स्कूल मं जात-पात के जरी

9 अगस्त, 2023. नांगुनेरी: एक ठन सरकारी स्कूल मं 11 वीं क्लास के दलित लइका चिन्नदुरई उपर, स्कूलेच के दबंग जात के संग पढ़ेइय्या मन हमला कर दीन अऊ वोला भारी घायल कर दीन. ओकर गलती बस अतक रहिस के वो अपन स्कूल मं होवत जातिवादी अतियाचार के खिलाफ आवाज उठावत रहिस.

12 फरवरी, 2025. शिवगंगई : “तुंहर जात के कोनो मइनखे के अतक हिम्मत के वो ह हमर आगू गाड़ी चलाही?” शिवगंगई सरकारी कॉलेज के बीएससी के तीसर बछर के लइका अय्यासामी उपर फटफटी चलाय सेती जानलेवा हमला करे गीस, अऊ वो ह कइसने करके अपन परान बचावत उहाँ ले भाग निकरिस.

10 मार्च, 2025 :अरियनायगीपुरम: कबड्डी के उभरत चैंपियन देवेंद्रराज ऊपर वो बखत बेरहमी ले हमला करे गीस, जब ऊंच जात के लोगन मन ओकर दलित टीम के जीत के विरोध करिन.

31 जुलाई,2025: अरुमुगमंगलम: आने जात के नोनी ले मया होय सेती कविन सेल्वगणेश के बेरहमी ले हत्या कर दे गीस.

तमिलनाडु के स्कूल अऊ कालेज मन मं जात-पात ला लेके भेदभाव खत्म नइ होय हवय, फेर ये ह अपन चोला बदल ले हवय. कुछेक इलाका मं ये जियादा सुधरे रूप मं लुकाय हवय, त दीगर कतको इलाका मं ये ह अभू घलो साफ नजर आथे.

कतको गांव मन मं आज घलो जात-पात के भेदभाव ह हर काम मं झलकथे. दलित अऊ पिछड़ा समाज के लइका मन ला स्कूल मं अलग बइठाय जाथे, ओमन ला अपमान वाले नांव धरके बलाय जाथे. हद तो तब हो जाथे जब गुरुजी मन लइका मन ले शौचालय साफ करवाथें.

स्कूल ले लेके सरकारी दफ़्तर मन तक,मंदिर लेके मीडिया संस्थान मन तक – हरेक जगा जात-पत के दबदबा गहिर ले धरे हवय. लोकतंत्र के जेन स्वतंत्र खंभा कहे जाथे –संसद, न्यायपालिका, मीडिया अऊ अफशरशाही- जात-पात ला खतम करे के छोड़ उल्टा वोला अऊ मजबूत करथें.

लोगन मन कहिथें, आजकल जात-पात ला कोन मानथे?” फेर सच बात त ये आय के जात के नांव मं हत्या, दलित मन के खिलाफ अतियाचार अऊ पिछड़े वर्ग के लइका मन ला दबाय अब तक ले चलत हवय.

हमन ला ये बखत जेन घलो घटत हवय वोला जरुर लिखे ला चाही. काबर के गर हमन ये नइ करबो, त ये इतिहास मिटा जाही- ठऊका वइसनेच, जइसने पहिली घलो अतियाचार के मारे लोगन मन के मया, वो मन के जिनगी, वो मन के लड़ई अऊ वो मन के विरोध ला मिटा दे गे हवय. एक नजर देखव के कइसने बौद्ध राज ला अंधकार युग कहे गीस, धन कइसने चोल राज के जात बेवस्था उपर सवाल करे के छोड़ ओकर गुन गाय जाथे. अतियाचार के मारे लोगन मन के इतिहास ला हमेसा दबाके राखे गे हवय.

आज घलो कतको जगा मं दलित वंचित लोगन मन ला पनही पहिरे, मन्दिर भीतरी मं जाय धन मरघट तक जवेइय्या सार्वजनिक रद्दा मं जाय के इजाजत नइ ये. अतियाचार के मारे जात के लइका मन ला दबंग जात के लइका मन अपमान करथें, वो मन ला स्कूल मं रांधे के हक नइ देय जाय, अऊ जब वो मन पढ़ई-लिखई मं आगू होवत जाथें त जान बूझ के वो मन ला फेल कर दे जाथे. गर वो मन मया मं पर जाथें, त वोला “फर्जी” धन “नाटक” के नांव देय जाथे – जेन ह 'लव जिहाद' के एक ठन जातिगत रूप आय.

बचपनाच ले मोला जात-पात के भेदभाव ले जूझे ला परिस. फेर मोला अपन जात्त ला लेके कोनो समझ नइ रहिस, जब तक के मंय अपन कैमरा के जरिया ले काम करेंय, अंबेडकर अऊ पेरियार ला पढ़े सुरु नइ कर देंय. तभिचे मोला ये समाज के समझ आय लगिस अऊ मंय अपन लोगन मन के संगे संग चले लगेंय.

