کلاس روم میں ذات پات کا زہر

اگست ۹، ۲۰۲۳۔ نانگُنیری: سرکاری اسکول میں ۱۱ویں جماعت کے ایک دلت طالب علم چنّا دورئی پر حملہ کر کے اسے زخمی کر دیا گیا، کیوں کہ اس نے غالب ذات کے اپنے ہم جماعتوں کے ذات پر مبنی مظالم کی مخالفت کی تھی۔

فروری ۱۲، ۲۰۲۵۔ شیو گنگئی: ’’تمہاری ذات کے کسی شخص کی ہمت کیسے ہوئی کہ وہ ہمارے سامنے گاڑی چلا سکے؟‘‘ شیو گنگئی سرکاری کالج میں بی ایس سی تھرڈ ایئر کے طالب علم ایّاسامی کو موٹر سائیکل چلانے کی وجہ سے شدید تشدد کا نشانہ بنایا گیا۔ اسے کسی طرح اپنی جان بچا کر بھاگنا پڑا۔

مارچ ۱۰، ۲۰۲۵۔ اریہ نائیگی پورم: دیوندر راج ایک ابھرتے ہوئے کبڈی کھلاڑی ہیں۔ ان پر اس وقت وحشیانہ حملہ کیا گیا جب اعلیٰ ذات کے لوگوں نے ان کی دلت ٹیم کی جیت پر اعتراض کیا۔

جولائی ۳۱، ۲۰۲۵۔ ارومُگ منگلم: کیوِن سیلوا گنیش کو دوسری ذات کی لڑکی سے محبت کرنے کی وجہ سے بے دردی سے قتل کر دیا گیا۔

تمل ناڈو کے اسکولوں اور کالجوں میں ذات پات کی بنیاد پر امتیاز ختم نہیں ہوا ہے، اس نے صرف شکل بدلی ہے۔ بعض علاقوں میں عمدگی کے ساتھ اور بعض میں بہت بھونڈے ڈھنگ سے۔

یہاں بہت سے گاؤوں میں ذات پات کی شناخت زندگی کے ہر پہلو میں نظر آتی ہے اور اس کے ساتھ ہی علیحدگی بھی در آتی ہے۔ دلت اور مظلوم طلباء کو اب بھی الگ کھڑا کیا جاتا ہے، انہیں اب بھی گالیوں سے پکارا جاتا ہے، اور اب بھی اساتذہ کے ذریعہ بیت الخلاء صاف کرنے پر انہیں مجبور کیا جاتا ہے۔

اسکولوں سے لے کر سرکاری دفاتر تک، مندروں سے لے کر میڈیا کے اداروں تک، ذات پات کا غلبہ بہت گہرا ہے۔ جمہوریت کے نام نہاد ’’آزاد‘‘ ستون، پارلیمنٹ، عدلیہ، میڈیا اور نوکر شاہی، ذات پات کو ختم کرنے کے بجائے اکثر اسے تقویت پہنچاتے ہیں۔

لوگ پوچھتے ہیں، ’’آج کل ذات پات کو کون دیکھتا ہے؟‘‘ لیکن حقیقت یہ ہے کہ ذات پات کی بنیاد پر قتل، دلتوں کے خلاف مظالم اور پسماندہ طلباء کا استحصال آج بھی جاری ہے۔

آج کل جو کچھ ہو رہا ہے اسے ہمیں ریکارڈ کرنا ہی ہوگا۔ کیوں کہ اگر ہم نے ایسا نہ کیا تو یہ تاریخ اسی طرح مٹ جائے گی، جس طرح آج سے پہلے مظلوموں کی محبت، زندگی، جدوجہد اور مزاحمت مٹ چکی ہے۔ اس بات پر غور کریں کہ کیسے بودھ مذہب کے دور کو ’’تاریک دور‘‘ کہا گیا، یا کیسے چولا عہد کے ذات پات کے نظام پر سوال اٹھانے کے بجائے اس کی ستائش کی گئی۔ مظلوموں کی تاریخ کو ہمیشہ دبایا گیا ہے۔

آج بھی، بہت سے مقامات پرپسماندہ طبقات کے لوگوں کو چپل پہننے، مندروں میں داخل ہونے، یا شمشانوں (جہاں لاشیں جلائی جاتی ہیں) کے عوامی راستوں پر چلنے کی اجازت نہیں ہے۔ غالب ذاتوں کے طلباء مظلوم ذاتوں سے تعلق رکھنے والے بچوں کی توہین کرتے ہیں، انہیں اسکولوں میں کھانا پکانے کے حق سے محروم رکھا جاتا ہے، اور جب وہ اچھی کارکردگی کا مظاہرہ کرتے ہیں تو انہیں جان بوجھ کر ناکام کر دیا جاتا ہے۔ اگر وہ کسی سے محبت کر بیٹھتے ہیں، تو اسے ’’ناٹک‘‘ یا ’’جھوٹی محبت‘‘ کا نام دیا جاتا ہے، جو ’لو جہاد‘ کا ذات پات والا ورژن ہوتا ہے۔

