ફોર્ટ કોચીના માછીમારોની જાળની જંજાળ

સહારા વડે ઊંચકવામાં આવતી જાળીઓ જે ‘ચાઇનીઝ ફિશિંગ નેટ્સ’તરીકે ઓળખાય છે, તે કેરળના કોચીમાં ઘણા સમયથી માછીમારો માટે આવકનું મુખ્ય સાધન રહી છે.

પરંતુ પર્યાવરણીય અને આર્થિક બંને પ્રકારના વિવિધ પરિવર્તનોને કારણે આ ઉદ્યોગ ઘટતો જાય છે. ફોર્ટ કોચી અને તેની આસપાસના કારખાનાંના પ્રદૂષણ અને ટ્રૉલિંગ (જાળીથી થતી માછીમારી) દ્વારા થતી વધારે પડતી માછીમારીને કારણે માછલીઓ ઓછી થઈ ગઈ છે. માછલીઓ વેચીને જે પૈસા મળે છે તેમાંથી મોટા ભાગનો હિસ્સો વચેટિયાઓ લઈ જાય છે, અને માછીમારોને ખૂબ ઓછો ભાગ મળે છે.

માછીમારોની મુશ્કેલીઓ સરકારની એવી યોજનાઓના કારણે વધી રહી છે જે તેમની જરૂરિયાતોને ધ્યાનમાં રાખીને બનાવવામાં આવી નથી. વધુમાં, જાળીઓની સારસંભાળનો ખર્ચ એટલો વધી ગયો છે કે તેના માલિકોને હવે કોઈ ફાયદો થતો નથી.

યુવાનો હવે આ વ્યવસાયમાં આવવા નથી માગતા, એટલે એવું બની શકે કે ચાઇનીઝ ફિશિંગ નેટ્સ ફોર્ટ કોચીના દરિયા કિનારેથી હંમેશ માટે ગાયબ થઈ જાય.

અનુવાદક: કનીઝફાતેમા