अपन कालेज के बखत मं, मंय फुटबॉल टीम मं रहेंय. फेर मोर टीम के संगी मन मोला कभू घलो मैदान मं खेले नइ देवत रहिन. मोला बहिर बइठा के राखे जावत रहिस, अऊ मंय अपन बखत ला दीगर मन ला खेलत देखत गुजारत रहेंय. मोला अपन हुनर ला दिखाय के कभू मउका नइ मिलिस – गर मोला खेलेच ला नइ मिलही, त सिखहूँ कइसने?

भेदभाव अलग-अलग तरीका ले काम करथे. पहिली यह मोला मउका नइ दीस, अऊ ओकर बाद उहिच बात ला येकर बर करे गीस के मंय बने खेले नइ जानों.

देस (भारत) मं मया मं घलो रजनीति खुसरगे हवय. जात-पात के भेदभाव के खिलाफ लड़ेइय्या संगठन ‘एविडेंस’ के संस्थापक विंसेंट राज कहिथें के तमिलनाडु मं बीते आठ बछर मं जात के आधार ले 65 'ऑनर किलिंग' (इज्ज़त के नांव लेके हत्या) होय हवंय, फेर सिरिफ आठ ठन मामला मं दुखियारी मन ला नियाव मिले हवय.

दीगर मइनखे ला अपन बरोबर समझे, इही ह मइनखे के सबले बड़े धरम आय. फेर पता नइ हमर समाज ह कब अइसन सोच राखही. जब कभू कोनो वंचित समाज के मइनखे आगू बढ़थे, त ओकर मान-सम्मान ला ठेस पहुँचाय जाथे, ओकर सम्मान ला कुचरे के कोसिस करे जाथे अऊ ओकर घर-दुवार मं बुलडोजर चला दे जाथे.

दिसंबर 2022 मं, पुदुकोट्टई जिला के वेंगईवयल गाँव मं, ऊँच जात के कहे जावत कुछु लोगन मन दलित मन के बस्ती मं बने पानी के टंकी मं मइनखे के मैला डार दीन. ये घटना ह इलाका मं चलत जात-पात के भेदभाव के कतको दीगर चलन ला घलो उजागर कर दीस; ये मं इहाँ के चाय के दुकान मं चलेइय्या “दू गिलास के चलन” (दलित अऊ आने जात बर अलग-अलग गिलास) अऊ दलित मन ले इहाँ के अय्यनार मंदिर भीतरी जाय ले रोक सामिल हवय.

उहाँ सिरिफ 12 ठन दलित परिवार रहिथें, जेन मन अब वो घटना के बाद ले जूझत हवंय जेकर बर कोनो ला घलो जवाबदेह नइ माने गे हवय. वेंगईवयल तक ले हबरे बर 12 ठन पुलिस चौकी ला पार करे ला परथे,अऊ पत्रकार मन ला घलो ये बखत जाय के इजाजत नइ ये.

अतियाचार के मारे लोगन मन ला नियाव, हमेसा कतको लड़ई के बादेच मिलथे.

दिसंबर 2025 मं, जब मंय येला लिखत हवंव,त्रिची मं दू झिन सफईकर्मी के भूमिगत नाली के सफई करत परान चले गे. ये सिलसिला चलत हवय.

कविन सेल्वगनेश के 31 जुलाई, 2025 मं ‘इज्जत के नांव मं’ बेरहमी ले हत्या कर दे गे रहिस. वो बखत ओकर उमर सिरिफ 27 बछर रहिस. इंजीनियरिंग मं स्नातक होय के बाद, वो ह चेन्नई मं सॉफ्टवेयर इंजीनियर के काम करत रहिस. ओकर दाई-ददा, एस. तमिलसेल्वी अऊ चंद्रशेखर, तूतुकुड़ी जिला के एरल के आरुमुगमंगलम मं तेरकु माडा स्ट्रीट मं रहिथें.

कविन अऊ सुभाषिनी स्कूल के संगवारी रहिन, जेन मन मं आगू चलके एक दूसर ले मया हो गे. एक दिन, कविन अपन बबा के हाल चाल जाने बर ओकर ले मिले गे रहिस - सुभाषिनी उहिच अस्पताल मं सिद्ध डॉक्टर के रूप मं काम करत रहिस.

कुछु बखत बाद, ओकर भाई सुजीत उहाँ आइस अऊ वो ह केविन ले कहिस के ओकर दाई-ददा ओकर ले मिले ला चाहत हवंय. सुजीत ह वोला अपन फटफटी मं संग चले ला कहिस. बस दू गली आगू जाके सुजीत रुकिस, वो ह चाकू निकार के भारी बेरहमी ले केविन के हत्या कर दीस.

ये बात ला घलो धियान मं राखे जरूरी आय के कविन,सुभाषिनी अऊ सुजीत कतको बछर ले संगवारी रहिन. ओकर बाद घलो, जब सुजीत ह ओकर उपर हमला करिस, त वो ह कहिस, “पल्लर [अनुसूचित जाति] लइका हमर परिवार के नोनी ले मया करथे? अब जाके मोर दाई-ददा ला चैन मिलही.”