بچپن سے ہی مجھے ذات پات کی بنیاد پر امتیازی سلوک کا سامنا کرنا پڑا۔ مگر مجھے ذات پات کی شعوری سمجھ اس وقت تک نہیں آئی، جب تک میں نے اپنے کیمرے کے ذریعے کام کرنا اور امبیڈکر اور پیریار کو پڑھنا شروع نہیں کیا۔ اس کے بعد ہی میں نے اس معاشرہ کو سمجھنا شروع کیا اور میں نے اپنے لوگوں کے ساتھ قدم سے قدم ملا کر چلنا شروع کیا۔

اپنے کالج کے دنوں میں، میں فٹ بال ٹیم کا حصہ تھا۔ لیکن میرے ساتھیوں نے مجھے کبھی میدان میں کھیلنے کی اجازت نہیں دی۔ مجھے ہمیشہ باہر بیٹھا دیا جاتا تھا، اور میں اپنا وقت دوسروں کو کھیلتے دیکھ کر گزارتا تھا۔ مجھے اپنی صلاحیتوں کو نکھارنے کا موقع کبھی نہیں ملا۔ اگر مجھے کھیلنے کا موقع نہیں ملا تو میں کھیلنا کیسے سیکھتا؟

امتیازی سلوک کے مختلف طریقے ہوتے ہیں۔ اس کی وجہ سے پہلے مجھے موقع نہیں ملا، اور پھر یہ دعوی کیا گیا میں اچھا کھلاڑی نہیں ہوں۔

ہندوستان میں محبت بھی سیاست ہے۔ ذات پات کے امتیاز کے خلاف لڑنے والی ایک تنظیم ’ایویڈنس‘ کے بانی وِنسینٹ راج کا کہنا ہے کہ تمل ناڈو میں گزشتہ آٹھ سالوں میں ذات پات کی بنیاد پر ’آنر کلنگ‘ کی ۶۵ وارداتیں پیش آئی ہیں، لیکن ابھی تک صرف آٹھ معاملات میں ہی موافق فیصلے آئے ہیں۔

ایک انسان کو دوسرے انسان کے برابر سمجھنا سب سے بنیادی انسانی قدر ہے۔ پھر بھی مجھے نہیں معلوم کہ ہمارا معاشرہ کب اس سطح پر پہنچے گا۔ کچھ معاملات میں جب کسی پسماندہ طبقہ سے تعلق رکھنے والا کوئی شخص ترقی کرتا ہے، تو اس کی عزت پر حملہ کیا جاتا ہے، اس کے قد کو کچل دیا جاتا ہے اور اس کے گھر کو بلڈوزر سے مسمار کر دیا جاتا ہے۔

دسمبر ۲۰۲۲ میں پڈوکوٹّئی ضلع کے وینگئی وَیَل گاؤں میں اونچی ذات کے مردوں نے ایک دلت محلہ کی پانی کی ٹنکی میں مبینہ طور پر انسانی فضلہ ڈال دیا تھا۔ اس واقعہ نے علاقہ میں ذات پات کے امتیازی سلوک کے دیگر مروجہ طریقوں کو سامنے لا دیا، جن میں مقامی چائے کی دکانوں میں ’’دو ظرفی نظام‘‘ (دلتوں اور دیگر ذاتوں کے لیے الگ الگ گلاس) اور دلتوں کے مقامی آیّنار مندر میں داخلہ پر پابندی شامل ہے۔

وہاں صرف ۱۲ دلت کنبے آباد ہیں، جو اب اس واقعہ کے بعد مشکلات کا سامنا کر رہے ہیں، جس میں کسی کو ذمہ دار نہیں ٹھہرایا گیا ہے۔ وینگئی وَیَل تک پہنچنے کے لیے ۱۲ پولیس چوکیوں کو عبور کرنا پڑتا ہے، اور تاحال صحافیوں کو وہاں تک رسائی سے محروم رکھا گیا ہے۔

یہاں مظلوموں کو کبھی نہ ختم ہونے والی جدوجہد کے بعد ہی انصاف ملتا ہے۔

دسمبر ۲۰۲۵ میں، جس وقت میں یہ لکھ رہا ہوں، تریچی میں دو صفائی کارکن زیر زمین نالوں کی صفائی کرتے ہوئے مارے گئے۔ اس طرح کی اموات کا سلسلہ ہنوز جاری ہے۔

کیوِن سیلوا گنیش کو ۳۱ جولائی، ۲۰۲۵ کو ’عزت‘ کے نام پر بے دردی سے قتل کر دیا گیا تھا۔ ان کی عمر صرف ۲۷ سال تھی۔ وہ ایک انجینئرنگ گریجویٹ تھے اور چنئی میں بطور سافٹ ویئر انجینئر کام کرتے تھے۔ ان کے والدین ایس تمل سیلوی اور چندر شیکھر توتوکڈی ضلع کے ایرل میں واقع آرومُگ منگلم میں تیرکو ماڈا گلی میں رہتے ہیں۔

کیون اور سبھاشنی اسکول کے زمانے کے دوست تھے، جو ایک دوسرے سے محبت کر بیٹھے۔ ایک دن کیون اپنے دادا کی صحت کی جانچ کرانے کے لیے سبھاشنی سے ملنے گئے۔ وہ اسی اسپتال میں سدّھ ڈاکٹر کے طور پر کام کر رہی تھیں۔

