपन हक बर डटे रहिन अऊ चेन्नई भर के रोड, गली, मरघट, नदिया अऊ सार्वजनिक जगा मं कब्जा जमाय रहिन.