कविन के हत्या करे के पहिली, कहे जाथे के ओकर शब्द इहीच रहिस. सुजीत के दाई-ददा दूनोंच पुलिस अफसर आंय.

कविन इंजीनियरिंग ग्रेजुएट रहिस. समाज एक ठन जानलेवा भ्रम मं रहिथे के शिक्षा,रोजगार अऊ आर्थिक स्थिरता जात-पात ला खतम कर सकथे. कविन के मामला मं ये नइ होइस.

"कविन के मरे के बाद ले, मोला अइसने लागत हवय जइसने मंय ह एक ठन चलत फिरत लाश अंव. जात-पात के सेती होय हत्या ला अपन आँखि ले देख ले ह, हमर भीतर के कुछु जिनिस ला बदल देथे. ये ह तुंहर सुरच्छा, समझ अऊ इहाँ तक के तुंहर पहिचान ला घलो छीन लेथे. मंय अपन आप ला फिर ले खोजे के कोसिस करत रहिथों - ओही मइनखे बने के, जेन ह मंय ये हिंसा ला देखे के पहिली रहेंय.ये ह भारी मुस्किल आय,ये ह भारी दुख-तकलीफ वाले आय.

ये दुख सिरिफ कविन धन ओकर परिवार बर नोहे. ये दुख मोर वो हिस्सा बर घलो आय जेन ह अब जम्मो दिन बर बदल गे हवय. कविन सिरिफ एक झिन दुखियारा नइ रहिस; वो ह एक ठन अंजोर रहिस, एक ठन अइसने मयारू मइनखे जउन ह दूसर मन ला चिंता ले उबारे अऊ सुरच्छित मसूस करावय. वो ह असल मायना मं एक ठन बनेच बने मइनखे रहिस. अऊ इही बात ह ये गमी ला सहे के बाहिर बना देथे. ये दुनिया ह सिरिफ एक जान नइ खोय हवय; वो ह अइसने मइनखे ला गंवा दे हवय जेन ह दूसर मन के जिनगी ला अऊ सुग्घर बनावत रहिस.

ये ह तीसर ‘इज्जत के नांव मं हत्या’ जेन ला मंय अपन आंखि ले देखे हवंव. करीबन बछर भर पहिली, मंय पल्लीकरनई मं प्रवीण के हत्या के रिपोर्टिंग करे रहेंय. कविन के हत्या के घटना जइसने. दूनों के अतक बेरहमी ले हत्या करे गे रहिस के ओकर मन के महतारी मं घलो वोला चिन्हे नइ सकिन. ये सिरिफ हत्या भर नइ रहिस, ये त वो मन ला पूरा मिटाय के साजिस रहिस.

जेन बात ह मोर मन मं सबले जियादा बस गीस, वो आय केविन के दाई के हिम्मत. वो ह जेन सहन ले बहिर पीरा ला झेलत रहिस, ओकर बाद घलो वो ह जेन धीरज अऊ मजबूती ले अपन आप ला संभाले रहिस, वोला बताय नइ जाय सकय. हो सकथे एक झिन टीचर के रूप मं गुजारे अपन बखत ले वोला ताकत मिले रहिस जेकर ले वो ह मुस्किल घड़ी मं अपन आप ला संभाले रहिस. केविन के अंतिम संस्कार के बाद जब मंय ओकर ले मिले गे रहेंय, त ओकर घर एकदम सुन्ना रहिस. वो ह भीतरी ले पूरा टूट चुके रहिस – हव, ये सच आय –फेर संगे संग वो ह अपन बेटा बर, नियाव बर अऊ सच्चाई बर लड़े बर घलो ठान लेय रहिस.

वरिष्ठ पत्रकार अऊ संगी जयरानी, ​​जउन ह लंबा बखत ले जात-पात के अतियाचार के बारे मं लिखत रहे हवंय, वो ह मोला कहिथे, “हमर समाज एको कनी घलो बदले नइ यें, मितान, अब बस फरक अतक हवय के सोशल मीडिया अऊ सीसीटीवी के सेती कुछु सच उजागर हो जाथे.” वो ह बतावत जाथे के कविन के मामला- ठीक उडुमलाई शंकर के मामला जइसने- सिरिफ वीडियो सबूत सेती लोगन मन के नजर मं आइस. अइसने कतको अऊ घटना हवंय जेन ह ककरो नजर मं नइ आवंय. “अब तो ‘ऑनर किलिंग’ (इज्ज़त के नांव मं हत्या) एक तरीका के संस्कृति बनगे हवय,” वो ह कहिथे. “तीज-तिहार धन रीत-रिवाज जइसनेच, अब ये ह घलो आम बात होगे हवय.”