تھوڑی دیر بعد سبھاشنی کا بھائی سجیت نمودار ہوا اور کیون سے کہا کہ اس کے والدین کیون سے ملنا چاہتے ہیں۔ سجیت نے اسے اپنی موٹر سائیکل پر ساتھ آنے کو کہا۔ صرف دو گلیوں کے بعد سجیت نے موٹر سائیکل روک کر کیون پر چاقو سے حملہ کر دیا اور اس کا قتل کر دیا۔

یہاں غور کرنے والی اہم بات یہ ہے کہ کیون، سبھاشنی اور سجیت برسوں سے گہرے دوست تھے۔ لیکن سجیت نے اس پر حملہ کرنے کے بعد کہا، ’’ایک پلّر [درج فہرست ذات کا] لڑکا ہمارے خاندان کی لڑکی کو چاہتا ہے؟ اب میرے والدین کو سکون ملے گا۔‘‘

کیون کے قتل سے پہلے اس نے مبینہ طور پر یہی الفاظ کہے تھے۔ سجیت کے ماں باپ دونوں پولیس افسر ہیں۔

کیون ایک انجینئرنگ گریجویٹ تھے۔ معاشرہ اس خطرناک وہم میں گرفتار ہے کہ تعلیم، روزگار، مالی استحکام ذات پات کو مٹا سکتا ہے۔ لیکن کیون کے معاملہ میں ایسا نہیں ہوا۔

کیون کی موت کے بعد میں نے خود کو ایک زندہ لاش کی طرح محسوس کیا ہے۔ ذات پات کی بنیاد پر قتل کا مشاہدہ آپ کے اندر کچھ بدل دیتا ہے۔ یہ آپ کے تحفظ، آپ کی فہم، یہاں تک کہ آپ کی شناخت کو بھی چھین لیتا ہے۔ میں دوبارہ اپنی تلاش کرنے کی کوشش کر رہا ہوں؛ اس مقام تک پہنچنے کی کوشش کر رہا ہوں، جہاں اس قسم کے تشدد سے رو برو ہونے سے پہلے تھا۔ یہ مشکل اور تکلیف دہ عمل ہے۔

یہ غم صرف کیون یا ان کے اہل خانہ کے لیے نہیں ہے۔ یہ میرے وجود کے اس حصہ کے لیے بھی ہے، جو مستقل طور پر بدل گیا ہے۔ کیون صرف شکار نہیں تھے؛ وہ ایک روشنی تھے، زندہ دلی کا نایاب نمونہ تھے، ایک ایسے شخص تھے جو دوسروں کو سنتے تھے، انہیں محفوظ اور قابل قدر ہونے کا احساس دلاتے تھے۔ وہ حقیقی طور پر ایک اچھے انسان تھے۔ یہی وجہ ہے کہ یہ نقصان ناقابل برداشت ہے۔ دنیا نے صرف ایک شخص کو نہیں کھویا ہے، بلکہ ایک ایسے شخص کو کھویا ہے جو دوسروں کی زندگی کو بہتر بناتا تھا۔

یہ ’آنر کلنگ‘ کا تیسرا معاملہ ہے، جس کا میں نے ذاتی طور پر مشاہدہ کیا ہے۔ تقریباً ایک سال قبل میں نے پلِی کارنئی میں پروین کے قتل کی رپورٹنگ کی تھی۔ کیون کی موت اس ہولناک موت کی یاد دلاتی ہے۔ دونوں پر اس قدر وحشیانہ حملہ کیا گیا کہ ان کی مائیں انہیں پہچان بھی نہ سکیں۔ یہ صرف قتل کی وارداتیں ہی نہیں تھیں، بلکہ یہ مٹانے کی کوششیں تھیں۔

جس چیز نے مجھے سب سے زیادہ متاثر کیا وہ کیون کی ماں کا عزم ہے۔ ناقابل بیان درد کے درمیان انہوں نے اپنے آپ کو جس پرسکون استقامت کے ساتھ سنبھالا، اسے الفاظ میں بیان نہیں کیا جا سکتا ہے۔ شاید یہ ایک استاد کے طور پر ان کا تجربہ تھا، جس نے انہیں اپنے غم کو برداشت کرنے کی جذباتی طاقت بخشی تھی۔ جب میں کیون کی تدفین کے بعد ان سے ملا، تو ان کا گھر خاموشی اور غم میں ڈوبا ہوا تھا۔ یہ ضرور ہے کہ وہ ٹوٹ چکی تھیں، لیکن انصاف کے لیے، اپنے بیٹے کے لیے، سچائی کے لیے لڑنے کے لیے پرعزم تھیں۔

ذات پات کے جبر کے بارے میں طویل عرصہ سے لکھنے والی سینئر صحافی اور کامریڈ جیہ رانی نے مجھے بتایا، ’’ہمارا معاشرہ بالکل نہیں بدلا، کامریڈ۔ صرف اتنا فرق پڑا ہے کہ سوشل میڈیا اور سی سی ٹی وی کی وجہ سے کچھ حقائق نظروں کے سامنے آ جاتے ہیں۔‘‘ انہوں نے مزید کہا کہ کیون کے معاملہ اُڈوملائی شنکر کے معاملہ کی طرح اس کے سامنے آیا کیوں کہ اس میں ویڈیو شواہد موجود تھے۔ بہت سے دوسرے معاملات کی جانب لوگوں کا دھیان نہیں جاتا۔ انہوں نے کہا، ’’اب آننر کلنگ کلچرل چیز بن گئی ہے۔ تہواروں یا رسومات کی طرح معمول بن گئی ہے۔‘‘

