ইয়াত নানা পশুপালক সম্প্ৰদায়ৰ লোক ইতিমধ্যে গোট খাইছে। আৰু আহিবলৈ আছেই। মূলতঃ মহাৰাষ্ট্ৰৰ ধনগৰসকল, কৰ্ণাটকৰ কুৰুবাসকল - তেওঁলোকৰ বাৰ্ষিক প্ৰব্ৰজনৰ বাট যিয়েই নহওক লাগিলে, অক্টোবৰ-নৱেম্বৰ মাহত আটায়ে সমবেত হয় আৰু হালধীয়া হৈ পৰা আকাশ-বতাহ অনুসৰণ কৰি এই পাট্টান কদলি গাঁৱত গোট খায়।
এয়া হাতকাংগেল তালুকৰ সাধাৰণতে চকুত নপৰা এইখন গাঁৱৰ ভিত্থল বীৰদেৱ মহাৰাজৰ আবিৰ্ভাৱ তিথি উদযাপন কৰিবলৈ তেৰাৰ মন্দিৰত সমবেত হোৱাৰ সময়। অন্য এক ধৰণৰ উছৱমূখৰ এটা পৰিৱেশ হৈছে আৰু ক’লহাপুৰখনত মানুহৰ মহাপয়োভৰ ঘটিছে। নাচোন-বাগোন কৰা ভক্তৰ সমাহাৰ ঘটিছে আৰু জীৱন-জীৱিকা, মানুহৰ ঘৰ-বাৰী, পথাৰৰ একো ক্ষতি নকৰাকৈ মানুহৰ সমদল বৈছে।
দেশৰ বিভিন্ন স্থানৰ পৰা ধনগৰ আৰু কুৰুবাসকলৰ নানা উপগোট আৰু উপজাতি যিয়ে ভিত্থল বীৰদেৱক গৰু-ছাগলী আৰু খেতিয়কৰ ৰক্ষক বুলি ভাবে, তেওঁলোক এই উছৱ উপলক্ষে মহাৰাষ্ট্ৰত গোট খায়। “ভিত্থল বীৰদেৱ আমাৰ বাবে খুবেই গুৰুত্বপূৰ্ণ। তেৰাই আমাৰ ঐশ্বৰিক ৰক্ষক, আমাৰ আধ্যাত্মিক শান্তি আৰু আমাৰ দিকদৰ্শক। তেৰা আমাৰ অগাধ বিশ্বাস, আশা আৰু ভক্তিৰ প্ৰতীক,” এজন ভক্তই এই প্ৰতিবেদকক কয়।