दूसर जात ले मया धन फेर समाज के नियम ला टोरे बर ये जेन “सजा” दे जाथे, वोला अब एक ठन समाजिक-सांस्कृतिक काम मान ले गे हवय. अनुसूचित जाति/जनजाति अधिनियम के बात होय धन कानूनी नतीजा,ये सब्बो ले वोमन के सोच मं कोनो फरक नहीं परय; वो मन के मानसिकता नइ बदलय.

सोशल मीडिया के आय के बाद, ये जातिवादी सोच खुलके उजागर होगे हवय. कम उमर के लइका मन, जेन मन पूरा जवान नइ होय हवंय, अपन बहिनी मन के लगवार मन ला जान ले मारे के बात बेफिकर होके करत रहिथें. इहीच ह वो डरावना असलियत आय, जेन मं हमन जीयत हवन.

तिरुनेलवेली सरकारी अस्पताल के कैज़ुअल्टी वार्ड मं हमेसा अफरा-तफरी मचे रहिथे. तमिलनाडु के दक्खिन जिला मन मं,खासकरके तिरुनेलवेली मं, दलित पढ़ेइय्या अऊ जवान लइका मन के जात-पात ला लेके अतियाचार होय के खबर कभू रूके के नांव नइ लेवत हवय. आईसीयू सरलग भरे रहिथे - हालत अतक नाजुक हवय.

जब मंय देवेंद्रराज ले मिले गे रहेंय, पहिलीच के जइसने पुलिस ह मोला रोक लीस. मंय वामपंथी पार्टी के संगवारी मन के मदद ले भीतर जाय सकेंय अऊ फोटो खींचेय. पुलिस ह मोर उपर सवाल के झड़ी लगा दीस, अऊ ऊहाँ रहे कम्युनिस्ट कार्यकर्ता मन मोला आगू जाय मं मदद करिन. अस्पताल मं तनाव अतक जियादा रहिस के वो दिन देवेंद्रराज के ददा ले बात करे संभव नइ रहिस. मंय मदुरई निकर गेंय अऊ दूसर दिन ओकर बयान लेगे बर लहूट आंय.

दुखियार के ददा, तंग गणेश, थूथुकुडी जिला के करूंगुलम तालुक मं, अरियानायकीपुरम के वल्लकुलम गाँव के बासिंदा आय. वो ह कहिथे, “मंय अपन बेटा ला बस मं बइठा के छोड़े रहेंय अऊ घर घलो नइ लहूटे रहेंय के मोला खबर मिलिस के लकठा के गाँव के तीन झिन ओकर उपर हमला कर दे हवंय. मंय तुरते उहाँ हबरके वोला अस्पताल ले गेंय. गर वो दिन मंय काम करे चले गे रहितेंय, त हालत अऊ घलो खराब हो सकत रहिस. हो सकथे मोर बेटा बांचे नइ सके रइतिस.”

वो ह 10 मार्च, 2025 मं देवेनराज उपर होय हमला के बात करत रहिस. येकर सुरुआत परोस के गाँव मं होय एक ठन कबड्डी मैच ले होय रहिस, जेन मं दलित टीम ह दूनों बरग मं जीत हासिल करे रहिस.

एक ठन दलित टीम की जीतेच ह जातिगत उपद्रव भड़काय बर भरपूर रहिस. जब देवेंद्रराज अपन परिच्छा देय बर जावत रहिस, त वो मन बस ला रोक लीन, वोला घसीटके बहिर निकारिन अऊ रोडेच मं ओकर उपर वार कर दीन. जब ओकर ददा ह मोला ये बात बताइस, मोर पोटा कांप गे. ये हिंसा कोनो खेल ला लेके नइ रहिस, ये ह अपन राज ला लेके रहिस. ये सोच के एक झिन दलित लइका कबड्डी मं दबंग जात के लइका मन ला हराय नइ सकय, ये जुलुमी हरकत के पाछू छिपे रहिस. अऊ सोचे के बात ये आय के देवेंद्रराज अपन इलाका के सबले बढ़िया खिलाड़ी मन ले एक के रूप मं जाने जाथे.

डॉक्टर ह मोला बताइस के ओकर मुड़ अऊ हाथ मं गहरा घाव रहिस, जेन मं एक ठन भारी गहिर रहिस. ओकर अंगुली मन थोकन कटा गे रहिस अऊ वोला बने होय मं दू ले तीन महीना लगही. डॉक्टर ह कहिस, “प्लास्टिक सर्जरी करे के पहिली अंगुली मन के बढ़िया तरीका ले जुड़े जरूरी आय.”

देवेंद्रराज अपन दाई-ददा के सबले बड़े संतान आय. “मंय एक ठन ईंटा-भट्ठा मं बूता करथों. मोर दू झिन लइका हवंय. देवेंद्रराज मोर सबले बड़े लइका आय; वो ह पलयमकोट्टई के एक ठन स्कूल मं पढ़त हवय. ओकर ले छोटे लइका मोर बेटी आय. मोर घरवाली अऊ मंय, दूनोंच रोजके भठ्ठा मं जाथन,” तंग गणेश कहिथे.