بین ذاتی محبت یاسماجی نافرمانی کے لیے یہ نام نہاد ’’سزا‘‘ اب ایک ثقافتی عمل کا حصہ بنتی جا رہی ہے۔ درج فہرست ذات / درج فہرست قبائل ایکٹ کے حقائق یا قانونی نتائج ان کی سوچ کو کبھی متاثر نہیں کرتے۔ ان کی ذہنیت نہیں بدلتی۔

دراصل سوشل میڈیا کے عروج کے بعد یہ ذات پرستی کی فکر نظر آنے لگی ہے۔ نوجوان لڑکے، جو بمشکل بڑے ہوئے ہیں، اپنی بہنوں سے محبت کرنے والوں کو قتل کرنے کے بارے میں بہت آرام سے باتیں کرتے ہیں۔ یہ وہ خوفناک حقیقت ہے، جس کے درمیان میں ہم رہتے ہیں۔

ترونیل ویلی کے سرکاری اسپتال کا ایمرجینسی وارڈ ہر وقت افراتفری کا شکار رہتا ہے۔ تمل ناڈو کے جنوبی اضلاع میں، خاص طور پر ترونیل ویلی میں، دلت طلباء اور نوجوانوں کے ذات پات پر مبنی تشدد کا شکار ہونے کی خبریں کبھی تھمتی نظر نہیں آتی ہیں۔ آئی سی یو مسلسل بھرا رہتا ہے، اس سے معلوم ہوتا ہے کہ صورتحال کتنی سنگین ہے۔

جب میں دیوندر راج سے ملنے گیا، تو حسب معمول پولیس نے مجھے روک لیا۔ میں بائیں بازو کی جماعتوں کے ساتھیوں کی مدد سے وہاں پہنچنے اور تصویریں لینے میں کامیاب ہوا۔ پولیس مجھ سے مسلسل سوالات کرتی رہی، اور وہاں موجود کمیونسٹ کیڈر ہی تھے، جنہوں نے مجھے وہاں سے گزرنے میں مدد کی۔ ہسپتال میں حالات اس قدر کشیدہ تھے کہ اس دن دیوندرراج کے والد سے بات کرنا ناممکن ہو گیا تھا۔ میں مدورئی چلا گیا اور اگلے دن ان کا بیان ریکارڈ کرنے واپس آیا۔

مقتول کے والد تنگ گنیش توتوکڈی ضلع کے کرونگولم تعلقہ کے اریہ نائیکی پورم کے گاؤں ولّ کولم کے رہائشی ہیں۔ انہوں نے کہا، ’’میں اپنے بیٹے کو بس میں بیٹھا کر ابھی گھر بھی نہیں پہنچا تھا کہ مجھے یہ خبر ملی کہ قریبی گاؤں کے تین لوگوں نے اس پر حملہ کر دیا ہے، میں وہاں پہنچا اور اسے ہسپتال لے آیا۔ اگر میں اس دن کام پر چلا گیا ہوتا تو حالات مزید خراب ہو سکتے تھے، شاید میرا بیٹا زندہ نہیں بچ پاتا۔‘‘

وہ ۱۰ مارچ، ۲۰۲۵ کو دیوندر راج پر ہوئے حملہ کا حوالہ دے رہے ہیں۔ اس کی ابتدا پڑوسی گاؤں میں منعقد کبڈی میچ سے ہوئی جہاں دلت ٹیم نے دونوں زمروں میں کامیابی حاصل کی تھی۔

دلت ٹیم کی جیت ذات پات پر مبنی تشدد کو بھڑکانے کے لیے کافی تھی۔ جب دیوندر راج اپنے امتحانات کے لیے جا رہے تھے، تو حملہ آورں نے بس کو روکا، انہیں گھسیٹ کر باہر لے گئے، اور سڑک پر ہی دھاردار ہتھیاروں سے ان پر حملہ کر دیا۔ جب ان کے والد نے مجھے یہ بتایا تو میرے جسم میں کپکپی سی دوڑ گئی۔ یہ تشدد کسی کھیل سے متعلق نہیں تھا، یہ طاقت کے اظہار سے متعلق تھا۔ دراصل یہ خیال کہ ایک دلت طالب علم کبڈی میں غالب ذات کے لڑکوں پر فتح حاصل نہیں کرسکتا، اس وحشیانہ فعل کے پس پشت ہے۔ اور ستم ظریفی یہ ہے کہ دیوندر راج کو اپنے علاقہ کے بہترین کبڈی کھلاڑیوں میں شمار کیا جاتا ہے۔

ڈاکٹر نے مجھے بتایا کہ ان کے سر اور ہاتھوں پر گہرے زخم آئے تھے، جن میں سے ایک زخم کافی گہرا تھا۔ ان کی انگلیاں جزوی طور پر کٹی ہوئی تھیں اور انہیں ٹھیک ہونے میں دو سے تین ماہ لگنے تھے۔ ’’پلاسٹک سرجری سے پہلے انگلیوں کو ٹھیک سے فیوز کرنا ہوگا،‘‘ ڈاکٹر نے کہا تھا۔

