ଏଠି ଏବେ ହଜାର ହଜାର ଯାଯାବର ପଶୁପାଳକ ଉପସ୍ଥିତ ଅଛନ୍ତି – ଏବଂ ଆହୁରି ଆସି ପହଞ୍ଚୁଛନ୍ତି। ସେମାନେ ଭିନ୍ନ ଭିନ୍ନ ସମୂହର – ଧାଙ୍ଗଡ଼ମାନେ ମୂଳତଃ ମହାରାଷ୍ଟ୍ରରୁ ଏବଂ କୁରୁବାମାନେ କର୍ଣ୍ଣାଟକରୁ। ସେମାନଙ୍କର ବାର୍ଷିକ ଯାତାୟାତ ପଥ ଯାହାବି ହୋଇଥାଉ ନା କାହିଁକି ସେମାନେ ପ୍ରତି ଅକ୍ଟୋବର-ନଭେମ୍ବରରେ ଏକତ୍ର ହୁଅନ୍ତି ଏବଂ ଏଠାରେ ପଟଣ କୋଡୋଲି ଗ୍ରାମରେ ଏକତ୍ର ହେଉଥିବା ପବିତ୍ର ହଳଦିଆ ବାଦଲକୁ ଅନୁସରଣ କରନ୍ତି।
ଏହା ହେଉଛି ଉଭୟଙ୍କର ଦେବତା ବିଠଲ ବୀରଦେବ ମହାରାଜଙ୍କର ଜନ୍ମ ବାର୍ଷିକୀ ତାଙ୍କ ମନ୍ଦିରରେ ପାଳନ କରିବା ପାଇଁ ଏକାଠି ହେବାର ସମୟ। ଏହି ମନ୍ଦିରରେ ରହିଛି ହଟ୍କଙ୍ଗଲ ତାଲୁକାର ଅନ୍ୟଥା ଅଜଣା ଗ୍ରାମରେ। ଏହି ଅବସରରେ କୋହ୍ଲାପୁରରେ ଏକ ଭିନ୍ନ ପ୍ରକାରର ବର୍ଷା ଏବଂ ଜଳ ପ୍ରଳୟ ଦେଖିବାକୁ ମିଳିଥାଏ। ଏହା ହେଉଛି ଉତ୍ସବ ମୁଖରତାର ବର୍ଷା ଏବଂ ନୃତ୍ୟରତ ଭକ୍ତମାନଙ୍କର ଏକ ବନ୍ୟା ଏହି ଜିଲ୍ଲାରେ ପହଞ୍ଚେ ଯାହା ଜୀବନ, ଘର ଏବଂ ଶସ୍ୟ କ୍ଷେତ୍ରକୁ ନଷ୍ଟ କରିଦିଏ ନାହିଁ।
ଅନେକ ସମୂହ, ସାରା ଦେଶରେ ଧାଙ୍ଗଡ଼ ଏବଂ କୁରୁବାମାନଙ୍କର ଅନେକ ଉପ-ଗୋଷ୍ଠୀ ଏବଂ ଉପଜାତି, ଯେଉଁମାନେ ବିଠଲ ବୀରଦେବଙ୍କୁ ପଶୁପାଳକ ଏବଂ କୃଷକମାନଙ୍କର ତ୍ରାଣକର୍ତ୍ତା ବୋଲି ବିଶ୍ୱାସ କରନ୍ତି, ଏହି ପର୍ବ ପାଳନ ପାଇଁ ମହାରାଷ୍ଟ୍ରରେ ପହଞ୍ଚନ୍ତି। ଜଣେ ତୀର୍ଥଯାତ୍ରୀ ମୋତେ କୁହନ୍ତି, ‘‘ବିଠଲ ବୀରଦେବ ଆମ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ସେ ଆମର ଦିବ୍ୟ ତ୍ରାଣକର୍ତ୍ତା, ଆମର ଆଧ୍ୟାତ୍ମିକ ସାନ୍ତ୍ୱନାଦାତା ଏବଂ ଆମର ମାର୍ଗଦର୍ଶକ। ସେ ହେଉଛନ୍ତି ବିଶ୍ୱାସ, ଆଶା ଏବଂ ଭକ୍ତିର ଅତୁଟ ପ୍ରତୀକ।