तहां ले वो ह अपन जिनगी के बारे मं धीरे ले बताय सुरु करिस: “ जब मंय कम उमर के रहेंय, त मोला जात-पात ला लेके कोनो गियान नइ रहिस. हमर कोनो घलो गुरुजी ह कभू अंबेडकर धन पेरियार के बारे मं नइ बताइस.10 वीं क्लास के परिच्छा के बाद, घर के माली हालत खराब होय सेती, मंय मोटर मेकेनिक के काम सीखे बर आईटीआई [वोकेशनल टेक्निकल ट्रेनिंग इंस्टीट्यूट]मं अरजी देंय. भर्ती के फीस 650 रूपिया रहिस, अऊ वोला घलो जुटाय मुस्किल रहिस. मोर महतारी ह दूसर मन ले उधार लेय रहिस.”

“मंय उहाँ कतको सपना देखे, हाथ मं पइसा धरे अऊ कुछु सीखे के इच्छा के संग गे रहेंय. फेर जब मंय उहाँ हबरेंय, त अफसर मन हमन ले दू तीन झिन के नांव ले के बलाइन अऊ कहिन के अब कोनो सीट खाली नइ ये. वो मन हमन ला बहिर निकार दीन अऊ दरवाजा मं ताला डार दीन. मंय घलो उहिच लोगन मन ले एक रहंय, मोला समझ नइ आइस के अइसने काबर होइस. मंय वो दरवाजा के मुहटा मं रोयें. वो मन कहिन के अइसने येकर सेती होइस काबर के मोर नंबर कम रहिस; फेर अगर ये सच बात रहिस, त मोला सुरु मं एडमिशन कार्ड दे काबर गे रहिस? ये सवाल ह कतको बछर तक ले मोला हलकान करत रहिस.”

जब हमन नांगुनेरी, तिरुनेलवेली हबरेन, त उहाँ के गली खोर सुन्ना रहिस. चिन्नदुरई के घर मं ताला लटके रहिस. परछी मं खून बगरे रहिस – जेन ह अब सूखागे रहिस – अऊ लहू सनाय हाथ के चिन्हा साफ दिखत रहिस. जइसने हमन घर मं पांव रखेन, लहू के बास वो बखत घलो आवत रहिस जइसने के चिन्नदुरई के खून हर जगा होय; हवा मं ओकर बास अभू घलो मसूस करे जा सकत रहिस.

ओकर स्कूल बैग मं हमन ला 100 फीसदी नबर वाले टेस्ट पेपर अऊ प्रिंसिपल के नांव एक ठन अधूरा चिठ्ठी मिलिस. चिन्नदुरई के एक ठन सरकारी स्कूल मं 11 वीं क्लास के लइका रहिस; वो ह मिहनती लइका रहिस जेन ह पढ़इ मं बढ़िया नंबर लावत रहिस. ओकर लगन के सेती ओकर टीचर मन अऊ प्रिंसिपल ह सहरावंय; प्रिंसिपल ह एक बेर स्कूल के गेट मं लइका मन ला जोरके के चिन्नदुरई के कड़ा मिहनत के सरहना करे रहिस अऊ आने लइका मन ला घलो ओकर जइसने बने बर उछाह भरे रहिस.

फेर दबदबा वाले जात के संग पढ़ेइय्या लइका मन ला ये बात नइ सुहाइस, काबर के चिन्नदुरई वंचित समाज ले आवत रहिस. इही ह बड़े कारन रहिस के ओकर उपर हमला करे गीस.

चिन्नदुरई ला अपन संग पढ़ेइय्या लइका मन के सरलग अतियाचार ले जूझे ला परिस, अऊ वो ह अक्सर घरेच मं रहय अऊ स्कूल जाय नइ भावय. आखिरकार, प्रिंसिपल ह दखल दीस, ओकर दुख के बात ला सुनिस अऊ कानूनी कार्रवाई करे बर एक ठन लिखित अरजी ओकर ले लीस. तउन दिन ऊंच जात के तीन झिन लइका मन के खिलाफ अनुशासनात्मक कार्रवाई करे गीस.

उहिच रतिहा, ऊँच जात के सात लइका – जेन मं तीन झिन नाबालिग अऊ चार झिन सियान रहिन - चिन्नदुरई के घर गीन. वो तीन झिन ले एक झिन ह हँसिया ले ओकर उपर हमला करिस अऊ वोला कतको वार करिस. ओकर बहिनी, जेन ह वोला बचाय के कोसिस करिस, वो ह घलो जख्मी हो गीस. ये जुलुम सोच ले बहिर रहिस. ये घटना ह स्कूल मन मं जात-पात के नफरत अऊ कोनहा मं परे वंचित समाज के लइका मन ला झेले ला परत अतियाचार ला उजागर करथे.