دیوندر راج اپنے والدین کی سب سے بڑی اولاد ہیں۔ ’’میں اینٹوں کے بھٹہ میں کام کرتا ہوں۔ میرے دو بچے ہیں۔ دیوندر راج سب سے بڑا ہے، وہ پلیَم کوٹّئی کے ایک اسکول میں پڑھتا ہے۔ میری چھوٹی اولاد ایک بیٹی ہے۔ میں اور میری بیوی دونوں ہر روز بھٹے پر جاتے ہیں،‘‘ تنگ گنیش کہتے ہیں۔

انہوں نے خود اپنی زندگی کے بارے میں آہستہ آہستہ بتانا شروع کیا، ’’جب میں چھوٹا تھا تو مجھے ذات پات سے متعلق کوئی آگاہی نہیں تھی۔ ہمارے کسی بھی استاد نے کبھی امبیڈکر یا پیریار کے بارے میں بات نہیں کی تھی۔ دسویں جماعت کے امتحان کے بعد، اپنی مالی مشکلات کی وجہ سے، میں نے موٹر میکینک کا کام سیکھنے کے لیے ایک آئی ٹی آئی [ووکیشنل ٹیکنیکل ٹریننگ انسٹی ٹیوٹ] میں درخواست دی۔

’’میں وہاں اپنے خوابوں کے ساتھ، ہاتھوں میں پیسے لیے، اور سیکھنے کے جذبے کے ساتھ گیا تھا۔ لیکن جب میں وہاں پہنچا تو افسران نے ہم میں سے دو تین نام پکارے اور کہا کہ نشستیں خالی نہیں ہیں، انہوں نے ہمیں باہر دھکیل کر گیٹ بند کر دیا۔ میں بھی ان میں سے ایک تھا۔ مجھے سمجھ میں نہیں آیا کہ ایسا کیوں ہوا۔ میں اس گیٹ کے سامنے بہت رویا۔ انہوں نے کہا کہ ایسا اس لیے ہوا کیوں کہ میرے نمبر کم تھے، لیکن اگر یہ سچائی تھی تو مجھے ایڈمیشن کارڈ ملا ہی کیوں تھا؟ اس سوال نے مجھے برسوں تک پریشان رکھا۔‘‘

جب ہم ترونیل ویلی کے نانگونیری پہنچے تو وہاں کی گلی سنسان پڑی تھی۔ چِنّا دورئی کے گھر پر تالہ لگا ہوا تھا۔ برآمدہ میں خون کے بکھرے ہوئے چھینٹے سوکھ چکے تھے، اور خون آلود ہاتھوں کے نشانات صاف دکھائی دے رہے تھے۔ جب ہم اندر داخل ہوئے تو خون کی بدبو برقرار تھی۔ جیسے چنا دورئی کے خون کی سخت بو ہر طرف موجود ہو۔

ان کے اسکول بیگ سے ہمیں امتحانات کے پرچے ملے، جن پر ۱۰۰ فیصد نمبر تھے اور پرنسپل کے نام ایک نامکمل خط ملا۔ چنا دورئی ایک سرکاری اسکول میں ۱۱ویں جماعت کے طالب علم تھے۔ وہ ایک مخلص طالب علم تھے جنہوں نے مسلسل اچھی کارکردگی کا مظاہرہ کیا تھا۔ پڑھائی میں ان کے لگن کی وجہ سے اساتذہ اور پرنسپل ان کی تعریف کرتے تھے۔ ایک دفعہ تو پرنسپل نے اسکول کے دروازہ پر طلباء کو جمع کرکے چنّا دورئی کی محنت کی تعریف کی اور دوسروں کو ان کی تقلید کرنے کی ترغیب دی تھی۔

لیکن غالب ذات کے ہم جماعتوں نے اسے ناقابل قبول گردانا، کیوں کہ چنا دورئی کا تعلق پسماندہ طبقہ سے تھا۔ ان پر حملے کی بنیادی وجہ یہی تھی۔

چناّ دورئی کو ساتھی طالب علموں کی جانب سے مسلسل استحصال کا سامنا کرنا پڑا، اور وہ اکثر گھر پر رکے رہنے کو اسکول نہ جانے پر ترجیح دینے لگے۔ آخرکار، پرنسپل نے مداخلت کی، ان کے خدشات کو سنا، اور قانونی کارروائی کے لیے ایک تحریری خط حاصل کیا۔ اس دن تین اعلیٰ ذات کے طالب علموں کے خلاف تادیبی اقدامات کیے گئے۔

اسی رات، اونچی ذات کے سات طلباء، جن میں تین نابالغ اور چار بالغ شامل تھے، چنا دورئی کے گھر گئے۔ ان میں سے تین نے ان پر ایک ہی درانتی سے حملہ کیا، ان کے جسم پر متعدد زخم لگائے۔ ان کی بہن نے مدد کرنے کی کوشش کی لیکن وہ بھی زخمی ہو گئیں۔ حملے کی سفاکیت ناقابل تصور تھی۔ یہ سانحہ اسکولوں میں ذات پات کی نفرت اور اس تشدد کو ظاہر کرتا ہے جسے پسماندہ طبقات کے طالب علموں کو برداشت کرنا پڑتا ہے۔

