कजलिया: सौ बरिस पुरान रिवाज

कजलिया के सलाना उत्सव के तइयारी नव दिन पहिले से सुरु हो जाला. एह मौका पर बुंदेलखंड आ बघेलखंड के लोग माटी के हांड़ी में गेहूं बोएला. ओह गेहूं के बड़ा जतन से सींचल जाला. अंकुरित होखेला, त इहे जई (गेहूं के नया पौधा) के पूजा कइल जाला. एह अंकुरित गेहूं के खुजलू कहल जाला. एकरा टोकरी में ध के मेहरारू मंदिर ले जाला. रस्ता में खूब गीत-नाद (पारंपरिक लोकगीत) होखत रहेला.

गीत गावे वाली ममता कहेली, “हमनी कजलियान खूब उल्लास से मनाइला.” शाहडोल जिला के पचगांव में मेहरारू लोग जब मंदिर जाला ओह घरिया उहो गीत गावेली आ ढोलकी बजावेली.

ई त्योहार मधेपुरा आ यूपी के कइएक इलाका के बहुते खास बा आ एकरा बहुते धूमधाम से मनावल जाला. एकरा लोग मिलजुल के मनावेला. एह में लोग पुरान बात सब बिसरा के आगू बढ़ेला. मानल जाला कि जेकरा खुजलू देवल जाला, ऊ अपनापा स्वीकार करेला आउर फेरु से मेल-मिलाप हो जाला. बामन आ राजपूत जइसन उंच जात के लोग ध्वजा वाला शोभायात्रा निकालेला आउर अपना घर में पूजा-पाठ करेला. गोंड आ बैगा आदिवासी समाज के लोग लोकगीत गाएला आ खुसी मनावेला.

“एहिजा पहिले मेला जइसन रौनक रहत रहे,” मंदिर के देखभाल करे वाला रामस्वरूप विस्वकर्मा कहलन.

कजलिया अगस्त में कवनो बेरा रक्षा बंधन के दोसरका दिन मनावल जाला. खुजलू के पानी में डूबा के देवता पर चढ़ावल जाला. एकरा बाद एकरा परिवार आ संगी लोग के कान के ऊपर अटका देवल जाला. मरद लोग भी एह त्योहार में शामिल होखेला.

मध्य प्रदेस के पचगांव के रहनिहार जीतेंद्र प्रताप सिंह आपन लरिकाईं इयाद करत कहेलन, “एह त्योहार के बहुते रौनक रहत रहे. सभे लोग मिल-जुल के खुसी मनावत रहे. एकर परंपरा हमनी के बाबा-दादा के जमाना से चलत आ रहल बा.”

रोजी-रोटी खातिर गांव से बाहिर जाए के असर एह त्योहार पर पड़ल बा. “अब लोग लगे जादे समय ना रहेला. कमाए खातिर लोग परदेस जाए लागल बा. धीरे-धीरे ई सब परंपरा खतम हो रहल बा.”

फिलिम में कजलिया के जश्न देखे के मिली.

अनुवाद: स्वर्ण कांता