चिन्नदुरई अऊ ओकर बहिनी ला तिरुनेलवेली के सरकारी अस्पताल मं भर्ती कराय गीस अऊ भारी सुरच्छा मं आईसीयू मं राखे गीस. सुरु मं मोला ओकर ले मिले बर मना कर दे गीस, फेर राजनितिक पार्टी के लोगन मन के अऊ ‘अछूत-उन्मूलन मोर्चा’ के लोगन मन के संग भीतर गेंय, जेन मन ओकर हालचाल जाने बर गे रहिन. मंय देखेंय, ओकर हाथ,पांव अऊ मुड़ मं वार के चिन्हा रहिस; हलच मं होय आपरेसन के बाद ओकर जम्मो देह मं प्लास्टर चढ़े रहिस. मंय ओकर बने होय ला लेके भारी डेर्राय रहेंय, दरद के बाद घलो ओकर मुचमुचाय ह मोला थोकन आस दीस.

दरद झेलत घलो वो ह बोले बर तियार रहिस, चिन्नदुरई ह बताइस के ये हमला उहिच दिन होइस, जेन दिन वो ह अपन अधूरा आरजी प्रिंसिपल ला दे रहिस.

मंय वोला ढांढस बंधाय, कुछु फोटो खींचेंय, अऊ भारी मन ले उहाँ ले निकर गेंय. ओकर महतारी ले बात करे त अऊ घलो जियादा मुस्किल रहिस. वो ह अपन लइका मन ला अकेल्ला पाले पोसे अऊ पढ़ावत लिखावत रहिस – उहिच लइका मन के घर के काम बूता करके, जेन मन चिन्नदुरई उपर हमला करे रहिस. वोला भरोसाच नइ होवत रहिस के ये लइका मन अतक मारकाट कर सकथें. वो ह पूरा थक चुके रहिस अऊ कलेचुप रहिस. मंय थोकन बखत बाद उहाँ ले निकर गेंय.

ये हमला एक ठन कड़ा चेतावनी आय के स्कूल मन मं जात-पात के जरी कतक गहिर मं हवय.

“अंबेडकर अऊ पेरियार ला पढ़े सुरु करे के बादेच मोला समझ आइस के ये ह सिरिफ नंबर के बात नइ रहिस. मोला मोर जात सेती नकार दे गे रहिस.” आज घलो, स्कूल अऊ कालेज के लइका मन बर जेन फोटोग्राफी वर्कशॉप करवाथों, ओकर जरिया ले मंय नव पीढ़ी के कतको लइका मन ले मिलथों अऊ गोठ-बात करथों. मंय देखथों के लइका मन मं जात-पात ला लेके अभू घलो जागरूकता बनेच कम हवय जेन ह दुख के बात आय.

येकर ले घलो जियादा चिंता के बात आय के आरक्षण ला लेके वो मन के बिचार काय हवय. वो मन ले अधिकतर लोगन मन येला नकारात्मक नज़रिया ले देखथें. समाज ह वो मन के सोच ला अइसने ढंग ले ढाले हवय के वो मन ला लागथे के आरक्षण दलित अऊ आदिवासी लइका मन ला “खास हक” देथे. आज हमर नव पीढ़ी के लइका मन के इहीच हालत हवय.

हमर शिक्षा बेवस्था ये बिसय मं सही काम के लइक पाठ सामिल करे मं विफल रहे हवय. इहाँ तक के सरकारी लॉ कॉलेज मन मं घलो, अंबेडकर के बारे मं पढ़ई अब दुब्भर होगे हवय, अऊ ओकर बिचार ला लेके बात करे विवाद के बात मने जाथे. कतको वकीलाती पढ़ेइय्या मन ले गोठ बात करे के बाद मोला येकर गम होइस.

स्कूल अऊ कॉलेज मन के काम जिम्मेदार नागरिक तियार करे होथे, फेर ये जगा मन घलो जात पात के भेदभाव ले भरे हवय. भलेच पढ़ई के किताब मन मं ये लिखाय होय के “छुआछूत पाप आय,” येकर बाद घलो मंय कभू कोनो टीचर ला ये समझावत नइ देखेंय के असल जिनगी मं येकर काय मतलब हवय, धन सही समाजिक अऊ राजनीतिक बात मं येकर काय मायने आय.

बीते आठ बछर ले, मंय फोटोग्राफी के जरिया ले जात-पात ला लेके करे गे अतियाचार के दस्तावेज बनावत आवत हवंव. फ़ोटोग्राफ़ी वर्कशाप मं एससी अऊ एसटी लइका मन के संग काम करत, मोला वो मन के अनुभव अऊ सरलग गोठ-बात ले ये समझे के मऊका मिलिस के स्कूल अऊ कालेज मन मं वो मन ला कोन किसम के अतियाचार ले जूझे ला परथे.