چنا دورئی اور ان کی بہن کو ترونیل ویلی کے سرکاری ہسپتال میں داخل کرایا گیا اور سخت حفاظت میں آئی سی یو میں رکھا گیا۔ مجھے شروع میں ان سے ملنے سے منع کیا گیا تھا، لیکن میں ایک سیاسی پارٹی اور چھوا چھوت مٹاؤ محاذ کے ممبران کے ساتھ وہاں داخل ہوا، جو انہیں دیکھنے آئے تھے۔ جب میں نے انہیں دیکھا تو ان کے ہاتھ، ٹانگیں اور سر کٹے ہوئے تھے، ان کا جسم حالیہ سرجری کے بعد پٹی اور پلاسٹر سے ڈھکا ہوا تھا۔ میں ان کی حالت دیکھ کر گھبرا گیا تھا، پھر بھی درد کے باوجود ان کی نرم مسکراہٹ نے مجھے امید بخشی۔

تکلیف میں ہونے کے باوجود اپنی بات کہنے کے لیے پرعزم چنا دورئی نے کہا کہ حملہ اسی دن ہوا تھا جب انہوں نے اپنا نامکمل خط پرنسپل کو دیا تھا۔

میں نے تسلی کے کچھ الفاظ کہے، کچھ تصویریں اتاریں، اور بھاری من کے ساتھ وہاں سے چلا گیا۔ ان کی ماں سے بات کرنا اور بھی مشکل تھا۔ چنا دورئی پر حملہ کرنے والے کچھ طالب علموں کے گھروں میں گھریلو ملازمہ کے طور پر کام کرتے ہوئے، انہوں نے تنہا اپنے بچوں کی پرورش کی تھی اور تعلیم کا انتظام کیا تھا۔ وہ یقین نہیں کرسکتی تھیں کہ وہی طالب علم اس طرح کا تشدد کرسکتے ہیں۔ وہ تھکی ہوئیں اور خاموش تھیں۔ میں تھوڑی دیر بعد وہاں سے چلا گیا۔

یہ حملہ اس بات کا واضح ثبوت ہے کہ اسکولوں میں ذات پات پرستی آج بھی گہرائی تک پیوست ہے۔

جب میں نے امبیڈکر اور پیریار کو پڑھنا شروع کیا، تب مجھے سمجھ میں آیا کہ یہ نمبروں کا معاملہ نہیں ہے۔ مجھے میری ذات کی وجہ سے مسترد کر دیا گیا۔ آج بھی میں اسکول اور کالج کے طلباء کے لیے فوٹوگرافی کی ورکشاپس منعقد کر کے بہت سے نوعمر بچوں سے ملتا ہوں۔ اورجب ان کے ساتھ کام کرتا ہوں، تو مجھے احساس ہوتا ہے کہ طلباء میں ذات پات کا شعور اب بھی بہت کم ہے۔

سب سے زیادہ پریشان کن بات ان کا ریزرویشن کا تصور ہے۔ ان میں سے اکثر اسے منفی طور پر دیکھتے ہیں۔ سماج نے ان کی فکر کو اس نہج پر پہنچا دیا ہے کہ ریزرویشن دلت اور آدیواسی طلبہ کو خاص ’’استحقاق‘‘ دیتا ہے۔ آج ہمارے نوجوانوں کا یہ حال ہے۔

ہمارا تعلیمی نظام ان موضوعات پر بامعنی اسباق شامل کرنے میں ناکام رہا ہے۔ یہاں تک کہ سرکاری لاء کالجوں میں بھی امبیڈکر کو پڑھانا نایاب ہو گیا ہے اور ان کے نظریات کے بارے میں بات کرنا اکثر متنازع خیال کیا جاتا ہے۔ قانون کے کئی طالب علموں کے ساتھ بات چیت کے بعد میں اس نتیجہ پر پہنچا ہوں۔

یہ خیال کیا جاتا ہے کہ اسکول اور کالج ذمہ دار شہری تشکیل دیں گے، لیکن یہ ادارے بھی ذات پات کی تفریق میں ڈوبے ہوئے ہیں۔ نصابی کتابیں اعلان کر سکتی ہیں کہ ’’چھوا چھوت ایک گناہ ہے،‘‘ لیکن میں نے کبھی کسی استاد کو یہ بیان کرتے نہیں دیکھا کہ حقیقی زندگی میں، یا صحیح سماجی اور سیاسی تناظر میں اس کا کیا مطلب ہے۔

میں پچھلے آٹھ سالوں سے فوٹوگرافی کے ذریعہ ذات پات کی بنیاد پر ہونے والے مظالم کی دستاویز سازی کر رہا ہوں۔ فوٹوگرافی کی ورکشاپوں میں درج فہرست ذاتوں اور درج فہرست قبائل کے طلباء کے ساتھ کام کرنے سے ان کے تجربات کو اور ان سے مسلسل بات چیت کے ذریعے اسکولوں اور کالجوں میں ان پر ہونے والے مظالم کو سمجھنے کا موقع ملا۔