पढ़ेइय्या नोनी मन के संग जावत, मंय ये देखे हवंव के हरेक वो लइका जेन ह जात ला लेके करे गे अतियाचार ले जूझे हवय, वोला अपन बात रखे के आजादी नइ होय सेती वो मन दिमागी तनाव अऊ मन मं ठेस झेले ला परथे. मंय खुदेच ये बात के गम करें हवंव. जब मंय 11 वीं क्लास मं रहेंय, त मोर संग पढ़ेइय्या संगवारी मन मोर उपर झूठा आरोप लगार रहिन के मंय कुछु अइसने करे रहेंय जेन ला मंय असल मं करेच नइ रहेंय. मोला समझ नइ आइस के अइसने काबर करे गीस, मंय कलप- कलप के रो परेंय. ये घटना ले मोरा भारी गहिर ले दुख पहुंचिस, अऊ मंय स्कूल जाय छोड़ देंय. स्कूल जाय के सोचे भर ले मंय डेर्रा जावत रहेंय. तब मोर महतारी ह दखल दीस, मोर डहर के बात रखिस अऊ समस्या सुलझिस.

बाद मं, कालेज के बखत मं, प्रशासन ह मोला 72,000 रूपिया के छात्रवृत्ति देय ले मना कर दीस. जब मंय येकर बेरे मं पूछेंय, त वो मन कहिन, हमर टेक्स के पइसा ले तुंहर खरचा काबर उठाये जाय?” अऊ मोला उहाँ ले भगा दे गीस. मोला त ये घलो पता नइ रहिस के ये छात्रवृत्ति मोर हक आय. लोगन मन के संग फोटोग्राफी के जरिया ले काम करे, वो अनुभव ले राजनीतिक जागरूकता हासिल करे, अंबेडकर अ ऊ पेरियार ला पढ़े के बादेच मोला समाज मं जात-पात के रूप अमझ मं आइस अऊ मंय अपन हक ला पहिचानेंय.

वंचित समाज मन के दस्तावेज बनाय अऊ राजनीतिक जागरूकता बढ़ाय बखत, मोला ये गम होइस के स्कूल मं मोर उपर लगाय गे झूठा आरोप अऊ मोर छात्रवृत्ति ल मोला वंचित करे जाय, ये सब्बो येकर सेती होइस, काबर के मंय अनुसूचित जात समाज ले रहेंय. स्कूल कालेज मं, जब घलो कोनो जिनिस गंवा जाथे, त अक्सर सबले पहिली शक वंचित समाज के लइका मन के उपर करे जाथे. झूठा आरोप सेती कतको लइका दिमागी तनाव मं रहिथें. आज घलो कतको अइसने खबर आवत रहिथे के टीचर ह सफईकर्मी के लइका मन ला शौचालय साफ करे बर मजबूर करथें.

स्कूल अऊ कॉलेज मन मं जात-पात के भेदभाव आज घलो हवय, अऊ हमर शिक्षा बेवस्था येला सुधारे मं नाकाम रहे हवय. देस (भारत) मं, हमर करा कभू घलो 'जाति-उन्मूलन' कार्यक्रम नइ रहे हवय. आज़ादी के 75 बछर मं, हमन जाति बेवस्था ला खतम करे के छोड़ वोला बचाय हवन.

जर्मनी ला देखव. नाजी राज के बाद, वो मन अपन अपराध मन ला छिपाइन नइ; फेर ओकर सामना करिन. शिक्षा सुधार अऊ ‘डी-नाज़ीकरण’ ह पूरा एक पीढ़ी ला नफरत भुलाय मं मदद करिस. लइका मन ला सिखाय गीस के वो मन अपन पुरखा के अपराध सेती माफ़ी माँगें. समाज अइसने ठीक होथे.

अनियाव के सामना करे बर भारी भावनात्मक ताकत के जरूरत परथे. जात-पात ला लेके घेरी-बेरी अतियाचार के डर ले कतको लइक चुप रहिथें अऊ अपन पीरा ला अपन भीतरी धरे आगू बढ़े के कोसिस करत रहिथें.

चिन्नदुरई अपन उपर होय जानलेवा हमला मं बचगे. बाद मं जब ओकर इंटरव्यू लेय गीस, त वो ह कहिस, जेन ह मोला चोट पहुंचाय हवय, वोला घलो बढ़िया ढंग ले पढ़े लिखे ला चाही अऊ बढ़िया पड़ मं पहुंचे ला चाही.” ओकर ये छमा ओ मासूमियत ला देखाथे,जेकर ये हिंसक समाज हकदार नई ये.

12 फरवरी, 20 25 मं शिवगंगई जिला के मनमदुरई तालुका के मेलप्पदवूर गाँव मं, एक झिन दलित जवान लइका उपर ऊँच जात के मरद लोगन मन बेरहमी ले हमला करिन. वो मन लइका ला छेंक लीन, जात ला लेके गारी दीन, अऊ कहिन, तुंहर जात के कोनो मइनखे के अतक हिम्मत कइसने होइस के वो ह हमर आगू गाड़ी चलावय?” अऊ ओकर बाद हथियार ले ओकर उपर हमला कर दीन.

दुखियार अय्यासामी, जेन ह शिवगंगई सरकारी कॉलेज मं बीएससी मं तीसर बछर मं हवय, वोला मदुरई के सरकारी अस्पताल मं भर्ती कराय गे रहिस. दू दिन बाद मंय ओकर ले मिले गे रहेंय. वो ह बताइस, “ वो मन कहिन, एक परईयार लइक बुलेट चलाही? हमर गली मं कूदाही? अतक हिम्मत होगे हवय तोर?’ ओकर बाद ओ मन हंसिया ले मोर घेंच मं वार कर दीन, फेर मंय अपन आप ला बचाय बर अपन हाथ उपर कर देंय अऊ मोला चोट लग गे. जब मंय अपन बुलेट गाड़ी छोड़ के भागेंय, त वो मन मोर उपर चाकू फेंकिन. किस्मत ले, मोर फोन ह वोला रोक लीस: नइ त, मोर गोड़ कटा जातिस अऊ मंय बचके निकरे नइ सके रइतेंय.”

ओकर भैय्या, पोनमुत्तु ह मोला बताइस के हमला करेइय्या मन बाद मं ओकर घर मं तोड़-फोड़ करिन. वो मन कहिन, “हमर तरक्की ले वो मन लंबा बखत ले जलत हवंय.”

हमर गोठ-बात बखत, अय्यासामी कहिथे के अब वो ह पढ़ई मं जियादा मिहनत करही अऊ बड़े अफसर बने ला ठान ले हवय.

कतको जिला मं, जब घलो दलित समाज आर्थिक धन समाजिक उन्नति करथें, त अक्सर वो मन ला हिंसक विरोध झेला ला परथे.

पत्रकारिता के क्षेत्र मं, दलित मन के आबाज सयदे कभू न्यूज़रूम तक हबरे सकथे, अऊ कोनहा मं परे वंचित समाज के बात सयदे कभू पहिली पेज मं रहिथे.आँकड़ा मन के मुताबिक, मीडिया मं फइसला ले के काम मं दलित मन के हिस्सेदारी शून्य हवय.

पी. साईनाथ ह ये बिसय मं फोरके लिखे हवय. वो ह कहिथें, “मोर मन मं ये बात ला लेके कोनो संदेहा नइ ये के भारतीय लोकतंत्र मं मीडिया सबले जियादा बहिष्कार करेइय्या संस्था आय. तुमन बाकि सब्बो क्षेत्र मं देख सकथो - विधायिका, न्यायपालिका, कार्यपालिका, शिक्षा जगत, धन कोनो घलो दीगर क्षेत्र. उहाँ दलित मन के कुछु न कुछु प्रतिनिधित्व ज़रूर रहे हवय, भ्लेच वो ह कतको घलो कमती होय. फेर मीडिया के क्षेत्र मं हालत 'कम' से कहूँ जियादक बदतर हवय. इहाँ तो दलित मन के प्रतिनिधित्व करीबन नहीं के बरोबर हवय. देस (भारत) मं दू झिन अइसने राष्ट्रपति होय हवंय जेन मन दलित रहिन. हमन अइसने केंद्रीय मंत्री घलो देखे हवन – भलेच वो मन के संख्या कम रहे होय- जेन मन दलित समज ले रहिन. कतको यूनिवर्सिटी मं कतको दलित कुलपति घलो रहे हवंय. कुछू अइसने दलित घलो होय हवंय जेन मन मुख्यमंत्री बनिन. देस (भारत) मं दो झिन अइसने मुख्य न्यायाधीश घलो होय हवंय जेन मन दलित रहिन (अऊ ये ह एक ठन अइसने पद आय जिहां कोनो घलो किसम के आरक्षण लागू नइ होवय; येकरे सेती, इहाँ काबिलियत धन मेरिट के सवालेच नइ उठे).”

फेर, अख़बार के दुनिया – मतलब राष्ट्रीय दैनिक मन – मं एके घलो दलित ‘चीफ़ सब-एडिटर’ खोज के देखव. धन टीवी मं कोनो दलित एंकर. तुमन ला बनेच लंबा बखत तक ले खोजे ला परही. वो मन ला प्रतिनिधित्व दे के मामला मं एक ठन अइसने निरदई विरोध लुकाय हवय, जेकर बारे मं कोनो बात नइ करय. इहाँ व् कोनो कोटा हवय, न कोनो आरक्षण. मीडिया के समाजिक संवेदनशीलता महज पाखंडी दिखावा आय.

जब हम जइसने लोगन मन ये असलियत ला लिखथन, त हमन त उन गिनती के लोगन मं सामिल हो जाथन – जेन मन बनेच कम हवंय. अऊ येकर संग आथे एक ठन जिम्मेदारी.

ये कहिनी मूल रूप मं तमिल मं लिखे गे रहिस.

अनुवाद: निर्मल कुमार साहू