طلباء کے ساتھ سفر کرتے ہوئے میں نے دیکھا ہے کہ ہر وہ طالب علم جس نے ذات پات کے جبر کا سامنا کیا ہے، وہ اختیار کی کمی کے باعث مسلسل ذہنی دباؤ اور نفسیاتی صدمے میں مبتلا رہتا ہے۔ میں نے بذات خود اس کا تجربہ کیا ہے۔ جب میں گیارہویں جماعت میں تھا تو میرے ہم جماعتوں نے مجھ پر ایسا الزام لگایا کہ جو میں نے کیا ہی نہیں تھا۔ میں سمجھ نہیں سکا اور رو پڑا۔ اس واقعہ نے مجھے بہت دکھ پہنچایا، اور میں نے اسکول چھوڑنا شروع کر دیا۔ محض اسکول واپس جانے کی سوچ سے ہی مجھ پر خوف طاری ہو جاتا تھا۔ میری ماں نے مداخلت کی، میری وکالت کی اور مسئلہ حل کیا۔

بعد ازاں، کالج میں انتظامیہ نے مجھے اسکالرشپ کے ۷۲ ہزار روپے دینے سے انکار کر دیا۔ میں نے دریافت کیا تو کہنے لگے کہ ہمارے ٹیکس کے پیسوں سے تمہارے اخراجات کیوں ادا کیے جائیں گے؟ اور مجھے بھگا دیا۔ میں یہ بھی نہیں جانتا تھا کہ اسکالرشپ میرا حق ہے۔ فوٹوگرافی کے ذریعہ لوگوں کے ساتھ کام کرنے، ان کے تجربات سے سیاسی بیداری حاصل کرنے اور امبیڈکر اور پیریار کو پڑھنے کے بعد ہی میں نے ذات پات پر مبنی سماج کی فطرت کو سمجھا اور اپنے حقوق کو پہچانا۔

پسماندہ برادریوں کی دستاویز سازی اور سیاسی بیداری حاصل کرنے کے بعد میں نے محسوس کیا کہ اسکول میں جھوٹے الزامات اور میری اسکالرشپ سے انکار اس لیے ہوا کیوں کہ میرا تعلق ایک درج فہرست ذات سے ہے۔ تعلیمی مقامات پر جب کوئی چیز گم ہو جاتی ہے، تو پسماندہ طلباء اکثر سب سے پہلے شک کا شکار ہوتے ہیں۔ بہت سے لوگ جھوٹے الزامات کی وجہ سے مسلسل ذہنی پریشانی میں مبتلا رہتے ہیں۔ آج بھی، اساتذہ کی جانب سے صفائی کارکنوں کے بچوں کو بیت الخلاء صاف کرنے پر مجبور کرنے کی خبریں منظر عام پر آتی رہتی ہیں۔

اسکولوں اور کالجوں میں ذات پات کی بنیاد پر امتیازی سلوک برقرار ہے اور ہمارا تعلیمی نظام اسے درست کرنے میں ناکام رہا ہے۔ ہندوستان میں کبھی بھی ’ڈی کاسٹ‘ (انسداد ذات پات) پروگرام نہیں چلایا گیا۔ آزادی کے ۷۵ سالوں میں ہم نے ذات پات کے نظام کو ختم کرنے کے بجائے اس کی حفاظت کی ہے۔

جرمنی کی مثال لیں۔ نازی اقتدار کے بعد انہوں نے اپنے جرائم کو نہیں چھپایا۔ انہوں نے ان کا سامنا کیا۔ تعلیمی اصلاحات اور ’ڈی نازی فکیشن‘ نے پوری نسل کو نفرت سے پاک کرنے میں مدد کی۔ بچوں کو اپنے باپ دادا کے جرائم کی معافی مانگنا سکھایا گیا۔ معاشرے اس طرح ٹھیک ہوتے ہیں۔

ان ناانصافیوں پر قابو پانے کے لیے بے پناہ جذباتی طاقت کی ضرورت ہوتی ہے۔ کئی طلباء، بار بار ذات پات کے تشدد سے خوفزدہ ہوکر، خاموش رہتے ہیں، اور آگے بڑھنے کی کوشش کرتے ہوئے اپنا درد برداشت کرتے ہیں۔

چناّ دورئی اپنے اوپر ہونے والے قاتلانہ حملہ میں بال بال بچ گئے۔ بعد میں جب انٹرویو کیا گیا تو انہوں نے کہا، ’’جن لوگوں نے مجھے تکلیف پہنچائی ہے، انہیں بھی اچھی طرح پڑھنا چاہیے اور اچھے عہدوں تک پہنچنا چاہیے۔‘‘ اپنے حملہ آوروں کو ان کا درگزر کرنا ان کی اس معصومیت کو ظاہر کرتا ہے جس کا یہ متشدد معاشرہ مستحق نہیں ہے۔

بارہ فروری ۲۰۲۵ کو، شیو گنگئی ضلع کے منم دورئی تعلقہ میں واقع میلپّد وور گاؤں کے ایک دلت نوجوان پر اونچی ذات کے لوگوں نے وحشیانہ حملہ کیا۔ انہوں نے اس نوجوان کو روکا، ذات پات پر مبنی گالی گلوچ کی اور ان پر ہتھیاروں سے حملہ کرنے سے پہلے کہا، ’’تمہاری ذات کے کسی شخص کی ہمت کیسے ہوئی کہ ہمارے سامنے گاڑی پر سوار ہو؟‘‘

زخمی ایّاسامی، جو شیو گنگئی سرکاری کالج میں بی ایس سی تھرڈ ایئر کے طالب علم ہیں، کو مدورئی کے سرکاری ہسپتال میں داخل کرایا گیا تھا۔ میں دو دن بعد ان سے ملنے گیا۔ انہوں نے یاد کرتے ہوئے کہا، ‘‘انہوں نے کہا، ’ایک پرئی یار لڑکا بلیٹ [موٹر سائکل] چاہتا ہے؟ ہماری سڑکوں پر سوار ی کرنا چاہتا ہے، کیا تم میں اتنی ہمت ہے؟‘‘ پھر انہوں نے مجھ پر حملہ کر دیا، انہوں نے اپنی درانتی میری گردن پر ماری، لیکن میں نے اپنی حفاظت کے لیے ہاتھ اٹھائے اور میرا ہاتھ کٹ گیا۔ جب میں اپنی موٹر سائیکل چھوڑ کر بھاگا، تو انہوں نے ایک چاقو پھینک کر مجھے مارنے کی کوشش کی۔ خوش قسمتی سے میرے فون نے اسے روک لیا، نہیں تو میری ٹانگ کٹ جاتی اور میرا بھاگنا مشکل ہو جاتا۔

ان کے بڑے بھائی پونموتو نے مجھے بتایا کہ حملہ آوروں نے بعد میں ان کے گھر میں توڑ پھوڑ کی۔ انہوں نے کہا کہ ’’ہماری ترقی انہیں طویل عرصہ سے پریشان کر رہی ہے۔‘‘

ہماری گفتگو کے دوران ایاسامی نے آگے کہا کہ وہ اب مزید محنت سے مطالعہ کرنے اور اونچے عہدوں کو حاصل کرنے کے لیے پرعزم ہیں۔

بہت سے اضلاع میں، جب بھی پسماندہ برادریاں معاشی یا سماجی ترقی حاصل کرتی ہیں، تو انہیں اکثر پرتشدد ردعمل کا سامنا کرنا پڑتا ہے۔

صحافت میں، دلت آوازیں شاذ و نادر ہی نیوز رومز میں داخل ہوتی ہیں، اور پسماندہ طبقات کی کہانیاں شاذ و نادر ہی سرخیاں بنتی ہیں۔ اعداد و شمار کے مطابق میڈیا میں فیصلہ سازی میں دلتوں کا تناسب صفر ہے۔

پی سائی ناتھ نے اس موضوع پر تفصیل سے لکھا ہے۔ وہ کہتے ہیں، ’’میرے ذہن میں اس بات کو لے کر کوئی شک نہیں کہ میڈیا ہندوستانی جمہوریت میں سب سے زیادہ استثنیٰ کا ادارہ ہے۔ آپ باقی تمام شعبوں – مقننہ، عدلیہ، عاملہ، اکیڈمیا، جو کچھ بھی دیکھ سکتے ہیں – وہاں دلتوں کی نمائندگی رہی ہے، خواہ کم ہی کیوں نہ ہو۔ میڈیا میں یہ بہت ہی کم ہے؛ تقریباً نہ ہونے کے برابر ہے۔ ہندوستان میں دو ایسے صدر تھے جو دلت تھے۔ ہم نے مرکزی وزیر دیکھے ہیں جن کا تعلق دلت سماج سے رہا ہے، بھلے ہی کم تعداد میں ہی کیوں نہ ہوں۔ کئی دلت یونیورسٹیوں کے وائس چانسلر رہے ہیں۔ کچھ دلت وزیر اعلی بھی بنے ہیں۔ ہندوستان میں دو دلت چیف جسٹس بھی ہوئے ہیں (اس سطح پر کوئی ریزرویشن نہیں ہے، لہٰذا میرٹ کا سوال نہیں ہے)۔

’’تاہم، قومی روزناموں کی دنیا سے ایک دلت چیف سب ایڈیٹرکو تلاش کرنے کی کوشش کریں۔ یا ٹیلی ویژن پر کسی دلت اینکرکو تلاش کریں، آپ کو طویل عرصہ تک اپنی تلاش جاری رکھنی پڑے گی۔ انہیں نمائندگی دینے کے خلاف ایک غیر واضح مزاحمت ہے۔ ان کے لیے کوئی کوٹہ یا ریزرویشن نہیں ہے۔ میڈیا کی منافقانہ حساسیت کا دہرا رویہ ہے۔‘‘

جب ہم جیسے لوگ ان حقائق کی دستاویز سازی کرتے ہیں تو ان معدودے چند لوگوں میں سے ہوتے ہیں جو نایاب ہیں۔ اور اس کے ہمراہ ایک ذمہ داری بھی آتی ہے۔

یہ اسٹوری سب سے پہلے تمل میں رپورٹ کی گئی تھی۔

ترجمہ نگار: شفیق عالم